Batboot Bread

سلام يا حلوين وبداية شهر حلوة عليكم ...قرب العيد كل سنة وانتو سالمين.... شو خططكم هاد العيد...حاسة كل الاردن مسافرة...احنا كنا ناويين بس اسعار الرحلات اشي بالعلالي بالمقارنة مع الايام العادية لهذا قررنا انه نعمل الستيكيشن واللي فيها جدول يومي لاماكن رح نروح عليها لاغراض التسلية والترفيه...
هاليومين بخلص هالجدول وبشارككم فيه..

هي فيديو ادائي لشهر 7 وبكرة ان شاء الله رح اشارككم بداية مشتريات شهر 8 والطبخ للشهر بفيديو واحد






الاداء عم بيكون منيح الحمد لله وهاد الاشي رح يساعدني باذن الله لتحقيق اول هدف بدي اعمله بالمطبخ....حزرتوا شو؟
الكاونترات....نعم...باذن الله بعد العيد وداعا لكاونترات الملوخية وجبت كاونترات ابيض فيه لمعة لاعطاء منظر روعة للمطبخ وهيك الامل...
فزي ما انتو شايفين بحاول كل شهر اعمل مشروع لزيز للبيت ومن المصروف ..بحوش وبعمل...هاي نصيحتي الكم 
اولا بتشعروا بالسعادة لانك ما ارهقت لا نفسك ولا زوجك بالمصاريف وثانيا بتحسي كانك انتي اللي عملتي هاد الانجاز بشطارتك وحكمتك... طبعا النية هلا من هون لاخر يوم بالعيد اني اعزل الخزاين من برة منيح منيح مشان حتى لو وسخوا وهمه بركبوا تكون الامور اهون...الموعد اللي اعطوني اياه هو تاني يوم بعد العيد واكيد رح اصورلكم مشان يكون هاد مشروع شهر 8
المشروع يتضمن كل الكاونترات، البانيل التحتاني والمجلى ولازم اجيب حنفية جديدة للمجلى...

نستعرض جدول وجبات شهر 7 وما تم عمله وما تبقى وبكرة ان شاء الله بشارككم منيو شهر 8

قائمة الوجبات المتبقية من الشهر الماضي:
برغر بشوربة البصل
شاورما لحم ودجاج
اجنحة دجاج

جانبي:
1 بيتزا
سمبوسك
ساندويشات تونا (راح منهم جزء وضل كم واحدة)

وجبات رح اعملها باذن الله هاد الشهر لنهاية 7:
ملوخية (لازم كل شهر)
اسباجيتي بالفرن وهاي كمان
صينية دجاج بالخضار وفريكة او اشي تاني جانبي
سلوبي جوز (الوصفة هون)
رز وعدس (الوصفة هون) تعتبر جانبي
فول باللبن
داوود باشا بالطحينة
محشي بطاطا
بازيلا ورز
سبانخ طبيخ (ما كان على المنيو بس لقيته بسعر ممتاز (رح شوفوا الفيديو بكرة)
طبخة سمك (لدورة اسماك)
طبخة بافخاد الدجاج (موجودة عندي من اول بالفريزر)
بريسكت (من دورة طبخ) عندي اللحمة بالفريزر

اطباق يوم الجمعة للفطور:
مفن زعتر اخضر وجبنة (الوصفة هون)
فرنش توست
وافل
ساندويشات فول (رح اعملهم فريش بخبز بيتي) والفول موجود بالمونة عملت الفول بس بدون خبز
فتة حمص (رح اعمل الحمص بس وعندي خبز مقلي)


اطباق تصلح للفطوراو عشا:
مفن موز (خلصنا نصهم)
معجنات جبنة
ساندويشات سلامي وجبنة
جارلك توست ببقية التوست (جنب المعكرونة)


رح احتاج اخبز: للاسف ما عملت اشي منهم
خبز برغر عدد 12 (اشتريت 6)
خبز صاج للشاورما
خبز عربي بيتي لساندويشات الفول

اشياء بالفريزر لازم امشيها:
ادامامي (بقية كيس)
حلقات بصل (بقية كيس)
جوافة مفرزة
كيس بروكلي (مع الدجاج)
خضار مشكلة للشوربة 

اشياء من البانتري ممكن تساعد :
برغل (بالسلطات)
حمص حب (بالسلطات وللفطور)
عدس

فزي ما انتو شايفين في وجبات لسة واغراض ممكن تترحل لشهر 8 وهاد يلي صار وهاد يلي رح تشوفوا منه ببوست الغد
وتابعوا بوست بكرة لاني رح احط جائزة بسيطة الكم رح يتم اختيار الفائزة بشكل عشوائي في البوست الي بعده  كنوع من الشكر الكم على دعمكم الي...

وصفة اليوم لخبز مشهور بالمغرب بيتميزبانه بينعمل على وش الغاز مو بالفرن وانا ضفت حبة البركة للطعامة
روعة للحشي وللتغميس


خبز بطبوط
المقادير:
كيلو طحين (انا استعملت 600 غم قمح و400 عادي ابيض)
ملعقة طعام خميرة
ملعقة صغيرة سكر
ملعقتين طعام حبة البركة
ماء دافئ للعجن
ملعقة ونصف صغيرة ملح

الطريقة:
تخلط المقادير الجافة
يضاف الماء بالتدريج للوصول الى عجينة طرية وغير دبقة
تترك لتخمر ساعة
تقطع الى كرات بالحجم الذي ترغبين به وتترك لترتاح 10 دقائق
تفرد الى ارغفة وتحمى مقلاة غير لاصقة ونخبز اول رغيف بالمقلاة وعندما يتحمر يقلب للجهة الثانية
نكمل الباقي ويقدم ساخن



Comments

Popular Posts