A day in my life plus cheese burger salad and white bean dip...YUM!!!

اتأخرت عليكم بالفيديو الثالث لتحضيرات الطبخ مرة بالشهر والسبب عطل فني باحد الفيديوهات واللي بيتطلب للاسف اني اعيد تصوير كم خطوة ورح اعمل هيك هاليومين ان شاء الله واحطلكم اياه.

مبدئيا عم بشتغل على مشروع لزيز للقعدة وان شاء الله رح اشارككم الفيديو بنهاية الشهر الجاي مش لاشي بس لانه عندي ميزانية محد\ة وهي 600 دينار لكل شي وحابة اني اورجيكم التقدم بالفيديو خطوة خطوة.

رح تشوفوا بفيديو اليوم واشارككم يوم من حياتي وهاد يوم حافل بس مرات بتكون الايام اقل ضغط ومرات اكتر بكتير...فعليا انا نهيت التصوير الساعة 4 العصر بس استمر شغلي لاخر الليل بعمليات تعزيل وضبضبة وتخلص من اشياء ما بدي اياها...كان النشاط 1000 هداك اليوم.

هي جزء من يومي كان فيو طلبية و3 مشاوير واكيد ترتيب للبيت وطبخ وشوفوا كيف الطبخ مرة بالشهر مع تنظيم جدول العمل بيساعد انه الواحد يلحق وينجز




فوعدتكم بالفيديو اقولكم بعض النصائح اللي بتخليكي جد تنجزي منيح:

1- الاسطوانة المكسورة ...نعن انه التخطيط...اكتر كلمة بضل اعيد وازيد فيها...من اهم خطوات الانجاز التخطيط المسبق... بيومي اللي شفتوه بالفيديو تخطيطي قبل بليلة لشو بدي اعمل ساعدني اعمل زي خريطة براسي شو بدي اعمل واديه رح ياخد وقت 

2- الطبخ مره بالشهر....سحر يا جماعة ما بندم ابدا اني جربت واكيد اني رح استمر...

3- العمل بشكل متوازي وهاد كتير بيوفر وقت وعشان يمشي صح لازم تكوني مخططة (نقطة 1) لانه زي ما شفتوا بالفيديو كنت بجلي وبعمل طلبية (شغالة على طبقية وهمه حشوة اللوتس وشوي الباذنجان) وبصور الفيديو والغسيل بالغسالة وكله ماشي مع بعض بشكل متوازي

4- التزمي بخطتك قدر الامكان وكوني مستعدة لبعض المفاجئات مو اخر الدنيا :)

وخلينا نشوف كيف ادائي لغاية اللحظة من وجبات الشهر ...

لمنيو بشكل عام لهاد الشهر والاسبوع الاول من شهر 7 هي: المشطوب يعني تم
1- ملوخية (عندي كل اغراضها)
2- فاصوليا (عندي كل اغراضها )
3- مجدرة (عندي كل الاغراض بعد ما جبت بصل)
4- اسباجيتي (تفرزت)
5- لازانيا (تفرزت) من بواقي باكيت لازانيا بالمونة
6- ريش بالخضار (انطبخت)
8- شاورما لحمة ودجاج (انتقعت وبالفريزر) بتلاقوا اللينك لشاورما اللحمة تحت والدجاج بحطلكم اياها ببوست خاص
9- بيتزا ومنقوشة (4 بيتزا ومنقوشة) تفرزت
10- كباب هندي (بالفريزر)
11- لحمة معصجة (ممكن لمعكرونة بالبشاميل) انطبخت (عملتها لوصفة السلطة بهاد البوست)
12- تشيلي (اكلناها ب 6/11)
13- فيلادلفيا ستيك ساندويش (اتفرزت)
14- فتة دجاج (اكلناها ب 6/10 ووصفتها بهاد البوست)
15- فطيرة اللحم والخضار مع البطاطا
16- برغر بالبصل الفرنسي (رح احطلكم الوصفة ببوست)
17- جوانح الدجاج بالباربيكو صوص مع قالب المعكرونة بالجبنة
18- افخاد الدجاج تيرياكي 
19- فخدة خروف مع الارز
اخر 3 طبخات رح ينطبخوا فريش لانه عندي اغراضهم مفرزة اصلا 

جانبي
1- برغل بدفين (انطبخ) الوصفة هون
2- ساندويشات تيركي وجبنة (للعشاء) اتفرز
3- ساندويشات تونا
4- كاساديا البطاطا (من بواقي البطاطا من فطيرة اللحم)
5- سمبوسك لحمة وجبنة 

مخبوزات
مفن موز (اتفرزت ) طاااروا
براونيز (اتفرزت)
خبز برغر
خبز فرنسي (للجارلك بريد)
خبز هوت دوغز تم اضافته
خبز صاج للشاورما (تم اضافته)

مكملات
صوص سلطة سريعة  (بالثلاجة)

وجبات رح تطلع من البواقي
1- تشيلي دوغز من بواقي التشيلي
2- سلطة من بواقي البرغل بدفين (رح اشارككم الوصفة) 

حلويات باردة (كلها رح اشارككم وصفاتها باذن الله)
بوظة الفانيلا
بوظة الفستق الحلبي
بوظة او سوربيه البطيخ
كعكة بوظة البطبخ
اسكيمو القهوة 

شايفين هاي العملية اديش بتشعرك بالانجاز وبنفس الوقت بتكوني عارفة انتي وين واقفة...اليوم 23 الشهر والطبخة مجدرة وهيني شطبتها فوق...
الباقي  9 طبخات مع انه البيتزا على مرتين ففعليا 10.... مش بطال ابدا وانا جبت باذنجان صغير بدي اعمله طبخة (بتيري ما قاومت مع انه مش على المنيو) فهي  11طبخة وباقي 13 يوم لاخر اول اسبوع من شهر 7 (نهاية التحدي) 7/6  :)

ونشوف وصفات اليوم :)

تغميسة لزيزة وصحية وسهلة بالفاصوليا البيضاء
تغميسة الفاصوليا البيضاء
المقادير:
علبة فاصوليا بيضاء مصفاة ومغسولة
سن ثوم مهروس
عصير ليمون حسب الرغبة
روزماري (حوالي ملعقة طعام فريش او 1/2 ملعقة صغيرة مجفف)
1/4 كوب زيت زيتون

الطريقة:
تطحن المكونات معا للحصول على قوام للتغميسة وتقدم مع الخضار


والوصفة الثانية خرافية قليلة عليها بتشهي  لكل محبي البرغر ..كانك عم تاكلي بيج ماك بس بدون الخبز بتجنن

سلطة التشيز برغر
المقادير:
250 غم لحمة بيف معصجة مع بصل وملح وفلفل اسود
1/2 راس خس مفروم
حبتين بندورة مفرومة مكعبات وسط
15 شريحة مخلل بالشبت (مهم للحصول على نفس طعم البيج ماك) مفروم مكعبات
150 غم جبنة شدر مبشورة
بصلة بيضاء وسط مفرومة مكعبات
للصوص:
صوص البيج ماك موجودة بالمدونة بهاد الرابط

الطريقة:
تخلط معا عند التقديم ....بتشهي





Comments

  1. يعطيكي العافية منال حبيبتي بدّي اسال المكنسة من وين جبتيها بتنصحي فيها؟؟

    ReplyDelete

Post a Comment

Popular Posts