2nd vlog on my once a month cooking challenge and chicken fatteh


تحدي الطبخ مرة واحدة لكل الشهر ما كان مثل ما بدي بالزبط...يعني الاصول انه يوم واحد بس وانه اكون جايبة كل الاغراض اللي بتلزمني بعد ما كتبت المنيو وانه اكون متفرغة تماما للطبخ بس فعليا بما اني دمجت الخبز للحلويات مع الموضوع فمش سهل كتير عشان هيك تقسم معي التحضير ل 3 ايام فعليا 

الاشي المهم هو اني حسيت اني ما وضحت الاشياء بشكل جيد بالبوست الاول...اللي بيهمكم تعرفوه هو المنيو (شو انعمل منها للفريزر كامل وشو تحضر اغراض اله وشو الاشياء اللي عندي من اول وساعدت)



المنيو بشكل عام لهاد الشهر والاسبوع الاول من شهر 7 هي:
1- ملوخية (عندي كل اغراضها)
2- فاصوليا (عندي كل اغراضها )
3- مجدرة (عندي كل الاغراض بعد ما جبت بصل)
هدول الطبخات طبخ بيومها
4- اسباجيتي (تفرزت)
5- لازانيا (تفرزت) من بواقي باكيت لازانيا بالمونة
6- ريش بالخضار (انطبخت)
8- شاورما لحمة ودجاج (انتقعت وبالفريزر) بتلاقوا اللينك لشاورما اللحمة تحت والدجاج بحطلكم اياها ببوست خاص
9- بيتزا ومنقوشة (4 بيتزا ومنقوشة) تفرزت
10- كباب هندي (بالفريزر)
11- لحمة معصجة (ممكن لمعكرونة بالبشاميل) انطبخت
12- تشيلي (اكلناها ب 6/11)
13- فيلادلفيا ستيك ساندويش (اتفرزت)
14- فتة دجاج (اكلناها ب 6/10 ووصفتها بهاد البوست)
15- فطيرة اللحم والخضار مع البطاطا
16- برغر بالبصل الفرنسي (رح احطلكم الوصفة ببوست)
17- جوانح الدجاج بالباربيكو صوص مع قالب المعكرونة بالجبنة
18- افخاد الدجاج تيرياكي 
19- فخدة خروف مع الارز
اخر 3 طبخات رح ينطبخوا فريش لانه عندي اغراضهم مفرزة اصلا 

جانبي
1- برغل بدفين (انطبخ) الوصفة هون
2- ساندويشات تيركي وجبنة (للعشاء) اتفرز
3- ساندويشات تونا
4- كاساديا البطاطا (من بواقي البطاطا من فطيرة اللحم)
5- سمبوسك لحمة وجبنة 

مخبوزات
مفن موز (اتفرزت )
براونيز (اتفرزت)
خبز برغر
خبز فرنسي (للجارلك بريد)

مكملات
صوص سلطة سريعة  (بالثلاجة)

وجبات رح تطلع من البواقي
1- تشيلي دوغز من بواقي التشيلي
2- سلطة من بواقي البرغل بدفين (رح اشارككم الوصفة) 

حلويات باردة (كلها رح اشارككم وصفاتها باذن الله)
بوظة الفانيلا
بوظة الفستق الحلبي
بوظة او سوربيه البطيخ
كعكة بوظة البطبخ
اسكيمو القهوة 

نظرة سريعة على المنيو بتشوفوا تنوع بين ساندويشات وطبخ ورز ومعكرونة وطبعا رح يكون في سلطات وحلويات واكيد رح يكون في بزاقي بايام وبالتالي رح تكفي فترة التحدي كامل وبالفيديو القادم رح احطلكم ادائي التسوقي

قبل ما ابدا بالوصفة خليني اقولكم انه من اروع حسنات هاد النظام:
1- توفير الوقت والجهد (بتطبخي مرة واحدة وبقية الشهر اشياء بسيطة وبالتالي بتقدري تعملي اشياء تانية)
2- توفير فلوس (كل اللي بتشتريه بتستخدميه)
3- نظام المنيو رح يريح مخك طول الشهر ويطلع معك وجبات ممتازة واشياء بتنفع للعشاء وحلو
4- ريحة البيت بتضل حلوة...يعني يزم واحد بتعبى ريحة بصل وطبخ بس بعدين خلص وانتي كمان ما بتصير ريحتك بصل كل يوم
5- الجلي (اديش رح ترتاحي طول الشهر من الجلي وخاصة الطناجر والمفارم)

اصعب الاشياء بالنظام:
1- التعب بس كل ما تفكري بانك رح ترتاحي طول الشهر معلش
2- عصر المخ عدة ساعات لتعملي المنيو بس برضو معلش شوي شوي بتصيري خبيرة
3- الجلي كتير بس برضه معلش هو هاليوم وبعدين بترتاحي
وسلبية اخيرة هي انه اكلنا العربي مش كتير بينفع معه هاد النظام لانه مش اظرف اشي يتفرز بس الشهر الجاي ان شاء الله رح نعمل اشياء تسهل الموضوع فخليكم بالجو...

اخيرا بدي اقول انه اللي بيجي عندها ناس كتير ممكن تخصص يوم لاشياء تنفعها بالفريزر زي الكبة والششبرك والسمبوسك والمعجنات
وممكن تخصص يوم لخبز المفن والكيك والبسكوت وهكذا

لسة الشهر باوله وحاسة حالي طاير عقلي بانجازي واعتقد اني رح اعتمد هاد النظام على طول ان شاء الله

وصفتنا لليوم هي فتة الدجاج وطريقتي سهلة وبسيطة ولزيزة



فتة الدجاج
المقادير:
3 صدور دجاج بعظمها (ممكن اي قطعة من الدجاج ومهم العظم بيعطي نكهة)
لسلق الدجاج:
ورقة غار، عود كرفس، قطعة قرفة
5-7 حبات هيل حب
فلفل اسود حب
بصل
حبتين مستكة

للفتة:
4-5 ارغفة خبز عربي وسط مقطعة ومقلية وممكن محمصة
كيلو لبن مع ملعقة طعام طحينة وملح وفلفل اسود وحبة ثوم مهروس (مخلوطين سوا)
2 كاسة ارز مصري منقوع
رشة هيل مطحون

للتزيين:
لوز مقلي
بقدونس مفروم



الطريقة:
يسلق الدجاج مع المطيبات لينضج
يطبخ الارز بمرق الدجاج مع الاحتفاظ بكوب مرق لتسقية الخبز
في صحن التقديم يفرد الخبز ثم قطع الدجاج مفسخة بدون عظم ثم رشة هيل
يوضع طبقة من الارز ثم اللبن بالثوم والطحينة
تزين حسب الرغبة باللوز المقلي والبقدونس وممكن رمان


Comments

  1. Wow am overwhelmed before seeing the video 💕💕

    ReplyDelete

Post a Comment

Popular Posts