Yogurt from scratch and a couple of dishes

عمركم جربتوا تعملوا لبن بالبيت؟ انا شخصيا كنت اعاني وانا باميركا لانه اللبن اللي هناك مش زي اللبن تبعنا واقرب اشي النا هو اللبن اليوناني... وكان مش دايما متوفر ونسبيا اغلى فقررت اني لازم اعمل لبن بالبيت ومن يومها وانا كل ما بقدر بفضل لبن البيت لاسباب كتير منها انه ازكى وما في اي مواد حافظة ومنها انه اوفر...

طريقتي سهلة وبسيطة جدا وبيطلع اللبن بيشهي وسميك بس في قواعد مهمة لازم الالتزام فيها منها:
1- اختيار الروبة الممتازة (انا استخدمت لبن اليوم البلدي) بيجنن وسميك وحامض
2- درجة الحرارة قبل وضع الروبة (اذا عند ميزان بعد غلي الحليب لازم تكون حرارة الحليب 45 درجة او بتحطي اصبعك الصغير بالحليب لتتأكدي ان بيتحملها للحرارة اذا عديتي لل 10)
3- عدم تحريك الحليب مطلقا بعد اضافة الروبة
4- تركه ملفوف بمكان دافئ على الاقل 12 ساعة بالصيف ل 16 ساعة بالشتاء (انا استخدمت البقجة من بقجتي طلع روعة)

ترويب اللبن
المقادير:
2 لتر حليب
1/3 كوب لبن للروبة
3 ملاعق طعام مليئة حليب بودرة

الطريقة:
يخلط الحليب مع الحليب البودرة ويغلى على النار
يترك ليبرد ويصل الى 45 درجة (انا حطيته على الكاونتر اللي بدي اخمره عليه يبرد مشان اضيف الروبة والفه فورا)
بس يوصل ل 45 تضاف الروبة ولا يحرك ابدا ابدا ابدا
غطية ولفيه بهدوء وما تحركيه
بعد الوقت بتفتحي عليه بيكون جمد بتحطيه بالثلاجة يبرد واستمتعي باحلى لبن

طبعا محسوبتكم بتحب اكلات اللبن كتيييييييير...اليوم رح اشارككم بطريقتي بالشاكرية وهي اكلة باللبن مشهورة ببلاد الشام خاصة سوريا وفلسطين وبتتسمى بلبن امه او معقود لبن وتختلف تماما عن المنسف... فيها بصل ولحمة والبصل هو سر نكهتها الرائعة...والطبق الثاني هو شوربة اللبن التركية الياييلا....عملتها مرتين على سناب تشات وبتشهي...
وانا بتركيا بشهر واحد لقيت بالسوبرماركت هناك باكيتات جاهزة لهاي الشوربة الحمد لله اني جبت 1 بس اجربه لانه ما اله دخل بالطعم اللزيز جدا وفرق شاسع عن اللي بتنعمل من الاساس بالبيت وما بالكم لو اللبن بيتي...اصولها فيها بيض بس انا والبيض بينا عداوة بهيك قصص وكمان اصولها بالرز فانا استعملن رز بايت وممكن تسلقوا رز عادي وكمان ممكن تعملوها بالشوفان السريع التحضير.

برمضان اللبن من اطيب الاشياء لانه بيبرد على القلب واحلى اشي فيه انه سهل وخفيف على الجيبة...



شوربة الياييلا التركية
المقادير:
كيلو لبن بلدي حامض
ملعقة ونصف نشا
1/4 كوب ماء
كوب ونصف ارز بايت ابيض مطبوخ او بتساقي رز وممكن تستعملي كوب شوفان
ملح وفلفل اسود
2 ملعقة طعام زبدة
ملعقة صغيرة نعنع ناشف
ماء مغلي
مكعب مرق دجاج

الطريقة:
يطبخ اللبن مع خليط النشا والماء على النار ليغلي
يضاف مكعب المرق والارز ويحرك وسيسمك قليلا (اذا كان سميك جدا يضاف الماء المغلي للتخفيف)
تذاب الزبدة بمقلاة على النار ويضاف النعنع
تسكب على وجة الشوربة وتقدم


اما الشاكرية فمن الاكلات المحببة عنا بالبيت واليكم الطريقة



الشاكرية
المقادير:
1/2 كيلو لحم خروف بعظمه او بدون
لتطييب مرق سلق اللحم: ورقة غار/ عود كرفس، 1/2 جزرة ضغيرة، 10 حبات فلفل اسود حب، 3-4 اعواد بقدونس/ بصلة صغيرة
ماء
كيلو لبن بلدي نوع سميك او نعاج
1/2 1 ملعقة طعام ممتلئة نشا
1/4كوب شنينة او ماء
مكعب مرق دجاج
بصلة كبيرة مقطعة شرائح رفيعة
2 ملعقة طعام زيت نباتي
ماء مغلي 
ملح وفلفل اسود



الطريقة:
لطبخ البصل يقلب لمدة دقيقتين بالزيت ثم نضع الماء المغلي (كمية لغمره فقط) ويترك ليسلق ويصبح طري 
يصفى ويوضع جانبا
يسلق اللحم بالماء مع المطيبات لينضج ويصفى
نضع اللبن بقدر على نار عالية ونحرك
نضيف خليط النشا والشنينة او الماء ونستمر بالتحريك ليغلي
نضيف القليل (حوالي كوب) من مرق اللحم (الباقي ممكن تفريزه اشوربة) ونضيف مكعب المرق وقطع اللحم
نضيف البصل (سر نكهة الشاكرية) 
نضبط الملح والفلفل
تقدم مع الارز الابيض والقلوبات



Comments

Popular Posts