Monday, December 25, 2017

The Delicious Sloppy Joes




We are coming close to closing on 2017...what a year!!! Full of joyful moments and sad ones, achievements and failures, ambitions achieved and others gone with the wind...Oh well!!! This is life!!! I do wish you happy holidays and that 2018 will be full of joy, more goals achieved and less hiccups ... 

I remember putting so many goals for 2017, some which I have managed to achieve and some that I didn't or ended up putting off due to certain conditions that arise unexpectedly. Reflecting on 2017, I have managed to have a new start again in my business; I finally decided that I don't belong to an office, or a job where I have to punch in and out. I enjoyed being around some people in my last job yet it was not fulfilling enough. Something was missing!! That is when I made my decision to leave and start again on "Manal's Bites". Today the business is very promising and flourishing "Alhamdulellah" and new goals are set for 2018 which I hope you will be able to witness and see with me with Allah's will. 

I have stopped writing in English for a while on the blog...boy does it take time to write posts let alone in two languages...yet I feel that I owe this to my followers who don't know Arabic...so Goal No. 1 for this blog is to translate all the recipes into English to enrich the blog and to bring it back to life. I am also planning while doing that (boy will it take time!!!) to try to take new photo shoots for old photos. I am not planning to remove the old photos as I am very proud of how far I have come since I started this blog. Styling, photography....etc. So please bare with me as I do this and pray for me that I will be able to achieve this. 

The last recipe for this year is a delicious sandwich that is so popular in this house hold that it removed the burger on the side. It is easier to prepare and so delicious..its the famous Sloppy Joes.



Sloppy Joes 
Ingredients:
1/2 kilo ground beef
One medium onion finely chopped
1 green bell pepper, chopped (I used mixed green and red); you can use chili peppers if you like it spicy
1/2 tsp garlic powder
1 tsp mustard
3/4 cup catchup
1/4 cup bbq sauce
3 tsp brown sugar
Salt, black pepper

Directions:
Brown the beef
Add onion and pepper and cook till the onion and pepper are a bit tender
Season to taste
Add the rest of ingrdients
Cook for 5 min on low heat
Serve over burger buns
(I choose mini ones)

  ايام بتفصلنا عن العام الجديد...بتمنى انه يكون عام مليان بالسعادة والانجاز والرضا لجميع متابعيني وقراء هالمدونة...وبتمنى انه يكون عام مليان بالتغييرات الايجابية اللي بتحبوا تصير بحياتكم...كتير بنحكي عن الاهداف للسنة الجديدة..اشي بيتنفذ واشي للاسف بيتعثر وما بيشوف النور...اهداف ما كانت على البال ولا الخاطر برضه بتحقق واشياء مش متوقعة بتصير....هاد حال الدنيا ...

بتذكر اديش حطيت اهداف لل 2017...اشي تحقق واشي لا بسبب ظروف معينة....كتير اشياء صارت هالسنة اهمها اني قررت انه عالم العمل المكتبي وبالرغم من اني كنتا ممتازة فيه..مش الي..اني بطلت قادرة اكون تحت حكم قوانين شركة او جهة ..مدير او تسجيل دخول وخروج...انه حرية الاختيار والقرار اشي لا يقدر بثمن...انه البزنس تبعي "Manal's Bites" لازم يكون هو شغلي الشاغل ولازم يكون مصدر الهامي وتفكيري....انه شغفي وحبي للي بعمله (واللي هو اساس هوسي بكل الاكل وما يتعلق به) اشي مال الدنيا ما بشتريه ولا بيعوضه... عشان هيك قررت اني اترك شغلي المكتبي بشهر 4 واني ارجع اوقف على رجلي مرة تانية واثبت لنفسي اولا مين انا وشو بقدر اكون...والحمد لله الامر عم تمشي بشكل ممتاز وباذن الله الجديد والاجمل قادم...دعواتكم....

محبتكم ودعمكم الي لا يقدر بثمن...شكرا لكل متابعة او متابع لسة بيمر على المدونة ليشوف كل جديد..لكل شخص بعتلي كامة تشجيع ودعم...بحبكم وبقدركم من كل قلبي وبتمنى ربي يقدرني اكون عند حسن ظنكم دائما...

اخر وصفة على المدونة لسنة 2017 هي وصفة ساندويشة قدرت تتحدى البرغر ببيتي وتزيحه على جنب لانها زاااكية وسهلة التحضير...وصفة السلوبي جوز...



سلوبي جوز
المقادير:
1/2 كيلو لحمة بيف مفروم
بصلة مفرومة ناعم
فليلفة خضراء مفرومة
1/2 ملعقة صغيرة بودرة الثوم
ملح، فلفل اسود
ملعقة صغيرة ماسترد
3/4 كو كاتشب
1/4 كوب صوص باربكيو
3 ملاعق صغيرة سكر بني

الطريقة:
يحمر البيف لينضج
تضاف البصلة والفليفلة وتقلب لتذبل قليلا
يضاف الملح والفلفل الاسود وبقية المكونات وتقلب وتطبخ على نار هادئة 4-5 دقائق
تقدم فوق خبزالبرغر


Sunday, December 17, 2017

خبز الشعير السريع وشوربة الكراب بالبطاطا




الشتاء تأخر السنة...مش البرد...المطر....الله يفرجها علينا وان شاء الله تشتي لانه جد شو رح يصير فينا اذا ما شتيت...ومع انه الجو مو شتاء لسة بس البرد اكيد بيخلي الواحد بده ياكل اشياء سخنة زي صحن شوربة لزيز مع قطعة خبز الز...

وصفتين اليوم رح اشارككم فيهم سعرهم لطيف ومناسب للجيبة ولزيزين

الوصفة الاولى لمحبي البحريات وهي شوربة الكراب (السلطعون) بالبطاطا...ممكن استخدام الجمبري للي بيحب



شوربة الكراب بالبطاطا
المقادير:
2 ملعقة طعام زبدة
بصلة مفرومة ناعم
1/4 كوب طحين
حبة بطاطا مقطعة مكعبات
2 اصبع كرفس مفروم
علبة 250 غم كراب مقطع مكعبات
كوب حليب
ملح، فلفل اسود
3 كوب مرق دجاج
كوب جبنة مونتراي جاك
(يمكن اضافة الفلفل الحار او الذرة للشوربة)
ممكن الاستغناء عن الاكل البحري تماما ووضع دجاج مسلوق او ابقاءها بدون لحم



الطريقة:
تخلط البطاطا والكرفس مع مرق الدجاج وتسلق على النار
في قدر اخر تذاب الزبدة وتذبل البصلة
يضاف الطحين ويقلب
يضاف الحليب وتقلب ليسمك تضاف طل كمية البطاطا والكرفس والمرق وتقلب
تملح وتبهر
يضاف الكراب والجبنة
تحرك لتذوب الجبنة وتقدم




اما الخبز فهو من صنف الخبز السريع (يعني بالبيكنج باودر مش بالخميرة)


خبز الشعير السريع
المقادير:
1/2 3 كوب طحين
ملعقة طعام بيكنج باودر
ملعقة صغيرة ملح
2 ملعقة طعام سكر
علبة ماء الشعير بدون نكهة او ماء الصودا
بيضة
اصبع زبدة مذاب
ملعقة صغيرة خل
اختياري : نكهات مقل القوم المعمر المفروم او البصل الاخضر او الاعشاب)
جبنة مبسورة للوجة (شدر)

الطريقة:
تخاط الزبدة والبيض والخل معا 
تخلط المواد الجافة معا
تضاف المواد السائلة للجافة وتضاف علبة ماء الشعير وتحرك لملعقة خشبية لتتجانس
تضاف النكهة هنا في حال الرغبة باضافتها (انا اضفت ثوم معمر)
تسكب بقالب الخبز المدهون والمبطن بورق الخبز 
ترش بالجبنة في حال الرغبة باضافتها
تخبز على 180 في فرن محمى سابقا من 40-50 دقيقة ليجتاز اختبار الكيك
يبرد على سلك معدني


كعكة الشوكولاتة بدون بيض


كتير من الناس بتعاني من حساسيات مختلفة بالاكل...اشي من القمح، اشي من المكسرات، اشي من البيض..الخ واكيد مش ساهل دايما نلاقي وصفات مناسبة وتطلع زاكية اللي تناسب احتياجات الدايت لاصحاب الحساسيات...مشان هيك اذا لقيت وصفة وعجبتني اكيد رح اشاركمم فيها لتعم الفائدة..انا شخصيا عندي حساسية من البيض...مش حساسية فعلية بقدر ما هي حساسية من الزنخ وبحاول قدر الامكان اني اتجنب الوصفات اللي فيها بيض كتير...

وصفة اليوم هي لكعكة شوكولاتة تضاهي الكعكات اللي ببيض وكمان لونها حلو وطعمها شوكولاتة بامتياز


كعكة الشوكولاتة السهلة بدون بيض
المقادير:

1/2 1 كوب الطحين
كوب سكر
1/4 كوب كاكاو
1/2 ملعقة صغيرة ملح
ملعقة صغيرة كربونات الصوديوم
ملعقة صغيرة فانيلا
ملعقة صغيرة خل
1/3 كوب زيت
كوب ماء ساخن
1/2 كوب شوكولاتة شيبس (اختياري)

الطريقة:
يحمى الفرن الى  350 درجة (180 مئوي)
تدهن صينية مربعة 8 انش ب 8 انش (حوالي 20 سم) وتبطن بورق زبدة
تخلط المواد الجافة عدا السكر
تخفق بقية المواد عدا الماء
يضاف خليط الطحين للمواد السائلة
يضاف الماء مع الخفق
تسكب بالقالب وتخبز من 25-30 دقيقة لتجتاز اختبار الكيك






Monday, December 11, 2017

شوربة العدس الاصفر على الطريقة التركية وسلطة الشومر المشوي


اديش كل انسان فينا عبارة عن طبقات وطبقات من اشياء وخبرات ومواهب وحتى مشاعر ما بنعرفها...كل يوم بكتشف اديش في اشياء ما بتعرفوها عني...وكل ما احكي اشي لحد فيكم بحكم انه سأل او اقترح بينصدم وبيستغرب وطبعا بتصير تنزل كميات المدح الهائلة من اني اديش مثقفة ومتعلمة وووو.... طبعا شكرا جزيلا على كل كلمات الاطراء اللي بتوصلني على قنوات السوشال ميديا المختلفة بس هاد لبموضوع بيخليني مرات اقول اديش المثل "اللي ما بتعرفه بتجهله" صحيح... فعلا...كتير ناس بتفكر اني انا بطبخ وبحب الطبخ وعندي بزنس وبعمل وصفات والمدونة بس كتير ما بيعرفوا اني عندي مش بس هوايات تانية ومشاريع تانية بحياتي....كتير بيبعتولي...مين بيصورلك؟ او مين بيعملك الترتيب تبع التصوير؟ كتير بيبعتولي ليش ما تعملي كتاب او ليش ما تعملي دروس طبخ؟ او ليش ما تروحي على فتافيت؟ وغيرها من الاسئلة اللي بتخليني اقول اديش في اشياء ما بتعرفوها عني :)

المهم (هاي صارت كلمتي المعهودة) اللي بيتابعني حاليا على سناب تشات صار يعرف بعض من هاي الاشياء بحكم انه بسألني وبجاوب عام او بحكم اني عم بورجي المتابعين جزء تاني من شخصيتي...نوعا ما الجزء الفلسفي المهتم بجوانب كتير تانية من الحياة غير الطبخ والتنظيم والتوفير...

سعيدة جدا بتفاعلكم معي دايما وسعيدة اني بشارككم جزء من حياتي بحدود المعقول...

هالفترة ومع البرد وبالرغم من انه لسة ما في مطر (الله يفرجها)...عم بعمل اكلات شتوية لزيزة كان منها في الايام الخيرة شوربة عدس مميزة على الطريقة التركية وسلطة خضار مشوية بتشهي...

خلينا نبدأ بالوصفات



شوربة العدس الاصفر على الطريقة التركية
المقادير:
1 ملعقة طعام زبدة
3 ملاعق طعام زيت زيتون
بصلة مفرومة
جزرة كبيرة مقطعة
حبة بطاطا مقطعة
3/4 1 كوب عدس اصفر او مجروش
ملعقة طعام رب البندورة
6 اكواب مرق دجاج او ماء مع مكعب مرق
1/2 ملعقة صغيرة كركم
ملح، فلفل اسود
عصير ليمون للتقديم

الطريقة:
تذاب الزبدة ويضاف زيت الزيتون وتقلب البصلة ثم بقية الخضار والعدس
يضاف الكركم ورب البندورة وتقلب
يضاف المرق وتترك لتنضج تماما
تطحن وتملح وتبهر
تقدم مع عصير الليمون



سلطة الشومر المشوي
المقادير:
بصلة كبيرة مقطعة شرائح
4 حبات شومر مقطع شرائح
جزرتين كبار مقطعين بالطول
ملح ، فلفل اسود
2 ملعقة طعام زيت زيتون

للسلطة:
ضمة جرجير
سبانخ مفروم خشن بمقدار ضمة الجرجير
1/4 كوب بذور القرع
1/4 كوب رمان احمر
1/4 كوب نعنع طازج وكزبرة مفرومة

للصوص:
2 ملعقة طعام عصير ليمون
2 ملعقة خل
6 ملاعق طعام زيت زيتون
رشة بابريكا او فلفل حلبي احمر
ملح، فلفل اسود
حبة ثوم مهروس

الطريقة:
تخلط الخضار مع الملح والفلفل الاسود والزيت بصينية وتشوى بالفرن على 180 حتى تنضج وتحمر قليلا مع التقليب بين فترة واخرى
تترك لتبرد
في صحن السلطة نضع اوراق الجرجير والسبانخ ثم الخضار المشوية وبذور القرع والرمان والاعشاب
تخلط مكونات الصوص وتنزل عليها


Monday, December 4, 2017

السميت التركي





عملية اني الاقي وقت لاكتب بالمدونة صارت تقريبا شبه مستحيلة.... هل ممكن استنسخ حالي؟!!! يعني في الف شغلة لازم اعملها وما في غير شخص واحد!!! اريد حلا!!! وما حد يحكي عن اني اجيب حد يساعدني...لانه حاليا 3 بيساعدوني... الحمد لله وانا ما عم بحكي عن شغل الطلبيات ...عم بحكي عن تصوير الافلام لقناتي على اليوتيوب، ارد على رسائل الناس التي لا تنتهي على السوشال ميديا، اصور ...اعمل تجارب لوصفات جديدة..دورات الطبخ...كلها اشياء ما بزبط الا انا اعملها!!! يبقى من وين بده يجي الوقت للمدونة وهاد غير المسؤوليات العائلية... 

المهم اني قدرت اصور اليوم صور لوصفة جديدة انا رضيانة عنها..اليوم وصفتنا لعمل السميت التركي...وصفة سهلة وزكاوتها تتاكل فريش...

اهم اشي تلتزموا بالخطوات اللي رح احكي عنها لافضل النتائج... بس قبل ما ابدأ بدي احكي انه السميت بيشبه كعك القدس كتير مع اختلاف ببعض المقادير وطريقة التحضير...



السميت التركي
المقادير:
3 كوب طحين
ملعقة صغيرة ملح
1/2 1 ملعقة صغيرة خميرة
1/4 1 كوب ماء دافئ
ملعقة صغيرة سكر
1/4 كوب دبس عنب (يفضل بس بيزبط تمر)
1/4 كوب ماء
كوب سمسم محمص (يفضل انتي تحمصيه)



الطريقة:
تخلط الخميرة مع السكر والماء
يخلط الطحين والملح
تضاف الخميرة وتعجن جيدا لتتماسك ونحصل على عجينة غير ملتصقة 
تخمر مدة ساعة بحرارة الغرفة وتدخل الثلاجة طوال الليل او 5 ساعات على الاقل
( عملية التخمير البطئ بالثلاجة تساعد على الحصول على نتائج افضل)
تخرج من الثلاجة ويحمى الفرن على 200 مئوي او اعلى حرارة
يخلط الدبس مع الماء في وعاء ويحضر السمسم في وعاء اخر
يغلي ابريق من الماء ويوضع بصينية وتوضع باخر طبقة من الفرن
(هذه الطريقة تخلق جو من البخار داخل الفرن وبالتالي تساعد على ان ينضج العجين بشكل افضل وللحضول على قشرة مقرمشة)
تقطع العجينة الى 4 اقسام (اذا كنتي تريدين سميت كبير) او 8 اذا صغير
نأخذ قسم ونغطي الباقي ونعمله حبل طويل
نمسك الحبل من المنتصف ونبرم الطرفين من العجين معا بشكل لولبي ونلفها دائرة ونغلق الاطراف معا
ننزل الحبة بخليط الماء والدبس ثم بالسمسم 
نكمل الباقي وتوضع على صينية مبطنة بورق الخبز
توضع على الرف فوق الصينية المملوءة بالماء
يؤخذ القليل من الماء الساخن ويرمى بقاع الفرن لعمل جو من البخار (يفضل استخدام هذه الطريقة مع وجود صينية بقاع الفرن لمنع دخول الماء على الغاز)
بعد مرور 10 دقائق ترفع صينية الماء بحذر وتوضع صينية السميت بدلا منها
نكمل تحميرها من تحت ومن فوق للوصول الى لون ذهبي (17-25 دقيقة)





Tuesday, November 7, 2017

ابو شلهوب وعصير الجوافة بالرمان


عم بحاول جهدي اني اقدر الحق على كل هالسوشال ميديا لحالي...اخ يا راسي..كتار والله وكا واحدة بدها فريق لحالها... الله يعين...
عم بيكون نشاطي الحمد لله ممتاز هاليومين بين طلبيات ودروس طبخ والسوشال ميديا...اكيد احسن الف مرة من القعدة وانه الواحد ما يعمل اشي...

من الاشياء اللي كمان عم بشتغل عليها اكتر من مشروع منزلي منهم غرفة الغسيل وكورنر القهوة..من عشاق القهوة انا...عمري قلتلكم؟!! استنوا اشي لزيز بعد ما اخلص انجازات ان شاء الله...

المهم وصفتنا اليوم وصفتين.. عصير بيشهي واكلة سورية قديمة نباتية بتشهي... 

جاهزين

الاكلة بالكوسا والبرغل واسمها ابو شلهوب وفي متابعة بعتتلي انه جدها بيسميها يهودي مسافر هههههه ما فهمت ليش بس اللي بتعرف اصل التسميتين تخبرنا
الاكلة نباتية، سهلة وسريعة وموفرة جدا

ابو شلهوب
المقادير:
4 حبات كوسا كبير مقطع مكعبات
2 كوب برغل خشن
بصلة مفرومة ناعم
ملعقة طعام زيت زيتون
3 حبات ثوم مهروس
1/2 ضمة كزبرة مفرومة ناعم
ملح، فلفل اسود
ماء او مرق لطبخ البرغل
للوجة: رمان (اختياري)

الطريقة:
يوضع زيت الزيتون بقدر وتطبخ البصل لتذبل
تضاف الكوسا وتقلب دقيقة وترش بالملح
يغسل البرغل ويضاف ويقلب دقيقة 
يضاف الماء او المرق الساخن وممكن اضافة الماجي الطبيعي 
كمية المرق كافية لغمر البرغل سم ونصف ويحتفظ بالمزيد للاحتياط لترش على البرغل اذا لم ينضج
عندما يغلي تخفض الحرارة ويترك ليتشرب الماء ويرش بالمرق لينضج تماما
يضاف الثوم والكزبرة وتفلفل بالشوكة
تقدم مع اللبن



اما العصير فهلا موسمه الجوافة معبية السوق ومع الجرانادين اشي بيشهي..



عصير الجوافة والرمان
المقادير:
5 حبات جوافة
2 كوب حليب
كوب ثلج
1/3 كوب سكر
ملعقة صغيرة فانيلا
جرانادين

الطريقة:
تضرب المقادير كلها ما عدا الجرانادين بالخلاط
يضاف الجرانادين حسب الرغبة بالكؤوس ويصب العصير






Monday, October 30, 2017

مقلوبة الباذنجان وصفيحة اللحم السريعة بالبف باستري



من اكتر الاكلات اللي بيحبوها الكل....المقلوبة والصفيحة... انا تربيت ببيت فيو المقلوبة انواع...كل مقلوبة الها طعم وبهارات وطريقة...كل مقلوبة الها موسم كمان...يعني مقلوبة الباذنجان هي مقلوبة صيفية بامتياز...طبعا هاد الحكي بحكم انه الخضار زمان جد كانت مواسم..مش زي هلا كل شي ما شاء الله موجود طول السنة...بس مالنا ومال الحكي...ما في ازكى من الاشي بموسمه...مقلوبة الزهرة شتوية بامتياز.... مقلوبة الفول بالربيع...يعني هيك انا تربيت وكتير بحب هاد الاشي...مع احترامي الشديد للي بيحطوا كل شي بالمقلوبة... زاكي...بس بالنسبة الي خصوصية كل مقلوبة الها وضعها...بطاطا ما بنحط باي مقلوبة...حمص؟!! ما اله دخل بالنسبة الي...الحمص للقدرة...هيك بالنسبة الي في محافظة على فردية كل طبق...بهارات مقلوبة؟!!! برضه لا..ليش؟ لانه كل مقلوبة من المقاليب هههه الها بهاراتها ببيتي... الرز!! مصري...ابدا مش رز امريكي او بسمتي...برضه ما الهم دخل...مشان تنقلب قالب لازم رز بنشا زي المصري... ودمتم وهاد رأيي..

اما الصفيحة فالوصفة سهلة وسريعة اذا جاييكي ضيوف فجأة..بدك تعمل طبق جانبي... بدك تعملي صفيحة وما عندك وقت... بتخافي من العجين..استخدمي مربعات البف باستري...واليكم الوصفتين بالف صحة وهنا

مقلوبة الباذنجان (الوصفة دخلت موقع مجلة سيدتي من سنين ومجلة اليقظة الكويتية)

المقادير:
كيلو لحم خروف بعظمه مسلوق مع ورق غار وعود قرفة وفلفل اأسود حب وعود كرفس وبصلة
3 كوب أرز متوسط الحبة منقوع ومصفى
2 حبة باذنجان متوسطة مقطعة ومقلية
حبة بصل كبيرة مقطعة جوانح
3 حبة بندورة متوسطة مقطعة مكعبات كبيرة
2 ملعقة متوسطة سمنة
1 ملعقة صغيرة ملح
1 ملعقة صغيرة فلفل أسود
1 ملعقة صغيرة قرفة مطحونة
1 ملعقة صغيرة بهار سادة
بهارات الأرز:  1/2 ملعقة صغيرة من :ملح ،فلفل اسود، ملعقة صغيرة بهار سادة، ملعقة صغيرة قرفة
لوز مقلي للوجة
طريقة التحضير:
1.يوضع السمن في قدر كبيرة ويقلب البصل ليذبل
2.تضاف البندورة وترش بالبهارات وتقلب لتذبل ويرفع عن النار
3. ترتب قطع الباذنجان المقلية فوق البندورة ثم قطع اللحم ويصفى المرق لاستخدامه في طهي الأرز
4.يخلط الارز مع البهارات ويرتب فوق اللحم ويعاد القدر على النار ويضاف له المرق المصفى الساخن ليغمرة بحوالي ½ 1 سم وعندما يغلي تخفض الحرارة تماما ويغطى ¾ تغطية وعندما نرى ان المرق اختفى عن السطح واصبح هناك ثقوب على سطح الارز نغطي القدر تماما ونتركه على نار منخفضة لينضج تماما.
5. تترك المقلوبة بعد رفعها عن النار 1/3 ساعة لترتاح ليسهل قلبها على صحن التقديم وتكون كالكعكة وتزين باللوز المقلي.

مربعات الصفيحة بالبف باستري
المقادير:
12-15 شرائح بف باستري مذابة بالثلاجة
للصفيحة:
250 غم لحم مفروم
ملح، فلفل اسود، بهار، قرفة (حسب الرغبة)
ملعقة كبيرة دبس رمان
حبة بندورة كبيرة مفرومة ناعم ومصفاة من الماء
بصلة متوسطة مفرومة ناعم
حبة ثوم مهروس
حبة فليفلة صغيرة مفرومة ناعم (ممكن استخدام حار)
2 ملعقة كبيرة بقدونس مفروم ناعم
رشة نعنع ناشف
ملعقة كبيرة زيت زيتون
صنوبر محمص (اختياري)

الطريقة:
تخلط المقادير وتوزع على مربعات البف باستري الباردة وتخبز على حرارة 190 من 15-20 دقيقة لتحمر ويشوى الوجة قليلا


Wednesday, October 25, 2017

دال العدسLentil Dal



اليوم اكلة لطيفة خفيفة على الجيبة ومناسبة لاجواء الخريف بامتياز...رحلة الى الهند واكلة الدال...نعم هيك اسمها...دال...وتعني يخنة بالحبوب...واليوم الوصفة لدال العدس ...وعملتها على سناب تشات قبل كم يوم بالعدس المجروش وجد بتشهي...بتتاكا مع لبن (انا عملت لبن بخيار بالثوم) ورز بسمتي...الحلو بالوصفة انها مشبعة ومفيدة جدا ومتكاملة غذائيا مع وجود اللبن وكمان رخيصة...

بس قبل ما ابدا بالوصفة بحب اقولكم انه في عندي مربى سفرجا بياخد العقل...للي بتحب توصي...


اذا حابين تشوفوا كيف بطبخ وشو يومياتي اول باول تابعوني على سناب تشات



دال العدس
المقادير:
1/2 1 كوب عدس مجروش (برتقالي ) مغسول ومصفى
2 ملعقة طعام زبدة
بصلة مفرومة ناعم
3 سن ثوم مهروس
قطعة زنجبيل بحدود 2 سم مبشورة
حبة فلفل اخضر حار مفروم (اختياري)
2 ملعقة طعام كاري
400 ملم حليب جوز الهند
3 اكواب ماء
2 علبة بندورة مقطعة 
2 ملاعق طعام رب بندورة
ملح، فلفل اسود
عصير 1/2 ليمونة
1/2 ضمة كزبرة مفرومة
2 ملعقة طعام زبدة
ملعقة صغيرة بهارات جرام ماسالا

الطريقة:
يذبل البصل بالزبدة
يضاف الثوم والزنجبيل وتقلب ثم يضاف الفلفل في حال استخدامه
يضاف الكاري والبندورة وتقلب 
تضاف بقية المكونات ما عدا الزبدة والجرام ماسالا والليمون والكزبرة
تطبخ لينضج العدس تماما على نار هادئة مع التحريك
تضاف الزبدة وبقية المكونات
يقدم مع الارز واللبن






Monday, October 23, 2017

كعكة قدرة قادر



مساء الخير على الجميع....بتمنى تكونوا بالف خير...زي ما انتو عارفين الي فترة متنشطة على سناب تشات وعم بحاول قدر الامكان انه اذا عملت اكلة تكون من المدونة لسببين..
ضيق الوقت ما عم بسمحلي اني اعمل الكم وصفات جديدة لانه الموضوع بده تصوير وتحضير وكتابة 
والسبب الثاني ما بدي المدونة تحتضر بسبب السوشال ميديا...يعني المدونة بالنسبة الي هي الاساس ورح تضل الاساس... 

قبل فترة عملت كعكة قدرة قادر (مش على المدونة) وامبارح عملت دال العدس (اكلة هندية بالعدس بتشهي)... وبرضه مش على المدونة.. وبالتالي لازم اني احط الوصفات هون لحتى يتوثقوا ويكونوا مرجع للكل...الاشي السيء بسناب تشات انه بعد 24 ساعة بتروح الفيديوهات...

فخليني ابدا ببوست اليوم وهو كعكة قدرة قادر واليومين الجايين باذن الله بحط دال العدس...

هلا اول مرة عرفت كعكة قدرة قادر كنت بكندا :) يعني مش بالعالم العربي... ولقيتها ظريفة بس زنخة..بيض كتير وهيك قصص وانتو بتعرفوا معزتي للبيض :)

المهم بعدين اندليت على طريقة اعمل فيها الكيكة بشكل زاكي ولزيز ومش اقل كتير بيض بس بوعدكم روعة والنتائج ممتازة..انا بستخدم الكيك مكس بهاي الطريقة وخليط الكريم كراميل الجاهز... هلا الفكرة انه الطريقة بدها صفار اربع بيضات وممكن تستخدموا بيضتين بدالهم بس ما رح يعطي نفس النعومة والزكاوة...فنصيحتي هي استخدموا الصفار زي الوصفة ...اما البياض فممكن الاحتفاظ فيه بالفريزر...كل بياض بيضة لحال وبس بدك اياه لاي وصفة بتطلعيه وبتسحيه وبتستعمليه عادي...



كعكة قدرة قادر
المقادير:
١/٢ باكيت كيك مكس اصفر او فانيلا او شوكولاتة
بيضة
ملعقة صغيرة فانيلا
١/٢ كوب ماء

للكراميل:
٢ باكيت كريم كراميل
لتر حليب
صفار ٤ بيض
٤ ملاعق صغيرة فانيلا بودرة

الطريقة
يحمى الفرن الى ١٨٠م او ٣٥٠ ف
يوضع السكر المحروق بقاع القالب 
يسخن الحليب مع الكريم كراميل مع التحريك ليغلي
يؤخذ قسم من الخليط الساخن ويضاف للصفار مع الفانيلا وتحرك بسرعة وتضاف للخليط الساخن وتحرك بسرعة
تصفى فوق الكراميل بالقالب
تخلط مكونات الكيك 
تضاف فوق الكراميل
توضع بحمام مائي ساخن
تخبز بالفرن حوالي ٣٥ دقيقة
تترك لتبرد بحرارة الغرفة
تبرد في الثلاجة عدة ساعات وتقلب وتقدم


Thursday, October 12, 2017

كعكة تري ليتشي...كعكة الحليب


مين منا ما بحب كعكة لزيزة مع الشاي؟ هلا الموضة كعكة الحليب ...ومع انها كهكة قديمة كتير بس لسبب ما بظن بعد ما الاتراك صاروا يعملوها واكلوها السياح من اهل الخليج والعرب فجأة اكتشفوها....هههه الكعكة مش تركية ابدا وانما مكسيكية بامتياز....عملتها قبل فترة على سناب تشات ...اللي ما بيتابعوني على سناب تشات ...اذا حبوا هي الكود بس جد صايرة نشيطة عليه وفي اشياء كتير ممكن تستفيدوا منها بحياتكم اليومية..

اليوم مثلا نضفنا البقع المستعصية من الدهون على الفرن باستخدام معجون من الكربونات والمي...فركته بفرشاية قديمة على البقع وتركته شي ساعة وبعدين فركت بسلكة وكله طلع وصار يوج وج...كيف بالله :)


اما الكعكة فاسمها Tre Leches  يعني 3 انواع حليب... او اذا بدكم تسموها كعكة الحليب زي ما هي موضة هلا...وبيحبوها بالزعفران بس ممكن تحطوا هيل او اي نكهة بدكم اياها..انا عملتها بالفانيلا ودمرت الدنيا بعدين وحطيت كراميل...دمرت الدنبا بشكل زاكي جدا :)

رح تعجبكم جدا...خلينا نبدأ بالوصفة



كعكة تري ليتشي...(كعكة الحليب)
للكعكة:
٥ بيض
إصبع زبدة
كوب سكر
١/٢ ١ كوب طحين
ملعقة صغيرة بيكنج باودر
٢ ملعقة كبيرة فانيلا بودرة او صغيرة فانيلا سائلة

لتشريب الكعكة :
علبة حليب مركز محلى
٢ كوب حليب
١/٢ ١ كوب حليب مبخر

للوجة:
كريما مخفوقة
اي زينة ترغبين بها من مكسرات او فواكة

الطريقة:
يسخن الفرن الى ١٨٠
يدهن قالب مستطيل
تخفق الزبدة والسكر لتصبح كريمية ويضاف البيض واحدة كل مرة مع الخفق وإضافة الفانيلا بالنهاية
يخلط الطحين والبيكنج باودر وينخل
يخلط مع المزيج السائل لدقيقة
تسكب بالصينية وتخبز من ٢٥-٣٠ دقيقة لتجتاز اختبار الكيك
تخلط مكونات التشريب
فور خروج الكعكة وهي ساخنة تثقب بالشوكة  وتشرب بالحليب بالتدريج
قد يبدو انها كمية كبيرة ولكنها ستتشربها
تبرد بحرارة الغرفة ثم بالثلاجة ٦ ساعات
تزين بالكريما المخفوقة واي شيء ترغبون به 




Wednesday, August 9, 2017

الدجاج الاسيوي بالعسل ومشروع منزلي



بعرف شو رح كلكم تقولوا...وبعدين معها هاي؟ كل شوي بتغط وبترجع بتطلع بتعتذر عن التأخير وبتحجج بحجج وانها ما بتحط بوستات... معكم حق الصراحة...واحدة من المتابعات قالتلي مدونتك عاملة ريجيم ههههههه...وبيزعل المزبوط لانه الوقت مش زابط....يعني شو اعمل عشان الاقي وقت...اكطع حالي يا خالاتي؟!!! :)

المهم اني قررت انه اذا بدي اكون حكيمة رح ارجع اكتب بالعربي بس ...الكتابة باللغتين برضه متعبة جدا....لنشوف اذا هاد الاشي رح يساعد او لا في اني ارجع المياة لمجاريها :)

اليوم الشغل معقول فقلت اخطفلي ساعة زمن واحط بوست...رح يكون مليان لاني عن بكون نشيطة على سناب تشات بس ما بقدر اني الحق على السناب والمدونة..يعني جد تقطيع رسمي..

بس جد الي ما بتحب سناب تشات...تجربه رح تغير رأيها ..انا كنت من هدول وغيرت رأيي بعد ما جربته...طبعا في تفاهات كتيرة...بس انا بصراحة ما بتابع اي اشي...

اللي بتحب اتابعني هي اكاونتي 




نرجع للمفيد...

اليوم رح اشارككم مشروع لمبة...ههههه ...لا مش اسم مشروع تنموي...مع انه والله الاسم "كاتشي" :) لمشروع تنموي...واللي بده يلطشه ما عندي مشكله :) 

عملت اشي للضو ..بديش اقوا ثرية لانه كتير عيب...ولا حتى بيوصل لهالمستوى...بس لزيز واكيد شوفتوه كتير فقررت اني اجرب بنفسي والنتيجة كانت هيك

كيف؟

هي الخطوات

بنحتاج ال:
بالون كبير 
خيطان قنب (بالبلد الطبة بنص دينار...يا بلاش)
غراء ابيض
وسلامتكم

هلا بتنفخي البالون...اما بمنفاخ او عند الكازية لانع بنات اذنية نزلوا في محاولة فاشلة لنفخه...وهاد انا شايلة اللوز...!!!
بترسمي دائرة بقلم فلوماستر بقطر 10 سم تقريبا حول عقد البالون. هاي الدائرة مهمة ...بعدين بحكي ليش.
بتفكي الطبة تبع الخيطان وبتقعيها بالغراء
وبتبدي تلفي الخيطان بشكل عشوائي ومتقاطع وفوق بعض ومهم انه ما تشبكي الخيطان عند الدائرة اللي رسمتيها. ليش؟ لانه من هناك رح تدخلي اللمبة فبدك مكان يوسع باريحية.
هلا بتحطيه ينشف تماما على علبة لبن او سطل...المهم اشي ما بيهمك يجي عليه غراء ومفتوح من تحت للتهوية

واتركية يومين او 3 لينشف الغراء ويقسى الخيط...
اذا حسيتي انه لسة طري بمحلات...زيدي غراء ولما ينشف تماما افقعي البالون زي هيك (البالون الازرق هيو جوة)


هلا بالفراغات بين الخيطان الغراء ممكن يعمل طبقات شفافة زي الصورة فوق...بخفة قمتها بسكين واللي ضل ما ببين

وحطيتها حولين لمبة مرتبة وخلصت فكت...
ما كلفت 3 دنانير...
والنتيجة حلوة جدا.. بالنسبة الي على الاقل :) 


ونرجع للاكل...عملت دجاج اسيوي بالعسل بالفرن على سناب تشات لاقى استحسان كبير



الدجاج الآسيوي بالعسل
المقادير:
٩ قطع دجاج (المفضل لديك)
للصوص:
١/٣ كوب كاتشب
١/٣ كوب عسل
١/٢ ١ ملعقة طعام سكر بني
ملعقة طعام خل
٣ -٤ حبة ثوم مهروس
بصلة صغيرة مبشورة
ملعقة صغيرة بشر زنجبيل طازج 
ملح، فلفل اسود
١/٤ كوب صويا صوص
للوجة:
سمسم محمص

الطريقة:

تخلط كل المواد وتوزع على الدجاج
توضع بالفرن على 180 وتقلب بين الحين والحين لينضج الدجاج وتتحمر القطع وتصبح الصوص دبقة...
يرش بالسمسم المحمص

وبس شفتوا اسهل من هيك؟