Thursday, January 8, 2015

مكرون جوز الهند واللوز Coconut Almond Macaroons

English Version of this post is below

مش عارفة شو اكتب ولا اكتب اليوم بهاد البوست...اكيد موضوع الثلج هو المحور الاساسي للحكي اليوم وهالثلجة بتخلي الواحد يفكر كتير....يعني كان في هجوم غير طبيعي وصور لرفوف المحلات اللي فضيت من الاكل وتعليقات عن الفجع والشجع بس رأيي مختلف بصراحة تماما وما بقدر الوم الناس اللي اشترت (بالمعقول) لانه السنة الماضية كتير في ناس عانت بسبب عدم استعدادها وبصراحة احنا ما عنا الاستعدادات الكافية لنفتح كل الشوارع مع انه السنة حاسة الاستعدادات احسن بكتير من الثلجة الماضية والحمد لله...بس كل اللي علقوا ولاموا الناس على انها اشترت خبز نسيوا انه اذا في ناس علقت ما رح تقدر تطلع بسياراتها العادية تشتري خبز ومش كل الستات بيعرفوا يخبزوا بالطوارئ واللي عندوا صغار او عيلة ما شاء الله فيها شباب وصبايا بده اكتر من لفة باليوم...حقيقة واقعة...مش عارفة ليه هيك دائما جاهزين نطلق الاحكام ونبدا حملات هجوم شعواء على اي اشي بدون فهم لابعاده او حتى افتراض لحسن النية...في حد كان كاتب انه فكروا بانه اللي اشترى كل الخبز يمكن كان جايب للجيران او لاهله (انا زوجي كان منهم..جاب لبيت امه واخته)...
وبالمقابل وعشان ما اكون سلبية هاي الثلجة عكست اخلاق رائعة من كتير من اصحاب الضمائر واللي نزلوا اعلانات انهم مستعدين لاي مساعدة في الحالات الطارئة واللي عرضوا توصيل مواد غذائية وحرامات وكاز وغيره للعائلات المستورة واللي تبرعوا بالصوبات...الخ كل هاد عكس انه لسة الدنيا بخير وانه لسه في ناس بتحس بغيرها وبتوقف معهم بوقت الشدائد...
وما بقدر الا اني احمد ربي على نعمه اللي لا تعد ولا تحصى باني قاعدة ببيتي وبين عيلتي ودفيانة وفي ناس عم بتموت من البرد...شعور بالرضا بس بيغتاله شعور مرير بالاسى والحزن من قلة الحيلة بانه الواحد يساعد...يعني مش عارفة كيف الواحد ممكن يوصل اشي لمخيم الزعتري...وعنجد يضمن انه يوصل...حد بيعرف؟ ابعتولي اذا بتعرفوا ...وربنا يقدرنا على فعل الخير..

طيب على صعيد تاني امبارح كان يوم حلو قضيناه مع العيلة باجواء بيضاء....ما طلعنا لعبنا بالثلج ...اعتراف...انا ما بحب الثلج وما بحب العب فيه...ههههه بفرح للاولاد بس اظن انه 6 سنين بكندا خلتني ما احب الثلج ابدا....بس اكيد الحمد لله على النعمة....بس انا وخالد طلعنا شوي امبارح ببداية الثلج لنوصل كم شغلة للعيلة قبل ما تسكر الطرق ...اعتراف تاني...بكره اشي اسمه سيلفي..يعني لما حد يقولي يالله سيلفي بكون بحالة اكتئاب وبيركبني 400 عفريت وبدي اقوله مااااااااا بدي....بس مش عارفة ليش اجا على بالي امبارح اتصور انا وخالد...يمكن لانه بداية سقوط الثلج والجو كان حلو ...ووالله طلع معنا صورة حلوة وانا حظي بالصور حدث ولا حرج...


واللي بيضحك انه في ناس فكروها فوتوشوب مع ممثل تركي ههههه لانه في ممثل تركي بيشبه خالد بحريم السلطان...هههههه وبس شفنا الصورة للممثل اللي شبهه البعض بخالد...زعل...قال شو؟ فكرهم شبهوه بمهند!!!!! ههههههههههه

وطبعا زي 3/4 الستات قضيتها بالمطبخ امبارح نعمل فطور وغدا...الحمد لله ما كان فيه عشا او وسع لعشا....شو عملت....افطرنا مع حماتي وبنت حماي وزوجها جايين من دبي عملت فطاير بجبنة وفتة حمص..والغدا كان مقلوبة باذنجان وسلطة وعملت حلو سهل وسريع وما في طحين..يعني بدون جلوتين...وزي ما وعدتكم انه المدونة رح تكون منوعة السنة ان شاء الله ومن ضمن الاشياء اللي بدي اركز عليها هي تخصيص ولو وصفة واحدة بالشهر تكون جلوتين فري او خالية من الجلوتين وحتى هاي الوصفة خالية من الحليب للي عنده حساسية كمان من الحليب بالاضافة الى انها طريقة ممتاز للاستفادة من بياض البيض اللي بتخليه بالفريزر لما بنستعمل الصفار ببعض الحلويات (رندة هاي الوصفة الك :) لانك سألتيني عن وصفات بالبياض بالاضافة الى انها اخف دسم...كمان موادها متوفرة تقريبا بكل بيت ومش غالية فبتخدم فكرة انها وصفة خفيفة على الجيب والوزن كمان



مكرون جوز الهند واللوز
المقادير:
2 كوب جوز هند
1/2 كوب لوز شرائح مكسر او لوز مفروم خشن
2 بياض بيض
1/2 كوب سكر بني وممكن سكر عادي
2 ملعقة صغيرة فانيلا
رشة ملح
للوجة: شوكولاتة مسيحة (اختياري)

الطريقة:
يخفق البياض والسكر والفانيلا ليتختلطوا (ما بدنا البياض ينفش)
يضاف جوز الهند واللوز ورشة الملح
نحمي الفرن الى 175 ونبطن الصينية بورق الخبز وبالملعقة نضع قدر من الخليط (قد ما بدنا كبر القطعة ) وبنحاوا نسوي الاطراف بايدينا ونعملها عالية زي الهرم
تدخل الى الفرن من 10-12 دقيقة لتبدأ باخذ لون خفيف
ترفع وتترك لتبرد على الصينية كم دقيقة ثم بحذر على سلك معدني
نذيب الشوكولاتة ونعمل خطوط عشوائية على الوجة
والف صحة

English Version of the post

It is is white officially here in Jordan!!! Snow is every where!!! Very exciting to many yet very scary to others who are living in tents and with no shelter!!! A bitter sweet feeling to be surrounded by your family enjoying the warmth of having a roof off your head knowing that many families don't!!! May Allah be with them and I really hope that we can help...I really want to and trying to find a way..so if you do..please let me know especially to people who are in Za'atari refugee camp...

Yesterday I spent most of the time cooking..well just like most of you in this weather...we woke up late anticipating to see the snow everywhere but there was non yesterday morning...But since we live in the same building with my mother in law and my sister in law is visiting with her husband, we thought it would be nice to have breakfast together. I made cheese pastries and Hummus Fatteh...then we had to go on with our daily chores and I started to cook lunch quite late (around 3!!!) I made Egg plants Maqloba (Upside down)


Served this with a salad and yogurt...mmmm

As for dessert, I made these easy coconut almond macaroons..they are Gluten free (part of my work this year to designate a space in this blog for Gluten free recipes). It is also dairy free and a great way to use up some of these egg whites that we have in our freezers not to mention that it is low calorie...

Coconut Almond Macaroons
Ingredients:
2 cups unsweetened coconut, shredded
1/2 cup coarsely chopped almonds
2 egg whites
A sprinkle of salt
1/2 cup light brown sugar or regular sugar
2 tsp vanilla
Melted chocolate for drizzling later (optional)

Directions:
Mix eggs, sugar and vanilla with a hand whisk (we don't want this to become double in size or anything like that)
Add coconut, almonds, salt and mix
Mound some of the dough on a baking sheet lined with baking paper. Try to make even and equal sized mounds.
Pop in the oven at 175 for 10-12 min till a bit golden brown and take out.
Let it set on the baking sheet for few minutes, then transfer carefully to a wire rack and let it cool.
Melt chocolate and drizzle on top.
Let the chocolate get set and serve.


13 comments:

  1. تسلم ايدك منال. شكلها طيبة. .بنفع احط بيض كامل! !

    ReplyDelete
  2. ممكن بدل البياض ال ٢ بيضة واحدة

    ReplyDelete
  3. تسلم ايديكي
    يسعد صباحكن
    صباح ابيض ان شالله يحمل معو الفرج والخير والسلام للامة الاسلامية كلها

    ReplyDelete
  4. حبي يا منال انتي الله يسعدك انتي وجوزك لازم اعملها للوصفه بس كنت بدي اسالك دايما عم بدور على جوز هند خشن وجوز هند محلى خشن اول شي هو فيه فرق بيناتهم تاني شي من وين دورت بكارفور وكوزمو ومايلز كلهم ببيعو جوز الهند العادي الناعم >.تحياتي الك يا غاليه دفي حالك منيح

    ReplyDelete
  5. شكرًا لما ومنار... جوز الهند الخشن عند العطار اكيد بتلاقيه

    ReplyDelete
  6. يسعد ايامك منال وضل ايامك بيضه زي بياض الثلج ما شاء الله عنك وعن زوجك الله يخليكو لبعض

    ReplyDelete
  7. كتير الصورة حلوة وطبيعية وانا راي متلك.ما بلوم الناس اللي شرو خبز.بعرف كتير عوائل الخبز هو وجبتهم الرئيسية ما في شي غيره

    ReplyDelete
  8. ماشاء الله منوره الله يخليلك زوجك واولادك انا كمان مابحب التلج انبسطت انه في حدا زيي والوصفه روعه بس انا اكلتها مره عند صاحبتي من محل بالسلط مابدي احكيلك عالطعمه ولهلا مو زابطه معي زيه بس طبعا بدون اللوز ان شاء الله بجربها حبيت الوصفه كتير واهم شي اعطتيني فكره لشو اطبخ بكره عالاكيد مقلوبه ان شاء الله

    ReplyDelete
  9. وصفة مكرون جوز الهند عملتها مرتين الاسبوع الماضي بس يا خسارة ما صورتها :-( يعطكي الف عافيه وكل وصفه ازكى من التانيه.

    ReplyDelete
  10. تم مارينا عماري
    مكرون جوز الهند واللوز

    ReplyDelete
  11. تم مارينا عماري
    مكرون جوز الهند واللوز

    ReplyDelete