Sunday, November 30, 2014

مشاركتي بمعرض التغذية والرجيم الثالث ووصفات مع خبز ريف "خبز صحي وخفيف"

عودتكم اني اكون صريحة بهالمساحة اللي بتخصني انا واياكم...انا بحكي وانتو وبكل صدر رحب بتسمعوني وبتقرؤوا شو بكتب...بتفرحوا معي وبتضحكوا معي واكيد بتطبخوا معي وفي كتير منكم بس اعزل واضبضب بيضبضب معي...الله يسعدكم...

شاركت امبارح واول امبارح بمعرض التغذية والريجيم الثالث ومشاركتي بالتحديد كانت مع خبز ريف "خبز صحي وخفيف"... والحمد لله كانت حلوة وناجحة وعملنا ساندويشات صحية ولذيذة بعرض الطبخ السريع ليومين ودوقنا الناس وحبوا الخبز كتير...وجد انه زاكي...يعني انا من الناس اللي كنت افكر انه بس للدايت والسكري بس طلع بيناسب الكل..مليان الياف وبدون سكر وبيشبه خبز الشراك شوي بس اثخن شوي تقريبا زي التورتيلا بس صحية ومن حبوب القمح الكامل وبدون مواد حافظة وكمان موجود باغلب السوبرماركتات الكبيرة..وهو خبز تنور بينخبز يوميا.....بالمناسبة انا ما عم بعمل دعاية ولا مدفوع الي لاكتب عنهم بمدونتي بس حبيت اعرفكم (اذا ما بتعرفوا المنتج اصلا) عشان لازم تجربوه...ودايما بيوزعوا عينات مجانية...والتجربة خير برهان....

ورح يكون في تقرير عن المعرض المفروض ينعرض على قناة رؤيا الاربعاء من الاسبوع القادم ان شاء الله على دنيا يا دينا الساعة 9:15 او 9:30 ...كان الي لقاء مع صديقتنا رزان شويحات اخصائية التغذية اللي خبرتني انها بتوصي فيه للي بيراجعوها...وبالمناسبة الرغيف جد كبير ووزنه بس 60 غم وهو عن حصة خبز واحدة...تخيلوا انه الواحد ياكل كل هالرغيف وما يحس بالذنب...شعور جميل...




ورح اشارككم الوصفات اللي توزعت على كل زوار المعرض من ريف :) وبالمناسبة استعملوا صوري للبروشور :)





من العرض السريع...





Monday, November 24, 2014

الرشوف...ما في احلى منه بالبرد



من اروع الأشياء بالشتاء هو الشوربة ... كيف اذا كانت وجبة كاملة ومشبعة ومش بس هيك ًطريقك ممتازة للاستفادة من بواقي المنسف... يأمل بيزيد عنا لبن منسف بدون لحمة وما بتعرفي شو تسوي فيه...سوي رشوف...


أكلة تراثية تقليدية أردنية عريقة...  وتؤكل بالشتاء لانها مليئة بالسرعات الحرارية فبتدفي ... بتمنى تجربوها ورح تصير من اهم الوصفات على قوائم العمل بالبيت :)





الرشوف
المقادير:
حوالي ٤ أكواب لبن منسف (انا بعمل هاي الشوربة من المنسف اللي بيزيد وما في لحمة ففرصة نستغله) واذا ما في بتجيبي جميد وبتكسرية وبتنقعية بمي ساخنة وبتطحنيه 
كوب عدس حب
١/٢ كوب جريش ( قمح مجروش ) بس لانه ما عندي استعملت برغل خشن
بصلة كبيرة مفرومة ناعم
٣ ملعقة طعام سمنة نوع جيد والأصل بلدي



الطريقة:
يسلق العدس بالماء اكثر قليلا من ٤/٣ سلق
ينقع البرغل بالقليل من الماء ويضاف للعدس اثناء السلق اخر ٥ دقائق وفي حال استعمال الجريش يضاف بعد نقعة بالماء مع العدس
يصفى المزيج
توضع ملعقة طعام سمن في قدر عميق وتقلب ١/٢ كمية البصل لتذبل ثم يضاف العدس والجريش ثم المنسف وتترك لتغلي على نار هادئة ٥ دقائق ليكتمل نضج العدس (واذا حسيتها سميكة زيدي شوية مي ساخنة) بس هي لازم تكون سميكة شوي اكتر من الشوربة اللي احنا متعودين عليها
نضع بقية السمن والبصل في مقلاة ونقلب ليطري ونقدح للرشوف
تقدم فوق خبز الشراك مع البصل الأخضر والزيتون والفجل وصحتين والف عافية






Sunday, November 23, 2014

سلطة البطاطا الحلوة وارز بالحليب بالبطاطا الحلوة...والحلو للحلوين

بهالجو البارد...جد كأنه الدنيا بدها اتلج الا شوي والا بتهيألي؟...المهم بهالجو بيحلى شوي الكستناء والبطاطا الحلوة وشرب السحلب وغيرها من الاشياء اللي بتدفي...وبما انه هلأ موسم البطاطا الحلوة فكنت حابة اشارككم بوصفات للبطاطا الحلوة امبارح على قناة رؤيا بس ما  زبطت الامور...كان في شيف كوري والقناة حابة تستضيفه وما بيزبط غير امبارح...اهلا وسهلا فيه وعلى كل وعشان انا نزلت صور ووعدتكم مش حابة انه ما اكون عند وعدي فمقال اليوم مخصص لاكلات بالبطاطا الحلوة....

كنت سابقا منزلة اكتر من وصفة منها واحد عملتها زمان على رؤيا هي كعكة البطاطا الحلوة بالجوز والقرفة وبتلاقوا وصفتها هون  وكمان كعكات البطاطا الحلوة بالكراميل وبتلاقوا وصفتها هون



وصفة اليوم همه وصفتين....الاولى وصفة سلطة زاكية كتير ومفيدة جدا وهي سلطة البطاطا الحلوة
سلطة البطاطا الحلوة
المقادير:
2 حبة بطاطا حلوة كبيرة مقشرة ومقطعة مكعبات
ملعقة طعام زيت زيتون
ملح، فلفل اسود
اوراق عود روزماري او حصى البان مفروم خشن
1/4 كوب جوز مفروم خشن ومحمص
1/4 كوب كرانبري
بصلة حمراء صغيرة مفرومة ناعم
ملعقة طعام بقدونس مفروم
اختياري: اوراق سبانخ كفرشة للسلطة
للصوص:
1/4 كوب زيت زيتون
3 ملعقة طعام عصير ليمون
ملح
فلفل اسود

الطريقة:
يوضع زيت الزيتون والملح والفلفل الاسود والروزماري فوق البطاطا وتقلب وتدخل الفرن على حرارة 180 لتنضج وتأخذ لون خفيف (لا نريدها ناجة كثيرا لتحافظ على قوامها بعد خلطها ببقية المواد) ويفضل خبزها على ورق الخبز او صينية غير لاصقة

تترك لتبرد ثم نضيف بقية المواد ونضيف الصوص بعد خلطها بزجاجة 
وتقدم والف صحة



اما الوصفة التانية وغير الاعتيادية فهي وصفة الرز بالحليب بالبطاطا الحلوة


ارز بالحليب بالبطاطا الحلوة
المقادير:
لتر حليب سائل
1/2 كوب ارز عادي (حسب النوع الذي تفضلين)
1/2 كوب سكر 
ملعقة صغيرة فانيلا
3/4 ملعقة صغيرة قرفة
2 ملعقة طعام شراب القيقب (الذي يستخدم مع البان كيك) وهو اختياري
كوب بطاطا مشوية مهروسة

الطريقة:
يوضع الحليب والسكر والارز على نار هادئة ويحرك كل فترة لينضج الارز (هذه العملية ستأخذ بحدود ال 1/2 ساعة) فاذا اردت اختصار الوقت ممكن ان تسلقي الارز على حدا وان تضيفي حوالي 2 ملعقة صغيرة نشا مذابة بملعقة طعام من الحليب لتسميك الارز بالحليب ..ولكن بطريقتي فان النشا في الارز سيسمك المزيج لذا لم استعمل النشا وستنزل كمية الحليب مع الطبخ الى النصف وهذا هو المطلوب
عندما ينضج الارز نضيف النكهات والبطاطا الحلوة وشراب القيقب ونسكبها في كاسات ويمكن تزيينها بالمكسرات...وطعمها رااااائع للشتاء..والف صحة





Monday, November 17, 2014

مشروعين منزليين بالصواني والستير فراي بالستيك

مؤخرا ومع الانشغال بكل شي في الدنيا عم بتروح واجبات تانية من قائمة العمل..بتقدروا تقولوا بتتأجل...بتنحذف لفترة ...الخ ومن اهم الاشياء اللي كانت ببالي هي تنظيف غرفة المونة...رح تقولولي شو جننتينا فيها...مزبوط بس هي اهم غرفة بالبيت...بنك الطعام...ومكاني المفضل بعد المطبخ...وطبعا محسوبتكم مرات من العجقة الا ما احط اشياء مش بمحلها وبالتالي يومين ثلاثة وتعود وتكتسح الفوضى العارمة ارجاء المكان...فامبارح قعدت انظف وارتب وامسح غبر واغسل تبرويرات وارتب من الساعة 8:30 الصبح ولغاية 12:30 الظهر...4 ساعات من الشعبطة على السلم والنزول وغيره وغيراته  بس شعور رهيب صارت ورجعت في قمة الترتيب والحمد لله.... 

بس من افضل الاشياء اللي نتجت عن عملية "الهجوم على غرفة المونة" طبعا غير الترتيب والنظافة هو عمل بعض الاشياء من الاغراض الموجودة وبتستناني احن عليها عشان تنعمل من ضمنها مرتبان مربعات السمورز اللي اخذته معي على رؤيا عشان افرجيكم كيف ممكن تقدموها كهدية...وطبخت ارز بفول اخضر وخلصت من شوية ارز امريكي خلطتهم مع الارز العادي وحطيت شوية لوز مقلي على الوجة برضه من لوز صرله فتره وكمان لقيت (لاحظوا كلمة لقيت!!!!!)...يعني الواحد بينسى مرات شو عنده  يا جماعة!!!! المهم لقيت كيس تمر قديم (حوالي 3 اكواب) وعلى السريع حطيت عليهم 3 اكواب مي مغلية وبس طريوا طحنتهم وبالفريزر ل 3 كيكات تمر..بلاقيهم الواحد وقت الزنقة...

وطبعا صار عندي هاجس هلأ انه لازم ارجع فكرة اطبخ مما وجد من هون لآخر السنة ان شاء الله لانه جد في كتير اشياء ولازم استغلها...

قبل 7000 سنة هههههه اذا بتتذكروا حكتلكم عن مشروع صواني رخيصة جبتها وقررت احولها لشكل تاني واخيرا صحللي اخصص وقت لهالموضوع...
المهم هدول الصواني اللي اشتغلت عليهم جبتهم بدينار للصينية من كارفور...حجمهم مش كتير كبير بس ممتازين للاغراض اللي استعملتهم الهم..اليوم رح احط شكلين وببوست تاني بحط شكلين تانيين ان شاء الله...
هي شكل الصينية لما اشتريتها...مش بطالة بس مش زوقي والناس ازواق... :)



طبعا انا بعاني من انه خالد (زوجي) لما يحط اغراضه بس يرجع من الشغل بيكونوا بشكل مش مرتب على الdresser (شو dresser  بالعربي؟ مأساة...مش خاطر على بالي..
فقررت اني اجيب ورق حلو واقيسه على قد داخل الصينية عشان الزقه عليها ولحمايته من اي اشي جلدت الورق بورق التجليد الشفاف واستعملت مسدس الصمغ ولزقته على الصينية واسفة الصورة معتمة شوي بس اشتغلت بالليل وتمت العملية بحدود ال 15 دقيقة :)



وطبعا انا ما دهنت الصينية خليتها على لونها وهي الشكل النهائي...ارتب بكتير :)


والصينية التانية قررت احطها على الكومودينا جنبي وعليها كتبي ولاني كتير بحب الورد فقررت اني ادهنها ابيض عشان تتناسب مع الورق وعملت نفس الاشي وعليها كتبي اللي بقرأ فيهم بالليل حاليا...وكتب طبخ بالمناسبة هههههههه يعني مش اشي غريب او عجيب :) 





بتمنى يكونوا عجبوكم وما كلفت الصينية اكتر من الدينار لانه كل المواد التانية عندي بالبيت من ورق وعلبة دهان رش... :)

اما وصفة اليوم فهي وصفة للستير فراي الصيني بالستيك من زمان عندي ما بحب اغيرها جربوها بتمنى تعجبكم

ستير فراي
    المقادير:
لصوص النقع:
ملعقة كبيرة خل ابيض
2 ملعقة طعام صويا صوص
رشة ملح
رشة فلفل اسود
حبة ثوم مدقوق
2 ملعقة كبيرة نشا
500 غم ستيك (روز بيف) مقطع شرائح
للستير فراي:
جزرة كبيرة مقطعة شرائح
2 فليفلة حمراء وفليفلة صفراء مقطعة شرائح
3 حبات ثوم مقطع شرائح
بصلة مقطعة شرائح (يمكن استخدام بصل اخضر)
*يمكن استخدام اي خضار مثل البروكلي
3 ملاعق كبيرة زيت نباتي
قطرات من زيت السمسم

لصوص الستير فراي:
فنجان قهوة صويا صوص
2 ملعقة طعان نشا
2 ملعقة طعام خل
فنجان قهوة ماء
بصلة خضراء مقطعة شرائح
           
   الطريقة:
توضع كل مقادير صوص النقع في كيس ويوضع فوقها الستيك وتنقع لمدة ليلة.
في مقلاة نضع الزيت ويحمى ونضيف الستيك وتقلب لعدة دقائق ويراعى عدم وضع كمية كبيرة من اللحم مرة واحدة او في زيت غير حامي.
يضاف البصل والثوم ويقلب
يضاف الجزر والفليفلة وتقلب لعدة دقائق
تخلط مكونات الصوص الثانية وتضاف وترش بالقليل من زيت السمسم وتقدم



Tuesday, November 11, 2014

دونتس التفاح بالخليط المتعدد الاستعمالات

اذا بدي اقول شو قمة السعادة بشغل الانسان فاكيد هي الناس اللي بتقدره وبتحترمه وبتحترم شغله وبتحسسه انه بيقدم اشي يعمل فرق...بس من اروع هاي اللحظات لما التقدير بيجي من شخص قدير في نفس المجال اللي انت بتشتغل فيه..من شخص له صولات وجولات بالمطبخ (لانه مجال عملي) ...شخص بالنسبة الك هو معلم وقدير وياما تطلعت اله...لما بيجي التقدير من شخص هيك اكيد بتكون لحظة سعادة غامرة وبتخليك تحس انك ماشي صح...ست منال العالم...كل الحب والتقدير الك على رسالتك الحلوة واتصالك معي ومن دبي كمان...اكيد لحظة رائعة بالنسبة الي...انا تعلمت منك كتير وما زلت بتعلم...بستمتع وانا بتفرج على اي برنامج بتقدميه...قمة الاخلاق والذوق والفن والدقة...تحياتي الك من الاردن...ومن مدونتي المتواضعة...

السبت الماضي قدمت طبق الصفيحة الارمنية اللي كتير ناس سألتني عنه...وقلت وبعيد مرة تانية انه اصولها تنعمل حشوة نية على العجينة بس لانه افران البيت غير عن الافران برة انا بطبخ الحشوة عشان ما تنزل ميتها على العجينة ويصير زفرة غير مرغوبة او تعجن العجينة...نفس العجينة بستعملها للصفيحة الشامية بس حشوة بلبن...هي الطريقتين وبتمنى تجربوهم وكمان تحبوهم للي ما جربها
والحقيقة مبسوطة كتير من الصور اللي عم تبعتوها ...وانه في منكم جربها وحبها...


الصفيحة الأرمنية 
مقادير العجين:
٦ أكواب طحين
٢ كوب لبن
كوب زيت زيتون
ملح
١/٢ ٢ ملعقة صغيرة خميرة
الحشو:
٥٠٠غرام لحمة مفرومة (عجل أو خروف أو مخلوطة عجل وخروف)
2 ملعقة طعام زيت 
بصلة كبيرة، مفرومه ناعم
٢حبة ثوم، مفروم ناعم أو مهروس
١ملعقة صغيرة بهار سادة
١/٢ملعقة صغيرة قرفة مطحونة
١/٢ ملعقة صغيرة فلفل أسود
١/٢ ملعقة صغيرة بابريكا
٢ ملعقة صغيرة ملح
٤-٥حبات كبيرة بندورة (طماطم)، مفرومة مكعبات صغيرة
٤/٣ كوب بقدونس مفروم ناعم
2 ملعقة طعام فلفل احمر مشوي مهروس
١ حبة فلفل أخضر حلو، مفروم ناعم
١ حبة فلفل أخضر حار، مفروم ناعم (اختياري)
١/٢ ١ ملعقة كبيرة رب البندورة 
٢ ملعقة صغيرة دبس الرمان 
ملعقة كبيرة نعنع طازج، مفروم ناعم
١/٣كوب صنوبر
طريقة عمل الصفيحة
نحمي الزيت ونضيف إليه البصل ونقلبهم حتى يذبل البصل قليلاً بدون أن يتغير لونه. نضيف اللحمة والبهار السادة والقرفة والفلفل الأسود والبابريكا ونقلبهم حتى تستوي اللحمة.
عندما تستوي اللحمة وتتبخر معظم عصارة اللحمة نضيف الملح والفلفل الأخضر الحلو والفلفل الحار المفروم. ونقلبهم لمدة دقيقتين.
نضيف البندورة المفرومة ورب البندورة ودبس الرمان . نقلبهم فوق النار حتى تتبخر نصف كمية ماء البندورة. لا نريد أن تتبخر كل الماء حيث أن حشوة اللحمة عندما تبرد تتكثف معظم الماء ونحن نريد الحشوة أن تكون رطبة قليلاً.
نغلق النار ونضيف النعنع المفروم والصنوبر. نخلطهم جيداً.
نفرد العجينة بعد ونضع الحشو عليها وبالفرن على ٢٠٠ من ١٥-٢٠ دقيقة لتصبح ذهبية
* يفضل تغطية المعجنات بشكل عام بعد الخبز ببشكير نظيف لتظل طرية

وهي الفيديو



اما الصفيحة الشامية




حشو الصفيحة الشامية:
٥٠٠غرام لحمة مفرومة (عجل أو خروف أو مخلوطة عجل وخروف)
2 ملعقة طعام زيت
بصلة كبيرة، مفرومه ناعم
١ملعقة صغيرة بهار سادة
١/٢ملعقة صغيرة قرفة مطحونة
١/٢ ملعقة صغيرة فلفل أسود
١/٢ ملعقة صغيرة بابريكا
٢ ملعقة صغيرة ملح
٢ حبة بندورة مفروم ناعم
١/٢ كوب لبن
2 ملعقة طعام طحينة
ملعقة طعام خل
صنوبر حسب الرغبة
ملعقة طعام دبس رمان (اختياري)
الطريقة:
تقلب اللحمة والبصل بالزيت ثم البهارات والبندورة لتذبل قليلا ثم بقية المكونات وترفع وتبرد وتفرد على العجينة وتخبز ويمكن اضافة الصنوبر

ومتذكرين وصفة الخليط المتعددالاستعمالات...طيب...عملنا فيه كتير وصفات وكلها هون على المدونة 
وبما انه عم نحكي عن الاشياء الحلوة فمن اروع الاشياء بالشتاء هو التفاح 


وعشان اجمع بين التفاح والخليط المتعدد الاستعمالات عملت دونتس بالتفاح بشبة اللي بنشتريه جاهز بالمبدأ بس الطعم مختلف لانه ما في خميرة هون فما تتوقعوا انه زيه بالزبط بس زاكي كتير

دونتس التفاح بالخليط المتعدد الاستعمالات
المقادير:
2 كوب خليط متعدد الاستعمالات
1/2 كوب ماء بارد
بيضة
2 ملعقة صغيرة فانيلا
ملعقة صغيرة قرفة
1/2 1 كوب تفاح مقشر ومقطع صغير
للجليز:
3 كوب سكر بودرة منخل
3-4 ملاعق طعام حليب

الطريقة:
تخلط كل المقادير السائلة ثم تضاف المقادير الجافة ثم التفاح
نحمي زيت غزير ونأخذ مقدار من الخليط بملعقة كبيرة وننزلها على الزيت الساخن ونحمرها لتنضج ونصفيها فوق ورق نشاف 
نحضر الجليز بخلط السكر والحليب ثم نغطس الدونتس بالخليط
والف صحة

ممكن وضع سكر ناعم فقط على الوجة لحلاوة اقل


Wednesday, November 5, 2014

الخبيزة...اكلة قديمة وصحية

زي ما كتير منكم قرأ على الفيسبوك قبل يومين الله ستر وطلعت من مكة مول بالوقت المناسب قبل ما تبدأ المي تدخل على الطابق السفلي...الحقيقة الي زمان مش رايحة على مكة مول وقررت سبحان الله اني اروح هداك اليوم واشتري كم غرض وامر على مايلز...واللي صار هو اني لما دخلت الكراج الدنيا كانت شمس والسماء نسبيا صافية بحدود الساعة 10 صباحا...لما خلصت وطلعت للكراج كان في شوية زحمة بالكراج وضجة بس لسة ما كنت عارفة شو عم بيصير...نا علينا قلت ازمة زي العادة بالكراج...حطيت الاغراض بالسيارة وطلعت ولاحظت بمجرد ما بديت امشي انه المي عم تنبع...جد تنبع من المناهل...قلت بعقلي...معقول مجاري؟!!!! موضوع مش رائع على مدونة للاكل بس نرجع للسولافة...وانا طالعة من الباب وبلاقي بدون مبالغة نهر متجه باتجاه الكراج ولسة انا مش منتبهة انه الدنيا شتا لاني لسة ما طلعت من الكراج وتبعون الامن عم يركضوا لجوا...فتحت الشباك اسأل شو في  ولا رجل الامن بيقولوا " انفدي بجلدك" ...شو!!! ولا ما شاء الله الدنيا بره زخ زخ زخ وبرد وبرك مي هائلة والحالة حالة....دعيت ربي اوصل بسلام للبيت وكتبت البوست اياه على الفيس بوك تحذيرا لاي حد بده يروح على شارع مكة انه ما يروح لانه الشارع مش بس غرقان وكمان انجرفت التربة من الاماكن اللي مش مبني عليها وصار في حجار وتراب وطين بالشارع...الله ستر ووصلت البيت وغرقت وانا بطلع الاغراض...بس الحمد لله اجت سليمة...لو تأخرت 5 دقايق بس كان على الاغلب غرقت سيارتي بالكراج...الحمد لله!!!! رضا رب العالمين وان شاء الله رضا الوالدين!!!

وللتأكيد امبارح نزلت على وسط البلد وبس رجعت بحدود ال 12:30 برضه زخت الدنيا منيح (مش بسوء اول امبارح) بس برضه رضا ما تبهدلت وخاصة وسط البلد الوضع مطين بالشوارع بدون هالواسطة!!! يا ريت يحافظوا على النظافة...جد مكان رائع بس بيعاني من قلة النظافة وشوي ازمة اخلاق عند البعض خاصة اتجاه الستات!!! 

ما علينا..وانا ماشية بالبلد امبارح...في ست قاعدة على الرصيف وقدامها ربطات خبيزة بيشهوا... بس انا كنت مستعجلة فاطلعت علي بابتسامة حلوة  وقالتلي "يما بدك خبيزة؟" ابتسمتلها وقلتلها " يسلموا شكرا" وضحكتلي مع اني ما اشتريت منها وضليت ماشية بس ابتسامتها بعيوني...فحملت حالي ورجعت واشتريت منها 4 ضمم...ولما رجعت على البيت نقيتهم وغسلتهم وفرمتهم خشن وطلع معي صحن خبيزة من الآخر...اكلة تراثية قديمة بتمنى تجربوها للي ما بيعملها لانها مفيدة جدا وصحية وسهلة...


الخبيزة
المقادير:
4 ضمم خبيزة (الاوراق فقط) مغسولة جيدا ومنشفة ومفرومة خشن
بصلة وسط مفرومة
3 سن ثوم مهروس
3 ملعقة طعام زيت زيتون
ملح، فلفل اسود
1/4 كوب كزبرة خضراء مفرومة
بصلة مقطعة شرائح ومقلية لتصبح ذهبية الى مكرملة (للوجة
عصير ليمون

الطريقة:
يوضع الزيت بالطنجرة ونقلب البصل ليذبل ثم نضيف الخبيزة ونرشها بالملح والفلفل الاسدو ونقلب على نار هادئة لينزل ماءها وتنزل كميتها الى النصف تقريبا.
نضيف الثوم ونقلب قليلا ثم الكزبرة الخضراء
نضعها في صحن التقديم ونزينها بالبصل وتقدم مع الفجل وعصير الليمون والخبز الطازج..والف صحة

Sunday, November 2, 2014

المطابقة الاردنية...طبق يتناسب مع موسم عصر الزيتون

من اروع جروبات الطبخ اللي انا مشاركة فيها هو جروب نكهة عربية لانه عم بيرجعنا على التراث القديم واللي اذا ما حفظناه رح يروح مع جيل البرغر والناتشوز والبيتزا...طبعا كلها اكلات زاكية وانا شخصيا بحبها كتير ومش غلط ابدا انه الواحد يكون بيحب الاكل من الشعوب والبلاد المختلفو بس من غير ما يتخلى عن ثقافته الاصلية وبلاده واكلاتها الشعبية

مضيفتنا هاد الشهر العزيزة اريج الصمادي واللي قدمتلنا طبق انا ما كنت بعرفه...طبق اردني رائع جدا رح يكون من الاطباق اللي لازم تنعمل دائما ان شاء الله ببتي...انا سميتها بف باستري الاردن...هشة بطعم زيت الزيتون البكر الاصيل والبصل المذبل بالزيت والشومر والقزحة واليانسون....عرفتوه؟ طبق شهر 10 بمجموعة نكهة عربية هو المطابقة الاردنية..موسمها هلأ هي والمكمورة لانه هلأ موسم عصر زيت الزيتون.... 



بالمجموعة اريج قالت  انه الوصفة هاي عندها غير
الذكرى والايام الجميله والاهل واللمه والبرد والصوبايه كلها ذكريات رجعتلي وانا بعمل فيها ما فيه احلى من الماضي والجميل ولمة العيله بحضن دافي عطبخه طيبه دافيه . طبقي اليوم من قلب عروس الشمال من مسقط رأسي (اربد)بنسميه مطابقة بصل طبق قديم جدا وتقريبا الجيل الجديد ما بيعمله كتير للاسف.. كتير الطبق بيشبه المكموره الاردنيه لكن ما فيه دجاج عباره عن رقائق عجين محشيه بصل والكثير من زيت الزيتون مخبوزه تقدم ساخنه او بارده مع الزلطه الاردنيه الحاره وكاسة الشاي الساخنه  "



شكرا مرة تانية اريج وخلينا ندخل بالمفيد...ما تفكروها صعبة...كتير زاكية وجربوها

المطابقة الاردنية ...
المقادير:
٣ كوب طحين 
ملح 
 نص ملعقه حبة بركه ونص ملعقه شومر ونص ملعقه يانسون حبوب(اختياري)
ماء للعجين
الحشو
راسين بصل كبار 
كاس زيت زيتون
ملح
فلفل 
رشة كركم او عصفر 

الطريقة: 
بنعجن العجين العويص حتى يتشكل عنا عجينه طريه بفضل تنعجن حوالي ربع ساعه مع الدعك الجيد وتقرص لأقراص وتغمر بزيت الزيتون ونتركها ترتاح عالاقل ساعه



الحشو 
نفرم البصل فرم ناعم نضع بالقلايه زيت الزيتون وبس يحمى نضع البصلات مع الملح والفلفل حسب الرغبه والعصفر او الكركم ونبداء بتقليبه حتى يذبل البصل ويستوي


1- نضع على رخامة المطبخ كمية من الزيت الزيتون ونبداء برق العجين حتى تصبح رقيقه وشفافه
2 و 3 و 4 ونفرد عليها ملعقه كبيره من الخليط ونطبقها كما في الصوره ونضعها على جنب
5 نفرد قرص اخر بنفس الطريقه نضع بصل ونفرده ونضع العجينه المطبقه الاولى بنصف هذه المفروده ونطبق العجينه المفروده عليها بنفس الطريقه نكمل بهذه الطريقه حتى نكمل العجين نترك القرص الكبير يرتاح نصف ساعه
6- ثم نضعه بصينيه دائريه ونفرده جيدا وبحذر حتى يتشكل عنا رغيف كبير مكون من كل الطبقات 


طبعا الفرن حامي من قبل حراره ٣٨٠ ف نضع الصينيه بالفرن تخبز حوالي ٣٥ دقيقه ل ٤٠ دقيقه المده تعتمد على عدد الطبقات
انا عملت 7 اخدت 60 دقيقه و غطيتها بالفويل قبل الخيز وبصينية ذات حواف وتركتها بالفرن عنار وسط مده اطول حتى تستوي الطبقات 
تقدم ساخنه جنبها السلطة او خيار ولبن او شنينه 

بجد رااااااااااااااااااااااااااائعة


ومن جوة