Sunday, August 31, 2014

اطباق حلقة السبت 8/30 على دنيا يا دنيا

اولا اسمحولي اشكركم على كل اللطف والدعم والمتابعة اللي عم تعملوها...جد اني فخورة بانه لدي معارف واصدقاء مثلكم...وفي نفس الوقت اشي محزن ومضحك معا اديش في ناس تشعر بالاسى الداخلي لدرجة انها تكتبلي اشي مثل تعليق شخص وبدون ذكر اسماء من حلقة السبت الماضي على دنيا يا دنيا وقناة رؤيا بانها بتكرهني!!! جد!!! بتكرهيني!!! لهالدرجة!!! يعني الكره كلمة وشعور  قوي جدا في قاموسي وما بنحكى الا اذا الشخص اللي بكرهه اذاني بشكل كبير...وحتى يمكن ما اقدر اكرهه بمعنى الكراهية او استخدم عبارة مثل هيك خاصة والشخص اللي علق لا بيعرفني ولا عملتله اشي!!! جد اشعر بالاسف على نوعية قلب هاد الشخص وشو شكل حياته اذا هو شاغل حاله ومساحة من قلبه بانه يعبر عن شعور قوي زي الكراهية وعلنا وكمان لشخص ما بيعرفه ولا سواله اشي غير انه بيطلع يطبخ على التلفزيون؟!!! طيب مين قاله يتفرج؟!! جد!!! اللي مش حابب يشوف ما في ضريبة اذا قلب المحطة!!! اشي بيضحك وببكي بنفس الوقت!!! يعني تفسير عميق وواضح ليش بنضل نقول والله الوضع صعب والناس مش هي الناس...وهي عينة من هالناس...يمكن البعض يفكر اني زعلانة بس والله ابدا...مش على حالي...بس زعلانة على مستوى الاخلاق اللي انحدر بانه الواحد يبهدل او يشتم او يجرح شعور شخص هو ما بيعرفه اصلا...!!! جد الله يجيرنا من الاصعب...وما الي غير مقولة " كل اناء بما فيه ينضح" وبس...

وبالمقابل والحمد لله في ناس محترمة جدا حتى لو انتقدت وعلقت بشكل ما على وصفة وقالت انها  مش الوصفة الاصلية وغيره...بيكون بشكل بناء...وبحب اقلهم برضه وعلى قد ما بحترم رأيهم..انه الناس اذواق وانه عشان هيك في طباخين كتييير بالدنيا وكل واحد اله طريقته...وبخص بالحكي التعليقات على تسقية الحمص...مش اصلية!..ما فيها ايلي (المادة اللي بتنضاف مع عصير الليمون بعد خلطها بالخلاط ليصير شكلها مثل الحليب)..الخ...يمكن مزبوط بس انا بعملها هيك..وما في شرطة الاكل تقولي ما بيصير تسميها هيك...يعني مثال بسيط ومحلي هو المنسف...كتير ناس بسلقوا اللحمة بالجميد وبيقولوا هي الطريقة الاصلية وفي ناس ما بيحبوا وبيسلقوا اللحم لحال وبعدين بيضيفوا اللبن...وين شرطة الاكل تحاسب؟!!!! الناس اذواق وعلى رأي مثل تاني عامي "كول على ذوقك والبس على ذوق الناس"...تسقية الحمص او الفتة الشامية اللي عملتها على رؤيا الاسبوع الماضي هي الطريقة اللي انا بعملها ببيتي..وعيلتي بتحبها...انا ما قلت انها الاصلية ولا اعتديت على التراث!!! ولا قلت رح اعمل تسقية بالفقسة (يعني الايلي)...وانا اختصرت خطوة طحن الحمص للتسهيل ولاني بدي اغير...واكيد بالنهاية بيرجع الكم...يا بتعملوها مثل طريقتي او بتغيروا...وبرضه ما رح اكون شرطة الاكل عشان احاسب اي حد...هاد اكل بالنهاية وحرية شخصية... والف صحة على قلوبكم بغض النظر عن الطريقة اللي بتختاروها...

انا من الناس اللي بحب اعبر عن رأيي وما بستحي اني احكيه طالما لا عم بضايق حد او بجرحه او بشتمه..وبالنهاية هاي مساحتي الخاصة للبربرة الاكترونية واللي بفكر فيها بشكل مكتوب وبصوت عالي...

ما علينا بكفي بربرة ..وندخل بالمفيد...فيديوهات السبت الماضي والطرق زي ما وعدتكم مكتوبة..

الحيدري 
المقادير:
700 غم لبن مصفى من الماء قليلا
200 غم جبنة فتة
1/2 ضمة بقدونس مفروم
1/2 ضمة نعنع مفروم
1/2 ضمة شبت مفروم
2 حبة ثوم مهروس
ملعقة طعام عصير ليمون
للوجة: شرائح فلفل احمر حار، زيتون اسود، بقدونس، زيت زيتون


الزيتون الحلبي
المقادير:
2 كوب زيتون اخضر مزال البذر
بصلة صغيرة مفرومة ناعم
2 ملعقة طعام شطة حمرا
فلفل اخضر حار مقطع شرائح
حبة ليمون مفرومة ناعم
حبة بندورة مفرومة ناعم (اختياري)
زيت زيتون




فول مدمس بالقشطة والفليفلة والطحينة
المقادير:
علبة فول مدمس مهروسة
2 ملعقة طعام زبدة
بصلة صغيرة مفرومة ناعم
2 حبة ثوم مهروس
حبة فليفلة خضراء صغيرة مفرومة ناعم
حبة بندورة مفرومة ناعم
ملح
2 ملعقة طعام كريما او ملعقة طعام قشطة
3 ملعقة طعام طحينة
عصير ليمونة
1/4 كوب بقدونس مفروم
1/4 كوب كزبرة خضراء مفرومة (اختياري)
للوجة: زيت زيتون 


قالب الكنافة بالسميد
المقادير:
لطبقة الكنافة
1/2 كيلو كنافة خشنة
اصبع زبدة مذاب

لطبقة السميد:
كوب سميد ناعم (فرخة)
1/2 1 كوب حليب بودرة
5 كاسات ماء
ملعقة كبيرة ماء زهر
بضع حبات مستكة مطحونة

لطبقة الوجة:
كريما مخفوقة
فستق حلبي
كرز مجفف 

للتقديم:
قطر بارد

واخيرا وليس آخرا الطبق اللي عمل ضجة وبلبلة...هههههه وانا مصرة وحابة اسمي تسقية الحمص وعلى طريقتي :)



تسقية الحمص على طريقة منال عبيدة
المقادير:
3 كوب حمص مسلوق مع القليل من ماء السلق
2 رغيف صغير خبز مقطع مكعبات مقلي او محمص 
كوب ونصف لبن
3 ملاعق طعام طحينة
عصير ليمونة 
حبة ثوم 
ملح

للوجه:
صنوبر
سمنة او زيت زيتون
رشة من الفلفل الاحمر والكمون 
بقدونس ناعم
القليل من الحمص

Tuesday, August 26, 2014

كعكة الطائر المغرد

بالعودة للمدارس بدأت الحياة نسبيا ترجع لطبيعتها ومع ذلك مش تماما وعلى الآخر لانه هارون ببدأ الدوام ان شاء الله الاحد الجاي فيعني لسة في حد قاعد ومش اي حد...حد بده تركضي وراه طووووول الوقت...الله يخليهم ويسعدهم ..
عندي كتييير اشياء اشارككم فيها من مشاريع منزلية تم انجازها الى اكلات عديدة ووعدت اني اتنشط الفترة الجاي واتمنى اكون عند كلامي..بعدين عملية تعزيل 101 لسة ما بدت بالبيت وان شاء الله نبدأ الاسبوع القادم مع ذهاب النونو للمدرسة...هاد رح يكون اله جزء من الحديث في الايام الجاية...وعشان بلا طول سيرة اديش منكم بيزيد عنده موز خاصة بالصيف (بحسه ما عليه طلب)؟ اليوم الوصفة لكيكة لذيذة بالموز اسمها Hummingbird Cake يعني كعكة الطائر المغرد؟ ليش طيب؟ اكيد مش لانها معمولة من الطيور المغردة...بس لحد الآن ما حد عارف اذا في قصة وراء التسمية الا لانه الكيكة كتير حلوة وبتشجع الطيور المغردة تيجي عليها مثل ما بتيجي على الرحيق الحلو...جربوها...رح تعجبكم اكيد

كعكة الطائر المغرد
المقادير:
كوب بيكان او جوز مفروم خشن ومحمص
1/2 2 كوب طحين
1/2 1 ملعقة صغيرة كربونات الصوديوم
ملعقة صغيرة قرفة
1/2 ملعقة صغيرة ملح
كوب زيت
2 كوب سكر
4 بيضات
2 ملعقة صغيرة فانيلا
3 موزات متوسطة مستوية ومهروسة
علبة اناناس صغيرة مطحونة بالخلاط مع عصيرها
للوجة:
1/2 باكيت (110 غم) جبنة كريمية
2 كوب سكر ناعم منخول
ملعقة صغيرة فانيلا
2-3 ملاعق طعام حليب سائل

الطريقة:
يخلط الطحين والكربونات والقرفة والملح
يخفق الزيت والسكر والبيض واحدة بعد الاخرى وتضاف الفانيلا
يضاف الموز والاناناس ثم الطحين والبيكان او الجوز المحمص
تسكب في قالب مثقوب من النصف Tube or Bundt pan ومرشوش بالطحين بعد دهنه بالقليل من السمنة وتوضع في فرن على حرارة 180 مئوي لغاية ما تجتاز اختبار الكيك
بدها حوالي ساعة واذا حسيتوا انها لسة ما عم بتستوي وبدت يحمر وجهها خفضوا حرارة الفرن الى 160.

تقلب على سلك معدني لتبرد
يحضر الجليز بخلط المكونات لتصبح كريميو وسهلة السكب وتسكب على الوجة وتزين بحبات البيكان او الجوز
تقدم مع احلى كاسة شاي...والف صحة..


Monday, August 25, 2014

وصفات فقرة المطبخ ليوم السبت 8/23 على دنيا يا دنيا وقناة رؤيا ووصفة البصارة المصرية



واخييييرااااااا.... اكيد عرفتوا عن ايش عم بحكي؟!!! بدت المدرسة!!!! ووووههههههووووو!!! جد...!!! معلش لو كان في مجال افقع زغروتة الكترونية كان عملت هيك!!! مع اني بالواقع افشل شخص ممكن يزغرد...المهم...يوم رائع من الانجاز على صعيد العودة للمدارس من تنظيم وترتيب...ولسة المشوار باوله...ومع انه النونو هارونو لسة ما داوم...بيداوم الاحد الجاي ان شاء الله..الا انه مشي الحال وقدرت انجزلي كم شغلة هون وهناك من اشراف على التعزيل لغرفة التلفزيون لضبضبة شوية اواعي وغسيل وطبخ وضبضبة العاب وكتب..اشي للتفريق واشي للكب...

بتمنى مع عودة الاولاد للمدارس انه ارجع لنشاطي التدويني واللي اشتقتله كتير.... 
وصفات السبت الماضي 8/23 على قناة رؤيا وبرنامج دنيا يا دنيا كانت كالتالي:

شاورما اللحم بفخدة الخروف


سلطة الخس بالبرتقال والفتة




بودرة الثوم


والحلو....مربعات السمورز


وهي الطريقة:
 وصفة المدونة لليوم هي البصارة المصرية على طريقة الصديقة رحاب البارودي من مصر...متذكرين المجموعة العربية من الطهاة والمحترفين اللي عملناها قبل فترة وحطيت بوست الدقة الغزاوية؟ الشهر هاد كانت مضيفتنا رحاب من مصر وشاركتنا وصفة تراثية في عائلتها وهي البصارة... احنا بنعمل البصارة بالفول المجروش والملوخية الناشفة بس طريقتها ما فيها ملوخية...والطعم رائع...جربوها ومش رح تندموا... رحاب ومن خلال مشاركتها بينتلنا انه (وهذا اقتباس من كلامها)


قال تعالى في سورة البقرة الآية 61"
بسم الله الرحمن الرحيم
(وإذ قلتم ياموسى لن نصبر على طعام واحد فادع لنا ربك يخرج لنا مما تنبت الأرض من بقلها وقثائها وفـــــومها وعدسها وبصلها..) صدق الله العظيم 
كان هذا حديث بنو اسرائيل لنبيهم موسى عليه السلام طلبا لخيرات الارض مما عرفوا فى ارض مصر فلما خرجوا منها بالرغم من عطاء الله لهم وسقوط المن والسلوى عليهم الا انهم اشتاقوا لخيرات ارض مصر .
وفى ارض مصر العظيمة زرع المصرى القديم وعَلم العالم زراعة البقول والثوم والبصل والعدس والقثاء , ومن هذه الخيرات طبخ أشهى الأكلات الغنية بالبروتينات النباتية والتى توراثتها الاجيال حتى الأن ومن أشهر هذه الأكلات التى لا تزال على موائد المصريين العامرة حتى الأن أكلة البصارة او البيصارة والبصارة هو الاسم العربى المستمد من الاسم الفرعونى بيس أورو 
والاسم كما نرى متكون من مقطعين, الاول ( بيس )بمعنى (مطبوخ )- والثانى (أورو) بمعنى (بقول ) وطور اقباط مصر الاسم فى لغتهم القبطية واصبح (بيسار ) وإن ظلت الوصفة محتفظة بنفس مكوناتها وأسرارها , إلى أن دخل الأسلام مصر وتكلمت مصر العربية وأستمرت الاكلة بنفس مكوناتها تطبخ وتقدم على الموائد المصرية بأسم البصارة .
هذه المقدمة لا بد منها لنعرف العالم وخصوصا من يحاول الاستيلاء على تاريخنا وثقافتنا من نحن وماهى جذورنا , ولكن تعالوا معى لتتعرفوا على قصة وصفتى للبصارة التى ورثتها عن أمى وعمتى ودعونى أحكى لكم كيف وصلت لى بخط والدتى ...

حكت لى أمى أنها حين تزوجت أبى كانا شابين فى بداية حياتهما وكان ولابد ان تعد قوائم طعام تناسب ميزانية الأسرة الوليدة ,وعليه فقد أستعانت الزوجة الشابة بنصائح شقيقة زوجها التى كانت تكبرها سنا وتحترمها وتعدها شقيقة كبرى لها ونصحتها عمتى أن تطبخ يومين فى الاسبوع وصفات نباتية قليلة التكاليف عالية القيمة الغذائية وعلى رأس هذه الوصفات وصفة البصارة المصرية الشهيرة ولكن والدتى أعترفت لعمتى وهى خجلى انها لا تعرف كيف تعد البصارة وفورا أملت عمتى على والدتى وصفة البصارة على الطريقة البارودية التى احتفظت بها أمى فى دفترها الخاص بوصفات الطهى والتى كانت "دائما تقول لى أنها تجمع هذه الوصفات وتكتبها لى"



البصارة المصرية بطريقة رحاب البارودي

المقادير:
كمية من الفول المجروش (انا حطيت كوب كبير) منقوع ومغسول 

5 اسنان ثوم
بصلة مفرومة
ضمة كبيرة كزبرة
ضمة كبيرة بقدونس

للوجة:
سمن
ثوم مدقوق
بصلة متوسطة مقطعة جوانح
كمية (حوالي ملعقة صغيرة من الكزبرة الناشفة والكراوية) تطحن
ملح وفلفل اسود

الطريقة:
يسلق الفول بالماء ويضاف البصل والثوم وعندما ينضج تضاف الاعشاب ثم تقلب قليلا وتصفى من الماء وتملح وترش بالفلفل الاسود وتطحن ناعم
في مقلاة نضع السمنة ونقلب البصلة لتحمر وترفع
نضيف الثوم والكزبرة الناشفة المطحونة والكراوية ونقدح للبضار (الطشة بالمصري)
نزينها بالبصل المقلي...وانزل ياللي بتنزل...مممممم



Wednesday, August 13, 2014

وصفات حلقة السبت 8/9 على قناة رؤيا واكواب الجلو المايلة


الف سنة؟!!!! هيك  احساسي من آخر مرة كتبت فيها هون...شو قصة الصيف هاد...عجقة؟!!! كلمة قليلة عليه!!! انهديت!!! كلمة لا تعبر عن الضغط اللي انا فيه!!!! الحمد لله احسن من القعدة بس جد مش معقول الوضع...طبعا غير الظروف اللي بالمنطقة وحالة النكد اللي احنا فيه وعقدة الذنب اللي مش عارفة شو بدي احكي فيها ولا ولا ولا... تخلونيش ابدا...

من اكتر الاشياء اللي تعبتني هاد الصيف انه البيت ماشي...ماشي بكل ما تعني الكلمة من معنى!!! ما اظن انه في اشي بمحله مزبوط مع كل الركض طول الوقت...مو مصدقة وتبدأ المدرسة وارجع يكون في وقت الصبح عشان اقدر انظم واعيد التنظيم...حديقة البرندة الحلوة اللي متذكرين تعبت عليها...كم يوم شوب والبنت اللي عندي ما سقت الزريعة جابت خبر نص القواوير...عشان هيك قررت قرار حاسم اني ما ازرع الا النبتة اللي متعارف عليها باسم الخبيزة(لانه ورقها مثل الخبيزة)  لانها الوحيدة اللي صمدت بوجه البرد القارص بالثلجة الماضية وبالحر الشديد بالاكم يوم الفايتين...

اما على صعيد الاكل فكتير اشياء انعملت بس ما كان في وقت للتصوير او الصور موجودة وبدها تصغيير او انه المراق مش جاي واعتمدت على انه احنا معزومين تقريبا كل يوم هاد الصيف اما على العشاء او الغدا فالجماعة قضوها اشياء تمشاية حال لانه في اكل مرتب بعدين...بس جد مشتاقة لحالة من الاستقرار الجسدي والنفسي...كيف صيفكم انتو؟!!!

آخر الوصفات السبت الماضي على قناة رؤيا وبرنامج دنيا يا دنيا هي كانت تحت "ما يطلبه الجمهور" وطلباتكم اوامر وحاولت اني اشمل جزء منها...اذا عندكم اي طلبات تانية ارجو تخبروني...

لستيك الدجاج بصوص الفطر واللي بجد بنصحكم تجربوه هي اللينك للفيديو

اما لعمل الحليب المركز المحلى بالبيت وفدج الشوكواتة البيضاء بالبسكوت فهي الفيديو

ولسلطة السيزر باكواب التوست وبدون مايونيز فهي الفيديو

ولخبز الثوم فهي الفيديو

وطبعا من الاشياء اللي شغلتني الفترة الماضية كانت العزايم..من الاشياء اللي بحبها بالعزايم هو التزيين...يعني مش بس للاكل وكمان للسفرة والقعدة...عملت هالفازات لتزين القعدة واستعملت مرتبانين مخلل كبار قمت الليبل من عليهم بالطريقة اللي مرة شاركتكم فيها وحطيت جوا كل مرتبان زجاجة عصير برضه قمت الورقة عنها وحطيت شرايح ليمون اخضير بين المرتبان والزجاجة والتانية شرايح ليمون اصفر وعبيت مي بيناتهم وبزجاجة العصير كمان وحطين الزهور اللي اشتريتها بهالشكل...



وطبعا شرائح الليمون بعد ما روحوا الضيوف صفيتهم وبالفريزر واستعملتعم لتنظيف الدجاج..فما راحوا خسارة..  :)

وهالحلو كان من ضمن الحلويات 


جلو فراولة بتصبي جزء منه في الاكواب وبتميلها حوة صينية (انا استعملت صينية الميني مفن) وبس يجمد (رح يجمد بسرعة) بقية الجلو مع شوية كريما مخفوقة وبتنزليه بكيس الكريما وميلي ليجمد وبعدين كريما مخفوقة وحبة فراولة...سهل ..سهل وببين انك هلكتي وهو سهل كتير..

موعدي معكم بكرة ان شاء الله وبوست جديد...مع حبي


Wednesday, August 6, 2014

وصفات يوم السبت 2014/8/2 و الاثنين 2014/8/4 على قناة رؤيا


تحياتي للجميع وهي الروابط للوصفات...

وصفة الدجاج الهندي بالعسل
 برياني الخضار

سلطة العدس بالحلوم


كريم كراميل التمر
كرات الجبنة بالزيتون
http://www.youtube.com/watch?v=60-A4zyXCA8

البروسكاتا باللبنة والبندورة المشوية

تغميسة الشيبس الغنية

الدونت مفن