Friday, July 25, 2014

Gazan Daggaالدقة الغزاوية

Note: the full English Version of this post is below

قلبي مفطور ومن الحامض لاوي على قولة ستي الله يرحمها..لا في نفس للكتابة ولا للطبخ ولا للتصوير...ومؤخرا ومع الوضع في غزة زادت الامور صعوبة بوفاة قريب عزيز بحادث سير مؤسف على طريق السعودية ومعاناة طويلة لاهله ليحصلوا جثمانه ليدفنوه...جد اشي محزن والله يصبر عيلته ويتكفل باولاده...واللي زاد وغطى..محاولة لواحدة صهيونية في جروب للتصوير انا مشتركة فيه مع كتير من الصديقات المبدعات في الطبخ والتصوير لسرقة سلطتنا العربية...شايفين لحد وين!!! الله لا يعطيها العافية لا هي ولا بني صهيون...وقال شو منزلة الصورة على انها سلطة اسرائيلية...حسبي الله ونعم الوكيل...المهم حاولنا نرد قد ما بنقدر واشي منا طلعوه من الجروب واشي بهدلهم وانسحب من الجروب المعادي للانسانية ...وتمخض عن كل هالمهاترات ولادة جروب "نكهة عربية" من الصبايا العربيات من انحاء العالم اللي بيحبوا يطبخوا ويصوروا لنحاول نوثق تاريخنا بالاشي اللي منفهم فيه..الاكل... لانه الاكل جزء مهم من ثقافة اي شعب ..

ومع كل هاد  بعتبر هاد البوست من اكتر البوستات اللي اسمتعت بالشغل فيها وبكتابتها...جد..

واول محاولة النا هي توثيق الدقة الغزاوية...اقل اشي ممكن نعمله لتوجيه تحية لابطال غزة...واللي استضافتنا هاد الشهر...نسرين شوا...بنت غزة هاشم وصاحبة مدونة Monsterscallmemama ...نسرين عملت الدقة من فترة وبتلاقوها على مدونتها الرائعة على هالرابط.... واحنا كمجموعة طبقنا الوصفة وهي تطبيقي...بس قبل هيك لازم اعترف اعتراف خطير يمكن يزعل اهل غزة والجروب ونسرين وهو اني ما بقدر على الحار ابدا وعادة ما بشتري الفلفل الحار...بس لعيون غزة وعيون اولاد غزة نزلت واشتريت الفلفل




 وعملت الدقة وشاركت فيها اهلي اللي بيستمتعوا جدا بالفلفل الحارواكلوها مع فتة حمص واحنا مع جبنة بيضاء...نااااار يا حبيبي نار...

بس قبل ما ابدا بالطريقة...في قصة حلوة كتير حكتلنا اياها مي الجنيدي، واحدة من اعضاء الجروب، عن الدقة الغزاوية على لسان زوج اختها رندة واسمه سعيد وحبيت اشارككم فيها لانها معبرة جدا...

القصة بكلام مي...
سعيد رجل فلسطيني وطني جداً من غزة، عاش أول فترة شبابه فيها و طلع منها أول الثمانينات لكن قلبه و روحه و عقله ضلوا فيها، عاصر في هذه الفترة اليهود في غزة و كان إله تعامل مباشر معهم. كان عمره ١٦ سنة و بدور على شغل عشان يحوش شوي و يكمل دراسته الجامعية عن طريق وكالة الغوث للاجئين، على مضض لقي شغل في مطعم سمك يهودي كل زبائنه يهود، فكانت طريقته الوحيدة وقتها عشان يقهرهم انه من بين كل ٦ سمكات، يترك ٢ زي ما همة و ما ينظفهم و يغطهم بالطحين و يقليهم و يقدمهم للزبائن!! عدى أول يوم، و الثاني، و الثالث لغاية ما عدى أسبوع، حتى تعجب صاحب المحل اليهودي من عدم تكملة الزبائن لوجباتهم، فقرر انه يذوق السمك بنفسه و اكتشف المصيبة.. طبعا انطرد سعيد بدون ما يحصل على قرش أحمر عن الأسبوع اللي قضاه بينظف و يقلي سمك، و طلع من المطعم و هو ما معه حق المواصلات لأنه كان المفروض يقبض راتبه في نفس اليوم. من قهره ضل يمشي لغاية ما تعب و عطش و جاع، بعدها بشوي مرق جنب ٤ شباب قاعدين في منطقة فيها شجر على طرف الطريق، سلم عليهم و سألهم اذا معهم شوية ماء يشرب، أصروا إلا يقعد معهم و يأكل و يشرب، طبعا سعيد ما سدق..

فتح واحد من الشباب الكيس اللي معه و طلع ١٢ قرن فلفل أخضر حر و بصلة و حبة بندورة وحدة.. نعم.. وححححدة!!! و بلش يحضر الدقة الغزاوية ببقية المكونات المخلوطة في عبوة على جنب، و لعدم وجود مدق استعمل الشب حجر و صار يدق بالمكونات في صحن نحاس و حضر الدقة. طلعوا الخبز الناشف و قالوا بسم الله و بلشوا أكل. سعيد كان عارف انه ممكن يصاب بحروق درجة ثالثة اذا أكل معهم بس ما قدر يحكيلهم لأ بعد كرمهم معه، بالإضافة الى انه كان واقع من الجوع، و قال بعقله بالفلسطيني: "حط راسك بين هالروس و قول يا قطاع الروس"، بالعربي: الموت مع الجماعة رحمة!!
و أكل سعيد أول لقمة و الدموع سحسحت من كل جنب و صوب و ضل يأكل لغاية ما بطل يحس من عند
رقبته و فوق و لا بأصابع إيده اليمين.. و اختفت الدقة من الصحن!
بس خلصوا كلهم أكل سأل الشباب سعيد شو قصته و حكالهم إياها، دبت فيهم الحمية و قالوله احنا بنجيبلك حقك.. و دبت الشجاعة في قلب سعيد كمان.. قاموا أخذوا سرفيس و طلعوا لعند المطعم، طبعا الشباب طلعوا من النوع القبضاي عريض المنكبين.. ما لحقوا ينزلوا من السرڤيس و توجهوا للمطعم و شافهم اليهودي الجبان إلا و ركض لعند سعيد و حط راتب الأسبوع في إيده.
خلاصة القصة؛ الدقة الغزاوية لأهل غزة زي السبانخ لبوباي.. بتعطيك جوانيح! بس بحلف سعيد انها أطيب و ألذ دقة غزاوية أكلها بحياته كلها، و ختم قصته بجملة: "الدقة الغزاوية هي طعام الشجعان".. نصرك الله يا غزة و حماكي.."

شكرا يا مي على هالقصة ولانك سمحتيلي استعملها...

عناصر الدقة الغزاوية بسيطة كتير بس مفعولها بيطلع على الراس لفوق ...



الدقة الغزاوية على طريقة نسرين الشوا هي كالتالي...

الدقة الغزاوية
المقادير:
٦ قرون فلفل أخضر حار، منزوع البذور ومفروم ناعم
١ حبة بصل متوسطة الحجم، مفرومة ناعم
٢ ملعقة صغيرة بذور الشبت(عين جرادة)
رشة ملح
٢ حبة بندورة متوسطة الحجم، مفرومة ناعم
عصير ليمونة
٣ ملاعق طعام زيت زيتون

الطريقة:
في هاون او جرن زي ما اهل زمان بيقولوا بندق ونهرس الفلفل والملح وعين الجرادة والبصل...واللي ما بيعرف شو عين جرادة مش يفكر انها عيون جراد مجففة...هههه هي بذور الشبت وهي شكلها


واللي ما بيلاقيها ممكن بستعمل شبت اخضر وهي شكله..


وبعد الدق شوي


وبعد ان تنعم المكونات نضيف البندورة ونستمر بالدق بشكل خفيف ثم عصير الليمون والزيت...
والنتيجة...


واللي بيحب ياكلها مع خبز سخن وجبنة بيضاء...اشي بيفتح النفس..


ومع مي بالله لانه رح تولعوا...مع انه بعرف المي ما بتنفع بهيك حالة...

بتمنى تجربوها وشاركوني وشاركونا في توثيق اكلاتنا الشرقية الرائعة ...

It is with a broken heart, I find my self writing after a good number of absent days from my beloved blog. The situation in Gaza, the killings of innocent children, women and civilians, the atrosties that is going on while the whole world is watching in silence is just heart breaking. This Ramadan has been a tough one, not in terms of fasting but in terms of what has been going on all around us in the Middle East. Add to this a sudden death for a young man in our family, my husband's cousin, who dies in a car accident while coming from KSA to Jordan to spend Eid vacation with his family. My heart goes out to his wife, children, mom and extended family. Add to all of this, a recent situation that occurred on one of food photography groups where a member decided to steal and I emphasize "Steal" a very authentic Arabic recipe for a simple salad, adding tuna to it and calling it "Israeli ceviche". When we stood up for our rights as Arabs in general and Palestinians in particular especially that this is what we can do for now in the current situation which Gaza is going under, we were kicked out from the group just for standing out for our right to claim the authenticity of this salad. I just can't help but to wonder if the situation was the opposite and we stole an Indian recipe and called it Moroccan or Arab...what would have happened?!!! Just a thought!!!

However and looking at the bright side of things, we the Arab foodies decided to create this wonderful group "Arabic Flavor" to document our heritage.. our food that is partially what defines who we are and where do we belong to...it is a tribute to our an-sisters and our beloved people in Palestine in general and in Gaza in particular...to them and for them we decided to choose a monthly recipe to share with all of you...a very authentic one that defines us...this month it is the Gazan Dagga...our beloved host is the daughter of Gaza, the monsters mama, Nisreen Shawwa of Monsters call me mama; a great blog that you all should check out. Nisreen gave us this challenge and I hope that we will give it its worth. 

One apology I have to make or should I call it a confession, is that I don't have a taste bud for hot food, this Dagga is very hot, however, I made it and took it with me to my parents house where they enjoyed it big time. My dad is a big fan of hot food....Thank you Nisreen for the recipe and here is my application to it...

The recipe according to the Monster's Mama; Nisreen Shawwa is:



Gazan Dagga
Ingredients:

6 green chili peppers, seeded &  finely chopped
1 medium onion, finely chopped
2 tsp dill seeds
Pinch of salt
2 medium tomatoes, finely chopped
1 lemon, juiced

3 tbsp olive oil (use Extra virgin)
Directions:
In the mortar, pound chili, onion, dill seed and salt very well till you get a close to smooth mixture
Add tomatoes and pound again gently till tomatoes are all crushed. Add lemon juice and E.V.O.O.





Thursday, July 10, 2014

باي الكنافة الرخامي بالمهلبية وقمر الدين

مع رمضان مع عم بيكون في مزاج كتير عندي للقعدة على الكومبيوتر...عشان هيك عم بتأخر بالبوستات مع انه في كتير اشياء حابة اشارككم فيها...وعشان السرعة والمزاج خليني ادخل بالموضوع دغري...

عندي حوالي 2 كوب عجينة كنافة بالفريزر ولاني قررت استعمل اللي عندي زي ما انتو عارفين...فقررت اعمل كنافة بالمهلبية وقمر الدين...والطريقة اسهل من هيك عبث وسميتها باي الكنافة الرخامي بالمهلبية وقمر الدين


 باي الكنافة الرخامي بالمهلبية وقمر الدين
المقادير:
1/4 كيلو كنافة طازجة مقطعة باليد خشن
1/2 اصبع زبدة مذابة
1/2 مقدار من وصفة مهلبية بقمر الدين مبردة
فستق جلبي مطحون للزينة
قطر

الطريقة:
تفرك الكنافة بالزبدة وترص جيدا بقالب الباي وتخبز على 180 لغاية ما تشقر وتصبح ذهبية
تترك لتبرد وترفع بخفة على صحن التقديم
نضع كمية من المعلبية الباردة وبملعقة طعام ننزل عليها بشكل متفرق مهلبية قمر الدين ونعمل شكل رخامي بالشوكة او السكينة
تزين بالفستق الحلبي المطحون وتقدم مع القطر البارد

Tuesday, July 8, 2014

طلباتكم اوامر...فتة الفول الاخضر والمندي

عم بحس حالي عم بموت من التعب مؤخرا ...الصيام مش صعب بس مع المشاوير والطلعة والمسؤوليات ما عم بيضل في نقطة طاقة بآخر النهار..حد حاسس هيك؟ الحمد لله والله يعين..

ولاني انشغلت مؤخرا...بس طبعا ما انسيتكم وانطلب مني اكتر من وصفة وبهمني اكيد اني اصورها عشان اشارككم فيها...

اول طلب كان لفتة الفول الاخضر 

في طرق كتيرة منها باللحمة ومنها بدون....طريقتي باللحمة المفرومة والشبت...لاحظتوا اني بحب الشبت كتير...جد وهو رائع مع الفول...



فتة الفول الاخضر
المقادير:
2 ملعقة طعام زيت زيتون
1/2 كيلو فول اخضر مقطع
1/2 ضمة كزبرة خضراء
1/2 كوب شيت اخضر مفروم
3 سن ثوم مهروس
عصير ليمونة
كوب مرق دجاج
ملح، فلفل اسود
4 اكواب مكعبات خبز مقلي
للوجة:
اوقية لحمة مفرومة ناعم معصجة (مقلبة بالقليل من الزيت والملح والفلفل الاسود والقرفة والبهار)
2 كوب لبن
1/3 كوب طحينة
2 سن ثوم
ملح
كزبرة مفرومة للوجة
صنوبر مقلي (اختياري)

الطريقة:
يقلب الفول بزيت الزيتون لحد النضج  (انا بضيف عصرة ليمون عشان ما يسود)
يضاف الثوم والكزبرة والشبت ويملح ويرش بالفلفل الاسود ونضيف المرق وعصير الليمون وتترك لتتسبك عدة دقائق.
يفرد الخبز في صحن التقديم
يسكب الفول فوقة
يخفق اللبن والطحينة والثوم 
يسكب على الوجة ويضاف اللحم والكزبرة
وتقدم والف صحة وهنا


الطلب التاني كان للمندي...انا بعمل المندي باللحم وممكن اكيد بالدجاج...

مندي اللحم
المقادير:
10 قطع لحم خروف بعظمة
بصلة مفرومة ناعم
عود قرفة كبير
10 حبات هيل
8 حبات كبش قرنفل
ملح، فلفل اسود
ملعقة طعام سمنة
ماء لسلق اللحم
3/4 كيلو ارز بسمتي مغسول ومنقوع ومصفى
لدهن اللحم:
2 ملعقة طعام سمنة مذاب
ملعقة صغيرة كركم
ملح، فلفل اسود
ملعقة صغيرة هيل مطحون
3/4 ملعقة صغيرة قرفة
فحم لتدخين المندي

الطريقة:
في قدر او قدر الضغط تذاب ملعقة السمنة وتقلب قطع اللحمة لتحمر وتضاف لها البهارات والبصلة
يضاف الماء الساخن وتترك لتنضج
يرفع اللحم من المرق ويصفى المرق
تخلط مكونات الخلطة ويدهن بها اللحم
يطبخ الارز بالمرق ليشارف على النضج
نحضر قطعة قصدير ممكن ادخالها بشكل يغطي الارز كامل داخل القدر
بسكينة نقوم بعمل شقوق بقطعة القصدير...
نصف قطع اللحم بكل السوائل على قطعة القصدير ونغطي القدر ليكمل الارز نضجه
نحمي قطعة الفحم لحد التجمير
نضعها بقطعة قصير مجوفة فيها القليل من الزيت داخل الارز ونغطي لتدخين الارز
يسكب الارز وترتب قطع اللحم على الوجه
وصحتين



Friday, July 4, 2014

البوريك التركي بالجبنة والشبت

6 ايام مرقت من رمضان...والحمدلله الطقس عم بيتحسن وعم بيبرد شوي...الله يرحمنا برحمته...بتمنى تكونوا مستمتعين بالصيام وتكونوا ما عم بتكبوا اي اكل وانكم عم تستفيدوا من كل اشي موجود عندكم...لحد الآن عم بحاول اطلع باكلات من الاشياء اللي عندي بالفريزر...وبما انه عندي عجينة البقلاوة فقررت بدل السمبوسك اني اعمل بورك تركية بالجبنة والشبت ...روعة للسحور كمان


البوريك التركي بالجبنة والشبت
المقادير:
لفة عجينة بقلاوة مسيحة بالثلاجة
للحشوة:
 2 كوب جبنة نابلسية مفتتة
كوب جبنة فتة مفتتة
1/3 كوب شبت طازج مفروم
1/3 كوب نعنع اخضر مفروم
بيضة
ملح، فلفل اسود
ملعقة صغيرة بابريكا
للدهن:
1/2 اصبع زبدة مذاب
1/4 كوب حليب

الطريقة:
تخلط مواد الدهن وتترك جانبا
تصفى الجبنة تماما من الماء
تخلط مكونات الحشوة كاملة
تفرد كل ورقتين من العجينة وتدهن بخليط الدهن وترتب الحشوة من الجهة الطويلة وتلف مثل الحلزون (مثل طريقة المحنشة المغربية) ونصفها بصينية مدهونة
وبنكمل بنفس الطريقة لتخلص الكمية وندهن الوجه بسائل الدهن
تخبز على 180 لتحمر من الاسفل ونشوي الوجه
وتقدم ساخنة مع احلى كاسة شاي على السحور
والف صحة




Wednesday, July 2, 2014

تارت الخوخ Plum Tart

Note: English Version of this post is below

في حد زيي؟ عنده عيد ميلادين؟ العيد الاصلي ب 6/30 والعيد الرسمي على الورق ب 7/1...واللي بيضحك انه في ناس حكت معي ب اليومين...شو بدي احسن من هيك؟ يومين ورا بعض من الاحتفالات والهدايا.....احلى مفاجأة كانت من ياسمين واللي جابتلي ورد وكيكة وجننت امي وهي تحكي معها تسألها عن التفاصيل..حبيت انها فكرت تفاجئني وانها عملت اتصالاتها ووصت على كيكة ودليفري كمان وراحت علة محل الورد جنب البيت وجابتلي هالبوكية الحلو مع الكرت





اما الكيكة التانية فكانت من سلفتي هند...شكرا كتير مع اسوارة حلوة...


الصور مش واو لانهم بالليل... :) بعد الافطار
الحمد لله كان لطيف وسلاطين اعطاني زي الرجال 20 دينار..ههههه آل شو ماما اشتري اللي بدك اياه!!!! صاير زلمة ما شاء الله

ولاني كنت عاملة اضراب مع اني وعدت حالي اني اعمل كيكة عيد ميلادي السنة بس مع رمضان كسلت وقررت هادا رمضان بشكل عام اني استعمل الاشياء الموجودة عندي قدر المستطاع ...ولانه عندي خوخ قررت اعمل هالتارت اللي مش بس سهل ولذيذ بس  ..اهم اشي يكون الخوخ حلو ، اما اللي عندي كان شوي حامض فاثر على الطعم


تارت الخوخ
المقادير
2 كوب طحين
3/4 كوب جوز محمص مطحون خشن الى ناعم
كوب سكر بني
120 غم زبدة
بيضة
2  ملعقة صغيرة فانيلا
8 حبات خوخ حلو ومستوي
2 ملعقة كبيرة سكر

الطريقة:
تخلط كل المقادير ما عدا الخوخ اما باليد او الخفاقة بوصلة ال k
تفرد 2/3 الكمية بقاع صينية متحركة القعر
يقطع الخوخ بقشرة ويرتب فوق الطبقة الاولى وينثر فوقه السكر
تفرك بقية العجينة باصابع اليد على الوجة
تخبز على 175 من 30-35 دقيقة او اكثر (حتى نرى ان الكرست تحمرت وبدأت فقاقيع صوص الخوخ بالظهور)
تترك لتبرد على سلك معدني 10 دقائق ونفك جوانب القالب وتقدم دافئة او بحرارة الغرفة


One of the best things in the world is to have two birthdays?How? Well, my real birthday date is the 30th of June while my official day on paper is the 1st of July, so I had people calling and congratulating me on both days...One of the lovely surprises (which the not so tech savvy me knew) is that Google customizes even your own search browser so here is what I saw when I opened to search for something on the 30th



I thought how cool!!!! I shared this on facebook ..just to show you how lovely it felt...Thank you Google!!!

On the other hand, I am so blessed as am surrounded by people who love me and care so much...Yasmin was so thoughtful and got me lovely flowers and a cake...I love the fact that she took the courtesy to call my mom (actually to nag my mom) asking her about every single detail like the flavor of the cake and the color of flowers...Thank you Simsim...

Sultan was nice but so manly about his gift...he handed me 20 JDs he had saved from his allowance to give me as a gift of convenience to buy what ever I please...Thank you Salateen...

My sister in law was also so nice getting me a cake and a lovely bracelet...Thank you Dede.. 

Lots and lots of phone calls and facebook messages from people I even don't know so well...thank you all for your lovely wishes....

As for me, I had put that one of my 101 goals is to make my own birthday cake this year...booohoooo...I didn't as I was too tired with fasting and all but I decided to bake this lovely and delicious plum tart instead as it is not only easy but it served my promise to my self to not go over board this Ramadan and use whatever I have on hand and I had plums...just make sure your plums are sweet...mine where a bit on the tart side despite the fact that I added 2 Tbsp of sugar...trust me...you want ripe and sweet ones for this recipe...don't put tart plums...

Plum tart
Ingredients

2 cups all-purpose flour
3/4 cup finely chopped walnuts
3/4 cup light brown sugar, lightly packed
120 gm butter
1 egg 
8 ripe plums, pitted and quartered lengthwise

Directions

Preheat the oven to 175 degrees C.


Combine the flour, walnuts, and sugar in a large bowl. Add the butter and the egg. Mix, either by hand or with an electric mixer, until crumbly.

Press 1 1/2 cups of the crumb mixture in an even layer into the bottom of a 9 1/2-inch spring form or tart pan. Arrange the plums in the pan, skin side down, to form a flower pattern; begin at the outside and work your way in.


Sprinkle the rest of the crumb mixture evenly over the plums. Bake the tart for 30 minutes, or until it's lightly browned and the plum juices are bubbling. Remove from the oven and cool for 10 minutes. Remove from the pan and transfer the tart to a flat plate. Serve warm or at room temperature.