Monday, June 30, 2014

وصفات السبت 6/28 على دنيا يا دنيا على قناة رؤيا ووصفة الفتة الحمرا

كيف كان اليوم الاول؟ بتمنى ما تكونوا صدعتوا زي كتير ناس!!! الحقيقة انه الحر اللي جاي ما عم بيساعد كتير خاصة للناس اللي بتطلع برة البيت (انا امبارح طلعت 5 مرات بدون مبالغة بين توصيل وشراء اغراض وطلوع درج 3 طوابق!!!) طبعا مع الطبخ...الله بيعين...رياضة وريجيم طبيعي الحقيقة...اظن العطش هو الاصعب...يا رب يهونها علينا...

بس الواقع ما في بعد اجواء رمضان واللمة واكيد الاكل الزاكي..بعرف انه كتير ناس كانوا معزومين امبارح او عازمين..واغلب الاكلات كانت ملوخية، كوسا وورق، دجاج محشي، كبة لبنية...على الاقل هاد اللي قرأته...

للي حابين وصفات السبت الماضي على برنامج دنيا يا دنيا...
وصفة القدرة الخليلية


عصير الدراق


خبز رمضان


صينية السميد بالجبنة


انا امبارح عملت شوربة انشلادا الدجاج اللي شاركتم وصفتها امبارح وعملت عصير البطيخ والفراولة وايس تي الدراق وسلطة بندورة بالبصل والفتة والنعنع والفتة الحمرا...شو الفتة الحمرا؟ هي طبق من مصر والحقيقة انها لزيزة خالص!!! فتة لحمة بصوص البندورة بالخل...جد رائعة وهي عادة ما بتتقدم مع اللبن بس انا عملت لبن متوم على جنب وحطيته للي بيحب يضيف على الوجه...جربوها وبتمنى تعجبكم...



الفتة الحمرا
المقادير
1/2 كيلو قطع لحم حجم وسط مسلوقة بعود قرفة وهيل وبصل وكرفس وفلفل اسود 
2 كوب ارز ابيض مطبوخ عادي (هاي طريقة لاستخدام الرز الزايد)
3 كوب خبز عادي مقطع مربعات مقلي
ملعقة طعام زيت زيتون
3 حبة ثوم كبير مهروس
1/3 كوب خل
1/2 كوب ماء
2 ملعقة طعام كبيرة ممتلئة رب بندورة
1/2 كوب مرق اللحم المسلوق
كمية من مرق اللحم لتشريب الخبز
اختياري:
لوز مقلي بالقليل من السمنة للوجة
لبن مسنون بالثوم 
بقدونس مفروم ناعم

الطريقة:
لتحضير صوص الخل الحمراء نقلب الثوم بزيت الزيتون لتظهر رائحته في قدر صغير ثم نضيف الخل ونتركة ليغلي 2 دقيقة
نضيف الماء ورب البدورة ونتركه ليغلي على نار هادئه 5 دقائق
نضيف مرق اللحم ونتركة ليغلي 5 دقائق
يرتب الخبز المقلي بقاع صحن التقديم ويشرب بالقليل من المرق
يرتب الارز
ترتب قطع اللحم ثم تشرب بالصوص الحمراء وتزين باللوز المقلي والبقدونس وتقدم...
الف صحة وهنا


Sunday, June 29, 2014

رمضان كريم...زينة رمضان السنة وشوربة انشلادا الدجاج

رمضان كريم وكل عام وانتو بالف خير...هاي رمضان التاني النا مع بعض على المدونة بتمنى انه اشارككم وصفات حلوة وسريعة وغير مكفة عشان تشاركوها مع اسركم وتستمتعوا مع بعض....

بس قبل الاكل مين فيكم زين لرمضان؟ انا كتير بحب هاد الموضوع وبحطني بجو رائع...طبعا لما الواحد بيروح على المعارض للاشغال اليدوية بيضوف اشياء كتير والحقيقة في اشياء حلوة بس الاسعار نار ومش الكل بيقدر يدفع...انا من الناس اللي مش مستعدة ادفع 70-80 دينار حق شرشف طاولة...لما نزلت على البلد قبل كم يومين اشتريت شوية قمايش وكلف عشان اعمل زينة رمضان (غير الاضوية والتعليقات واللي بالبلد ارخص ...اشتريت حبال الزينة ب 3 دنانير و2 دينار وعندي من السنة الماضية كم واحد وهيك حطيت على شبابيك البرندة والضيوف)...نرجع للشراشف...اشتريت هاي القماشة (مصرية) من البلد 3 متر بعرض متر ونص ب 7 دنانير وكلفة للداير 10 متر بدينار ونص و4 قطع معدنية (اكسسوار) ب دينار...


وبعد الحبك والتركيب




وكمان اشتريت قماش تربيعة اللي بيستعملوه زمان للايشربات...اشتريت 3 ب 5.5 دينار واكسسوارات 2 لكل واحدة تراوحت اسعارهم بين 1/2 الى دينار.......

قبل


وبعد الحبك...لسة بدهم كوي بالمناسبة....(الحبك للكل بكلفة 5 دنانير)...يعني 4 شراشف واحد كبير و3 صغار باقل من 20 دينار...مش بطال ابدا :)




وعلى الباب كنت شارية من كندا بآخر زيارة تعليقة للباب ب 4 دولارات كندي...بحدود 3 دنانير او اقل شوي وعلقت عليهم ميداليات فوانيس رمضان الدزينة بدينار






انطلب مني وصفة شوربة انشلادا الدجاج واللي الها طرق كتير بس بعد التجربة طلع معي هالوصفة هاي واللي بتناسب طبيعة الاشياء اللي موجودة في السوبرماركت عنا وطبيعة ميزانياتنا كمان...بتمنى تجربوها وتعجبكم...



شوربة انشلادا الدجاج
المقادير:
4 صدور دجاج مسحب
3 ملاعق طعام زيت زيتون
بصلة متوسطة مفرومة ناعم
حبة ثوم مهروس
حبة فليفلة خضراء مفرومة ناعم
2 حبة بندورة متوسطة مقشرة ومفرومة ناعم
ملعقة صغيرة بودرة التشيلي (بتنباع عند البهارات الاجنبية)
ملعقة صغيرة كمون
ملح، فلفل اسود
لتر وربع مرق دجاج (بدون بهارات عربية او هيل)
110 غم جبنة كريمية
كوب جبنة شدر مبشورة
للوجة:
3 ارغفة خبز تورتيلا ذرة او طحين مقطعة بالمقص بالطول ومقلية بزيت غزير
بصلة خضراء مفرومة
جبنة شدر
كزبرة خضراء

الطريقة:
يحمى الفرن الى 180 وتدهن صدور الدجاج بملعقة زيت زيتون وترش بالملح والفلفل الاسود وتشوى بالفرن حوالي 30 دقيقة وتبرد وتفسخ
يوضع بقية الزيت في طنجرة على النار وتذبل البصلة ثم الثوم والفليفلة وتذبل
تضاف البندورة وتقلب عدة دقائق وتضاف بودرة التشيلي والكمون والملح والفلفل الاسود
يضاف الدجاج والمرق وتترك لتتسبك قليلا
تضاف الجبنة الكريمية كقطع وتحرك لتذوب 
تضاف الجبنة الشدر وحاولي ان لا تغليها لكي لا تتخثر
تقدم وعليها القليل من الخبز المقلي والبصل والجبنة الشدر ورمضان كريم وكل عام وانتم بخير




Monday, June 23, 2014

وصفات يوم السبت 21/6/2014 على برنامج دنيا يا دنيا على قناة رؤيا


اذا انتو بتقرئوا المدونة بتعرفوا اديش بحب وسط البلد...يا سلام يا سلام...بتلاقي تقريبا كل شي بدك اياه وباسعار رائعة...امبارح العصر رحت انا وماما وخالد زوجي ولفلفنا زي العادة واشترينا الاشياء اللي بدنا اياها بس كان لزيارة امبارح نكهة خاصة وغريبة وجديدة علي نوعا ما وهي انه يوقفني بالشارع اكثر من 5 ستات ويسلموا علي لانهم شافوني على التلفزيون...الكل في قمة اللطف والذوق وبشكركم على حبكم وحسن ظنكم في وبتمنى نقدم الاحسن والافضل دايما...

وصفات حلقة السبت الماضي هي كالتالي وبتمنى تجربوها...
صلصة الخل البلسامي او البلسامك وسلطة الجرجير والشمندر واللي ممكن استعمالها لاي وصفة بتحتاج هاد الصوص


سلطة المعكرونة بصوص الخل البلسامي


عصير البطيخ والفراولة



كوبلر الكرز (ممكن يكون الفراولة، الدراق، البلوبري المعلب او الطازج والاناناس بس اكيد مش البطيخ الله يرضى عليكم...)

واشي تاني حلو كتير من البلد كان...اني اشتريت 3 علب بندورة كرز ب دينار!!!! جد؟!!! العلبة عند الخضرجي او اي سوبرماركت كبير بتتراوح بين 99 قرش اذا سعرها رخيص وبين 1.5 دينار...ويا ريت كان معي وقت اكتر كنت اشتريت كمان خضار وفواكة بس احنا مسافرين في اجازة عائلية صيفية لعدة ايام ان شاء الله تحت الحاح وضغط الاولاد قبل رمضان فخفت تخرب الاشياء بالكم يوم اللي رح اغيبهم...بعاود بنزل ان شاء الله بس ارجع...

قرب حبيب الكل شهر رمضان المبارك واللي كلنا بنستناه على احر من الجمر..هو شهر العبادة والتسامح والعطاء .....وعرفتوا شو كمان...شهر الاكل والابداع المطبخي!!!! هههههه يالله بدنا نشوف شطارتكم وتفاعلكم بالشهر الفضيل...كتييير بحب استضيف اي حد منكم حابب يشارك بوصفة مع صور على المدونة...وخلونا نولعها!!! شو رأيكم؟ّ!!!! بحب اسمع منكم...

مع حبي
منال

Sunday, June 22, 2014

وصفات الاربعاء من دنيا يا دنيا على قناة رؤيا وخل التوت المنزلي How to make Mulberry Vinegar

Note: English Version of this post is below

سعيدة جدا بردود افعال الناس اتجاه الطبخات على برنامج دنيا يا دنيا على قناة رؤيا...وبالرغم من هيك اكيد ما خلي الامر من بعض الهفوات وكذلك التعليقات اللي " مش  لطيفة" مثل اني لازم اربط شعري وانا بطبخ (مع انه خرطت شعري مؤخرا بشكل صعب ربطه) غير انه زميلات الي بيطبخوا بالاضافة الى كتير برامج طبخ ما حد بيربط شعره...واللي بحير انه اغلب الشيفات بالمطاعم رجال ولا يخلو الامر من انه نلاقي شعرة بالاكل (طيب ايش اقول للشيف يربط شعره؟ وهل ستات البيوت كلهم لما بيطبخوا بيربطوا شعرهم؟ ما علينا...غير كم تعليق انه اكلي تخبيص...مع انه والله زاكي :) وبقدر افهم انه في كتير ناس بتحب الاكل التقليدي بس الكلمة لحالها بتكفي "تقليدي" يعني الاغلب بيعرف يعمله وغير انه انعمل 7000 مرة على التلفزيون...الهدف كان محاولة لعمل اشياء مناسبة للموسم والجو من سلطات وعصاير بالذات واشياء نسبيا جديدة ويا ريت يحربوها قبل ما يحكموا عليها...اما موضوع الاكل السريع ولقب ابو سريع من الروعة ديالا الدباس (واللي شخصي اروع لسة من التلفزيون)...فانا اتقصد اني اقطع الاشياء بالبيت قبل الحلقة عشان الوقت ما يروح كله على التقطيع وبالتالي لعمل اطباق اكثر خاصة وانه (وعلى ما اعتقد) الكل بيعرف يقطع...مش عارفة بس اكيد انه رضا كل الناس غاية لا تدرك ومع ذلك الحبايب واللي علقوا تعليقات مشجعة وايجابية كانوا اكتر بكتير من الناس السلبيين (واللي انا مش ضد الانتقاد بقدر اعتراضي على الاسلوب والطريقة) لانه اجاني ملاحظات من ناس قمة بالذوق والاخلاق واكيد انا انسان بنهاية المطاف وبحب اتطور واتعلم لاني لسة بعمل ورح اعمل اخطاء...

المهم...حلقة يوم الاربعاء الماضي غطيت بدل الزميلة ديما حجاوي لانها بالكويت برحلة عمل (بتمنالها التوفيق  والنجاح) وعملت اشياء بدون لحمة وهي كالتالي

سلطة الكولسلو بدون مايونيز


متبل الباذنجان باللبن والجوز


شوربة الذرة بالسميد


سلطة الزيتون


المحنشة المغربية

بتمنى تجربوهم ويعجبوكم..

اما بالمدونة فاليوم بدي احكي عن كيف تعملي خل التوت...مش طبق بس كيف تعمليه بالبيت من التوت اللي ما اتاكل...وعم بحكي عن التوت الاحمر ...



خل التوت
المقادير
كوب توت
ثلاث اكواب خل عادي ابيض
مرتبان

الطريقة
يوضع التوت في المرتبان ويضاف له الخل ويترك عدة ابام ليتغير لونه الى الاحمر ويصفى ويستخدم بالسلطات



وبتقدروا تستعملوه باي صوص للسلطة وبيعطي طعم جميل...وممكن تهدوه هدايا خاصة اللي عندهم شجرة توت بالبيت...

اعملوه هلأ لتستعملوه برمضان...

It has been quite a ride this past week. Going on TV was indeed a lot of fun and yet exhausting. The best part is the great friends and the lovely comments which I have been receiving from followers to the show and to the blog. Thank you all for your great comments and support. I truly appreciate it. And of course, there where some people who where not too keen about the dishes I made, well, to them I say...please try them before you judge...then you can tell me if they where good or not...if not, then I am sorry that they didn't match your taste buds and if yes, then that is a winner for both me and you.

All videos are uploaded above in Arabic for 5 vegetarian dishes. As for this lovely blog which I miss dearly...I decided to share with you a great way to benefit from red mulberries. You bought them, you ate some, and then you are stuck with some leftovers...or better yet, you have a tree in your garden that decided to pour in and rain mulberries and you are overwhelmed with it...make vinegar...yes and give it as party favours to your friends and family. Here is how

Mulberry Vinegar
Ingredients
1 cup mulberries, washed and drained
3 cups white vinegar
A sterilized jar

Directions:
Mix all in the jar and seal for few days, the vinegar will turn red and you can drain and use....Great for salads and marinades...enjoy.... 


Tuesday, June 17, 2014

تقاصيل غرفة المونة ووصفة عمل طحين الكيك والطحين ذاتي التخمير بالبيت وفيدويوهات حلقة السبت من دنيا يا دنيا


شكرا لكل الكلمات الحلوة بخصوص غرفة المونة واللي بعترف انه الصور مش معطياها حقها...ولانه في منكم سألوا اني اكتب بالتفصيل شوي شو عملت فقررت انه هاد البوست يكون عن هاد الموضوع وبالمرة بدي اشارككم وصفتين لخلطتين في البيت لطحين الكيك والطحين ذاتي التخمير واللي كتير وصفات بتطلبه وبنروح نشتري طحين كيك منلاقيه بمبلغ وقدرة فبنبطل نعمل الوصفة او بنستعمل طحين عادي وبنقايس واكيد النتيجة ما رح تكون نفسها...

قبل غرفة المونة هي وصفات السبت الماضي من دنيا يا دنيا

الليموناضة البرازيلية


سلطة البازيلا الباردة


كبسة لسان العصفور


بالنسبة لغرفة المونة اللي عندي فهي مساحة مش كتير كبيرة ولكا كنت حاطة الرفوف البني بالاول كانوا ماكلين المساحة وعددهم قليل بالمقابل عرضهم كبير بيوسع اشياء كتيرة بس الا ما تتكوم الاشياء فوق بعض بسبب السرعة وعدم مساعدة نفس الترتيب علىانه الامور تكون انظم مهما حاولت. وكمان اللون البني كان كابس على نفسي ومش معطي اضاءة وروح للغرفة. وبمكن تضحكوا وتقولوا "هو من امتى لازم يكون في جمالية بغرفة خزين او مونة؟" !!!!! بالنسبة الي هادي اهم غرفة بالبيت لانه فيها الاشياء اللي بتهمني من اكل وادوات....!!! شايفين المنطق!!!

المهم التغييرات اللي تسوت بالغرفة هي التالية:

1. انقامت كل الاشياء منها (وعينكم ما تشوف الا النور على الكركبة والاغراض...والبنت الجديدة اللي عندي علقت...مدام هاي دكان!!! هههههه
2. تم دهنها باللون الابيض لتعطي ضو احسن
3. تغيرت الاضاءة من ضو عادي ل 2 نيون ابيض ليعطي اضاءة اكبر
4.اتركبت من فوق لغاية اكتر من الوسط بشوي 5 رفوف لون ابيض. وسبب عدم تكملة الرفوف للآخر هو وجود خزاين التدفئة من تحت ولازم نقدر نفتحها فالفكرة او الحل هو اشي متحرك ولاني كنت بدي سلات للبصل والثوم والبطاطا فكانت فكرة استعمال السلات على قاعدة بارجل متحركة لتحريكها لما بجنا نفتح الخزابن لمواسير التدفئة. 
البداية كانت باللف على الاماكن اللي بتبيع الرفوف واولها كان ايكيا...عندهم خيارات تنظيمية فظيعة بس لما عمانا الحسبة طلعت بتكلف كتير والحل كان رفوف الديكسون اللي بتنعمل بالدكاكين (عشان البنت اللي عندي ما تزعل وجد تصير دكانة!!!) بس السعر فرق كتير وكان ارخص ونفس اللي ركب وفرلي السلات الكروم اللي حطيتها تحت الرفوف واستعملت 6 سلات وخليت جهتين بدون سلات لوضع جرتين غاز وصوبتين الشتاء وورا الباب مشان ما يبينوا كتير.
5. بعد التركيب والتنظيف اجى وقت ترتيب الاشياء وترجيعها وفرصة للتعزيل واعرف شو عندي وما عندي فرتبت الرفوف بالشكل التالي:
- من فوق حطيت صناديق كرتون بتركبوا بالبيت من ايكيا (كل باكيت بيجي صندوقين مع غطاء وليبلز) واخترت لون زهري وفستقي وفيهم اترتبت كل ادوات الكيك والقطاعات والكريما وادوات الطبخ الصغيرة اللي بستعملهاش دايما مثل قوالب الكعك والمعمول...الخ)


- كنت شارية اوعية بلاستيكية مفتوحة (بدون غطاء) من كارفور وفيهم قسمت المكسرات، الخلطات الجاهزة، الفواكة المجففة، الشوكولاتة للطبخ، الوان الطبخ وغيرة وكنت حاطة من اول عليهم ليبلات عملتهم من الطوابع اللي عندي من المدرسة بعد ما رشيتهم بدهان السبورة (التفاصيل ممكن ترجعولها هون)


- رتبت كل المرتبانات بطريقة (قد ما بقدر مرتبة لانها مش كلها زي بعض بس قلت شوي شوي بغرها وعلى مهل وكله علية من الطوابع ومكتوب اسم الاشي اللي جوا المرتبان بالطبشور)


- بقية الرفوف اخدت الاكل من معلبات لصوصات وغيره وخصصت رف لاكل هارون الخالي من الجلوتين وعدة رفوف للاكل اللي مش مفتوح من معلبات وغيره ورف لرقائق الفطور ورف للمشروبات من حليب وعصير ومشروبات غازية.




- وبعترف وانا برتب اني كنت شاكة انه رح توسع الاشياء المهولة اللي راحت على غرفة القعدة بس المدلله لما رتبت لقيت عندي انه في مساحات ممتازة لاخفف عن المطبخ شوي فرتبت الرفوف وراء الباب بشكل اخدت فيه كتير من ستاندات الكيك والسلات والصحون الكبيرة وقلاية الكهرباء + صناديق بلاسيك مع اغطيتها اشتريتها من ايكيا وفيها حطيت الصجون والكاسات البلاستيك وزينة رمضان ومحارم السفرة (عمري حكتلكم عن نقطة ضعفي واديش بحب اشتري نابكنز!!!!) ما علينا نرجع للمفيد وصندوق للاكياس واللي بحب اجيبها من البلد بالكيلو وباحجام مختلفة لسلات القمامة بالبيت والفريزر والساندويشات وغيره)


وفوقهم حطيت مزهريات وثلاجات الرحلات والترموس الكبير
- اما السلات ففخصصت واحدة للشيبس والبزر وواحدة للبسكوت والاشياء الحلوة وواحدة للبصل والثوم والبطاطا وواحد للطناجر اللي بستعملها كتير يس ماخدة مساحة بالمطبخ وتنتين للاكياس الاكل اللي مش مفتوحة من طحين لمعكرونة لعدس وغيره وواحدة لعجائن السكر وواحدة للزيوت والسمنة والمخلل.
- ورا الباب وبالجهة اللي ما فيها سلات انحطوا الصوبتين وجرات الغاز

احلى شعور بالعالم لما تعملي اشي الك زمان بدك تعمليه وتطلع النتيجة حلوة ومرتبة وتوفري كمان وقت وجهد وفلوس.

اما وصفتين اليوم فهم كالتالي ونصيحتي حضري منهم كميات وحطيها بمرتبانات وعليها ليبل ضروري عشان تعرفيهم من بعض وتميزيهم عم الطحين العادي:

طحين الكيك
بيمتاز بانه لازم يكزن خفيف عشان تطلع الكيكة هشة ومش كل الوصفات تتطلبه ومقاديره هي:
كوب و 3/4 طحين
1/4 كوب نشا

او
كوب طحين ناقص 2 ملعقة طعام


الطحين ذاتي التخمير
بيمتاز بوجود عناصر رافعة لتضمن نفشان العجينة او الكيك واذا بتنتبهوا بالوصفات اللي بتحتاجة ما بيكون في بيكنغ باودر او خميرة ومقاديره

كوب طحين
ملعقة صغيرة بيكنج باودر
1/2 ملعقة صغيرة ملح
1/4 ملعقة صغيرة كربونات

Sunday, June 15, 2014

Potato Moussakaمسقعة البطاطا

Note: English version of this post is below

امبارح ومن الاشياء اللي عجبتني هي اني لاحظت اديش حلو الانسان يكون مشغول ويحب عمله....ملاحظة فظيعة!!! ههههه لأ جد....يعني لما الواحد ياخد دقيقة ويطلع حوليه ويشوف الناس بتشتغل والكل منهمك بشغله من العامل البسيط للمدير (اذا اشتغل هههه) اشي حلو كتير...اللي خلاني آخد هاي الدقيقة هو انشغالي الشخصي مؤخرا وركضي ورا اكتر من شغلة بس وانا مبسوطة بعجقة الصيف والمشاريع والمواعيد واليوم اللي بتمنى يكون اكتر من 24 ساعة...اكيد بحمد ربي على نعمة الانشغال باشياء مفيدة وتخدم غيري وبتملي وقتي وبنفس الوقت الحمد لله على نعمة الصحة وانه الواحد قادر يركض ورا الاشياء كلها...بتمنالكم ايام مليانة بالانتاجية والابداع وحب الاشي اللي بتعملوه...

ومن الاشياء اللي مسعداني وقرفتكم فيها الي فترة (آسفة على النق) هي غرفة الخزين او المونة او pantry بالعنجليزي :) ...هاي الغرفة واللي الها اهمية كبيرة عندي زي ما كلكم بتعرفوا كانت كل ما ارتبها لسة احس انها مش مرتبة لانه الوان رفوفها غامقة وضوها اصفر وكمان رفوفها غميقة وقليلة وبالتالي الاشياء يتضيع وبفكر ما عندي وكل فترة لازم جرد...الخ هي صورها قبل







وهلأ...
.
.
....
.......







هدول كانوا بالمطبخ :)


وصفة اليوم هي مسقعة بطاطا ...زاكية كتير وجربوها... المعروف بالمسقعة هو الباذنجان بس للي ما بحبه (ومش عارفة كيف الناس ما بتحب الباذنجان...يعني انا معه في حالة عشق مستمر واطباق جديدة على الدوام :) هاي الطريقة بالبطاطا بتحل الموضوع :)

مسقعة البطاطا
المقادير:
3 حبات بطاطا كبيرة مقطعة شرائح ومقلية 1/2 استواء
1/4 كوب لحم مفروم ناعم
بصلة متوسطة مفروم ناعم
ملعقة صغيرة بهار مشكل
حبة ثوم مهروس
حبة بندورة متوسطة مفرومة ناعم
ملعقة صغيرة زعتر ناشف
1/4 كوب كزبرة خضراء مفرومة
2 ملعقة طعام رب بندورة
1/2 كوب ماء
زيت زيتون
ملح، فلفل اسود

للوجة:
بيضة
ملح، فلفل اسود
1/2 كوب لبن
1/4 كوب حليب
2 ملعقة طعام جبنة بارمزان مبشورة

بقدونس مفروم للزينة

الطريقة:
في مقلاة يوضع زيت الزيتون وتذبل البصلة ويضاف اللحم ليتغير لونة وينضج ويرش بالملح والفلفل الاسود وملعقة البهارات المشكلة
يضاف الثوم وتقلب
تضاف البندورة والكزبرة وتقلب لتذبل البندورة ويضاف الزعتر
يضاف رب البندورة و1/2 كوب ماء وتسبك على النار
في صحن الفرن توزع نصف كمية البطاطا ثم الحشوة ثم البطاطا المتبقية
للوجة: نخفق المقادير ونسكبها على الوجة
توضع في الفرن على حرارة 180 من 20-30 دقيقة لتتسبك ويحمر الوجة
ترش بالبقدونس وتقدم والف صحة


It is amazing what you can achieve when you love what you do...yesterday I was taking a look at many people working ...in the street, at the studio, at the shops...it was really nice to see that everyone are busy doing whatever they had to do(though I am not sure they truly have a passion to what they do) ...that sense of achievement and work got to be one of the best feelings in the world. Lately, I have been so busy running around especially that it is summer time and there is barely any slot in the day that is available ...Alhamdulellah for that..it is better to be busy than not to do anything at all...

One of the projects that I have been talking about lately is the redecoration and rearrangement of my beloved pantry...I won't bore you with the same pictures but you can scroll above to see the before and after...I so enjoy walking in every time to pick something to cook. 

Today, the recipe I am sharing is Potato moussaka...an originally Greek dish made with eggplants...so if you don't like eggplants and my apologies go to you in advance as I don't understand how one doesn't like eggplants (I so love eggplants and can't stop buying them to create new dishes every time)

Potato Moussaka
Ingredients:
3 large potatoes cut into slices and deep fried till they are cooked half way through
250 g ground meat (beef or lamb)
1 small onion, minced
1 clove garlic, minced
1 tsp mixed middle eastern spice
salt, pepper
1 large tomato finely chopped
1/4 cup cilantro finely chopped
2 Tbsp tomato paste
1 tea spoon oregano
1/2 cup water
2 Tbsp olive oil

For topping:
1/2 cup yogurt
1/4 cup milk
1 egg
2 Tbsp Parmesan cheese
salt, pepper

Chopped parsley for garnish

Directions:
Cook meat, onion in olive oil till cooked through and onion is softened
Add salt, pepper and middle eastern spice
Add garlic, tomato and cook till tomato is soft
Add cilantro, oregano and tomato paste
Add water and let it cook over medium heat till some of the liquid is absorbed
In an oven baking dish, lay half of the potato slices. Add filling then top with the rest of potato
Mix topping ingredients and add to the top
Bake at 180 for 20-30 minutes till it bubbles and top is golden brown
Garnish with parsley and serve.




Monday, June 9, 2014

فيديوهات التبولة البيضاء والكباب الحلة ومهلبية جوزالهند والشاي المثلج بالفراولة وكمان وصفة بوشار الكراميل بخليط الكيك الجاهز


نزلت حلقة يوم السبت على ال youtube وبتمنى تعجبكم كل الوصفات...

وصفة التبولة البيضاء


وهي الصورة من عندي :)


للكباب الحلة


لمهلبية جوز الهند



وللشاي المثلج بالفراولة


وللي طلب وصفة بوشار الكراميل هي المقادير والطريقة باستخدام خليط الكيك الجاهز :) مع تحياتي للجميع


بوشار الكراميل
المقادير:
8 اكواب بوشار معمول بدون ملح او اي اضافات (يوضع ملعقة زيت في طنجرة وحوالي 3-4 ملاعق طعام بوشار حب وتغلق الطنجرة وتترك لتنضج)
اصبع زبدة
½ كوب خليط كيك مكس اصفر
1/4 كوب سكر
¼ كوب كورن سيرب (قطر الذرة)

الطريقة:
يوضع البوشار في صينية كبيرة
تخلط كل المقادير ما عدا البوشار في طنجرة وتحرك لتغلي ثم تضاف ملعقة صغيرة فانيلا.
يضاف الخليط على البوشارويحرك بملعقة خشب ليغطي كل البوشار

يحمى الفرن الى 250 ف او 120 سلسيوس وتوضع من 18-25 دقيقة مع التقليب كل 5 دقائق لتصبح ذهبية وبلون الكراميل وتبرد تماما وتكسر.



Saturday, June 7, 2014

صينية معكرونة بالدجاج والبارمزانChicken Parmesan Pasta Casserole

Note: English Version of this post is below

من الاشياء الرائعة بالصيف اكيد الافراح والمناسبات والليالي الملاح (على قولة شهرزاد) بس برضة من الاشياء المتعبة شوي لما يكون كله ورا بعض لانه رمضان قرب والكل بده يعمل الخطبة او العرس قبل رمضان...الله يهني الجميع ويسعدهم بس حاسة حالي كل ما بقول هلأ بهدا بيتصل حد و(كتر خيره) بيعزمني على مناسبة جديدة :) ههههه والله مش زعلانة بالعكس بس حاسة حالي مع الامتحانات والصيف والتعزيل والمناسبات بديت افشكل (اللي ما بيعرف هاي الكلمة معناتها مش من ايامي وكلمة افشكل كلمة عامية جدا (صبيانية فعليا) ومعناتها اتعب وترادفها اسوكج هههههه وهي كلمة اخرى عامية بيستعملوها الكبار زمان لتعبر عن عطل او خراب...هههه كيف بالله درس العربي الخرافي على الصبح...

ما علينا....تقريبا خلصت غرفة المخزن بس لسة باقي كم صندوق لازم اشتريهم عشان اصور بالمرة واشارككم الصور وكمان عندي كم مشروع اشغال يدوية لرمضان لازم اشد همتي ويخلصوا...باذن الله...وقديش مبسوطة لانه غرفة المخزن كانت على اهدافي ال 101 وكمان امي ابروز كم صورة واعلقهم بالمطبخ وتم بحمد الله...شعور لطيف بالانجاز

اليوم كنت على قناة رؤيا على برنامج دنيا يا دنيا بفقرة المطبخ بشكر كل اللي شافوا الحلقو واللي علقوا وتابعوا والكلمات التشجيعية وبتمنى اكون عند حسن الظن .....
رح انزل الوصفات ان شاء الله على المدونة هون قريبا مع صور خاصة في وبحب انوه لملاحظة من سوسن اللي تابعتني من قبرص...وسون شاطرة كتير بالطبخ ومبدعة دايما...وملاحظة سوسن على تسمية الكباب الحلة باسم كباب مع انها شقف وهو انه بمصر عندهم الاسم بالعكس الشقف كباب والكباب شقف....ماما اعطتني نفس الملاحظة وبحترم اراء غيري وبالعكس بتعلم منكم كل يوم....:)

اما اليوم وكسرا للرتابة والهدوء اللي ساد المدونة بالفترة الاخيرة بسبب الانشغال فقررت اني اشارككم وصفة لصينية معكرونة بالدجاج والبارمزان...كتير منكم بيعرفوا الدجاج بالبارمزان...الفرق بالوصفة هاي هي انها صينية وبتتاكل مع المعكرونة مع بعض...


صينية معكرونة بالدجاج والبارمزان
المقادير:
4 صدور دجاج مقطعة قطع متوسطة (حوالي 6- 7 قطع لكل صدر دجاج)
بيضة مخفوقة
كوب قرشلة
1/2 كوب جبنة بارمزان مبشورة
ملح، فلفل اسود
رشة بودرة ثوم
ملعقة طعام زيت زيتون
ملعقة طعام زبدة
باكيت معكرونة اقلام penne
للصوص:
ملعقة طعام زيت زيتون
4 سن ثوم مدقوق
ملعقة صغيرة اوريجانو او زعتر
علبة بندورة مهروسة (او 4- 5 حبات بندورة مقشرة ومفرومة ناعم)
كوب ماء
2 ملعقة طعام رب بندورة
علبة قشطة
علبة صغيرة حليب مركز غير محلى
1/2 1 كوب جبنة موزريلا مبشورة

الطريقة:
تسلق المعكرونة 
تغطس قطع الدجاج بالبيض ثم بالقرشلة
توضع الزبدة والزيت في المقلاة وتحمر قطع الدجاج لتصبح ذهبية
لعمل الصوص يوضع الزيت بالطنجرة ثم يضاف الثوم والزعتر وتقلب
تضاف البندورة والملح والفلفل والماء ورب البندورة وتقلب لتغلي على نار هادئة لتتسبك
يضاف الحليب والقشطة وتحرك 
تخلط الصوص بالعكرونة وتفرد في صحن بايركس
توزع قطع الدجاج
توزع الجبنة
تخبز في الفرن على 175 من 20-30 دقيقة
تقدم ساخنة



Summer is here and so are the family occasions and responsibilities. Don't get me wrong, it is always great to see everyone but it is funny how occasions seem to be adding up just before Ramadan. On a different and positive note, my storage renovation is almost done...so excited about the changes and can't wait to share the pictures with you but I still have to buy few boxes for organization before snapping some pic and uploading them.

Today I also appeared on Roya TV in the kitchen segment. I prepared four easy dishes which I will be sharing here once I have good photos to share and once the video is uploaded by Roya on YouTube. I will be seeing you next Saturday Inshalla with new dishes. So please don't hesitate to tell me what you would like so I can see if I can do it for you. 

Today's recipe is very easy and comes in a casserole dish, don't you love Casseroles..they are the best...every thing in one dish...easy clean up and presentation...

Chicken Parmesan Pasta Casserole 
Ingredients:
4 chicken breasts cut into bite sizes
1 egg
1 cup bread crumbs
1/3 cup Parmesan cheese, grated
a sprinkle of garlic powder
salt, pepper
1 Tbsp butter
1 Tbsp olive oil
Penne pasta cooked
For the sauce:
1 Tbsp olive oil
4 cloves of garlic, grated
1 tsp oregano
1 can crushed tomatoes
1 cup water
2 Tb tomato paste
1 can qishta + 1 small can evaporated milk (you can easily use one cup of cream instead)
1 1/2 cups mozzarella cheese, grated

Directions:
Cook pasta according to package directions
Sprinkle chicken with salt and pepper
Heat a pan with butter and oil.
Mix bread crumbs, cheese, salt, pepper and garlic powder
Sprinkle egg with salt and pepper
Dredge chicken pieces in egg then in bread crumbs and cook in the pan until golden brown.
To make the sauce, add oil, garlic and oregano and cook a bit. Add tomato, water, tomato paste and cook for few minutes. Add qishta and milk and cook for another few minutes
Add the mixture to pasta, pour into casserole, arrange chicken pieces and sprinkle with cheese.
Bake at 175 for 20-30 minutes
Serve hot with a salad.

Enjoy...



Monday, June 2, 2014

Kunafa with Muhalabiaالكنافة بالمهليبة

Note: English Version of this post is below


واخيرا ركبت الرفوف الجديدة بغرفة الخزين واكيد رح اشارككم الصور بس نخلص ترتيب...الوضع قمة في الكركبة حاليا بس فرصة فظيعة للتعزيل واستغلال المتوفر هاد الشهر قبل رمضان ...كل عام وانتو بألف خير...وبمناسبة الحديث عن رمضان فان شاء الله هاد الشهر رح تكون الوصفات الى حد ما بتخدم الشهر الفضيل ومنها وصفة حلو اليوم للكنافة بالمهلبية...حلو سهل وسريع وببرد على القلي لانه مش ساخن مثل الكنافة اللي متعودين عليها وكمان بتقدروا تتحكموا بمقدار الحلاوة...

الكنافة بالمهليبة
للكنافة:
ذ/2 كيلو عجينة كنافة (اما من الفريزر او طازجة) مفرومة خشن
1/2 كوب فستق حلبي مفروم خشن
3 ملاعق طعام سكر
50 غم (1/2 اصبع) زبدة

للمهلبية:
5 اكواب حليب
3/4 كوب قشطة او كريما سائلة
1/2 1 كوب طحين (ممكن استعمال 7 ملاعق طعام نشا)
1/4 1 كوب سكر
2 ملعقة كبيرة ماء زهر
5 حبات مستكة (تطحن ناعم مع القليل من السكر)

قطر او عسل حسب الرغبة
فستق حلبي للوجة
مربى زهر الليمون او كرز مجفف للزينة

الطريقة:
في مقلاة كبيرة واسعة تذاب الزبدة وتحمص الكنافة ليصبح لونها ذهبي فاتح
يضاف السكر والفستق الحلبي وتحمص قليلا وترفع وتترك لتبرد
تحضر المهلبية بخلط الطحين والسكر والحليب والكريما معا وتطبخ على النار مع التحريك المستمر لكي لا تتكتل (في حال تكتلات صفيها بمصفاة خشنة) وعندما تغلي يضاف ماء الزهر والمستكة وترفع
تسكب في وعاء وتغطى بورق نايلون ملامس للسطح مباشرة لكي لا تتكون قشرة وتترك لتبرد في حرارة الغرفة ثم في الثلاجة عدة ساعات
للتقديم
باستعمال خفاقة باليد تحرك المهلبية لتصبح اسهل للفرد
يمكن تقديم الطبق بصحون صغيرة او صحن كبير
توضع 1/2 كمية الكنافة في القاع
تفرد المهلبية
ثم بقية الكنافة وتزين
تقدم مع القطر او العسل للراغبين بالمزيد من الحلاوة...

والف صحة وهنا



Ramadan is almost here and I will be dedicating this month's posts to recipes that serve the great Holy Month...Today's dessert ...Kunafa with Muhlabia (Kunafa dough with milk pudding) is a great dessert that serve the holy month well...its light, cold and traditional...

Kunafa with Muhalabia
Ingredients:
1/2 kilo fresh or frozen and thawed Kunafah dough, shredded
50 g (1/2 stick) of butter
3 Tb sugar
1/2 cup roughly ground pistachios

Muhalabia
5 cups milk
3/4 cup Qishta or heavy cream
1 1/2 cups flour (or 7 Tb corn starch)
1 1/4 cups sugar
4 pieces of Mastic (finely ground with some sugar)
2 Tb orange blossom water

Pistachios, dried cherries for garnish

Directions:
In a wide pan, melt butter and toast the Kuhanaf dough till golden brown. Add sugar and pistachios; toast some more and let it cool.
In another pot, mix all Muhalabia ingredients except the mastic and the O.B. water. Stir constantly so it won't lump (if that happen run it through a wide hole sieve). Once it comes to a boil and thicken, add Mastic and the O.B. water. Pour in another dish and wrap with plastic in a way that it touches the surface to prevent a dry surface. Let it cool to a room temp then in the fridge for few hours.
With a hand whisk, stir the Muhalabia once ready to serve. This can be served as an individiaual portion by placing some kunafah dough then muhalabia then top it with Kunafah and garnish with pistachios and cherries. Or serve it as a family style the same way by dividing the Kunafah dough between the top and bottom layers. Enjoy with some sugar syrup or honey for more sweetness.