Wednesday, January 29, 2014

كعكة القرع بالبيكان وصوص القيقب (الميبل سيرب)

قرب شهر 2 وتحدي جديد وهدف من ال 101 (جززتكم ب 101 هدف!!!! عارفة!!) بس بحب احكيلكم ...شو اعمل؟!!! المهم...واحد من الاهداف هو اني اطبخ باستخدام الموجود عندي قدر المستطاع خلال شهر 2 (يعني اقل حد ممكن للصرف على الاكل خلال الشهر)  بس مهم انه اذا حبيتوا تخوضوا مثل هذا التحدي انكم يكون عندكم تموين كويس (في خزانة المونة والثلاجة والفريزر) وكمان انكم مش تقضوا على كل اللي عندكم وما تحاولوا تستغلوا العروض خلال الشهر...المهم هو ميزانية معينة (اقل من اللي بصرفوه عادة) عشان يكون في مجال لاستغلال العروض وبنفس الوقت استهلاك الموجود عندكم اصلا..مش رح يكون كتير سهل بس قادرة اشوف كتييير معكرونات بشهر 2 :) فرح انشوف ورح ارجع احط قائمة الطعام كل اسبوع...

من الاشياء اللي عندي بالفريزر مثلا هو القرع...قرعة كبيرة...شويتها وهرستها وقسمتها بتبرويرات بالفريزر لشوربة، حلو، فتة (فتة القرع)...


اليوم تنتين من اعز صاحباتي جايين يزوروني ومحضرة حالي لوقت ممتع جدا..لانهم هيك..قمة الروعة...وبالحديث عن الصاحبات الرائعات ففي صاحبة رائعة ثالثة جابتلي طقم صحون بيجنن زيها رح استعمله اليوم لاول مرة....عملت صينية الجبنة والزعتر لانه عندي زعتر اخضر...شكرا سماح على الهدية الحلوة...


ونرجع للقرع...طلعت تبروير من الفريزر واستعملته لكعكة لذيذة كتير في الشتاء بالذات مع فنجان شاء العصر...



كعكة القرع بالبيكان والميبل سيرب
المقادير:
للوجة:
3/4 كوب سكر بني فاتح
1/4 كوب سكر عادي
كوب طحين
ملعقة صغيرة قرفة
اصبع زبدة مذاب
1/2 كوب بيكان مفروم خشن

للكعكة:
1/2 1 كوب طحين
2 ملعقة صغيرة بيكنغ باودر
1/2 ملعقة صغيرة كربونات
1/4 ملعقة صغيرة ملح
1/2 1 ملعقة صغيرة قرفة
1/2 ملعقة صغيرة كبش قرنفل مطحون
1/4 ملعقة صغيرة جوزة الطيب
اصبع زبدة بحرارة الغرفة
3/4 كوب سكر
1/4 كوب سكر بني
2 بيضة
2 ملعقة صغيرة فانيلا
1/2 كوب قرع مهروس
1/2 كوب لبن

للصوص:
ملعقة كبيرة زبدة
ملعقة كبيرة صوص الميبل (ممكن صوص البان كيك)
ملعقة كبيرة  حليب
2 ملعقة كبيرة  سكر بني
ملعقة صغيرة فانيلا
1/2 كوب سكر ناعم منخول

الطريقة:
تخلط مكونات الوجة وتفرك لتكون مثل الفتات
للكعكة: يخلط الطحين والبيكنج باودر والصودا والبهارات
تخفق الزبدة والسكر بنوعيه لتصبح كريمية
يضاف البيض والفانيلا وتخفق دقيقتين لتختلط
يضاف اللبن والقرع وتخفق
يضاف خليط الطحين والبهارات
تدهن صينية التشيز كيك وتغلف من الخارج بورق المنيوم
نضع 1/2 كمية الكيك ثم 1/3 كمية الفتات ثم بقية الكيك ثم بقية الفتات
تدخل الفرن الحامي على حرارة 350 ف او 175 مئوي وتخبز من 35- 45 دقيقة لتجتاز اختبار فحص الكيك (اذا احسست بان وجهها بدأ بالاحمرار ولم تنضج بعد غطي الوج بقطعة المنيوم بشكل خفيف
تترك لتبرد على سلك معدني ونحضر الصوص
لتحضير الصوص يوضع السكر وشراب الميبل والحليب والزبدة في المايكرويف ل 30-45 ثانية ليذوب السكر وتسخن المكونات وتحرك جيدا
يضاف السكر الناعن وتحرك بالخفاقة اليدوية
ننزل الصوص بشكل خيوط فوق الكعكة وتقدم...وصحتين




Monday, January 27, 2014

بسكوت الاوتميل (الشوفان) والكورن فليكس

ما في احلى من شكل البيبيات!!!! انا كتيير بحبهم اول ما ينولدوا وبعرف انه كتير ما بيوافقوني الرأي بس انا هيك!! بيبي "الين" امورة وكتكوتة وصغنونة مع انه ما شاء الله وزنها منيح...الله يحميها ويخليها لابوها وامها واخوها... وكمباركة قررت اني احط عدة اطقم وشوية اشياء تانية للبيبي وهدية لماما بسلة والفها...طلعت لطيفة


مين فيكم مريض ومرشح؟!!!! انااااااااااااااااااااااااااااااااا...وهارون وخالد قبلنا...عشان هيك الي يومين ما حطيت اشي...مش معناته ما طبخت بس ما كان في مراق لصور وغيره...بس كان في انجاز على صعيد التنظيم واحد اهدافي ال 101 وهي تنظيم غرفة المونة...هلأ كتييير كنت بحب لو لقدر اشتري تبرويرات من اول وجديد ويكون كله زي بعضه بس بدها ميزانية خارقة....عشان هيك اكتفيت بشراء بعض العلب البلاستيكية الكبيرة وبعض المرتبانات للمعكرونات..واستخدمت اللي عندي حاليا...صور قبل بتخزي ومستحية احطها بس رح احطها وما تضحكوا


غرفة الخزين عندي هي غرفة بدون نوافذ وبالتالي الاضاءة مش واو بالصور...بس وصلتكم الفكرة واديش مش مرتبة...
هلأ بعد الليبلات اللي مثل لوح السبورة والعلب الجديدة..




اللي صار هو اني طلعت كل محتوبات الغرفة ونظفت طبعا وفرغت الاشياء اللي بالاكياس بعلب شفافة عشان اشوف شو في عندي دايما وجمعت الاشياء اللي لازم تضل بعلبها مثل خلطات الكيك الجاهزة وغيرها بعلب بلاستيكية كبيرة حسب المحموعة (مكسرات، خلطات جاهزة، شوكولاتة...الخ) وحطيت ليبل على كل علبة


لسة فيه الطبقة التحتانية على الارض واللي فيها الزيت وبعض العلب اللي فيها سكر وطحين وهي المنظر بعد بس لسة بده شغل...

اما السلة المعدنية ففي الطبقة الاخيرة منها البصل والثوم والبطاطا والطبقات التانية فيها مرتبانات اللبنة الجامدة والمكدوس..الخ...

انا ما عندي اكل بالمطبخ الا بالثلاجة وخزانة البهارات واللي برضة ترتبت وهاي صورتها


وبهاذا الانجاز بكون ماشية كويس وانا متأكدة انه العملية بدها صيانة كل فترة وتعديلات حسب الوضع وشوي شوي بركي بحول كل العلب لعلب موحدة...
اما على صعيد الاكل...فلاني تعبانة وبنفس الوقت ما بدي ما اعمل اشي للاولاد فوصفة بسكوت الاوتميل والكورن فليكس من اسهل الوصفات اللي كله بينحط فوق كله وبتطلع بسكوتة لذيذة...مين فينا ما بيحب هيك وصفات؟!!! وبالزيت كمان..يعني ما في عندك زبدة؟ ولا يهمك!!!



بسكوت الاوتميل (الشوفان) والكورن فليكس
المقادير:
كوب سكر بني
1/2 كوب سكر عادي
كوب زيت
2 بيضة
2 ملعقة صغيرة فانيلا
2 كوب طحين
ملعقة صغيرة كربونات
1/2 ملعقة صغيرة ملح
3/4 كوب شوفان
2 كوب كورن فليكس (مثل ما هو مش مكسر) ممكن المحلى او اللي مش محلى

الطريقة:
يخلط الطحين والكربونات والملح والشوفان والكورن فليكس
تخفق بقية المقادير ثم تضاف المقادير الجافة لتختلط
يؤخذ ملعقة كبيرة ممتلئة من الخليط ويوضع على صينية مبطنة بورق الخبز وبشكل متباعد حوالي 5 سم (لانها رح تفرد)
باطراف الاصابع حاولي تشكيل العجينة بشكل لتصبح الحواف مرتبة ويضغط على كل حبة بباطن اليد لتصبح مفرودة قليلا وتخبز على 350 او 175 درجة مئوية من 12-15 دقيقة لتنضج وتترك 5 دقائق على الصينية قبل رفعها على سلك معدني وصحتين..



Friday, January 24, 2014

كعكة لفافة القرفة

الحمد لله وجمعة مباركة للجميع....امبارح رزق الله اخوي الاوسط عادل ببنوتة سماها "إلين" ان شاء الله تتربى بعزهم ويجعلها ابنة صالحة لابوها وامها ...

امبارح كان يوم كسسسسسسسسسسسسسسسل ...فطور برة مع الاولاد وخالد...بعدين قيلولة ل 25 دقيقة (محاولة للتغلب على حالة عدم استقرار النوم اللي عندي) ثم نسكافيه مع الاولاد وزيارة لبيت اهلي بعد الظهر والعودة للبيت....شو عملت على اي صعيد؟ صفر!!!! معلش...مش غلط الراحة والاسترخاء...وبالمقابل يبدو يوم الجمعة حافل بالروحة على المستشفى لنشوف البيبي الجديدة وواجب عزاء في العيلة وبعدين روحة على المزرعة ان شاء الله..
وفي خضم الركض بين المشاوير لازم على الاقل اؤمن فطور لذيذ يوم الجمعة...وشو اروع من لفافة قرفة ضخمة تتقطع مثل الكيكة ...



وقبل ما اشارككم الوصفة والطريقة بدي اقولكم على هدف جديد من الاهداف ال 101 وهو برضة هدف على صعيد التحويش...بس بطريقة تانية وهو اني اجمع اي فراطة بمحفظتي كل يوم جمعة بمرتبان...وهي اول جمعة...


ونرجع للفطور...

كعكة لفافة القرفة 
المقادير:
3/4 2 - 3 كوب طحين
2 ملعقة صغيرة خميرة
2 ملعقة كبيرة سكر
ملعقة صغيرة ملح
1/4 كوب حليب دافئ
1/2 كوب ماء دافئ
3 ملعقة طعام زبدة مذابة
بيضة
ملعقة صغيرة فانيلا
للحشوة:
1/3 كوب سكر
ملعقة كبيرة قرفة
3 ملاعق طعام زبدة بحرارة الغرفة
1/4 كوب جوز مطحون  (اختياري)
للوجة:
كوب سكر ناعم
3-4 ملاعق طعام حليب
ملعقة صغيرة فانيلا


الطريقة:
تخلط الخميرة والسكر والماء والحليب
تضاف الزبدة والبيضة والفانيلا وتخلط جيدا
يضاف الطحين والملح وتعجن لتصبح عجينة متماسكة وطرية (ممكن ما تحتاجي كل كمية الطحين فآخر 1/2 كوب ضيفيه حسب الحاجة)
تترك لتخمر ساعة ليتضاعف حجمها
ترق الى مستطيل على سطح مرشوش بالطحين
تدهن بالزبدة وترش بخليط الحشوة (السكر والجوز والقرفة) وترص عليى العجينة باليد بخفة
تقطع العجينة الى حبال بالعرض مثل الصورة مع ازالة الحواف التي لم تصل اليها الحشوة

في صحن او صينية مدهونة نبدأ بلف اول شريط مثل الرول (كما في الصورة ) ثم نبدأ بلف العجينة حوله ليصبح لدينا لفافة ضخمة


نغطيها بقطعة قماش نظيفة ونتركها لتخمر 20 دقيقة
نحمي الفرن على 190 وتخبز من 25-30 دقيقة لتنضج ويحمر وجهها قليلا
نخلط مقادير الوجة ونوزعها عليها كخيوط وصحتين...



Thursday, January 23, 2014

بهارات التاكو المنزلية و اسباجيتي التاكو

قديش منا بياخد امور صغيرة بشكل عادي وكانها امور عادية... تجاربي السابقة وخاصة السنة الماضية علمتني قديش اقدر الاشياء الصغيرة اللي غيري ممكن يتطلع علي وباستغراب من كتر سعادتي فيها...بس طبيعة الانسان ما بيقدر الاشي الا لما يمر بمحنة او يفقده لا سمح الله...يا رب خلينا من الناس اللي بتحمد وبتشكر فضلك علينا بكل شي وخاصة الاشياء الصغيرة اللي بنمر عليها مرور الكرام...

لساتني عم بعاني من فرق الوقت وما عم بنام قبل ال 3 الصبح...مشكلة ...!!!! لانه هارون بيصحى على ال7:30..عم بيصير شكلي مثل الزومبي حاليا...بس بالنظر للجانب الايجابي من الامور عم بحاول اعمل الاشياء المتراكمة علي بالليل مع انه مش سهل الواحد يشتغل من غير صوت...كل هاد ما بيخليلي وقت اعمل اشياء جديدة على صعيد المطبخ والجأ لاي اشي سهل وسريع...اسباجتي التاكو من هاي الاكلات خاصة اذا كنت مجهزة مرتبان من بهارات التاكو جاهز في خزانة المونة...انا بعمل الخلطة بالبيت لسببين:
اوفر (لانة دايما عندي البهارات) و طازة اكتر ... وهي الوصفة



بهارات التاكو المنزلية
المقادير:
1/2 ملعقة صغيرة بودرة الثوم
1/4 ملعقة صغيرة بودرة البصل
1/4 ملعقة صغيرة زعتر
1/2 ملعقة صغيرة بابريكا
1/2 1 ملعقة صغيرة كمون
ملعقة صغيرة ملح
ملعقة صغيرة فلفل اسود
1/2 ملعقة طعام طحين

الطريقة:
تخلط معا وتستعمل باضافة 1/2 كوب ماء فوق اللحم

اما الاسباجتي

 فهي وصفتها
اسباجيتي التاكو
المقادير:
400 غم معكرونة اسباجيتي مسلوقة
ملعقة طعام زيت زيتون
بصلة متوسطة مفرومة ناعم
250 غم لحم مفروم (ممكن تحطي اكثر)
مقدار من بهارات التاكو
1/2 حبة فليفلة خضراء مفرومة
1/2 حبة فليفلة حمراء مفرومة
علبة بندورة مطحونة على الخلاط
1/4 ملعقة صغيرة بودرة الثوم
2 ملعقة طعام رب بندورة
كوب ماء
ملح و فلفل اسود
علبة ذرة مصفاة
كوب جبنة شدر مبشورة
كوب جبنة موزريلا مبشورة
1/3 كوب شرائح زيتون اسود
اختياري:
صلصة مكسيكية، جواكمولي، خس

الطريقة:
يوضع الزيت في قدر ويقلب البصل ثم اللحم لينضج وتضاف بهارات التاكو وتملح وتبهر
تضاف الفليفلة وتقلب لدقيقتين
تضاف البندورة والماء وبودرة الثوم ورب البندورة وتترك لتتسبك من 7-10 دقائق (ممكن اضافة الماء اذا احتاج الامر)
تضاف الذرة
تضاف المعكرونة وتخلط جميعا وتوضع في صحن للفرن
ترش بنوعي الجبنة والزيتون على الوجه
تخبز من 20-25 دقيقة على حرارة 350 او 180 مئوي
وصحتين


Wednesday, January 22, 2014

مربعات الرازبري وجوزالهند بالشوكولاتة

كيف بالله هالطقس؟!! بعرف كتير منكم بقول بدري...بس جد ما احلى الدفاااااااااااااااااااااااااااااااااااااا وصوت العصافير والشعور بالنشاط....شئ رائع...حتى هارون اكتشفت انه بيحب الدفا والطلعة برة وما بيبكي لما بحطه بكرسي السيارة لانه ببساطة مش لابس ملحفة ومتضايق :)

وبالحديث عن النشاط...تمشينا امبارح شوي انا وهارون وماما وياسمين بعد الظهر...واحدة من الاهداف ال 101 هي انه احاول امشي ولو مرة واحدة بالاسبوع...بداية جيدة...والهدف اللي بحب احكي عنه اليوم هو هدف حلو ونبيل بنفس الوقت وهو انه اعمل اشي كويس لشخص غريب ما بعرفه مرة بالشهر على الاقل....ممكن مساعدة باي شكل او نوع او حتى ابتسامة... جربوا معي واكيد بتصير الدنيا احلى لو الكل فكر يساعد بعض...

وبالحديث عن الحلو والحلاوة...حلو اليوم كتيير زاكي وسهل وشكله رائع...مربعات الرازبري وجوزالهند بالشوكولاتة...جربوها ورح تعجبكم...



مربعات الرازبري وجوزالهند بالشوكولاتة
المقادير:
1 3/2 كوب بسكوت مطحون
اصبع زبدة
3 كوب جوز هند محلى (وممكن لأ)
علبة حليب مركز محلى
كوب مربى رازبري
1/2 كوب بيكان او لوز مفروم
1/2 كوب شوكولاتة مفرومة
1/2 كوب شوكولاتة بيضاء مفرومة

الطريقة:
يفرك البسكوت بالزبدة المذابة وترص بصحن البايركس المتسطيل
يوزع جوز الهند
يوزع الحليب المحلى
تخبز على 180 حوالي 20-25 دقيقة لتبدأ جوانبها بالاحمرار قليلا
تخرج وتبرد تماما
تفرد المربى عليها ويوزع البيكان او اللوز
تسيح الشوكولاتة السوداء وتوزع بشكل خيوط ثم الشوكولاتة البيضاء
تبرد تماما في الثلاجة وتقطع مربعات


Monday, January 20, 2014

صوص او سيرب البان كيك بالقرفة

حكيتلكم عن قائمة الاهداف اللي بديتها (ال 101 هدف ب 1001 يوم)...واحدة من هالاهداف اني ما اعصب او اشكي من اشي لمدة اسبوع فجربت ابدا اليوم...ههههههه جد!!!! جد منال!!!! ما تعصبي لاسبوع؟!!!! هاد الهدف رح يكون صعب المنال!!!!! منيح اللي بديت بدري عشان اضل احاول...على القليل معي وقت...يعني بيكفي السواقة اليوم...وضع سيئ واللي بيغيظ انه الناس الغلطانة بالسواقة (اللي بيدور من نص الشارع واللي بيقرر يوقف فجأة بشارع سريع وبيجحرك ليش بتزمريله وبيقولك " على مهلك" !!! انا اللي على مهلي!!! واللي بيلف يوترن على الاشارة اللي ادامك واشارتك هي اللي ماشية ومش بس هيك وبسرعة خرافية بيتخليه يفقد السيطرة على سيارته اللي بتبدا تلف ادامك وانت معك بيبي صغير بالسيارة!!!! قال شوووووو ما اعصب!!! ان شاء الله يزبط هالهدف!!!

طيب على صعيد ايجابي اكتر... من الاهداف اللي حكيتلكم عنها اني احوش فقررت ادخل حالي بتحدي وهو اني احوش لمدة 52 اسبوع (سنة) دينار بالاسبوع الاول و2 بالاسبوع التاني و3 بالثالث...وهيك ل 52 دينار بالاسبوع ال 52...(الفترة الاخيرة من التحدي هي الاصعب) بس بحوش بآخر السنة 1378 دينار!!!! مش بطال!!!....والهم صفحة على الفيسبوك بس انا ما اشتركت فيها...ممكن تعملوها بمرتبان وممكن بمغلف زي ما انا عملت وتعملوا صفحة زي هاي
المصدر: http://www.lgfcunewsworks.org/mm-52weekchallenge.php

بكرة ان شاء الله بحكيلكم على هدف جديد من القائمة واللي بيحب يشاركنا باهدافه بيكون كتير حلو نتعلم ونتشجع مع بعض..

اليوم طبخت شاكرية وافطرنا بان كيك (سادة وبالشوكولاتة) بما انه الاولاد معطلين ...وصفة اليوم مش للبان كيك بس لسيرب مميز معه بالقرفة....وهي الطريقة:

صوص او سيرب البان كيك بالقرفة
المقادير:
اصبع زبدة
3/4 كوب سكر
1/4 كوب سكر بني
ملعقة طعام كورن سيرب (قطر او شراب الذرة) (ممكن تستعملوا عسل)
رشة ملح

1/4 ملعقة صغيرة قرفة
1/4 ملعقة صغيرة كربونات
ملعقة صغيرة فانيلا

الطريقة:
تذاب الزبدة ويضاف السكر بنوعيه  وشرلب الذرة والملح ونحرك ليذوب السكر ويغلي المزيج
تضاف بقية المكونات ويحرك لدقيقة ويرفع
يقدم مع البان كيك دافئ
وصحتين...
جربوه الجمعة الجاي...


Sunday, January 19, 2014

سلطة الافوكادو بالرمان والبندق وصوص البلسامك

اول بوست بال 2014...وصار مارق 19 يوم منها؟!!!! جد وين الوقت بيروح...شكرا لكل الدعم اللي قدمتولي اياه السنة الماضية وبانتظار دعمكم هاي السنة كمان.... :)

بعد رحلة قصيرة الى بلاد الزمهرير (كندا) لما وصلنا كانت الحرارة -36...!!!!! البنطلون مجرد ما طلعنا من المطار كان صار مثل الورق...شوي وبينمزع!!! والحمدلله انه بدا الجو يدفي بعدين...فصارت -8 وجد بتحسوا الدنيا صارت ادفا؟!!!! لو -8 بالاردن اظن بنموت...!!! المهم انها كانت مغامرة لطيفة في ارجاء تورنتو...وانا بحب المدن الكبيرة وخاصة المشي...فبالرغم من الطقس البارد المشي كان من احلى الاشياء اللي عملتها لانه بفتقدها كتير بالاردن للاسف!!! يعني اذا بدك تمشي بالشارع ..100 عقبة بتطلعلك بالطريق من شجرة زيتون هون لدرجة هناك لحد بيطرش عليكي مي او ريحة الديزل الخانقة...للاسف واذا بدك تمشي بمكان مناسب بيصير المشي رياضة...وانا ما بحب الرياضة؟!!! جد...عندي مشكلة معها من زمان!!!

المهم...بما انه بداية سنة جديدة...ففي بالي عدة تحديات حطيتها قدام حالي للسنة الجديدة ان شاء الله على الصعيد الشخصي وصعيد البيت ...وبالهامناسبة بحب اخبركم عن موقع عجبني كتير اسمه Dayzeroproject  اذا كنتوا من الناس اللي بيحبوا يحطوا اهداف لحالهم فهاد الموقع بيعطيكي الفرصة انك تحطي عدة قوائم لاهداف بتحبي تحققيها بمدة زمنية معينة...انا حطيت 101 هدف بحب احققها ب 1001 يوم (حوالي 3 سنين) يعني مش بطال...وممكن طبعا تكون لمدد زمنية اقل...وكل ما تحققي هدف او تبدي فيه ممكن تعملي update عشان الواحد يعرف حالوا وين وصل...ومن ضمن الاهداف اللي حابة احققها اهداف متعلقة باعادة تنظيم الاشياء ببيتي بطريقة تكون اكثر رتابة...ومنها:
غرفة المونة (بديت ورح ياخد وقت لاني لازم اشتري مرتبانات وكونتينرات لتكون منظمة ورح اشارككم الصور ان شاء الله لقبل وبعد (اشي بيخزي قبل!!!) بتمنى بعد يكون احسن...
خزانتي
مكتبي
اغراض مشاريعي المنزلية (هدول بهم شغل ليوم الشغل)
غرفة الغسيل
الثلاجة (للمرة ال 7000) بس بدي احاول الاقي حل جذري
...الخ
وكمان حطيت اهداف طويلة الامد مثل اني اشتري تلفون؟!!! وما كنت عارفة اني رح اضيع تلفوني وشكلوا رح يكون هدف قصير الامد جدا!!!!
وفي اهداف متعلقة بالصحة واهداف بالتوفير والتدبير المنزلي بديت بواحد منها وهي تحدي اني احوش ...بخبركم عن الطريقة بالبوست الجاي
ورح اشارككم بعض الاهداف التانية في بوستات مستقبلية ان شاء الله...

وبما انه اشتقنا للوصفات والاكل فحطيت صورة على الفيس بوك لكعكة شوكولاتة من اروع ما اكلت...لاني اولا بحب الشوكولاتة كتير ولانها معمولة بافضل انواع الشوكولاتة ولانها كلها شوكولاتة بشوكلاتة حتى العجينة اللي على الوجه...



بس لانها اول السنة وحابين نكون صحيين الى حد ما....فسلطة الافوكادو والرمان بالبندق وصوص الخل البلسامك من السلطات الغنية والمشبعة



سلطة الافوكادو بالرمان والبندق وصوص البلسامك
المقادير:
1/2 حبة خس مقطع كبير مغسول ومنشف
ضمة جرجير مغسولة ومنشفة
1/2 رمانة مفروطة
حبة افوكادو مقسمة
1/2 كوب بندق محمص
للصوص:
1/2 بصلة صغيرة مبشورة
4 ملاعق خل بلسامك
2 ملعقة طعام عصير ليمون
8 ملاعق زيت زيتون
ملعقة صغيرة سكر او عسل
1/2 ملعقة صغيرة ملح
فلفل اسود

الطريقة:
تخلط مواد الصوص
تقدم فوق السلطة
صحتين والف عافية