Thursday, December 4, 2014

خبز البوري والزلابية


كتير ناس بتسألني كيف الواحدة ممكن تنظم امورها بين البيت والشغل والاولاد والمسؤوليات الاجتماعية ؟ بطيخات كتير بس كيف الواحدة ما توقع ولا واحدة منهم...
سؤال وجيه بس الاجابة سهلة وبسيطة وبتتلخص بكلمتين: التنظيم والبساطة.
والبساطة بقصد انك تهونيها على حالك شوي..يعني مش ضروري كل اشي يكون سوبر...كتير ناس بتفكر انه اكيد ولادي بياخدوا كل يوم ساندويشة شكل على المدرسة مثلا والحقيقة والاعتراف الخطير انه لأ...والاعتراف الاخطر انه السيد سلطان اعلن اضرابه وحاليا بياكل ساندويشة حلوم...حلوم يا جماعة  من المدرسة...يعني شو مال ساندويشة الحلوم بالبيت؟ قال تبعت المدرسة ازكى...اولها كنت ازعل من هيك قصص واشعر بالذنب كمان انه اكيد انه الساندويشة اليومية مش مغرية بس انا ما عندي وقت مرات لاتفنن لساندويشات المدرسة فقررت انه لازم افوت...بلاش على الاقل ياسمين بتفضل ساندويشة من البيت.. هيك صرت اعزي حالي.

وبالحديث عن تبسيط الامور مرات بحس حالي عم بغرق بدوامة انه علي هيك وهيك ومش ملحقة على هيك...واكتشفت اني اميل اني اعبي جدولي بكتير اشياء مرات من كترها بصير مش عارفة من وين ابلش وبضيع وما بنجز اشي.....فقررت اني احط قائمة كل ليلة قبل ما انام بايش جدولي تاني يوم ويكون فيها انجاز ل 3 اشياء على صعيد البيت بس...اذا قدرت اكتر ممتاز بس لازم 3 اشياء..مثلا بدي اعزل غرفتي...اذا ببدا فيها مرة واحدة بهلك وبصير مش قادرة انجز بقية اعمال وواجبات اليوم فقررت انه مثلا واحدة من ال 3 اشياء اني اعزل خزانتي ومعي ساعة بس....بعدين بحط شغلتين تانيين على القائمة ما الهم دخل بتعزيل الغرفة زي مثلا بدي اعمل حلو (لانه اشي مش اساسي زي الطبخة) وبدي اشتري اغراض للبيت...خلص هيك بس..طبعا في اشياء ونتاتيف تانية بس عم بحكي عن اشياء رئيسية باليوم فمثلا ما بحسب الغسيل من ال 3 اشياء لاته الغسالة اوتوماتيك ولا الطبخة لانها تقريبا اشي يومي...

وكمان لازم يكون في انجاز شخصي الي..واحد على الاقل يوميا...مثلا اليوم بدي اكتب بوست على المدونة او بدي اعمل مشروع منزلي craft... وهيك

موضوع التنظيم مهم كتيييييير وبيجيه معه التخطيط..والتخطيط بالبيت بيكون على عدة جبهات (على الاقل بالنسبة الي):
1. شغل البيت اذا بدي اعزل وبحط جدول اشياء انا اعملها واشياء البنت اللي بتساعدني تعملها
2. الاكل (هاد لحاله اله خطة وهي اني بقرر شو بدي اطبخ لاسبوع قبل ما اروح اجيب اغراض وبتنحط الاشياء اللي بدي اطبخها حسب:
- شو في عندي بالثلاجة والفريزر والمونة عشان استفيد منها
- شو في اشياء عليها عروض بالسوبرماركت
- موسم الخضار والفواكة
- وطبعا ميزانيتي

3.  اي مناسبات اجتماعية (بدي هدايا، بدي اودي اشي على الدراي كلين، جاييني ضيوف شو بدي اقدملهم..وهكذا
4. شغلي..شو علي التزامات ومواعيد تسليم وهيك قصص
5. واكيد الاولاد شو بدهم مين جاي اصحابه عنده ومين رايح عند اصحابه وهيك

ورفاقي في هاي العملية هو دفتر وقلم وموبايل...بدونهم بضييييييييع....

كتير بحب اسمع منكم عن افكار للتنظيم او حتى اسئلة اذا حد عنده مشكلة...
رح نخصص مواضيع مستقبلية عن التنظيم بس على المدونة في كم موضوع وهي الرابط 

اما بوست اليوم تحت طلبكم فهو للخبز البوري ؟ رح تقولولي ما وعدتينا بالزلابية. مزبوط وانا عند وعدي ...بس لاني من الناس اللي كتير بحب اي وصفة ممكن اني استغلها بوصفتين...فقررت انه وصفة البوري هي نفسها للزلابية وبتطلع بتقرمش وبتطرى شوي ...هلا الزلابية في منها انواع...قصدي حسب كل بلد...اللي بتنعمل بنابلس وبتتقدم مع هربى البقطين المكلس ما في اي بهارات عشان تذوقي طعم البقطين عشان هيك للي طلبوا مني خبز البوري الهندي وكمان الزلابية نفس العجينة مع فارق انه للزلابية بنضيف حبة البركة

عجينة الخبز البوري الهندي والزلابية
المقادير:
3/4 كوب طحين اسمر
3/4 كوب طحين ابيض
رشة ملح
1/2 كوب ماء دافئ
2 ملعقة طعام زيت

وللزلابية: ملعقة طعام حبة البركة

الطريقة:
تعجن معا جيدا ويمكن ان تحتاجوا للمزيد من الماء وتررك لترتاح 1/2 ساعة
تقسم حسب حجم الرغيف الذي تريدون وتفرد على سطح مرشوش بالدقيق اتكون رفيعة قدر الامكان
نحمي زيت غزير في مقلاة مناسبة لحجم الرغيف ويجب ان يكون الزيت حامي
نبدأ بقلي الارغفة ونقلبها
هي صورة للزلابية


والنتيجة



21 comments:

  1. يا الله من زمان نفسي اتعلم طريقة الزلابية ... يسلمو كتير كتير 😊😊😊😊

    ReplyDelete
  2. كمان عندي مشكلة بتنظيم الوقت لانه انا بشتغل وبرجع متأخرة علی البيت بعد الساعة 6 فعندي مشكلة بالتعزيل وحتی الطبخ مرات بقضيها نواشف. يا ريت استفيد من خبرتك بهادا المجال

    ReplyDelete
    Replies
    1. حاضر يا احلى سهى...رح اخصص كم بوست لهاد الموضوع واصبري علي شوي ورح يعجبك كتييير :)

      Delete
  3. شكلي رح أعملها اليوم يسلموا هالايدين يا ست منال ،الله يحميكي.

    ReplyDelete
  4. عزيزتي منال يعني لازم الزيت يكون غامر عجينة الزلابية لو فرضا اني عملتها حجم صغير زي حجم القطايف مثلا

    ReplyDelete
    Replies
    1. لتطلع زي الزلابية او البوري لازم زيت غزير

      Delete
  5. يسلمو اديكي شي بشهي ..

    ReplyDelete
  6. والله مشكلة تنظيم الوقت بالنسبة الي مشكلة
    ومتل ما حكيت يا ست منال اوقات بنلتهي بتعزيل غرفة وحدة وبخلص كل النهار
    وبتتراكم الاشياء التانية علينا وباخر النهار بكون هالكين من التعب ...
    انا بشكرك على افكار تنظيم الوقت
    ورح احاول اطبقها لانها فعلا طرق عملية
    وما بتستنفذ كل قواي وبتخليني اضل عند الرغبة باكمال كل اعمالي

    ReplyDelete
  7. بالنسبة لوصفه اليوم كتتير رائعة
    انا بحب الخبز البوري كتيير وخاصة مع المربياات

    ReplyDelete
  8. يسلموا اديك ست منال الزلابية من أزكى الاكلات عند ابني شكرا كتير الك☺☺☺

    ReplyDelete
  9. يسلموا اديك ست منال الزلابية من أزكى الاكلات عند ابني شكرا كتير الك☺☺☺

    ReplyDelete
  10. يسلمو ايديكي منال وشكرا على مشاركتنا أفكارك وصفاتهم رائعة كالعادة

    ReplyDelete
  11. اليوم كلامك بجنن بحب الحكي عن التنظيم والترتيب واستغلال الوقت عن جد بنستفيد من خبرتك وكمان بحب اعرف من وين بتجيبي اغراضك وادواتك وطناجرك وكل شي عنك منال المبدعه

    ReplyDelete
    Replies
    1. تابعيني دايما يا دعد بتعرفي كتييير اشياء عني :) شكرا لزوقك

      Delete
  12. رائعة دائما بكل وصفاتك

    ReplyDelete
  13. يسلموو منال.انا كتير بحب الخبز البوري وهلا بفضلك عرفت كيف رح اعملوو.. فداء

    ReplyDelete
  14. حبيت اسماء اولادك احكيلنا قديش أعمارهم،وعشان موضوع التنظيم بستنى أفكارك الرااائعة على احر من الجمر

    ReplyDelete
  15. رائعة .. بالنسبة للتنظيم انا كنت اهلك حالي طول اليوم بس لما صرت اقسم تعزيل الغرفة على عدة ايام .. حسيت بالفرق

    ReplyDelete
  16. حبيبتي منال شكرا كتير لكل تعبك وبجد كل ما تخطري ف بالي بدعيلك ممكن لو سمحتي بدي اعمل عيد ميلاد لبنتي عندك افكار ممكن اعملها كضيافه للاطفال ولو بدي اعمل كوكيز شو ممكن استعمل تغطيه للكوكيز
    والمفن او كب كيك كيف بقدر اخلي قوامها تقيل فاهمتيني يعني مو كيك هش اسفه لو غلبتك ..منار

    ReplyDelete
  17. يمييييييي هاد الخبز بتجيبو تيتا من نابلس ماكنت بعرف انو اسمو زلابية كتييييير بيشهي بفضلو اكتر من البوري مشان حبة البركة بتعطي طعم

    ReplyDelete