Monday, November 17, 2014

مشروعين منزليين بالصواني والستير فراي بالستيك

مؤخرا ومع الانشغال بكل شي في الدنيا عم بتروح واجبات تانية من قائمة العمل..بتقدروا تقولوا بتتأجل...بتنحذف لفترة ...الخ ومن اهم الاشياء اللي كانت ببالي هي تنظيف غرفة المونة...رح تقولولي شو جننتينا فيها...مزبوط بس هي اهم غرفة بالبيت...بنك الطعام...ومكاني المفضل بعد المطبخ...وطبعا محسوبتكم مرات من العجقة الا ما احط اشياء مش بمحلها وبالتالي يومين ثلاثة وتعود وتكتسح الفوضى العارمة ارجاء المكان...فامبارح قعدت انظف وارتب وامسح غبر واغسل تبرويرات وارتب من الساعة 8:30 الصبح ولغاية 12:30 الظهر...4 ساعات من الشعبطة على السلم والنزول وغيره وغيراته  بس شعور رهيب صارت ورجعت في قمة الترتيب والحمد لله.... 

بس من افضل الاشياء اللي نتجت عن عملية "الهجوم على غرفة المونة" طبعا غير الترتيب والنظافة هو عمل بعض الاشياء من الاغراض الموجودة وبتستناني احن عليها عشان تنعمل من ضمنها مرتبان مربعات السمورز اللي اخذته معي على رؤيا عشان افرجيكم كيف ممكن تقدموها كهدية...وطبخت ارز بفول اخضر وخلصت من شوية ارز امريكي خلطتهم مع الارز العادي وحطيت شوية لوز مقلي على الوجة برضه من لوز صرله فتره وكمان لقيت (لاحظوا كلمة لقيت!!!!!)...يعني الواحد بينسى مرات شو عنده  يا جماعة!!!! المهم لقيت كيس تمر قديم (حوالي 3 اكواب) وعلى السريع حطيت عليهم 3 اكواب مي مغلية وبس طريوا طحنتهم وبالفريزر ل 3 كيكات تمر..بلاقيهم الواحد وقت الزنقة...

وطبعا صار عندي هاجس هلأ انه لازم ارجع فكرة اطبخ مما وجد من هون لآخر السنة ان شاء الله لانه جد في كتير اشياء ولازم استغلها...

قبل 7000 سنة هههههه اذا بتتذكروا حكتلكم عن مشروع صواني رخيصة جبتها وقررت احولها لشكل تاني واخيرا صحللي اخصص وقت لهالموضوع...
المهم هدول الصواني اللي اشتغلت عليهم جبتهم بدينار للصينية من كارفور...حجمهم مش كتير كبير بس ممتازين للاغراض اللي استعملتهم الهم..اليوم رح احط شكلين وببوست تاني بحط شكلين تانيين ان شاء الله...
هي شكل الصينية لما اشتريتها...مش بطالة بس مش زوقي والناس ازواق... :)



طبعا انا بعاني من انه خالد (زوجي) لما يحط اغراضه بس يرجع من الشغل بيكونوا بشكل مش مرتب على الdresser (شو dresser  بالعربي؟ مأساة...مش خاطر على بالي..
فقررت اني اجيب ورق حلو واقيسه على قد داخل الصينية عشان الزقه عليها ولحمايته من اي اشي جلدت الورق بورق التجليد الشفاف واستعملت مسدس الصمغ ولزقته على الصينية واسفة الصورة معتمة شوي بس اشتغلت بالليل وتمت العملية بحدود ال 15 دقيقة :)



وطبعا انا ما دهنت الصينية خليتها على لونها وهي الشكل النهائي...ارتب بكتير :)


والصينية التانية قررت احطها على الكومودينا جنبي وعليها كتبي ولاني كتير بحب الورد فقررت اني ادهنها ابيض عشان تتناسب مع الورق وعملت نفس الاشي وعليها كتبي اللي بقرأ فيهم بالليل حاليا...وكتب طبخ بالمناسبة هههههههه يعني مش اشي غريب او عجيب :) 





بتمنى يكونوا عجبوكم وما كلفت الصينية اكتر من الدينار لانه كل المواد التانية عندي بالبيت من ورق وعلبة دهان رش... :)

اما وصفة اليوم فهي وصفة للستير فراي الصيني بالستيك من زمان عندي ما بحب اغيرها جربوها بتمنى تعجبكم

ستير فراي
    المقادير:
لصوص النقع:
ملعقة كبيرة خل ابيض
2 ملعقة طعام صويا صوص
رشة ملح
رشة فلفل اسود
حبة ثوم مدقوق
2 ملعقة كبيرة نشا
500 غم ستيك (روز بيف) مقطع شرائح
للستير فراي:
جزرة كبيرة مقطعة شرائح
2 فليفلة حمراء وفليفلة صفراء مقطعة شرائح
3 حبات ثوم مقطع شرائح
بصلة مقطعة شرائح (يمكن استخدام بصل اخضر)
*يمكن استخدام اي خضار مثل البروكلي
3 ملاعق كبيرة زيت نباتي
قطرات من زيت السمسم

لصوص الستير فراي:
فنجان قهوة صويا صوص
2 ملعقة طعان نشا
2 ملعقة طعام خل
فنجان قهوة ماء
بصلة خضراء مقطعة شرائح
           
   الطريقة:
توضع كل مقادير صوص النقع في كيس ويوضع فوقها الستيك وتنقع لمدة ليلة.
في مقلاة نضع الزيت ويحمى ونضيف الستيك وتقلب لعدة دقائق ويراعى عدم وضع كمية كبيرة من اللحم مرة واحدة او في زيت غير حامي.
يضاف البصل والثوم ويقلب
يضاف الجزر والفليفلة وتقلب لعدة دقائق
تخلط مكونات الصوص الثانية وتضاف وترش بالقليل من زيت السمسم وتقدم



16 comments:

  1. حلوووه كتير الفكره يسلمو

    ReplyDelete
  2. فن ة ابدااع!الله يعطيكي العافية

    ReplyDelete
  3. رائعة ومبدعة كالعادة

    ReplyDelete
  4. ماشاءالله عليكي من ابداع ل ابداع

    ReplyDelete
  5. فكرة خلوة ومميزة كثيييير

    ReplyDelete
  6. فكرة حلوة يعطيك الصحة

    ReplyDelete
  7. حبيبتي منال لو سمحتي بدي اسال ازا ممكن انقعها ساعتين بس واللحمه لازم روست بيف ولا بقدر استعمل اشي تاني

    ReplyDelete
    Replies
    1. ممكن بس انقعيها برة الثلاجة

      Delete
    2. نوع اللحمة ممكن فيليه وستيك نوع طري

      Delete
  8. يسلمو حبيبتي بس حتى النقع فيو نشا

    ReplyDelete
  9. الزوووء كله انتي وبس يسعدك وين ما رحتي

    ReplyDelete