Tuesday, September 16, 2014

وصفات السبت 9/13 على دنيا يا دنيا وقناة رؤيا ووصفتين للمفن من خليط الخبز المتعدد الاستعمالات

بدا الخريف يعزف اول نغماته بالطقس وبديت اشعر بانه فصل الصيف العزيز على قلبي عم بيودع!!! يعني وبالرغم من النق اللي عملته من فترة لفترة على عجقة الصيف والشوب بس بيضل فصلي المفضل بسماه الزرقاء والشمس اللي معبية كل مكان وبتعطيني الشعور بالطاقة وبالانجاز!!! بس كل اشي واله آخر...عشان هيك رح احاول استمتع بالخريف مع انه من اكتر الفصول كآبة..بشعرني بالحزن مع انه في ناس كتير بتحبه وبشعرها بالدفء...اهو كل واحد وعلامو!!!

السبت الماضي على دنيا يا دنيا استمتعت بحلقة جميلة وردود فعل رائعة منكم...شكرا جزيلا للمتابعة بحلقة الخليط المتعدد الاستعمالات 


والبسكوت اللي بيتقدم مع الدجاج المقلي



لخلطة الخبز المتعدد الاستخدامات (مثل ما حبت ديالا الدباس تسميها الخلطة السحرية) والبسكوت اللي بيتقدم مع الدجاج المقلي
هي الفيديو

ولتندرز الدجاج او النجتز


 وللبان كيك مع صوص الشوكولاتة وصوص القرفة هي الفيديو



صوص الشوكولاتة بالمناسبة ممكن تستعملوها باي وصفة بدها صوص شوكولاتة :) وتحتفظوا فيها بالثلاجة


ولاني وعدتكم ووعد الحر دين عليه...هاد الخليط بيستاهل كل قؤش بيندفع فيه لانه بنعمل فيه اشياء كتيرة...اليوم رح احط وصفتين للمفن...واحدة عامة لاي نوع مفن بتحبوه وانا استعملت البلوبري (مجمد اشترتيه من فترة من سلكت) وممكن تستعملوا بداله الفراولة او اي نوع فولكة متوفر وممكن الشوكولاتة او رشة قرفة وزبيب وبنفس الكمية اللي انا حطيت فيها البلوبري...وهي اول وصفة


المفن بشكل عام بخلطة الخبز المتعددة الاستعمالات
المقادير:
2 كوب  من الخليط
بيضة
ملعقتين فانيلا
2/3 كوب سكر
2 ملعقة طعام زيت
2/3 كوب حليب
3/4 كوب بلوبري مفرز او طازج او اي نوع فواكة تفضلون

الطريقة:
تخفق البيضة، الفانيلا، السكر، الحليب والزيت
تخلط مقادير الخليط بالسوائل وتحرك لتختلط بالملعقة
تسكب في قوالب المفن وتوضع في فرن على 180 درجة من 12-15 دقيقة لتنتفخ وتنضج
تترك لتبرد على سلك معدني


والوصفة الثانية بزبدة الفستق والشوكولاتو تشيبس...مش معقول شو زاكي

مفن زبدة الفستق بالشوكولاتة تشيبس
المقادير:
2 كوب من الخليط
2 بيضة
2 ملعقة صغيرة فانيلا
2/3 كوب سكر
كوب حليب
كوب شوكولاتة تشيبس
1/2 كوب زبدة الفستق

الطريقة:
تخلط زبدة الفستق، البيض، الفانيلا، الحليب والسكر وتخفق
يضاف الخليط وتحرك بالملعقة الخشب ثم الشوكولاتة تشبس
توزع على الصنينة
تخبز على 180 من 12-15 دقيقة
تبرد على سلك معدني


14 comments:

  1. لو سمحتي شو هو الخليط

    ReplyDelete
    Replies
    1. الوصفة بالفيديو الاول :)

      Delete
  2. شكرا الك على الوصفه الرائعه
    وانا استعملتها في عمل بيتزا باي
    استعملت قوالب المفن بنفس طريقه البان كيك وطلعه رائعه جدااااااا

    ReplyDelete
  3. ممممم الوصفات رائعة والصراحة السبت الماضي كان اول مرة بشوفك عالتلفزيون :) أديش انت امورة وبتجنني حبيتك اكتر الصراحة :) هلا أنا كان عندي سؤال بالنسبة للشورتننج (السمن النباتي) هلا اذا فيه وصفة بدها زبدة بقدر أحط بدل جزء منها شورتننج ولا ما بزبط لانه صراحة عندي علبة كبيرة ومش عارفة اخلصها :/ وسؤال تاني كيف بقدر ابعتلك صورة هون اذا طبقتلك وصفة؟ وشكرا ياعسل :)

    ReplyDelete
    Replies
    1. اذا عملتي هاي الخلطة صدقيني رح تخلصي من العلبة بسرعة... :) بس طبعا ممكن تستعملي الشورتنغ بعمل عجينة الباي والبسكوت والكيك والتبديل بيكون واحد بواحد بس مهم يكون كعمها زاكي زي اللي على زبدة...يا ريت اي صور بتحبي تبعتيها انا على الفيسبوك على صفحتي او على ايميلي وانا بنزلها manal_obieda@yahoo.com مع حبي وشكري الك

      Delete
  4. مرحبا الله يعطيكي الف عافيه عملت الخليط وعملت منو الخبز.والدجاج طعم روعه الله يسعدك واستخدمت كمان الشورتنغ بدل السمنه للكعك كمان طريقتك جد يسلمو كتير.وبتمنالك مزيد.من التقدم والنجاح

    ReplyDelete
    Replies
    1. وايديكي يا رب والف صحة وهنا وكل عام وانتم بخير

      Delete
  5. منال الفيديو مش راضي يفتح معي :( متزكرة اني شفت وصفة ال biscuits مكتوبة كتابة

    ReplyDelete
  6. يسلمواااااااا ايدكي على وصفة البان كييك
    من زمان بدي وصفة سهلة ومضمونة

    ReplyDelete
  7. الخليط السحري جربت في كم وصفة ولهلا لساتو عندي :)

    ReplyDelete
  8. تم
    حنان ابوغوش
    صوص الشوكولاته

    ReplyDelete