Tuesday, August 26, 2014

كعكة الطائر المغرد

بالعودة للمدارس بدأت الحياة نسبيا ترجع لطبيعتها ومع ذلك مش تماما وعلى الآخر لانه هارون ببدأ الدوام ان شاء الله الاحد الجاي فيعني لسة في حد قاعد ومش اي حد...حد بده تركضي وراه طووووول الوقت...الله يخليهم ويسعدهم ..
عندي كتييير اشياء اشارككم فيها من مشاريع منزلية تم انجازها الى اكلات عديدة ووعدت اني اتنشط الفترة الجاي واتمنى اكون عند كلامي..بعدين عملية تعزيل 101 لسة ما بدت بالبيت وان شاء الله نبدأ الاسبوع القادم مع ذهاب النونو للمدرسة...هاد رح يكون اله جزء من الحديث في الايام الجاية...وعشان بلا طول سيرة اديش منكم بيزيد عنده موز خاصة بالصيف (بحسه ما عليه طلب)؟ اليوم الوصفة لكيكة لذيذة بالموز اسمها Hummingbird Cake يعني كعكة الطائر المغرد؟ ليش طيب؟ اكيد مش لانها معمولة من الطيور المغردة...بس لحد الآن ما حد عارف اذا في قصة وراء التسمية الا لانه الكيكة كتير حلوة وبتشجع الطيور المغردة تيجي عليها مثل ما بتيجي على الرحيق الحلو...جربوها...رح تعجبكم اكيد

كعكة الطائر المغرد
المقادير:
كوب بيكان او جوز مفروم خشن ومحمص
1/2 2 كوب طحين
1/2 1 ملعقة صغيرة كربونات الصوديوم
ملعقة صغيرة قرفة
1/2 ملعقة صغيرة ملح
كوب زيت
2 كوب سكر
4 بيضات
2 ملعقة صغيرة فانيلا
3 موزات متوسطة مستوية ومهروسة
علبة اناناس صغيرة مطحونة بالخلاط مع عصيرها
للوجة:
1/2 باكيت (110 غم) جبنة كريمية
2 كوب سكر ناعم منخول
ملعقة صغيرة فانيلا
2-3 ملاعق طعام حليب سائل

الطريقة:
يخلط الطحين والكربونات والقرفة والملح
يخفق الزيت والسكر والبيض واحدة بعد الاخرى وتضاف الفانيلا
يضاف الموز والاناناس ثم الطحين والبيكان او الجوز المحمص
تسكب في قالب مثقوب من النصف Tube or Bundt pan ومرشوش بالطحين بعد دهنه بالقليل من السمنة وتوضع في فرن على حرارة 180 مئوي لغاية ما تجتاز اختبار الكيك
بدها حوالي ساعة واذا حسيتوا انها لسة ما عم بتستوي وبدت يحمر وجهها خفضوا حرارة الفرن الى 160.

تقلب على سلك معدني لتبرد
يحضر الجليز بخلط المكونات لتصبح كريميو وسهلة السكب وتسكب على الوجة وتزين بحبات البيكان او الجوز
تقدم مع احلى كاسة شاي...والف صحة..


13 comments:

  1. مرحباً منال أنا كنت سألتك قبل فترة عن كب كيك الموز وحتى فيه سؤال ما جاوبتي عليه لكن عندي سؤال اهم هو لو عندك موز مستوي اي وصفة بتفضيل منهم لانه الوصلتين نفس عدد الموز ٣ وانا عندي إياهم في الفريزر وآسفة غلبتك

    ReplyDelete
  2. اهلا عزيزتي..جاوبت على وصفة مفن الموز...الوصفتين مختلفات تماما...واحدة كيكة والتانية مفن والطعم بيختلف..اقتراحي جربي التنتين :) بس ممكن تجربي المفن بالاول وتشوفي اذا عجبتك بالطعم بتجربي التانية وبالتوفيق :)

    ReplyDelete
    Replies
    1. شكرًا كتييييير :)

      Delete
  3. يسلموا ايديكي شكلها شهي وطريقتها سهلة جدا

    ReplyDelete
  4. يسلمو ايديكي اسمها لطيف جدا حلو تشجعي اطفالك ياكلوها بس تحكيلهم اسمها رح يحبوها اكتر

    ReplyDelete
  5. يسلموا وصفة حلوة و اسمها احلى واللي عملتها احلى و احلى :-)

    ReplyDelete
  6. حبيبتي منال يسعد مساكي هالكيكه بتاخد 2 كوب سكر مو كتير ولا هيك تمام

    ReplyDelete
    Replies
    1. اهلًا منار لا الكمية مناسبة :)

      Delete
  7. ضفتلها معلقه صغيره بكنج باورد هلا انتبهت انه ما فيها الله يستر lol

    ReplyDelete
  8. شكرا الك على زووءك وسرعه الرد

    ReplyDelete
    Replies
    1. اهلًا بيمشي الحال :)

      Delete
  9. بتجنن طلعت سلم ايديكي وعينيكي يازوء دعيتلك من قلبي

    ReplyDelete
    Replies
    1. ممتاز الف صحة والله يسعدك 😊

      Delete