Saturday, March 8, 2014

بسكوت رقائق الشوكولاتة ومنيو الاسبوع القادم

الساعة 6:30 صباحا وانا عم بطبع البوست...هارون مريض وحرارته عالية (اظن انه انعدى من بنت مريضة بالحضانة) فهي ضريبة المدارس...والحاصل اني ما نمت الي يومين وهلا عم بشرب قهوتي وبطبع البوست...

مع الجو الدافي بديت اشعر بالرغبة بالبدء بتنظيف البيت بس لاني كنت مداومة بالحضانة الاسبوع الماضي فحاولت ابدا باني اطلب اشياء من البنت اللي بتساعدني...اهو ولا البلاش...بس بيقولوا في ثلجة جديدة على الطريق؟ اكيد ولا اشاعة؟!!! ان شاء الله تتلج وتشتي..

اما على صعيد الطبخ فالاسبوع الماضي عملت الاكلات التالية:
يوم الاحد من برة بدل يوم الجمعة الماضي لاني طبخت
يوم الاثنين ستيك بالجريفي وجراتان البروكلي والزهرة ومتبل وبطاطا بالفرن
يوم الثلاثاء مقلوبة زهرة وسلطة وشوربة كويكر بالبندورة
يوم الاربعاء فيلادلفيا ستيك ساندويش وبطاطا وسلطة الشومر والبرتقال والجرجير
يوم الخميس...صينية رقاق 0طبق مصري لذيذ) بشارككم بوصفته قريب ان شاء الله
يوم الجمعة (ارجعنا للنظام من برة)

اما وجبات الاسبوع القادم فهي ان شاء الله وبدون ترتيب
بامية وارز
بيف ستروغونوف وشوربة كويكر بالكريما
محشي بطاطا
كاساديا وشوربة بروكلي على طريقة مطعم بانيرا 
دجاج كوردون بلو وسلطة كولسلو بالفليفلة
يوم بواقي
الجمعة من برة

كل الاغراض موجودة عندي وبالتالي من المفترض عدم صرف الكتير الا الاشياء العارضة زي الحليب او بعض نواقص الخضار اذا احتاج الامر

اليوم رح اشارككم وصفة لذيذة كتير لبسكوت الشوكولاتة تشيبس...في كتيييير طرق لهاد البسكوت...اشي بدون شوفان واشي بشوفان زي طريقة حطيتها قبل قترة (بسكوت الشوفان برقائق الشوكولاتة) واشي بزبدة الفستق الخ...وصفة اليوم الحلو فيها انها لازن تتبرد على الاقل 2 ساعة بالثلاجة لحد 3 ايام فممكن تعمليها وتبرديها اليوم وبكرة تخبزيها على راحتك..


بسكوت رقائق الشوكولاتة 
المقادير:
1/2 1 اصبع زبدة بحرارة الغرفة
1/4 كوب جبنة كريمية
1/2 كوب سكر
كوب سكر بني فاتح
2 بيضة
2 ملعقة صغيرة فانيلا
1/4 2 كوب طحين
ملعقة صغيرة كربونات
ملعقة صغيرة ملح
2 كوب شوكولاتة شيبس (رقائق الشوكولاتة)

الطريقة:
يخلط الطحين والكربونات والملح ويترك جانبا

تخفق الزبدة والجبنة مع نوعي السكر ليصبح المزيج كريمي وخفيف القوام
يضاف البيض واحدة كل مرة ثم الفانيلا
يضاف الطحين والشوكولاتة وتخلط لتختلط


تغطى وتبرد بالثلاجة من 2 ساعة الى 3 ايام
تخرج من الثلاجة ويحمى الفرن الى 350 ف او 175 مئوي وتبطن صينية الخبز بورق الخبز ويؤخذ كمية من العجينة وتكور على الصينية مع ترك مسافة 4 سم بين كل بسكوتة والثانية ويضغط قليلا على البسكوت المكورة بباطن اليد لتفرد قليلا

تخبز من 12-15 دقيقة لتنضج
تترك على الصينية 2-3 دقائق لتبرد ثم ترفع لتبرد تماما على سلك معدني

واستمتعوا...وصحتين..


8 comments:

  1. صباح الخير وسلامته لهارون وان شاء الله اموره تتحسن ويرجع على الحضانه بنشاط وعافيه باذن الله
    انا حبيت اشكرك على كتاباتك الي صارت جزء مني لازم اقرئها كل يوم واذا بمر يوم اواكثر من غير قرائتها بحس في شى نا قص يعطيكي الله الف عافيه

    ReplyDelete
  2. الله يسلمك يا رب وشكرا على الكلام الحلو والتشجيع...كلك زوق سوزان :)

    ReplyDelete
  3. يسلموا ايديكي
    بصراحة التصوييير رائع جدا
    وبخلي الوصفة تصير اشهى واشهى
    يسلموا دياااتك يا رب

    ReplyDelete
  4. مممممم مااطيب الكوكيز ومنظرو كل مابدخل ع المدونة بشهيني كتير

    ReplyDelete
  5. يميبيي شكله بشهي ابني كتير بحبه وعجبني لنه في جبنه كريميه بس بدي اطلب منك وصفه سهله للدونت كتير في وصفات عالنت بدي وحده مضمونه لستات البيوت وخاصه مع التلجه الجاي قاعدين ماورانا غير الاكل والشرب ههههه بس طولتي علينا الغيبه اشتقنالك

    ReplyDelete