Thursday, March 6, 2014

طبق السلطان التركي

عم بكتب البوست وقلبي مشلوع (معلش ما لقيت احسن من هاي الكلمة) لانه كتير غريب الهدوء بالبيت ومن غير شر الاولاد كلهم وبالذات هارون بالمدرسة...صرت حاكية معهم مرتين خلال ساعة مع انهم اكدولي اذا في اشي رح يحكوا معي....وشعور عجيب بالذنب وحاسة ايديي مربطين مش عارفة اعمل اشي مع اني كنت راسمة خطط للوقت اللي ممكن استغله...كنت مفكرة انه بس هارون بده يتعود على الوضع الجديد...طلعت انا كمان...بس اتمنى انه احنا الاتنين نتعود على الوضع ...

المهم بلا طول سيرة...كيف معنوياتكم بهالطقس المشمس المغبر شوي...شوب برة والساعة 11 بس...

كيف خطط الاكل لهاد الشهر؟ ان شاء الله رح احط المنيو للاسبوع الجاي بكرة...

قبل كم يوم عملت اكلة تركية واسمها طبق السلطان...مش سلطاني انا...هي اسمها هيك...ههههه
بس جد انها بتسلطن لانه تنوع النكهات بالرغم من بساطتها رائع...وبعدين فيها باذنجان!!! سبق وحكيتلكم عن العلاقة الغرامية بيني وبين الباذنجان...

طبق السلطان التركي
المقادير:
1/2 كيلو لحم خاروف مقطع راس عصفور
بصلة متوسطة مفرومة ناعم
2 ملعقة كبيرة زيت زيتون
ملعقة كبيرة ثوم مهروس
2 كوب صلصة بندورة (انا استعملت رب بندورة ومي لعملو 2 كوب صوص سميك بس ممكن تستعملو بندورة طازجة وتبشروها ناعم مع القليل من رب البندورة)
باذنجانة كبيرة مشوية على الغاز ومقشرة ومهروسة
1/4 كوب كريما
2 ملعقة طعام زبدة
2 ملعقة طعام عصير ليمون
1/2 1 ملعقة طعام طحين
رشة زعتر
ملح وفلفل اسود
بقدونس للزينة

الطريقة:
يوضع زيت الزيتون بقدر على نار متوسطة وتضاف البصلة وتقلب لتذبل
يضاف اللحم وترش بالملح والفلفل الاسود وتقلب ليتغير لونها للذهبي
يضاف الثوم ويقلب دقيقة ثم الزعتر ثم صوص البندورة وعندما تغلي تخفض الحرارة وتغطى 3/4 تغطية وتترك لتتسبك وتنشف الصوص قليلا وتستوي اللحمة (من 1/2 ساعة الى 40 دقيقة)
في قدر آخر توضع الزبدة ويقلب الباذنجان ويضاف له الملح وعصير الليمون والطحين والكريما وتقلب ليسمك (بين 2-3 دقائق) ويوضع في صحن التقديم
يعمل حفرة بالوسط وترتب فيه اللحمة ويزين بالبقدونس
والف صحة واتمنى لكم عطلة سعيدة..


2 comments:

  1. وصفة جديدة اول مرة بسمع فيها يسلمو ايديكي

    ReplyDelete
  2. معك حق
    اولادنا لما بروحوا المدرسة شعور بتحسي قلبك طلع منك
    مع انو هو بكون مبسوط انو رايح على المدرسة
    الله يحمي كل اولادنا يا رب
    ويسلموا على الوصفة

    ReplyDelete