Friday, January 24, 2014

كعكة لفافة القرفة

الحمد لله وجمعة مباركة للجميع....امبارح رزق الله اخوي الاوسط عادل ببنوتة سماها "إلين" ان شاء الله تتربى بعزهم ويجعلها ابنة صالحة لابوها وامها ...

امبارح كان يوم كسسسسسسسسسسسسسسسل ...فطور برة مع الاولاد وخالد...بعدين قيلولة ل 25 دقيقة (محاولة للتغلب على حالة عدم استقرار النوم اللي عندي) ثم نسكافيه مع الاولاد وزيارة لبيت اهلي بعد الظهر والعودة للبيت....شو عملت على اي صعيد؟ صفر!!!! معلش...مش غلط الراحة والاسترخاء...وبالمقابل يبدو يوم الجمعة حافل بالروحة على المستشفى لنشوف البيبي الجديدة وواجب عزاء في العيلة وبعدين روحة على المزرعة ان شاء الله..
وفي خضم الركض بين المشاوير لازم على الاقل اؤمن فطور لذيذ يوم الجمعة...وشو اروع من لفافة قرفة ضخمة تتقطع مثل الكيكة ...



وقبل ما اشارككم الوصفة والطريقة بدي اقولكم على هدف جديد من الاهداف ال 101 وهو برضة هدف على صعيد التحويش...بس بطريقة تانية وهو اني اجمع اي فراطة بمحفظتي كل يوم جمعة بمرتبان...وهي اول جمعة...


ونرجع للفطور...

كعكة لفافة القرفة 
المقادير:
3/4 2 - 3 كوب طحين
2 ملعقة صغيرة خميرة
2 ملعقة كبيرة سكر
ملعقة صغيرة ملح
1/4 كوب حليب دافئ
1/2 كوب ماء دافئ
3 ملعقة طعام زبدة مذابة
بيضة
ملعقة صغيرة فانيلا
للحشوة:
1/3 كوب سكر
ملعقة كبيرة قرفة
3 ملاعق طعام زبدة بحرارة الغرفة
1/4 كوب جوز مطحون  (اختياري)
للوجة:
كوب سكر ناعم
3-4 ملاعق طعام حليب
ملعقة صغيرة فانيلا


الطريقة:
تخلط الخميرة والسكر والماء والحليب
تضاف الزبدة والبيضة والفانيلا وتخلط جيدا
يضاف الطحين والملح وتعجن لتصبح عجينة متماسكة وطرية (ممكن ما تحتاجي كل كمية الطحين فآخر 1/2 كوب ضيفيه حسب الحاجة)
تترك لتخمر ساعة ليتضاعف حجمها
ترق الى مستطيل على سطح مرشوش بالطحين
تدهن بالزبدة وترش بخليط الحشوة (السكر والجوز والقرفة) وترص عليى العجينة باليد بخفة
تقطع العجينة الى حبال بالعرض مثل الصورة مع ازالة الحواف التي لم تصل اليها الحشوة

في صحن او صينية مدهونة نبدأ بلف اول شريط مثل الرول (كما في الصورة ) ثم نبدأ بلف العجينة حوله ليصبح لدينا لفافة ضخمة


نغطيها بقطعة قماش نظيفة ونتركها لتخمر 20 دقيقة
نحمي الفرن على 190 وتخبز من 25-30 دقيقة لتنضج ويحمر وجهها قليلا
نخلط مقادير الوجة ونوزعها عليها كخيوط وصحتين...



5 comments:

  1. الله عليكي يا منال شو انك فنانة ,,,, الله يحميكي ويديم عليكي النشاط والحيوية ... يعني شو احكيلك لو بضل بالمدونة طول اليوم ما بمل الله يعطيكي الف عافية ... وان شاءالله رح اجرب كتير وصفات ,,,منال حبيبتي شكرا من كل قلبي يا مبدعة والله يحميكي

    ReplyDelete
    Replies
    1. تسلمي يا قمر :) الله يسعدك

      Delete
  2. يسلمو ع الوصفة و الفكرة هههههه انا بعملها كتير وبستفيد منهم بعد فترة بمسك الفراطة بطلعو مبلغ منيح مابكون متوقعة اني جمعت هالقد ! بعمل فيهم شي او بشتري شي للبيت لماما

    ReplyDelete
  3. انا زوجي من النوع الي ما يحب يحمل فراطة بجيبتو
    فأول ما يوصل البيت بحط كل الي زايد معو على البيرو وخديهم يا سماح واجمعيهم
    بس صدقا جمعهم وبس نطلع نشتري اغراض للبيت بنستعملهم
    بطلعوا مبلغ محترم

    ReplyDelete