Monday, January 20, 2014

صوص او سيرب البان كيك بالقرفة

حكيتلكم عن قائمة الاهداف اللي بديتها (ال 101 هدف ب 1001 يوم)...واحدة من هالاهداف اني ما اعصب او اشكي من اشي لمدة اسبوع فجربت ابدا اليوم...ههههههه جد!!!! جد منال!!!! ما تعصبي لاسبوع؟!!!! هاد الهدف رح يكون صعب المنال!!!!! منيح اللي بديت بدري عشان اضل احاول...على القليل معي وقت...يعني بيكفي السواقة اليوم...وضع سيئ واللي بيغيظ انه الناس الغلطانة بالسواقة (اللي بيدور من نص الشارع واللي بيقرر يوقف فجأة بشارع سريع وبيجحرك ليش بتزمريله وبيقولك " على مهلك" !!! انا اللي على مهلي!!! واللي بيلف يوترن على الاشارة اللي ادامك واشارتك هي اللي ماشية ومش بس هيك وبسرعة خرافية بيتخليه يفقد السيطرة على سيارته اللي بتبدا تلف ادامك وانت معك بيبي صغير بالسيارة!!!! قال شوووووو ما اعصب!!! ان شاء الله يزبط هالهدف!!!

طيب على صعيد ايجابي اكتر... من الاهداف اللي حكيتلكم عنها اني احوش فقررت ادخل حالي بتحدي وهو اني احوش لمدة 52 اسبوع (سنة) دينار بالاسبوع الاول و2 بالاسبوع التاني و3 بالثالث...وهيك ل 52 دينار بالاسبوع ال 52...(الفترة الاخيرة من التحدي هي الاصعب) بس بحوش بآخر السنة 1378 دينار!!!! مش بطال!!!....والهم صفحة على الفيسبوك بس انا ما اشتركت فيها...ممكن تعملوها بمرتبان وممكن بمغلف زي ما انا عملت وتعملوا صفحة زي هاي
المصدر: http://www.lgfcunewsworks.org/mm-52weekchallenge.php

بكرة ان شاء الله بحكيلكم على هدف جديد من القائمة واللي بيحب يشاركنا باهدافه بيكون كتير حلو نتعلم ونتشجع مع بعض..

اليوم طبخت شاكرية وافطرنا بان كيك (سادة وبالشوكولاتة) بما انه الاولاد معطلين ...وصفة اليوم مش للبان كيك بس لسيرب مميز معه بالقرفة....وهي الطريقة:

صوص او سيرب البان كيك بالقرفة
المقادير:
اصبع زبدة
3/4 كوب سكر
1/4 كوب سكر بني
ملعقة طعام كورن سيرب (قطر او شراب الذرة) (ممكن تستعملوا عسل)
رشة ملح

1/4 ملعقة صغيرة قرفة
1/4 ملعقة صغيرة كربونات
ملعقة صغيرة فانيلا

الطريقة:
تذاب الزبدة ويضاف السكر بنوعيه  وشرلب الذرة والملح ونحرك ليذوب السكر ويغلي المزيج
تضاف بقية المكونات ويحرك لدقيقة ويرفع
يقدم مع البان كيك دافئ
وصحتين...
جربوه الجمعة الجاي...


2 comments:

  1. هههههههه حبيت الفكرة وبما انا هلا باخر كم يوم بالسنة ف يارب تكوني وصلتي لهدفك ، وانا حابة ابلش من السنة الجديدة ان شاءالله موضوع التوفير مع انو اخر كم اسبوع بدهم تحدي كبير ب مو غلط فكرة رائعة

    ReplyDelete
  2. حلوة فكرة التحدي :)
    لو احكي عنها لزوجي بيينبط لانو رح يلاقي مبلغ مكوم باخر السنة ويستفيد منو
    ههههه

    ReplyDelete