Sunday, January 19, 2014

سلطة الافوكادو بالرمان والبندق وصوص البلسامك

اول بوست بال 2014...وصار مارق 19 يوم منها؟!!!! جد وين الوقت بيروح...شكرا لكل الدعم اللي قدمتولي اياه السنة الماضية وبانتظار دعمكم هاي السنة كمان.... :)

بعد رحلة قصيرة الى بلاد الزمهرير (كندا) لما وصلنا كانت الحرارة -36...!!!!! البنطلون مجرد ما طلعنا من المطار كان صار مثل الورق...شوي وبينمزع!!! والحمدلله انه بدا الجو يدفي بعدين...فصارت -8 وجد بتحسوا الدنيا صارت ادفا؟!!!! لو -8 بالاردن اظن بنموت...!!! المهم انها كانت مغامرة لطيفة في ارجاء تورنتو...وانا بحب المدن الكبيرة وخاصة المشي...فبالرغم من الطقس البارد المشي كان من احلى الاشياء اللي عملتها لانه بفتقدها كتير بالاردن للاسف!!! يعني اذا بدك تمشي بالشارع ..100 عقبة بتطلعلك بالطريق من شجرة زيتون هون لدرجة هناك لحد بيطرش عليكي مي او ريحة الديزل الخانقة...للاسف واذا بدك تمشي بمكان مناسب بيصير المشي رياضة...وانا ما بحب الرياضة؟!!! جد...عندي مشكلة معها من زمان!!!

المهم...بما انه بداية سنة جديدة...ففي بالي عدة تحديات حطيتها قدام حالي للسنة الجديدة ان شاء الله على الصعيد الشخصي وصعيد البيت ...وبالهامناسبة بحب اخبركم عن موقع عجبني كتير اسمه Dayzeroproject  اذا كنتوا من الناس اللي بيحبوا يحطوا اهداف لحالهم فهاد الموقع بيعطيكي الفرصة انك تحطي عدة قوائم لاهداف بتحبي تحققيها بمدة زمنية معينة...انا حطيت 101 هدف بحب احققها ب 1001 يوم (حوالي 3 سنين) يعني مش بطال...وممكن طبعا تكون لمدد زمنية اقل...وكل ما تحققي هدف او تبدي فيه ممكن تعملي update عشان الواحد يعرف حالوا وين وصل...ومن ضمن الاهداف اللي حابة احققها اهداف متعلقة باعادة تنظيم الاشياء ببيتي بطريقة تكون اكثر رتابة...ومنها:
غرفة المونة (بديت ورح ياخد وقت لاني لازم اشتري مرتبانات وكونتينرات لتكون منظمة ورح اشارككم الصور ان شاء الله لقبل وبعد (اشي بيخزي قبل!!!) بتمنى بعد يكون احسن...
خزانتي
مكتبي
اغراض مشاريعي المنزلية (هدول بهم شغل ليوم الشغل)
غرفة الغسيل
الثلاجة (للمرة ال 7000) بس بدي احاول الاقي حل جذري
...الخ
وكمان حطيت اهداف طويلة الامد مثل اني اشتري تلفون؟!!! وما كنت عارفة اني رح اضيع تلفوني وشكلوا رح يكون هدف قصير الامد جدا!!!!
وفي اهداف متعلقة بالصحة واهداف بالتوفير والتدبير المنزلي بديت بواحد منها وهي تحدي اني احوش ...بخبركم عن الطريقة بالبوست الجاي
ورح اشارككم بعض الاهداف التانية في بوستات مستقبلية ان شاء الله...

وبما انه اشتقنا للوصفات والاكل فحطيت صورة على الفيس بوك لكعكة شوكولاتة من اروع ما اكلت...لاني اولا بحب الشوكولاتة كتير ولانها معمولة بافضل انواع الشوكولاتة ولانها كلها شوكولاتة بشوكلاتة حتى العجينة اللي على الوجه...



بس لانها اول السنة وحابين نكون صحيين الى حد ما....فسلطة الافوكادو والرمان بالبندق وصوص الخل البلسامك من السلطات الغنية والمشبعة



سلطة الافوكادو بالرمان والبندق وصوص البلسامك
المقادير:
1/2 حبة خس مقطع كبير مغسول ومنشف
ضمة جرجير مغسولة ومنشفة
1/2 رمانة مفروطة
حبة افوكادو مقسمة
1/2 كوب بندق محمص
للصوص:
1/2 بصلة صغيرة مبشورة
4 ملاعق خل بلسامك
2 ملعقة طعام عصير ليمون
8 ملاعق زيت زيتون
ملعقة صغيرة سكر او عسل
1/2 ملعقة صغيرة ملح
فلفل اسود

الطريقة:
تخلط مواد الصوص
تقدم فوق السلطة
صحتين والف عافية


9 comments:

  1. اححححححححح بردت وانا بقرأ ,,,الف الحمد لله عا سلامتك والله اشتقنالك يا منال واشتقنا لبوستاتك وحكياتك الحلوين,,ان شالله تكون رحلتك زي ما تمنيتيها واكتر ومبسوطة انك استمتعتي بالمشي :) الموقع كتير حلو ومفيد,,شكرا كتير وهينا عم نستنا وصفة الكيكة اللي انتحرت وانا بقرأ قديش فيها شوكلت,,لو خيروني بين المصاري والشوكلت اكيد اكيييد رح اختار المصاري ههههه عشان اضل اشتري فيها شوكلت طول عمري ,,,بحبها كتير

    ReplyDelete
  2. ههههه جد وانا كمان :) اكيد ان شاء الله رح يكون فيه اشياء ممتعة ومفيدة على المدونة السنة وغير الطبخ...رح اقولك شخصيا انه من احد اهدافي على القائمة هي اني اقابل شخص بعرفه من خلال الفيسبوك بس..وكنت انت الشخص اللي خطر على بالي... :) لازم نرتب لقاء ان شاء الله...

    ReplyDelete
  3. يسلمو ع السلطة الطيبة متوفرة عندي كل مكوناتها عادا خل البلسمك بقدر استبدلو بخل عادي او خل تفاح ؟

    ReplyDelete
  4. بصراحة انا ما جربت الافوكادو بس من هاي الوصفة اتوقع اني رح احطة في قائمة المشتريات للمرة الجاية، على فكرة صرت اعمل زيك قائمة للمشتريات اشي خضار و فواكة اشي لحوم مجمدات...الخ

    ReplyDelete
  5. بصراحة انا ما جربت الافوكادو بس من هاي الوصفة اتوقع اني رح احطة في قائمة المشتريات للمرة الجاية، على فكرة صرت اعمل زيك قائمة للمشتريات اشي خضار و فواكة اشي لحوم مجمدات...الخ

    ReplyDelete
  6. وصفات منوعة وكل مرة شي جديد
    شكرا الك
    ووصفات السلطات رائعة جدا لانو لو زبطناها منيح بتطلع وجبة كاملة تمااما

    ReplyDelete