Tuesday, December 31, 2013

اكثر 12 وصفة من اختياركم ل 2013

آخر بوست هادي السنة ..ان شاء الله يجعل ال 2014 سنة خير علينا جميعا وتكون ايامنا احلى واحلى...
بحب مع نهاية ال 2013 اني اشكركم من كل قلبي على المتابعة وتحملكم لبربرتي الالكترونية واني بفتحلكم قلبي وبحكي مرات كتير كتير كتير...

وهاي السنة اكيد كان فيه بوستات حلوة حبيتوها كتير وبوستات...امممم...شو بدي اقول...يعني مش واو....ومن خلال تعليقاتكم بحس انه اعلى 12 بوست كانت (بترتيب عشوائي) واغلبها للحلو)....



وللرجوع الهم هي الروابط...


صينية الزعتر والجبن




الارز الصيني المقلي


صينية البطاطا المخبوزة والسبانخ



كعكة اللوز


فطيرة التفاح بالكراميل


كعكة بوظة تشيزكيك بالفراولة


شوربة الجزر والبرتقال




السمسمية


كعكة التفاح بصوص البيكان والكراميل


هريسة تشيزكيك


وكل عام وانتو بالف خير ولنا لقاء ان شاء الله ب 2014 مع حبي

منال

Monday, December 30, 2013

شوربة الكراث

يوم جنوني جديد من الركض في كل مكان بين المواعيد واشغال البيت والطبخ وامتحانات الاولاد ...الخ الخ الخ ...الحمد لله...وقولتلكم عندي عزيمة يوم الخميس؟!!!! ههههه بس ان شاء الله امورها ميسرة...

المهم ولضيق الوقت ما صحللي اني اكتب منيو للاسبوع هاد لانه عم بطبخ كيفما اتفق...اليوم عاملة انشلادا الدجاج بالبربكيو صوص وكمان معكرونة باللبن وشوربة الكرات...الكراث باللغة العربية الفصحى و ال leek  بالعنجليزي...
وللي ما بيعرفوه هو مثا البصل الاخضر بس ضخم وهي صورته وتنظيفه مهم بطريقة صح لانه بيجمع طين وتراب بين الاوراق فلازم يتقطع زي الصورة



وبعدين ينغسل اكثر من مرة بحمام مي فاترة لتتأكدي بانه كل التراب راح



ويمكن تكرهوني وتقولوا ان شاء الله عنه ما حد اكل...بس ما عدا غسله..الشوربة سهلة وزاكية ومفيدة وممتازة بهالجو والاولاد رح يحبوها بالاضافة الى انها مناسبة لاي حفلة عشا لانها مختلفة وانيقة...

شوربة الكرات بالكريما
المقادير:
2 ملعقة طعام زبدة
2 كرات حجم كبير
2 حبة بطاطا وسط
6-7 اكواب مرق دجاج
ملح
فلفل اسود
2/3 كوب كريما سائلة
2 ملعقة طعام عصير ليمون

الطريقة:
تسيح الزبدة في طنجرة كبيرة ويضاف الكرات المقطع ويقلب دقيقتين
تضاف البطاطا مكعبات وتقلب
يرش بالفلفل والملح وتضاف المرقة
يترك على نار متوسطة لتنضج الخضار
يطحن على الخلاط ويعاد للطنجرة
تضاف الكريما ونتأكد من الملح والفلفل الاسود
نضيف عصير الليمون
وتقدم مزينة بالبقدونس
وصحتين


Saturday, December 28, 2013

رولات خبز البطاطا الحلوة

مع البرد اللي بره...كلنا بنحب البطاطا الحلو...لانها بتدفي وكمان مفيدة جدا...اليوم وصفة خبز كتييير زاكية بالبطاطا الحلوة واللي بتضيف حلاوة وطراوة على الخبز...فاذا خبزتوا بطاطا حلوة..احسبي حساب حبة ونص زيادة للخبز هاد..

رولات خبز البطاطا الحلوة
المقادير:
3 كوب طحين
3/4 ملعقة صغيرة ملح
1/2 1 ملعقة طعام سكر
ملعقة صغيرة خميرة
1/2 1 حبة بطاطا وسط مسلوقة او مشوية ومهروسة
بيضة مخفوقة
60 غم زبدة مذابة
3/4 كوب ماء فاتر
1/2 1 ملعقة طعام عسل

الطريقة:
تخلط 1/2 كمية البيضة المخفوقة والزبدة والماء والعسل
تضاف للخميرة في العجانة والسكر وتحرك
تضاف البطاطا الحلوة والملح
يضاف الطحين وتعجن من 5-7 دقائق
تترك لتخمر من ساعة ونص الى ساعتين ليتضاعف حجمها
تقسم كرات وممكن ان تشكليها كما تحبين...انا حطيتها مقسمة طابات في صينية مربعة
تترك مغطاه لتخمر 1/2 ساعة
يهن الوجة ببقية البيضة المخفوقة مع القليل من الحليب وترش اما بالسمسم او بذور الخشخاش او القزحة
تخبز على 190 لتنضج وتحمر...
جربوها مدهونة وهي ساخنة بالزبدة....ممممم
صحتين



Thursday, December 26, 2013

كعكة الموز بالقرفة (من خليط الكيك الجاهز وبدون زيت)

معجوقة شوي هاليومين..لاني مسافرة ان شاء الله على كندا بعد اسبوع ونص ومع امتحانات الاولاد والترتيبات اللي لازم تنعمل (لاني مش ماخدة الاولاد معي) + الالتزامات الاجتماعية واللي مش عارفة ليش سبحان الله بتزيد لما الواحد يكون بامس الحاجة للوقت...الحمد لله والله يعين...عشان هيك رح ادخل بالموضوع وما احكي كتير...

كلكم بيزيد عندكم موز وبيسود وحكينا مرة ببوست سابق (هون) عن كيف تستفيدوا منه ووصفة مفن الموز والكراميل...وصفة اليوم بتدخل بهاد النطاق وهي كعكة الموز...الحلو انها باستخدام الكيك مكس...والاحلى انه ما فيها زيت او زبدة...وووهههوووو..زاكية وخفيفة وسهلة كتير

كعكة الموز بالقرفة
المقادير:
باكيت كيك مكس جاهز (ابيض او اصفر)
1/2 ملعقة صغيرة قرفة
4 موزات وسط صومالي مستويين ومهروسين
3 بيض
2 ملعقة صغيرة فانيلا
2/3 كوب جوز مفروم (اختياري..انا ما حطيت)
للوجة:
ملعقة صغيرة قرفة
1/2 1 ملعقة طعام سكر

الطريقة:
تخلط كل مكونات الكيكة
تسكب بقالب الخبز التوست المدهون والمرشوش طحين
ترش بخليط القرفة والسكر
تخبز على 175 من 40-50 دقيقة لتجتاز اختبار الكيك
تبرد على سلك معدني
تقدم مع القهوة او الشاي
وصحتين




Tuesday, December 24, 2013

اكثر 10 افكار وحيل بحبهم بالمطبخ لعام 2013

بما انه السنة قربت تخلص وكل سنة وانتو سالمين والله يجعل السنة الجاي سنة خير وسعادة وامان علينا جميعا... حبيت اني اعمل بوست خاص على اكثر 10 حيل حبيتهم خلال سنوات الطبخ اللي مريت فيها...انا متأكدة انه كتسر منكم بعرفوها وكمان متأكدة انه كتير منكم عنده افكار وحيل اخرى لجعل الحياة اسهل بالمطبخ...


خلونا نبدأ ...

الحيلة الاولى: استخراج اكبر قدر ممكن من عصير الليمون من الليمون
طبعا وبالرغم من وجود الغور عنا وانه الدنيا شتاء والليمون لازم يكون ارخص الا انه سعره احيانا بيكون منيح واحيانا فوق الدينار للكيلو...ولانه احنا طبيعتنا بنحب الليمون بالسلطة والعصير فنصيحتي هي انكم لما تعصروا الليمونة حاولوا انها تكون بحرارة الغرفة واذا كانت بالثلاجة حطتوها ثواني بالمايكرويف وهلأ مستعدين للحيلة...بدل ما تقطعوها بالعرض..جربوا اقطعوها بالطول واعصروها ورح تقدروا تستخرجوا عصير اكثر...



الحيلة الثانية: تقشير كمية كبيرة من الثوم بسهولة
كلنا بنكره كيف ريحة الثوم بتعلق بالايدين لما بنقشر الثوم...النصيحة هي امسكي راس الثوم واضغطي عليه بالسكينة (رص ) ليتفكفك وينقام الجزء اليابس من فوق) وبعدين حطية بتبروير وخضيه بقوة...(ممكن تحطي موسيقى وتهزي التبروير وتتمايلي مع الانغام!!...وين رحت انا..احم!! نرجع للثوم..هههههه المهم مع الهز القوي وبتفتحي التبروير وبتكون القشرة كلها تقريبا طلعت عن الحبات...


الحيلة الثالثة: ما في وسع بالثلاجة للعصير والمشروبات يوم العزومة
كلنا جربنا هالقصة ويوم العزومة بتكون الثلاجة رح تستفرغ من الاشياء اللي فيها ومش كلنا عنا كوولر للمشروبات..الحل؟ الغسالة!!! شو؟!! آه...سمعتوني...عبي حوض الغسالة ثلج وحطي المشروبات فيها...ولانها مخزقة رح تنزل المي السايحة بالغسالة شوي شوي (بعد ما يروحوا الضيوف بتشغليها لتصفي...ولانها مثل الحوض فبتحافظ على الثلج بحالته اكبر مدة ممكنة وبتبرد المشروبات...

                                                صورة تعبيرية: المصدر The History Chicks

الحيلة الرابعة: تقسيم كمية كبيرة من البندورة الكرزية بسهولة
مرات بتفرفط روحي من الحبات اللي بيهربوا هون وهون...الحل؟ بين غطايتين علبة لبن اة تبرويرين قد بعض حطي الحبات على واحدة وحطي الغطاية الثانية فوقهم وباستخدام السكينة المسننة (الافضل للبندورة مش بس للخبز) مرري السكين بين الغطايتين بالعرض وبتكوني قطعتيهم بسهولة



الحيلة الخامسة: الحفاظ على السكر البني طري
حكيت عن هادي الحيلة كتييير وعلى التلفزيون...بس حطي قطعة خبزة طرية بالمرتبان وبيضل طري ولما تستعمليه مرة تانية بدليها بقطعة تانية لانها رح تكون يبست ...ولأ...ما بتعفن...في كمان اشياء تانية ممكن تستعمليها مثل التفاح او المارشملو...بس ليش...الخبز ارخص وانا بفضل اني آكل التفاحة او المارشملو...



الحيلة السادسة: الحفاظ على الصفار بالبيض المسلوق اصفر برتقالي..
قديش في منكم بيسلق بيض وبس يقشر البيض بيلاقي لون على خضار حولين الصفار...مما يعني انها انطبخت زيادة...مش لطيف خاصة اذا بدك تقدمي قطع البيض فوق سلطة...الحل؟!! اسلقي البيض واول ما يغلي اطفي النار(هي توفير غاز) وغطي الطنجرة واتركيها 15 دقيقة بالزبط (عايري الساعة..) وبهيك بيكون الصفار والبيضة استوت وما بينكون فيه اللون الاخضر حول الصفار (انا كنت مستعجلة اصور وما قشرت البيضة منيح)



الحيلة السابعة: طبخ المعرونة بشكل ممتاز كل مرة مع توفير الغاز 
هاي الطريقة حطيتها على الفيسبوك زمان (كنت اكتب فصحى!!! :)
طبخ المعكرونة بشكل جيد ولتوفير الطاقة اليك بعض النصائح:
1. املئي القدر بكمية كافية من الماء (لا تتجاوزي هذه الخطوة والا ستلتصق المعكرونة ببعضها اذا كانت كمية الماء قليلة)
2. غطي القدر واتركي الماء ليغلي (هكذا سيغلي اسرع وتوفري طاقة)
3. اضيفي الملح للماء عندما يغلي وليس قبل ذلك (لان اضافة الملح قبل ذلك ممكن ان تبطئ عملية الغليان وكذلك تعكر صفو الماء)
4. اضيفي المعكرونة وحركي. شخصيا انا لا اضيف الزيت للماء فعملية التحريك ووجود كمية جيدة من ماء السلق كاف لمنع التصاق المعكرونة. اتركي الماء ليغلي مرة اخرى لعدة دقائق واطفئي النار وغطي القدر وهكذا ستنضج المعكرونة من حرارة الماء وتوفري الطاقة)
5. صفي المعكرونة جيدا ولا تغسليها لان غسلها سيزيل النشا منها وبالتالي تمنعي ن التصاق الصلصة بها وتضيفي المزيد من الماء الغير مرغوب فيه.( الا اذا كنت ترغبين بتحضير سلطة المعكرونة)



الحيلة الثامنة: لعمل ليموناضة مميزة
السر؟ رشة ملح صغيرة بتطلع طعم الليمون...جربوها

الحيلة التاسعة: تخزين الاعشاب الخضرا اطول مدة ممكنة
واللي كتير حبيتها وحكيتلكم عنها قبل هون



الحيلة العاشرة: قشري الزنجبيل بسهولة
وبرضة حكيت عنها بالتلفزيون ...باستخدام المعلقة...



شاركوني بافكاركم واحسن الحيل اللي بتستعملوها بالمطبخ... خلينا نضيفها ...
وكل عام وانتو بخير...

Monday, December 23, 2013

استروغونوف اللحم المفروم

الخطة اليوم كانت انه اعمل كباب هندي ...بس مش عارفة اذا اليكسا اثرت على نظري ولا لأ لاني فكرت عندي كمية كافية من اللحم المفروم بس طلعت الكمية مش كبيرة لتكفي...خطر على بالي البس بسرعة واروح على اللحام واجيب لحمة بس بعدين وانا بطلع على الشارع والازمة قررت انه لأ...خلص..غيري الخطة..يعني هي اول مرة!!! ضل عندي صحن برياني صغير وصحن مطفية كوسا باللبن..

فكان القرار اني اعمل استروغونوف باللحمة المفرومة...يعني اذا جاي على بالكم اكلة مشبعة وغير مكلفة كتير (بدل الستيك) اعملوها وبضمنلكم انه الاولاد رح يطالبوا فيها وباستمرار...



استروغونوف اللحم المفروم
المقادير:
1/4 كيلو لحمة مفرومة ناعم
2 ملعقة طعام زبدة
بصلة صغيرة مفرومة ناعم
2 حبة ثوم مدقوق
1/2 علبة فطر طازج مقطع شؤائح (وارجوكم ما تستعملوا المعلب...ما الو دخل بالفطر والطازج اغلى شوي بس الطعم كتيييير غير)
1/2 علبة علبة جبنة كريمية وزن 227 غم مقطعة مكعبات
2 مكعب مرق بيف
2 كوب ماء
3/4 كوب حليب
 2 ملعقة طعام ممتلئة طحين
1/2 كوب كريما سائلة
ملح، فلفل اسود

الطريقة:
تقلب اللحمة على نار عالية وانصح بطنجرة ستانلس ستيل (عشان لما تترك اشياء بالقاع من اللحمة تضيف للنكهة)
عندما يصبح لون اللحمة غير احمرنضيف الزبدة والبصل ونقلب جيدا لدقيقتين
نضيف الثوم ونقلب
نضيف الفطر ونرش الملح والفلفل الاسود ونقلب ليذبل الفطر قليلا
نضيف مكعبات الجبنة ونقلب على حرارة متوسطة لتذوب
في وعاء نخلط بالخفاقة اليدوية الطحين والحليب ومرق اللحم (المكعبات مذابة بالماء)
نضيف الخليط ونحرك لمنع اي تكتلات
ونتركها اتتسبك قليلا على نار متوسطة
نضيف الكريما ونتأكد من الملح والفلفل الاسود
تقدم مع المعكرونة او الارز
صحتين

قدمت معها سلطة وجواكولي بالرمان



Sunday, December 22, 2013

متبل الكوسا باللبن

اليوم كان ...شو ممكن الكلمة الي توصفه!!!  مش لطيف (عشان اضل مؤدبة!!!) يعني الازمة بالشارع قاااااااتلة!!! مشوار بياخدني 1/4 ساعة بالكتير...اخد اليوم ومن غير مبالغة 3 ساعات...هارون انجن بالسيارة وانا مع عياطه كنت بدي اطلع راسي من الشباك وابدى اصرخ بصوت عالي "مششششششششششششااااااااااان الله بدي اروح بس"!!!!  ما علينا...وترتني السواقة الى ابعد الحدود اليوم وكنت على وشك اعاقب الكل وما اطبخ بس كبرت عقلي وعملت مطفية الكوسا باللبن بركي اطفي الغضب الشديد اللي كنت شاعره فيه...بس فعليا اللي هداني وبرد على قلبي هو طبق المتبل باللبن واللي بتمنى تجربوه لانه زاكي كتير...وممتاز بالصيف مع المشاوي بس عملته اليوم عشان استفيد من كم حبة كوسا زادو...

متبل الكوسا باللبن
المقادير:
3 حبات كوسا وسط مبشورين ومقلبين بملعقة صغيرة زيت زيتون للتخلص من ماؤهم
2/3 كوب لبن
1/2 1 ملعقة طعام زيت زيتون
2 حبة ثوم مهروس
1/4 كوب جوز مطحون خشن
2 ملعقة طعام شبت طازج مفروم
ملعقة طعام نعنع طازج مفروم
ملح
فلفل اسود

الطريقة:
بعد التخلص من الماء من تقليب الكوسا وتبريدها لحرارة الغرفة
نخلط كل المقادير السابقة ونضعها في صحن التقديم وتزين بحلات الجوز والبندورة الكرزية وعود نعنع طازج
وصحتين...



وبعد الظهر استمتعت بفنجان نسكافية مع بسكوتي الزنجبيل




Saturday, December 21, 2013

منيو الاسبوع القادم ووصفة برياني اللحم

بتقدروا تقولوا انه اليوم يوم البهارات ببيتي...قصدي من ناحية الريحة بكل انحاء البيت...من الغدا اللي كان برياني باللحم الى ال بسكوتي (البسكوت الايطالي) بطعم الزنجبيل والبهارات...طبيعة الشتاء بتخلي الواحد بيشتهي الاشياء هاي...
اليوم السبت وزي موعدنا منيو الاسبوع القادم بس برضة بنستعرض اداء الاسبوع الماضي واللي انقلب فوقاني تحتاني مع الثلجة ...طبعا بحكم انه الكل قاعد وماما جاعبالي هيك وماما بدنا هيك...وقومي يا ماما زي التوتو على المطبخ واعملي هيك وهيك!!!! صحتين على قلوبهم واتسلينا بس اللي مش مستوعباه كيف عطلتهم من 1/2 ل 2/9...شوووووووووووووو!!! يعني رح يجنينوني رسمي!!! الله بيعين...وكل مالها هالمدرسة بينقصف عمرها والعطلة بتزيد وبنترحم على التعليم!!!

اما المنيو للاسبوع الماضي فنعمل منها كل شي ما عدا الكباب الهندي والملفوف وتم استبدالهم بالمعكرونة بالبشاميل والملوخية ويوم اكلنا اكل فطور على الغدا (فول ولحمة وبيض..كان ازكى من ازكى اكل)...اما منيو الاسبوع الجاي فبتلاقوها هون قائمة الطعام 5

ما علينا نرجع للطبيخ...!!! ما كنت ناوية احط الوصفة اليوم لاني كنت بدي اشارككم وصفة تانية بس عشان عيون مي واللي وعدت بنتها تطبخ البرياني بكرة (مي بدي صورة اثبات!!!) ههههه

برياني اللحم
المقادير:
7 قطع لحم خروف على العظم (مثل لحمة المنسف)
2 ملعقة طعام زيت
10 حبات هيل كامل
8 حبات كبش قرنفل كامل
4 عود قرفة متوسط
2 بصلة كبيرة مفرومة شرائح
4-5 حبات ثوم مهروس
ملعقة طعام زنجبيل مبشور
1/4 كوب كزبرة خضراء مفرومة
3 ملاعق طعام نعنع اخضر مفروم
4 حبات بندورة مقطعة وسط
ملح وفلفل اسود
كوب ماء مغلي + مكعب مرق خروف او دجاج
2 ملعقة كبيرة ممتلئة لبن
2 ملعقة طعام عصير ليمون
3 كوب ارز بسمتي
ماء ساخن لسلق الارز مع ملح وملعقة طعام زيت (مثل المعكرونة)
للبصل المقلي:
2 ملعقة طعام زيت
بصلة كبيرة مقطعة شرائح

ملعقة كبيرة عصفر منقوع ب 2 ملعقة طعام ماء ساخن
ملعقة طعام سمن نوع جيد

في حال الرغبة بعمل برياني حار: يقلب فلفل اخضر حار مع البصل حسب الرغبة

الطريقة:
ينقع الارز بماء بارد مدة 30 دقيقة ويصفى
نضع الزيت في طنجرة على النار
نقلب البهارات لتظهر رائحتها
نضيف البصل ونقلب ليذبل ويصبح اشقر اللون الى بني فاتح
نضيف الزنجبيل والثوم ونقلب
نضيف اللحم ونقلب القطع جيدة لتأخذ لون ونرشها بالملح والفلفل الاسود
نضيف الكزبرة والنعنع ونقلب
نضيف البندورة ونقلب قليلا (دقيقتين)
نضيف الماء المغلي مع مكعب المرق ونغطي القدر ونتركها لتنضج على نار هادئة (حوالي ساعة او اكثر حسب نضج قطع اللحم)
عندما ينضج اللحم نضيف اللبن وعصير الليمون ونتذوق للتأكد من حاجتها الى الملح او الفلفل الاسود
اثناء مشارفة اللحم على النضج نسلق الارز بالماء المملح والزيت وعلى نار عالية حتى يشارف على النضج ونصفيه
ننقع العصفر بالماء الساخن
نقلي البصل بالزيت ليصبح لونة ذهبي غامق
لترتيب البرياني:
نضع ملعقة السمن في قاع قدر كبير وانا استعمل الستانلس ستيل
نفرد 3/2 كمية الارز
نرتب قطع اللحم فوق الارز ونوزع الصوص (مهم الانتباه الى ان كل شي مستوي تقربا فاذا احسست بكمية كبيرة من المرق انشلي اللحم ودعي المرق يغلي على نار متوسطة ليتبخر جزء من الماء ويتركز الطعم)
نوزع 1/2 البصل المقلي بزيته (انا ما قلت اها طبخة low fat هههه)!!
نوزع بقية الارز ونفرد العصفر بماؤة على الوجة
توضع على نار منخفضة وتوضع قطعة قماش نظيفة على وجة القدر المفتوح ثم يوضع غطاء الطنجرة فوقه وترفع جوانب قطعة القماش كي لا تحترق (هذه العملية تساعد على حبس البخار)
تترك على النار مدة 1/2 ساعة
تسكب وتزين ببقية البصل المقلي والكزبرة
وتقدم والف صحة




Friday, December 20, 2013

خبز النيوتيلا المبروم...فطور يوم الجمعة

شعور حلو اليوم لما صحيت وكانت الساعة 9 بالتوقيت الصيفي...يعني 8 بالتوقيت الحالي...لاول مرة بحس اني كسبت ساعة بفرق التوقيت...زمان وانا اصغر ما كنت احس الفرق بس لما جربت شو يعني توقيت صيفي بالشتاء وانه تكون الدنيا نص ليل الساعة 7 الصبح!!! لأ يا عمي والله فرق التوقيت مهم ومهم كتييير...

وبسبب شعوري باني كسبت ساعة...تحمست وعجنت عجينة العشر دقائق الوصفة  وقررت اعمل منقوشة لبنة


ومنقوشة زعتر بالجبنة


بس نجم السفرة (على الاقل عند سلطان كان خبز النيوتيلا والطريقة سهلة...بس تخمر العجينة بدك تقسميها لقطع كبيرة لتنفرد دوائر بصينية قطرها 30 سم تقريبا وبدهم ما يكونوا كبار لانه بدنا نحط 4 طبقات عجين فوق بعض فما بدنا العجينة تكون سميكة لما نفردها
هلأ بتبطني الصينية بورق خبز وبيدهني الورقة شوية صغيرة زيت وبتفردي اول دائرة وبتحطيها بالصينية وبتفردي عليها نيوتيلا حوالي 2 - 3 معلقة كبار ..انا استهلكت حوالي 350 غم نيوتيلا لكل الموضوع (يعني علبة وسط تقريبا) وبتعيدي الكرة مع الرغيف الثاني وتأكدي ما ييجي نيوتيلا على الاطراف وتكرر العملية بالرغيف الثالث وهي الصور للتوضيح



بعدين اخر رغيف


بعدين وبسكين حادة بتعملي خطوط كأنك بتقسمي العجينة بس بدون الوصول للوسط ..اول اشي ارباع


بعدين كل ربع من النص وكل واحد من النص مثل الصور...بعدين بتاخدي كل نصيت وتبرميهم عكس بعض وبتلزقيهم من الآخر..مثل الصورة


وبصير شكلها هيك..


بتغطيها 10 دقائق ترتاح وبعدين بتخبزيها


والف صحة وهنا وجمعة مباركة باذن الله



Thursday, December 19, 2013

هريسة تشيزكيك

عم بكتب هالبوست وريحة الكمون معبية البيت لاني رح اعمل مجدرة للغدا...جد انها من الاكلات اللي بتصرخ" دفااااااااااااااااا" ومناسبة بهالطقس...متذكرين كيف مرة حطيت صورة لطريقة تقديم الها


كتير منكم طلبوا مني وصفات احطها على المدونة وان شاء الله رح انزلها كلها قريب لعيون الجميع...اليوم الوصفة لتشيز كيك الهريسة وهو من الاطباق الغير تقليدية واللي جمعت الاكل الغربي بالعربي...زاكية كتييير وسهلة كتييير ومش غالية ابدا لعملها مقارنة بالتشيز كيك التقليدية...



هريسة تشيزكيك
المقادير:
طبقة البسكوت:
علبة بسكوت دايجستف او عادي (انا بستعمل العادي) وزن 210 غم تقريبا مطحون
اصبع زبدة مذاب

طبقة التشيز كيك:
1/2 علبة جبنة كريمية وزن 227 غم او 6 مربعات جبنة كريمية مثل الكيري بحرارو الغرفة
1/2 كوب سكر
علبة لبن زبادي بالقشطة (الحجم الصغير)
كوب حليب بودرة

طبقة الهريسة:
 3 بيضات
2 ملعقة صغيرة فانيلا
علبة قشطة
كوب سميد خشن
ملعقة كبيرة بيكنغ باودر
1/2 كوب سكر
1/2 كوب زيت

كمية من القطر بماء الزهر للوجه

الطريقة:
لطبقة البسكوت: تذاب الزبدة وتفرك مع البسكوت وترص بقالب التشيز كيك
تحضر طبقة التشيز كيك بخلط كل المكونات في الخلاط الكهربائي وتوضع فوق طبقة البسكوت وتدخل الفرن على حرارة 175 حوالي 7-8 دقائق
تخلط المكونات السائلة للهريسة مع السكر في الخلاط
يخلط السميد والبيكنغ باودر
تضاف المكونات السائلة للسميد وتحرك بملعقة مطاطية جيدا لتختلط
تضاف فوق طبقة الجبنة وتعاد للفرن من 25-30 دقيقة حتى تستوي الهريسة حسب اختيار الكيك بان يخرج عود الاسنا بعد غرسة بنصف الهريسة جاف تقريبا
تسقى بحوالي كوب قطر بارد وهي ساخنة او اقل وممكن تقديم القطر على جنب
تترك لتبرد تماما في القالب ثم تفك وتقدم مزينة بالكريما المخفوقة والكرز المجفف
والف صحة وهنا



Tuesday, December 17, 2013

مخبوزات جديدة: صمون الخبز الفرنسي

متذكرين لما دوشتكم بالحديث عن اهمية انه يكون عندك خزانة مونة جيدة وانه وباستمرار تخصصي جزء من ميزانية الشهر للاستفادة من العروض؟ هالوقت اللي عم بنمر فيه ومع عواقب هالثلجة الكبيرة هو اكبر دليل على اهمية الموضوع..ليش؟ عشان ما تضطري تطلعي وتجيبي اغراض بآخر لحظة وتصيري عالقة بالازمة اللي صارت علامة تجارية لشوارع عمان هاليومين!!! وكمان عشان ما تكوني عرضة وللاسف للاستغلال البشع اللي صار عند بعض المحلات...للاسف!!!

اليوم مووود الخبز لسة شغال ههههه...الطبخة كانت معكرونة بالبشاميل..تغيير عن الخطة وامبارح قرروا بدهم فول وحواضر للغدا..فالخطة ما مشيت كتيير وقررت اعمل خبز جنب المعكرونة وانا عم بستنى هنادي سمارة (صديقة عبر الانترنت لغاية الآن...تحياتي هنادي اذا عم تقرئي)...كانت رح تمر علي لتاخد حصتها من الكب كيك

بس مع الازمة ما قدرت واضطرينا تؤجل الموعد لبكرة...وبالمقابل هنادي بدها تجبلي...بانوفي تشيز كيك من تحت ايديها...يسلموا


المهم نرجع للخبز....سهل وسريع وشكلة جميل مع اي طبق معكرونة او بعزومة بسلة خبز مع الزبدة...مممممم

صمون الخبز الفرنسي
المقادير:
1/2 1 كوب ماء دافئ
ملعقة طعام خميرة
2 ملعقة طعام سكر
ملعقة صغيرة ملح
2 ملعقة طعام زيت نباتي
2 كوب طحين عادي
2 كوب طحين قمح
ملاحظة: ممكن استخدام كله طحين عادي او قمح

الطريقة:
تخلط الخميرة والماء والسكر والملح والزيت
يضاف 1/2 3 كوب طحين وتعجن على العجانة مع اضافة الطحين المتبقي لتتكون عجينة ناعمة الملمس (حوالي 7 دقائق)
تكور وتغطى ساعة ليضاعف حجمها
تضغط لتفريغ الهواء وتقسم الى 16 قطعة متساوية الحجم تقريبا
تكور كل قطعة وتصف في صينية الخبز 5 سم متباعدة عن بعضها
تغطى وتترك لتخمر 1/2 ساعة
يحمى الفرن الى 200 وتخبز من 20-25 دقيقة لتصبح ذهبية
تقدم ساخنة مع زيت الزيتون او مثل ما بنحب ببيتي...زبدة وملح وفلفل اسود
صحتين