Saturday, November 30, 2013

الارز الايراني

بكرة ان شاء الله بداية جديدة وشهر جديد وميزانية جديدة...(حلو لما بتشعري انك بتقدري ترجعي تعيدي محاولة تزبيط الميزانية مرة تانية..الفرص التانية حلوة بالحياة!!!

الشهر الماضي تجاوزت ميزانيتي ب حوالي 20 دينار..مش سيء خاصة اني لقيت:
1. اني كنت متوقعة تخلص حفاظات هارون ولسعادتي الغامرة في عندي كمية من الشهر الماضي تكفي لغاية 15 الشهر :) فما في شراء حفاظات لفترة (متذكرين اشتريت كمية على العرض الشهر الماضي من السيفوي)
2. اني عندي شوية لحوم من الشهر الماضي تشمل( 3 ستيكات كبار، اكلتين لحمة مفرومة، 2 باكيت عظم للشوربة، اكلة لحم قطع لمقلوبة او منسف، كيس شرحات للورق الدوالي (لسة ما عملت) دجاجة كاملة، صحن افخاذ دجاج، سورامي كيس او ما يعرف بلحم السلطعون وباكيتين سالمون مدخن، وكيس 5 شرائح سمك سالمون)
3. اني مونت اشياء كتير من سكر وطحين وعصير للمدرسة وغيره وهادا رح يساعدني الشهر هاد اذا ما كان في عروض كويسة

نتمنى نزبط الشهر هاد بشكل افضل...
بكرة ان شاء الله بخبركم عن اداء اول رحلة تسوق بكارفور اليوم للاسبوع الاول من شهر 12 ..

اليوم بحب اشارككم بوصفة الارز الايراني...عملته الاسبوع الماضي وحبيناه ووعدتكم بالوصفة...


الارز الايراني
المقادير:
3 كوب ارز بسمتي منقوع ساعة ومصفى
ملح
ملعقة طعام زيت او سمنة لسلق الارز
1/2 كوب زبيب
1/2 كوب كرانبري
1/2 كوب لوز مقطع بالطول
1/4 كوب فستق حلبي
2 ملعقة طعام زيت او سمنة

1/2 ملعقة صغيرة زعفران
3 ملعقة طعام ماء زهر
2 ملعقة طعام سكر

2 جزرة وسط مقطعة رفيع بالطول
ملعقة طعام سمنة
عود قرفة
2 ملعقة صغيرة هيل مطحون
كوب ماء

(الوصفة الاصلية فيها قشر برتقال بس عيلتي حست انه كتير طعمه طاغي فقررت اني الغيه)

الطريقة:
يوضع 2 ملعقة زيت او سمنة بمقلاة على النار ويقلب اللوز ليصبح ذهبي فاتح ثم الفستق الحلبي والكرانبري والزبيب وتقلب دقيقة وترفع جانبا
ينقع الزعفران بماء الزهروالسكر
في طنجرة صغيرة نضع ملعقة السمنة ونقلب الجزر قليلا ليأخذ بعض اللون ونضيف الزعفران المنقوع وعود القرفو والهيل وكوب ماء ونتركها على نار متوسطة ليتبخر جزء جيد من الماء ويصبح الجزر طريا ويتكثف السائل قليلا

يملأ قدر كبير بالماء ويملح ويوضع على النار مع ملعقة طعام زيت ليغلي
يسلق الارز البسمتي 3/4 سلقة ويصفى من الماء
في طنجرة كبيرة مدهونة بالقليل من الزيت او ممكن اختيار قدر غير لاصق يوضع الارز المسلوق بشكل متناوب مع خليط الجزر ويرص قليلا ويغطى ويترك على نار منخفضة 20 دقيقة
يسكب ويزين بالقلوبات ...

ملاحظة: في حال الرغبة باستعمال البرتقال فالوصفة الاصلية تستعمل قشر البرتقال (الجزي الاصفر فقط) ويقطع بالطول مثل الجزر ويسلق لوحدة بالقليل من الماء مدة 3-4 دقائق للتخلص من المرارة ثم يضاف للجزر اثناء سلقة.


Tuesday, November 26, 2013

عجة الزهرة وكعكة المشمش باللوز

قرب الشهر يخلص ومتحمسة على بداية شهر جديد من الاعمال والاشغال وطبعا الاطباق الجديدة...
قلتلكم على الصواني اللي عم بشتغل عليهم بس لسة ما خلصوا (وين الوقت يا جماعة بيروح؟!!!) بس ان شاء الله بيكون عندي وقت اكبر هاليومين الجايين عشان احاول اخلصهم...

اليوم غدانا من اكتر الغدايات (هادي كلمة ولا لازم اقول الغدوات؟!!!) المهم...اللي بحبها وهي:
عجة مشاط (عجة زهرة)


وقلاية بندورة


وشوربة قرع (امي الله يرضى عليها بعتتلي 1/2 قرعة)
وحمص باللحمة
وصحن صغير سلطة هندباء (برضة بعتتلي اياها امي)


ونقانق حرة (على طريقة الشيف منال العالم...بوجهلها تحية كبيرة لانها استاذة وعلمتني وعلمتنا كتير وبالضغط على الاسم بتلاقوا الطريقة بس انا ما حطيت شطة لانه بدي الاولاد ياكلوا منها ففعليا مش حارة)



هادا الغدا بعتبروا اروع من اكثر اطباق اللحم والارز..والواحد بيسحب فيه...مش كويس للرجيم (رجييييم مين!!!)

وطريقة امي العزيزة للعجة بالزهرة هي:

عجة الزهرة
المقادير:
راس زهرة صغير مسلوق 3/4 سلقة (ممكن تفكفكيه وممكن تخلية كامل عشام تقطعية مشاط)
للعجة:
2 بيض
1/2 - 3/4 كوب طحين
ملعقة صغيرة مليانة كمون
3 ملاعق طعام بقدونس مفروم
3 ملاعق طعام كزبرة مفرومة
2 سن ثوم مدقوق
ملح
فلفل اسود
1/2 كوب حليب

الطريقة:
تخلط مقادير العجة معا وتضاف قطع الزهرة (رح يكون الخليط سميك
يحمى الزيت (وسط مش غزير ولا قليل) وبالملعقة نضع جزء من العجة ونحاول تسوية سطحها 
عندما تحمر نقلبها على الجانب الآخر ونتركها لتحمر ثم نرفعها ونصفيها على ورق نشاف
ترش وتقدم مع السماق.

اما وصفتي الكم لليوم فهي كعكة المشمش باللوز


كعكة المشمش باللوز
المقادير: 
100 غم زبدة (اصبع ) بحرارة الغرفة)
30 غم سكر
2 صفار بيضة
2 ملعقة صغيرة فانيلا
2 بياض بيض+ 60 غم سكر
80 غم طحين كيك
40 غم لوز مطحون ناعم

30 غم لوز مطحون ناعم
علبة مشمش انصاف (نحتاج الى 9 انصاف مصفاة من الماء)
لوز شرائح

الطريقة:
ندهن صينية مربعة صغيرة ونرشها بالطحين (8 * 8 انش)
نخفق الزبدة والسكر لتصبح خفيفة
نضيف الصفار ونخفق ونضيف الفانيلا ليصبح القوام خفيف
ننخل الطحين ونضيف ال 40 غم لوز ونحرك بملعقة مطاطية من الاسفل للاعلى بحركة دائرية وبخفة بدون شدة
في صحن آخر نخفق بياض البيض والسكر ليصبح بقوام سميك نسبيا (soft peak) يعني قريب على الكريما بس مش جامد تماما
نضيف البياض للعجينة على مرحلتين ونحرك بنفس الطريقة ليختفي البياض ونحصل على عجينة خفبفة
نضع 1/2 الكمية بقاع الصينية (لن تكون كبيرة ولا تقلقي رح تزبط :) )
نرتب انصاف المشمش بصفوف 3 صفوف بالطول والعرض
نضيف 30 غم اللوز المطحون على بقية العجينة ونضعها في كيس ونقص طرفه
نعمل بالعجينة حواف حول المشمش مثل المربعات (الصورة الاخيرة للكيكة بتبين الخطوة) ونضع ايضا على الداير
نرش شرائح اللوز على الحواف العالية من العجينة (التي عملناها بالكيس)
نخبزها على 175 من 20-25 دقيقة لتجتاز اختبار الكيك
نتركها لتبرد وتقدم


وتقدم مع كاسة شاي... ممممم





Monday, November 25, 2013

كعكة الشوكولاتة بالسويسرول الجاهز

بعد يوم حافل من الصبح واكثر من مشوار كان لازم يتنعملوا...حاسة حالي خلص فلست من التعب...عشان هيك اليوم الكلان مختصر مفيد...سعيدة اني لسة ما فتحت جزداني واشتريت اي شي هاد الاسبوع... :) ان شاء الله استمر :)

زي ما وعدت امبارح وصفة كعكة الشوكولاتة بالسويسرول الجاهز...شكلها حلو وبتنعمل ب 10 دقائق...

 كعكة الشوكولاتة بالسويسرول الجاهز
المقادير:
4 علب كيك سويسرول شوكولاتة من الحجم الصغير (بالثلاجة بينباع وفي العلبة 6 رولات ) يمكن يزيد شوي فكليهم انت زي ما عملت انا :) ههههههه
2 باكيت بودينغ شوكولاتة النوع السريع اللي ما بده طبخ نوع جلو موجود باغلب محلات السوبرماركت عند الحلويات ومكسات الكيك وسعره 1.20 للباكيت
3/4 2 كوب حليب بارد
2 كوب كريما مخفوقة
شرحات شوكولاتة للزينة
حبة فراولة

الطريقة:
نقطع الكيك شرائح بسمك 1/2 سم ونصفها في ثاع قالب النشيزكيك وعلى الجوانب
نضع الحليب فوق مكونات البودينغ ونحرك بالخفاقة اليدوية ليسمك ويتجانس
يسكب فوق الكيك
يزين الوجه بالكريما وتوضع في الثلاجة 4-6 ساعات قبل التقديم وتزين بالشوكلااتة والفراولة

ملاحظة: اللي ما بيحب يجيب البودينغ جاهز ممكن يعمل بالبيت ويخليه سميك شوي ويبرده تماما قبل وضعة على الكيك واذا حبيته القوام يكون على موس ممكن اضافة الكريما المخفوقة للبودينغ وتحريكها بخفة ليصبح قوامها اخف.

وبالمناسبة تكلفة هاي الكيكة ما بتتجاوز ال 5 دنانير بالبودينغ الجاهز :)


وصحتين...



Sunday, November 24, 2013

منيو الاسبوع القادم ومغلفات الدجاج المقرمشة

بتمنى تكونوا قضيتوا نهاية اسبوع حلوة...انا قضيتها بالبيت وكتير انبسطنا...يعني راحة نسبيا وخاصة اني امبارح عملت عيد ميلاد لامي (انا طبخت بس عندها رح تغدينا) وعملت :

- سلطة تاكو بالدجاج

- سلطة سيزر
- سلطة عربية
- لبن
- فريكة وبرغل باللحمة
- قلاية بندورة باللحمة
- ارز ابيض
- دجاج مقلي بالفرن
- بطاطا مقلية
والحلو:
مرت اخوي (شكرا ديما) جابت كيكة شوكولاتة بالكريما (مش عارفة ليش نست اصورها !!!) شكلها حلو ولذيذة وانا عملت

كعكة الزبدة بالبيكان

تشيز كيك الكنافة



الله يعطيها الصحة والعافية ويخليلكم امهاتكم لانه مافي بعد الام..

وبما انه اليوم السبت وضايل اسبوع تقريبا لآخر الشهر فخليني اخبركم عن ادائي الاسبوع الماضي على صعيد الصرف بالاول:
الحقيقة اني ما كنت مصدقة اني صمدت ليوم الثلاثاء بدون الروحة على السوبرماركت بس اللي صار اني اما رحت يوم الاربعاء على كارفور اكسبرس اللي جنبي لقيت بعض العروض اللي كانت بالنسبة الي ممتازة ومنها:
حليب بوك بودرة 800 وشوي غم بعلبة بلاستيك (ممتازة وكبيرة لحفظ السكر والارز والطحين (بتعرفوا اني عم بشتغل على ترتيب غرفة الخزين شوي شوي) ب 3.99 يعني 4 دنانير فجبت 2 ...يعني 8 دنانير لحوالي 1700 غم حليب بودرة مع حافظتين بلاستيك كبار (عادة سعر الواحدة ب حوالي 3 دنانير بس للحافظة)
حليب بلدنا (الاولاد بيحبوه اكثر شي مع حليب حمودة بس بلدنا على العرض ب 1.09 فجبت 10 علب للشهر الجاي (يعني ما رح اشتري حليب للاولاد الشهر الجاي) يعني حاولي 11 دينار
عصير راني (كمان مرة جبت 24 واحدة برضه للشهر الجاي  ب 4.40 دينار)
دجاج على العرض (الدجاجة كيلو) ب 1.80 تقريبا (جبت 4 دجاجات) يعني 7.20 (صراحة استعملت منهم 3 لانه عملت واحدة لما اجت حماتي و 2 لليوم لعزيمة اهلي وضل واحدة بالفريزر فما بقدر اعتبره خزين بس عرض جيد)

المهم اني ابدعت ومع اني كنت متوقعة اصرف اقل بس لاني عملت عزيمة لحماتي و عاملة عزيمة اليوم ل 11 شخص فاكيد الالتزام اقل من المتوقع. المهم شو بدنا بطول السيرة الحقيقة ووقت الاعتراف جاء وهو اني صرفت 145 دينار هادا الاسبوع!!!!!!!!!!!!!!!! فيه وجه بيعبر عن الصدمة  00
                                   O                                  

هادا اللي طلع معي..ههههههه!!!

الهدف انه ولا تعريفة لآخر الشهر باذن الله الا لنسكافيه فقط....

معدل الصرف للآن من اول الشهر هو الاسبوع الاول 86.33 والثاني 82.21 واللحمة والاغراض الموزعة على الشهر 105 وهاد الاسبوع 145 دينار فالمجموع هو 418.54 دينار (تجاوز ب 18.54 دينار عن الميزانية المرغوبة) بس اذا بدي افكر فيها فيه عندي اشياء كتير لسة ما رح اشتريها الشهر الجاي ومنها حليب وعصير للمدرسة ومحارم ورقية ومنعم اقمشة الغسيل (كان عليه عرض) غير الاشياء اللي اشتريتهل للخزين وغير اني عملت عزومة للاصحاب على الفطور وعزومة لاهلي لعيد ميلاد ماما )
اسفة اني شكلي عم ببرر بس هادا مثال حي كيف مرات بنتجاوز الميزانية ...بس الامل موجود انه الاسبوع الجاي ما اصرف اشي واني اعمل احسن الشهراللي وراه....

اما على صعيد المنيو فعملت المقلوبة والكباب شاورما والارز الايراني والتشيلي وما عملت الشوربة (مش كاينة تنعمل هالشوربة) وبدلت بدل ورق الدوالي ببازيلا وارز لانه ما كان عندي وقت وعملت ثريد بدل يخنة اللحم الايطالية واللي عملته زيادة كان دجاجة مشوية بالزعتر والليمون وسلطة الشمندر بالطحينة وطلبنا من برة يوم الخميس لانه سلطان عزم صاحبه (دايما فيه يوم بالاسبوع من برة.....هيك الاتفاق مع جوزو)
وعلى هالاساس منيو الاسبوع القادم هو:

السبت 11/23
خلص (موجود فوق)

الاحد 11/24
بواقي (ياااااااي....لانه راحة وتوفير) فيه تشيلي وثريد مع ارز

الاثنين 11/25
اسباجيتي وسلطة

الثلاثاء 11/26
عجة مشاط، قلاية بندورة، نقانق حارة (رح اشارككم بالوصفة)

الاربعاء 11/27
ورق دوالي وسلطة

الخميس 11/28
عرايس باللحمة وبطاطا

الجمعة 11/29
جورميه بيتزا (رح نحكي شوي عن البيتزا والحشوات المختلفة)

السبت 11/30
فيلية السالمون بالاعشاب واشي جنبه (لسة ما قررت) بخبركم الاسبوع الجاي لما نراجع الاداء

المهم...وصفة اليوم هي لمغلفات الدجاج المقرمشة واللي انا متأكدة انها رح تعجبكم انتوا والاولاد....


مغلفات الدجاج المقرمشة
المقادير:
2-3 صدور دجاج مسلوق او اي دجاج باقي عندك ومفسخ (بس من غير بهارات عربية)
1/4 كوب صوص بستو (صوص الريحان)
120 غم جبنة كريمية (كيري او اميركان هيريتج او فيلادلفيا)
بصلة خضراء وسط مفرومة ناعم
1/2 اصبع زبدة مذاب
1/2 1 كوب قرشلة يابانية (بانكو ) لانها بتقرش اكتر من القرشلة العادية بس ممكن استخدام العادية وبتلاقوا القرشلة اليابانية عند قسم الاكل الشرق اسيوي
ملح، فلفل اسود
عجينة العشر دقائق او اي عجينة بتحبيها

الطريقة:
يخلط الدجاج والبستو البصل الاخضر والجبنة معا وتملح وتبهر
تقطع العجينة الى كرات بحجم كرة البينغ بونغ او المضرب (حسب ادبس بدك المغلف كبير او صغير)
تفرد كل قطعة عجين الى دائرة وتحشى بكمية من الحشوة وتكور بشكل مغلف لضمان عدم خروج الحشوة
تملح القرشلة وتبهر
تغطس بالزبدة المذابة ثم بالقرشلة وترتب على صينية وتخبز على 175-180 من 20-25 دقيقة

وتقدم ساخنة او دافئة وصحتين


Tuesday, November 19, 2013

نصيحة منزلية: بوست اسبوعي جديد ووصفة كباب الشاورما

اليوم حديثنا رح يكون خصوصي عن بعض النصائح المنزلية اللي ممكن تساعد بالبيت...وطبعا فيه وصفة !!!! بتمنى يصير هاد البوست اسبوعي مشان نستفيد مع بعض واللي عندها نصيحة منزلية يا ريت تعلق وتحطها عشان كلنا تستفيد....

اولا...مين فيكم بتحب تستفيد من المرتبانات اللي بيجي فيها المخلل او المربى او العسل وغيره وبتنقعها بمي سخنة وصابون عشان تروح الورقة اللي عليها وبصير المرتبان مبهدل وبتقول يوم خلص بديش اياه ورح اكب كل هالاشياء اللي مش مرتبة بالمطبخ؟ اناااااااااااااااااا
وعشان هيك ولكل واحدة فيكم زييي رح ادلكم على الطريقة السحرية لازالة بواقي الصمغ اللي بيكون على المرتبانات القديمة وبتصير جديدة ونظيفة...
السر هو ببساطة معجون من الكربونات وزيت....بس وهي صورة الكمية اللي عملتها ...

(ما تسألوني عن المقادير لاني حطيت لصار عندي معجون بقدر ادهنه على مكان الصمغ

المرتبان قبل


وتركته من الليل او عدة ساعات
المرتبان اثناء العملية

 وباسفنجة الجلي ومن الجهة الخشنة طلع الصمغ زي التوتو....دماااار!!!

بعد العملية

قادرين تفكروا معي بكل الاحتمالات والاستعمالات لكل المرتبانات اللي عندكم؟ انا شخصيا بديت اكتب شو بدي اعمل فيهم مشان ما انسى....هههههه
بتمنى تستفيدوا وهاد جزء من اعادة التدوير ومع نصيحة جديدة الاسبوع الجاي ان شاء الله وابعتولي احسن نصائح عندكم لاستثيفكم بالمدونة...

امبارح غدانا كان وحسب المنيو كباب شاورما وارز ايراني ومن عندي سلطة خيار باللبن وبطاطا حرة

الارز الايراني...ان شاء الله بشارككم الوصفة قريب


والبطاطا الحرة


اما كباب الشاورما 


وزي ما وعدتكم هي الوصفة

كباب الشاورما
المقادير:
700 غم لحمة مفرومة ناعم (انا بخلط خروف وعجل)
2 سن ثوم مدقوق
برش ليمونة صغيرة
ملعقة طعام بهارات شاورما
1/2 ملعقة صغيرة زعتر ناشف
رشة زيت زيتون
ملح، فلفل اسود
فحمة لتدخين اللحم

الطريقة:
تخلط كل المقادير وتكبب الحمة على اسياخ خشب وتشوى اما في مقلاة الشوي او في الفرن...انا شويتها بالقلاية اولا لتاخد علامات الشواء


























وكملت نضجهم بالفرن وحطيتهم بصحن التقديم.
وبعدين حميت فحمة وحطيتها بصحن زجاجي فوق شوية زيت وفي الصحن اللي فيه اللحمة وغطيتها بالمنيوم لتاخد النكهه.
وقدمتها مع صوص خيار باللبن...سلطان قال الي ضيفيهل على القائمة مع الدجاج اللي بحبه!!! :) فاذا سلطان حبها اكيد انتو وعيلتكم رح تحبوها وصحتين..


Sunday, November 17, 2013

منيو الاسبوع الثالث ووصفة الارز بالكاجو والبرتقال

يمكن لاحظتوا من خلال متابعتكم للمدونة اني من الاشخاص اللي بيحبوا القوائم والخطط كتير...يمكن يبدو للبعض انه شو هاد؟!! هادي وظيفة بحد ذاتها والحقيقة صح...تنظيم شؤون البيت والاسرة مش اشي سهل ....وصدقوني وبالرغم من المحاولات الكتيرة بفشل كتيييير مرات بس بعاود بقول نبدأ من جديد...

ومن الاشياء اللي كتير بحب اعملها هي قائمة الانجازات الاسبوعية اللي بحاول احققها على صعيد امور البيت...
1. منيو الاسبوع
2. الاعمال المنزلية العادية (غسيل، تنظيف البيت، طبخ...الخ)
3. مشاريع يدوية
4. مشاريع تنظيمية للبيت (دوامة لا تنتهي)
5. مشاوير لازم تنعمل واشياء لازم تنجاب

بالنسبة للاسبوع الماضي فالتزمت بالمنيو و عملت معكرونة بالباشميل وملوخية (كفت ليومين) وسمك بالكزبرة والزنجبيل  وارز بالكاجو والبرتقال ومغلفات الدجاج المقرمشة مع سلطة البحر المتوسط (الاخيرة مش على المنيو) والجمعة اكلنا برة...فهيك ضل عندي برضه بعض الاكلات اللي رح تروح للاسبوع هاد فمنيو الاسبوع هاد واللي كان لازم احطها امبارح بس ما كنت حابة اطول بالشرح...

السبت 11/16
من البواقي بيتزا (كان عندي كرات لحم وعندي من حشوة مغلفات الدجاج المقرمشة)

والحلو مفن الموز


الاحد 11/17 
مقلوبة زهرة وسلطة (اليوم...ممتازة بهالطقس)

الاثنين 11/18
كباب شاورما (رح اشارككم بالوصفة) وارز ايراني وشوربة الجزر والبرتقال

الثلاثاء 11/19 (عيد ميلاد امي ست الكل واللي عالاغلب رح يتأجل للسبت لانه امتحانات وشغل)
تشيلي مع ارز

الاربعاء 11/20
ورق دوالي مع قطع لحم بالقاع شوربة بروكلي جديدة 

الخميس 11/21
يخنة اللحم الايطالية و فريكة ريزوتو

الجمعة 11/22
فطور: فول مصري وحواضر
يخنة اللحم الايطالية و فريكة ريزوتو

اشياء وخلطات منزلية:
صوص تفاح
لبن
بهارات التاكو
طحين ذاتي التخمير

حلويات:
كيكة لماما
كريم كراميل
نوع بسكوت

احتمالات للعشاء:
ساندويشات دجاج
بوريتو

وعلى هالاساس قائمة الشراء رح تكون مقتصرة على اشياء بسيطة مثل:
خضار وفواكة: موز، ثوم، بندورة، خيار، خس
ثلاجة: لا شيء
فريزر: لا شئ
تخزين: حليب للاولاد و حليب للقطط..ما قلتلكم انه جبنا 5 قطط صغار يا حرام امهم اندهست (هدول بدهم ميزانية لحالهم :)) رح احطلهم صور قريب :) وكمان نسكافيه واشياء زاكية وبسسسسسسسسس

ممتاز وبخبركم بالنتيجة السبت الجاي إن شاء الله...هلأ الوصفة للارز وانا قدمته مع السالمون
ارز بالكاجو والبرتقال
المقادير:
2 كوب ارز بسمتى منقوع ومصفى
عصير 2 برتقالة
 بشر برتقالة واحدة
1/3 كوب كاجو محمص للوجه
بصل اخضر عدد 2 (الجزء الابيض مفروم لوحده والاخضر لوحده)
حبة فليفلة حمراء وحبة فليفلة صفراء مفرومين مكعبات وسط 
مرق دجاج
2 ملعقة طعام زبدة
ملح وفلفل اسود

الطريقة:
في طنجرة نغلي مرق الدجاج 
نضع الزبدة في طنجرة ونقلب الجزء الابيض من البصل ثم نضيف الفليفلة ونقلب
نملح ونرش الخضار بالفلفل الاسود
نضيف الارز المصفى ونقلب
نضيف عصير البرتقال ومرق الدجاج المغلي لغمر الارز ونطبخه مثل الطريقة الاعتيادية
يفليفل بالشوكة ويضاف بشر البرتقال ويزين بالبصل الاخضر والكاجو
وصحتين




Saturday, November 16, 2013

اداء الاسبوع الماضي بالميزانية والخزين ووصفة سمك السلمون على الطريقة الاسيوية

اعتقد اني رسميا بقدر اعلن اني مدمنة تدوين!!!! ولا دواوين؟!!!! ههههههه المهم اني بهالمساحة الالكترونية عم بحكي كتيييير وهادا طبع فيي...مش بس بالكتابة وبالاحاديث!!! تحذير غير رسمي الكم!!!!
كتير عم بستمتع باسئلتكم وتعليقاتكم ومتابعتكم...ارجوكم استمروا والله يزيد ويبارك...بدنا تسجلوا مشان تضلوا متابعين آخر التطورات...
حاليا عم بشتغل على كم مشروع منزلي متعلق بالصواني...3 صواني خشب وبلاستيك قديمة بدي احولهم الى صواني جداد بشكل جديد باستخدام دهان الرش...ان شاء تزبط الامو وبفرجيكم النتائج قريبا...

اليوم رح نعمل ال update الاسبوعي لادائي وبوعدكم رح يكون مختصر مفيد... يعني ما رح احكي بالتفصيل شو شريت الا اغراض بناء الخزين...
هادا الاسبوع صرفت التالي:
- 67.58 دينار على اغراض البيت والتنظيف 
- 14.63 للخزين وشملت:
4.40 دينار ثمن 24 زجاجة عصير راني مشكل للمدرسة ب 1.10 لل 6 (العرض بكارفور ومستمر)
1.98 ل 6 زجاجات صوص سلطة من مكسيم حدم صغير (العرض كل 3 ب 99. قرش من كارفور) عادة انا بعمل بالبيت بس السعر لا يقاوم وبريح مرات يكون فيه وجبت ايطالية و ثاوزند ايلاند
4.27 ل 5 علب تونا كبيرة نوع ممتاز
2.99 ل 7.5 كيلو طحين
99. قرش مرتبات مربى فراولة حجم كبير (حوال 800 وشوي غرام) من السي تاون
- 58.20 دينار للحمة بس هاي بتتوزع على بقية الشهر وفعليا بيزيد مرات للشهر الجاي

فمجموع الاسبوع بدون اللحمة هو 82.21 يعني اقل ب 17,79 دينار عن ال 100 وللخزين زاد 5.37 من اصل 20 بينجمعوا مع 2 دينار من الاسبوع اللي قبل ففالبقجة :) 7.37 دينار

هلأ اذا متذكرين الاسبوع اللي قبل كمان صرفت 47.03 على اشياء رح احتاجها طول الشهر وما رح اشتري منها مثل البامبرزوقلت رح يتوزعوا على الشهر وهلأ اللحمة كمان ومجموع هالمبلغ هو 105.23 وعلى 4 اسابيع تقريبا(شهر 11) بيصير 26.30 دينار على مصروف كل اسبوع...بس ما رح اضيف المبلغ الا لنهاية الشهر لاني عارفة انه معدل صرفي بالاسبوعين اللي جايين رح يكون اقل لاني اشتريت الاشياء الاساسية بشكل ممتاز بالاسبوعين الماضيين.

وشيكوا كارفور هاد الاسبوع في عروض كتير منيحة مثل
 الحليب المركز المحلى ابوقوس ب 99. (انا عندي كتير حاليا)


وعصير راني اللي قلتلكم عليه ال 6 ب 1.10

وعروض على جبنة ابو الولد (ال 5 ب 2.79)  وكيري ال 3 ب 1.99 وجبنة حللو حلوم (كتييير زاكية) ب 1.64 وطحين 10 كغم ب 3.29 (انا ما رح اجيب لانه صار عندي منيح) زالفريكة من كباتيلو ب 69. للباكيت وبقوليات منوعة ب 99. للكيلو مثل عدس حب ومجروش وغيره..المهم شيكوا العرووووض لاني رح استفيد منها للخزين....

وبحب احكي اني ما عم بعمل دعاية لحد وهدفي هو انكم انتو تستفيدوا والله اعلم...

هلأ نيجي لوصفة اليوم وهي سمك السلمون على الطريقة الاسيوية..



 سمك السلمون على الطريقة الاسيوية
المقادير:
5 قطع سمك سالمون فيلية
لصوص النقع:
1/2 كوب صويا صوص
1/4 كوب عصير برتقال
بشر ليمونة
3 سن ثوم مدقوق
برشة زنجبيل طازج (حوالي ملعقة طعام)
2 ملعقة صغيرة زيت زيتون
للطبخ:
رشة زيت سمسم

الطريقة:
تخلط صوص النقع ويؤخذ منها مقدار ربع كوب
ينقع السمك بالصوص الباقي حوالي ساعة
قبل الطبخ يرش بزيت السمسم ويوضع في مقلاة حامية وغير لاصقة ويطبخ من 4-5 دقائق على الجهة الاولى ويقلب ليكمل الطبخ على الجهة الثانية ثم يضاف صوص النقع الذي احتفظنا به (لم ننقع به السمك) ويطبخ قليلا حتى اذا امسكت بطرف شوكة تشعري بان السمك ينفص بسهولة ويقدم
لا يحبذ طبخ السمك زيادة  فهذه الوصفة لا تستغرق اكثرمن 10 -12 دقيقة كحد اقصى
وصحتين





Friday, November 15, 2013

كيف تخططي لعزومة بدون جنون ووصفة شوربة البروكلي من مطعم بانيرا بكندا

سؤال تاني مهم انسألته وبنساله كتير وهو كيف تعملي عزومة بدون ما تنعجقي وينهد حيلك وتسبحي في عالم من الفوضى العارمة واللي عادة بتجتاح المطابخ بالعزايم وكمان تقدري تستمتعي مع الضيوف بدل ما تقضي الوقت بالمطبخ....الجواب هو نفس الكلمة الذهبية اللي حكينا عنها وقت الميزانية...التخطيط المسبق وبالتخطيط مهم انه تهتمي بالامور التالية:

1. توزيع الشغل على عدة ايام خاصة اذا العزومة كبيرة مشان ما تتعبي كتير يوم العزومة وتكوني متل الجاجة المقطوع راسها بتفرفر بكل مكان!!!! و
2. توزيع المهام على اشخاص يساعدوكي بالانجليزي Delegation

خلينا امشي معكم خطوة خطوة لما بيكون عندي عزومة سواءا ل 2 او 60 بتبع نفس الاسلوب لانه المبدأ واحد بس اللي رح يختلف وقتها هو امتى ابدأ بالشغل بعزومة ل 60 وطبيعة المنيو اللي بدي اقدمها...

قبل كل شي برضه بجيب ورقة او دفتر صغير وبسجل عليه كل شي وبفضل دفتر لانه ممكن ترجعيله بعزومة تانية ويكون كل اشي مدون وما ترجعي تعيدي الشغل

الخطوة الاولى: تحديد عدد المدعوين ويوم العزيمة
وعادة زوجي بيتولى هادي المهمة الا اذا جمعة ستات...وهيك بخفف على حالي جزء من الشغل

الخطوة التانية: تحديد مكان العزومة
يعني اذا بالصيف بتحبي تعمليها بالجنينة اذا عندك واحدة او على السطوح اذا فيه طلة حلوة او بغرفة السفرة جوة البيت. وحاولي تفكري بالاسهل عليكي...يعني اذا فيه كتير طلعي وفوتي اذا بدك تعمليها بره حتى لو الطقس حلو بعمل الاكل جوه وممكن الحلو برة..

الخطوة الثالثة: ترتيب مكان الجلسة
وهاي الخطوة انا عادة ما بقلق عليها كتير اذا كنت رح استضيف الناس بغرفة السفرة والعدد على قد الكراسي . بس اذا كان العدد كبير وما بيكفي القعدة حولين الطاولة لازم افكر بشكل القعدة. زمان كنت اغلط غلطة اني احط الاكل على السفرة والكبار يقعدوا والصغار ينحطلهم طاولة جانبية بس اللي كان يصير انه تعم الفوضى لما الصغار بدهم يسكبوا وبيصيروا بدهم يمدوا ايديهم من فوق الكبار القاعدين والواحد ما بيرتاح بالقعدة فلقيت الحل الاحسن هو اني اعمل بوفية على جنب (اشتريت طاولتين من النوع اللي بنضب من صويلح بمبلغ بسيط) بحط عليهم شرشف مرتب فما ببينوا وعليهم الاكل وبطاولة مدورة برضه عالية شوي عندي من اول بحط الصحون والمعالق وهيك الكل بيسكب والكبار بيقعدوا على الطاولة الكبيرة باريحية والصغار على طاولة جانبية او بالمطبخ بدون اي حد ينزعج) الترتيب هاد بعمله يومين قبل العزومة ومرات كنت ارسم زي مخطط كيف بدها الطاولات تكون. عمل هاد الترتيب قبل العزومة بيومين مش بس بوفر وقت وجهد وكمان بعطيطي المجال تغيري او تبدلي بالترتيب اذا ما عجبك او حسيتي انه مش زابط من غير ما تنعجقي يوم العزومة نفسها.

الخطوة التالتة: المنيو 
وهون بيت القصيد...تحضير شو بدك تطبخي هو  اهم خطوة ومرات بعملها قبل بثلاث اربع ايام من العزومة (وطبعا في عزايم بآخر لحظة وما في رفاهية الوقت  رح احكي شو بعمل بهيك حالة بعدين). تحضير المنيو مهم فيه مراعاة الامور التالية:
1. التنويع 
يعني يكون فيه
- مقبلات
-  سلطات مناسبة لنوع الاكل الرئيسي اللي بدك تقدمية (مثلا عاملة ارز بخاري بده سلطة عربية واعملي سلطة تانية نوع غربي مثلا بس لازم سلطة عربية ولبن مع هيك اكلة)
- الاكل الرئيسي وهون مهم برضه تفكري بالمعزومين اذا بتعرفي انه حد ما بياكل لحمة وبدك تعملي منسف والمنسف سيد السفرة بس لازم تعملي اشي للضيف اللي ما باكل لحمة والا ليش عزمتيه او حد عنده حساسية من نوع معين...الخ. كمان مهم انه الاكل يكون مش كله رز يعني مش تعملي محشي وارز بخاري ومقلوبة مع بعض...لازم يكون فيه اشي رز( مثلا كبسة)، اشي معكرونة (مثلا لازانيا)،  اشي مع ارز ابيض (انا بعمل نوعين اشي بلحمة مثلا ستروغونوف واشي بدجاج مثل ستير فراي (صيني)  ، صواني مثلا شرحات بالخضار والبطاطا...الخ (هلأ مش شرط يكون فيه كل هاد بس الفكرة انه تنوعي ويكون فية ارز، لحمة، دجاج، معكرونة...وفيه ناس بتحب سمك.
- الحلو: مهم انه يكون مناسب للطقس (بارد بالصيف) ومنوع...يعني اشي بشوكولاته، اشي مش بشوكولاتة (لانه فيه ناس ما بتحب الشوكولاتة) وفواكة (سواءا بطيخ وشمام بالصيف) او صحن فواكة او سلطة فواكة

2. الميزانية
وكتير منا بيصير رح يغمى عليه من تكاليف العزايم وما بلومه لانها بتكلف كتير...بس اذا بتتبعي نظام بناء الخزين رح تكتشفي انه كتييير رح يوفر ونصيحتي هي:
1. فكري شو في عندك اشياء اصلا ممكن تستفيدي منها بدل ما تروحي وتشتري...يعني عندك زوايد كيك...خلص واحد من اطباق الحلو ترايفل. عندك حمص معلب بعمل صحن حمص كنوع مقبلات...عندك باذنجانه اشتريتيها قبل يومين على عرض بعمل متبل كمقبلات..عندك ارز بسمتي..بعمل برياني...وهكذا
2. فكري كيف ممكن تمطي الدينار...شو يعني؟!!!! يعني تكلفة  صينية ستيك كتتتتير اكثر من تكلفة ستيك مقطع ليدخل بعمل ستير فراي صيني او ستروغونوف لانه بدك كمية ستيك اكبر بصينية الستيك (على الاقل حبة لكل مدعو) بينما لما يتقطع الستيك بالطول ومع الخضار بيبرك وبكلف اقل. كمان مثال تاني..بدك تعملي صنف باللحمة بس الميزانية لا تسمح بسدر كبسة وقطع لحمة كبيرة عليه فبعمل كباب هندي مع ارز وكمان طباخ روحو (قطع لحمة راس عصفور مع خضار) يعني صنفين لحمة مع طبق ارز ابيض بتكلفة اقل من الطبق الاول وتنويع كمان)
3. شو على العروض وشو بالموسم (واظن هادي النقطة واضحة وحكينا فيها كتير...)
4. شغل البيت دايما اوفر....ما بدها شرح كتييير...صح من برة بترتاحي شوي بس اذا الميزانية قليلة شغل البيت بيربح غير انه ضيوفك بيشعروا انك مغلبة حالك

3. التحضير المسبق
يعني رتبي المنيو بشكل يكون فيه اشياء بتنعمل قبل بوقت من غير ما يؤثر على الطعم ...مثلا اللازانيا بتعمل قبل بيوم كاملة من غير خبز وبتنحط بالثلاجة وتاني يوم (يوم العزومة بتتطلع عشان تصير بحرارة الغرفة وتاخد وقت اقل بالفرن) الحلو عادة اغلبه احسن قبل بوقت (انا بختار حلويات قبل بيوم مثل التشيز كيك والكيك والترايفل والكريم كراميل وغيرها). مثال تاني بدك تعملي شاورما بنقع اللحمة او الدجاج بالتتبيلة قبل بيوم. سلطة (بحضر كل اغراضها بوعاء بلاستيك وبدون غسيل وبالثلاجة وبس بطول وبغسل وبفرم يوم العزومة). متبل...بشوي الباذنجان قبل بيوم وبعمله الصبح وبحطه بصحن التقديم مع الزينة وبغطيه ببلاستيك وبالثلاجة بس بطلعة قبل التقديم بنص ساعة وخلصت فكت... بدي اعمل ستروغونوف وملوخية (كله ممكن يتجهز الصبح وبس يتسخن وما بيصرلوا اشي بيطلع روعة) فاختاري اشياء ما بدها آخر وقت...

4. وسع الثلاجة والفرن
ما في اسوأ من انك يوم العزومة ما تلاقي الا والفرن عم بيموت والاكل ما عم بيستوي لانه في 7000 صينية بالفرن!!! طبعا مستحيل بس القصد انه نوعي المنيو بحيث يكون فية اشياء جوة الفرن واشياء على الغاز من فوق. وكمان الثلاجة...يعني حلو بده تلاجة وحلو ما بده...وهكذا..

5. الوصفات
جمعيها كلها بالدفتر اللي بتخططي فيه عشان برضة ما تنجني لانه سبحان الله كيف بتضيع الوصفة يوم العزومة ما بتعرفي ليش؟!!!

الخطوة الرابعة: قائمة المشتريات
عملتي المنيو هلأ لازم قائمة المشتريات...وهون بتحطي كل وصفات الاشياء اللي قررتي تعمليها وشو بتحتاج منك وايش عندك وما عندك لانه ما في اسوأ من انك تكوني معجوقة بالطبخ وتلاقي ما في غرض من مكونات طبخة...وهاتي تلفونات مع جوزو واللي بيصير يقولك ضروري هلأ!!! او بدك تروحي تشتري وتضيعي وقت انت بحاجه اله والعجقة..الخ. انا عادة بحضر قائمة المشتريات بعد المنيو مباشرة (على الحارك) وبقسم المشتريات على ايام احيانا لانه فيه اشياء لازم تنجاب فرش مثل الخبز او ثلج للايس بوكس وهاي المهمة بوكل فيها جوزو وبقلوه قبل العزومة بيوم عشان نفسيا يحضر حاله...هههههه

الخطوة الخامسة: قائمة الاعمال اليومية
كل يوم شو بدي اعمل...هاد الاشي كتييير بريح...العزومة الخميس واليوم الاحد..فبقسم يوم الاثنين بدي اعمل المنيو وقائمة المشتريات. يوم الثلاثاء بعمل بشتري الاغراض وبرتب القعدة وممكن انقي اذا فيه اشي بده تنقاي وعادة اذا عندك حد يساعد بيكون منيح يعني البنت اللي عندك خليها تنقي وانت بترتبي القعدة . يوم الاربعاء بعمل الحلو وبنقع اللي بده نقع..الخ وبرتب الصحون والادوات والكاسات وصحون التقديم ومعالقهم وعادة بحط ورقة على كل صحن تقيم لشو بده ينحط فيه. يوم العزومة كل اشي بمكانه (القعدة محضرة والحلو انعمل والصحون مرتبة وجاهزة بس بدي اطبق الاكل واحطه على السفرة)

الخطوة السادسة: شراء الاغراض
شراء الاغراض حسب قائمة المشتريات وعادة قبل يومين كله من خضار ولحوم واي شيء آخر لانه بدي احضر قبل بوقت وبدي يكون كله موجود

الخطوة السابعة: التحضير المسبق ويوم العزومة
التحضير المسبق لما يمكن تحضيره وهادا حكينا عنو سابقا...اللي بده تنقاية واللي بده نقع واللي بده تجهيز كامل...وهون بيفيد كتير تعملي قائمة الاعمال بكل يوم اللي حكينا عنها وبس تشطبي ما يتم انجازه لتعرفي وين وصلتي

نقاط ممكن تسهل عليكي اي عزومة:
1. استثمري بشراء ايس بوكس  تيرموس كبير للمي الساخنة وتيرموس للمي الباردة. ليييييييييششششششششششششش؟ لانه بحط المي اباردة مع كاسات على جنب يوم العزومة ومن الصبح وما بنجن كل شوي لما يجوا الضيوف هاتي مي هاتي مي. ولانه بغلي المي السخنة قبل بساعة من العومة وبجهزها مع انواع الشاي والنسكافيه وبهيك ما بنجن وانا اعمل الشاي وبدي احط الحلو بنفس الوقت...اللي بيصير اني بحط الحلو وبقول للضيوف تفضلوا وبوقف جنب طاولة الشاي وبيأل كل ضيف شو بحب او ياسمين وسلطان بيتولوا هادي المهمة Delegation. والايس بوكس لانه ما بضطر احط العصائر والمشروبات الغازية لتاخد وسع بالثلاجة وبس بحطها قبل بساعتين بالايس بوكس مع كيسين ثلج وخلصت فكت .
2. جمعي اولادك واعطيهم مهام قبل العزومة (طبعا اذا كباركفاية ليساعدوا) وهيك بيتحملوا مسؤولية وبيتعلموا وانت بترتاحي شوي.
3. اعملي قوائم مقترحة للعزايم بلحظة صفا...يعني اذا ما عندك شغل وهادا اشي ناااااااادر..ممكن تعملي مجموعة من القوائم او المنيوز المقترحة لعزايم وهون بيفيد اذا عملت القائمة الرئيسية اللي حكينا عنها بالتخطيط للخزين وتاخدي منها.
4. اختاري اكل سهل وممكن تجهيزه قبل بوقت وانت ممتازة فيه...يعني ما تجربي وقت العزومة باكلات جديدة عشان المقالب والذي منه...

واخيرا...

تذكري انه العزومة المفروض تكون لناس بتحبيهم وبيتسمتعي انهم ينبسطوا عندك وتنبسطي فيهم مش تكرهي حالك وتقولي بحياتي ما بعمل عزايم مرة تانية!َ!!!!

و ENJOY 

اما العزايم اللي بآخر لحظة فنصيحتي هي انه اذا عملت القوائم المقترحة فرح تلاقي اختيار الاكل سهل ولانه ما في وقت كتيير اختاري اكلات سهلة تتجهز من الصبح مش آخر لحظة وزيدي الكمية بدل النوعية..يعني ضيوفك كتار وما في وقت لانواع كتير فبعمل اكلات تبرك مثل سدر منسف، كبسة مع دجاج، سدر اوزي وسلطات وطبختين مثل ملوخية و اشي غربي للشباب والحلو فواكه الموسم ونوع حلو سريع وخلص..واقعدي مع جوزك وقوليلوا بالله عزايم آخر وقت لا تكتر من المعازيم مشان ما انجن واجننك معي!!!! مهمة هاي النقطة!!!

طيب وبعد كل هالبرم...خليني اشارككم وصفة اليوم وهي من مطعم بحبه كتيييير بكندا بقدم كتيير اشياء منها الشوربات بخبزة وانا ما عندي وقت لاعمل الخبزة بس عملت الشوربة (رائعة) وببقى اعمل وصفة شوربة تانية بخبز واشارككم فيها...

شوربة البروكلي من مطعم بانيرا
المقادير:
3 كوب مرق دجاج
كوب جزر مبشور
بصلة صغيرة مفرومة
2 سن ثوم مدقوق
واحد راس بروكلي مقطع قطع صغيرة الى وسط
ورقة غار
3 ملعقة طعام طحين
3 ملعقة طعام زبدة
1/4 ملعقة صغيرة بودرة الثوم
1/8 ملعقة صغيرة ريحان ناشف
1/8 ملعقة صغيرة بهار
1/8 ملعقة صغيرة جوزة الطيب
فلفل اسود وملح
كوب كريما
كوب جبنة جودا او ايدام (موجودين بكل السوبرماركتات)
كوب جبنة شدر

الطريقة:
في قدر كبير على النار نضع مرق الدجاج والبروكلي والجزر والبصل والثوم وورقة الغار ونتركها لتغلي ونغطيها 1/4 ساعة لتستوي الخضار ونرفع ورقة الغار
في مقلاة صغيرة نسيح الزبدة ونضع الطحين ونحمصه قليلا ثم نضيفة للشوربة مع التحريك السريع
نضع كل البهارات 
نضيف الكريما والجبنة بنوعيها ونتركها لتشارف على الغليان بدون ان تغلي ولتذوب الجبنة وتقدم مع رشة فلفل احمر على الوجة وصحتيييين


Sunday, November 10, 2013

كيف تحددي الميزانية الشهرية للبيت وتدخلي بناء الخزين: البوست الرابع ووصفة الارز المصري المعمر خالص!!!!

انا حطيت بوست اليوم الصبح بس ما قدرتش اقاوم اجاوب ....
سألتني واحدة من الصاحبات سؤال وجيه وهو كيف بتعرفي شو الميزانية المناسبة للبيت وكيف تحدديها؟ والجواب هو انه كل بيت ميزانيته اكيد بتختلف عن البيت التاني طبعا حسب:
1. عدد افراد الاسرة
2. دخل الاسرة واديش بتقدر تحدد لميزانية البيت
3. اذا بتعملي عزايم او لأ واكم مرة بالشهر
4. بتطبخي ولا مش كتير بتحبي الطبخ
5. شو نوع الاكل اللي بتفضله اسرتك؟ صحي، شرقي، غربي...الخ

وهون مهم ابين انه شغل البيت والاكل بالبيت دايما ابرك وارخص وانظف من اكل بره بس مرات الحاجة والظروف تتطلب انه الواحد يطلب او ياكل برة...

الكلمة الذهبية هون هي: التخطيط...التخطيط...التخطيط....وكمان مرة...النخطيط...(حاولت احطها بلون ذهبي :) وهاد اقرب واحد....التخطيط هو اساس نجاحك بالالتزام بالميزانية...وعشان هاد الحكي يصير مهم انك :
1. تعملي المنيو الاسبوعية (ضروري) لانه بيحددلك شو تشتري وبتتفادي الشراء العشوائي لاشياء مش لازمة.
2. الالتزام...المغريات كتير بالسوبرماركت وانا واحدة من الناس اللي بتوقع بفخ هادا زاكي وهادا بشهي...روحي على السوبرماركت وانتي شبعانة وما تاخدي الاولاد ،ان امكن ، لانهم مش بس بجننوكي وبيصيروا يغنوا موال "بدي هاد وبدي هداك"!!!! وانت كمان...التزمي...ماشي !!! :)
3. سجلي مصروفاتك على دفتر خاص لهاد الاشي مشان تضلك متابعة
4. اتبعي نظام المظاريف....هههههه شوووووووووووووو؟ اوكي...يعني جيبي كم ظرف رسائل فاضي واكتبي على كل واحد لشو هو بعد ما تحددي ميزانيتك نفسها. انا عندي واحد للاكل وواحد لادوات التنظيف وواحد لبناء الخزين واكثر من واحد تاني ميزانيات مش للبيت (شخصي وللاولاد...الخ) هادا النظام قد يبدو معقد بس هو سهل جدا وبخليكي تعرفي اديش ضايل عندك بكل بند. واذا مش حاببتيه ممكن انك تكتفي بالتسجيل بعامود لكل بند عشان تعرفي وين وصلتي...

هلأ عشان تقدري تحددي اديش تحطي ميزانية للبيت بيتطلب منك انك تعصري مخك وتحاولي وبناءا على ذاكرتك (وانا مش من الناس تبعون الذاكرة!!!!) انه اديش معدل صرفك بالشهر على البيت وتحاولي انك تخففيها شوي الشهر الجاي وبعدين تسجلي خلال الشهر وتشوفي ادائك. نصيحتي هو انك تضحي بشهر بس تحاولي كبداية انك تكتفي بالتسجيل شو عم تصرفي...يعني ما تغيري طريقتك بس مهم تسجلي كل شي كيبر وصغير وهلأ بيجي الشغل...
بآخر الشهر ومع دفترك والآلة الحاسبة وفنجان قهوة...اقعدي واطلعي يا حبيبتي على البلاوي....!!!!!!
جد انا لما بديت بهالقصة من زمان اكتشفت اني بصرف على شراء المجلات والعلكة مثلا كل ما وقفت على الكاش بدفع مبالغ مش بطالة كل شهر...يعني السوبرماركتات عارفين كيف يغرونا... كمان اكتشفت اني بشتري اشياء جاهزة كتير وخلطات ممكن بكل سهولة اعملها بالبيت بس كان عذري دايما ما في وقت وانا مستعجلة ويالله...بس شو ما في وقت؟!!! عذر اقبح من ذنب...في وقت كتير اذا خصصت...يعني لو بعطلة نهاية كل اسبوع خصصت ساعة لعمل خلطات بهارات او مكسات مثل البان كيك او البراونيز...اديش بتوفري فلوس ووقت بعدين...صح؟!!!!

نرجع للمفيد فاذا عملت هادي الخطوة رح تقدري تحددي وين الفلوس بتروح على الاشياء اللي مش مهمة عشان تمحيها من تاريخك الى الابد!!! ومشان ما تحسي انك عم تحرمي حالك من مجلة بتحبيها او اي شي تاني من الاشياء الغير ضرورية..بآخر الشهر اذا كنت شاطرة والتزمت بميزانيتك اعطي حالك جائزة واشتري واحدة منها.

طيب وبعد ما قمت الاشياء اللي مش مهمة ولغيتيها بيصير عندك تصور اوضح انت اديش بيلزمك بالشهر لاغراض البيت وهون بتشوفي اذا المبلغ معقول ممتاز...هادي ميزانيتك...اذا المبلغ عالي...لازم ترجعي وتعيدي حساباتك ووخففي شوي بس من هاد المبلغ عشان ما يصير عندك ردة فعل عكسية للموضوع وتكرهيني وتكرهي الميزانيات...هههههه...والشهر اللي وراه خففي كمان شوي ومع بناء الخزين بتصيري تشوفي الفرق وانك ممكن تخففي اكتر واكتر لتوصلي للمعقول...

اما الخزين وبناءه فنفس صاحبتي اللي سألت برضه سألت سؤال وجيه وهو انه زوجها بعتقد انه الافضل ما نشتري زيادة وبس نشتري وقت ما نحتاج. وجهة نظر!!! بس برأيي انه بناء الخزين بيوفر كتييييير وخاصة على المدى البعيد. بس مش معناته تروحي وتصرفي 1000 دينار بحجة بناء الخزين!!! الفكرة انه تخصصي جزء من ميزانيتك الاصلية الها وتاخدي كل النقاط اللي حكينا عنها بعين الاعتبار من العروض، للي شو لازمك، وشو بتستهلكي اكتر بالبيت...الخ. واذا ما في عروض منيحة خلص حوشي المبلغ للاسبوع اللي وراه يمكن يصير عروض فظيعة وتستفيدي اكتر...وشوي شوي بتلاقي صار عندك مخزون ممتاز اذا ما في ميزانية كبيرة هادا الشهر امورك بتكون مرتاحة وبتقدري تعملي احسن اكل باللي موجود عندك اصلا.

طيب عشان الخص الموضوع هي اللي لازم تعمليه بخطوات مختصرة اذا ما عندك فكرة من وين تبدي بموضوع الميزانية وبناء الخزين:
اولا وقبل 1...اشتري دفتر جديد خاص للميزانية واذا بتحبي الكومبيوتر استعملي برنامج اكسل بس انا بحب الدفتر عشان بقدر آخده اي مكان وبقدر احط فيه الفواتير للشهر...الخ
1. سجلي مصاريفك بدون اي تغيير مدة شهر
2. راجعي المصاريف والغي اي شي مش ضروري واوصلي للمبلغ المعقول للشهر الجاي بدون ما تظلمي حالك وتعاقبي العيلة...الموضوع خطوة خطوة
3. خصصي جزء من الميزانية لبناء الخزين (وممنوع يروح على اي شي تاني غير الخزين واذا ما انصرف بتحوش للاسبوع اللي وراه)
4. هلأ اكتبي قائمة كبيرة بالاكلات اللي عيلتك بيحبوها وهادا بده قعدة رايقة مع كل الوصفات اللي عندك  والوصفات اللي حابة تجربيها لهاد الشهر...الخ ...هاي القائمة رح تصير مرجعك دايما واي اكلة جديدة بتجربيها وبتعجبهم تضاف على القائمة.
5. القعدة التانية هي ببداية او نهاية كل اسبوع عشان تعملي المنيو الاسبوعية . وعشان تصير هاي العملية بكل سلاسة بيكون عندك:
أ. القائمة الكبيرة بالاكلات اللي بتحبها عيلتك مشان ما تحتاري
ب. العروض بالسوبرماركتات مشان تستفيدي منها. مثال....سوبرماركت عامل عرض على اللبن والعيلة بتحب الشاكرية...ممتاز يبقى هي اكلة ليوم السبت...راس الزهرة الكيلو ب 1/4 دينار والعيلة بتحب المقلوبة...هي مقلوبة يوم الاحد...انا حابة اجرب تشيز كيك جديدة وبدها طبعا جبنة ومحطوطة الجبنة على العرض فبجيب لاجرب الوصفة ...الخ ...وصلت الصورة!!!
6. سجلي كل مصاريفك بعد التسوق واحتفظي بالفواتير لنهاية الشهر احتياط اذا حبيتي ترجعيلها وبعدين بتتخلصي منها بس تبدي الشهر الجديد...
7. راجعي صرفك بآخر الشهر وشوفي اذا التزمت او لأ ووين صار خلل ومش نهاية العالم لسة بتقدري تزبطي الامور الشهر اللي وراه....
8. اذا عندك التزامات اجتماعية مثل عزايم ممكن تخصصيلها مبلغ خاص بالبداية بس مع بناء الخزين لادام رح تلاقي انه ممكن تعملي عزايم من ضمن المزانية لانه عندك كتير من الاغراض اصلا.

مع تمنياتي الكم برحلة موفقة...لانها بالفعل رحلة وبالنسبة الي صار نوع من الادمان والتحدي لذاتي...وحلو الواحد بتحدى حاله مرات ويدفش حاله (لاحظوا يدفش!!!!)  ليصير احسن...

اما وصفة اليوم فهي للارز المصري المعمر بدون لحم وجد انه بيعمر المخ...مش قليل السعرات ابدا بس زاكي جدا وجربوه من فترة لفترة لانه اذا انعمل كتير رح تشوفي النتائج على الارداف!!! هههههه
الاصل انه ينعمل بفخارة بس اذا ما عندك ممكن بطنجرة بتدخل الفرن واعذروني المقادير مش كتير واضحة لاني بفترض الاغلب بيعرف يعمل الرز بس هو بده سائل اكتر من الطريقة اللي على الغاز...هادا الرز بكون مفرمش على الوجه ...

الارز المصري المعمر (بدون لحم)
المقادير:
2 كوب رزعادي (مصري او متوسط الحبة) منقوع 20 دقيقة على الاقل ومصفى
سائل لطبخ الارز وفي العادة هو الحليب بس انا خلطت حليب ومرقة دجاج والحليب اكتر من المرقة
1/4- 1/2 كوب كريما سائلة
2 ملعقة طعام سمنة بلدية اة حيوانية او زبدة (ما بدنا مارجرين او زيت ...ما بيطلع معمر وبيعمر الراس!!!!)
زيت نباتي لدهن الفخارة
ملح

الطريقة:
يحمى الفرن الى 180
تدهن الفخارة او الطنجرة بالزيت
يخلط الارز بالملح ويوضع في الفخارة
يسخن السائل الى حد الغليان ويصب فوق الارز (كمية اكبر من الطريقة على الغاز) عادة على الغاز بخلي المي تغمره قد عقدة اصبع...هون بدنا اكتر
توضع الكريما والزبدة او السمنة على الوجة
يدخل الفرن وبدون تغطية ويترك من 35-40 دقيقة ليبدأ الوجة بالاحمرار قليلا
يوضع لدقائق تحت الشواية ويقدم...مممممم وصحتين





كيف تعملي ليبلات تكتبي عليهم مثل لوح السبورة ووصفة سلطة الكينوا المنعشة...

حكيتلكم امبارح اني مبسوطة على الليبل على علبة خليط الراونيز والسبب اني لقيت استعمال مفيد جدا لطوابع المدرسة اللي الهم عندي من سنة ستس والاولاد كبروا على انهم يحطوهم على الكتب خاصة انه مدرستهم السنة عملت طوابع خاصة الها وممنوع استخدام طوابع تانية...المهم قررت وانا بنظم غرفة الخزين اني لازم اعمل ليبلات تعجبني وبخط كبير ويا ريت اذا بتنمحي وبقدر اغير اسم المحتوى...فاشتريت بخاخ بيعمل طبقة فوق السطح المرشوش بتصير مثل لوح السبورة اللي بينكتب عليه بالطباشير وهي صورتة واشتريته من ACE بمكة مول لما رحت الاسبوع الماضي...


وهي الطوابع التحفة!!!! فكرة بدل ما اشتري ليبلات..


وهيهم مرشوشين وتركتهم 1/2 ساعة نشفوا


تاتاتاتا!!!! هيهم على العلب....!!!



سعر علبة الرش 5.75 دينار بس ما بتحتاجي كتير..يعني ممكن تضل فترة طويلة عندك وبتستاهل السعر...انا مش عارفة من وين ابدا معها هالعلبة عشان استغلها!!! هههه بخبركم اول باول...

وهادا الاشي اللي عم بعمله هو جزء من ترتيب وتنظيم غرفة المونةواللي قلتلكم انه رح يكون عملية مطولة لانه بده وقت و فلوس...

هلأ بنيجي لوصفة اليوم وهي سلطة منعشة ومفيدة لانه الكينوا مليانة بالالياف واللي ما بيعرفها هي شكلها وكانت جزء من اكل حضارات امريكا الجنوبية القديمة...وهالايام صايرة موضة!!!! جد بحكي !!! وسعرها مش رخيص وممكن برأيي تبدليها ببرغل متوسط الخشونة او كسكسي مغربي بهاي السلطة...



سلطة الكينوا المنعشة
المقادير:
كوب كينوا جافة
1/2 1 كوب ماء
1/2 ملعقة صغيرة ملح
للسلطة:
حبة فليفلة حمراء مشوية ومقشره ومفرومة وسط
2 حبة خيار وسط مفروم
1/4 كوب بقدونس مفروم
1/4 كوب نعنع مفروم
1/4 كوب شبت مفروم
1/4 كوب بصل اخضر مفروم
1/4 كوب زيتون اسود نوع كويس مفروم
1/4 كوب فستق حلبي مفروم ناعم (اختياري)
للصوص:
1/3 معلقة صغيرة كمون
1/3 معلقة صغيرة كزبرة ناشفة
بشر وعصير ليمونة
1/4 كوب زيت زيتون
ملح
فلفل اسود
معلقة صغيرة زيت سمسم
سن ثوم مدقوق

الطريقة:
تحضر الكينوا بوضعها في قدرمع الملح والماء على حرارة عالية 
عندما يغلي تخفض الحرارة ويغطى القدر 3/4 مثل الارز ويترك ليتشرب ماؤه
ترفع عن النار وتغطى 5 دقائق ثم تفلفل بالشوكة وتترك لتبرد تماما
توضع بقية مقادير السلطة فوق الكينوا


تخلط مقادير الصلصة في زجاجة


تضاف للسلطة وتقدم...صدقوني منعشة جدا ومشبعة...صحتين


Saturday, November 9, 2013

كيف تبني الخزين: البوست الثالث ومنيو الاسبوع القادم وخليط البراونيز المنزلي

قضينا يوم جمعة رائع امبارح بصحبة الاصدقاء بالمزرعة وبشكر ديمة ورجائي على المشاوي اللذيذة والصحبة الالذ...ما في احلى من الاصحاب الطيبين والاجواء الدافية باحضان الطبيعة...عزومتنا كانت على الفطور بس من لطفهم جابوا الغدا وضلينا ناكل طول الوقت...ومن الاشياء اللي عملتها كان البراونيز واللي طاروا الف صحة وهنا..وعلى سيرة البراونيز...انا ولتوفير الوقت والجهد بعمل خليط جاهز (مثل اللي بنشتريه جاهز من السوبرماركت ) وبحطه بمرتبان كبير وبس بدي اعمل براونيز بطلع كوبين منه لكمية صينية مربعة صغيرة. فتوفير وقت وجهد كبار... اليوم رح اشارككم الوصفة للخليط وهي صورته وبحطه بالمونة


بس قبل ما نحكي عن البراونيز خليني احكي كيف انا بوظف المعلومات المهمة اللي حكيت عنها سابقا مثل الشراء على العروض، وسعر الوحدة و عمل الاشياء بالبيت وغيرها ببناء الخزين عندي بالبيت ...مهم انه تنتبهي ل:
1. تواريخ الصلاحية ...رتبي الاشياء مثل السوبر ماركت الاقرب مدة صلاحيته للانتهاء لبرة والاطول لجوة...
2. انتبهي على الاشياء الجافة انها تكون بعلب محكمة الاغلاق وما يدخلها حشرات (يعني مش بعد التعب والجهد يخرب الاشي...صح؟!!!!)
3. راجعي الاشياء اللي عندك عشان ما تضلي تشتري من اشي واحد كتيير وتنوعي بالمخزون...

فمثلا انا اشتريت الاسبوع الماضي:
على العروض:
سكر (دايما بدنا سكر وكمية منيحة (10 كيلو) فما رح اروح واشتري الاسبوع هاد كمان سكر لانو خلي الفلوس تروح على اشي تاني ومن هون لنستهلكه بينزل السكر على عرض تاني (من خلال خبرتي بالاسعار)
رب بندورة (مهمة كتير وبتضل فترة)
مش على العروض:
الموزريلا والمايونيز

الاسبوع هاد رح نشوف شو في عروض ولقطات مثلا على الارز او الطحين او غيره...
طيب...خلينا نراجع المنيو للاسبوع الماضي واعترافاتي الخطيرة بعدم الالتزام فيها تماما بسبب الظروف...

يوم السبت التزمت بكل شي تمام، الاحد للاسف ما لحقت اعمل الغدا بسبب ظروف فجاب زوجي اكل من بره والتكلفة كانت 22 دينار رح احملها على الميزانية آخر الشهر، يوم الاثنين عملت اكل يوم الاحد، يوم الثلاثاء برضه لظروف بس عملت اليخنة وبطاطا مهروسة ففي اشياء لم يتم الالتزام به ومنها الكيكة لصاحبتي، يوم الاربعاء كان اكل يوم الاثنين السلوبي جوز، يوم الخميس طلعنا الاولاد وتغدينا بره وانا بعرف انه لازم يوم بالاسبوع بره بس مع ذلك بحط اكلة على المنيو للاحتياط، يوم الجمعة فطور مناقيش وبيتزا مرجريتا (ما عملتها على العشا مثل ما مخطط، وفول وحمص وغيره ومشاوي من اصحابنا على الغدا). هادا الشي يعني انه لسة عندي خيارات للاسبوع الجاي فالمنيو هي ان شاء الله
السبت 11/9 
الغداء دجاج الا سلطان وارز مصري معمر وسلطة الكينوا الرائعة واللي رح اشارككم وصفتها ان شاء الله
العشاء  كاساديا السبانخ والفتة  (من تبروير السبانخ بالفريزر) برضه رح تنزل على المدونة
كل الاغراض موجودة

الاحد 11/10
الغداء معكرونة بالبشاميل مع سلطة
العشاء حواضر (الا اذا جد اشي ببالي)

الاثنين 11/11
الغداء سمك بالكزبرة والزنجبيل (باستخدام كيس الهامور) وارز بالكاجو والبرتقال وسلطة الجمبري بالافوكادو
العشاء حواضر (الا اذا جد اشي ببالي)

الثلاثاء 11/12
الغداء ملوخية وارز (قلتلكم لازم مرتين بالشهر)
العشاء ساندويشات توست بالدجاج 

الاربعاء 11/13
الغداء كباب شاورما (رح اشارككم بالوصفة) وارز ايراني وشوربة الجزر والبرتقال
العشاء حواضر (الا اذا جد اشي ببالي)

الخميس 11/14
الغداء سر ههههه بخبركم بس لاحط الوصفة :)
العصر: جاي صاحبتي واولادها وانا بعرف انها بتقرأ المدونة فما رح اقول شو رح اضيف ههههههه بس بخبركم بعدين
العشاء حواضر (الا اذا جد اشي ببالي)

الجمعة 11/15
الفطور بالمزرعة مع اصدقاء النا ان شاء الله برضه وعلى الاغلب حمص وفول ومناقيش واشي هيك :) يعني اعادة للاسبوع الماضي واذا جد اشي بخبركم
الغداء برضه مع الاصحاب والنية منيو خاصة حسب عدد المدعوين ورح اعملها خلال الاسبوع وبخبركم فيها 
العشاء حواضر (الا اذا جد اشي ببالي)

حلويات محتملة: كعكة تقاح بصوص كراميل او ابل باي (طريقة قديمة عندي بس بحبها كتير...على طريقة رهام بنت خالتي وهي طباخة ماهرة :)

وعلى هالاساس قائمة الشراء هي:
لحوم: رح اوصي على اللحمة للشهر واللي رح تكلف بس برضه كلفتها على كل الشهر
خضار وفواكة: برتقال للعصير، بصل، خيار، بندورة، خس، برتقال للاكل، فليفلة خضراء وفليفلة حمراءوصفراء، كزبرة، افوكادو، جزر
اشياء اخرى: باكيت معكرونة بيني، اشياء زاكية للمدرسة 
خبز: عادي، توست
ثلاجة وفريزر: ملوخية، لبن (الا اذا روبت بالبيت وهيك النية من باب التوفير)
غير طعام: محارم ورقية

وهلأ نرجع لوصفة خليط البراونيز...ومهم احكي انه لازم ما تنخبز البراونيزمثل الكيك لتجتاز الاختبار لانه وقتها بنكون بطلت براوني وبتنحرق وبتصير يابسة..البراوني بتكون اقل مسامات من الكيك (كانها معجنة) وللحصول على هالقوام لازم تنخبز لتنشف الاطراف والوسط لسة نسبيا طري...

خاطة البراونيز المنزلية
المقادير:
8 اكواب سكر
6 اكواب طحين
2 كوب كاكاو
1/2 1 ملعقة طعام بيكنج باودر
ملعقة طعام ملح

الطريقة:
تخلط معا وتحفظ بمرتبان ويوضع عليها ليبل (بتقدروا تحزروا قديش انا مبسوطة على الليبل الجديد :)...رح احكيلكم عنها ببوست قريب ان شاء الله :)


مقادير عمل صينية 8 انش ب 8 انش (المربعة الصغيرة) من البراونيز:
2 كوب مكس
2 بيضة
2 ملعقة صغيرة فانيلا
1/3 كوب زبدة مذابة

الطريقة:
تخلط المواد السائلة وتضاف للخليط وتحرك بملعقة خشب جيدا وستكون سميكة
توضع في الصينية المدهونة بالفرن على 170 درجة الى ان تنشف الحواف ويبقى الوسط لامع قليلا
تترك لتبرد في الصينية لتكون دافئة
تقلب وتقطع
تقدم مع بوظة وصوص شوكولاتة وهي دافئة او لحالها او ممكن تضيفي اي شي فيها مثل شوكولاتة شيبس ابيض او عادي ، مكسرات...الخ
وصحتين





Friday, November 8, 2013

كيف تبني الخزين: البوست الثاني ووصفة كعكة الليمون باللبن والفستق

انشغلت كتير الايام الماضية ببعض الامور اللي اخرتني عن البوست التاني بكيفية بناء الخزين...اذا بتتذكروا بالبوست الاول حكينا عن المبادئ المهم اخدها بعين الاعتبار عشان تعرفي كيف تبني خزين جيد يكون اكبر عون الك في حال ما قدرت تشتري اغراض او كانت الميزانية قليلة وتتطلب سياسة شد الحزام...وعشان اسهل عليكم الفكرة حكيتلكم اني رح اخدكم برحلة معي هادا الشهر عشان نشوف كيف..اولا بتعرفوا اني حطيت المنيو للاسبوع الماضي واللي بنيتها على ما عندي وطبعا عملت قائمة بالاشياء اللي بدي اشتريها وكانت الفكرة اني التزم بصرف 100 دينار بالاسبوع واني اخصص 20 دينار لبناء المخزون
اللي صار هو اني اشتريت الاشياء التالية ولانه كان في عروض ممتازة فاشتريت اشياء اكثر من  ال 100 دينار الميزانية اللي حطيتها بس اذا بتتوزع على كل الشهر رح اكون وفرت(انا حطيت القائمة اللي حطيتها بخط مايل والاشياء اللي اشتريتها بالاحمر) ولازم تعرفوا اني اشتريت الاغراض من 3 محلات بحكم اني كنت موجودة بالمول من مايلز وبحكم العروض من كارفور والمرور من جانب السيفوي..عشان هيك في اشياء ممكن تلاقوها ارخص بس بحكم الحاجة والوجود بالمكان وعدم الرغبة باللفلفة فاشتريتها بهالاسعار...

فليفلة خضراء 67.
ليمون ل 65. (اخضر الكيلو ب 88 قرش بكارفور)
فليفلة حمراء 79.
موز 1.73
بصل 39.
تفاح 2.10
بندورة 5 حبات 80. 
خيار 65.
3 اصابع زبدة برزدنت 1.99
3 اصابع لورباك 2.37
جبنة شدر ومونتراي جاك ب 2.10 للواحدة يعني 4.20 دينار
موزريلا مبشورة 227 غم 1.85
مرتديلا (نوع نعمة سادة ب 48. قرش للواحدة يعني 2 ب 96. قرش
نوع سنيورة ب 75. قرش
روست بيف 1.78
ببسي عادي 5 زجاجات وسط 2 دينار
ببسي دايت صندوقين ب 6 علب رفيعة ب 2.5 
عصائر مشكلة للمدرسة 2.10
اشياء زاكية للمدرسة 10 ...كتير بس احنا ما بنعطي مصروف وانا وخالد بنحب الاشي زاكي كمان :)
حليب لهارون 10.9 دينار من الصيدلية
خبز .25 
خبز برغر 2 دينار من السفراء 10 حبات

اشياء ما كانت على القائمة بس للضرورة احكام زي انه الاولاد مش شايفين اشي بالثلاجة الا المرتديلا واللي اضطريت اشتري منها علبتين كبار...بس هدول ضفتهم فوق...المهم...
علبة لبنة وسط 1.10
شاي اخضر بالنعنع 3.25
نسكافيه فانيلا (ببرر لحالي اني اشتريها لاني بحبها وبتعب وبستاهل هالجائزة) 3.95
نسكافية 3 ب 1 2.85  ل 30 ظرف
حليب مركز غير محلى  3 علب ب 35. قرش للعلبة المجموع 1.05 دينار
وكمان  باكيت دجاج 4 افخاذ ب 2.55 (للفريزر الاسبوع الجاي)

اغراض غير الاكل: 
ورق تواليت (20 رول) 2.15

المجموع الكلي: 68.33 دينار

للخزين:
2 مرتبان رب بندورة ب 89 قرش يعني ال 2 ب 1.78 دينار
- 10 كيلو سكر ب 3.69 قرش من كارفور
- مرتبان كبير مايونيز ب 1.32 من كارفور نوع حياة (زاكي وسعره زاكي كمان)
- موزريلا بلوك كبير نوع خمس بقرات من كارفور ومش على العرض من قسم الاجبان وزن 2.5 كيلو ب 11.20 دينار (اذا انتبهتوا اني اشتريت ال 227 غم ب 1.85 دينار وخلينا نعتبر الوحدة هي 100 غم فسعر ال 100 غم بالباكيت اللي 227 هو 81. قرش والبلوك الكبير سعر ال 100 غم هو 45 قرش ...فرق كبير حوالي الضعف...صح دفعت مبلغ كبير بس هيك انا وفرت على المدى الطويل وبالزبط  8.75 دينار...تقريبا حق بلوك موزريلا جديد!!!! انا ببشره وبفرز كل كوبين بكيس في الفريزر وبطلع كل ما بدي
المجموع: 17.99 دينار من اصل 20 يعني زاد 2 دنانير للاسبوع الجاي

يعني مجموع ما صرفت مع الخزين هو: 86.33 دينار

 الفرق هو...احم...وسمعوني كف كبير... 13.67 دينار منهم 2 دينار للخزين وهدول رح يروحوا بحصالة على جنب وبآخر الشهر اذا صار فيه عجز بسده منه...
وكان فيه اشياء مهمة جدا لازم اشتريها طول الشهر بس بعروض ممتازة وسعرها ممكن يتوزع على كل الشهر لانها بتكفي طول الشهر وما رح اضطر اشتري خلال الشهر منها
- بامبرز 2 باكيت كبير حجم 5 (56 حفاظ) ب 16.13 (بالسعر العادي بيكون الباكيت الواحد اكثر شوي من 9 دنانير...يعني توفير بحدود 1 دينار للباكيت وانا اشتريت 4 ب 32.26 دينار (لكل شهر 11 ان شاء الله) من السيفوي
- صندوق ببسي دايت (واحنا بستهلك) 30 واحدة ب 7.10 دينار ومعهم 2 زجاجة ببسي عادي سعة اللتر هدية (يعني وفرت استهلاك 6 ايام ببسي عادي واشتريت ببسي دايت لفترة من الشهر...صدقوني رح اضطر اشتري كمان مرة بسعر  23. قرش...توفير 2 قرش بالعلبة ب 30 حبة يعني 60 قرش + الزجاجتين الهدية من كارفور
- ورق تواليت حجم كبير (رح يكفي طول الشهر ويزيد شوي لبداية شهر 12 (مع اني اشتريت قبل 22 رول وعلى عرض كمان بس ما رح يكفوا وكمان هدول اجى معهم 2 رول مطبخ هدية ب 7.67 دينار من كارفور
المجموع 47.03 دينار
هدول يمكن يبينوا تجاوز للميزانية بس في الواقع توفير ورح يبين الفرق خلال الاسابيع القادمة لاني ما رح اشتري بامبرز او ورق تواليت وكمان ببسي دايت لحد قبل آخر الشهر

اوكي انجاز جيد...اما وصفة اليوم فهي لكيك الليمون باللبن والجليز بالفستق الحلبي..ممتازة مع كاسة شاي العصرية...

كيك الليمون باللبن والجليز بالفستق الحلبي
المقادير: 
كوب لبن
كوب زيت
5 بيضات
عصير ليمونة وسط
بشر ليمونتين
كوب سكر
1/2 كوب سكر بني
2 ملعقة صغيرة فانيلا
1/2 2 كوب طحين
ملعقة صغيرة ملح
1/2 ملعقة صغيرة كربونات
1/2 1 ملعقة صغيرة بيكنج باودر
للوجة:
1/2 كوب فستق حلبي مطحون خشن
كوب سكر ناعم منخل
3 ملاعق طعام عصير ليمون

الطريقة:
يخفق الزيت والسكر بنوعيه ليختلطا
يضاف البيض بيضة كل مرة مع استمرار الخفق
يضاف عصير الليمون والبشر والفانيلا واللبن
يخلط الطحين والملح والبيكنج باودر والكربونات ويضاف على مرحلتين
توضع في القالب المدهون وفي الفرن على 175-180 درجة 
تخبز من 35-40 دقيقة لتجتاز اختبار الكيك
تقلب على سلك معدني وتترك لتبرد
تحضر الجليز بخلط السكر بعصير الليمون
تسكب على الوجه وترش بالفستق الحلبي








Sunday, November 3, 2013

كيف تبني الخزين: البوست الاول وبروسكاتا الفليفلة المشوية

بحب ابدا بالاعتذار اذا كان البوست المرة الماضية طويل...بس دعت الحاجة لتغطية الموضوع بشكل مفصل...اليوم وزي ما وعدتكم بدنا نحكي عن كيف ممكن تبني غرفة الخزين الخاصة فيكي بحيث يكون عندك تقريبا كل شي بيلزم على القائمة الرئيسية ومن غير ما تكسري البنك خاصة مع الاسعار هادي الايام والغلا اللي مش طبيعي وعشان ما ارهقكم كتير رح اقسم الموضوع على عدة بوستات...اليوم رح احكي عن...وحكيت قبل هيك عن اهمية التخطيط 

التخطيط مش بس بيوفر فلوس وبيوفر وقت كمان عليكي... هي بعض النقاط الاساسية اللي ممكن تساعد ومهم انه تختاري اللي بيناسبك منها لانه ممكن بعضها مش مناسب اذا ما عندك سيارة او فرصة للوصول الى افضل المحلات اللي بتوفر العروض...
- اعملي جرد لما عندك
- قرري اهم الاشياء اللي تستهلك ببيتك: اعملي القائمة الرئيسية الانسب الك..اللي عملتها انا كانت مقترحة وبتناسبني وحسب الاشياء اللي بطبخها ببيتي ..والقائمة رح تساعدك تبني الخزين للاكل اللي بتستهلكه عيلتك
- شو اكتر الوجبات اللي بتعمليها...مثلا انا لازم اعمل ملوخية مرتين بالشهر والا بتقوم علي القيامة..ههههه...بس ما بخزن الا اذا كان النوع اللي بنحبه على العرض وكنت زمان افرز بس هلأ ما عم بعمل هيك لانه ما عندي وقت والبنت اللي عندي ما بتساعد كتير...الاسباجيتي كمان من الطبخات المهمة ببيتي والنودلز الصينية والبرغر ولازم تنعمل مرة بالشهر
- الشراء بالجملة: وهو سلاح ذو حدين...مناسب اذا :
1. عائلتك بتستهلك وكبيرة (انا بين البينين عشان هيك بتقاسم مع اهلي مرات يعني بنشتري كرتونة وبنقسمها وهادا خيار كويس للعائلات الصغيرة)
2. اذا سعر الوحدة (اللتر، الغرام، الكغم...الخ) اوفر من شراؤه بالمفرق وحكينا كتير عن هاد الموضوع وعشان تقدري تميزي ممكن تكتبي بدفتر صغير تخليه بشنتة ايدك اسعار الوحدة خاصة لاهم الاشياء اللي بتلزمك عشان ترجعيلها لانه الواحد بينسى مرات...اعطيكم مثال...اما ما بشتري الزيت الا اذا كان سعر الليتر دينار او 1.10 دينار (وهادا السعر صعب  تلاقيه بالجملة عشان هيك لما الاقي عرض وخاصة بكارفور بستغل الفرصة وبجيب كمية) اما النوع اللي بستعمله فانا ما عندي انتماء لنوع واحد لاني اكتشفت انه اغلبها زي بعض خاصة اني بستعمل الزيت بالعجين والكيك اكثر من القلي...فممكن اذا بتحبي تقلي بزيت ما بيطلع ريحة تستثمري بالنوع اللي بتحبيه )

والشراء بالجملة غير مناسب اذا سعر الوحدة نفس او اغلى من سعر الوحدة بالمفرق او عائلتك ما بستهلك

-  الشراء على العروض مع الانتباه الى تواريخ الانتهاء وهادا احسن شي ممكن تستغليه...مثلا قبل فترة كارفور عمل عرض 1.2.3 وكان كتير منيح فاستثمرت مبلغ منيح للخزين اكثر من العادة لاني عارفة انه مدة العرض محدودة وما رح يعيده لفترة فاشتريت الزيت والفول وغيرها من الاشياء. السيفوي بيعمل عروض مرات على اشياء ممكن ضايللها شهر وبتنتهي واذا بنحب الاشي بشتري منه اللي يكفي قبل مدة الشهر بس البيكان مثلا اشتريته وحطيته بالفريزر وهيك استفدت بالرغم من انه المدة على الباكيت ضايللها شهر ولما فتحت العلبة كان زاكي كتيير فوضعه بالفريزر بيضمن انه يضل بوضع ممتاز حتى بعد الشهر...وعلى سيرة المكسرات اللي بيحب استخدام اللوز وغيره من المكسرات وبيعرف حد بالعقبة يوصيه...كيلو اللوز كان ب 6 دنانير...سعر كويس بالمقارنة باسعار عمان. من احسن الاشياء اللي بتنشرى على العروض وبتضل لفترة الاشياء الجافة مثل الحبوب، المعكرونة، السكر والطحين (حطي الطحين ليلة بالفريزر وطلعيه لتقتلي اي احتمالية انه يسوس اذا كنت من النوع اللي ما بيستهلك طحين).
- شراء الخضار او الفواكة بموسمها وممكن من الحسبة وتفريزها او طبخها كصوص او مربيات لتدخل في اكلات مستقبلية مثل الفراولة والبطاطا الحلوة المهروسة والقرع والورق الدوالي والملوخية...الخ وهون بيفيد كتير اذا عندك فريزر وانا بعتقد انه اي بيت بيشتغل المطبخ فبه كتيير لازم ما يخلو من فريزر...واسعارهم هالايام معقولة واذا بتفكري فيه فهو استثمار على المدى الطويل...
- شراء اللحوم على العروض وطبعا نوعية جيدة وتفريزها مع الانتباه للمدد
- اعملي الاشياء بالبيت وبهيك بقصد مكسات البان كيك ، البهارات مثل الفهيتا والتاكو وغيرها، الشوربة بالكريما، شراب الكاكاو، الحليب المركز المحلى...الخ
-ازرعي ببيتك...وللاسف انا ما عندي جنينة بس بحاول الاعشاب على الاقل اني ازرعها..اشتريت باول الصيف نبتة حبق او ريحان ب 1.5 دينار من كارفور (وانا متأكدة من المشتل اوفر) بس نقلتها على قوار اكبر شوي وهيها هلأ بشهر 11 وما اشتريت حبق من يوم ما اشتريتها...

وورق الغار برضه من عند جيران اهلي بنقطف وبنشف...طلبت من المزارع بالمزرعة يزرعلنا واحدة...


- انتبهي للرفوف السفلية بالسوبرماركت لانها عادة بتحوي الاشياء اللي على العروض او الارخص زكمان بعض السوبرماركتات مثل السيفوي عندها قسم خاص للاشياء اللي على التصفية

وعشان تعرفوا بالزبط شو بعمل لازم اشارككم تجربتي هاد الشهر وزي ما اتفقنا يوم السبت الجاي بستعرض اللي عملته... هلأ وصفة اليوم لنوع مقبلات لذيذ وكمان صحي وممكن يكون عشاء ممتاز...بروسكاتا الفليفلة المشوية



بروسكاتا الفليفلة المشوية
المقادير:
2 حبة فليفلة من كل لون (اخضر، احمر، اصفر) مشوية ومقشرة
1/4 كوب زيت زيتون
2 سن ثوم
2 ملعقة كبيرة خل بلسمك
ملح
فلفل اسود
شرائح خبز فرنسي محمص بالفرن
حبق وبقدونس طازج للوجه

الطريقة:
تخلط المقاديروتوضع فوق الخبز وتزين بالحبق والبقدونس الطازج

اسهل من هيك عبث !!! وصحتين