Sunday, October 27, 2013

فطيرة التفاح بالكراميل

بعد ترتيب مكتبي اخيرا وانجاز قائمة الوجبات للاسبوع القادم وتحضير لائحة المشتريات (حسب قائمة الاكل) قررت اشارككم وصفة لذيذة جدا وخاصة مع اجواء الخريف واللي بالزبط بتاخد جوالي 1/4 ساعة لتعملي هالطبق الرائع وتستمتعي فيه مع عائلتك العصر بعد الغدا...طبق اليوم هو فطيرة التفاح بالكراميل...واذا انتو من متابعي المدونة بتعرفوا اديش انا بحب اعمل وصفات بالتفاح ولسة رح يكون في وصفات جاية ان شاء الله...تحفة ومناسب بالخريف والشتاء واذا اجاكي ضيوف بس اعملي هادي الوصفة (على افتراض انه عندك تفاح) وما رح تشعري باي غلبة...



فطيرة التفاح بالكراميل
المقادير:
3 تفاح اخضر او احمر نوع قاسي وبيقرش مقشرين ومقطعين مكعبات
1/4 كوب سكر عادي
للوجة:
كوب طحين
كوب سكر بني
ملعقة صغيرة قرفة
رشة جوزة الطيب
رشة ملح
اصبع زبدة مكعبات

الطريقة:
يدهن صحن الباي بالقليل من الزيت
يوضع التفاح والسكر فوقة بالقاع
تخلط مكونات الوجة بمطحنة الطعام لتصبح فتات
تضاف فوق التفاح
تدخل فرن حرارة 170 وتخبز حوالي 45 دقيقة الى ساعة
تترك 1/4 ساعة لترتاح خارج الفرن قبل التقديم
تقدم مع الايس كريم او الكريما المخفوقة
والف صحة...
ما في اسهل من هيك...


Saturday, October 26, 2013

الحمص بالبندورة المجففة

اول خميس من فترة بطلع بزور صاحبة الي مع الاولاد...جد نسيت اديش انه الواحد ممكن يقضي وقت حلو مع الناس واديش الاولاد بينبسطوا...شكرا كتييير سماح على استضافتنا امبارح....سلطان كتيييير انبسط وهارون وانا كمان :) وكعكة البلوبري بالستروسل كتيييير زاكية...بحب انك تصوري قطعة وتعطينا الطريقة كوصفة لضيفة وطاهية ماهرة على المدونة :)

وعلى صعيد البيت فحالة التنظيم والترتيب البطيء والتدريجي جدا ماشية بشكل جيد...هدفي هو التخلص من كل ما لا يلزم وما اكثر الكراكيب!!! اللي خلص لهلأ خزانتي وكومودينتي والدرسر الكبير من غرفتي وخزانة الحمام الرئيسي و3/4 غرفة الخزين و 1/2 مكتبي....مفرقين صح بس حسب وين عم بقضي الوقت...يعني برتب شوي بالمكتب وانا قاعدة على الانترنت وهيك.. عادة بعمل هاي العملية بس ما بتخلص من الاشياء اللي مو لازمة لانه دايما بفكر يمكن يجي يوم واحتاجها وبتمرق ايام وشهور وما بتطلع عليها...المرة هاي قررت انه لأ...اذا ما استعملت لفترة اما على التفريق او الكب حسب حالتها...

طبعا امبارح الجمعة اعطيت حالي اجازة من الموضوع هاد...اما اليوم فالنية استكمال العمل على المكتب وناوية اشارككم وصفة الحمص بالبندورة المجففة..بشبه طعم الحمص العادي بس لونه على احمر شوي وفيه شوية حداقة على حلاوة من البندورة المجففة ونوع من التغيير...


الحمص بالبندورة المجففة

المقادير:
2 كوب حمص مسلوق (انا بحب اجيب جاف واسلقه بالبيت احسن وابرك بكتير واوفر وطبعا صحي اكثر وبحطه باكياس وبالفريزر مع شوية من ماء السلق)
عصير ليمون حسب الرغبة
سن ثوم مدقوق
3 ملاعق كبيرة طحينة (ممكن اكثر للي بحب)
ملح
10-12 حبة بندورة مجففة منقوعة بماء ساخن ل 1/2 ساعة ومفرومة او ممكن استخدام النوع المكبوس بالزيت (بدون نقع حوالي 3 ملاعق طبيرة مفرومة)
زيت زيتون للوجة

الطريقة:
تطحن كل المقادير بالخلاط او محضرة الطعام لتتجانس وتصبح ناعمة (انا قشرت الحمص للحصول على قوام انعم بس ممكن ما تقشريه)
استعملي ماء السلق للمساعدة في الطحن والحصول على القوام المرغوب وصحتين



Wednesday, October 23, 2013

صينية البطاطا المخبوزة بالسبانخ

لما غنت صباح "عل بساطة البساطة..ياعيني عل البساطة...غديني جبنة وزيتون وعشيني بطاطا"!!! ما كذبت لانه البطاطا من اروع الخضار الموجودة بكل المواسم واكثرها توفرا وسعرها مناسب (ولو انه هالايام عم بتكون أغلى من ما لازم)..بس هي مفيدة وبتشبع ولذيذة ومحبوبة الجماهير من كبار وصغار وعدد الاطباق اللي ممكن تنعمل منها كبييييير جدا..يعني مش بس مسلوقة ومقلية ومشوية...حتى افخم المطاعم بتقدمها بطرق "او لا لا" عشان تعطيها الشكل الفخم وبتبطل عل البساطة!!! انا شخصيا الي علاقة خاصة مع البطاطا وحب وشغف كبيرين...بدوا من زمان بس اكثر ما بتذكر انه في اجازة الدراسة للتوجيهي (كانت امي معلمة) كنت اضل بالبيت لحالي لانه الكل بالشغل والمدرسة...ويجي على بالي بطاطا مقلية الصبح...ومش عارفة اركز...فاقوم واقلي 3 حبات بطاطا وبدون مبالغة آكلهم زي التوتو...ولما بدت الامتحانات...كانوا كل صاحباتي ضعفانين ووجوهم باين عليها الدراسة..الا انا!!! ما شاء الله وجهي مبطبط من كتر البطاطا اللي اكلتها بالعطلة !!!! والحمد لله اثمرت معي وجبت بالتسعين!!!!هههه يعني اللي عندها حدا توجيهي طعميه بطاطا...هههه مجربة!!!

اكلة البطاطا اليوم هي صينية مخبوزة بالفرن مع السبانخ والبصل والثوم والجبنة...كيف بالله!!!! اكيد اشي زاكي وصحن جانبي رائع...جربوه وما رح تندموا...

صينية البطاطا المخبوزة بالسبانخ
المقادير:
3 حبات بطاطا كبار مقشرين ومسلوقين بماء مملح ومهروسين
1/4 كوب زبدة
1/2 كوب حليب او ممكن كريما اذا حبيتيها ادسم
ملح وفلفل اسود
ملعقة طعام زيت زيتون
بصلة متوسطة مقطعة شرائح رفيعة
سن ثوم مهروس
6 اكواب - 8 من السبانخ الطازج المفروم
1/2 1 كوب جبنة شدر حادة او متوسطة الحدة

الطريقة:
تخلط البطاطا المهروسة الساخنة مع الزبدة والحليب
يوضع زيت الزيتون بمقلاة ويضاف البصل ويقلب ليصبح طري
يضاف الثوم والسبانخ ويطبخ ليقل حجمه وينشف ماؤه
ترص البصاطا بصحن البايركس
ثم طبقة السبانخ بالبصل
ثم الجبنة وتخبز على 175 من 20-30 دقيقة لتحمروتقدم ساخنة كصحن جانبي
وصحتين




Monday, October 21, 2013

سلطة الشمندر بالفتة

لكل اللي دايما بحبوا البلاد الاجنبية بحب اقول...انها حلوة مزبوط بس ما في بعد بلادنا واسألوا مجرب...يعني كتيير في اشياء وبدي احكي بس من وجهة نظر ست البيت ومن منظار الاكل لانه (كل واحد وعلامه!!!) انه بس اروح على الخضرجي واشوف الخضار والفواكه الرائعة واللي بره بتكون من الاشياء المستوردة والغالية جدا مثل البقدونس (بتصدقوا!!!) او النعنع او الشمندر...الخ...احنا محظوظين بوجودها مرات مزبوط باسعار عالية بس بشكل عام جيدة واذا بتروحوا على الحسبة بآخر النهار بتكون الاسعار اقل لانه البياعين بدهم ما تكسد البضاعة ويخلصوا منها....

وبموسم الشتاء في لذة بوجود الكتير من الخضار الرائعة مثل القرع والبطاطا الحلوة والشمندر والكستناء وغيرها...اليوم سلطة الشمندر بالجبنة الفتة بخل لبلسامك...برضه سهل وسريع وصحي ولذيذ وشكله كتييير حلو بعزومة...



سلطة الشمندر بالفتة
المقادير:
4-5 حبات شمندر حجم وسط مسلوقة ومقشرة
1/2 كوب جبنة فتة مفتتة (انا استعملت بينار التركية المحفوظة بالمي لانها حامضة واقل طراوة من غيرها)
1/4 كوب خل بلسامك
1/2 كوب زيت زيتون
ملح
فلفل اسود
حفنة جوز (حوالي 1/4 كوب) محمص ومفروم خشن
القليل من ورق الزعتر الاخضر للزينة

الطريقة:
تقسم كل حبة شمندر شرائح بالعرض (بين 3- 4 شرائح حسب حجم الحبة) ونحتفظ بها فوق بعضها البعض
نخلط الزيت والخل والملح والفلفل الاسود
في صحن التقديم نضع شريحة شمندر ثم القليل من الجبنة الفتة ثم قطعة شمندر وهكذا لتنتهي الحبة ونكمل ببقية الشمندر
ننثر الجوز المحمص على الصحن حول الشمندر المحشي ثم الزعتر والصوص
وتقدم فورا...
وصحتين..


Sunday, October 20, 2013

رحلة الشتاء والصيف والدجاج المشوي بالزعتر

بديتوا رحلة الشتاء والصيف؟!!! انا بديت قبل العيد بس بشكل عشوائي نسبيا...طبعا عرفتوا شو قصدي؟!!! تغيير الاواعي!!ههههه
كل سنة بدخل بهالميمعة وبقول لازم اعمل جرد للاواعي عشان ما اشتري اشي يكون عندي منه اشياء مشابهه وبوقع بفخ اني بكسل وبالله ابدل واضب وخلصت فكت...السنة قررت اني اكون اكثر تركيزا واقسم الشغل حتى ولو اخد وقت اطول بس المهم النتيجة !! قد يبدو الموضوع سخيف للبعض بس اديش منا بيوقف ادام الخزانة وبيطلع وبيطلع وبيقلب وكل هالاواعي ادامه وبيحس انه ما في اشي مناسب وبيقول لحاله "ما عندي اشي البسه"!!! و لاني من النوع اللي بحب اللبس بس كتير مرات ما بعرف شو البس وبضل اطلع بهالخزانة وهي تتطلع فييي وبدون نتيجة....والمشكلة الاكبر انه...عندي اواعي كتييير..بس هادا مش عارفة على شو يلتبس...وهادا صار ضيق...وهادا زهقت منه...ووووو...الخ...عشان هيك حطيت ببالي اني لازم افكر بحل فقررت اني اعمل التالي...(بعرف انه هادي المدونة للطبخ بس لازم برضه الواحد يكون مرتب وهو بطبخ!!!! ههههه
1. قررت اجمع كل المجلات والقصاقيص والصور للبسات اللي عجبوني على النت او في مجلات واقضي جزء جيد من يوم واحد اطلع عليهم وانقي اللي عجبني كتير واحاول اشوف اذا عندي قطع مشابهه لتقليد اللبسه...ومش معقول قديش ساعدت هالشغلة في تلبيق اشياء مع بعضها موجودة عندي اصلا وسجلت كل اللبسات على ورقة (هادا رح يساعد عشان ما ابحلق انا وخزانتي ببعض بعدين!!!)

2. عزلت اغراضي كاملة (الملابس، الاحذية، الاكسسوارات (كفوف، لفحات، مجوهرات تقليدية، جرابات، شناتي....الخ)
هلأ اجا دور الاشي المهم وهو تفصيل الاشياء اثناء الترتيب والتعزيل وهادا الحكي بده جزء منيح من نهارك لانه في قياس وتجريب قطع...الخ ...لما بديت بلشت بكل نوع لحال...يعني البلايز، البنطلونات...الخ وصنفتهم كالتالي:

مجموعة1: ممتاز وقياسه جيد ووضعه مرتب...هادا دخل في تقسمين فرعيين: الاول اني بحبه كتيير ومناسب واكيد لو صحتلي فرصة تانية بشتريه كمان مرة...هادا تعلق وترتب بالخزانة (وطبعا اخذت اللبسات اللي حبيتها ونقيتها بالاول بعين الاعتبار ولقيت انه عندي كتير اشياء ممكن استفيد منها وما خطر على بالي...الثاني مش متأكدة اني بشتريه كمان مره لو صحللي ومش مقتنعة تماما فيه او ما بيلبق على اشي...هادي المجموعة ترتبت على التخت للعودة الها مرة تانية
مجموعة2: حالته ممتازة او جيدة جدا بس مش حلو علي، ضيق، واسع، مش راكب على كتافي منيح...الخ) هادي المجموعة للتوزيع لاصحاب النصيب (وكان فيه اشياء جديدة بورقتها)
مجموعة 3: حالته مش ممتازة، قديم شوي، نازل عليه نقطة زيت...الخ (وكلنا عنا من هالقطع واللي مش عارفين نفارقها) باي باي...لانه مش معقول اعطيها لاي حد بحاجة وهي مش بحالة جيدة بس مرات قبل ما اودعها باخد الازرار او ممكن احولها لمجموعة قمايش عندي اياها للاستخدام في الاعمال اليدوية ..

بعدين رجعت للمجموعة اللي مش متأكدة منها وللبسات اللي ببالي واشي تعلق واشي تفرق وكل النواقص دونتها (ومش كتيير ابدا بعد هادي العملية...وكل هاد مع تنظيف عميق للخزانة والكومودينا الجانبية وال Dresser ...وصار عندي وسع يا جماعة...يعني منظر الخزانة صار مش بس حلو...صرت عارفة شو فيها...شعور رائع بالانجاز والتوفير لاني كنت مفكرة بدي مبلغ زي كل سنه كسوة شتاء...ابدا!!!! وكنت حاطة اخلص كل الموضوع ب 4 ابام بس تشجعت واخذ يومين..
النية بكرة ان شاء الله خزانة الحمام (بكل ما فيها من شامبو وكريمات وغيرها) وبعديها تعزيل كامل لغرفتي والانتقال الى قسم تاني بالبيت...

وبكل هالعجقة والشغل ما في وقت كتييير للطبخ بس ليش...الدجاج بالزعتر كان الحل...سهل وسريع ولذيذ كتيييير

الدجاج المشوي بالزعتر
المقادير:
دجاجة حجم وسط
3 ملاعق كبار زعتر اكل (اللي مكلف بسمسم وسماق)
عصير ليمونة وسط
3 سن ثوم
1/3 كوب زيت زيتون
ملح
فلفل اسود
رمان احمر للزينة

الطريقة:
تخلط كل المكونات معا وتدهن بها الدجاجة جيدا وتنقع لمدة 1/2 ساعة على الاقل (انا هيك عملت لانه ما عندي وقت)
تزضع في كيس الفرن وعلى حرارة 180 مدة 45 دقيقة ثم يشق الكيش وتطبخ لتحمر من 25-35 دقيقة
تزين بالرمان وتقدم مع العصار الموجودة بالكيس وصدقوني انها بتكون دايبة ومثل الزبدة خاصة مع خبز ساخن وتغميسة العصارة...والف صحة وهنا...



Saturday, October 19, 2013

بعد شهر من البعد....كعكة اللوز الرائعة

آخر مرة كتبت فيها على المدونة كانت قبل شهر تقريبا...شكرا لكل اللي سالوا عني واستفقدوني واللي كانوا اروع من اخوات خلال الفترة الماضية ومن غير ما اخوض في التفاصيل هم عارفين حالهم وعارفين الظروف...انا مش بس محظوظة انكم بحياتي...انا متأكدة انه ربي راضي عني...الله يسعد قلوبكم ويجعل ايامكم كلها خير وحب وسعادة مع الناس اللي بتحبوهم...

ولاني مش حابة ابعد اكتر من هيك قررت انه لازم ارجع على الاقل للمدونة لانها المساحة الخاصة اللي بتخليني اتواصل معكم واشارككم حبي الكبير للمطبخ واي اشي اله علاقة بالبيت والاعمال اليدوية...

وقبل ما انسى كل عام وانتو بالف خير..بتمنى انكم قضيتوا عيد سعيد ومبارك ان شاء الله...العيد عنا كان مليان بالزيارات العائلية "الحمد لله" وبعض الطلعات العائلية على الفطور والغدا...وبالرغم من انه العيد ممكن يكون متعب للبعض منا الا انه كسر رائع لروتين الحياة اليومية وفرصة نشوف الاهل والاحباب وخاصة انه الكل يدوب يلحق هالايام على اموره الشخصية...بس كل الزيارات والعجقة خلتني احن لايام الجمعات واشعر اديش مهم هادا التجمع العائلي ووجود الناس بحياتنا...ما بعرف بالنسبة الكم كيف الامور بس انا في بيتي الامور عادة هادية كتير والتجمعات العائلية محدودة...عشان هيك مفكرة اكسر هادا الروتين واحاول اني الاقي الوقت ليصير فيه زيارات عائلية اكتر مثل ايام زمان...مش بس عشاني ...عشان الاولاد اللي هالايام فقدوا الشعور بالصلة للعائلة الممتدة ..اغلبهم بيفضلوا يروحوا عند اصحابهم او يقعدوا بالبيت ولما بتناقش بالموضوع مع اي حدا من الناس بيقولوا "ما هو الزمن تغير!!!" جد !!! من امتى صار انه الواحد يتعرف على افراد عيلته مش اشي "كوووول"..ارحموني مشان الله!!! بالنسبة الي يا رب يقدرني واقدر اكسر هادا القالب والمعتقد ببيتي...من احلى ذكرياتي هي الاوقات اللي كنت اقضيها مع اولاد خالاتي واخوالي وعمتي والجيران وحتى اصدقاء العيلة اللي كانوا جزء من العيلة بحكم العلاقة الوطيدة...يعني الزيارة العائلية كانت بتخص كل افراد العيلة مش بس ماما وبابا لحال...او البنت لحال او الولد لحال...الكل كان يجتمع والكبار يتسلوا والصغار كمان...حتى هالايام بحس انه الاولاد مش اجتماعيين ابدا...لما بيزورنا حدا ومعاه اولاد قدهم بيقعدوا كلهم على التلفزيون او كل واحد على موبايله!!! جد اشي محزن!!! ايامنا كنا نطلع نلعب البنات والاولاد مع بعض او البنات في غرفة ونبربر ونضحك ونلعبلنا لعبة شدة او مونوبولي...جد يا خسارة انهم فقدوا متعة الاحساس بهادي النكهة الخاصة للحياة اللي اعتقد انها السبب انهم ما بيقدروا قيمة اشي هادي الايام ولو راحوا على احلى مكان...الا تلاقي في نقطة انتقاد او حدا يقولك كلمة "ازهقت" لانه الاكس بوكس عم تستنى بالبيت وانه يلعب عليها اهم من انه يقضي الوقت مع عيلته!!! اشي مضحك مبكي صار بالعيد لما كنا على الغدا باحد المطاعم كان في طاولة عليها عيلة ما شاء الله عددها منيح...الكل وبدون استثناء كان على الموبايل!!!! طيب ليش نطلع مع بعض اذا كل واحد بده يقعد لحال؟!!!

ما علينا!!! بس ما في احلى من العيلة واللمة وما في اشي بيجمع العيلة اكتر من الاكل!!! صح!!! عشان هيك الاكل هو جزء مهم من ثقافة وحضارة الشعوب...حوليه بنضحك وبنشارك اللي بنحبهم لحظات وذكريات...بس بشرط الموبايلات مطفية!!!!!

الوصفة اللي حابة اشارككم فيها هي لكيكة عملتها قبل فترة وحطيت الصور على الفيسبوك...كيكة تفيض بطعم الزبدة الرائع...ان شاء الله تجربوها وتعجبكم

كعكة اللوز 
المقادير:
70 ملم حليب
ملعقة صغيرة عصير ليمون
75 غم زبدة
3 بيض
كوب سكر
2 ملغقة صغيرة فانيلا
كوب طحين
ملعقة صغيرة بيكنغ باودر
1/4 ملعقة صغيرة ملح
للوجه:
كوب لوز شرائح رفيعة
125 غم زبدة
3/4 كوب سكر بني فاتح
50 ملم حليب
1/2 ملعقة صغيرة ملح
ملعقة صغيرة فانيلا

الطريقة:
يدهن قالب التشيز كيك ويرش بالطحين وتلف جوانبة بورق الالمنيوم لضمان عدم خروج العجينة اثناء الخبز
يخلط الحليب بعصير الليمون ويترك 10 دقائق (ممكن استعمال لبن خاثر (اكتيفيا 75 ملم بدل الحليب والليمون)
يحمص اللوز بالفرن من 5-7 دقائق ليصبح ذهبي فاتح
تذاب زبدة الكيكة في طنجرة وتترك لتبرد قليلا
يخفق البيض والسكر والفانيلا مدة 5 دقائق (ليتضاعف حجمه ويصبح سميك القوام واصفر فاتح)
ينحل الطحين والبيكنغ باودر والملح
يوضع 1/3 الكمية فوق البيض وتحرك بملعقة مطاطية ثم 1/2 كمية الحليب وتكرر العملية بالتناوب بالانتهاء يالطحين
ننزل 1/2 كمية الزبدة المذابة ونحرك برفق للتخلص من اي فقاعات هواء ونضيف باقي الزبدة ونحرك
تسكبها في القالب ونضعها في فرن حامي 160 او 320ف  من 25-30 دقيقة
ونحضرالوجه في هذه الاثناء بوضع كل مقادير الوجه في طنجرة على النار وتحريكها بخفة لتذوب الزبدة وتغلي وتسمك قليلا
نرفع الكيكة من الفرن ونرفع الحرارة ل 200 لو 390ف ونسكب الوجه فوق الكيكة ونفرده ونعيدها للفرن لتخبز من 8-10 دقائق وتصبح اغمق باللون وتخرجها من الفرن
نتركها لتبرد قليلا وباستخدام السكين نحركها على جوانب القالب للتأكد من انه غير ملتصق
يفك القالب وتترك اتبرد على سلك معدني وتقدم بحرارة الغرفة وصحتين..