Monday, September 16, 2013

خبز رمضان

رجعنا لدرس المخبوزات وقرب ينتهي شهر 9 واللي بيكون آخر دروس المخبوزات عشان نبدأ بدروس تانية ان شاء الله بس ما في مانع من وقت لآخر انه نعمل نوع خبز جديد لانه ما في اشي بيضاهي ريحة الخبز بالبيت...(قززتكم اد ما قلت هالجملة!!!!)
خلينا نبدا باحلى خبز رمضان.على الاقل احنا هيك بنسميه..وهو خبز اصله تركي وهي الطريقة اللي بتعمل رغيف واحد



خبز رمضان
المقادير:
3-4 كوب طحين
ملعقة صغيرة خميرة
كوب حليب دافئ
1/4 كوب ماء دافئ
3 ملعقة طعام زيت زيتون
2 ملعقة صغيرة ملح
1/2 ملعقة كبيرة سكر
سمسم وحبة البركة للوجة
صفار بيضة مع 2 ملعقة طعام حليب او حليب بس (انا استعملت بس حليب عشان انا والبيض على وجه الخبز مش اصدقاء)

الطريقة:
تخلط الخميرة والسكر والماء والحليب وملعقة طعام زيت والملح في العجانة
يضاف الطحين 3 اكواب ونضيق المزيد بالتدريج اذا استلزم الامر للحصول على عجينة متماسكة ويدهن وعاء نظيف بملعقة زيت اخرى وتترك لتخمر ساعة


ندهن صينية دائرية بقطر 30 سم تقريبا بملعقة الزيت النتبقية ونفرد العجينة المختمرة باليد لعمل وجه متعرج وباستخدام السكين نعمل خطوط طولية وعرضية وندهن الرغيف بالحليب ونرش السمسم وحبة البركة ويغطى ليخمر ساعة اخرى

يحمى الفرن على 200 مئوي ويخبز ويشوى وجهه قليلا اذا احتاج الامر...والف صحة وهنا




ساندويشات التشيلي دوغز

كيفكم اليوم...مش رح احكي كتيير لاني مشغوووووولة على الآخر بس اليوم الوصفة رح تكون استخدام بواقي التشيلي اللي عملناها امبارح في طبق جديد...ساندويشات التشيلي دوغز...وهي ببساطة ساندويشات هوت دوغز بس عليها صوص التشيلي...

ساندويشات التشيلي دوغز
المقادير:
6 قطع خبز الهوت دوغز
علبة هوت دوغز (انا بحب المفرز) ويكون بقري....بس برجع الكم وبحب اعملها سوتيه بشوية زيت زيتون
كمية من صوص التشيلي (نحتاج ال 2 ملعقة طعام على كل ساندويشة
جبنة شدر ومزريلا مخلوطين
ماسترد ومايونيز لدهن الساندوشات من الداخل (الكمية حسب الرغبة)
بصل مفروم للوجة

الطريقة:
ندهن الخبز من الداخل بالماسترد والمايونيز
توضع الهوت دوغز داخل الخبز في صحن بايركس
نضع التشيلي والجبنة
ندخلها في فرن على 175 من 10-15 دقيقة لتسيح الجبنة
تقدم وفوقها البصل المفروم
وصحتين



Sunday, September 15, 2013

التشيلي السريعة

وصفات الاكل كتييييييييييييييييييييييييييييرة...يعني مرات من كتر الوصفات بحس اني بنسى او بتجاهل اكلات معينة لانه عم بنشغل باكلات جديدة وعادة اللي بتروح عليه هو الطبيخ او الاكلات الكلاسيكية اللي صارت تنعمل بدون وصفة من مخي وبحط هيك وهيك وما في هيك...مش مشلكة!!! حطي هيك بدالها...انا متأكدة انه في منكم بشعروا بهادا الشعور...المهم اني قررت اني لازم كل اسبوع احاول اني اعمل مرتين اكلات كلاسيكية وطبيخ عشان ما اشعر اني بحرم عيلتي من الاكلات اللي بتراثنا واللي بصراحة غنية بالخضار وزيت الزيتون والاشياء اللي اكثر فايدة من الزبدة والجبنة...الخ...

البداية كانت امبارح لما اشتريت كيس كبير (حوالي 25) حبة كوسا صغيرة مشان المخشي...وكان الغدا مخشي ورز وسلطة لب الكوسا بالنعنع...


ضايل 3 حبات كوسا مفكرة اعمل فيهم اشي تاني ببقى اخبركم بعدين شو صار فيهم...

وكمان قررت انه عندي بلاوي من الوصفات اللي حابة اجربها واشارككم فيها فلازم كمان يكون الها نصيب من الوصفات كل اسبوع بالاضافة الى مساحة لتلبية طلبات الاولاد الخاصة...هادا نوع من الاطار العام اللي بساعد بتخطيط وجبات الاسبوع بالاضافة الى الاكل اللي على العروض متل قصة الكوسا واللي ما قلتلكم انه كل هاد الكيس كان ب 99 قرش من كارفور...

بس يوم الجمعة كان له نصيب من اكلة صارت نسبيا من الاكلات الكلاسيكية ببيتي واكيد ببيوت كتير ناس لانها زاكية ومفيدة ونسبيا رخيصة مثل التشيلي (اكلة امريكية من ايام رعاة البقر)...عندي الها وصفات عديدة بس هاي الوصفة سهلة كتيير وما بدها مكونات كتير وهو المطلوب هادي الايام مش بس للتوفير ولانه اغلب الناس بتحب الوصفات اللي بتنعمل بمكونات متوفرة بالبيت عادة... انا ما عملت كمية كبيرة لاني استعملتها في طبق تاني رح اشارككم فيه بكرة ان شاء الله بس بتقدري تضاعفي الكمية بكل سهولة



التشيلي
المقادير:
اوقية لحمة
بصلة وسط مفرومة ناعم
ملعقة طعام زيت زيتون
حبة فليفلة خضراء مفرومة ناعم
علبة فاصوليا حمراء مصفاة مغسولة
علبة رب بندورة (الكرتون )+ 2 كوب ماء
ملعقة طعام دبس او سكر اذا ما فيه
رشة ورتشير صوص
ملح
فلفل اسود
1/2 1 ملعقة صغيرة كمون

الطريقة:
تحمر اللحمة لتصبح بنية اللون وتنشف ماءحا ويضاف الزيت والبصل والفليفلة وتقلب اتذبا
تضاف الفاصوليا وبقية المكونات وتطبخ على نار هادئة لتتسبك (من 20-25 دقيقة)
وتقدم الى جانب الارز الابيض..
سهلة وسريعة والاولاد بيحبوها كتييير وبكرة ممتازة للبرد مع انه بالهاشوبات مش شايفة فصل الشتاء قريب ابدا...والله اعلم...




Saturday, September 14, 2013

فطيرة الباذنجان بالبستو والبندورة

مين فيكم بحب الباذنجان؟ انا انا انا انااااااااااااااااااااااااااااااااااااااااااااااا...من اطيب الخضار ومن اكثر الخضار اللي بحب اشتريها وخاصة في ابهى حالاته اسود وبيلمع..كأنه بينادي علي..وبشتري عادة 3- 4 باذنجانات والخيارات عدد ولا حرج...وطبعا الاولاد مش من المعجبين فبه...ياسمين بتاكل على مضض وسلطان مستحيل...بس ولا بيهمني...رح اعمل باذنجان وعلى قول خالد الهم انه كان زيهم وهو صغير وهلا بقول انه راح نص عمره لانه لقاه زاكي كتير بس كبر...لنأمل ذلك!!! بس لغاية الآن لا حياة لمن تنادي!!!

اكلة اليوم بتنفع صحن جانبي او للعشاء او الفطور لمحبي الباذنجان...يمكن شكلها مش احلى شكل بالعالم بس طعمها زاكي كتييير صدقوني...فطيرة الباذنجان بالبستو والبندورة...وهي غريبة شوي بمكوناتها لانه ما فيها كرست باي ..الكرست هو الباذنجان نفسة ومخلوط بمكونات اخرى...

فطيرة الباذنجان بالبستو والبندورة
المقادير:
باذنجان متوسطة مقطعة مكعبات كبيرة
بصلة متوسطة مفرومة ناعم
2 سن ثوم مدقوق
بيضة
كوب قرشلة
3 ملاعق طعام زبدة مذابة
1 ملعقة طعام صوص البستو (صوص الريحان)
حبة بندورة مقطعة دوائر رفيعة
كوب جبنة شدر
بقدونس للوجه

الطريقة:
يلق الباذنجان بالماء والملح ليصبح طري ويهرس
تضاف البصلة والثوم والقرشلة والبيض والزبدة ويرش بالفلفل الاسود
يفرد المزيج في قاع صحن الباي
ترتب قطع البندورة فوقه وترش بالملح والفلفل الاسود
تفرد طبقة من الجبنة
تدخل الفرن على حرارة 180 لمدة 30 دقيقة تقريبا
تقدم بعد رشها بالبقدونس المفروم...
كتتيييير زاكية لمحبي الباذنجان والطعم الايطالي...مش بالضرورة الاولاد ياكلوها..انا وخالد قمنا بالواجب :)





Thursday, September 12, 2013

صينية البامية بالريحان

من الاسئلة اللي بنسئلها مرات انه شو بستفيدي من هالمدونة؟ يعني لانه ما في مردود مادي منها (من وجهة نظر الناس) بس بالنسبة الي الموضوع مش مادي ابدا...الموضوع انه هالمدونة هي مكاني الخاص...مساحتي الخاصة اللي بختلي فيها بنفسي وبربر اد ما بدي من غير ما حد يقاطعني او يعترض...الخ..هالمدونة هي المكان اللي بلتقي فيه بالناس اللي بتحب الاكل (زيي) والناس اللي بتحب تسمع قصصي (مع اعتذاري منهم لاني احيانا بحكي كتيييير وبعيد وبزيد بقصص يومية يمكن زهقتهم منها!!!) المهم اني متمسكو بفكرة ما احب ان اسمية "البربرة الالكترونية" !!!هههههه

اليوم كان حار نسبيا وكان لازم اجيب اغراض للبيت واخيييييييييييييييرا مع ماما...كل اللي بكارفور اشتاقولها والمشوار طول اكتر من المعتاد لانه اغلب اللي بيشتغلوا هناك (من اللي بتوزن الخضار للي بعبوا الاكياس ) بيعرفوها والنا فوق الشهر مش رايحين زي عادتنا كل اسبوع فكانت شبه احتفالية.بكل حد يوقفها ويسألها وين الغيبة؟..والسعادة كانت غامرتني وانا بشوفها بتجر العرباية بعد ما كانت مسكينة مش قادرة تقوم لحالها ابدا!!! الحمدلله وشكرا لسؤالكم عنها ولدعواتكم الها...

اليوم كمان كان عندي ضيفين على الغدا فكان لازم ارجع اوام اوام لحتى اعمل الغدا واللي كان اجنحة الدجاج بصوص خاصة (لذيذة جدا) ونقانق بالصوص الحارة وحمص وسلطة وصينية بامية بالريحان ورز ابيض...الحمد لله على نعمه...

صينية البامية بالريحان لذيذة كتييير بتمنى تجربوها وهي انشف شوي من الطبيخ بس طعم لذيذ...

صينية البامية بالريحان
المقادير:
اوقية لحم خروف مقطع اصغر من راس العصفور (يعني كل قطعة راس عصفور بثلاث قطع)
ملعقة زيت نباتي وملعقة سمنة
بصلة متوسطة مقطعة مكعبات
4-6 اسنان ثوم شرائح
2 باكيت بامية مفرزة مقلية بزيت غزير ومصفية
علبة بندورة مفرومة ناعم او 3-4 حبات بندورة مقشرة ومفرومة ناعم
كوب الى كوبين ماء
ملعقة صغيرة ريحان
ملعقة طعام رب بندورة
ملح وفلفل اسود
2 ملعقة طعام دبس رمان
ريحان طازج للوجة

الطريقة:
يوضع الزيت والسمنة في طنجرة على النار وتقلب البصلة لتذبل
يضاف الحم ويقلب ليأخذ لون ذهبي قليلا
يضاف الثوم ويقلب دقيقة وترش بالملح والفلفل الاسود
تضاف البندورة  والريحان الناشف وتقلب عدة دقائق ثم كوب الماء ورب البندورة وتترك لتتسبك على نار هادئة لتستوي اللحمة (هذا النوع من البامية ما بدها مي كتييير مثل الطبيخ لانها للتغميس بس اللي بحب الصوص ممكن يضيف كمان كوب ماء)
تضاف البامية وتترك لتطبخ 5-7 دقائق ونتأكد من ملوحتها
يضاف دبس الرمان وترفع عن النار وتسكب في صحن بايركس وتغطى بالالمنيوم
توضع في الفرن من 20- 25 دقيقة لتتسبك
تزين باوراق الريحان الطازج وتقدم مع الارز
وصحتييييين




Wednesday, September 11, 2013

دجاج الماسترد بالعسل والروزماري

مرق اليوم على خير والحمدلله وكنت العصر مش قادرة بالمرة فاخدت قيلولة رائعة بتسوى مليون دبنار...
غدانا اليوم كان منوع...والطبق الرئيسي فيه كان دجاج الماسترد بالعسل والروزماري...سهل كتييير ولذيذ...

دجاج الماسترد بالعسل والروزماري
المقادير:
6 صدور دجاج مسحبة (انا قسمت كل صدر من النصف بالطول) ممكن استخدام التندرلوين (الجزء الطري من الصدر بس)
1/4 كوب ماسترد ديجون
1/4 كوب ماسترد كامل الحبوب
1/3 كوب عسل
ملح
فلفل اسود
عودين روزماري
3 ملاعق كبيرة زيت زيتون
بصلة صغيرة مفرومة ناعم
3 سن ثوم مدقوق

الطريقة:
تخلط الماسترد بنوعيها مع العسل وملعقة طعام زيت زيتون ورشة الملح والفلفل الاسود
يوضع بقية الزيت في مقلاة وتذبل البصلة  لدقائق ثم الثوم وتقلب دقيقة وتوضع في قاع صحن بايركس
ترش قطع الدجاج بالملح والفلفل الاسود
ترتب فوق البصل والثوم
تدهن بالماسترد وتصب كل الصوص فوقها
يفرط عود روزماري ويفرم ناعم ويرش فوفها
ندخلها الفرن بحرارة 200 من 18-20 دقيقة لتنضج (ولا يجب طبخها اكثر من اللازم والا اصبحت ناشفة)
تقدم مع عود روزماري في الوسط
وصحتين...



مفن الموز وطريقة الاستفادة من الموز المستوي

صار الي فترة مش حاطة اكلات جديدة على المدونة فعذرا منكم لاني انشغلت...ركض ركض طول النهار والحمدلله...انا متأكدة انه كتييير منكم في نفس الوضع...

المهم انه وقبل ما انشغل شوي اليوم بحب اقولكم اني رح احط بوست تاني آخر النهار ان شاء الله (نوع من التعويض)...وصفة هاد البوست لمفن موزكتييييييييييييييييييييييييير زاكي وقررت اني اشارككم الوصفة لانه كتير ستات حكولي اديش مرات بكبوا الموز لما يستوي شوي ...الحل عندي...

الحل للموز المستوي ...حطيه بالفريزر بقشره بالكمية اللي الوصفة اللي بدك تعمليها بتحتاج...يعني وصفة اليوم بدها 3 موزات بتحطي 3 موزات بكيس بالفريزر بقشرهم ورح يصير لونها اسود على الآخر...معلش...لما بدك تستعمليها بالوصفة بتطلعيها من الفريزر وبتخليها تسيح وبتقصي طرفها وبتطلعي الموزة ورح تكون طرية ومستوية ولونها عادي (يعني مش اسود) بس على بيج وهو المطلوب بوصفات الحلو لاته الموز المستوي افضل كتييييير...

مفن الموز
المقادير:
للمفن:
1/2 1 كوب طحين
ملعقة صغيرة كربونات
ملعقة صغيرة بيكنج باودر
1/2 ملعقة صغيرة ملح
3 موزات وسط مهروسة (مستوية)
3/4 كوب سكر
بيضة
2 ملعقة صغيرة فانيلا
1/3 كوب زبدة
للوجة:
1/3 كوب سكر بني فاتح
2 ملعقة طعام طحين
1/8 ملعقة صغيرة قرفة
ملعقة طعام زبدة

الطريقة:
قاعدة لاي وصفة مفن: تخلط المكونات الجافة لوحدها والسائلة لوحدها ثم تضاف السائلة للجافة وتحرك بملعقة خشب فقط لتختلط المواد ببعضها وتصب معا ومعلش اذا كان فيه كباتيل...زيادة التحريك بيخلي المفن تصير كب كيك او يابسة وهادا وقتها مش مفن...

نخلط مكونات الوجه معا ونتركها جانبا
تخلط الطحين والكربونات والبيكنغ باودر
يخلط السكر والزبدة والبيض والفانيلا والموز معا
تضاف المواد السائلة للجافة وتحرك بملعقة خشب وتوزع على قوالب المفن المبطنة بورق (حوالي 12- 14 مفن حسب حجم القالب)
توزع مكونات الوجه المفروكة معا على زجة كل حبة
تخبز على 175 من 15- 20 دقيقة لتجتاز اختيار عود الاسنان
تبرد على سلك معدني...وصحتين

رح يحبوها الصغار كتييير...كونوا على ثقة!!!




Saturday, September 7, 2013

قالب البراونيز بصوص الكراميل والجناش

ملاحظة...البوست كان مكتوب امبارح وفكرت حالي طلعته قبل ما اطلع من البيت..عذرا الاخبار بايتة فبه..هههههه


جمعة مباركة للجميع ويجعل ايامكم هنا وسعادة...اتمنى تكونوا صمدتوا اول اسبوع مدارس (مش من ناحية الدراسة) يس من ناحية الطلبات والاحتياجات والتجليد وغيره...احنا ما لحقنا نداوم الا بيبعتولنا انه يومين عطلة (الاحد والاثنين) لانه في تدريب معلمين...الولاد طاير عقلهم...يعني ما لحقوا تزهقوا؟!! ولسه الدراسة مش بالهالقوة!! جيل غريب!!! ما علينا...يوم آخر للاستعداد للذهاب للمزرعة للاستفادة من اواخر الصيف بالسباحة... من الصبح صحيت وقررت اني اعمل مجدرة (سلطان بيحبها كتتيييير) وخاصة مع سلطة ناعمة ولبن (هيك الطلب كان)...وكان عندي 3 ارغفة خبز تشيباتا بايتتين فقررت اعملهم خبز فرنسي (ما اله علاقة بالمجدرة) بس امبارح كنت عاملة ستيك وزاد شوي فقلت جنب الستيك...وعملت بوشار وحضرت مكسرات واغراض السلطة وبراونيز من امبارح (اجو صاحبات ياسمين بعد المدرسة وانبسطوا سوا وكنت عاملتلهم بيتزا وسلطة معكرونة وبوشار وبراونيز) البيتزا ما شاء الله طارت وكنت مخلية شوي النا للعشا بس ما تعشينا ففطور اليوم بيتزا (آه على الفطور :) ) وزادت عجينة طلعت قرص زعتر وجبنة برضه للفطور...وحضرت غدا الاستاذ هارون وبهيك بنكون ان شاء الله مستعدين للروحة خلال ساعة ان شاء الله..

هادا الاسبوع ما لحقت اخبز اشي مشان درس المخبوزات لاني بحب احط الخطوات بالتفصيل (يعني باعتبار انه درس) بس بوعدكم الاسبوع الجاي ان شاء الله يكون فيه درسين للتعويض ونوعين رائعين من الخبز...

اليوم طبق حلو تاني وهو قالب البراونيز بصوص الكراميل والجناش...
قالب البراونيز بصوص الكراميل والجناش
المقادير:
2/3 كوب زبدة بحرارة الغرفة
1/4 1 كوب سكر
1/2 كوب شراب الذرة المركز (الشفاف)
2 بيضة
2 ملعقة صغيرة فانيلا
1/4 1 كوب طحين
1/2 كوب كاكاو
1/2 ملعقة صغيرة ملح
3 ملاعق طعام حليب سائل
كوب جوز مفروم او اي نوع مكسراي تفضليه او قطع شوكولاتة اذا بدك تدمري الموضوع :)

للجناش:
كوب كريما سائلة
كوب شوكولاتة مفرومة

للوجة:
صوص كراميل الوصفة بالانجليزي على المدونة فقط اضغطي فوق الاسم
جوز مفروم

الطريقة:
تخفق الزبدة والسكر لتصبح خفيفة القوام
يضاف البيض واحدة كل مرة مع الخفق ثم الفانيلا
يضاف شراب الذرة
تخلط المواد الجافة وتضاف بالتناوب مع الحليب
توضع العجينة في قالب التشيز كيك المدهون على حرارة 160 من 30- 40 دقيقة (تكون الجوانب جامدة والوسط ناشف ولكن اذا غرزت فيه عود اسنان يخرج بعض الفتات وهو المطلوب في البراونيز مش مثل الكيك)
تفك من القالب وتترك لتبرد على سلك معدني
نعمل الجناش بتسخين الكريما لتبدأ اطرافها بالغليان الخفيف من الجوانب
تضاف فوق الشوكولاتة وتحرك لتذوب تماما
تصب فوق البراونيز بعد ان تبرد
تزين بصوص الكراميل والجوز المفروم والف صحة وهنا



Wednesday, September 4, 2013

كعكة الليمون والاناناس

اليوم يوم الحلو العالمي...مش حقيقي بس في بيتي على الاقل...اليوم كان عندي درس حلو وكان حلو كتير الحمدلله بمجموعة مميزة ورائعة من السيدات...عملنا كعكة البقلاوة


وفطيرة التفاح بالجبنة بصوص الكراميل



وتشيز كيك الكرز الطازج


وبسكوت زبدة الفستق الرخامي بالشوكولاتة


كان الحمدلله كله ممتاز وزاكي...وعشان اكمل اليوم الحلو قررت انه البوست التاني يكون طبق حلو من ضمن سلسة الاطباق الحرة...
كيكة سهلة كتير وباستخدام خليط الكيك الجاهز بطعم الليمون

كعكة الليمون والاناناس
المقادير:
باكيت خليط كيك الليمون (جاف)
4 بيضات
2 ملعقة صغيرة فانيلا
بشر ليمونة
علبة اناناس كبيرة مطحونة على الفود بروسسر مع ماءها 
1/2 كوب زيت
1/4 كوب سكر

للوجة:
كوب سكر ناعم منخول
2 ملعقة طعام من ماء الاناناس
ملعقة طعام عصير ليمون

الطريقة:
يخلط خليط الكيك مع البيض والفانيلا والزيت والسكر  ومقدار كوب من الاناناس المطحون بماؤه
يوضع في القالب المدهون ويخبز على 175 ليجتاز اختبار فحص الكيك (عود اسنان يغرز في منتصف الكيك بعد ان نبدأبشم رائحتها بالفرن ليخرج جاف)
تقلب الكيك على سلك معدني وتترك لتبرد تماما
يصفى بقية الاناناس جيدا من الماء
لعمل الجليز يخاط كوب السكر بملعقة عصير ليمون وملعقتين من ماء الاناناس ونتخلص من الباقي
يوزع على السطح وتزين بالاناناس المصفى
وتبرد في الثلاجة 3 ساعات قبل التقديم
وصحتين




ساندويشات البطاطا المقلية بالجرجير والجبنة

من احلى الاشياء في حياتي هي اصدقائي...امبارح زارتني صاحبتي والي زمان مش شايفتها وضلينا نحكي نحكي..ومرق الوقت اوام اوام وجد ما كنت بدي اياها تروح...وقتها خطر على بالنا احنا التنتين اديش مرات الواحد بينسى مقدار السعادة اللي بدخلوها اصدقاؤه على حياته مع معمعة الحياة اليومية وبس يقعد معهم ويشوفهم وقتها بيحس اديش انه مفتقد اشي مهم في حياته...كمان كم ساعة عندي درس طبخ وفي ناس من الحضور صاروا اصدقاء اعزاء وناس جداد لسة رح اتعرف عليهم لاول مرة شخصي...هادي من الاشياء اللي بحبها في دروس الطبخ انها اديش اضافتلي اصدقاء ومعلومات كمان لانه كل ست من الحاضرات عندها معلومة واشي تضيفلي اياه....يعني واحدة من الصبايا (ياسمين...شكرا الك كتير) خبرتنا عن تشييك استواء الستيك ولقيت هادا الفيديو ليبين المعلومة الكم اوضح

امبارح لاني انشغلت بصاحبتي وواجباتي المنزلية واتجاه اهلي لانه امي لسة تعبانة فما قدرت اني اكتب الموضوع اللي كنت حابة اشارككم فيه وعشان هيك اليوم ان شاء الله رح يكون في موضوعين للتعويض..

من سلسلة من البواقي اكلة جديدة...اذا انتو كنتوا زيي وبتحبوا البطاطا المقلية فانتوا برضه زيي بتميلوا انكم تقلوا كميات اكبر من اللي راح تاكلوها...وزكاوة البطاطا المقلية انها تتاكل سخنة وطازجة بس من الممكن انك تستفيدي من الزيادة بطريقة تانية ولذيذة بساندويشات بطاطا مع الجبنة والجرجير...بترجعني الفكرة لايام الجامعة وكيف كنا نحب ساندويشات البطاطا بالكاتشب والمايونيز واللي كانت من ازكى الساندويشات..ساندويشة البطاطا اللي بحكيلكم عنها يمكن اخف شوي لانه مافي مايونيز بس الحقيقة  في جبنة وبعزي حالي انه برضه الجرجير اضافة صحية للساندويشة...

ساندويشات البطاطا المقلية بالجرجير والجبنة
المقادير:
خبز توست
بطاطا مقلية (انا استعملت زيادة كانوا من الغداء
كاتشب
جرجير ورق كامل
شرائح جبنة موزريلا او كشكوان
زبدة



الطريقة:
نضع حوالي 1/2 ملعقة طعام زبدة في مقلاة غير لاصقة ونسيحها على نار متوسطة
نضع شريحة توست
نصف حبات البطاطا
كاتشب
جرجير
جبنة


قطعة توست تانية ونضغطها قليلا لنساعة في تسييح الجبنة والتصاق الساندويشة ببعضها ونتركها لتحمر من الجهة السفلية ونقلبها ونتركها لتأخذ لون من الجهة الاخرى

وتقدم والف صحة






Monday, September 2, 2013

صحنك الجانبي...الاسباجيتي بالزيتون الاخضر والقرشلة

الصيف بدا ولا شو يا جماعة؟!! الحمد لله على نعمة الطقس المنيح اللي كان برمضان بس هلأ الجو عم بيكون حار خلال النهار كتييير...يمكن لاتي بركض من اشي لاشي...وعشان هيك اليوم ما رح اطول بالبوست...رح ادخل بالموضوع دغري ومتل ما وعدتكن بالصحن الجانبي من المعكرونة بالزيتون الاخضر والقرشلة...طبق لذيذ كتير من مارثا ستيوات وانا بحبه لانه خفيف (من غير كريما) وكمان طبق جانبي سريع...

الاسباجيتي بالزيتون الاخضر والقرشلة
المقادير:
علبة اسباجيتي او لينغوني (الارفع من الفتتوتشيني) مسلوقة ومصفاة
كوب قرشلة ناعمة
1/4 كوب زيت زيتون
كوب زيتون اخضر نوع جيد (مش الاسباني او المعلب) النوع اللي بتحبي تاكليه مع لبنة مثلا او كبيس البيت
3 سن ثوم مدقوق
ملعقة صغيرة زعتر ناشف (اوريغنو)
1/3 كوب بارمزان مبشورة

الطريقة:
يوضع الزيت في مقلاة عميقة وواسعة او طنجرة
يضاف الثوم ويقلب لتظهر رائحته وبدون لون
تضاف بقية المقادير ما عدا الجبنة وتقلب من 1-2 دقيقة
تضاف المعكرونة ويقلب لتختلط القرشلة بالزيتون والمعكرونة
تضاف الجبنة وتقدم
وصحتين...

اسهل من هيك عبث...




Sunday, September 1, 2013

السمسمية

المفروض العطلة يوم واحد...صح؟ غبت يومين مع اعتذاري بسبب انشغالي بمرض ماما...ان شاء الله تصير احسن قريب...الاشي الوحيد اللي ما امشينا على الخطة فيه هو من البواقي اكلة جديدة بتمنى اعوضها الكم قريب...

مش عارفة اديش ممكن يتحمل الواحد توتر هالايام مع الجو العام والضغوطات المختلفة وبعرف انه انا شخصيا احسن من غيري الف مرة بس والله بحس حالي بده يصيبني انهيار عصبي مع كل اشي بصير بالاضافة الى المسؤوليات اليومية والقصص الغير متوقعة في حياة كل واحد فينا...يعني قبل كم يوم راح نهاري وانا بدور على اشي ضايع...قلبت البيت كله (وهو اشي ما بنسرق...يعني ما اله قيمة مادية ابدا) ولهلأ وبعد كل المحاولات ما لقيته وبعرف اني لما خلص اضطر اني ابدله رح الاقيه...اللي بزعل انه جد ما كان عندي دقيقة حتى اضيعها وضاع يوم كامل مما سببلي مشاكل واضطريت اني ما انام عشان انجز اشياء كان لابد من انجازها...بتصير...وعلى رأي المثل الاجنبي When it rains...it pours

بعدها قررت اني احاول آخد الامور ببساطة ويوم بيوم عشان صحتي العقلية!!! ههههه يعني اذا بستمر هيك ممكن...في مجال يعني اني اصير في المشمش!!!! فهادا تحذير النا كلنا انا نهدي شوي وشو يعني اذا هادا بده يجلد كتب وهادي بدها ادوات مدرسية ناقصة ولازم تروحي على المكتبة وبالمرة تمري على الخياط ليقصر بنطلوات المدرسة الجديدة وتبع النظارات لانه النظارة انكسرت وفي غسيل بالغسالة واشياء بدها كوي وكيكة بالفرن وبيبي ماسك بفستانك بشد فيه بده شوية اهتمام وانت على التلفون بتنسقي مشان درس الطبخ بعد يومين وبتكتبي قائمة بلوازم البيت وبتفكري شو وصفة المدونة بكرة!!!! لحظة !!! لازم شوية نفس...شهييييق...زفيييير!!!! احسن؟!!!آه احسن...

المهم وبعد كل هاد الكلام...اليوم قررت اعمل سمسمية من باب اكلة او حلو قديم واله تاريخ وذكريات وكمان سلطان ابو الشوكولاتة بس وما في بعدها حلو بحبها كتير...غريب بس منيح..تغيير عن الشوكولاته....وبعترف اني وانا صغيرة ما كنت احبها ابدا الا اني مثل كتير ناس تغيرت وصرت من جماعة السمسمية...سهلة كتير بس اهم شي هو الانتباه والعمل بسرعة فيها عشان تزبط...

السمسمية
المقادير:
كوب سمسم غير محمص
3/4 كوب سكر
3 ملاعق طعام عسل

الطريقة:
نحضر ورقتين خبز مدهونين بالقليل من الزيت
يحمص السمسم في مقلاة على نار متوسطة مع التقليب المستمر (عشان بنحرق بسرعة) ويرفع
يذاب السكر والعسل حتى يذوب تماما ويبدأ بالغليان 
يضاف السمسم ويحرك بسرعة (وهنا يجب العمل بسرعة) يفرد السمسم بالعسل على واحدة من الورقتين ويغطى بالاخرى ويفرد بالشوبك (النشابة) للسماكة المرغوبة وبحذر لانه ساخن جدا وممكن يلسع اصابعك من فوق الورق
ترفع الورقة وتقسم وهي ساخنة بسكين مدهونة بالزيت وتترك لتبرد تماما
عندها يمكن تكسيرها عند حدود السكين ويمكن تغليفها لتقدم كهدية او توضع في صحن للتقديم

والف صحة وهنا...

غداء اليوم: دجاج مطفى بالليمون والثوم ومعكرونة اسباجيتي بالزيتون (الوصفة غدا ان شاء الله من ضمن سلسلة طبقك الجانبي) وسلطة