Thursday, August 29, 2013

اصنعي في بيتك.. برغر الدجاج...

صوتي راح كمان مرة هاي السنة...شو القصة؟ هو يعني مش انه مش طالع بالمرة بس بيشحط...ولانه مش طالع ما رح احكي كتير !!!! ههههه...المهم الاولاد راحوا على المدرسة اليوم وامبارح خلصت تجليد كل كتب الفصل الاول وبعض الدفاتر ...اليوم اكيد بيجوا بطلبات دفاتر جديدة.....يعني مش قلتلكم مسلسل تجليد رح يمتد لاسبوع على الاقل...

اليوم كان يوم تسوق صباحي...لبيتي وبيت اهلي لانه لسه امي تعبانة...فما كانت رحلة تسوق سهلة لبيتين ومعي مستر هارون...بس مشي الحال الحمدلله...هلأ بما انه بدت المدارس رح اصير اشارككم بوصفات مناسبة لفطور صباحي او عشا او ساندويشات للمدرسة ابتداءا من الاسبوع الجاي ان شاء الله...اليوم رح يكون وصفة من ضمن اصنعي في بيتك وهو برغر الدجاج...يعني اعمليه انت بدل اللي بره احسن بالف مرة وازكى وانظف وعارفة شو فيه وسهل كتييير..وممكن يكون احلى ساندويشة للمدرسة...انا هيك بعمل...بزودهم حبتين لتاني يوم للاولاد على المدرسة...

برغر الدجاج
المقادير:
4 صدور دجاج مطحونة على مطحنة الطعام او بماكنة اللحمة
2 ملعقة طعام صوص باربكيو
3/4 كوب بقسماط
ملعقة صغيرة زعتر وريحان ناشف (1/2 ملعقة صغيرة من كل نوع)
بصلة صغيرة مفرومة ناعم
سن ثوم كبير مدقوق
1/2 ملعقة صغيرة بابريكا
رشة فلفل اسود
ملح

الطريقة:
تخلط كل المقادير معا ونعملها بشكل اقراص بغر بالحجم الذي تريدين...ممكن ميني وممكن عادي...
وممكن انه يتغطس بالطحين والبيض المخفوق والبقسماط لو حبيتي...
انا عملته عادي بالمقلى بمعلقتين كبار زيت زيتون وحمرته على الوجهين ليستوي...وممكن يندهن بالزيت وينشوى ليكون صحي اكثر...
ويقدم على رغيف برغر مع صوص الرانش او المايونيز والخس والبندورة او المخلل...مثل ما بتفضلوا عيلتك..وصحتين...


الغداء اليوم...تشيكن الا سلطان...لانه طلبه من امبارح...

Wednesday, August 28, 2013

اكلة من ايام زمان: البصارة وطبقنا الحر..كعكة البوظة بالارز المنفوش والنيوتيلا

اولا آسفة اني ما حطيت وصفة امبارح بس الامور مكركبة شوي بمرض ماما (امي عندها تكلس باحد اعصاب الاذن الداخلية وبسببلها هادا الموضوع دوخة شديدة بتبطل تقدر تقوم ابدا من السرير) وما في اله علاج ...الها بتاخد نفس الدواء حوالي 20 سنة...الله يعينها والحمدلله على كل حال ...ومحسوبتكم كمان مفلوزة والبيبي مفلوز...وهادا الاشي ما بيساعد ابدا والله يعين..

وعلى صعيد آخر...كيف وديتوا الاولاد على المدرسة اليوم؟ انا الاولاد مسافرين على انطاليا وبرجعوا اليوم المسا ان شاء الله...بس المدرسة اتصلت تسألني ليش ما داوموا؟ استغربت من التلفون وكانه كان نوع من التنبيه الادبي انه احترموا الدوام يا جماعة!!! خاصة انه الرد علي لما سألت كيف كان الدوام واجوا الطلاب ولا لأ ؟ قالتلي: طبعا دزام عادي وحصص ومش عارفة شو.... مع اني لما مريت على السوبرماركت وانا راجعة من عند امي وهو مقابل مدرسة حكومية سألته كيف الدوام اليوم ؟ قاللي : صوري؟!!! طيب مين اصدق؟!!! على كل حال بس ييجوا اللولاد رح اخليهم يتصلوا بزملاؤهم لمعرفة حقيقة الامر :)
ما تفهموني غلط بس الدوام هيك بآخر الاسبوع لا اله طعم ولا معنى من وجهة نظري...زمان كنا ندوام هيك بمدارس الحكومة عشان استلام الكتب بس هلأ بالمدارس الخاصة الكتب مسلمة من زمان وما تقنعوني انهم رح يبدوا دراسة هاليومين...

اليوم للتعويض عن امبارح رح نحط وصفتين حسب الجدول تبعنا...واحدة عن اكلة وحكاية من ايام زمان والتانية هي الطبق الحر وهو كعكة الايس كريم بالارز المنفوش والنيوتيلا..(عملتها لعيد ميلاد خالد ومع انه عددنا قليل بس طارت) صحتين...

اكلتنا من ايام زمان هي البصارة ...والبصارم من الاكلات المفيدة والقديمة واللي بتنعمل بمصر كتير بس طريقة اهل فلسطين بتختلف شوي عن الطريقة المصرية بعملها والتنتين زاكيين كتير بس الطعم مختلف ...ان شاء الله بنهمل البصارة المصرية بوقت تاني...ما فيش حكاية كتيير كبيرة للبصارة الا انها من الاكلات اللي برضة اعتمدت على الحبوب (الفول المجروش) والملوخية الناشفة باعتبار انه ما كان فيه تلاجات زمان ولا ملوخية مفرزة...

البصارة
المقادير:
كوب فول مجروش
1/2 كوب ملوخية ناشفة مفروكة ناعم من خلال منخل (في ناس بيحبوا يحطوا ملوخية اكثراو اقل...بصير)
4-5 سن ثوم مدقوق
ملح، فلفل اسود
زيت زيتون (حوالي 1/4 كوب...ممكن اكتر اذا بتحبوا الطعم)
عصير ليمون للتقديم

الطريقة:
يسلق الفول المجروش بالماء حتى يصبح طري جدا (دايب بمعنى آخر)
يطحن على الخلاط مع بعض ماء السلق ليصبح مثل الحمص المطحون ناعم من ناحية السماكة
يعاد للقدر على النار وتضاف الملوخية ويملح ويرش بالفلفل الاسود وتطبخ على نار هادئة حوالي 5 دقائق. اذا كانت سميكة كتير يضاف القليل من الماء واذا كانت طرية تترك لتسمك (مثل قوام الحراق اصبعه لانها ستسمك لما تبرد)
يسخن زيت الزيتون في مقلاة ويقلب الثوم وتوضع فوق البصارة
تسكب في صحون وتقدم باردة مع الشطة والجرجير والفجل والزيتون وعصير الليمون وخبز ساخن والف صحة



اما كعكة البوظة بالارز المنفوش والنيوتيلا فهي ولا اسهل...


 كعكة البوظة بالارز المنفوش والنيوتيلا
المقادير:
5 اكواب ارز منفوش
2/3 1 كوب نيوتيلا
علبتين بوظة سعة الليتر للواحدة (انا استعملت فانيلا ممكن استعمال اي نوع بتحبيه ملائم للشوكولاتة) (اخرجيها من الفريزر فور بداية العمل لتصبح طرية قليلا)
صوص شوكولاته للوجة

الطريقة:
يخلط الارز المنفوش بالنيوتيلا (انا ما احتجت احط النيوتيلا بالمايكرويف شوي لانه الدنيا شوب) بس بدك الشوكولاتة تكون شوي طرية
يبطن قالب التشيز كيك بورق الخبز
يرص 2/3 كمية النيوتيلا في قاع القالب
تخلط بقية النيوتيلا بالبوظة وترص فوق الطبقة الاولى
يلف القالب بالنايلون ويوضع في الفريزر 2 ساعة على الاقل
ويقلب القالب لتكون طبقة الارز المنفوش بالنيوتيلا فوق وتزين بصوص الشوكولاتة وحبة فراولة
وتقدم فورا ...






الغداء: امبارح ما طبخت من قد ما انا تعبانة واليوم بوريتو...كتيير زاكي من المطبخ المكسيكي...
مسلسل التجليد: 11 كتاب لسلطان خلصوا لهلأ...كان لازم اليوم كله يكون خالص ...منشوف من هون لآخر النهار..




Monday, August 26, 2013

الدرس الرابع في المخبوزات: الخبز الفرنسي

ما بدي ابدا البوست بالشكوى بس مريضة وحلقي بيوجعني وعيني كانها ملتهبة شوي (شحاد؟؟!!! pink eye جد ليش سموه شحاد؟ شو هالاسم؟ الحمد لله مش كتير بس ماشي الحال...  وزوجي كمان مريض والله يعين...

اليوم الدرس الرابع في المخبوزات ورح نغطي فيه الخبز الفرنسي...خطوة خطوة...في طرق كتيير وهو مش اشي ما بده وقت بس بستاهل لانه الريحة لا تقاوم...

الخبز الفرنسي (الكمية لرغيفين)
المقادير:
6 اكواب طحين
ملعقة كبيرة خميرة
1/2 1 ملعقة صغيرة ملح
2 كوب ماء دافئ

بس... :)

الطريقة:
نأخذ 2 كوب طحين والماء والخميرة ونحركهم معا (ستكون لينة جدا) في العجانة ونتركهم ليخمروا 20 دقيقة وهي مغطاة


نضيف الملح ونبدأ باضافة الطحين بالتدريج لنحصل على عجينة متماسكة (ليست طرية) وهي صورة كيف طرية


وهيها اكثر تماسكا وبدت تبعد عن جوانب الوعاء


وبدها عجن بين 10- 12 دقيقة بالعجتنة و15 باليد (فكروا بالموضوع رياضة)
وضعيها في وعاء مدهون بالقليل من الزيت

ونغطيها لتخمر ساعة ليتضاعف حجمها


هلأ بدكم تركزوا معي شوي...
بطوي الجهة اليمين للنص مثل الصورة


بعدين بطوي الجهة الشمال للنصف

بعدين الامام للنصف والخلف بتصير مثل المربع




ونتركها تخمر 1/2 ساعة ثم نخرجها  على سطح مرشوش بالطحين ونقطعها الى نصفين او 3 اجزاء حسب حجم الرغيف المطلوب ونفرد القطعة الواحة باليد او الشوبك الى مستطيل (مثل الصورة)


نطوي الجهة الطويلة للوسط ثم نطوي الباقي لعمل رول ونغلقة جيدا ثم بطرف اليد (مثل الصورة) نقوم بعمل خط من النصف ثم نرص الجانبين المقابلين معا ونضغط (مثل الصورة لاغلاقها جيدا)


ونضعها اما في صينية خاصة بالخبز الفرنسي او في صينية مبطنة بورق الخبز

 نغطيها ونتركها لتخمر 1/2 ساعة ونحمي الفرن حوالي 10 دقائق قبل الخبز على اعلى حرارة
بسكين حادة نعمل خطوط مائلة فوق السطح ونرشها بالماء قليلا لعمل (كرست) ونضعها بالفرن لتبدأ بالاحمرار من 20-25 دقيقة (ممكن دهنها بيض للحصول على اللمعة بس انا ما بحب)




 وهي شكله من الداخل...


والف صحة وعافية...

حكمة اليوم بتقول..."الخبز الحاف بربي او بيعرض الكتاف"...جربوا الخبز الفرنسي حاف او مع زيت زيتون وخل بلسامك ورشة ملح وفلفل اسود...رائع...

مسلسل التجليد: خلصت 10 كتب كمان لياسمين (هدول كتب الفصل الاول بس) :(
غداء اليوم: برغر الدجاج المقرمش بالرانش...رح يكون بوصفة قريبة ان شاء الله...

Sunday, August 25, 2013

فرايز البيتزا وكركدية بالرازبري وطريقة حفظ الاعشاب الطازجة...

يوم حافل جدا او خليني اقول اسبوع حافل جدا بيستناني ان شاء الله...بتمنى انه الله يقدرني واقوم بكل واجباتي العائلية والعملية...قائمة الاعمال لهذا الاسبوع الخرافي...
- تجليد كتب ياسمين وسلطان...تم تجليد 10 كتب لياسمين
- عيد ميلاد زوجي العزيز اليوم
- درسين طبخ خصوصي
- اجتماع عمل
- كعكة عيد ميلاد
- الاهتمام بامور بيت اهلي  اليومية من طبخ وتنظيف لانه امي مريضة (ادعولها بالشفاء الله يخليكم)
- الاهتمام بامور بيتي
- وطبعا المدونة :)

وكل هاد بدون الاشياء الغير متوقعة والي بتطلع من هون وهون وابو الشباب هارون اللي بده كتير اهتمام...الله يقدرنا ويعينا جميعا...

اليوم رح نحكي عن صحن جانبي سهل كتييير وبحبوه الاولاد ولطيف للعشاء او جنب برغر...وهو بطاطا او فرايز البيتزا


فرايز البيتزا
المقادير:

كمية من الفرايز الجاهزة المفرزة اما مقلية او مشوية بالفرن الى ان تحمر قليلا
كمية مناسبة من صوص البيتزا المفضلة لديك
جبنة موزريلا مبشورة

الطريقة:
نضع البطاطا في صحن للفرن
نسخن صوص البيتزا ونوزعها على البطاطا
نرش الجبنة على الوجة
نضعها في الفرن من 5-7 دقائق
وتقدم ساخنة


اما العصير...فهو الكركدية واللي لازم اعترف اني ما كنت احبه ابدا لحد ما رحت على العقبة بشغلي السابق وضيفوني في المكتب كركدية  وكان بارد ولذيذ بحر العقبة...وسألت كيف الطعم زاكي هيك فقاللي المراسل اني اضيف نكهة التوتي فروتي  واللي ما حالفني الحظ الاقيها فقررت اني استعمل شراب الرازبري المتوفر عند الجراندين والتمر الهندي بالسوبرماركتات الكبيرة

كركدية بالرازبري
المقادير:
كمية (حوالي كوب من اوراق الكركديه الجافة) مغسولة
حوالي 3 كوب ماء مغلي
كوب سكر (والمزيد للتحلية اكثر فيما بعد)
1/2- 3/4 كوب رازبري شراب مركز

الطريقة:
ينقع الكركدية بالماء الساخن بعد اذابة السكر فيه قبل بليلة من التقديم
يصفي ونتذوق لاضافة الماء والسكر حسب مقدار التركيز الذي نريد
نضيف الرازبيري ويبرد تماما ويقدم فوق مكعبات الثلج
وصحتين


نصيحة اليوم هي طريقة الحفظ الامثل للاهشاب لمدة تزيد عن اسبوع بحالة ممتازة...
نقي النعنع والبقدونس والكزبرة مثل ما بتحبي...بللي فوط المطبخ (اللي مثل الكلينكس رول) بالماء
رتبي الاعشاب كل نوع طبقة وعليه ورقتين مبللين ثم نوع تاني وهكذا بتبروير كبير واغلقيه واحتفظي به في الثلاجة...حاولي في حالة الاعشاب التانية مثل الشبت يكون في تبروير لحاله...طريقة ممتازة ومجربة والله يرضى على امي ويشفيها لانها علمتني اياها....




غدا اليوم...برة لانه عيد ميلاد خالد...كل سنة وانت سالم يا زوجي العزيز...




Friday, August 23, 2013

سلسلة من البواقي اكلة جديدة...الارز الصيني المقلي

اليوم ما رح ابربر كتيير وعد...بس خلينا تستعرض اللي غطيناه الاسبوع الماضي:

- اكلة وحكاية من ايام زمان.... حبة الرمانة
- المخبوزات...خبز الشواية
- الاكل الجانبي... سموذي البطيخ والخبز الفرنسي بالجبنة الزرقاء
- الطبق الحر...كعكة الدراق
- اصنعي في بيتك... جرانولا الكاجو وجوز الهند

اما الموضوع الاخير هادا الاسبوع فهو تحويل البواقي لاكلة جديدة... اليوم رح نعمل الفرايد رايس (الارز المقلي الصيني) من بواقي الارز قبل بيوم...وفي الواقع والاصل انه ينعمل بارز بايت...فاذا زاد عندك صحن منيح ارز ابيض من قبل بيوم...اعملي الفرايد رايس وشخصي عليهم...



الارز المقلي (الفرايد رايس)
المقادير:
2-3 كوب ارز مطبوخ بايت دافئ
2 ملعقة كبيرة زيت نباتي
بصلة متوسطة مقطعة جوانح او مفروم
3 سن ثوم مقطع شرائح
خضار مقطعة ( الخيارات هي: كوب جزر مفروم ، بازيلا مفرزة، فليفلة ملونة...اللي موجود عندك بشكل مناسب مع كمية الرز
1/2 1 -2 ملعقة طعام زيت سمسم 
3-5 ملاعق طعام صويا صوص
القليل من الملح ، فلفل اسود
2 بيض مقلي اومليت ومفروم (اختياري) انا ما حطيت اليوم
ملعقة طعام زبدة
ملاحظة: انا اضفت صدرين دجاج مقطع مكعبات 

الطريقة:

يوضع الزيت في مقلاة غير لاصقة كبيرة او الووك الصيني ويحمى ثم يضاف البصل ونحرك بسرعة
في حال استعمال الدجاج يضاف ويقلب ثم نضيف الثوم والخضار وتقلب كل الخضار لتستوي قليلا ثم يضاف الارز وتقلب ويضاف زيت السمسم والصويا صوص والبيض المفروم وتنهى بالزبدة وتقدم.



بالمناسبة...الغدا امبارح...فرايد رايس :) اليوم...على المزرعة ان شاء الله ومش طابخة :) برضه الراحة حلوة...بتمنالكم عطلة سعيدة وان شاء الله موعدي الاسبوع الجاي...يوم الاحد معكم لنكمل وصفاتنا وحكاياتنا...



Thursday, August 22, 2013

صحنك الجانبي...خبز ثوم بالجبنة الزرقاء وسموذي البطيخ والموز

كتير حلو يشعر الانسان انه لحياته معنى...ما تفهموني غلط هلأ اكيد لكل حياة معنى بس مش كلنا بنشعر بهادا الاشي..انا من الناس اللي شعوري اتجاه هادا الموضوع زي اليويو...يعني مرة هيك ومرة هيك...ومن الاشياء اللي بتشعرني بمعنى حياتي (وهي اشياء كتيير) بس منها الشعور بالانجاز وانو لما اكون كاتبة قائمة باشياء لازم اعملها اعمل (شطبة هون وصح هناك)..واشوفها عم تتقلص ادام عيوني واشوف الانجازات على ارض الواقع...

ومن النجازات اللي بحس انها غيرت حياتي...احم..."تغير تذوقي او خليني اقول تطور حاسة التذوق عندي على مدى السنين"...شو هالانجاز؟!!! قصدي انه على مدى السنين في اشياء كتيير ما كنت احبها وبعدين اكتشفت انها زاكية كتيير...ليش ما كنت احبها؟ بس هو على ما اعتقد النضج العقلي وفي حالتي "التذوقي" اذا في نضج من هاد النوع!!!

من الاشياء اللي ابدا ما كنت احبها هي الجبنة الزرقاء "المعفنة" مثل ما بنقول عنها...كنت اوانا صغيرة استغرب كبف ابوي بحب هالجبنة...معفنة يا عالم؟!!! كيف!!! وقصة التحول كانت نوع من التضحية عملته لما كنت مسافرة مع اهلي ودخلنا مطعم بريطاني...كنا كتير جوعانين وبصراحة الاكل الانجليزي مش ازكى اكل في العالم...المهم قلنا باكل وجبة خفيفة وبنتعشى اشي منيح...انا طلبت شوربة واخوي الصغير (كان وقتها 13 سنة وكان نزق وعصبي ولساته ؟!!!) طلب سلطة بصوص الجبنة الزرقاء ..ولما اجى الاكل...وانا متحمسة لصحن الشوربة...صار الاستاذ مش عاجبة طلبه وعيونه متسمرة على صحن الشوربة ...ولاني بعرفه رح ينكد قررت اني ابادله وانا عم بحاول افكر كييييف بدي آكل الجبنة المعفنة (كان عمري 21 وقتها) وكانت المفاجئة!!! سلطة رهيبة!!! اكلت الصحن وبدي كمان...ومن يومها وانا من محبي الجبنة الزرقاء...وللامانة هي انواع..مثل الركفور والستلتون...

اليوم من سلسة طبقك الجانبي رح نعمل خبز بالثوم مع الجبنة الركفور (ماركة امبورغ ممتازة وسعرها ممتاز) وهاد الطبق السهل لعيون بيان...هي بتحب الجبنة الزرقاء كتيير...

خبز الثوم بالجبنة الركفور
المقادير:
رغيف خبز فرنسي مقطع بالطول الى نصفين
زبدة مذابة (حسب قديش يحبوا يكون دسم...وانا بحب الدسم بصراحة فاستعملت اصبع مذاب)
2 سن ثوم مدقوق
ملح
فلفل اسود
علبة جبنة امبورغ (ركفور الزرقاء) مفتتة
2 كوب جبنة موزريلا

الطريقة:
تخلط كل المقادير وتفرد على الخبز
تضاف الجبنة الموزريلا
توضع بالفرن بين 7-12 دقيقة لتسيح ويحمر الوجة..
تقطع وتقدم ساخنة مع المعكرونة


بالمناسبة...الخبز الفرنسي هو عمل بيتي...رح يكون بدرس المخبوزات الاسبوع القادم ان شاء الله...

اما سموذي البطيخ والموز فهو منعش جدا ومفيد وخفيف وطريقة ممتازة للاستفادة من البطيخ لانه الواحد بيجيب بطيخة كبيرة وبعديت هات يخلصها...

سموذي البطيخ والموز
المقادير:
1/2 2 كوب بطيخ مقطع مكعبات ومحطوط بالفريزر قبل 4 ساعات من الخلط
1/2 كوب ماء
عصرة 1/2 ليمونة صغيرة
موزة وسط

الطريقة:
كلة بالخلاط ويقدم فورا وصحتين..





Wednesday, August 21, 2013

لوحة سريعة وبتكلفة بسيطة...

قبل حوالي سنة ونص..ولما كنت حامل بمستر هارون...اخذت اجازة من الشغل (الدروس والطلبيات)...وكان عندي وقت فراغ كبير زجهته لحب تاني عندي وهو اي شئ متعلق بالفن والديكور ...ولاني شخص مهووسة (الى حد ما) باني اعمل او اجيب اشياء بسعر اقل فكنت بحاجة لتعليق لوحة في غرفة الضيوف وما بدي ادفع كتير...ولانه كان عندي وقت كنت وباستمرار بشوف افكار على المواقع المختلفة ومررت بمدونة لقيت فيها اشي عجبني وهو لوحة سهلة (حتى اللي ما بيعرف يرسم بيقدر يعملها) وضوت لمبة براسي (متذكرين كيف كان هادا الاشي نشوفة بالكرتون واحنا صغار؟!!!)

الصورة اللي شفتها كانت هاي




من مدونة http://www.onecreativehousewife.com

وما كزبتش خبر...رحت على هوم سنتر واشتريت لوحة كبيرة ب 12 دينار...ورحت على المكتبة وجبت الوان وفرشايات مدورة (مثل اسفنج مدورة) يمكن دفعت كمان 15 (بس تذكروا اني ما استخدمت كل الالوان...يعني لسة فيه منها لاستخدام آخر)... طبعا استخدمت الوان بتناسب المكان اللي عندي..

والنتيجة هي



الطريقة ممكن انكم تشوفوها على الرابط على المدونة
http://www.onecreativehousewife.com/2012/06/diy-contemporary-wall-art.html
ان شاء الله بدي اعمل كم مشروع تاني ببالي وبشارككم فيها...

اكلة وحكاية...حبة الرمانة

امبارح جابوا الاولاد كتب المدرسة...المنظر مرعب!!!!هههههه قصدي عدد الكتب للفصلين والدفاتر...وانا مش عم بحكي عن الدراسة...عم بحكي عن التجليد...بعرف كتير قالولي ليش بتجلدي؟ ودي على المكتبة...بس صرت شارية التجليد وخلص اظن انه عندي مشكلة بترك الكتب بايدين حد تاني؟هههه بس انا سريعة والرتابة مستواها جيد...مش بالتكة بس منيح وبعدين اوفر بصراحة...الخطة اني رح اوزع الكتب على ايام...اليوم رح اخصص جزء من طاولة السفرة للحفلة وابدأ وبخبركم شو بصير...لسة صراحة ما عديت الكتب...يا خسارة البنت اللي كانت عندي تساعدني قبل الموجودة عندي حاليا كانت عون كبير...مرة واحدة شافتني بجلد وزي العادة خصصت مكان لانهاء العملية على ايام...وطلعت مشوار عدة ساعات ورجعت لقيت المكان فاضي وكل شي مضبوب والكتب مجلدة كلها...جد حكمة اليوم
" ما بتعرف خيري لتجرب غيري"

وعلى سيرة الحكم القديمة والشعبية كانوا يقولوا انه الامثال ما تركت اشي وما قالته...والحقيقة انه فيه منه هالكلام ..مع اعتراضي على بعض الامثال الانهزامية من وجهة نظري واللي بتهبط العزايم..مثل شو...
امشي الحيط الحيط وقول يا رب الستر
الباب اللي بيجيك منه الريح...سده واستريح
لا تنام جنب القبور ولا تشوف منامات وحشة
...الخ

جد بحس انه بالرغم من انها بتزبط مرات بس بتشجع على عدم تقبل التحديات والمواقف الصعبة والبعد عن اي نوع من انواع المخاطرة اللي ممكن تكون لخطوة افضل...المهم انها بتزبط بحالات معينة بس برأيي....

ولانه عم نحكي على ايام زمان...اكلتنا التراثية اليوم (ولما بحكي تراثية بقول انها من ايام زمان وكانت ستي الله يرحمها تعملها)... واكيد في اكلات قديمة تانية وبحب انه اذا عندكم اكلة تبعتولي اياها وخبروني شو قصتها وبستضيفكم على المدونة...
اكلة اليوم هي اكلة قديمة من فلسطين برضة وكانت من الاكلات المغذية والسهلة والموفرة بحكم انه ايام زمان كانت الاحوال صعبة في فترات معينة خاصة وقت الحروب...كان ملك السفرة بدون منازع.....هو ....حزرتوا؟!!!....العدس....لانه رخيص وسهل التخزين ومليان بالفوائد وبديل عن البروتين الحيواني ووجبة متكاملة خاصة اذا اكله الواحد مع لبن وفيه بركة...بيت جدي ابو امي كان عندهم 11 ابن وابنة...ما شاء الله...يعني قبيلة بعرف هالايام...اكلة اليوم كانت تكفي الكل ويشبعوا منيح ويسحبوا منيح فيها....ما بعرف اذا اسمعتوا فيها بس هي "حبة الرمانة"

امي قالتلي انه زمان كانوا ما شاء الله لما يكون في شغل كتير بالبيت مثل الغسيل (انتوا متخيلين غسيل 13 بني آدم) وغسالة قديمة حوض واحد؟؟؟؟ او اذا جابوا ملوخية لينقوها (طبعا كانت على عيدان مش زي هلأ) او تعزيل البيت...كانت كل واحدة من خالاتي تستلم مهمة او يفرشوا حرام كبير (الحرام الاسود تبع الجيش) ما بعرف اذا بتعرفوه؟ ويقعدوا تحت الدالية وينقوا الملوخية ويضحكوا ويحكوا قصص ويتسلوا...وستي كانت تطبخلهم طنجرة كبيرة من حبة الرمانة وتوزعها على صحون...وانزل يلي بتنزل!!! هههههه
امي قالتلي كنا ناكل منيح ونضب الاكل ونكمل الشغل بعد الغدا مع كاسة شاي بالنعنع...صورة حلوة كتييير بتخيلها وببتسم على قديش كانت الحياة بسيطة واديش كانت السعادة بالعمل الجماعي والمشاركة والتعاون...سقى الله الايام الحلوة!!!!

وخلينا نشوف حبة الرمانة كيف بتنعمل لانه بيهمني انه هالاكلات ما تندثر...

حبة الرمانة
المقادير:
كوب عدس حب (بني) مغسول (طبعا لو ستي الله يرحمها تشوف المقادير بجوز تضحك على الكمية )
حبة باذنجان وسط الى صغيرة مقشرة ومقطعة مكعبات كبيرة
حبة رمان حامض معصورة (هلأ لما يكون فيه رمان طازج ممتاز وحاولي تفرزي منه بس اذا ما فيه البديل هو عصير ليمون وشوية دبس رمان)
2 ملعقة طعام طحين
2 ملعقة طعام ماء
3 سن ثوم مدقوق
1/4 كوب زيت زيتون
ملح
ملعقة كبيرة كمون

الطريقة:
يوضع العدس في طنجرة ويغمر بالماء ويضاف له الكمون ويسلق ختى يشارف على النضج
يضاف الباذنجان ونزيد القليل من الماء اذا احتاج الامر (مهم ما يكون فيه كتيير مي عشان بدنا اياها جامدة وتتغمس)
نترك العدس ليكمل نضجه ويذبل الباذنجان وينضج
نضيف الملح وعصير الرمان (او عصير الليمون ) ونتذوق (حموضتة لازم تكون قريبة من الحراق اصبعه)
نذيب الطحين والماء ويضاف ويقلب جيدا ليسمك (اذا ما كان سميك كويس زيدي طحين مذاب بالمي واذا سمك كتير ضيفي شوية مي)
نسخن الزيت في مقلاة ونضيف الثوم ونقلب ليصبح ذهبي ونضيفه للعدس (قدحة بالعامي)
ويسكب عادة في صحون اكل ويترك ليبرد وتقدم دافئة او باردة مع صحن مخللات وخبز سخن...
والف صحة وهنا...


الغداء امبارح كان: دجاج حلو حامض وارز...يخنة اللحم بالخل البلسامي وبطاطا مهروسة...نودلز تايلاندية بالجمبري...والكيكة...ملفيه بكسترد شراب القيقب (Maple Syrup) ....اليوم....بواقي :)

Tuesday, August 20, 2013

الدرس الثالث في المخبوزات: فطاير الشواية

من احلى الاوقات باليوم الي هو فترة الصبح بكير وبعد اذان الفجر والهدوء وصوت العصافير ونسائم الهوا الصباحية...في هادا الوقت بشعر اني في حالة "الانا"...يعني الوقت الي انا مش عم بعمل اشي لحد ولا حد بينق علي وعشان هيك بعمل فنجان هالنسكافية وبقعد ادام الكومبيوتر وببلش كتابة..مثل ما عم بعمل هلأ...كتير صايرة البلد ازمة وضجة زخاصة اذا الواحد عايش على شبه شارع رئيسي...ببدأ صوت السيارات وحتى الشاحنات من الساعة 7 ولسة بكرة تزمير باصات المدارس بس تبدأ المدرسة...اذا بتمشي من بيتي بس 100 م لجوة المنطقة وبعيد عن الشارع الفرق في الضجيج واضح...طبعا زمان هادا الحكي ما كان موجود والشارع كان هادي...بس وين في مكان هادي هالايام بعمان الا من رحم ربي...ومع ذلك بتضل عمان احب الاماكن الى قلبي....يعني لما كنت عايشة برة ما كنت اصدق وانا آجي اجازة...كنت لدرجة اني اول ما تنزل الطيارة اطلع من الشباك واقول اشتقت للتراب!!! وسط استهجان كتير من العرب المغتربين اللي كانوا معي برة...انه حد بيشتاق للتراب مقابل الخضار والزهور اللي برة...آه  وذرة تراب من الاردن بتساوى الدنيا...الله يديم علينا الامن والامان والاستقرار والمحبة بين قلوبنا ونضل بوعينا وصاحيين انه اللي عم بيصير حولينا درس كبير بتمنى نتعلم منه ومطب اكبر الله يبعدنا عنه...لازم نضل ايد واحدة بالرغم من كل اختلافات وجهات النظر ونفرجي العالم كله مين احنا وشو معدنا وانه احنا اهل وزي ما بقول المثل المصري واللي للاسف مش عم بيعملوا فيه هلأ " مصارين البطن بتتخانق بس عمره الدم ما يبقى مية"...الله يخليلي اياكم ويحميكم كلكم من كل شر وسوء ويلم شملنا ويوحد كلمتنا دايما....

طيب انفعلت شوي وخليني ارجع للمطبخ :)

اليوم درسنا الثالث في المخبوزات وكتير منكم اكيد بعرف هادي الوصفة ويمكن عملها بس حبيت اشارككم فيها عشان اللي ما بيعرف وخاصة الستات اللي دايما بيخافوا من موضوع الخبز لانه هادي العجينة ما بدها غير عجن وتشكيل والخبز بالشواية..نعم اليوم رح نعمل فطاير الشواية واللي اذا عملتيهم للاولاد بالمدرسة رح يحبوهم كتير وما بتاخد اكثر من 40 دقيقة من البداية الى لحظة الاكل وممكن 30 اذا ايديك ماخدة وعندك عجانة...

قبل ما انسى...غدانا اليوم ....اليوم عيد ميلاد بابا الله يعطيه الصحة والعافية فانا طابخة الغداء ورح اشارككم في الصور والاكلات قريب... :)

فطاير الشواية
المقادير:
3- 1/2 3 كوب طحين
قاعدة ذهبية في الخبز: ما بنحط كل الطحين في اي وصفة بنخلي دايما حوالي 1/2 كوب من المقدار للآخر لانه يمكن نحتاجه ويمكن لأ حسب نوع الطحين وحسب الطقس...
ملعقة كبيرة خميرة
ملعقة كبيرة بيكنج باودر
ملعقة كبيرة سكر
ملعقة صغيرة ملح
كوب لبن
1/2 كوب حليب ساخن شوي (لانه لما نخلطه مع اللبن رح يبرد وما بدنا السائل اللي بالعجينة يكون بارد عشان الخمير تشتغل)
1/4 كوب زيت

الطريقة:
تعجن كل المقادير معا وما فيها مي هادي العجينة..وتترك لتختمر من 1/4 الى 1/3 ساعة
تقطع دوائر بحجم كرة البنغ بونغ


بنحمي الشواية وبنحط من 3-4 كرات حسب كبر الشواية وبتركها من 3-4 دقائق وونشيك عليها ليكون لونها ذهبي...شوايتي حامية شوي.. وبيكون شكلها بس تخلص هيك

وبتحطيها في بشكير نظيف وبتغطيها لحتى تخلصي الكمية (هادي الوصفة جد سهلة كتييير وممتازة اذا ما عندك خبز في نص الليل (زي ما بنكتشف مرات انه خلص الخبز فاذا فيه طحين وخميرة ولبن ...انحلت!!!)


وبعدين بتفتحيها

وبتحشيها اللي بدك اياه من جبنة بيضاء الى حلوم مع بندورة وجرجير ونعنع الى لبنة ونعنع وزيتون او نيوتيلا زي ما سلطان طلب...

والف صحة وهنا


بترككم مع حكمة اليوم....

إذا أردت السلام للعالم يجب أن تؤسسه في بلدك
إذا أردت السلام في بلدك يجب أن تؤسسه في عائلتك
إذا أردت السلام في عائلتك يجب أن تؤسسه في نفسك
وإذا أردت السلام في نفسك اصلح جسدك وعقلك
مثل صيني قديم
الله يهدي البال ونكون كلنا بسلام داخلي وعائلي ومحلي وعالمي....جربوا الوصفة والف صحة وهنا...

Monday, August 19, 2013

موضوعنا الحر...الفواكه القديمة وحلول لاستعمالها وكعكة الدراق

قديش في منا بيشتري فواكة وكتير مرات اللي ما بيتاكل بيصير بحالة لا يمكن تقديمها او اكلها كفاكهة وطبعا كلنا ما بنحب انها تخرب وتنكب...فالحلول كتيرة ومتعددة ومنها:
- اذا الكمية كبيرة...فورا بيخطر على بالي مربى (حتى لو بالآخر طلع مرتبان بس...ولا ينكب)
- ممكن صوص في حالات الفراولة والتوت تقدم فوق اليوظة والكيك
- ممكن سموذي او ميلك شيك
- ممكن حشوة كيك او فطيرة مثل التفاح
- ممكن تنحط بالفريزر مثل الموز المستوي...مثل ما هو بقشرة وبس بدي اعمل مفن او كيك بطلعه وبسيحه وبقص طرف الموزة وبضغط على الطرف المقابل وكله بيطلع واحسن بكتير من الطازج لانه احلى في الطعم واسهل للهرس..ولما تفرزي الموز رح يصير كل القشرة لونها اسود بس عادي...ان شاء الله بفرجيكم كيف وبشارككم بوصفة رهيبة بالموز قريبا...
- ممكن سلطة فواكة
- وممكن على وجه الكيك...اليوم كان عندي 4 دراقات وضعهم شوي صعب ليتاكلوا كفاكهة وتم انقاذهم!!! احلى كيكة بالدراق وطارت بيوم واحد...راح منها لاهلي والنا وكمان للمزارع...

هلأ الدراق موجود بكثرة...خلينا نستغل الاشياء بمواسمها...وقبل ما انتقل للوصفة...قررت اشاركم بفكرة الغداء لليوم من اليوم وطالع ان شاء الله...منه افكار ومنه بتعرفوا شو بطبخ :)

الغداء اليوم: بواقي مقلوبة باذنجان من امبارح وتشكن تندرز مقلية شغل بيتي مع صوص العسل والماسترد...رح اشارككم فيها قريب ان شاء الله..

ملاحظة: هي الكيكة سريعة وما بترتفع كتير...بس عشان ما تقلقوا!!!


كعكة الدراق
المقادير:
1/2 1 اصبع زبدة (ارجوكم اختاروا زبدة نوع ممتاز للكيك لانه بيعمل فرق في الطعم والقوام)
3/4 كوب سكر
ملعقة صغيرة بيكنج باودر
ملعقة صغيرة زنجبيل مطحون
1/2 ملعقة صغيرة ملح
2 بيضة
2 ملعقة صغيرة فانيلا
1/2 1 كوب طحين
1/3 كوب حليب
4 حبات دراق صغيرة او 3 كبار مقشرة ومقطعة ودجز (شرائح)

للوجة:
2 ملعقة طعام طحين
2 ملعقة طعام سكر بني
ملعقة طعام زبدة

الطريقة:
تخلط مكونات الوجة لتكون مثل الفتات وتترك جانبا
يدهن قالب التشيز كيك ويرش بالطحين
تخفق الزبدة والسكر والزنجبيل والملح والبيكنج باودر حتى تصبح خفيفة القوام
يضاف البيض واحدة كل مرة ويخفق ثم الفانيلا
يضاف الدقيق على 3 دفعات بالتناوب مع الحليب
تسكب الكيكة في القالب
يصف الدراق
ينثر الوجة على السطح
وتوضع في فرن حامي على 175 وتترك من 30-35 دقيقة لتجتاز اختبار الكيك (عود الاسنان بدون بقايا عند غزه في منتصف الكيكة)

وتترك لتبرد 10 دقائق في القالب ويفك وتترك لتبرد تماما على سلك معدني وتقدم مع احلى كاسة شاي او فنجان قهوة....


  وبترككم مع حكمة اليوم...

لا يوجد حب مخلص أكثر من حب الطعام...برنارد شو


صحتين...

Sunday, August 18, 2013

سلسلة اصنعي في بيتك..جرانولا الكاجو وجوز الهند

عندي اكتئاب!!! ومين اللي ما عنده هالايام؟!! الاخبار بتسم البدن وكل مالها لاسوأ!!! الله يفرجها!!!
بس على الصعيد المشرق...لما بكون زعلانة ومتضايقة وبالرغم من اني ببطل احب اطلع ولا اروح ولا آجي ...وقتي بيسرقه المطبخ وبالتالي بقضي اغلب الوقت فيه... وبنسى حالبي وبكون في قمة الاستمتاع...
بتمنى تكونوا قضيتوا عطلة نهاية اسبوع مثمرة وسعيدة الى حد ما بالرغم من كل المنغصات والنقاشات العقيمة اللي بتدور على الصفحات الاكترونية من فيس بوك وغيره الى الاحاديث والجلسات العائلية واللي لازم ينحكى فيها بالسياسة...

جدولنا هادا الاسبوع رح يكون ان شاء الله حلو ولطيف من سلسة الاكلات والاشياء الجديدة اللي رح اعملها واشارككم فيها عشان تجربوها وتخبروني شو النتائج...

اليوم رح اشارككم بوصفة رائعة من سلسة اصنعي في بيتك وهي سهلة كتيير ولذيذة كتير وصحية الى حد ما اذا اكلت باعتدال...اليوم رح احط وصفة الجرانولا بالكاجووجوز الهند...رائعة مع اللبن والعسل كفطور مفيد جدا ومغذي وملئ بالطاقة ومشبع كمان...وبما انه المدارس قربت فبدل الشيبس والشوكولاتة ممكن تحطي لاولادك منها على المدرسة كسناك لذيذ وصحي

وبمناسبة الحديث عن المدارس فان شاء الله رح يكون فيه كتير بوستات جاية عن ساندوبشات للمدرس وسناكس مناسبة للفرصة بدل الاشياء الفارطة اللي بياكلوها الاولاد هالايام...



جرانولا الكاجو وجوز الهند
المقادير:
3 كوب شوفان
كوب لوز ني مقطع (اما انصاف او ارباع)
كوب كاجو ني
كوب جوز هند (اما شرائح عريضة زي ما انا استعملت او عادي)
1/3 كوب سكر بني
1/2 كوب صوص البان كيك
1/4 كوب زيت عادي
رشة ملح

وبالآخر: كوب زبيب

الطريقة:
يخلط الشوفان واللوز والكاجو وجوز الهند معا

يخلط السكر وصوص البان كيك والزيت ورشة الملح
تضاف وتحرك كلها معا
توضع في فرن على حرارة 120 مدو تتراوح من 1/2 ساعة الى 3/4 الساعة (رح تشموا ريحتها) ولازم تتقلب وهي بالصينية عشان كلها تتحمص منيح...
تخرج من الفرن ويضاف الزبيب

تترك لتبرد وتوضع في مرتبان نظيف ومحكم الاغلاق..

تستعمل مثل ما ذكرت سابقا مع اللبن والعسل او كسناك خفيف ومفيد...