Wednesday, July 31, 2013

سوبرماركت Select...مكان يستحق الذهاب اليه لمحبي الطبخ

مشاركة تانية لليوم ما الها دخل بوصفات الاكل بس الها دخل بمحل زرته اليوم لاول مرة وحبيته كتييير وهو سوبرماركت Select اللي على الدوار السابع وبيجيب منتجات من اميركا (وبعرف انه كتيير ناس ممكن ما يعجبها هالحكي) بس انا شخصيا بحب استعمل كتير من هادي المنتجات بالاكل مرات لانها بتسهل ومرات لجودتها الممتازة...المهم انه في زيارتي الاستكشافية الاولى (والاكيد ما رح تكون الاخيرة :) ) اشتريت كتير اشياء بحب استعملها وما رح تصدقوا انه اسعار Select ارخص  من محلات تانية بتبيع نفس المنتج...رح اعطيكم عدة امثلة بس قبل ما اعمل هيك بهمني اني انوه انه هادا المقال مش دعاية مدفوعة من Select ...لانهم في الواقع ما بيعرفوني ابدا واليوم كنت زبونتهم لاول مرة بس انا حبيت اشارككم باللي لقيته لانكم حبايبي وبحب انه الفائدة تعم...وبصراحة محل متل هاد بهمني انه ينجح ويستمر لانه بيوفر كتير من الاشياء الممتازة وباسعار ممتازة...

من الاشياء اللي اشتريتها رازبري مفرز...والكمية بتعادل حوالي علبتبن ونص من الطازج واللي سعره كطازج فوق ال 5 دنانير للعلبة بينما المفرز (وبجودة ممتازة) ب 3.85 دينار...فرق!!!!

بوينغ الشوكولاته والفانيلا السريع (اللي بتحطي عليه حليب بارد وبيصير بودينغ بدون طبخ) ب 1.12 للباكيت بالمقارنة مع 1.20 في ارخص مكان لقيته ومرات ب 1.5 



البهارات والاعشاب الجافة ب 99. قرش بالمقارنة مع 1.20 برضه بارخص مكان 
ملح البحر (فيه ناعم وفيه خشن) وكتيير ستات سألوني عنه (علبة كبيرة ) بصراحة مش عارفة الوزن بالضبط ب 1.14 قرش بالمقارنة مع اسعار فوق 2 دينار بمحال اخرى

هادا جزء من الاشياء اللي اشتريتها واستمتعت بالخدمة اللطيفة من الكاشير وبهدوء الموسيقى  والمكان...
السوبرماركت متخصص..يعني مع بتعملي فيه تسوقك الاعتيادي بس هو وجهة اكيد لكل محبي الاطعمة الفريدة والمنتجات المميزة...آه ونسيت احكي اني لقيت مشروب غازي بحبه كتير اسمه Cream Soda بس ما اشتريت لاني مش حاسبة حسابي...رح ارجع!!!!

واللي حابب يعرف عنوانه واكثر عنه ممكن يزور الصفحة على الفيس بوك

ومرة تانية هاد البوست غير اعلاني والهدف منه الفائدة لكم..
مع حبي..

منال

وصفة بسكوت يومي الى آخر رمضان...بسكوت الشوكولاتة بزبدة الفستق

كل واحد فينا اكيد بيحب يجمع اشياء معينة او يشتريها كل ما يشوف اشي حلو...بالنسبة الي هادي الاشياء هي اغراض المطبخ والاكل :) اكيد حزرتوا...ومشكلة لانهم منوعين وكتار وكل يوم بيطلع اشي جديد...يعني بدك بير فلوس...من اكثر الاشياء اللي بحب اشتريها واجمعها هي الورق الخاص بالكب كيك من ورق وزينة..وبحب احطه بمرتبان شفاف عشان اشوف اديش ضل عندي وشو هي الالوان المتوفرة...




ومنظر الورق خلاني افكر قديش حابة اشارككم بوصفات جديدة للكب كيك والمفنز اللي بتحتاج هادا النوع من الورق...ان شاء الله بعد العيد رح احضر مجموعة جديدة من المقالات والفوائد والدروس اللي بتمنى انها تصير منتظمة على المدونة ...بتمنى انكم اتابعوها وتعجبكم...

هلأ وبما انه قرب العيد...كل سنة وانتو سالمين...بحب اشارككم بوصفة بسكوت كل يوم للي بحبوا انهم يعملوا بسكوت بالعيد بدل الكعك او معاه...

بسكوت الشوكولاتة بزبدة الفستق
المقادير:
1/2 1 كوب طحين
1/2 كوب كاكاو
3/4 ملعقة صغيرة كربونات
1/2 ملعقة صغيرة ملح
اصبع زبدة بحرارة الغرفة
1/2 1 كوي سكر
1/2 كوب زبدة الفستق
2 بيضة
ملعقة صغيرة فانيلا
1/2 1 كوب شوكولاتة تشبس (رقائق الشوكولاتة)

الطريقة:
يحمى الفرن الى 175 درجة
تبطن صواني الخبز بورق الخبز
تخلط المواد الجافة  (الطحين، الكاكاو، الكربونات، الملح)
تخفق الزبدة وزبدة الفستق والسكر معا حتى تصبح خفبفة
يضاف البيض واحدة كل مرة ثم الفانيلا
تضاف المواد الجافة وتخلط حتى تتجانس
تضاف رقائق الشوكولاته
يؤخذ قدر من العدينة ويكور دائرة صغيرة (حسب الحجم المرغوب فيه)
ترتب في صينية الخبز متباعدة بحدود 5 سم عن بعض
تخبز 10 دقائق وتترك على الصينية 2 دقيقة ثم ترفع لتبرد على سلك معدني

(الكية حوالي 36 بسكوتة)
الوصفة من الوصفات السابقة على المدونة ترجمت للعربية
وصحتين


Tuesday, July 30, 2013

وصفات المدونة باللغة الانجليزية الى العربية...عرايس باللحمة انظف وازكى من برة وسهلة كتييير

الحمدلله خلصت العزيمة امبارح وكانت ممتازة...صحتين وهنا لكل اللي افطر وان شاء الله ربنا يتقبل...حاسة حالي هلأ بقدر ارجع على المود اللي كنت عليه قبل!!! انا من هادي النوعية من الناس...اي نوعية؟ اللي لما يكون عليها اشي لازم تخطط وتكتب وتشطب وتصحى بدري قبل الهنا بسنه...بس بحس هيك الامور بتكون تحت السيطرة لما الناس تيجي...والحمد لله امبارح الله يرضى عليها امي كانت اكبر عون...وكمان سلفتي الله يجزيها الخير ساعدتني كتير بعد العزومة لانه الكل قعد برة للحلو وبرة عنا معناه الجنينة وانا على الطابق الثالث ...عادي!!! وبلا مصعد!!! يعني اطلع انزل...وياسمين حبيبتي دارت بالها على هارون خلال الفطور وبعده وضلت عنده وهو نايم...واخيرا زوجي العزيز كان يساعد كمان...الله يديم المحبة...العزومة كانت بالمناسبة حوالي 32 شخص وهو عادي بصراحة بس برمضان شوي الامور بتكوناربك بحكم انه فيه وقت معين لازم كله يكون جاهز والحقيقة صار امبارح...كله على الطاولة وساخن ومرتب قبل الاذان بدقائق...المنيو كانت:
شوربة عدس
شوربة بصل بالجبنة والكريما (مش شوربة البصل الكلاسيكية)
سلطة ابو العبد
سلطة الباذنجان والجرجير والرمان (الفيديو للي ما شافه)


حمص
فول
صحن مشكل (كبة مقلية، سمبوسك جبنة، رولات فطر وجبنة وسبرنغ رولز)
كواج
ستيك بالفطر
دجاج بالزبدة (هندي)
ارز ابيض
صرر اوزي
لبن

والحلو كان:
قشطلية
كريم كراميل
بقلاوة بيتية
قطايف عصافيري قشطة ونيوتيلا
بطيخ
شمام
كاسات ترايفل الشوكولاتة

عصائر:
قمر دين بيتي (يعني معمول من المشمش الطازج)
جلاب
كركديه
تمر هندي
ليمون بالنعنع
ليمون بالسفن اب
توتي فروتي
ريد مكس

الحمد لله على نعمه الكثيرة....

طيب ولانه ارجعنا خليني استعرض آخر منيو مقترح للاسبوع واشوف شو انعمل وشو ضل لانه تأخرت هالمرة بس آسفة بحكم الانشغال.. وكتير اشياء في الحقيقة ما انعملت لانه انعزمنا اكثر من مرة الفترة الماضة (3 مرات)

الاول: شوربة فريكة على عظم خروف من الفريزر، تشكن تندرز بصوص البافلو (وطريقتها موجودة على المدونة بس اضغطي على الكلمة بتاخدك للوصفة)، بطاطا مقلية، فتوش، قطايف نيوتيلا وكريم كراميل عصير ليمون بالنعنع، وعصير مانجا
الثاني: شوربة كويكر، فتة حمص، دجاج الا سلطان (بالثوم والكزبرة)، ارز، عصير فمتو، عصير اناناس وليمون، شباكية
الثالث: شوربة شعيرية، فتة دجاج،  سمبوسك بف هندي، عصير بينا كولادا وعصير برتقال ومهلبية الفراولة
الرابع: شوربة قرع، عرايس لحمة، سلطة البطاطا بالشبت، سلطة خيار بلبن ، عصير توتي فروتي، عصير ليمون وكيوي، حلو بافي (ان شاء الله بشارككم الوصفة
الخامس: شوربة بصل بالكريما، معكرونة بالبشاميل، سمبوسك بجبنة حلوم ، سلطة جرجير بالفليفلة المشوية كعكة بوظة الاوريو (برضه رح اشارككم الوصفة)
السادس: شوربة بروكلي بالجبنة، داوود باشا بالطحينة مع ارز، سلطة جرجير بالباذنجان والرمان (ممكن تشاهدوني على رؤيا بالضغط على اسم السلطة)، كريب بالنيوتيلا، عصير بطيخ وليمون وعصير برتقال ، قشطلية
السابع: شوربة الجرجير (آه زي ما سمعتوا وان شاء الله بشارككم وصفتها كتير زاكية)، انشلادا الدجاج، سلطة الدجاج الصينية،عصير ليمون ونعنع وعصير توتي فروتي وموس الشوكولاتة والكراميل

وفيه اشياء انعملت ومش على المنيو (لانه كمان تجاوزنا السبعة ايام) مثل شوربة البندورة المشوية وشوربة خضاروبيتزا (مرتين)
اليوم فيه عندي اكل زايد فالحمدلله ما فيه طبخ...راحة...مش كتير فعليا لانه البيت بده تنظيف عميق...ورحلة التعزيل قبل العيد لازم تبدأ من اليوم ان شاء الله...

اليوم وبما انه زاد عندي اكل قررت ابدا ادخل شوية وصفات من اللي كتبتها ببداية المدونة بالانجليزي...الوصفة لعرايس باللحمة...للسحور او الفطور وفي بيتي بنحبها كتيير وصحية اكثر من الجاهزة وسهلة كتييير...واعذروني الصور القديمة مش بزيادة لانه الكاميرا كانت خربانة وتم التصوير بالموبايل...

عرايس باللحمة
المقادير:
6 ارغفة خبز وسط (نوع سميك شوي) مقسومة من النص
زيت زيتون لدهن الارغفة من الداخل

للحشوة:
كيلو لحمة مفرومة ناعم (خروف وعجل زي لحمة الكفتة بس بدون بهارات او بقدونس او بصل)
حبة فليفلة خضراء مفرومة ناعم (ممكن وضع حار للي بحب الحار)
بصلة متوسطة مفرومة ناعم
حبة بندورة مزالة البذور والعصير مفرومة ناعم
3 ملاعق طعام زيت زيتون
ملعقة طعام بهارات مشكلة (فلفل اسود، بهار، قرفة)
ملح

الطريقة:

تدهن الارغفة بالزيت من الداخل بشكل جيد (بيعطي طعم كتييير زاكي وما في سمنة)
تخلط كل مكونات الحشوة ويؤخذ كمبة وفيرة منها لتفرد في كل نصف رغيف




تصف الارغفة على صينية مبطنة بورف الالمنيون وتدهن من الخارج وعلى الجهتين بزيت الزيتون
يحمى الفرن الى 190 وتخبز الارغفة بين 20- 30 دقيقة وتقدم ساخنة مع اللبن وصحتبن وصيام مقبول ان شاء الله


Sunday, July 28, 2013

شوربة البندورة المشوية ولفائف التوست بالقرفة والجبنة

رح ابدأ هاد المقال بكلمة...آسفة...آسفة...آسفة...يعني جد وين الوقت بيروح بالرغم من انه النهار طويل برمضان بس جد وين بروح؟؟؟ بتمنى ما اكون انا لحالي اللي حاسة حالي بدور متل الجاجة المقطوع راسها طول اليوم من شغلة لشغلة وشوي برة البيت وشوي في المطبخ وشوي مش قادرة اوقف لازم اغفى ولو 1/4 ساعة لانه الكل ما عم بينام برمضان...بس هادي هي حلاوته كمان...بتنعكس كل الموازيين والليل بصير نهار والنهار عند كتيير ناس بيصير ليل بس عندي النهار نهار لانه هارون لسة ما بيعرف رمضان...بتمنى تكونوا تقبلتوا اعتذاري عن عدم الكتابة في الايام الثلاثة الماضية...وبتمنى تكونوا قضيتوا ايام حلوة وفطور هنئ باذن الله...

اليوم رح اشارككم وصفتين وان شاء الله بكرة كمان وصفتين وعندي عزومة يوم الاثنين ان شاء الله فما رح اقدر بس اذا زبط ليش لأ...

وصفة اليوم هي شوربة البندورة المشوية..وانا بحب شوربة البندورة كتييييير وشوي جزء منها بالفرن رح يركز طعمها الحلو ويعطي عمق للشوربة...الوصفة اليوم رح تكون بالتفصيل الممل للخطوات...بتمنى تجربوها وتعجبكم...



شوربة البندورة المشوية
المقادير:
بصلة متوسطة مفرومة
3 سن ثوم مدقوق
ملعقة طعام زيت زيتون
كوب صوص بندورة (علبة رب بندورة مع ماء لاكمال الكوي وسوف تكون ثقيلة)
4 ملاعق طعام رب بندورة
2 علبة بندورة معلبة
5 حبات بندورة وسط مدهونة بالقليل من زيت الزيتون ومشوية بالفرن مدة 1/2 ساعة ومقشرة
2 كوب ماء
2 كوب مرق دجاج
2 ملعقة صغيرة ملح
فلفل اسود
1/2 1 كوب كريما طبخ
1/4 كوب جبنة بارمزان
10 اوراق ريحان طازج يفرم عند نضج الشوربة ويضاف عند التقديم (اذا لم يتوفر الريحان الطازج يمكن استعمال الناشف شرط اضافته في البداية لتظهر نكهته)


الطريقة:
يوضع الزيت في طنجرة ويضاف البصل ليذبل

يضاف الثوم وتقلب دقيقة

نضيف كل انواع البندورة والماء والمرق والملح ورشة فلفل اسود (في حال استعمال الريحان الناشف يضاف في هذه المرحلة)



نتركها لتغلي ثم نخفض الحرارة ونغطيها 30 دقيقة

ثم نهرسها يالخلاط اليدوي لتصبح ناعمة


نضيف الكريما والبارمزان ونحرك ونتركها على نار هادئة 5 دقائق




نضيف الريحان الطازج في هذه المرحلة اذا استعمل وتقدم وصحتين


الوصفة الثانية لحلو سعل بالتوست وهو لفائف الجبنة بالقرفة والسكر وبتذكرني بساندويشات السكر والزبدة اللي كنا ناكلهم واحنا صغار...بس بطعم القرفة

 لفائف الجبنة بالقرفة والسكر
المقادير:
توست منزوع الحواف ومفرود بالنشابة ويفضل ان يكةن طري ليسهل فرده
جبنة كريمية مخفوقة مع سكر ناعم 
سكر
قرفة
زبدة مذابة

الطريقة:
تفرد الجبنة على الخبز بعد فرده
تلف رول
تغطس بالزبدة الكذابة ثم بخليط السكر والقرفة وتصف في صينية وتخبز على 350 حتى تجملا جوانبها وصحتين ويفضل اكلها وهي ساخنة




Tuesday, July 23, 2013

اصابع زينب...حلو شرقي دارت حوله القصص

كنت بسمع الراديو (مزاج اف ام ) هديك اليوم وكان في مناقشة ومسابقة بين معن ورامي اذا اصابع زينب اكلة مصرية اوسورية...وبكذب اذا قلتلكم اني عرفت لانها مسابقة على مدار البرنامج وانا نزلت وقتها من السيارة وما عرفت...حاولت اشوف اصل الحكاية على المواقع المختلفة بس ما لقيت قصة واضحة واحدة...اشي بيقول انها نسبة لزينب بنت الحسين بن علي رضي الله عنهم واشي بيقول انها بنت مصرية عملت الحلو لخطيبها وصارت مثل و اشي بيقول انها زينب بنت حلوة وشبهوا الحلو باصابعها الجميلة...بغض النظر عن التسمية...كتير ناي بيحبوا اكلة اصابع زينب واليوم رح اشارككم الوصفة اللي انا بحبها وبتمنى تجربوها وتعجبكم...الوصفة بالمناسبة بتبرك...يعني ممكن عمل 1/2 الكمية بس...

اصابع زينب
المقادير:
3 اكواب سميد ناعم
3 اكواب طحين
ملعقة كبيرة خميرة
كوب ماء دافئ
ملعقة صغيرة سكر
كوب زيت نباتي
ملعقة صغيرة شومر ويانسون مطحون
ماء دافئ للعجن
قطر سميك شوي وبارد

الطريقة:
تخلط الخميرة والسكر والماء الدافئ
تخلط المواد الجافة ويفرك الخليط بالزيت
تضاف الخميرة ونعجن ونبدأ باضافة الماء الدافئ لنحصل على عجينة متوسطة الليونة
تترك لترتاح وهي مغطاة مدة ساعة
نأخذ كرات منها بحجم حبة الجوز ونشكلها كرول ونمررها على مصفاة باطراف الاصابع لتأخذ شكل اصابع زينب المعروف
تقلى بزيت حامي وغزير
وعندما تحمر تنقل الى القطر وتترك بضع دقائق ثم تسحب
ترش بالفستق الحلبي المفروم (اختياري)
وصيام مقبول ان شاء الله


الدرس الاول في المخبوزات (خبز البرغر)

حكيت قبل هيك انه من اروع الاشياء هو ريحة الخبز بالبيت...وعشان نكمل سلسلة اصنعي في بيتك ونبدأ درس طبخ جديد حبيت ابدأ بوصفة خبز البرغر المنزلي واللي زاكي كتير وسهل...اديش منكم بيشتروا خبز برغر ومرات بيكون معجن او بفتفت...رح تشوفو اديش سهل ينعمل بالبيت واديش ممكن تنوعي بالعجبنة واللي ممكن ينعمل منها خبز الهوت دوغز كمان...

الدرس الاول في المخبوزات
خبز البرغر
المقادير:
كوب حليب
1/2 كوب ماء
1/2 اصبع زبدة
ملعقة كبيرة خميرة
حوالي 1/2 4 كوب طحين (ممكن نحتاج اكثر او اقل)
1/2 ملعقة صغيرة ملح
2 ملعقة كبيرة سكر
بيضة

الطريقة:
يوضع 3/4 1 كوب طحين في العجانة مع السكر والملح والخميرة وتحرك
يسخن الحليب والماء والزبدة ليصبح دافئ (يتحمله اصبع اليد الصغير) وعادة لتذوب الزبدة سيسخن اكثر من اللازم عندها اتركيه يبرد قليلا (اذا عندك ميزان لازم الحرارة 120)
يضاف المزيج للطحين ونبدأ العجن وعندما تختلط تضاف البيضة المخفوقة ونعجن لتختلط
نبدأ باضافة 1/2 كوب طحين كل مرة مع استمرار العجن للوصول لعجينة متماسكة ولا تلصق (مثل المعجنات)
نعجنها 7 دقائق بالعجانة و10 اذا باليد (العجن الجيد هو سر خفة ونجاح العجين في الخبز لانك تريدين ان تطوري مادة الغلوتين داخل الطحين والمسؤولة عن جعل الخبز يمضغ (وهو امر مهم في عالم الخبز)
وسيكون شكل العجينة هكذا


تقسم الى 9 او 12 كرة حسب حجم البرغر الذي تريدين (انا قسمتها 12 لاني بحبه وسط) وترتب على صينية مبطنة بورق الخبز وبشكل متباعد ويضغط عليها بباطن اليد لتسطيحها قليلا وتغطى بورق نايلون ثم قطعة قماش نظيفة وتترك لتخمر ساعة

                                                 بعد التخمير                                      قبل التخمير

(الفرق مش واضح بالصورة بس السطح مرتاح والعجينة بتصير خفيفة)

يحمى الفرن الى 200 درجة وتدهن الاقراص اما بالبيض وترش بسمسم غير محمص او حبه البركة او تدهن بكريما مثل ما عملت انا (عشان ما بحب زنخة البيض) ورشيتها حبة بركة (ما كان عندي سمسم غير محمص)
تدخل الفرن وتخبز لتحمر من القاع ويشوى الوجه وتترك لتبرد مغطاة بشكل خفيف بقطعة قماش نظيفة
وصحتين...
جربوها وسهلة كتير واللي عندها اي سؤال يا ريت التعليق في الاسفل لاني رح ارد هون :) مش على الفيس بوك...
التعليقات تكون بعد المقال تحت "ارسال تعليق"
ملاحظات:
- ممكن تعملي اي نكهة بدك اياها بالخبز مثل انك تضيفي بصل مجفف او جبنة على الوجة
- نفس العجنة اذا اتشكلت اصابع طويلة تستعمل للهوت دوغز

Monday, July 22, 2013

كولسلو وضيفة جديدة..السيدة سماح القعقاع وفطيرة التفاح على طريقتها

 اليوم البوست حلو كتيير لاني مستضيفه فيه صديقة من ايام المدرسة جمعني فيها الفيس بوك بعد طول انقطاع....شايفيين قنوات التواصل الاجتماعية الها فوائد...بنت صفي السيدة سماح القعقاع رح تشاركنا بوصفة مميزة لفطيرة التفاح واللي شكلها بيشهي زي ما رح تشوفوا بالصور...لما كتبت اسم الوصفة (فطيرة التفاح) حسيتها عادي !!! ما فيه كتير فطاير تفاح...فحبيت اضيف على طريقة سماح لانه الوصفة على طريقتها وكمان فيها وزن (بالصدفة) وبعد اذنها طبعا!!!!

وقبل ما نتشارك بوصفتها خليني اقولكم شو افطرنا امبارح...زي ما حكيت انه زاد اكل كتير فسخناه وخالد (زوجي العزيز) كان جعباله صحن فول فعملتله وعملت صحن زيتون حلبي (ما بيحرق عشان احنا ما بنحب الاكل الحار)..بعرف انه بطل اسمه زيتون حلبي بس هيك طلع معي...

اما اليوم ففطورنا لحالنا بالبيت لانه الكل معزوم في اماكن مختلفة...فمهمتي لليوم هي: شوربة البندورة المشوية بالريحان (رح احط وصفتها بكرة ان شاء الله)، برغر (مش على المنيو بس قررنا نعمل هيك) والحلو انه كله شغل البيت حتى الخبز واللي رح انزل خطواته وطريقته ضمن سلسلة اصنعي في بيتك ودرس اون لاين...وان شاء الله رح يكون فيه دروس من هالنوع كل ما يصحللي فرصة...بتمنى تعجبكم وتستفيدوا...اذا الله اراد بنزل الدرس الليلة او بكرة الصبح...فاستنوني بوصفة خبز البرغر واللي بينفع كمان للهوت دوغز....ونرجع للمنيو اليوم ففيه كولسلو وبطاطا مقلية...

وصفتي اليوم لسلطة الكولسلو اللذيذة وهي طريقتها...

كولسلو
المقادير:
1/4 ملفوفة حجم وسط مفرومة شرائح رفيعة
2 جزرة كبيرة مبشورة
علبة ذرة صغيرة (مش اعتيادي بس احنا بنحبها)
الصوص:
 كوب مايونيز
ملعقتين كبار لبن زبادي
بصلة صغيرة مبشورة
2 ملعقة طعام سكر تذاب ب 2 ملعقة طعام خل
ملعقة طعام ماسترد ديجون
ملعقة صغيرة حبوب الكرفس مطحون
ملح وفلفل اسود

الطريقة:
تخلط مقادير الصوص وتضاف للخضار وتبرد ساعة قبل التقديم لتختلط النكهات...وصيام مقبول ان شاء الله

وهي وصفة سماح...

فطيرة التفاح على طريقة سماح
المقادير:
3/4كاسة سمنة ghee
3 كاسات طحين
3 بيض
1/2 -3/4كاسة سكر
2 ملعقه صغيرة baking powder
1ملعقه صغيرة ڤانيلا
مقادير الحشوة:
خمس تفاحات
ملعقه كبيرة مربى احمر اللون مثل الفراولة
ملعقتين صغار قرفه ناعمه



الطريقة:
بالنسبه للعجين نخلط أولا البيض و السكر و السمنة و الڤانيلا و من ثم نضيف خليط الطحين و ال baking powder



نقسم العجين ثلثين بثلث
ثلث في الفريزرًو الثلثان في الثلاجه لوقت الاستعمال اي عندما يجمد الثلث الأول
نفرد العجين التي في الثلاجه في قالب ال pie و نضع الحشوة بعد برشها خشن في ال food processor وبعد خلطها مع المربى و القرفه




ثم نبرش الثلث من الفريزر فوقهم


و نضعها في الفرن على درجة. حرارة ١٨٠ و نضع تحت القالب صينية حتى لا ينشعط اسفل العجين و ننتظر حتى تشقر الحواف ثم نحمرها

بعد ان تبرد نرشها بالسكر الناعم و نقدم بجانبها ايس كريم الڤانيلا



Sunday, July 21, 2013

مثلثات اللحمة والبطاطا الهندية وصوص الرايتا وشوربة القرع

من اكثر الاسئلة اللي بدت تتوارد على الاذهان هالايام....شو بدنا نطبخ اليوم؟ يعني ما شاء الله الخيارات واسعة جدا هالايام بالمقارنة مع ايام زمان لما كان الدجاج المحشي من اكبر الطبخات..وكان الفطور شوربة ماجي وعصير سوبر سكواش ورز وملوخية او فاصوليا او بازيلا...هلأ ما شاء الله مما لذ وطاب من اكل عربي وغربي...الله يديم النعمة وما يحرم منها محتاج...بجد انه رمضان من اروع الاشهر لانه بخلينا نحس اديش احنا بالف نعمة بالمقارنة مع غيرنا...كان الله بعون المسلمين في ارجاء الارض...

وبدي استغل الفرصة واعتذر اني صايرة كسلانه وما عم بحط بوست كل يوم بس والله بحاول اعوضها باليوم الثاني باني احط اكثر من وصفة...

فطورنا اول امبارح  (كنا معزومين) و امبارح كان تعاوني زي دايما. انا عملت شوربة قرع، سلطة مقالي، مثلثات اللحمة والبطاطا بالكاري مع سلطة الرايتا الهندية (بتشبه سلطة الخيار باللبن) واصابع جبنة الفتة بالقزحة المقلية وبواقي دجاج الا سلطان وارز (قضوا عليها الاولاد..صحتين) واصابع زينب (كنت حابة الاصابع امبارح :) وعصير بطيخ وليمون وعصير ليمون وكيوي..بقية الفطور كان صفيحة شامية (جابتها عمة زوجي لانها افطرت معنا) شاكرية وارز، فتة دجاج وفتوش وسمبوسك...وسلفتي عملت قطايف و اشترت عوامة وبتيفور...غير عصائر اخرى مش عارفة ايش كانت....بجد الف نعمة...

وعشان هيك اليوم مهمتي بسيطة: تسخين بقايا الصفيحة واصابع الفتة، عمل عصير توتي فروتي وبرتقال ولحد الآن مش واضح اذا رح اعمل شوربة او فتوش...بنشوف بالتنسيق مع سلفتي...وبقية الاكل من امبارح...زاد اشياء عند الكل....

وصفات اليوم متنوعة اول واحد هي شوربة القرع...اذا متذكرين القرع اللي فرزته قبل فترة...
شوربة القرع
المقادير:
2 كوب قرع مهروس (مسلوق او مشوي)
2 ملعقة طعام زبدة
بصلة متوسطة مفرومة ناعم
2 جزرة متوسطة مقطعة مكعبات
3 اكواب مرق دجاج او خاروف (انا كان عندي كبس عظم واستعملته)
ملح، فلفل اسود، رشة قرفة وكمون
كوب كريما (ممكن استعمال حليب مركز او عادي للي بده دسم اقل)

الطريقة:
تسيح الزبدة وتذبل البصلة
يضاف الجزر والقرع ويقلب
ترش البهارات ويضاف المرق
تترك لتنضج من 20-25 دقيقة ثم تهرس اما بالخلاطة اليدوية او الخلاط
تعاد الى الطنجرة ويمكن اضافة المزيد من المرق اذا استلزم الامر
تضاف الكريما وتسخن ولا تغلى



الوصفة الثانية لليوم هي وصفتين ...الاولى للرايتا (صوص باللبن بتتقدم جنب كتير اكلات هندية زي التندوري)

الرايتا
 المقادير:    
    4 حبات خيار مقشر ومفروم
      كوب لبن زبادي
      كوب لبن عادي
3 ملاعق طعام نعنع مفروم
½ ملعقة صغيرة كمون
¼ ملعقة صغيرة فلفل شطة حرة
¼ ملعقة صغيرة بابريكا
½ ملعقة صغيرة ملح
2 ملعقة صغيرة عصير ليمون    

  الطريقة:
تخلط كل المقادير وتقدم باردة 

اما الاشي اللي عملته جنبها فكان مثلثات اللحمة والبطاطا الهندية بالبف باستري

مثلثات اللحمة والبطاطا الهندية
المقادير:
لفة عجينة بف باستري (انا استعملت السنبلة كاملة وفردتها وقطعتها مربعات بس بامكانكم تستعملوا المربعات المقطعة جاهزة وتذتب داخل الثلاجة)
للحشوة:
1/2 كيلو لحمة مفرومة
بصلة متوسطة مفرومة ناعم
حبة بطاطا وسط مفرومة مكعبات صغيرة (ممكن اضافة البازيلا او الجزر)
2 ملعقة طعام زيت
ملح، فلفل اسود، رشة قرفة
ملعقة طعام كاري
مكعب ماجي
ملعقة صغيرة نشا مذابة بملعقة طعام ماء
زيت غزير للقلي

الطريقة:
تحضر الحشوة بتذبيل البصلة بالزيت ثم اللحم وترش بالفلفل الاسود والقليل من القرفة
تضاف البطاطا والكاري وتقلب على نار منخفضة حتى تنضج البطاطا (ممكن اضافة بضع ملاعق من الماء لمساعدة البطاطا على النضج)
يضاف مكعب المرق والنشا المذاب بالماء ويجب ان تتسبك وتنشف قبل الحشي وتبرد
يوضع حوالي 1/2 1 ملعقة طعام على العجين وتطوى مثلث وتغلق اطرافه بالشوكة 
يحمى الزيت وتقلى لتحمر وصحتين وصيام مقبول ان شاء الله





Friday, July 19, 2013

كريب ووصفة معكرونة الكانيلوني بالدجاج والسبانخ لضيفتي لليوم السيدة تغريد عودة

جمعة فضيلة ومباركة على الجميع...من احلى الاشهر شهر رمضان....!!! ليش...لانه بالاضافة الى انه شهر العبادة والتقرب الى الله بحكو انه كتير اشياء بتوقف فيه ففيه وقت عند الواحد ان يقوم بالمزيد من الطاعات..انه شهر اللمة والاسرة ...اميارح كان اول مرة بفطر عند اهلي برمضان وكتيييييييييييييييييييير انبسطنا...الجمعة الحلوة والاكل الرائع من تحت ايدين ست الحبايب الله يخليها...امبارح الفطور كان عامر بما لذ وطاب وشغل بيتي 100%...
فطورنا امبارح كان: تمر، شوربة بندورة بالكريما، شوربة شمندر وجزر، فول، حمص، سمبوسك لحمة، جبنة سبرينغ رولز، كبة مقلية، صينية كواج، فيليه لحمة بالجريفي والخضار والبطاطا، فتوش، وانا عملت: سلطة بطاطا بالشبت ودجاج الا سلطان وارز ابيض....ابداع..والحلو كان عوامة، عيش السرايا شغل ماما وهريسة بالقشطة (مرت اخوي عملتها)...جد من اول رمضان ما تهنيت على اكل زي امبارح وكان لو فيه وسع باكل كمان بس وصلت لحد الانفجار...الحمد لله على النعمة...وللملاحظة: الاكل ما كان معمول بكميات كبيرة وكمان توزع علي وعلى بيت اخوي فالكل عنده راحة اليوم...بس احنا معزومين اليوم...
ولاني امبارح قضيت النهار عند اهلي من  الصبح فما صحللي اني اعمل بوست امبارح....
اليوم وتعويضا رح اشارككم بوصفتين ان شاء الله...واحدة الي والثانية رح استضيف صديقة لتشاركنا باحدى وصفاتها وانا متأكدة انها رح تعجبكم كتير..

الوصفة الاولى للكريب وهي عجينة رقيقة وممكن نحشيها بكتير اشياء حلو ومالح ...اذا قررت انك تحشيها مالح لا تحطي فانيلا او سكر ناعمروعوضيها بنكهات اخرى مثل الفلفل الاسود والاعشاب ...
بس السيد سلطان طلب انه احشيها نيوتيلا وفوقها صوص شوكولاتة متل ما اكلها بالمول...وما شاء الله طارت...صحتين...

الكريب بالنيوتيلا
المقادير:
1/2 1 كوب طحين منخل
1/2 ملعقة صغيرة بيكنج باودر
2 كوب حليب سائل
2 بيضة
ملعقة كبيرة سكر ناعم
2 ملعقة كبيرة زبدة مذابة
2 ملعقة صغيرة فانيلا
1/2 ملعقة صغيرة ملح

الطريقة:
يخلط الطحين والبيكنغ باودر والملح
يخفق البض مع الفانيلا
يضاف ملعقة السكر وتخفق
يضاف الحليب والزبدة وتخفق
يضاف خليط الطحين للبيض وتحرك لتتجانس وتزال اي كتل (ولا تخفق كثيرا والا اصبحت قاسية)
تترك لترتاح في الثلاجة ساعة وهي مغطاة
يحمى مقلى غير لاصق (وحجم المقلي يتعتمد على حجم الكريب الذي تريدين(
يدهن اول مرة بالقليل من الزبدة ويؤخذ حوالي 1/3 كوب من العجين لمقلاة وسط وتفرد في المقلاة مع تحريك المقلى بحركة دائرية لتوزيع الخليط بالتساوي وبشكل رقيق
تقلب عندما تبدأ جوانبها بالاحمرار وتحمر قليلا على الجهة الاخرى وتنزل على صحن وتكرر العملية مع مراعاة وضع شرائح من الورق بين الكريب كي لا تلتصق
ملاحظة: يمكن عمل كمية والاحتفاظ بها تقريبا شهر في الفريزر
تحشى بالحشوة التي ترغبين وتلف وتقدم وصيام مقبول ان شاء الله...

الصورة قديمة لاني ما لحقت اصور..كانوا يتاكلوا اول باول... :)



اما الوصفة الثانية فهي وصفة الضيفة ....
كانيلوني الدجاج بالسبانخ لتغريد عودة
مقادير الحشوة 
٢ ملعقة كبيرة زيت نباتي 
٦ قطع صدور دجاج مقطع 
٢ كوب سبانخ مقطع 
٤/١ كوب كريمة فرش 
٤/١  جبنة موتزريلا 
ملح حسب الحاجة 
ملعقة صغيرة جوزة الطيب 
ملعقة صغيرة بودرة الثوم 

مقادير أخرى 
باكيت معكرونة كانالوني تيوب
٤ كوب صلصة الباشميل 
جبنة موتزريلا حسب الحاجة 

الطريقة:
لعمل الحشوة نقلي الدجاج حتى ينضج ثم نضيف السبانخ ونقلبه حتى يستوي تماماً ثم نضيف الملح وجوزة الطيب وبودرة الثوم ونقلبه ثم نضيف الكريما وربع كوب الموتزريلا .
نحشو المعكرونة بدون سلق ونصفطها في البايركس  ونغمرها بالباشميل وفوقها باقي الجبنة . 
نضعها في الفرن لمدة ٢٠ دقيقة وتقدم 
ملاحظة ممكن إضافة نصف مكعب ماجي ونصف كوب كريما فرش وشوية جوزة الطيب على الباشميل لنكهة اغنى . 

صحتين
تغريدعودة

وهي الصور من تغريد وشكرا ...يسلموا ايديكي