Saturday, June 29, 2013

الدجاج بصوص البندورة الجافة والكريما والريحان

يوم من الآخر...حاسة حالي مش عم بقدر القط نفس بس قلت والله لو شو...بدي اكنب على المدونة... :) بشتاقلكم شو اعمل!!!!
من الصبح شراء اغراض مع ماما وخالتي ورحنا من الساعة 9 الى الساعة 12 !!! اغراض للبيت وخضرجي ولحام...وتوصيل خالتي بالاغراض وامي بالاغراض وبعدين اغراض بيتي...لو شفتوا السيارة...انا من جماعة السيارات الصغيرة لاسباب اهمها البنزين والصفة!!! يعني وين ما كان بتوسع هههه!!! بس مش ممتازة كتير لما الواحد بده يجيب اغراض!!! بس والله كتر خير الله وسعت اليوم...وبعدين بس رجعت على البيت وعادة من رحلات التسوق اللي متل هاي بيكون فيه ضب كتير وشغل كتير بالاضافة الى تحضيرات لدرس رمضان بكرة ان شاء الله....وطبعا الطبخ وبعدين على الصالون لاني معزومة على عرس ...لازم كمان شوي اقوم اجهز حالي!!! وكوي الفستان وكنت كمان معزومة على جاهه الساعة 6 بس خلص...اعتذرت وامي رح تروح لحالها...والمساكين بكل هالقصة الاولاد!!! بس الحمدلله راحوا على درس التصوير الظهر وهلأ سلطان عند صاحبه وياسمين بدها تدير بالها على هارون وانا وخالد في العرس!!!! الصيييييييييييييييف!!! جنون بس حلو!!! احسن من الزهق والبرد!!!

بكرة الدرس رح يكون حلو كتير ان شاء الله والاكلات زاكية من شوربة ومقبلات وسلطة ورئيسي وحلو...
اقبل يومين كان عيد ميلاد هارون...الله يخليهم ويبارك فيهم والكعكة كانت سيرك...
3 طبقات..ليزي كيك

الطبقة الثانية كيك قوس قزح ولونها ناقصة لونين بس حسيت انه رح يكون فيه كتير كيك هيك


والخيمة من الرايس كرسبيز...

وطبعا كان فيه اشياء زاكية مثل


واشياء تانية...المهم اليوم بدي اشارككم وصفة الدجاج بصوص البندورة الجافة والكريما والريحان...كتير سهلة وسريعة ...

الدجاج بصوص البندورة الجافة والكريما والريحان
المقادير:
4 صدور دجاج مقطعة بالطول مثل التندرز
2 ملعقة طعام زيت زيتون
بصلة متوسطة مفرومة ناعم
2 سن ثوم مدقوق
2 ملعقة طعام طحين
1/3 كوب بندورة حافة (منقوعة بالقليل من الماء الساخن لتطرى ثم مقطعة)
2 كوب مرق دجاج
ملعقة طعام زبدة
1/3 كوب كريما طبخ
1/4 كوب ريحان طازج مفروم

الطريقة:
يرش الدجاج بالملح والفلفل الاسود ويحمر بملعقتين الطعام من الزيت ويرفع
في نفس المقلاة نضيف البصل ونحرك حتى يذبل ثم نضيف الثوم ونقلب دقيقة ثم البندورة الجافة
نضيف الطحين ونقلب ثم نضيف المرق الساخن مع التحريك ونرشها بالملح والفلفل الاسود
وعندما يغلي نتركه لبسمك قليلا ثم الكريما ونحرك ونعيد الجاج ونتأكد من الملوحة ونتركه ليتسبك من 3-5 دقائق ونزينة بالريحان الطازج ويقدم مع الارز او المعكرونة وصحتين...

Monday, June 24, 2013

عصير مركزالفراولة والليمون

الي فترة ما عم بيصحلي اكتب اشي على المدونة بسبب الانشغال سواءا باعمال الكيك او البيت (اللي اتفقنا انه ما بتخلص). يعني على سبيل المثال امبارح ما كان عندي شغل في الكيك بس نكشت كم شغلة بالبيت (تعزيل داخلي) مثل خزانة الحمام وبتعرفوا كيف لما بتبدي ما بتعرفي توقفي لانه وببساطة بيصير متل السوسة...واكتشفت اني لازم وبرمضان ان شاء الله باعتبار انه فيه وقت كتير قبل الافطار اني اشتغل على التعزيل الداخلي واحاول اني اعمل نوع من الفلترة لاشياء كتير ما بدي اياها...هادي رح تكون مهمة شاقة لانه كلنا نميل الى تجميع الاشياء بشكل عجيب مع الزمن!!!!

اليوم النية ان شاء الله انه نطلع نفطر برة مع الاولاد وياسمين وخالد نازلين على البلد ليشتروا بعض تجهيزات عيد ميلاد هارون (ومعه سلطان) ان شاء الله يوم الاربعاء...رح يكون جمع عائلي بحت وفبه بعض النشاطات للاولاد وان شاء الله بشارككم الصور بعده....وبالمقابل انا وسلطان رح نشتغل بالمطبخ اليوم لانه عندنا شغل كتير للحفل واهمه الكعكة....

وبما انه اتفقنا انه نتشارك بوصفات تليق بالشهر الفضيل فوصفة اليوم تندرج تحت هاد الباب بالاضافة الى انها جزء من سلسة اصنعي في بيتك...
وصفة اليوم عصير مركز الفراولة والليمون...مش رخيص كتير اذا بتفكروا بسعر الفراولة والليمون خاصة هالايام بس هو فكرة حلوة ممكن نستغلها اذا عندك فراولة او لقيتيها على عرض ممتاز لانها بتنحط بالفريزر وممكن استعمالها لاحقا وازكى الف مرة من الباكيتات الجاهزة....

عصير مركزالفراولة والليمون
المقادير:
4 اكواب فراولة مفرومة
كوب عصير ليمون
كوب ونصف سكر
3 اكواب ماء

الطريقة:
في مطحنة الطعام او الخلاط اطحني الفراولة وعصير الليمون والاسكر
ضعيها في طنجرة واضيفي الماء وعلى نار متوسطة الى منخفضة الى ان تصل الى حرارة 165 ف...(من المهم ان لا تغلى ابدا وبعرف انه كتير منكم رح يقولوا بس كيف بدي اعرف الحرارة...بقولهم اشتروا ميزان ويفضل ميزان سكاكر (مختلف عن ميزان اللحم ) وسعره لا يتجاوز ال 4 دنانير وموجود بالسيفوي وكارفور... وهي صورته



ازيلي الرغوة اللي على الوجه وصفي الخليط جيدا من البذور بمصاه ناعم مع الضغط بالملعقة لاستخراج كل العصير
تترك لتبرد وتعبأ في مرتبانات زجاجية.
يمكن الاحتفاظ بها في الثلاجة لمدة اسبوع وفي الفريزر لمدة اطول
الكمية كانت حوالي 5 اكواب ونصف من العصير المركز

طريقة عمل العصير:
كمية من العصير مقابل كميتين ماء بس ملاحظتي مع التجربة ان يفضل تقللي الماء لغاية ما تتذوقيه عشان تتأكدي من الطعم فكل واحد فينا بيفضل الطعم بشكل مختلف من حلو الى اخف حلاوة...والازكى انه تضيفي صودا او سفن اب وصحتين...



Thursday, June 20, 2013

بيتزا بالخبز الفرنسي والدجاج وصوص الالفريدو

امبارح عملت دجاج مقلي على الغدا وزاد قطعتين وكان عندي خبز فرنسي من امبارح برضه فقرت اني اعمل بيتزا الخبز الفرنسي بال الفريدو صوص والدجاج...والطريقة سهلة كتير...


بيتزا بالخبز الفرنسي والدجاج وصوص الالفريدو
المقادير:
3/4 رغيف خبز فرنسي مشقوق بالعرض من النصف (اللي كان زايد عندي)
لصوص الالفريدو السميكة:
1/2 كوب كريما
1/4 كوب زبدة
1/4 كوب جبنة بارمزان مبشورة
1/4 ملعقة صغيرة بودرة الثوم
رشة ملح وفلفل اسود

2 صدر دجاج مقطع مكعبات اة اي من قطع الدجاج مفسخة
حبة بندورة مفرومة بدون ماء وبزر
2 كوب جبنة موزريلا
بعض اوراق البيزل الطازج مفرومة خشن للوجه

الطريقة:
توضع كل مقادير الصوص على النار وتحرك لتغلي وتتسبك قليلا
تفرد على الخبز ويوزع الدجاج على الخبز
تفرد الموزريلا ثم قطع البندورة على الوجه
توضع بالفرن على 180 من 7-10 دقائق لتتحمر قليلا وتسيح الجبنة
تقدم بعد توزيع البيزل الطازج على الوجه وصحتين



Monday, June 17, 2013

متبل باذنجان بالجوز واللبن والفليفلة

امبارح كنت معزومة على حفلة تخريج...في الواقع كانت حفلة دينية وفيها اناشيد بدل الاغاني وكانت ممتعة كتير ومختلفة ومميزة....وقبلها كان عيد ميلاد عمر ابن اخوي وكان كمان كتير حلو والاكل زاكي ولزيز...ورح اشارككم قريب بوصفة من وصفات مرت اخوي حبوها الاولاد كتير...وهي باردة ومنعشة في الصيف...
اليوم النية ان شاء الله اني اقضي الوقت مع الاولاد من الصبح ونطلع ونشتري بعض اللوازم وعلى الاغلب نتغدا برة....النا زمان مش طالعين مع سو وفرصة انه ما في شغل كتير اليوم....
ولانه رمضان قرب فقررت اني ان شاء الله ابدأ معاكم ومن الآن المشاركة باطباق نسبيا رمضانية ومناسبة للسحور او الفطور ان شاء الله. واذا حد فيكم حابب يشارك بوصفة بيقدر يبعتلي اياها وبنحطها مع صورة على المدونة...
 واذا بدنا نحكي عن شهر رمضان والاكل ما بنخلص بس (واحنا كلنا عارفين) انه المفروض انه الاكل مش هو رمضان فهو شهر العبادة والاعمال ...ولانه في وقت كتير قبل الافطار السنة (تقريبا متل السنة الماضية) فانا ناوية ان شاء الله اني اجهز (منيو) من الآن وبعرف انها ممكن تتغير بسبب العزايم او غيره بس الهدف هو اني:
1. ما احتار كل يوم شو بدي اعمل واقضي ساعة وانا بس بفكرشو بدي اطبخ
2. اني استعمل من الاشياء الموجودة عندي بالفريزر وخزانة المونة
3. اني اقدر اعمل تجارب واكلات جديدة من خلال المنيو وبدون ما اقعد متل الجاجة المقطوع راسها ادور بالوصفات الجديدة اللي حابة اجربها...
4. اني افضى لاعمل العبادات وغيرها من الاشياء اللي على قائمة الانتظار والها فترة طويلة..سواءا على مستوى البيت او غيره
ان شاء الله ...الله يقدرنا على الصيام والعبادة والطاعات...
اللي بميز رمضان ببيتي هو انه بنفطر كلنا (العيلة) مع بعض وبالتالي ما شاء الله السفرة بتكون عامرة بما لذ وطاب ومرات حد بيعمل الشوربة وحد الفتوش وحد تاني سمبوسك...الخ وعادة  بنتفق خلال النهار شو كل حد عامل عشان ما تتكرر الاطباق لانه مرة صدفت كلنا كنا طابخيين ملوخية ..!!!!!

النية اني اشتغل عليها هاليومين ورح اشارككم فيها ان شاء الله وزي ما حكيت...يحضيري الها لا يعني اني رح انفذ كل اللي فيها لانه مرات بيصير عزايم او بيزيد اكل...الخ

من الاطباق الجانبية اللي بحبها هو طبق المتبل...ووصفة اليوم لمتبل بالجوز المحمص واللبن والفليفلة المشوية...

متبل باذنجان بالجوز واللبن والفليفلة
المقادير:
حبة باذنجان مشوية ومقشرة (ولما تقشروا الباذنجان ما تحطوه تحت المي بس في صحن وغطوه ببلاستيك وخلوه ليبرد وبعدين التقشير بيصير سهل كتير وبتحتفظي بطعم الشوي وما بتدخلي مي زيادة على الاكلة)
حبة فليفلة حمراء مشوية ومقشرة
بصلة مشوية ومفرومة
سن ثوم مدقوق
1/4 كوب جوز محمص ومفروم
2-3 ملاعق لبن (ممكن اضافة المزيد اذا احتاج الامر)
ملح
عصير ليمون حسب الرغبة

الطريقة:
توضع كل المقادير في محضرة الطعام او الخلاط وتذوقيه لتري ان كان بحاجة الى اي اضافات من ليمون او لبن او ملح وصحتين


الصورة قبل رشة زيت الزيتون :)

Saturday, June 15, 2013

الحليب المركز المحلى البيتي من سلسة اصنعي في بيتك وميني مفن البيكان

خلينا نرجع اليوم لسلسة اصنعي في بيتك...كنت في درس الحلويات الماضي استعملت الحليب المركز المحلى...وكتير مرات لما بدنا نعمل وصفة بتحتاج لهادا النوع من الحليب ما بيكون عنا فبنضطر اما نبعت حدا على اقرب سوبركاركت ليجيب او بنؤجل الوصفة...برمضان الكريم احنا كتيربنعمل حلويات وكتير منها بيحتاج هادا النوع من الحليب...واغلبنا عنا حليب بودرة بالبيت وسكر وزبدة...صح؟ عشان هيك رح اخبركم انا كيف بحضروا بالبيت وبيكون جاهز للاستعمال في اي وصفة بتحتاج هالنوع من الحليب...

الحليب المركز المحلى البيتي
المقادير:
كوب حليب بودرة
2/3 كوب سكر
1/3 كوب ماء مغلي
3 ملاعق طعام زبدة او مارجرين مذوبة

الطريقة:
تخلط كل المواد في الخلاط لتتجانس ويمكن الاحتفاظ بها لمدة اسبوع في الثلاجة او 6 اشهر في الفريزر...وصحتين...
كيف بالله؟ لونة وقوامة وشكله متل الحليب الجاهز واوفر بكتير وسهل...

امبارح كان عند زوجي حدث هام وهو تجمع لاهل مصفاة البترول اللي عاشوا فيها كأهل وجيران ل 30 سنة من الستينات الى اوائل التسعسنات...حفلة رائعة جدا جمعتهم بعد عشرات السنين من الغياب عن بعض ورجعت ذكريات حلوة كتير على قلوبهم...الحفلة كانت في جاليري الاورفلي واللي تديره وتملكة عائلة صنوبر...احد العائلات اللي عاشت بالمصفاة...تكرموا واستضافوا التجمع اللي اجى عليه حوالي 300 شخص وكان في منتهى الترتيب والروعة...زوجي خالد من اشد المحبين لايام الطفولة والشباب في المصفاة وكان من رواد ترتيب هاللقاء...وعشان خيك قررنا نساهم ولو باشي بسيط في الضيافة فعملت 8 صحون من حلويات ميني مشكلة...في كل صحن كان فية ميني تارت زبدة الفستق والشوكولاتة، بسكوت الشوكولاتة المشقق بالسكر الناعم، معكرون جوز الهند، ميني بروفترول، كرات الكيك بالشكولاته باربع اشكال (سادة بالفارسميلا، بالفول السوداني، بجوز الهند وسمورز)


ولفيت كل صحن هيك

وفي هالتشكيلة في ميني مفن البيكان...متذكرين البيكان اللي جبته على العرض؟ يعني مش ملحقة وصفات...ههههه بس هادي الوصفة حلوة لانها بتجمع بين المفن والبيكان باي وبتنعمل في قوالب الميني مفن ...

ميني مفن البيكان
المقادير:
1/2 كوب طحين
كوب سكر بني فاتح
كوب ونصف بيكان مفروم خشن الى ناعم
2 بيضة
2 ملعقة صغيرة فانيلا
2/3 كوب زبدة بحرارة الغرفة
انصاف بيكان للوجة

الطريقة:
يخلط الطحين والسكر والبيكان
تخفق الزبدة والبيض وتضاف الفانيلا
تضاف المواد السائلة للجافة وتحرك بملعقة لتتجانس فقط (لا تخفقي زيادة)
توضع في القوالب المرشوشة جيدا (لانها اذا مش مرشوشة منيح ممكن تلزق) وتزين بحبة بيكان في الوسط
وفي الفرن الحامي على حرارة 175 لغاية ما تحمر الجوانب من 10-12 دقيقة
بسكين حاد نديرها على جوانب المفنز ونقلبها
وصحتين...

Thursday, June 13, 2013

فتة القرع الاصفر

صار لي فترة مش فاضية افتح الكومبيوتر او اقعد زي الناس واكتبلي اشي...الصيف الصيف بكل انشغالاته وعجقته الحلوة سواءا على الصعيد الشخصي او العملي...امبارح كان عندي درس في الحلويات وعملنا 4 انواع حلو منها نوع بصوصين...كان درس ممتع ومتفاعل من كل الستات والصبايا اللي شاركوا فيه...بوجهلهم شكر خاص...ولكل اللي حابيين ياخدوا الدرس مرة تانية ان شاء الله بحكي معكم وبرتبلكم شي قريب...

اليوم صحيت على الساعة 5:30...مش بسبب النشاط...بس بسبب ناموسة قرصتني بايدي الشمال بالزبط 7 قرصات بس!!! وفي الآخر صحيت على صوتها جنب وجهي مستعدة للهجوم...المهم راحت عليها لانها من كتر ما هي تقيلة مو عارفة تطير!!! ما علينا!! فقررت اني اضل صاحية واشتغل على طلبية بسكوت لعرسان ليوم السبت خاصة انه بيت سلفي جايين اليوم من السعودية والكل معزوم عندي على الغدا على منسف ان شاء الله...

اليوم حابة اشارككم بوصفة انا متأكدة كتير منكم بعرفوها ويمكن كتير ما بعرفوها وهي مناسبة لشهر رمضان الفضيل لانه كلنا منحب الفتات المختلفة برمضان سواءا على الفطور او السحور...الفتة اليوم هي فتة القرع الاصفر...مفيدة جدا وتغببر وبتسبه بطعمها فتة الحمص..

كنت اشتريت قرعة صغيرة قبل فترة وقررت اني اسلقها وافرز جزء لاكلات مستقبلية مثل الفتة واعمل الفتة على عزومة كانت عندي على العشاء يوم الاثنين الماضي

وكمان جزء منها راح باكل هارون والبزر تحمص بشوية زيت زيتون وملح بعد ما غسلته وخليته ينشف ليلة...


اما الفتة فطريقتها كالتالي:
فتة القرع الاصفر
المقادير:
2 كوب قرع اصفر مسلوق ومهروس
1/3 كوب طحينة (واذا حسيت بدها كمان بضيف شوي)
سن ثوم كبير مدقوق
2 ملعقة كبيرة لبن
عصير ليمونة كبيرة (يضاف المزيد حسب الرغبة)
ملح
6-8 شرائح توست مزال الحواف
القليل من ماء سلق القرع لتسقية الخبز
لحمة مفرومة  مقلبة بزيت للوجه
صنوبر مقلب بسمنة حيوانية (انا بحس انه هادا اللي بيعمل الفرق بالطعم وممكن تستعملي زيت زيتون)
بقدونس وسماق للتزيين

الطريقة:
يفرد الخبز في صحن التقديم ويسقى بالقليل من ماء سلق القرع ليطرى
في الخلاط يطحن القرع والطحينة والثوم واللبن والليمون والملح للحصول على قوام (يميل الى اليولة اكثر من قوام الحمص) ونتذوق لنرى ان كان يحتاج الى الليمون او الملح او الطحينة
يسكب فوق الخبز
يزين باللحمة المقلبة والبقدونس المفروم والسماق
نقلي الصنوبر بالسمن ونضعها ساخنة فوق الفتة
وصحتين

(الصورة كانت قبل ما اعمل الصنوبر)


Sunday, June 9, 2013

ساندويش الكابوناتا الايطالي

مش معقول الاولاد شو بيكبروا بسرعة!!! ما شاء الله!!! يعني ياسمين حبيبتي صارت تستعير من اغراضي وهذا يشمل كل شي ما عدا بعيد عنكم الاحذية وطبعا الملابس اللي ما بتناسب عمرها...اما كل شيء آخر فهو مباح....اليوم استمتعنا انا واياها بلعبة Dress up وساعدتني كمان بهارون وبترتيبات لعزومة بكرة ان شاء الله ...انشغال تام ما شاء الله بالصيف من عزايم (سواءا عازمين او معزومين) وحفلات تخرج واعراس...الله يديم الاستقرار والفرحة بقلوبنا...

وعلى سيرة الاولاد بيكبروا بسرعة...قرب عيد ميلاد هارون السنة ان شاء الله...وين الوقت راح؟؟؟ وطبعا ان شاء الله رح اعمله عيد ميلاد مع سلطان لانه سلطون قرر انه بده عيد ميلاده مع اخوه وانا كنت مبسوطة...مش بس لانه محترم وبيحب اخوه الصغير ، بس لانه ريحني من غلبة حفلتين...النية بنهاية 6 لانه بيصير سنة باذن الله في 26 الشهر...

واذا لاحظتوا على المقالات اللي بشارككم فيها على المدونة فاغلب الوصفات حاليا للسلطات والساندويشات وهادي احد ميزات الصيف في بيتي...بحاول اطبخ اشياء خفيفة وفي نفس الوقت ما اقضي وقت كتير فاتحة الغاز بسبب الشوب... وصفة اليوم لساندويشة نباتية باستخدام صوص انا بحبها كتير كتير واللي راح على مطعم سنترو اكيد اكلها لانها بتتقدم كمقبلات من المحل مع سلة خبز وهي الكابوناتا صوص... صلصة نباتية ايطالية ممكن تستعمل مع الباستا لو حبيتو او على وجه شرائح من الخبز الفرنسي كمقبلات او كحشوة ساندويشة متل اللي رح احكيلكم عنها اليوم...واذا عملت كمية منها فهي بتضل لغاية 2 اسبوع بالثلاجة او ممكن وضعها بالفريزر...

ساندويشات صوص الكابوناتا
المقادير:
حبة باذنجان متوسطة مقطعة مكعبات وسط ومقلية ومصفاة جيدا من الزيت
ملعقة طعام زيت زيتون
بصلة متوسطة مقطعة شرائح
علبة فطر مقطع شرائح
2 سن ثوم مقطع شرائح
1/2 علبة زيتون اسود شرائح
1/2 حبة فليفلة حمراء مفرومة ناعم
1/2 حبة فليفلة خضراء مفرومة ناعم
علبة رب بندورة 
3 ملاعق طعام خل عنب
1/2 1 ملعقة صغيرة سكر
1/2 ملعقة صغيرة زعتر
القليل من الماء 
شرائح جبنة ايدام او جودا

الطريقة:
يوضع زيت الزيتون في قدر على النار وتذبل البصلة على نار منخفضة حتى تصبح ذهبية قليلا
يضاف الفطر والثوم والفليفلة وتقلب مدة 5 دقائق لتذبل
يضاف الباذنجان وبقية المواد وتترك لتتسبك على النار  (منخفضة) مدة 1/2 ساعة
تقدم بحرارة الغرفة
توضع على خبزة وعليها شريحة الجبنة وتسيح عدة دقائق في الفرن...
وصحتين


الساندويش من الداخل...

Saturday, June 8, 2013

سلطة الزهرة المشوية

خلصت الامتحانات....يعني سعادة غامرة واكيد الاولاد اسعد مني!!! وهدا هو سبب انشغالي في اليومين الماضيين...فالاولاد كان عندهم خطط وكنت لازم اوصل واجيب...الخ زي كل امهات هالايام!!! اليوم ما كان جاي على بالي كتير أكل اشي فيه لحوم ...بس عندي كوسا من امبارح للعائلة الكريمة فقررت اعمل سلطة بسيطة بالخيار والبندورة والنعنع والبصل والجبنة النابلسية...

وعندي زهرة صغيرة فقررت اني اعملها سلطة الزهرة المشوية...زاكية كتير وتغيير واللي عامل رجيم بتناسبه متل هادي السلطة كتير لانها بتشبع وفيها فوائد كبيرة من اللبن والزهرةوالجوز...وما تخافوا...فيها كمون!!! :) يعني عشان النفخة!!!

سلطة الزهرة المشوية
المقادير:
رأس زهرة صغير مقطع زهرات صغار
رشة زيت زيتون وملح وكمون (لشوي الزهرة بالفرن) 
1/4- 1/3 كوب كرانبري مجفف 
1/4 كوب جوز مفروم محمص
1/4 كوب بقدونس مفروم
للصوص:
كوب لبن
ملعقة طعام عصير ليمون
رشة ملح
حبة ثوم مدقوق

الطريقة:
تشوى الزهرة بعد رشها بالزيت والملح والكمون في الفرن على حرارة 175 وتقلب من حين الى آخر حتى تبدأ بالتحول الى اللون الذهبي وتطرى قليلا
توضع في صحن التقديم وترش بالكرانبري والجوز
تحضر الصوص بخلط كل المكونات معا
توزع على الوجة ويرش البقدونس وتقدم...
وصحتين








Tuesday, June 4, 2013

واخيرا...بسكوت الشوفان بقطع الشوكولاتة...

يوم حافل جدا من الصبح...اكتشفت انه هويتي انتهت مدتها الها يومين والبنك اتصل امبارح قال لازم تيجي عشان نجدد معلومات الحساب ومعاكي الهوية ...!!! فكان لازم اروح من الصبح على الاحوال المدنية وبعدين على البنك...طبعا ما قدرت اطلع من البيت قبل الساعة 10 عشان الاولاد يكونوا رجعوا من المدرسة واترك هارون وانا مطمئنة انه في حدا يدير باله مع الشغالة...طبعا لما قلت لامي زعلت وقالتلي كانت جبتيه...بس هي شوية تعبانة فاختصرت...ما احسن الامهات!!!
المهم رجعت على البيت الساعة 1:45 دقيقة لانه الهوية اخدت ساعة ونص... وعشان ما اروح وآجي قضيت كم غرض ورجعت للهوية وبعدين على البنك...
ولانه الى زمان كتير حارمة الاولاد انهم يطلبوا اشي من برة فاستغليت الفرصة اليوم وبما اني تأخرت وما طبخت طلبنا الغدا من برة وبالتالي ما كان فيه شغل كتير في المطبخ ف... واخيرا وبعد ما رجعت صحللي فرصة اعمل بسكوت الشوفان بقطع الشوكولاتة لعيون صديقتي منال ...(مع اعتذاري منها لاني طولت عليها بالوصفة) وهادي الوصفة بالجوز وقطع الشوكولاتة بس ممكن تتحول الى بسكوت بالشوفان والزبيب والقرفة ورح اذكر البدائل في الوصفة نفسها..

بسكوت الشوفان بقطع الشوكولاتة
المقادير:
1/4 1 كوب طحين
ملعقة صغيرة ملح
1/2 ملعقة صغيرة كربونات
3 كوب شوفان
كوب قطع شوكولاتة
كوب جوز مفروم
(في حال اردت انها تكون بالزبيب والقرفة فبدلي كوب قطع الشوكولاتة بالزبيب واضيفي ثلاثة ارباع ملعقة صغيرة قرفة)
كوب زبدة بحرارة الغرفة (226 غم)
كوب سكر بني فاتح مضغوط عند القياس (يعني اضغطي على السكر لما تقيسيه بالكوب)
1/2 كوب سكر عادي
2 بيضة
2 ملعقة صغيرة فانيلا

الطريقة:
تخلط كل المقادير الجافة معا
تضرب الزبدة مع السكر بنوعية لتصبح خفيفة القوام
يضاف البيض واحدة كل مرة مع الخفق وتضاف الفانيلا
تضاف المواد الجافة وتحرك بملعقة خشب لتختلط
يؤخذ مقدار ملعقة طعام وتكور وتضغط براحة اليد قليلا وترتب في صينية مبطنة بورق الخبز ومتباعدة بحدود ال4 سم عن بعض
تخبز في فرن على حرارة 180 من 12-15 دقيقة حسب النضج من الاسفل
تترك لترتاح على صينية الخبز 5 دقائق (مهم) قبل رفعها على شبك معدني...

الريحة والطعم ولا اروع وهدول البسكوتات من النوع اللي طري شوي من النص...وصحتين...


Monday, June 3, 2013

جبنة الفتة بالزعتر والليمون

يمكن تحضير العشاء من الاشياء اللي كتير عائلات بتعتبروا اشي روتيني كل يوم وكمان في كتير عائلات بتفضل تنام خفيفة وما تتعشى...في عيلتي الموضوع مرة هيك ومرة هيك...في اغلب الاحيان العشاء بيكون اشي فردي لكل شخص الا اذا انا عاملة بيتزا او ساندويشات...الخ..وقليل ما نتعشى متل اولادي ما بيحبوا يسموه "عشاء كامل" :) عشان بيحسوا انه كل الحواضر بتنحط على السفرة فهو كامل..والكمال لله وحده...
المهم انه الاستاذ سلطان قرر انه بدو يتولى امور العشاء وخاصة انه تفرج على برنامج توب شيف استراليا وشاف اطفال اصغر منه بيعملوا اكلات فظيعة على رأيه يمكن في ناس كبار ما بيعملوها...فقرر يحضرلنا عشاء امبارح وانه يعمل بيض مقلي...وانا بعمل لهارون حمام فبعد ما خلصت اجيت لقيته فاتح اليوتيوب وبيطلع كيف يقلي بيض...وضلوا يحكي في الموضوع وانه كيف بدوا يضل يحضر عشاء كل ليلة...ان شاء الله!!!! ببقى اذكركم اذا استمر الموضوع!!!

المهم ضلوا يسألني اذا نزلت صور عشاؤه الفاخر :)

اهم اشي الفت نظركم لترتيب الخيار والبندورة...

اما انا فعملت طبق سريع وسهل جدا ولذيذ وخاصة برمضان على السحور من باب التغيير...وهو باستخدام الجبنة الفتة اللي لاحظتوا اني بحبها كتييييير...

جبنة الفتة بالزعتر والليمون
المقادير:
كوب جبنة فتة
بشر ليمونة صغيرة
ملعقة طعام عصير ليمون
حبة ثوم صغيرة مهروس
ملعقة صغيرة زعتر ناشف
5 ملاعق زيت زيتون

الطريقة:
تخلط كل المقادير معا في مطحنة الطعام او بشوكة وتقدم مع البطيخ :) مممممم



Sunday, June 2, 2013

سلوبي جوز الفيلادلفيا ستيك ساندويش

قربت العطلة!!!! شعور حلو كتير وفي نفس الوقت لأ!!!! ههههه يعني بس افكر انو الاولاد بيضلهم نايمين ومافي نشاط الا لنص النهار وما في نوم الا لآخر الليل بتعب!!! بس احسن من ادرس وادرسي!!! منيح اللي فيه هيك وهيك...بتمنى تكونوا صامدين بالامتحانات والله يوفق كل اولادنا وبناتنا...
واذا انتوا زيي ولاحظتوا اديش ما شاء الله الاولاد نفسهم مفتوحة بالامتحانات...ذرة رايحة وفواكة جاي وشوكولاته وكيك ونسكافيه والمطعم شغال...ومن اكتر الاشياء اللي بحبها اني اعملهم ساندويشات...بتشبعهم واحسن الف مرة واسرع من اتصلي باقرب مطعم واطلبي...
ساندويشات اليوم لزيزين كتير ومناسبين للصيف لانه اغلبنا ما بنحب نشغل الفرن او الغاز فترات طويلة وبما انه شهر رمضان قرب فكمان ممتازين للسحور...

اكيد كلكم بتعرفوا ساندويشات الفيلادلفيا ستيك وكتير منكم بتعرفوا السلوبي جوز ...ساندويشة اليوم بالنص بينهم وهي سلوبي جوز الفيلادلفيا ستيك ساندويش

 سلوبي جوز الفيلادلفيا ستيك ساندويش
المقادير:
1/2 كيلو لحم بيف مفروم ناعم
بصلة مفرومة
1/4 كوب صوص ستيك
كوب مرق بيف
فليفلة خضراء مفرومة ناعم (انا حطيت صفراء)
علبة فطر طازج مقطع شرائح
ملح، فلفل اسود
شرائح جبنة قشقوان او ايدام (والاصل بروفلون)
خبز برغر

الطريقة:
يقلب اللحم في طنجرة من غير زيت لانه فيهت دهن شوي وقلبيها لتستوي تماما
اضيفي البصل المفروم وقلبي عدة دقائق لتذبل البصلة
يضاف الفليفلة وتقلب ثم شرائح الفطر
نضيف صوص الستيك والملح والفلفل الاسود
نضيف المرق ونخفض الحرارة فور ان تغلي...
تترك بين 20-25 دقيقة لتتسبك
نضع شريحة من الجبنة على الخبز ونحمصها قليلا في الفرن الى ان تذوب (عدة دقائق)
نضع ملعقة كبيرة من اللحم فوقها وتقدم مع البطاطا المقلية وصحتين...