Thursday, May 30, 2013

خلطة شوربة الكريما ومعكرونة الكوردون بلو

اليوم الجزء التاني من سلسلة "اصنعي في بيتك" ورح اشارككم كيف تعملوا خلطة شوربة الكريما لكل اشي بدو شوربة كريما جاهزة وخاصة الوصفات الاجنبية اللي بتتطلب علبة شوربة كريما الماشروم او الدجاج او البروكلي...الخ والحلو في الموضوع انه بتعملي مرتبان وبتخليه بالثلاجة لما بدك تستعمليه في الاكل وحطي عليه ليبل تبين طريقة الصنع عشان ما تنسي وطعمته زاكية كتير...

خلطة شوربة الكريما العامة
المقادير:
كوب حايب بودرة
3/4 كوب نشا
1/4 كوب بودرة دجاج
4 ملاعق طعام بصل مجفف مقطع (كتوفر عند البهارات)
ملعقة صغيرة ريحان ناشف
ملعقة صغيرة زعتر ماشف
ملعقة صغيرة فلفل اسود

الطريقة:
تخلط المقادير معا في مرتبان ولعمل الشوربة خذي 1/3 كوب من الخليط مع 1/4 1 كوب ماء وتغلى معا على النار لتسمك (الكمية بدل علبة شوربة) وحسب الوصفة اللي بدك تعمليها دوقي الطعمة اذا بدك تضيفي ماء او حليب.



اليوم الوصفة الرئيسية للفائف المعكرونة كوردون بلو ورح نستخدم الخلطة اللي للشوربة وان شاء الله ببقى بنزل كمان وصفات باستخدام هذه الخلطة.

لفائف معكرونة الكوردون بلو
المقادير:
14 شريحة لازانيا مسلوقة بحيث يمكن لفها رول بعد الحشي
للحشو:
4-5 صدور دجاج مسلوقة ومفسخة
7 شرائح حبش مدخن مقسومة من النصف (يعني 14 قطعة)
2 كوب جبنة امنتال مبشورة
للصوص:
كمية ونصف من الشوربة معدة حسب التعليمات
1/2 علبة جبنة كريما
1/2 كوب كريما
كوب مرق دجاج من سلق الدجاج

الطريقة:
لعمل الصوص تخلط كل المقادير على النار وتتحرك لتغلي وتسمك وترفع (تذوقيها لتعديل الملوحة)
يضاف 1/3 كمية الصوص للدجاج
تؤخذ شريحة لازانيا وتحشى بالقليل من خلطة الدجاج ثم الجحبش والجبنة ونلفها رول وتصف في صحن بايركس مدهون برشة زيت والوجة المفتوح للاسفل ونستمر الى ان تنتهي الكمية مع ترك القليل من الجبنة للوجة
تسكب بقية الصوص ثن الجبنة وتوضع في فرن على حرارة 175 من 25- 30 دقيقة وتقدم مع رشة بقدونس على الوجة وصحتين


Tuesday, May 28, 2013

رحلة تسوق موفقة وبيتزا التفاح

امبارح وفي رحلة تسوق موفقة الى السيفوي...كان الهدف اني اشتري شراب الذرة المركز عشان اعمل عجينة سكر لطلبية كيك عندي بكرة...واحلى ما في الموضوع اني كنت رايحة وانا في قمة الاسترخاء لاني طبخت شاكرية وخلصتها قبل ما اطلع ونيمت هارون وكمان الاولاد كانوا بيدرسوا للامتحانات...فكنت مرتاحة وطلعت من البيت الساعة 12 ورجعت 1:45 وحسيت حالي لفلفلت منيح ودورت على اي فرصة تسوق واستفدت منها والاحلى انه هارون صحي بس دخلت على البيت فكانت رحلة تسوق خالية من اي شعور بالذنب او القلق او الاستعجال...ومن الاشياء اللي اشتريتها وخلتني في قمة السعادة 7 اكياس بيكان (اللي كانوا ضايلين) كل كيس 226 غم ب 2.70 قرش بس!!!!! يعني الكيلو ب 10.80 قرش!!!! وهو بارخص مكان ب 25 دينار للكيلو. مدة الانتهاء بشهر 7 بس فعليا فتحت باكيت والريحة فرش وحطيتهم بالفريزر عشان يضلوا بطعم ممتاز...وووهههو!!! واشتريت اشياء تانية كمان اشي على العروض واشي لأ بس كنت سعيدة بالنتيجة النهائية وخاصة بالبيكان....قادرين تتخيلوا معي فطاير البيكان تلوح في الافق...هههههه!!!

وقبل امبارح باليل (ولأ مش اغنية فضل شاكر) اجاني المراق وقررت اعمل توبرز لكب كيك للبيبي والعرسان والنتيجة كانت هالكب كيك هاد:




وحضرت شوية شغلات مشان كيكة البرغر اللي طلبيتها اليوم وببقى اشارككم الصورة...
اليوم وصفة حلو زاكية جدا جدا...بالصيف والشتاء...بيتزا التفاح..

بيتزا التفاح
المقادير:
عجينة باي اما جاهزة او معمولة بالبيت بالطريقة اللي بتحبيها
2/3 كوب سكر
3 ملاعق طعام طحين
ملعقة صغيرة قرفة
3 تقاحات خضر كبار مقشرين ومقطعين مكعبات
للوجة:
1/2 كوب طحين
1/3 كوب سكر بني
1/2 كوب شوفان
ملعقة صغيرة قرفة
1/2 اصبع زبدة نوع جيد
للوجة: صوص كراميل اضغطي على الكامة للذهاب الى الوصفة باللغة الانجليزية على المدونة
بوظة فانيلا

الطريقة:
يحمى الفرن الى حرارة 175 مئوية
تفرد العجينة بشكل دائرة في صينية بقطر 24 سم تقريبا
يخاط السكر والطحين والقرفة والتفاح وتوزع على الوجة
تخلط مكونات الوجة وتفرك وتوزع فوق التفاح
تخبز من 30-35 دقيقة
تقطع مثلثات مثل البيتزا وتقدم مع صوص الكراميل والبوظة..





Friday, May 24, 2013

باييلا

اسبوع حافل جدا ولسة الامتحانات باولها...اليوم وبالرغم من حرارة الطقس وانه النية الروحة على المزرعة عشان الاولاد يسبحوا بس ما صار نصيب على الاقل الي ولهارون وياسمين عشان الامتحانات...مع اني كتير كنت حابة نروح...على كل حال الايام جاي ان شاء الله..بكرة انشاء الله عندي درس في الاكل المكسيكي وتسليم كعكة حلوة لبنات توأم حلوين...
كتير كنت حابة ابلش بعض المشاريع المنزلية زي ما كنت حاكية بمقال سابق بس من كتر الانشغال ما قدرت او على الاقل النية انه الزراعة لقواوير في الجنينة تكون يوم الاحد ان شاء الله...كتير متحمسة انه احط زهور جديدة برة ...
المهم متل ما وعدتكم بوصفة الباييلا...وهي وصفة اسبانية اصلها استخدام بواقي اللحوم لعمل طبق ارز غني بالنكهات وممكن الاستغناء عن الجمبري للي ما بيحبوا الاكل البحري (مع انه زاكي كتير ) وممكن استخدام المحار..

باييلا
المقادير:
2 ملعقة طعام زيت زيتون
1/2 كيلو جمبري مقشر ومنظف
اصبع سجق حلبي عريض مقطع على زاوية (يعني بالورب)
بصلة وسط مفرومة وسط
3 سن ثوم مفروم
2 كوب ارز امريكي
ملعقة صغيرة بابريكا
1/2 ملعقة زعفران منقوع بالقليل من الماء او كركم
ورقة غار
3-4 كوب مرق دجاج
حبة فليفلة حمراء مفرومة
بشر ليمونة
علبة بندورة مفرومة
كوب بازيلا مفرزة ومسيحة
للدجاج ونقعه:
1/2 دجاجة مقطعة بعظمها وبدون جلد وبتقطع الصدر من النصف بالعرض ويقطع الفخد الى قسمين
2 ملعقة طعام زيت زيتزن
ملعقة طعام بابريكا
2 ملعقة صغيرة زعتر
ملح، فلفل اسود

الطريقة:
تنقع الدجاج قبل بليلة
في مقلاة واسعة (يجي ان تكون واسعة جدا وهذا الاصل) بس مش آخر الدنيا اذا عملتوها بطنجرة بس الفكرة انها تتقدم مثل الصورة بنفس الطنجرة او المقلاة الواسعة العميقة)
نضع ملعقة زيت الزيتون ونقلب الجمبري ليستوي (4-5 دقائق ويرفع)
نضيف الملعقة الثانية من زيت الزيتون ونضيف الدجاج ونحمره على كل الجهات  ونقلبه جيدا ثم نضيف السجق  ونقلب دقيقة ثم نضيف البصل ونفلب لتصبح البصلة شفافة اللون ثم نضيف الثوم والفليفلة والبابريكا والكركم او الزعفران وبرش الليمون ونرش الكل بالملح والفلفل الاسود ثم نضيف الارز المنقوع والمصفى والبندورة المفرومة وورقة الغار والمرق لغمر الارز ليستويوعندا تغلي نخفض الحرارة ونغطيها 3/4 تغطية وتركها ليشلرف على النضج ثن نضيف البازيلا ونتركها دقيقتين ثم نصف الجمبري وتقدم وممكن رش الوجه بالبقدونس المفروم...والف صحة وهنا...






Thursday, May 23, 2013

عزومة وبارفيه الجلو السهل جدا

امبارح كان عندي عزومة على العشاء متل ما خبرتكم قبل اسبوع والحمدلله كانت حلوة ولطيفة والاكل زاكي...المنيو كانت:
محشي كوسا وورق دوالي مع شرحات تحته
فخدة خاروف مسحبة ومحشية بالبصل المكرمل والفطر مع خضار مشوية على جنب وصوص جريفي
دجاج تكا ماسالا مع ارز هندي بالثلاث الوان والنكهات

والاطباق اللي ما لحقت اصورها:
فطيرة الراعي بالبطاطا
سلطة عربية
سلطة البحر المتوسط
متبل كوسا

وللحلو كان فيه:
كعكة جوز الهند
بيكان باي
وبارفية الجلو الكريما

وبطيخ ومشمش

الحمدلله على النعمة...ومتل ما شايفين اديش بارفية الجلو والكريما شكله حلو وبصراحة سخيف...بتعملي الجلو وبتخليه يجمد وبتخربيه بالمعلقة (عشان يصير مثل كتل) وبتخفقي كريما (سائلة او بودرة) وبتوزعي بالكاسات شوي كريما وشوي جلو...الاولاد خلصوا عليه وخفيف وسهل ومنعش وسعرة معقول وكمان ببرد على القلب بالصيف...

بتواصل معكم بكره ان شاء الله في مقال جديد وطريقة الباييلا الاسبانية...عشان الحبايب واللي طلبوها مني واذا الله قدرني بيكون فيه كمان جزء من سلسة اصنعي في بيتك"

مع حبي..
منال

Monday, May 20, 2013

سلسة "اصنعي ببيتك" لمدة اسبوع وساندويش الجبنة المشوية والبصل

اليوم حابة اشارككم سلسة من الاشياء اللي ممكن تنعمل بالبيت وباقل التكاليف وبتوفر وقت وجهد وفلوس وكمان ممكن تكون هدية حلوة تاخديها لامك، اختك، صاحبتك...الخ. كل يوم ان شاء الله وابتداءا من اليوم  رح احط وصفة او تنتين كل اسبوع لتحضير اشي احنا ممكن نشتري من برة بالبيت. نش بس لانه اوفر وكمان بتعرفي شو حاطة فيه ومن غير المواد الحافظة اللي الله بيعلم شو هي واللي اغلبنا لما بيتطلعوا على لائة المكونات ما بيعرفوا يلفظوها...!!!
الوصفة الخاصة باليوم هي معجون الزنجبيل والثوم. مش قصة كبيرة لانه ممكن دائما تحطي ثوم وزنجبيل في الاكلة اللي بتقول وصفتها مثلا: ملعقة طعام من معجون الزنجبيل والثوم. بس انا بعرف كتير ستات بيحبوا يلتزموا بالوصفة بحذافيرها وبالتالي بيروحوا على السوبر ماركت يدوروا على معجون الثوم والزنجبيل واما بيلاقوه وبيكون سعر مرتبان صغير فوق الدينار وشوي او ما بيلاقوه. وهذا النوع من المعاجين يستخدم في الاكل الهندي والشرقي كتير.. وهي الوصفة:

معجون الثوم والزنجبيل
المقادير:
كميات متساوية من الثوم والزنجبيل
ملعقة كبيرة زيت نباتي
الطريقة:
تطحن المواد في الخلاط لتصبح كالمعجون
تحفظ في الثلاجة بمرتبان مدة اسبوعين او في الفريزر لمدة اطول (وانا بقول اذا ما بتستعمليها كتير حطيها بالفريزر وجمديها بقوالب الثلج وبعدين قيميها من القوالب وبكيس وكل ما بدك بتطلعي واحد)


اما طبق اليوم فهو ساندويشة زاكية للعشا...واذا انتوا زيي فبتحتاروا شو تعشوا الولاد اشي زاكي وسهل ومفيد لانه بغض النظر عن المايونيز اللي في الوصفة فالجبنة مصدر هام للكالسيوم...

ساندويش الجبنة المشوية بالبصل
المقادير:
14 شريحة توست
باكيت جبنة شدر 220 غم مبشورة (من النوع الحاد) وممكن تستعملوا اي جبنة قوية في الطعم وبتسيح مثل امنتال
4 ملاعق كبيرة مايونيز (ممكن تقللي الكمية)
بصلة خضرا متوسطة مفرومة ناعم
ملح

الطريقة:
تخلط المقادير وتوصع كميات متساوية منها على 7 شرائح توست وتغطى بالسبع شرائح الباقية وتوضع انا على مقلاة غير لاصقة او الجريل الكهربائي الى ان تصبح ذهبية وتسيح الجبنة وصحتين...

 مقطع من الداخل والجبنة سايحة






Saturday, May 18, 2013

سلطة الخيار بالشبت والجبنة

الحمد لله بحب اخبركم انه بيتي تعزل بشكل ممتاز (اعتقد!!!) بس ضايل نعيد على الشبابيك الاسبوع الجاي بعد الشتا...بدي استمتع باليومين اللي جايين ان شاء الله لانه يوم الثلاثاء بتبدأ امتحانات آخر السنة عند الشباب!!! جد وين الوقت راح!! وبعتقد اني مثل كتير ستات عنا علاقة حب وكره مع المدرسة...يعني جد انها بتضب الاولاد نص نهار فما بتضلك قلقانه انهم مقضيينها نوم وكسل وبتعملي 7000 اشي الصبح وهم بالمدرسة...وفي نفس الوقت بكره ادرس واسمع واضلني اعيد اسطوانة روح ادرس...روحي ادرسي...آآآه...اظن انه كتير منكم بشعروا بهادا الشعور!!!

المهم اني لا اتطلع مطلقا للاسبوعين الجايين من ناحية الامتحانات والله يعينا ويعينهم ويوفقهم وينجحهم. اما على صعيد الاعمال المنزلية فحابة ابلش هادا الاسبوع بشوية مشاريع منزلية ديكورية ..(اذا كانت هذه كلمة!!!) في عندي حيط بدوه تعليق صورة عليه ولازم زراعة بعض الاماكن في الجنينة وكم قوار على البرندة. وعندي عزومة على العشا ان شاء الله يوم الاربعاء واللي بيعرفوني بيعرفوا اديش بحب العزايم...كانوا صاحباتي في الشغل ينصدموا من حماسي للعزايم :)


امبارح الحمد لله قضينا يوم لطيف بالمزرعة مع كمشة اولاد :) وزي ما حكتلكم المرة الماضية انه من اكتر الاشياء اللي بحبها بالصيف والروحة على المزرعة (او رحلة) السلطات اللي ممكن الواحد يعملها...يعني خلينا نطلع بره قالب السلطة اليومية التقليدية...سلطة اليوم منعشة كتير وخفيفة وما بدها خضرة غير خيار وبصل (بفضل احمر) وشبت ونعنع...وهي الوصفة:

سلطة الخيار بالشبت والجبنة
المقادير:
5 حبات خيار وسط مقطع بالطول ثم قطع كبيرة شةي
بصلة حمراء صغيرة مقطعة شرائح رفيعة
2-3 ملاعق طعام نعنع مفروم
2-3 ملاعق طعام شبت مفروم
زيتون اسود (اختياري) انا ما حطيت
1/2 كوب جبنة فتة

الصوص:
2 ملعقة طعام خل عنب
2 ملعقة طعام عصير ليمون
1/2 ملعقة صغيرة اورجنو
6-7 ملاعق طعام زيت زيتون
ملح

الطريقة:
تخلط مقادير السلطة وتوزع عليها الصوص وتقدم وصحتين...


Wednesday, May 15, 2013

لب الكوسا بالثوم والنعنع

اتفاجأتوا بالطقس اول امبارح؟!! طيب...زعلتوا على تنظيف الشبابيك اول امبارح؟!!!!!!! آه ما سكرت الاباجورات!!! بكره اسكرهم والدنيا لسه فضا... :)
الحمد لله على الشتاء...نعمة كريم ...ويا الله بنعيد تنظيف الشبابيك الاسبوع الجاي...ما بدهم كتير بما انهم انعملوا امنيح...
اوكي...آخر اخبار مسلسل المطبخ...الامور ممتازة وعلى الجدول تمام...امبارح عملنا كل شي على القائمة بس عملنا فرن واحد مش الاثنين لانه كان فيه غسيل وما لحقنا..زائد انه استاذ هارون كان مش على بعضه اليوم وقرر ينكد وينكد...الله يهديه...
اليوم الغداء مجدرة تحت طلب عنيف من السيد سلطان ونق ونق ونق...(مش عارفة شو مالي اليوم بكرر حالي!!!) وادامي يومين مليانين شغل ان شاء الله لانه في كب كيك للمدرسة لليوم المفتوح السبت) بالاضافة الى استضافة عدد من الاولاد والبنات الحلوين من اصحاب واقارب بوم الجمعة ان شاء الله في المزرعة طبعا بالاضافة الى الشغل اليومي الاعتيادي واحتمال عزومة الاسبوع الجاي ان شاء الله...

الوصفة اليوم طبق مقبلات سهل كتيرفي منكم بيعملوا ويمكن في ناس ما بتعملوا...لب الكوسا بالثوم والنعنع...هو طبق ممتاز للاستفادة من لب الكوسا لما تتقور للحشي (عشان ما نرمي اشي) وصحي وسهل ومنعش بالصيف

لب الكوسا بالثوم والنعنع
المقادير:
كمية من لب الكوسا (انا كانوا من 15 حبة)
بصلة صغيرة مفرومة ناعم
ملعقة طعام زيت زيتون
سن ثوم مدقوق
حفنة من النعنع الطازج مفروم وممكن استخدام النعنع الناشف بحدود ملعقة صغيرة

الطريقة:
نذبل البصلة في قدر على النار بملعقة الزيت ليصبح لونها شفاف
نضيف لب الكوسا ونرش الملح ونخفض الحرارة ونتركها لتستوي (لن يكون وقت طويل ولكن من المهم التشييك عليها كل فترة وتقليبها ورشرشتها بالماء ان احتاج الامر الى ان تنضج الكوسا)
يضاف الثوم والنعنع وترفع عن النار
وتقدم بحرارة الغرفة

وصحتين...جد طبق اقتصادي، موفر (لانها طلعت من اكلة تانية وصحية جدا)


Monday, May 13, 2013

كب كيك بالاوريو وزبدة الفستق...مشروع مدرسة

كم واحدة فينا محظوظة بوجود اشخاص رائعين في حياتها بيخلوا كل شي صعب اسهل وبيفكروا فينا دائما ؟ الحمدلله انا محظوظة كتير من هادي الناحية وخاصة بوجود امي (الله يعطيها الصحة والعافية) لانها كل ما تنزل على السوق او تروح مكان الا تجيبلي معها اشي او تعملي اشي...من الادوات الجديدة اللي جابتلي اياها ويمكن في منكم عندهم اياها هي اداة بتشرح البطيخ الى شرائح...بدها ضغط شوي بس كل شرحة بتكون مثل الثانية وهي صورتها
هي فعليا مثل الاداة اللي بتقطع التفاح بس كبيرة :) شكرا ماما على تفكيرك الدائم فيي وحبك اللي ما بيخلص...بقدر اتخيل شكل البطيخة هيك بالمزرعة وجمعة الاولاد حولها عشان كل واحد ياخد شرحة :)

مثل ما وعدتكم اني رح اشارككم بوصفة لكب كيك لزيز عملته مع ياسمين مشان المشروع اللي كان للمدرسة واللي كان Presentation بالانجليزي عن اي موضوع بحبوه واختارت هي وزملاءها انهم يتعلموا يعملوا كب كيك...التجربة كانت حلوة والنتيجة علامة ممتازة بالمشروع والطلاب استمتعوا بالكب كيك..صحتين

ولانه في الواقع هو كب كيك شوكولاتة بس فيه بسكوت اوريو وزبدة الفستق فقرروا يسموه Oreonut Cupcake يعني بين الاوريو والبينت بتر...وهي الوصفة:

اوري نت كب كيك
المقادير:
2 كوب سكر
3/4 1 كوب طحين
3/4 كوب كاكاو
1/2 1 ملعقة صغيرة بيكربونات
1/2 1 ملعقة صغيرة بيكنغ باودر
1/2 ملعقة صغيرة ملح
2 بيضة
2 ملعقة صغيرة فانيلا
كوب حليب
1/2 كوب زيت
كوب ماء مغلي

للكمية نحتاج الى 60- 64 بسكوت اوريو 
كمية من زبدة الفستق

الطريقة:
يحمى الفرن الى 175 درجة
تبطن صينية الكب كيك بورق الكب كيك
يؤخذ مقدار 1/2 ملعقة كبيرة من زبدة الفستق وتفرد على بسكوتة الاوريو وتوضع فوقها بسكوتة اخرى وتوضع داخل الورقة وهكذا لتنتهي الكمية (حوالي 32 كب كيك)
تخلط المواد الجافة
تخلط المواد السائلة ما عدا الماء
يضاف السائل للجاف ثم كوب الماء المغلي وتخفق دقيقتين لتتجانس
يسكب مقدار حوالي 1/3 كوب من العجين فوق كل بسكوتة
تخبز لترتفع وتجتاز اختبار فحص الكيك من 15-18 دقيقة
وتقدم...
وهي منظرها من الداخل






Sunday, May 12, 2013

ناتشوز البيتزا...بين ايطاليا والمكسيك

ها قد عدنا لدراما الطقس...!!! يعني انا والاباجورات عم نلعب "طلع نزل" (بدل عالي واطي)...بس فهمتوا ليش...يعني بعد كل التنظيف  الاسبوع الماضي بيكون اشي محزن اذا بتشتي طين زي المرة الماضية...

تم انجاز المهام على قائمة اليوم والحمدلله...وللتأكيد على الانجاز حماتي علقت اول ما دخلت البيت وسالتني اذا عاملة ترتيب جديد بغرفة الضيوف...قلتلها تعزلت بس!!! المهم انه نكشت القواوير وغسلت البرادي وعلقتهم والباقي من تمسيح وشطف وغيره...بتقدروا تشموا ريحة النظافة...ما احلاها!!!

امبارح العصر اشتريت مسلتزمات البيت ومنها كوسا فكان اليوم الغدا كوسا وورق دوالي...لذيذ جدا ومناسب للطقس....وكله انعمل اليوم مع التعزيل...الحلو كان بطيخ بارد :) 

اليوم رح اكون العصر مشغولة بعمل طبق لصف ياسمين وهو كجزء من واجب عليها رح اشارككم فيه غدا ان شاء الله...اما طبق اليوم فهو من ازكى والذ وبضمنلكم من الاطباق اللي العيلة والاصحاب رح يطالبوا فيها دايما...مين قال ناتشوز؟؟؟؟ آه بس مش مكسيكي!!! اليوم الوصفة لناتشوز البيتزا...

ناتشوز البيتزا
المقادير:
للصوص:
1/2 1 ملعقة طعام زبدة
1/2 ملعقة طعام زيت زيتون
2 حبة ثوم مهروس
1/2 كوب كريما طبخ
1/4 كوب حليب
1/4 كوب جبنة بارمزان
ملح، فلفل اسود
للناتشوز:
باكيت تشيبس تورتيلا نوع Restaurant  Style (نوع بدون نكهات قوية)
حبة فليفلة خضراء وسط مفرومة
1/2 علبة ببروني او سلامي مفرومة
بصلة صغيرة مفرومة ناعم
1/2 علبة زيتون اسود شرائح
كوب جبنة موزريلا وشدر مخلوطة

الطريقة:
توضع الزبدة والزيت في قدر صغير على النار ويضاف الثوم ويقلب قليلا ثم يضاف الكريما والحليب وتحرك ليغلي ثم ترفع عن النار ويضاف الجبنة البارمزان والملح والفلفل الاسود
يفرغ الشيبس في صحن بايركس
تسكب فوقه الصوص
تضاف بقية المكونات وتوزع انتهاءا بالجبنة
تخبز على حرارة 180 مدة 10-12 دقيقة حتى تسيح الجبنة ويقدم وصحتين






Saturday, May 11, 2013

سلطة وسائل تنظيف البشرة من المكياج

اجت العطلة الاسبوعية واعترااااااااف ...تكاسلت شوي...يعني مش كل اشي انعمل حسب جدول التعزيل بس مش رح اموت حالي بالآخر "العمر بخلص والشغل ما بيخلص"...المهم انه اللي ضايل من شغل الاسبوع الماضي هو:
- نكش الزريعة
- غسيل برادي غرفة الضيوف
- تعزيل غرفة الضيوف (ما انعمل لاني سرقت ساعة نوم زيادة امبارح الصبح وبعدين طلعنا مع الاولاد من الصبح)

مش كتير اشياء بس ان شاء الله بعوض الاسبوع الجاي
ابتداءا من الغد جدول الاسبوع بالاضافة للشغل اليومي  ان شاء الله هو:
يوم الاحد: (الاشياء الباقية من الاسبوع الماضي)
- نكش الزريعة
- غسيل برادي غرفة الضيوف
- تعزيل غرفة الضيوف 

يوم الاثنين: الحلقة الاولى من مسلسل المطبخ :)
- تغيير الجرايد على اسطح الخزاين ومسحها (بحط جرايد عشان الغبر...امي بتعمل هيك وحماتي كمان :)
- تنظيف عميق للخزاين العلوية (كل شي بيطلع، بتنمسح الرفوف وابواب الخزاين من جوة وبرة)
- اعادة ترتيب اي ارفف والتخلص من اي ادوات غير لازمة (مكسورة..الخ)

يوم الثلاثاء:
- 1/2 الخزاين السفلية مع الفرنين
- اعادة ترتيب اي ارفف والتخلص من اي ادوات غير لازمة (مكسورة..الخ)

يوم الاربعاء:
- بقية الخزاين السفلية
- زيح الثلاجة وتنظيفها (رح يكون سهل لانها مش زمان انعملت
- شباك المطبخ

وطبعا وانا عم بكتب عم بفكر اني صح عزلت الغرف بس فعليا ما دخلت بتفاصيل يعض المحتويات مثل خزانة الصحون اللي بغرفة السفرة...وقبل ما ابدا اكتئب قررت اني اخصص الاسبوع اللي بعده لهادا الموضوع...

يوم الخميس: الحلقة الاخيرة بالمسلسل :)
- مسح البابين اللي بالمطبخ
- تنظيف عميق لكراسي طاولة الاكل والطاولة
- فرك الارض بالصابون النابلسي
ولانه اغلب هاد الشغل رح يكون من البنت اللي عندي فيمكن
- اعزل خزانة الصحون...ما بوعد!!!

يوم الجمعة....
استراحة :)

امبارح طلعنا مع الاولاد ومن اكثر الاشياء اللي بحب اعملها بالطلعات (على المزرعة) هو السلطات بالجو الدافي بتنعنش...اليوم الوصفة وصفتين..واحدة لاشي ما اله علاقة بالاكل (وصفة سائل مزيل للماكياج بتكلفة قروش مقارنة باللي بنشتريه وفعععععال :) والثانية وصفة سلطة الذرة الخفيفة والمنعشة مع الجبنة الفتة....

سلطة الذرة والفتة
المقادير:
2 علبة ذرة مصفاة
حبة صغيرة فليفلة حمراء مفرومة وسط
حبة صغيرة فليفلة خضراء مفرومة وسط
1/4 ضمة كزبرة مفرومة ناعم
بصلة خضراء مفرومة ناعم
1/2 الى كوب جبنة فتة مفرومة مكعبات (حسب اديش بتحبي فيها جبنة)
للصوص:
1/4 كوب عصير ليمون
1/2 كوب زيت زيتون
ملح وفلفل اسود

الطريقة:
تخلط مكونات الصوص
تخلط مكونات السلطة ما عدا الجبنة
تضاف الصوص حسب الرغبة
 تضاف مكعبات الجبنة وصحتين....سهلة كتير ولذيذة ومنعشة وخفيفة على الجيبة والمعدة...مش هيك!!!



سائل تنظيف البشرة من الماكياج
المقادير:
كوب ماء
1/2 1 ملعقة طعام شامبو اطفال
1/8 ملعقة طعام زيت اطفال

الطريقة:
تخلط كل المكونات في زجاجة ويوضع القليل على قطنة لمسح الماكياج









Thursday, May 9, 2013

دونتس النيوتيلا...

النشاط عال والحمدلله على صعيد العمل في المنزل...واذا بدي اراجع جدول الاشياء اللي حابة اخلصها هالاسبوع وما تم انجازه واللي باقي فهو:
  1. غسل الحرامات (والحمدلله هي خفيفة) خلص
  2. تهوية كل الفراش من لحف ومخدات خلص
  3. غسيل البرادي (غرف الاولاد والضيوف والقعدة) باقي غرفة الضيوف والقعدة
  4. فرك الارضيات (عندي البلاط بده هيك تقريبا كل شهر بالصابون النابلسي المبروش) خلص غرف النوم والحمامات والمكنب
  5. الشبابيك (والحمدلله هدول بينعملوا كل اسبوع فما كتتير تبهدلوا مع الشتوة الاخيرة) خلص
  6. تبديل الملابس الشتوية بالصيفية للاولاد خلص
  7. نكش قواوير الزريعة للتهوية وتسميدها لسة
  8. اي شي تاني ممكن ينضاف اذا حسيت لازم  (تعزيل خزانتي ... خلص)
يوم الخميس:
- شباك غرفة القعدة وغسيل البرداية وشباك الحمام فيها
- مسح لكل الكنب من الداخل 
نكش قواوير الزريعة للتهوية وتسميدها

يوم الجمعة:
في الوقت اللي بيكون الكل نايم الصبح:
- غرفة الضيوف وشبابيكها والبرادي 

وهيك بكون خلصت البيت ما عدا المطبخ وغرفة الغسيل ان شاء الله الاسبوع الجاي ابتداءا من الاحد لاني رح اكون السبت اجازة من شغل البيت...هيك قررت!!!!

امبارح قررت اني اعمل دونتس...مش كتير مناسب للصيف بس لانه كان في اصحاب للاولاد جايين فحسيت انه الانسب...فعملت نيوتيلا دونتس بس قبل ما اشارككم الوصفة بحب اني ابين الملاحظات التالية:
- الوصفة للكيك دونت...يعني ما في خميرة وبالتالي الطعم اقرب للكيك من العجين
- انا والبيض مش كتير حبايب والوصفة فيها معلقة فانيلا وانا بحط 2
- بعد عدة تجارب قررت اني اعملها مقطعة صغير عشان اضمن تستوي احسن
- الوصفة تتطلب انه تغطسيها بسكر عادي وهي سخنة عشان يغطي الدونت وجربت بالسكر الناعم ما عجبني وهو سخن...لقيتة بيلبط عليه فممكن وهو بارد اذا بدك تستعملي السكر الناعم
- عندي ملاحظة على كل الوصفات اللي بالنيوتيلا واللي بتنطبخ (يعني خبز او قلي) انه ما لقيت فرق بالطعم عن الكاكاو او الشوكولاته العادية...بمعنى آخر حسيت انه لازم الاقي طريقة اعوض النيوتيلا في الوصفة بنوع شوكولاته لانه طعم النيوتيلا اللي بنحبه اختفى مع القلي بس لسه الوصفة زاكية

وهلأ الوصفة:
دونتس النيوتيلا
المقادير:
1/2 كوب سكر
بيضة
2 ملعقة صغيرة فانيلا
1/2 كوب لبن خاثر (اكتيفيا)
3 ملاعق طعام نيوتيلا
1/2 ملعقة صغيرة كربونات
رشة صغيرة (اقل من 1/8 ملعقة صغيرة كريم التارتار)
1/4 ملعقة صغيرة ملح
2- 1/2 2 كوب طحين مع زيادة للفرد

الطريقة:
يخفق السكر والبيض والفانيلا واللبن الخاثر والنيوتيلا معا ليختلط المزيج
يخلط 2 كوب طحين مع الكربونات وكريم التارتار ويضاف ويحرك بملعقة خشب ليختلط ويضاف طحين حسب الحاجة للحصول على عجينة لينة قليلا وبلزق شوي...معلش لانه رح نستخدم طحين للفرد ولتغطيس القطاعة عشان تسهيل التقطيع
نحمي زيت غزير على الغاز
نفرد العجينة بسمك 1/2 1 سم ونقطعها
نخفض الحرارة للزيت الى الوسط حتى ما تحمر قبل ما تستوي ونقلي العجينة وننقلها على ورق نشاف (ورق المطبخ) وندحرجها بالسكر العادي وهي ساخنة...وصحتين



هارون مع الدونتس :)








Wednesday, May 8, 2013

بارفية الفراولة وموس الليمون

ملاحظة: تم كتابه هذا المقال على يومين ...
يو الاثنين
قبل كم يوم كان في صورة على الفيس بوك لبيبي صغير وتعليق انه "يا الله هلأ بنقوم، بنغير الحفاض وبناخد رضعة وبنبدا النكد على ماما" اشي زي هيك بس كان بيضحك اكتر!!! المهم انه حاليا وانا عم بكتب شاعرة بنفس هادا الشعور لانه هارون قرر انه اليوم بده يعمل هيك....الساعة 11:30 ولسه ما سويت اشياء كتير من الاشياء اللي على قائمة اليوم...الله يهديه وينام....عم بهزه وعم بكتب
بس على صعيد ايجابي لليومين الماضيين وآخر اخبار جدول التعزيل فهي ممتازة بشكل عام...كل اشي على القائمة اليومية تم انجازه بالاضافة الى اشياء زيادة وفي اشي ما تم عمله وهو فرك الارض لأنه ما اشتريت صابون نابلسي...بس اشتريت امبارح فانتقل الشغل لليوم الثلاثاء وبداله تعزلت خزانة ياسمين اللي كان المفروض تنعمل الثلاثاء وشباك غرفتها...وكمان عشان اخلص وبعد ما عرفت نواقص الصيف نزلت امبارح الصبح على السوق مع هارون واشترتله اللازم (العروض كانت ممتازة على ملابس الصغار بمحل Red Tag بمكة مول)...والعصر مع ياسمين وماما واشترينا اغلب اللي لازمها باقي نزلة تانية مع سلطان وبكون انهيت هادي المهمة...
اما جدول اليومين هدول بما فيهم اليوم فهو:
الثلاثاء:
- فرك ارض غرف الاولاد والحمام
-  تشميس الفراش بغرفتي وغسله
- شبابيك في غرفتي (تنظيف)

الاربعاء:
- غسيل برادي غرف الاولاد
- فرك الارض بغرفتي وغرفة المكتب والموزع
- تعزيل خزانتي

النية ان شاء الله اني اخلص البيت هذا الاسبوع واخصص وقت للمطبخ وغرفة الغسيل الاسبوع القادم ان امكن..وانتو...شو اخبار التعزيل اذا بديتوا او كنتوا اشطر مني وخلصتوا...!!!

وانشغال الصبح بالتنظيف رح يكون انشغال من نوع تاني العصر وهو البدء بمراجعة مواد آخر السنة لانه الامتحانات رح تبدأ ب 5/22...جد وين الوقت راح...يدوب نلحق خاصة وانه بنت حماي وبناتها الحلوين رح ييجوا ب 23 الشهر من اميركا وكل سنة الاولاد بيشعروا كأنهم بيفقدوا جزء من الصيف معهم لانهم بيكونوا مشغولين بالامتحانات وبتروح عليهم الطلعات واللعب خلال فترة الامتحانات...لنأمل السنة يكون الوضع احسن اذا التزموا بجدول المراجعة اللي لازم نبداه اليوم الثلاثاء...

وصفة اليوم هي وصفة حلو سريع وسهل ومنعش بالصيف...
بارفية الفراولة وموس الليمون

لعمل Lemon Curd وانا بفضل اعمله من غير بيض...ويمكن استعماله لاي وصفة تحتاج الى بودينغ الليمون
المقادير:
1/4 كوب ماء
3 ملاعق نشا
1/2 كوب سكر
1/4 كوب عصير ليمون
2 ملعقة صغيرة بشر ليمون
رشة ملح

الطريقة:
في قدر صغير يخلط الماء والنشا والسكر ورشة الملح ويحرك على النار ليذوب السكر والملح ويسمك الخليط ثم تخفض الحرارة ويطبخ لدقيقة اخرى ويرفع ويسكب في وعاء زجاجي ويضاف الليمون بعصيرو وقشره ويترك ليبرد

للبارفية:
كمية من بودينغ الليمون
علبة فراولة كبيرة مقطعة شرائح 
ملعقة صغيرة فانيلا
ملعقة كبيرة عسل
2 كوب كريما مخفوقة
اختياري: بسكوت مطحون مفروك بالقليل من الزبدة

الطريقة :
تخلط الفراولة والفانيلا والعسل معا وتترك 15 دقيقة ليخرج ماء الفراولة منها ويعطي صوص
تخلط الكريما بخفة مع بودينغ الليمون
توضع طبقة فراولة في كاسات ثم طبقة موس الليمون ثم طبقة فراولة اخرى او بسكوت مفروك بالزبدة متل ما عملت انا ويزين بالفراولة وصحتين




Sunday, May 5, 2013

تحدي التعزيل والجو المغبر ووصفة للبيت ووصفة سلطة...

لما كنت عايشة باميركا ولما يبدا فصل الربيع بيبدأ ما يسمونه "تنظيف الربيع" يعني بالعربي تعزيل البيت من كركبة الشتا واغراضه الكتيرة وتهوية البيت ...الخ من الاشياء اللي ستاتنا وامهاتنا واحنا بنعمله كل ربيع (مع انه الحقيقة السنة حسيت الصيف نط على الشتا واخذ الربيع معه!!!) وما عندي اعتراض ابدا لاني بحب الدفاااااااااااا.
 طبعا انا متأكدة انه كتير منكم بدوا بالعملية وانا يعني بدي ابدا بس كل ما بتطلع على الغبر اللي بالجو بقول خليني استنى شوي (لغسل البرادي وتهوية الفراش...الخ) بس بعرف اني لازم ابدا من نقطة ما وفي ظل الانشغالات اليومية وامتحانات المدارس اللي ما بتخلص (الله يعين الاولاد) لازم اعمل جدول واضح يكون في كل يوم اشي عشان ما انجن (لاني من النوع اذا بديت ما بعرف اوقف لحد ما ينهد حيلي!!!). وقلت بشارككم فيه اذا ناويين تعزلوا معي ...اهو...بنعمل مجموعة دعم لبعض...ويا ريت اذا حد منكم بيحب يشترك بجدوله في التعليقات بيكون ممتاز كتير...
المهمات العامة اللي حابة اعملها هي:

  1. غسل الحرامات (والحمدلله هي خفيفة)
  2. تهوية كل الفراش من لحف ومخدات
  3. غسيل البرادي (غرف الاولاد والضيوف والقعدة)
  4. فرك الارضيات (عندي البلاط بده هيك تقريبا كل شهر بالصابون النابلسي المبروش)
  5. الشبابيك (والحمدلله هدول بينعملوا كل اسبوع فما كتتير تبهدلوا مع الشتوة الاخيرة)
  6. تبديل الملابس الشتوية بالصيفية للاولاد (حاليا الوضع شوي فوضى من ناحية انه الصيفي نزل على الشتوي واختلط الحابل بالنابل!!!) وبهاي العملية رح اعرف النواقص اللي لازمة للاولاد ورح نشوف الاواعي الصغيرة...الخ
  7. نكش قواوير الزريعة للتهوية وتسميدها
  8. اي شي تاني ممكن ينضاف اذا حسيت لازم


اما تعزيل الغرف نفسها فما رح يكون فيه شغل كتير لانه احنا بنعزل غرفة كل يوم (او بنظفها منيح فما في اشي كتير خطير بس يمكن شوية تزييح للاشياء الثقيلة للتنظيف تحتها نثل مكتبة غرفة المكتب، الثلاجة في المطبخ، التسريحة في غرفتي والمكتب والخزانة بغرفة الاولاد.

رح اشارككم كل يومين مع سوا... ابتداءا من اليوم الاحد (اضافي على الشغل اليومي):
الاحد: هارون عنده تطعيم وناوية اروح افطر عند اهلي ان شاء الله وامرر اواعي للدراي كلين(يمكن عم بتقولوا...ولو شو هالبداية!!! هههه بس القصد اني بدي اعطي بعض المهام للبنت اللي عندي في فترة الصبح عشان تنجز وانا مو بالبيت...
- شباك البرندة والستارة المعدنية
- غسيل الحرامات (علي بس ارجع وضبها)

الاثنين: تهوية فراش غرف الاولاد وغسيل كامل
تبديل الملابس الصيفية للاولاد (سلطان وهارون)
شباك غرفة الاولاد والحمام
فرك ارضية غرفة الاولاد والحمام

طبعا هادا الحكي لا يعني انه الطبخ رح ينحط على الرف...بعني بدكم بعد كل هالتعب كمان ما في اكل لزيز!!! :)
بس قبل ما احكي عن الاكل بدي اشارككم وصفة لسائل مسح الكاونتر بالمطبخ..بما انه بدينا بالتنظيف اليوم ...وهو سهل، ريحته حلوة..واوفر على الجيبة بالاضافة انه بيعقم الى حد ما اكثر من مجرد استخدام بشكير المطبخ لانه فيه كحول طبي...

سائل تعقيم اسطح المطبخ:
المقادير والطريقة:
زجاجة رش سائل تنظيف الزجاج (فارغة ومغسولة)
عبي 1/8 الزجاجة كحول طبي (رخيص ومتوفر في قسم العناية الشخصية بكل السوبرماركتات)
قطرات من زيت معطر (بتعرفوا الزيت اللي بنشتريه للمباخر (بس اختاري نوع ريحته معقولة مش عود مثلا..اشي مثل الخزامى او ببل جم اذا بتحبي)
نقطة دواء جلي
عبي باقي الزجاجة ماء وخضيه شوي وبسسسسسسسسسسسسسسسسسسس...كتير سهل ورخيص وبتلاقيه مفيد...
وهي اللي عملته اليوم...


اما الاكل اليوم او الوصفة لليوم فهي وصفة سلطة الفاصوليا البيضاء مع النعنع...منعشة ومفيدة وصحية جدا...انا هيك موديلي...شوربات بالشتا وسلطات بالصيف..

سلطة الفاصوليا البيضاء مع النعنع
المقادير:
علبة فاصوليا بيضاء مصفاية ومغسولة
بصلة حمراء صغيرة مفرومة ناعم
1/2 كوب نعنع مفروم
حبة فليفلة حمراء مفرومة
2 ملعقة طعام قبار (ممكن الاستغناء عنه)
3 ملاعق طعام خل تفاح او عصير ليمون
ملح، فلفل اسود
زيت زيتون

الطريقة:
ينقع البصل بالخل 1/4 ساعة
تخلط بقية المواد معا وتترك لتمتزج النكهات ساعة في الثلاجة وصحتين...


Friday, May 3, 2013

عالبساطة البساطة...قوارب البيض والخبز

من أحلى الاقوال او الامثال اللي بحبها هي "العظمة في البساطة" وهذا الحكي بينطبق على كتير اشياء ..سواءا في اللبس او ديكور البيت او حتى الاكل...على قول صباح "علباساطة الباساطة...يا عيني عالباساطة).... ومن ابسط وازكى الاكلات اللي الكل بيحبها ساندويش الفلافل...صديقتي ميرا ابو غربية عملت قبل كم من يوم ساندويشات فلافل ...بسيطة صح...بس طريقة التقديم كانت لذيذة كتير وبالرغم من اني ما دقتهم بس انا متأكدة انهم زاكيين...ميرا فاجأتني بانها مش بس فنانة في عمل الكروت ...بتقدروا تزوروا صفحتها على الفيس بوك
http://www.facebook.com/pages/Mira-Cards/286759098028831
وكمان بالاكل من صور اكلات عاملتهم...تسلم الايادي يا ميرا

الفلافل من ايدين ميرا

اليوم عشيت الجماعة عشا بسيط كمان...ساندويشات بيض بخبز فرنسي...سهلين...بسيطين وزاكيين ...



قوارب البيض بالخبز
المقادير:
5 ارغفة خبز فرنسي صغيرة (مثل الحمامم بس اقسى شوي) مفرغين من النصف بالطول مثل الصورة
6 بيض مخفوق بالشوكة
1/2 علبة سلامي مفروم خشن (ممكن نقانق، بسطرمة...اي نوع لحم بارد بتحبوه)
زيت زيتون
بصلة خضراء كبيرة مفرومة
كوب جبنة مونتراي جاك او شدر (مش موزريلا لانها بالرغم من انها رح تذوب بس طعمها مش حاد كفاية)
1/4 كوب كريما طبخ او حليب
ملح، فلفل اسود

الطريقة:
يحمى الفرن الى 175 درجة
ننزل القليل من زيت الزيتون داخل الخبز
نخفق البيض والملح والفلفل الاسود والحليب او الكريما
نضع ملعقة زيت زيتون في المقلاة ونقلب اللحم البارد ليتحمر قليلا ثم نضيف البيض ونقلب قليلا لغاية ما يتكتل بس ما يستوي على الآخر (الاصل انه ما نتستويه على الغاز ونصبه جوة الخبز بس انا لما فرغت الخبز شزي من اللب حسيت انه في مناطق ضعيفة ممكن يطله منها البيض فقررت استويه شوي)
نرفع البيض ونضيف الجبنة والبصل ونضعها داخل الخبز ثم في الفرن من 10-12 دقيقة ..اذا مو مستوي من 20-25 دقيقة
صحتين...

واليوم على الغدا...سلطة يونانية...قمة البساطة و العين اللي بتاكل...




Wednesday, May 1, 2013

كسل عام...ووصفة البانوفي باي ترايفل

بعد النشاط في اليومين الماضيين...عيب...لازم اكسل شوي...يعني ما بصير تضل حالة النشاط مستمرة!!! اليوم صحيت ومش جاي على بالي اعمل اشي...ويدوب طبخت للجماعة (نوع من رفع العتب) بس الكويس اني كنت بدي استفيد من اشياء عندي بعد تعزيل خزانة المونة (5 قطع خبز للتاكو صار صينية تاكو مخبوزة (اللحمة من شوي ضلوا من اللحمة اللي استخدمتها لصينية المعكرونة فقمت شوي على جنب) وراس بروكلي تحول الى سلطة بروكلي رائعة (انتظروا الوصفة في عدد شهر 7 من مجلة نكهات عائلية ) و1/2 باكيت نودلز تحول الى نودلز صيني بالخضار (كيس من الفليفلة الملونة اللي فرزته قبل فترة اذا متذكرين)...الف نعمة الحمد لله...

اليوم وتحت طلب البعض منكم وبما اني غطيت هذه الوصفة في درس عملته مع شركة نستلة قبل عدة سنوات فقررت اني اشاركم وصفة البانوفي باي ترايفل واللي انا متأكدة رح يلاقي استحسان كبير خاصة انه الصيف جاي والحلويات الباردة هي المطلوبة وهو طبق ممتاز للاستفادة من بقايا الكيك وبيكفي عدد كبير من الناس...ان شاء الله يعجبكم...

بانوفي باي ترايفل

المقادير:
علبة حليب نستلة المركز المحلى
علبة جبنة قشدية 200 غم
باكيت كبير فانيلا بودينغ من النوع السريع Jello Vanilla Pudding and Pie filling
3 اكواب حليب بارد
ملعقة صغيرة فانيلا
4 اكواب كريما مخفوقة او 4 باكيتات كريما بودرة محضرة حسب تعليمات الباكيت او ¼ 1 كوب كريما خفق مع 2 باكيت كريما بودرة محضرة حسب تعليمات
½ قالب وسط كيك فانيلا
4 حبات موز مقطعة شرائح
كمية من صوص الكراميل
بسكوت مطحون للوجه
مقادير صوص الكراميل:
½ كوب سكر بني فاتح
¼ كوب كورن سيرب او قطر سميك بدون ماء زهر
2 ملعقة طعام ماء
ملعقة طعام زبدة
¼ ملعقة صغيرة فانيلا

الطريقة:
يحضر الكراميل بخلط كل المكونات في قدر على النار حتى يذوب السكر وغليها مدة دقيقة ثم ترفع لتبرد
لتحضير الترايفل:
تخفق الجبنة حتى تصبح خفيفة القوام ثم يضاف الحليب المركز المحلى والبودينغ والحليب البارد والفانيلا وتخفق.
تخفق الكريما.
في وعاء زجاجي عميق توضع نصف كمية الكيك ثم ½ كمية خليط حليب نستلة المركز المحلى ثم نصف كمية الموز ثم نصف كمية الكريما المتبقية ونصف كمية الكراميل وتعاد الكرة للانتهاء بطبقة من الكريما وتزين بالبسكوت المطحون بالكراميل.