Tuesday, April 30, 2013

معركتي مع الثلاجة ومعكرونة الكانيلوني

يوم جديد واخيرا انهيت معركة تنظيف الثلاجة...مش معقول بس صدق الامام الشافعي
ما حك جلدك مثل ظفرك           فتولى انت جميع امرك

والمغزى من هالكلام اني عاملة جدول واضح للبنت اللي بتساعدني بالبيت بس جد لما الواحد بيشتغل بايدوه غييييييييييييييييييييييير!!!
خطر ببالي اصور المنظر قبل الترتيب بس بصراحة استحيت!!! فصورته بعد الترتيب وحاولت انه اكون مرتبة قدر الامكان والترتيب الجديد مش فظيع بس صار الواحد شايف شو فيه في الثلاجة اللي كانت عاملة مثل البير....

- الرف العلوي : كل الاجبان بتبروير وكل اللحوم الباردة بتبروير آخر وبعض المتفرقات  مثل اللبنة والحمص وجبنة كاسات ...الخ من اغراض الفطور والعشا
- الرف الثاني: الصوصات والمربيات والبيض
-الرف الثالث والرابع: تبرويرات وحلو وغيره
- درج للفواكه ودرج للخضار
- باب الثلاجة: جهة للزبدة، جهة للنكهات للحلو، جهة للصلصات ، جهة للكريما ، جهة للمشروبات من حليب وعصائر ومشروبات غازية
طبعا هذا ان شاء الله يستمر بس مو اكيد مع وجود الكثير من الايادي في الثلاجة زي ما ذكرت سابقا

الثلاجة بس الرف العلوي مو مبين من الضو

باب الثلاجة

بشكل عام كان انجاز جيد وخلاني اعرف اذا في نواقص ...طلع بدي جوز...لأ لألأ!!!! ما تفهموني غلط...عندي جوز الله يحميه بس بدي جوز مكسرات :) وانا بحب احتفظ بالمكسرات بالثلاجة او الفريزر اذا الكمية كبيرة عشان تضل طازجة وزيوتها ما تروح وتتغير ريحتها.

اليوم وصفتي ل:

معكرونة الكانيلوني (الانابيب العريضة) بالبشاميل واللحمة والبندورة

المقادير:
3/4 علبة معكرونة كانيلوني حوالي 12 انبوب (مسلوقة يدوب دقيقتين عشان ما تفتح)
1/2 كوب موزريلا للوجة
للحشوة:
3 ملاعق طعام زيت زيتون
400 غم لحمة مفرومة
بصلة متوسطة مفرومة
1/2 ملعقة صغيرة زعتر ناشف
ملح، فلفل اسود
رشة بيزل (ريحان ناشف)
للبشاميل السميك:
4 ملاعق طعام زبدة
4 ملاعق طعام طحين
2 كوب حليب
ملح
فلفل اسود
رشة جوزة الطيب
مكعب مرق دجاج
كوب موزريلا
لصوص البندورةالاساسية:
2 ملعقة طعام زيت زيتون
بصلة متوسطة مفرومة ناعم
2 سن ثوم مدقوق
ملعقة صغيرة زعتر ناشف وبيزل
ملح وفلفل اسود
2 علبة بندورة مطحونة
رشة سكر

الطريقة:
نضع الزيت الخاص بالحشوة في قدر على النار ونقلب البصلة لتذبل ثم نضيف اللحم ونقلب لينضج ثم الملح والفلفل الاسود والبهارات.
في قدر آخر نذيب الزبدة الخاصة بالبشاميل ونقلب الطحين الى ان يصبح اشقر اللون ثم نضيف الحليب الساخن مع التحريك ومكعب مرق الدجاج والملح والفلفل الاسود وجوزة الطيب ونحرك لكي لا يتكتل الخليط وسوف يكون سميك عند الغليان ويضاف 1/2 الكمية الى اللحم ثم نضيف الجبن ليذوب وتكون الحشوة جاهزة
لعمل صوص البندورة نضع الزيت في طنجرة ونضيف البصل ونقلبه ليذبل ويصبح شفاف ثم الثوم والبندورة والبهارات والسكر ونتركها لتتسبك من 15-20 دقيقة.
نأخذ جزء من صوص البندورة ونفرشه في صحن الفرن ونحشي المعكرونة ونرتبها
نضيف بقية الصوص والبشاميل على الوجه والموزربلا ونضعها في فرن على 190 درجة حتى تتتسبك من 20-30 دقيقة وتقدم وصحتين...


منال












Monday, April 29, 2013

خبز الثوم بالارضي شوكي

الي يومين مش ماسكة الكومبيوتر...!!!! يعني لو في سمايلي فيس يدل على الصدمة على المدونة (اكيد فيه بس ما بعرف وين!!!) كان حطيته...لانه ما الي بالعادة ابعد كل هالوقت بس مرض هارون والسخونة...الحمد لله على كل حال...وبالرغم من اشتياقي اكيد الا انه في الوقت اللي هارون نايم فيه حبيت اعمل شوية ترتيبات في غرفة المونة عشان احنا آخر الشهر واعرف شو عندي وشو لازمني...وبصراحة في غرفة المونة عندي وصلات التدفئة وقبل يوم كان فيه شوية تعديلات وتحويل للتدفئة عشان الطقس بدا يدفا وبعترف انه الغرفة كانت مكركبة شوي!!! احم...قصدي كتير!!! وصار الامر اسوأ لما كل شي انزاح وطلع عشان تتزبط التدفئة...وكنت في قمة الخجل من خالد (زوجي) وهو عم بيزيح كيس طحين هون وكيس سكر هناك وكرتونة العصير من جهة عشان يوصل للوصلات...زي اللي عم بيسبح بس في اكوام من العلب والكراتين والاكياس....ما علينا بكفي احراج...المهم اني كتير فخورة باني اخبركم انه تفاجأ مفاجاة كبيرة تاني يوم لما شاف الترتيب والتزبيط وانا كنت في قمة السعادة مش بس لاني اثبتله اني مرتبة :) بس كمان لانه صار في وسع كتير وكمان حصرت شو لازم وشو في منه كتير...مثال...كان عندي درس حلو قبل عدة ايام والوصفات اللي فيه تتطلب سكر بني كتير وطلبت من امي في حالة مستعجلة انها تجيبلي معاها وهي جاي عندي يوم الدرس  عشان تقعد مع هارون ...وانا برتب لقيت علبتين!!! زي قصة الكراوية متذكرين!!! وهون وبالرغم من اني بعتبر حالي منظمة ...الى حد ما!! الا انه مرات كتير وفي لحظات الاستعجال بتتكركب الامور بالزبط زي لما بترتبي خزانة الاواعي وبتقولي لحالك خلص ما رح اكركبها ابدا وبتيجي طلعة سريعة ومش عارفة شو بدك تلبسي ونعود الى نقطة الصفر مرة تانية!!! بس الكويس انه كل فترة وفترة بنرجع لعقلنا وبنرجع منرتب وبنوعد حالنا مرة تانية وبتكرر العملية... بتصير معكم؟!!! على الاقل انا بعترف اني هيك!!!
اليوم النية الثلاجة ! بس الفرق اني ما بقدر اسيطر على ترتيبها لانه 100 ايد بتنعبش فيها...ههههه يعني الاولاد وخالد وانا والبنت اللي عندي ومؤخرا هارون بيجي بيركض بالكراجة لما حد يفتح التلاجة عشان يمسك الازايز اللي على الباب...!!!! بس برضه بدي افكر بنظام عشان الامور ما تخرج عن نطاق السيطرة زي ما هو الحال اليوم...

وجعتلكم راسكم بس امبارح رحت جبت اغراض البيت عشان كان فيه كتير نواقص اساسية من خبز ورز ولبنة وبيض...الخ وترتيب غرفة المونة ساعدني اني اعمل القائمة بشكل جيد عشان ما اجيب اشي عندي اياه وجبت الاشياء الناقصة متل الطحين اللي ما بستغني عنه...

اليوم انا شوية مسترخية لاني تعبت كتير امبارح من ترتيب واخذ هارون على الدكتور وشراء اغراض البيت وطبخ لامبارح ...الغدا اليوم ملفوف بالرغم من انه الربيع اجا والملفوف اكلة شتوية بس لما كل الملفوفة يكون سعرها 30 قرش...يعني لا تقاوم....وامبارح بعد ما نام الاولاد كلهم قعدت الساعة 9:30 ولفيته وهلأ جاهز للطبخ الساعة 1 الظهر ان شاء الله...عشان هيك انا ماخدة راحتي وقلت لازم ارفه عن نفسي شوي واقعد معكم لاني هيك بحس وانا عم بكتب...كاني عاملة زيارة...يمكن لاني بالاصل ما بعمل زيارات كتير من قلة الفضاوة...

وبعرف اني وعدتكم انزل الهريسة بس بدي تصبروا علي شوي وان شاء الله بنزلها قريب...الوصفة اللي رح اشارككم فيها اليوم هي لنوع من خبز الثوم بس بالارضي شوكي (لاني لقيت علبة بالمونة وقلت خليني استفيد منها)

خبز الثوم بالارضي شوكي
المقادير:
رغيف خبز فرنسي مقسوم من النصف بالطول
1/2 اصبع زبدة
3 سن ثوم مهروس
كوب موزريلا مبشورة
1/2 كوب شدر مبشورة
1/2 كوب بارمزان
1/2 كوب لبن زبادي
ملح، فلفل اسود
علبة ارضي شوكي مصفاة ومفرومة

الطريقة:
توضع الزبدة في قدر صغير على النار حتى تذوب ويضاف الثوم ثم كل المقادير وتقلب لدقيقتين وترفع
 وتفرد على الخبز ويوضع في الفرن تحت الشواية او عادي من 3-5 دقائق وتقطع وتقدم...
ملاحظة: اذا ما عندكم ارضي شوكي ممكن ينعمل بدون بس زاكي كتير معه...





Wednesday, April 24, 2013

خبز الزيتون والزعتر والجبنة

يوم جديد حافل من الصبح بالتحضير والترتيب لدرس وطلبية كبيرة...طبعا بالاضافة الى المسؤوليات العائلية والاهتمام بعدم التقصير وخاصة في تأمين وجبة غداء ساخنة...وانجازات امبارح واليوم كانت:
- مرتبان مخلل مشكل
- تجهيز كل متطلبات درس يوم الاربعاء ولانه درس حلو فالتحضير بالاضافة الى تجهيز المقادير هو خبز كب كيك، خبز تشيز كيك، تارت وتحضير لفائف القرفة
- غداء يوم الثلاثاء كان كبسة باللحم وسلطة زعتر وزيتون وكمان خيار باللبن والنعنع.
- غداء يوم الاربعاء ملوخية وارز
انا عم بتطبع هدا المقال واليوم الثلاثاء المسا والدرس بكرة ان شاء الله...
المهم...كنت وعدتكم احط وصفة الهريسة بجوز الهند بس ما عملتها لاني كنت مشغولة كتير وما كان عندي سميد وطبعا اكتشفت هدا الحكي بس كنت مجهزة كل المواد التانية والقطر...اليوم وبما اني رحت على السوبرماركت فجبت سميد وان شاء الله بعملها بكرة لانها تقريبا جاهزة والقطر كمان...
الوصفة اللي رح اشارككم فيها هي خبز الزيتون والزعتر والجبنة وهو من نوع الخبز السريع (ما فيه خميرة)


خبز الزيتون والزعتر والجبنة
المقادير:
1/4 2 كوب طحين
2 ملعقة صغيرة بيكنغ باودر
1/2 ملعقة صغيرة كربونات
ملعقة صغيرة ملح
1/2 ملعقة صغيرة ماسترد بودرة
1/2 كوب جبنة شدر مبشورة
كوب جبنة بارمزان فريش مبشورة
1/2 كوب زيتون اسود او اخضر شرائح
1/4 كوب بندورة مجففة منقوعة بماء ساخنة ومصفاية ومقطعة
ملعقة صغيرة ملح
رشة فلفل اسود
1/4 كوب بصل اخضر مفروم
1/4 كوب بقدونس مفروم
1/4 كوب زعتر اتخضر مفروم
2 بيضة
1/2 2 ملعقة طعام زيت زيتون
1/4 1 كوب لبن خاثر (اكتيفيا)
الطريقة:
يدهن قالب التوست بالزبدة
يحمى الفرن الى 180
تخلط المواد الجافة
تضاف الجبنة والبصل والاعشاب والندورة
يخفق البيض والزيت والملح والفلفل الاسود والحليب وتضاف وتحرك بملعقة خشبية وتسكب في القالب ويمكن نثر بعض الزعتر على الوجه
توضع في الطبقة الوسط من الفرن وتخبز حوالي 4-=45 دقيقة ولتجتاز اختبار فحص الكيك وتقلب وتقدم مع الفطور او الغدا او العشا وصحتين..

منال





Monday, April 22, 2013

بيقولوا الحاجة ام الاختراع وانا بقول الحاجة بتطلع الابداع...وصفة الكورن دوغز

بما انه الجو لسة مش مستقر والبرد مصر على البقاء فقررت اليوم اني اقضي الوقت في المطبخ لتعزيل مكونات الثلاجة والفريزر ومحاولة الخروج باطباق من الموجود وطبعا الساعة 11:30 وانا عم بطبع هذا المقال والانجاز برأيي كان جيد خاصة انه السيد هارون قرر يصحى على ال 6:30 وبالتالي ما في رجعة للنوم...فبدأ يوم بدري والانجازات على صعيد الطبخ لغاية الآن هي:

- 2 كيس حمص مسلوق بالفريزر (صاروا حمص بالطحينه وجاهزين لصحن حمص وفتة كمان)
- سبانخ مفرز وطازج (شوي من الاثنين) تقلبوا بزيت زيتون وبصل وثوم ورح يدخلو بصينية المعكرونة بالارضي شوكي للغداء اليوم
- 2 حبة ارضي شوكي صغير معلب (في المعكرونة)
- زعتر اخضر كمية حوالي كوب (1/2 راحت في خبز الزعتر والزيتون والجبنة اللي عملته الصبح و1/2 رح يكون لسلطة زيتون بالزعتر الاخضر على الاغلب اما على العشا امع صحن الحمص او بكرة ان شاء الله)
- خيار (لقيت عندي كمية ويعني اذا ما انعمل فيها اشي رح يخرب فخليت اربع خيارات لسلطة خيار باللبن ان شاء الله غدا (لاني رح اعمل كبسة سعودية باللحم والباقي انفرم وسط مع 2 حبة جزر وانرش بالملح وبمصفاية لبكرة عشان اكبسة مخلل مع زيت وليمون...ممممم)
- كيس دجاج منظف وكنت مخلياه لاعمل دجاج مقلي بالقرشلة (بروستد) فجهزتة كامل بالقرشلة للغدا اليوم مع المعكرونة
- 1/2 كيس بازيلا مفرزة (1/2 راح لسلطة روسية برضه للغداء اليوم و1/2 انسلق مع جزر وسبانخ وبندورة وشوية لحمة مطبوخة وانطحنوا لاكل الاستاذ هارون)
- بطيخ مقطع (والحقيقة انها كانت بطيخة حلوة كتير بالرغم من شكوكي اللي ابديتها للخضرجي لانه بدري على البطيخ وهو اكلي انها حلوة وبالفعل كانت حلوة والحمدلله اكلنا منها على عشاء مع جبنة مغلية جديد ويوم تاني العصر والباقي ان شاء الله بدي اعمله عصير مع فراولة على الغدا)

وعلى هذا الاساس فالنية للغداء اليوم (وحماتي ان شاء الله جاية)هي:
معكرونة بالسبانخ والارضي شوكي والكريما
دجاج بروستد
سلطة روسية
عصير بطيخ وفراولة
الحلو: هريسة جوز الهند واللي رح اشارككم وصفتها بكرة ان شاء الله لعيون حبيبتي تغريد عرفات :)

الله يديمها نعمة ويفرجها علينا وعلى هالامة...عم بستحي والله وانا احط صور الاكل والناس عم تندبح كل يوم....مسموم بدني اليوم كتير خاصة لما شفت الصور من اطفال وشهداء وسوق الحميدية العزيز على قلبي مدمر...آآآآآآآآآآآآآآآخ بس...الله يفرج الهم

وعملية تعزيل الفريزر اجت من باب الحاجة (عنوان المقال) والحقيقة اللي عملته مش ابداع بس يعني بشعر بالسعادة لما بستعرض الانجازات....!!! والحاجة بتعزيل الفريزر اجت لاني غليت جبنة (موسم الجبنة) وبحب احطتها بالفريزر ومافي كتير وسع فكان لازم اشاي يطلع ومنها الدجاج والحمص والسبانخ والهوت دوغز.....وامبارح لانه كان عندي باكيت هوت دوغز بالفريزر وحبيت اعمل فيه اشي فعملت اكلة سريعة ومشهورة في المهرجانات باميركا وهي الكورن دوغز وانا غيرت شوي في الوصفة الاصلية عشان تلبق مع زوقنا العربي لانها بالاصل على حلاوة شوي فقللت كمية السكروالطريقة هي:

ميني كورن دوغز (الاصل انه يكون كبير وينحط على عود خشب ويتغطس بالعجينة اللينة وينقلى)
المقادير:
باكيت هوت دوغز كامل ومقطع من الصف بالعرض او استعملي الميني (انا كان عندي الكبير وبحب استعمل النوع المدخن)
للعجينة:
كوب طحين
كوب طحين ذرة
4 ملاعق صغيرة بيكنغ باودر
ملعقة صغيرة سكر
ملح وفلفل اسود
كوب لبن اكتفيا + 2 ملعقة طعام
بيضة
زيت غزير للقلي

الطريقة:
تخلط المكونات الجافة للعجينة
تخفق البيضة اللبن بشوكة ويضاف للمواد الجافة مع التحريك لتمتزج للحصول على عجينة غير سائلة لتغطيس حبات الهوت دوغز
توضع كل حبة هوت دوغز على عود اسنان وتغطس بالعجينة وتقلي بزين حامي
تقدم مع الماسترد او صوص الماسترد بالعسل وصحتين








Sunday, April 21, 2013

سلطة الكوسا المشوية

الاسبوع الماضي كان حافل بالكتير من النشاطات من دروس ومواعيد والتزامات عائلية فكنت كتير كسلانة وما حطيت اشي جديد على المدونة ...وبقدر اقول....اشتقتلكم؟؟؟؟ والله كتير....
ومع اجواء الشتاء المتجددة عم بلاقي حالة الكسل بتحاول تتغلب علي ...وبحاول اقاوم بس المعركة مستمرة!!!
ولما بسمع اغنية سعاد حسني" الدنيا ربيع والجو بديع" بطلع من شباك غرفتي...حاليا وانا عم بكتب وبلاقي انه فيروز عم بتغني "شتي يا دنيي تيزييد موسمنا ويحلى" !!! والحمدلله على النعمة دائما وابدا لانه المثل القديم بيقول "شتوة نيسان...بتحيي الانسان"...طيب بكفي حديث ستس وستكم وخليني ادخل بالموضوع واشارككم وصفة هالسلطة البسيطة واللذيذة خاصة انه الكوسا منتشرة هالايام وبسعر ممتاز...

سلطة الكوسا المشوية
المقادير:
4-5 حبات كوسا مقطعة بالطول شرائح رفيعة لغاية ما توصلي جهة البزر...ما بدنا اياها بالسلطة...ممكن تعملي فيها سلطة كوسا بالنعنع او شوربة...
ضمة جرجير
1/2 علبة صغيرة بندورة كرز
جبنة فتة (حوالي 3/4 كوب)
زيتون اسود كامل (نوع جيد وليس الاسباني الخاص بالبيتزا)
زيت زيتون لدهن الكوسا
ملح وفلفل اسود
للصوص:
ملعقة طعام ماسترد ديجون
سن ثوم مدقوق
6 ملاعق طعام زيت زيتون
3 ملاعق طعام عصير ليمون
ملح، فلفل اسود

الطريقة:
تدهن شرائح الكوسا بالزيت على الجهتين وترش بالفلفل الاسود والملح وتشوى على الشواية وتترك لتبرد
ترتب المكونات في الصحن
تخلط مكونات الصوص وتقدم

 صحي....صح؟!!! بس مش بعده يكون الحلو براونيز وبوظة وصوص شوكولاته


Thursday, April 11, 2013

قرب الصيف ولا لسة؟؟؟؟ شوربة البرغر

اذا انتو متلي بتحبوا الصيف فالسؤال "قرب الصيف ولا لسة" واحد من الاسئلة الكتيرة او التعليقات حول الطقس اللي بستعملها كتير هادي الايام وخاصة انو يوم شوب ويوم برد وجد بدي الصييييييييييييييف يجي اوام...ولاني لسه بردانه ولسة بشعر انو الشتاء مصر على البقاء لآخر رمق فبستغل حبي للشوربة عشان اعمل صحن شوربة سخن يدفيني ...وبعرف انه البرد مو هالقد هالايام بس جد احنا بيوتنا ابرد من بره بكتير والمشكلة بتشغلي التدفئة بطقي من الشوب وما بتشغليها بتموتي من البرد...يعني بالنسبة الي صحن الشوربة ممتاز بهيك وضع!!! شوربة اليوم هي في الواقع وجبة كاملة لانه فيها بطاطا وفيها لحمة مفرومة وجبنة شدر فبنصح انه ما تعملي جنبها اشي لانها كمان سميكة شوي...واذا انتي من محبي البرغر ومن محبي الجبنة ومن محبي الشوربة وبتشعري انها احد اهم الاكلات اللي بتشعرك بالراحة ...فهادي الشوربة الك!!!

شوربة البرغر بالجبنة
المقادير:
2 كوب بطاطا مقشرو ومقطعة مكعبات
2 جزرة كبيرة مقشرة ومقطعة مكعبات
بصلة صغيرة مفرومة ناعم
سن ثوم مدقوق
1/2 1 كوب ماء
3 مكعب مرق بيف
ملح، فلفل اسود
450 غم لحم بيف مفروم ناعم
1/2 2 كوب حليب
3 ملاعق طعام طحين
كوب جبنة شدر (انا خلطت كرافت المطبوخة مع شوية شدر عادية)
للتزيين: بيكون تيركي او بقري مقطع ومقلي ليصبح مقرمش (انا استعملت نوع تقليد من بيتي كركر اسمه بيكوز من كوزمو بس مش طاير عقلي فيه كتير وممكن الاستغناء عنة تماما)

الطريقة:
قلبي اللحم المفروم في قدر على النار لحتى يستوي وينشف ماؤه تماما وارفعيه على جنب
اضيفي البصلة لنفس القدر وشوية زيت وممكن ما تضيفي زيت وقلبي لتتذبل ثم الثوم والبطاطا والجزر وقلبي دقيقتين
اضيفي الماء ومكعبات البيف ولمل يغلي دوقي اذا بده ملح ورشيه فلفل اسود واتركيه على نار هادية لغاية ما تستوي الخضار
اضيفي 2 كوب حليب والبيف المستوي
اخلطي الطحين بنص كوب حليب واضيفيه مع التحريك ودوقي ملوحتها ولازم على نار هادية
لما تغلي ضيفي الجبنة وحركي لتدوب تماما وقدميها...مممم جد وجبة متكاملة ما بدها اشي معها ...والف صحة
ملاحظة: اذا حسيتيها اسمك واغنى مما بتحبي خففيها بشوية مي...

منال


Friday, April 5, 2013

خبز الفلاح

علمتني الحياة انه ما في اشي احلى من الصحة وراحة البال...الله يريح بالكم جميعا ويحفظلكم الصحة والعافية...وعلمتني انه ما احلى من جمعة العيلة وحبها...الله يحفظلي عيلتي وعائلاتكم من كل سوء...واحلى مكان بتتجمع فيه العيلة هو غرفة الطعام مش بس لانه الحجياة صارت مشاغل كتيرة والاشي اللي بيجمعنا هو الغدا او العشا (وبعرف انه في ناس كتير الحظ ما يساعدهم حتى يجتمعوا على وجبة يوميا مع عائلاتهم بسبب العمل والظروف) بس كمان لانه الاكلة الهنية من ايدين حدا بيحب الناس الملتمين على الطاولة بتخلينا نقدر اديش بيحبونا وبياخدوا من وقتهم عشان احنا ننبسط ونستمتع بوجبة ساخنة ولذيذة ونتبادل الحديث ونحكي عن اللي فرحنا وزعلنا خلال اليوم...بهذه اللحظات بتطلع على اللي حولي وبشكر ربي على نعمة اللمة والله ما يحرمنا من الاستقرار والامان ويرزق المحتاج براحة البال مش المال..المهم راحة البال...

ومن احلى الاشياء اللي بتشعرني بالسعادة وراحة البال هو ريحة الخبز بالبيت...يعني لا تعوض واليوم بدي اشارككم بوصفة من كتر ما هي سهلة ما بدي اسمع ولا واحدة فيكم تقولي انا ما بعرف اعجن او انا ما عندي ماكنة عجن...عشان وصفة اليوم ما بدها عجن ابدا ابدا والحلو انها بتنخبز بصحن بايركس مجوف (زي الخاص بالسلطة) يعني ما بدك حتى قالب خاص...واروع من هيك ما في لانه لذيذ وخاصة يتغمس وهو سخن بزيت زيتون وخل بلسامك ورشة ملح وفلفل اسود مطحون طازج...وادعولي :)

خبز الفلاح
المقادير:
2 ملعقة صغيرة خميرة فورية
ملعقة طعام سكر
2 كوب ماء دافئ (يعني تحطي اصبعك الصغير فيه براحة)
2 ملعقة صغيرة ملح
4 اكواب طحين

الطريقة:
تخلط الخميرة والسكر والماء في وعاء وتحرك.
نضيف الطحين والملح ونحرك بملعقة خشب ورح تكون العجينة لزجة وبتلصق (معلش)
بنكون مدفيين الفرن شوي وطافيين الغاز طبعا. بنغطيها ومنتركها في الفرن الدافئ من 1/2 1 ساعة الى ساعتين
بندهن صحنين مجوفين بايركس بالزبدة بشسكل جيد جدا (مشان ما يلزق الخبز وبيعطي طعم زاكي)
بنقسم العجينة باستعمال معلقة او شوكة الى قسمين يوزعوا على صحنين البايركس ورح تغلبك شوي لانها بتلزق بس عادي
تغطى وبنتركها ترتاح من 1/2 ساعة الى ساعة ليتضاعف حجمها
بنحمي الفرن الى 200 وبنضعها على 220 مدة 10 دقائق بعدين بنخفض الحرارة  الى 190 وبنتركها من 20-25 دقيقة انشوف انها نفخت وصار لونها ذهبي
بنقلبها على سلك معدني واذا كنتوا شاطرين استنوا ليبرد.... :)
صحتين
منال





Tuesday, April 2, 2013

مين ما بحب الفتة!!!!

اي نوع فتة؟!! انا شخصيا ما بكره ولا فتة...لحظة شوي!!! يمكن فتة المقادم صعبة علي اني آكلها !!! بعرف انه كتير منكم بحبوها كتير وبقدملهم اعتذاري الشديد بس انا مش من محبيها حتى لو قلتولي " اكيد ما اكلتيها عند حد شاطر" الفكرة صعبة علي بحد ذاتها...وبالنهاية لكل شخص معتقداته...صح!!!
المهم...فتة اليوم هي فته معروفة لكتير ناس بس انا حبيت اشارككم فيها (للي ما بيعرفوها)...فتة الكفتة...وطبعا انا لازم اعترف اني ما كنت ناوية اعمل فتة كفتة بس زاد شوي من لحم الكفتة فقررت اني اعمل الفتة...وهون برجع بحكي عن التخطيط المسبق للاكل..يعني اذا ناوية تعملي كفتة اليوم...زيدي اللحمة شوي واعملي الفتة بعد يومين او اذا طبختي اللحمة وحطيتيها بالفريزر بتلاقيها جاهزة وقت الزنقة لفتة الكفتة... وبلا طول سيرة..هي الطريقة...

فتة الكفتة
المقادير:
كمية من لحم الكفتة بالبصل والبقونس والبهارات (حسب ما بتفضليها) مكورة ومشوية بالفرن (ممكن تقليها بس لاختصار السعرات انا بشويها)
خبز مقلي (كمية مناسبة لكمية الكفتة
لبن مسنون بالثوم والملح ومعلقة طحينة
صوص البندورة:
ملعقة طعام زيت زيتون
بصلة صغيرة مفرومة ناعم
3-4 حبات بندورة مقشرة ومفرومة ناعم (ممكن استعمال علبة من المعلبة)
سن ثوم
ملح، فلفل اشود ورشة بهارات مشكلة
ملعقة طعام رب بندورة
القليل من الماء
بقدونس مفروم وصنوبر محمص او مقلي للوجة (وانا ما كان عندي زي ما رح تشوفوا بالصورة)

الطريقة:
لعمل الصوص نذبل البصل بالزيت لعدة دقائق ليصبح لونها شفاف
يضاف الثوم ثم البندورة وتقلب 5 دقائق على نار منخفضة الى متوسطة
نضيف رب البندورة والقليل من الماء والملح والفلفل الاسود والبهارات ونتركها لتتسبك عدة دقائق
نضع الخبز المقلي في قاع صحن التقديم
نضيف الصوص
نضيف اللبن المسنون
نرتب قطع الكفنة على الوجه
نزين بالبقدونس والصنوبر...
وصحتين

منال



Monday, April 1, 2013

حمص وشمندر...

حمص وشمندر!!!! ممكن حد يحزر الخلطة... طيب قبل ما احكي عن الخلطة  خليني لقول قديش بنحب الحمص في الاردن؟...اظن الجواب معروف . بيكفي انه نمر جنب محل حمص وفول يوم الجمعة ونشوف الطوابير اللي بتستنى لتاخذ صحن الحمص والفول والفتة وكيس الفلافل... بالنسبة الي بحب الحمص كتير وبحب اكله من محلات معينة بس كتير بحب يكون عندي بالبيت موجود دائما... ولاني دايما بحكي عن التوفير فانا بحب اشتري الحمص حب وانقعه واسلقه واحطه باكياس بالفريزر مع شوي من ماء السلق وهيك الوقت اللي بدي اعمل فيه حمص، فتة او اي طبق بيتطلب الحمص بيكون الفريزر جاهز...وهدا مش معناه انه المعلب مو منيح بس اذا بتفكري في الواد الحافظة والسعر بيطلع الناشف اوفر وبصراحة ازكى كمان...اما الشمندر فهو من الاشياء المفضلة عنا بالبيت خاصة ياسمين بتحبه كتير....طيب رح تقولولي فهمنا انك بتحبي الحمص والشمندر ...بس ليش جبتي سيرتهم سوا؟ الجواب هو هاد الطبق الصحي والمختلف واللذيذ...



قبل ما ابدا بالطريقة بحب اقول انه هادا الطبق ما فيه طحينة فيعني انه اللي عنده حساسية من السمسم بيقدر ياكل منه واللي بده يوفر سعرات حرارية بياكل منه...
انا قدمته كطبق جانبي جنب دجاج مشوي بس فيكم كمان تقدموه كنوع تغميسة مع مثلثات خبز عربي محمص...

حمص بالشمندر 

المقادير:
2 حبة شمندر وسط مسلوقة ومقشرة ومفرومة
2 كوب حمص حب 
سن ثوم كبير مهروس
زيت زيتون
عصير ليمون (حيب الرغبة بالحموضة)
رشة كمون
ملح
2 ملعقة كبيرة خل بلسامك

الطريقة:
يوخذ مقدار ملعقتين طعام من الحمص على جنب للوجه
توضع كل المقادير ما عدا زيت الزيتون في الخلاط 
يدار الخلاط وننزل زيت الزيتون بالتدريج لنحصل على السماكة التي نرغب بها
ويزين بالحمص الحب وورقة بيزل ويقدم..والف صحة وهنا واذا كنتوا متلي بتحبوا الحمص والشمندر...رح تحبوا هادا الطبق كتير...

منال