Sunday, March 31, 2013

دجاج" الا سلطان"

من اكثر الاسئلة اللي بسألوني عنها الستات: من وين بتجيبي وصفاتك؟ والحقيقة جوابي بيكون واضح وصريح: من كل مكان!!! وبهذا الحكي بعني اني ممكن الاقي وصفة على الانترنت وتعجبني واطبقها (ونادرا ما التزم فيها تماما) يعني بعدل وبجرب وبغير عشان هيك عندي يوم مخصص لتجربة الوصفات مرة في الاسبوع...اما الاماكن الاخرى فهي الكتب (والحقيقة مش كثير عندي كتب) والمجلات والتلفزيون وكمان المطاعم...يعني لما بروح على مطعم بحب اذا عجبني طبق ارجع على البيت واحاول اطبقه...ومن اغرب الاماكن اللي لقيت فيها اكل حبيناه انا وعيلتي وخاصة الاستاذ سلطان هو "الطيارة"...اذا متذكرين اني في مرة كتبت عن اكلة بالدجاج والكزبرة الليمون حبها سلطان كتير من اكل الطيارة واليوم طلبها كمان مرة وهي الطريقة لانها سهلة جدا جدا ولذيذه ونسبيا صحية وكمان خفيفة على الجيبة...

دجاج الا سلطان (انا هيك قررت اسميها بس هي في الحقيقة دجاج بصوص الليمون والكزبرة)
المقادير:
4 صدور دجاج مقطع مكعبات
2 ملعقة طعام زبدة
ملعقة طعام زيت زيتون
3 ملاعق طعام طحين
2/1 2 كوب مرق دجاج
3 سن ثوم
1/4 كوب عصير ليمون (بقترح تصيفوا شوي شوي حسب الرغبة بالحموضة)
ملح وفلفل اسود
1/4 كوب كزبرة خضراء مفرومة

الطريقة:
نضع الزبدة والزيت في مقلاة واسعة وعميقة
نرش الدجاج بالملح والفلفل الاسود
نقلي قطع الدجاج بالزبدة والزيت على نار عالية لتحمر وتصبح ذهبية
نرش الطحين ونقلب دقيقة
نضيف الثوم المهروس ونقلب لثوان
نضيف مرق الدجاج الساخن ونحرك
ونتركها لتغلي ثم تخفض الحرارة وتترك 5 دقائق
يضاف عصير الليمون والكزبرة وتترك اتغلي 2 دقيقة
تقدم مع الارز الابيض
(ممكن انه تخلي صدر الدجاج كامل لتقديمها بشكل افخم شوي مع بطاطا)

والف صحة وهنا

منال



Saturday, March 30, 2013

كيك..كيك...

كتير منكم بيعرفوا اني وقفت عمل الكيك بس عرفت اني حامل بالاستاذ هارون والحكي هاد صرله فوق السنة ونص....واو...الوقت كيف بيطير..المهم اني كنت اكون بقمة السعادة لما تتصل فيي زبونة لتوصي على كيك لانه هادا يعني انها حبت الكيك اللي بعمله...وكنت ازعل لاني اضطر اني ارفض بسبب الانشغال الكبير مع البيبي وطبعا الاولاد بس ياسمين وسلطان ما شاء الله كبروا وبدهم مني اهتمام بس من نوع تاني مش ملاحقة طول الوقت زي هارون...الله يخليهم ويحفظهم من كل سوء ويوفقهم...
بس بعد تفكير طويل قررت اني لازم ارجع لاني بحن كتير كل ما اشوف كعكة حلوة..بالرغم من انه الكيك المزين بده وقت كتير وبتعب بس سيبحان الله لما الواحد بيعمل اشي بيحبه ما بحس بالتعب...حبيت في هذا المقال اني اشارككم بصوربعض كيكات بعتز اني عملتها وبحب اشكر زبايني الحلوين على التوصية...






























Monday, March 25, 2013

الاكل العربي وتحية للشيف محمد اورفلي...

اذا بدي احكي عن شيفات بحب اتفرج عليهم القائمة ما بتخلص بس اليوم بحب اوجه تحية للشيف محمد اورفلي "مطبخنا العربي" على فتافيت واللي طبخ اكلات بالزيت من المطبخ الفلسطيني والحلو انه ضل طول الحلقة يمدح ويحكي عن الاكل الزاكي وميزات المطبخ الفلسطيني بدون تحيز للمطبخ الشامي واللي فيه كتير اشياء مشتركة مع المطبخ الفلسطيني...والاحلى من هيك انه بيضل يحكي اديش مطبخنا العربي غني بالمكونات اللي وعلى قوله "ممكن نعمل من مكوناته مليون اشي" ...اشي حلو كتير خاصة انه احنا هالايام عم بنمر بازمة (وانا احد المذنبين) بتخلينا عن اللغة العربية وهويتنا العربية حتى اولادنا بيفضلوا البرغر والاسباجيتي وغيرها من الاكلات الغربية (وبرضه انا احد المذنبين)...مثال على اشي عمله كان السلطة الغزاوية (سلطة عربية ناعمة وفيها فلفل مخلل حار وغيرها من المكونات اللذيذة ) وعملها بشكل صلصة مع مثلثات الخبز العربي المحمصة بالفرن كشيبس للتغميس...حبيت الفكرة كتير وكيف انه اخد اكلة عادية جدا مثل السلطة وعملها اشي رائع الشكل وانا متأكدة الطعم كمان غير انها اشي الكل بيقدر يعمله ومش غالي ابدا...وطبعا الحكي هاد مش معناته اني بذم المطابخ الغربية بالعكس الاكل جزئ اساسي لثقافة الشعوب والتنويع اكيد اشي حلو بس المهم انه في خضم العولمة اللي ماشية هاليومين ما ننسى مطبخنا العربي...



انا بعترف مش كتير بيصحلي وقت اتفرج على التلفزيون زي ما كنت زمان بحكم انه "مش عارفة وين الوقت بروح"...يعني مثلا كنت معزومة على مباركة يوم السبت العصر ونسيت موضوعها تماما في خضم القصص اليومية بالبيت واتذكرت امبارح وكل فكري انه المباركة الاحد مش السبت!!! اعتذاري الشديد منك يا مرح....

امبارح كان عندي شوية رز ابيض زايد وكلتي امبارح كانت بحاجة لارز وكنت من اول ناقعة كاستين ارز (ابوبنت..امريكي) والارز الزايد كان ارز عادي وابيض...في البداية كنت على وشك انقع ارز ابيض عادي عشان ازيد الباقي عليه بس قررت اني استعمل المنقوع واحط عليه كركم فصار لونه اصفر ولما قربت اطفي تحته حطيت الارز الابيض العادي (كان بحرارة الغرفة) فوق الارز الاصفر وتركته 10 دقائق مغطى. وبعدين بالشوكة فتحته وصار عندي طبق ارز جديد ولزيز وبلونين وعيلتي فكروا اني مغلبة حالي كتير  :)


ومن ضمن الاشياء اللي اولادي بيحبوها كتير هي شوربة الذرة بالكريما وعملتها امبارح وهي طريقتي:

شوربة الذرة بالكريما

المقادير:
علبتين ذرة من نوع جيد وحلو مصفاية
ملعقة طعام زبدة
بصلة صغيرة مفرومة ناعم
ملعقة طعام طحين
لتر مرق دجاج
1/4 كوب كريما سائلة
رشة جوزة الطيب
ملح وفلفل اسود

الطريقة:
نضع الزبدة على النار ونستوي البصل ليذبل ثم يضاف الطحين ويحمص
نضيف المرق والذؤة ونتركها لتغلي 2 دقيقة
باستخدام الخلاط او نطحن جزء منها ونضيف المزيد من المرق اذا احتاج الامر
نرجعها على النار ونضيف البهارات والكريما
ونتركها لتغلي 5 دقائق على نار هادئة
وتقدم وانا زينتها ببصل اخضر مفروم


Friday, March 22, 2013

صحن الخضار بالبارمزان

كل عام وكل الامهات بالف خير...بتمنى تكونوا قضيتوا يوم حلو مع اولادكم وعائلاتكم ...الحلو انه صادف يوم الخميس والكل قدر يسهر مع اهله ويستمتع معهم والشوارع كانت زحمة ومنظر ناس بتطلع من سيارات حاملة ورد وهدايا وكيك وحلو ...كان منظر يبعث على الابتسام والرغبة بانه يا ريت كل الايام تكون اعياد ومناسبات حلوة وياريت يصحلنا دايما نظهر مدى حبنا لاهلنا مش بس بالهدايا بس كمان بالزيارة اللي اكيد بتدخل الفرحة على قلوبهم...
بعيد الام بهني كل الستات في الاردن والوطن العربي والعالم كله...والله يصبر كل اولاد فقدوا امهم لانه ما في اشي بيعوض حنان الام وعطاءها...
بالنسبة الي عيد الام كان عجقة شوي لاني قررت اعمل كيك لوالدتي ولحماتي والي فترة ما اشتغلت وفعليا بدأ الشغل عندي الساعة 11 مساءا يوم الاربعاء بعد ما الكل نام واستمر لغاية الساعة 3 صباحا...وذكرني اديش اني اشتقت لعمل الكيك واديش اني مبسوطة اني قاعدة مع فنجان النسكافيه وحوالي السكر والالوان والكريما...الخ...والنتيجة كانت:

 لحماتي
لماما

الكب كيك عملت منه زيادة والكعكة كانت كعكة شطرنج من جوة...ونسيت اصورها لما تقطعت...
اما نفس يوم عيد الام فكانت الخطة نطلب غدا من برة عشان صاحب سلطان جاي وعشات عيد الام بس بالاخر طلبت للاولاد واحنا الكبار (انا وزوجي وياسمين (صارت من الكبار هلأ وحماتي والبنات اللي بيساعدوا) اكلنا غدا لزيز وفيه اشياء صحية وكان:
ارزو كون بولو (لما ياسمين عرفت انه الدرس يوم السبت رح يكون فيه هالطبق طلبته مني فعملته وهي الصورة:

وكان فيه سلطة جرجيروشمندر


والصحن الصحي من...
 الخضار المشوية مع البارمزان
المقادير:
2 ملعقة طعام زيت زيتون
بصلة وسط مقطعة مكعبات كبيرة
2 حبة كوسا كبيرة مقطعة حلقات
2 حبة بندورة كبيرة مقطعة حلقات
2 حبة بطاطا مقشرة ومقطعة حلقات
ملعقة كبيرة زعتر ناشف
ملح، فلفل اسود
المزيد من زيت الزيتون (2-3 ملاعق لتغطية الخضار)
3 ملاعق طعام بارمزان

الطريقة:
يوضع الزيت في مقلاة ويذبل فيه البصل ويسكب في قاع صحن بايركس
تقلب الخضار مع الزيت والملح والزعتر والفلفل الاسود وترتب في الصحن وتغطى بالفويل وتوضع في الفرن حتى تستوي الخضار
يرفع الغطاء وترش بالبارمزان وتترك ليحمر وجهها قليلا وصحتين


Wednesday, March 20, 2013

اضلاع الباربكيو ومعكرونة بالجبنة والخضار

حلو كتير الواحد يكون مشغول باشي بحبه ومفيد اله ولغيره بنفس الوقت..ومن احلى الاشياء بالانشغال بالمطبخ انه الانتاج النهائي بيسعد الناس اللي حواليكي وخاصة وانت بتشوفيهم بياكلوا بكل شهية...هالايام ومتل ما كتير منكم بيعرفوا اني انشغلت بالبيبي وطبعا ياسمين وسلطان الله يخليهم...ومؤخرا وبما اني استأنفت دروس الطبخ والمشاركة بعدة مناسبات فبشعر اني بستعيد نشاطاتي تدريجيا...وبتأمل اني ارجع بشكل كامل لشغلي قريبا ان شاء الله عشان عيون كل اللي بيحكوا معي ولسه بيسألوني اذا رجعت على الكيك وغيره...وبما اني عم بمشي المشوار خطوة كل مرة...فبحب اني اخب (اللي ما بيعرفوا) اني رجعت لدروس الطبخ بشكل كامل ولتواصي الموالح كمان...اللي بيحب يعرف اكتر ممكن يتواصل معي..

ما بعرف اذا كانوا اولادكم زي اولادي بيحبوا الريش او الاضلاع بصوص الباربكيو واللي بيطلبوها في المطعم وخاصة المطاعم الامريكية الاصل...ولانهم بيحبوها كتير فقررت ومن 4 سنين مضوا اني لازم اعملها بالبيت..وهي اكلة مو رخيصة بالواقع لانه الاضلاع غالية شوي بس فعليا هي اكلة ما بياكلها الواحد دائما لانها بتنصح كمان فيعني يفضل انه ما تكون رخيصة!!! على الاقل بنتحجج بسعرها والا كنا اعملناها باستمرار وشفنا اثرها على اوراكنا :)

ولاني ما عملتها من زمن فقررت اني اليوم اعملها مع صحن معكرونة جانبي مفيد للصغار ولذيذ كمان...وهو طريقة ممتازة للاستفادة من زوايد الخضار والجبنة في الثلاجة...

اضلاع بصوص الباربكيو
المقادير:
2 كيلو ضلعة بقر ي(اطلبي من اللحام بس ينظفها من الدهن وخليها شقفة واحدة او ممكن تقطعيها اذا بدك تختصري من وقت الطبخ9
للنقع:
1/3 كوب سكر بني فاتح
ملعقة طعام بابريكا
ملعقة طعام بودرة الثوم
2 ملعقة طعام من سائل التدخين Liquid Smoke بتلاقو بكتير من محلات السوبر ماركت الكبيرة مثل السيفوي عند جهة الصويا صوص والصوصات التانية وهو بيعطي نكهة تدخين كانه الواحد شاويها على الفحم
فلفل اسود (رشة)
ممكن استعمال بهارات الباربكيو اذا عندك

الطريقة:
تدهن الضلعة تماما بخليط البهارات وتوضع على ورقتين المنيوم الجزء المكسو باللحم للاسفل وتغلف جيدا وتبرد في الثلاجة (انا حطيتها ليلة)
توضع مثل ما هي في فرن حرارتة 185 مدة ساعتين على الاقل (مع الانتباه اذا نشفت شوي افتحي الالمنيوم وحطي ماء مغلي شوي كل مرة عشان ما تنحرق) والفكرة انها تصير طرية ومستوية تماما
يرفع الالمنيوم وبنشغل الشواية وبندهن الوجه ب حوالي 1/2 زجاجة كبيرة باربكيو صوص (انا بستعمل نوع الهيكوري سموك Hickory Smoke حلو وبيعطي نكهة تدخين
حتى تتحمر شوي (وما بقدر اوصفلكم الريحة اديش حلوة) وببتركيها ترتاح شوي بعدين بتتقطع شرحات 




اما المعكرونة فهي وصفتها:
معكرونة بالجبنة والخضار
المقادير:
1/2 باكيت معكرونة صدف وسط (انا كان عندي نص باكيت معكرونة مثل شكل الادنين) مسلوقة
2 ملعقة طعام زبدة
2 ملعقة طعام طحين
2 كوب حليب (ممكن استعمال 1/2 كريما اذا بدك ادسم)
1/2 1 كوب اجبان (انا استعملت ايدام، شيدر بيضاء وبارمزان طازجة)
2 كوب خضار مسلوقة (انا استعملت خضار مشكلة كنت عاملتها من اول (بصل وبروكلي وجزر وبازيلا)

الطريقة:
نعمل الصوص وهي شاميل عادي يعني بنسيح الزبدة وبنحمص الطحين بدون لون (دقيقة ) وبعدين بنضيف الحليب الدافئ وبنحرك ولما تغلي بنضيف الاجبان واذا حسيتيها جامدة ممكن تضيفي جزء من ماء سلق المعكرونة وبعدين بنضيف المعكرونة والخضار وبنحطها في صحن مدهون بالزبدة وبالفرن على 180 مدة 20-25 دقيقة وصحتين..

قبل الخبز وممكن تتاكل هيك بدون خبز

بعد الخبز
منال



Tuesday, March 12, 2013

منيو الايام القادمة ان شاء الله

من اروع الاشياء في فصل الربيع (طبعا بالاضافة الى الشمس الدافية والطقس الحلو...االزهور والزراعة بشكل عام..وعشان ما اطول عليكم قبل فترة (واكيد كلكم مريتوا بالتجربة) كان عندي بصل ولقيت حبتين منه مطلعين اخضر (مزرعين) وطبعا لانه الداخل بكون نشف وما اله فايدة للاستعمال فقررت اني ازرعه...وبما انه ما عندي حديقة فقررت اني احطه بقوار على البرندة الصغيرة اللي عندي (يعني انا مو مسفيدة منها باشي لانه كثير صغيرة لينقعد فيها فيالله على الاقل بزرعلي كم قوار...وبما اني غلبت حالي وزرعت فقررت اني احط كم سن ثوم (مثل ما هم بقشرهم في قوار تاني وبس...وصارلهم فترة بسيطة ومع المي هي النتيجة:
 البصل


الثوم

مبسوطة لاته اول مرة بجرب ازرع بصل وثوم وان شاء الله رح استمر وناوية اجرب البطاطا والبندورة...ببقى اخبركم شو بصير...وبعد ما خلصت منال المزارعة..احم... :) ننتقل الى الطبخ والميزانية
وبعرف شو رح تقولولي...دايما بتقولي الميزانية والمنيو بس والله اني بحاول التزم كل شهر بس ما بعرف مرات واسفة على التعبير "الخوازيق" بتطلع من وين...مرات بتكون مزاجي اللي مش رايق وما بيجي على بالي اعمل اشي .."آه ما بيجعبالي!!!" بالنهاية انا ست زي كل هالستات وبكون مرات مش حابة ارفع ايدي من محلها ... :) المهم!!! هذا الشهر بديت منيح واستعملت اشياء موجودة عندي لغاية 3/6 بعدين طبعا كان لازم اروح اجيب اغراض لانه لا كان في حليب ولا سكر ولا رز...شطبنا :) ولاني مرات ما بقدر اقاوم اجرب اشي جديد او اجيب اشي على عرض..وهذا عيب كبير فيي بعترف فيه..فانجرفت في الشراء ودفعت مبلغ مرتب بس والله مو كله اكل..يعني فيه مواد تنظيف واغراض لهارون (احتياجات البيبي المعتادة) وطبعا شراء اللحوم بحد ذاته هو كسرة للميزانية وخاصة اذا تهورت زيي واشتريت ستيك ولحم مفروم ودجاج كمان!!! لا اخفيكم علما بس دفعت بحدود 225دينار...بس والله اني رح اجرب مرة تانية واشوف والله يساعد الناس...!!! والحمد لله على نعمه الكثيرة والله يديم النعمة...!!!

ابتداءا من اليوم 3/12 ولغاية الجمعة ان شاء الله فالمنيو هي:
- مقلوبة زهرة (باكيت لحمة شقف من الفريزر من الشهر الماضي لاني وبالرغم من اللي دفعته ما جبت قطع...كمان!!!) والزهرة برضه على العرض في السي تاون امبارح بسعر 45 قرش للراس الواحد وجبت 2 . وطبعا سلطة بس قررت اعمل سلطة الفليفلة المشوية مش سلطة عربية وشوربة شعيرية من كيس من اصل 5 اكياس مرق الدجاج اللي عملته امبارح
وهي سلطة الفليفلة وطريقتها...


سلطة الفليفلة المشوية بالجرجير
المقاديروالطريقة:
1/2 ضمة جرجير تفرد على الصحن
حبة فليفلة من كل لون مشوية ومقشرة ومقطعة بالطول
الصوص سن ثوم مدقوق ويخلط مع خل بلسامك وزيت زيتون (الزيت ضعف الخل) ورشة زعتر اوريغانو
بشر بارمزان طازجة
وبس
نرجع للمنيو:
- يوم الاربعاء في عندي درس وبالتالي سعيدة انه عندي بواقي (اسباجيتي ومقلوبة وكولسلو) وعملت كعكة لعيد ميلاد ياسمين :)
-يوم الخميس صدور الدجاج بالسبانخ والجبنة...اشي كتير زاكي ببقى ان شاء الله احط صورته :) وشوربة بروكلي (عندي راس بروكلي وبدي استعمل نصه بس للشوربة والباقي رح يروح مع معكرونة...
- يوم الجمعة ميني تشيز برغر (نسيت احكيلكم انه امبارح ومن ضمن النشاطات كان تحويل جزء من اللحمة المفرومة اللي اشتريتها الى ميني برغر) مع بطاطا

والحمدلله ومن ضمن نشاطات المطبخ اليوم واللي نسيت احكي عنها امبارح اني لقيت باذنجان على العرض (كيس فيه 3 باذنجان ب 31 قرش؟!!برده في السي تاون.. واحدة انشوت لمتبل و2 انقلوا ويمكن يكونوا بوجبة هاليومين (الجمعة على الاغلب) بخبركم...

واليوم خبزت كيكة لعيد ميلاد ياسمين وقبل ما ابدا اكتب هلأ خلصت عمل عجينة السكر ووضع الكريما على الكعكة...ببقى اشارككم صورتها لاحقا ان شاء الله...
مع حبي وتمنياتي لكن بطبخ سعيد!!!

منال



Monday, March 11, 2013

اسباجتي مخبوزة بالفرن وتجهيزات في المطبخ لتوفير المال والوقت

اليوم كان يوم حافل بالمطبخ...وكثير مرات بمر بهذه الحالة لما الاقي اشياء على عروض او لما يكون عندي اشياء قدمت شوي وحابة اني احولها لشيء اخر استفيد منه في اشي تاني...وهذا الاشي من اهم الاشياء للتوفير وبرضه عشان يوفر وقت في تحضير الوجبات المختلفة..وهي بعض الاشياء اللي حضرتها اليوم:
مكعبات خبز للسلطة:
خبز قديم مقطع مكعبات ومرشرش بشوية زيت وملح وفلفل اسود وزعتر (ممكن تحطي اي نوع اعشاب)

قرشلة:
خبز قديم محمص شوي بالفرن ومطحون باليد (في كيس ومدقوق بالمدقة...يعني كل الغضب اللي عندك ممكن تطلعي) :)

قبل الغضب :)
وبعده...


الفليفلة هالايام سعرها ممتاز واليوم جبت من السي تاون فليفلة حمراء وصفراء (كيسين كل واحد ب 49 قرش بس في كل واحد حوالي 5-6 حبات وحولتهم ال:
فليفلة مشوية لسلطة

ومكعبات فليفلة للفريزر

وفليفلة مقطعة بالطول للفريزر

وعلبة عظم دجاج برضه من السي تاون ب 69 قرش عملت طنجرة كبيرة مرق دجاج للشوربة وغيره ورح تروح باكياس منفصلة للفريزر


والغدا كان اسباجيتي مخبوزة بالفرن وبالرغم من كل التصوير اللي صورته اليوم ما صحلي اصور الاكل والصورة هاي قديمة لنفس الوصفة...


الاسباحيتي المخبوزة

المقادير:
2/1 1 باكيت معكرونة اسباجيتي جافة
3 ملاعق طعام زيت
بصلة مفرومة ناعم
2/1 كيلو لحم مفروم ناعم
2 سن ثوم مدقوق
علبة فطر مفروم ناعم
حبة فليفلة خضراء مفرومة ناعم
ملعقة صغيرة ملح
2/1 ملعقة صغيرة فلفل اسود مطحون
ملعقة صغيرة زعتر ايطالي ناشف
2/1 ملعقة صغيرة حبق ناشف
ورقة غار
2 علبة بندورة معلبة (مفرومة)
2 ملعقة كبيرة معجون البندورة
مكعب مرق دجاج (اختياري)
ملعقة صغيرة سكر
3 ملاعق طعام زيت زيتون جيد
2 كوب جبنة موزريلا مبشورة

الطريقة:

تسلق المعكرونة حسب تعليمات الباكيت وتصفى
يوضع الزيت في طنجرة على نار هادئة ويضاف البصل ويقلب ثم اللحم حتى يستوي
يضاف الثوم والفليفلة والفطر وتقلب عدة دقائق
يرش بالملح والفلفل الاسود والزعتر والحبق وتقلب
في الخلاط توضع علبتا البندورة مع رب البندورة وزيت الزيتون ومكعب المرق والسكر وتطحن
تضاف للحم والخضار ثم توضع ورقة الغار ويضاف الماء وتترك لتتسبل من 20-30 دقيقة (يمكن استخدام الصوص في هذه المرحلة لاي معكرونة)
يدهن صحن زجتجي خاص بالفرن بالزيت وتوضع المعكرونة وتسكب الصلصة فوقها وتخلط لتغطي المعكرونة.
ترش بالجبنة الموزريلا
توضع بالفرن مدة 20-30 دقيقة حتي تتحمر وتتسبك وتذوب الجبنة.
تقدم مع الخبر بالثوم والسلطة.