Tuesday, February 26, 2013

وصفات انطلبت مني...واكلة اليوم...

مساء الخير...يعني اذا قلت اني بشعر بالذنب فالي حق مش بس لاني الي فترة ما عم بكتب على المدونة بس لاني ما صحللي اني اشارككم المزيد من الوصفات ولا حتى النشاطات الشرائية (اذا بقدر اسميها هيك!!!). وبحب اخبركم قديش انا سعيدة بكل رسائلكم وملاحظاتكم وطلباتكم للوصفات المختلفةوعشان هيك انا اليوم رح احط عدد من الوصفات لاكلات انطلبت مني على الفيس بوك وان شاء الله في المستقبل القريب رح انزل وصفات تانية انطلبت مني...
من هذه الوصفات...شوربة الذرة بالسميد السوبر سريعة واللي (غادة) قالتلي انها بستناها وبعتذر اني طولت لنزلتها وكنت وعدتها انزل صور بس ما صحللي اعملها مؤخرا فهي الوصفة من غير صورة

شوربة الذرة السريعة
المقادير:
3 علب ذرة مصفاة من الماء
3 ملاعق طعام سميد ناعم
2 ليتر مرق دجاج (بدون هيل لو سمحتو)
بصلة خضراء

الطريقة:
نضع الذرة والسميد والبصلة المفرومة في مطحنة الطعام ونطحن
نضع كل الكمية في قدر مع المرق وعلى النار مع التحريك حتى تغلي وتسمك...وبس (يمكن ما رح تاخد اكثر من 1/4 شاعة من البداية للنهاية)
انا بقدها مع شيبس توتيلا على جنب وعلى الوجه...وصحتين

وبالرغم من برودة الطقس الا انه احدى السيدات طلبت مني طريقة عمل بوظة سريعة وبدون الة عمل البوظة...وهي الطريقة برضو سوبر سريعة لعيونها...

بوظة القهوة السريعة
المقادير:
300 ملم كريما خفق
علبة حليب مركز محلى
2 ملعقة طعام نسكافية بودرة
ملعقة صغيرة نكهة القهوة (اختياري)

الطريقة:
تخفق كل المقادير حتى يتضاعف حجمها وتحفظ في وعاء بلاستيك محكم الاغلاق في الفريزر لمدة 6 ساعات

تغييرات:
استبدال النسكافية بالكاكاو او الفانيلا او اي نكهة بتحبوها....وصحتين

اما وصفة البهارات اللي بعملها يا (صوفي) انا اخذتها من عطار قديم (الله يرحمه) في المحطة وجد انها ممتازة...اهم شي هو تحميص البهارات الحب وتركها تبرد بعدين طحنها والاحتفاظ فيها بوعاء محكم الاغلاق...الكمية كبيرة بس بتقدري تعملي نصها...

خلطة بهارات ابو نعيم...
المقادير:
125 غم بهار سادة
100 غم فلفل اسود (ممكن تقليله اذا ما بتحبوها تحرق)
25 غم كبش قرنفل
15 غم من كل من (القرفة، الهيل، الزنجبيل، الكزبرة)
اختياري (قليل من المستكة)

الطريقة:
تحمص كلها ما عدا المستكة
تبرد
تطحن مع اضافة المستكة...وصحتين

اليوم انا عملت مجدرة وجد انها اكلة مقدرة خاصة اذا تفننتوا بتقديمها...


والحلو كان بلونديز الزبدة المحمصة بالشوكولاتة

بلونديز الزبدة المحمصة بالشوكولاتة
المقادير:
6 ملاعق طعام زبدة
1/2 1 كوب سكر بني
2 بيضة
ملعقة صغيرة فانيلا
1/8 1 كوب طحين
ملعقة صغيرة بيكنغ باودر
1/2 ملعقة صغيرة ملح
1/2 كوب تشوكولت تشيبس

الطريقة:
تسيح الزيدة على نار هادئة حتى تبدأ بالتحول الى اللون البني وترفع
تخفق الزبدة والسكر معا ثم يضاف البيض والفانيلا
تخلط المواد الجافة معا ثم تضاف وتخلط لتختلط
توضع في صينية مربعة صغيرة مدهونة وترش الشوكولاتة على الوجه
تخبز في فرن حرارته 175 حوالي 20 دقيقة.
تخرج وتبرد في الصينية ثم تقطع...وصحتين

                                     

Tuesday, February 19, 2013

شوربة البطاطا الحلوة والزهرة الهندية

سلامي للجميع...
الي زمان ما كتبت على المدونة وآخر اخبار التوفير في البيت...من حوالي 6 ايام بالتحديد...وهذا الحكي مش معناه اني فشلت في التجربة لاني في الواقع كنت مشغولة كتير في الفترة الماضية بين الدروس ومتطلبات العمل ومواعيد دكتور الاسنان والاولاد والواجبات المنزلية ...وكمان ما رحت تسوق الا شئ بسيط عند الخضرجي والمخبز...مقدار الصرف حوالي 20-25 دينار
وبالتالي ما صحلي فرصة اني اكتب عن طبخات الاسبوع الماضي او انزل وصفات او صور...بس مش معناه اني ما قضيت وقت لطيف في المطبخ بعمل احب الاشياء الى قلبي وهو الطبخ :)
آخر مرة نزلت فيها كانت يوم 2/13 ونزلت وصفة اصابع الخبز وكنت قبلها بيوم طابخة تشيلي ...هلأ بكزب عليكم اذا انا متذكرة شو طبخت بالزبط وباي يوم بس اذا ذاكرتي اسعفتني عملت الطبخات التالية (عشوائيا):
في يوم اكلنا كباب من بره (كان جاي على بالنا)
ملوخية وارز
بواقي 
ستيك بالفرن مع بطاطا مهروسة وشوربة الزهرة والبطاطا الحلوة الهندية (وصفتها موجودة في الاسفل)وقالب خضار مخبوزة بالجبنة..وطلع قالب الخضار لزيز جدا...رح يدخل في درس من دروس الطبخ في المستقبل ان شاء الله..
فتوتشيني بالدجاج وخبز ثوم وسلطة
واليوم والدتي الله يخليها عملتلي طبخة عدس وسلق وبيتزا للاولاد مع بواقي تانية 

  بالرغم من عدم حبي لفصل الشتاء الا اني بحب الشوربات كتير وبحس انها ما بتتاكل الا بالشتا...واليوم وصفتي اللي بدي اشارككم فيها سهلة ومفيدة وصحية كمان..

شوربة البطاطا الحلوة والزهرة الهندية
المقادير:
1/2 راس زهرة صغير مقطع 
ملعقة طعام بهارات جرام ماسالا الهندية
ملعقة طعام زيت
3 حبات وسط بطاطا حلوة مقشرة ومقطعة مكعبات
بصلة صغيرة مفرومة
ملعقة طعام زبدة
مرق دجاج (حوالي لتر ونصف) وانا استعملت مرق الدجاج اللي طلع من العظام لدجاج استخدمته سابقا
ملح، فلفل اسود
1/4 ضمة كزبرو مفرومة ناعم

الطريقة:
ترش الزهرة بالزيت وبهارات الماسالا وتوضع في الفرن لتصبح اطرى وتاخذ لون ذهبي بحرارة 180 حوالي 25-30 دقيقة
في هذه الاثناء تذاب الزبدة وتقلب البصلة لتطرى ثم تضاف البطاطا والمرق وتترك لنصبح البطاطا طرية ثم يضاف نصف كمية الزهرة وتغلى 5 دقائق ثم تطحن ناعم وتضاف قطع الزهرة المتبقية والكزبرة وتقدم والف صحة...


Wednesday, February 13, 2013

اصابع الخبز...

مثل ما ذكرتلكم امبارح ووعدتكم بوصفة اصابع الخبز اللي عملتهم مع التشيلي...بس ممكن يتقدموا مع اي معكرونة كطبق جانبي...
اصابع الخبز
المقادير:
3 اكواب طحين (انا استعملت واحد اسمر و2 ابيض)
1/2 2 ملعقة صغيرة خميرة
3 ملاعق طعام سكر بني
كوب ماء دافئ
1/4 كوب زيت نباتي
ملعقة صغيرة ملح

زبدة لدهن صينية الخبز
للوجه
1/2 اصبع زبدة مذاب و 1/2 ملعقة صغيرة بودرة الثوم
ممكن اضافة: جبنة بارمزان للوجة او اي اعشاب جافة كالزعتر او البيزل او الروزماري

الطريقة:
تعجن كل المواد معا في العجانة 10 دقائق اة على اليد اكثر شوي وتترك مغطاة في مكان دافئ ليتضاعف حجمها
تدهن صينية مستطيلة بالزبدة وتفرد العجينة وتقطع بالسكينة او بكرة تقطيع البيتزا الى اصابع وتغطى وتترك لتخمر مرة اخرى مدة ساعة
تخبز في فرن حامي بحرارة 200 درجة حتى تستوي ويصبح سطحها ذهبي
تدهن بالزبدة المخلوطة ببودرة الثوم وممكن اضافة رشة بارمزان او اعشاب...انا بس حطيت زبدة وبودرة الثوم...والف صحة وهنا...

منال

Tuesday, February 12, 2013

سلطة التاكو السريعة وصوص السلطة الفرنسية

سلام...اليوم كان زي العادة حافل بالشغل خاصة انه الجو مش مشجع على الطلعة بوجود بيبي صغيرفكملت تعزيل زي ما انا مخططه ومش معقول اديش الشغل في البيت "نبع" ما بيخلص. وخطر على بالي كيف كنت وانا صغيرة اطلع على امي واستغرب جدا من كتر ما تشتغل في البيت واقول لحالي "ما بتزهق"!!! بس الحقيقة انه لما الواحدة بتشتغل في بيتها اكيد انه الشعور مختلف...طبعا بيت اهلي بهداك الوقت كان بيتي...ما تفهموني غلط!!! بس قصدي انه الواحدة لما تشعر انها بتتحكم بامور بيت بيكون بيتها وهي الملكة فيه "زي ما بيقولوا". وهون فهمت ليش امي ما كانت تزهق شغل بالبيت...المهم انه كان في انجازات على صعيد الترتيب والتنظيم بالاضافة الى التخلص من الكثير من الاشياء الزيادة بالبيت وان شاء الله بيستفيد منها ناس تانيين بحاجة الها...وطبعا متل ما خبرتكم امبارح اني طبخت تشيلي لليوم بس عملت شوية رز زيادة وعملت سلطة الدجاج الصينية بالدجاج اللي طلع من سلق العظم وعملت اصابع الخبز (بريد ستيكس) وشراب ليموناضة لزيز...رح اعلمه للستات من ضمن سلسة دروس تقديم الاكل في الحفلات "الدرس الاول" في نهاية الشهر ان شاء الله...

ومتل ما وعدتكم فوصفة اليوم هي سلطة التاكو السريعة وصوص السلطة الفرنسية (واللي ممكن يستخدم في اي وصفة بتحتاج لهذا الصوص) لاني ومتل ما ذكرت سابقا نا بحب اشتري صوصات السلطة الجاهزة...

سلطة التاكو السريعة وصوص السلطة الفرنسية
المقادير:
 باكيت شيبس تورتيلا (يفضل نوع ما عليه بهارات كثير..انا استعملت النوع اللي بينحط في المطاعم لانه بس مملح ومكتوب على الباكيت Restaurant Style كسري اغلبه وخلي قطع كاملة لتزيين الجوانب
1/2 خسة صغيرة ايس بيرغ مغسولة ومنشفة ومفرومة شرائح وسط
200 غم (شوي مو كثير) لحمة مفرومة ناعم مقلبة لتستوي ومرشوش عليها بهارات التاكو (اما بتشتروها جاهزة او بتعملوا البهارات انتو وفي وصفة على المدونة للبهارات)
حبة بندورة كبيرة مزالة البذور والعصير مفرومة ناعم
بصلة خضراء صغيرة مفرومة شرائح
كوب جبنة شدر حادة مبشورة
ممكن اضافة الفاصوليا الحمراء، الذرة، الزيتون الاسود وممكن الاستغناء عن اللحمة لتكون نباتية
1/2 كمية من صوص السلطة الفرنسية

مقادير صوص السلطة الفرنسية:
كوب كاتشب
كوب زيت
1/2 كوب سكر
1/4 كوب خل
1/4 كوب ماء
ملعقة صغيرة بودرة الثوم
ملح وفلفل اسود (رشة)

الطريقة:
تخفق مقادير الصوص معا في الخلاط وسنحتاج الى نصف الكمية للسلطة والباقي ممكن الاحتفاظ فيه لمدة شهر في الثلاجة في زجاجة محكمة الاغلاق
للسلطة: تفرد كمية التيبس المكسر وفوقها الخس ثم البندورة واللحم والجبنة والبصل وتوزع الصوص بدون خلط السلطة وتزين الجوانب بقطع التيبس الكاملة والف صحة...




صوص السلطة (انا عملت نص الكمية)

السلطة...

اما في الغد فان شاء الله رح اشارككم وصفة اصابع الخبز اللي عملتها اليوم...والمنيو للغد هي بواقي اكل اليوم ان شاء الله وبركي بعمل حلو...

منال

Monday, February 11, 2013

منيو الاسبوع الثاني وبونبون جوز الهند...

اليوم كان عندي امور مهمة لانجازها الصبح ولغاية الساعة 11:30 لبديت شغل في المطبخ بس الانجاز كان ممتاز لاني طبخت لليوم وبكرة كمان عشان اقدر اكمل حملة التعزيل واللي تستهدف الخزانة في غرفة الاولاد ان شاء الله...وانجازاتي اليوم كانت بوشار بالكراميل (واللي طلع من نصيب صاحبات ياسمين لانها راحت عند واحدة منهم ليشتغلوا على بحث جماعي) وبون بون جوز الهند واللي رح تشوفوا انه من اسهل واسهل الاشياء الحلوة اللي ممكن تنعمل وخاصة في اعياد ميلاد الاولاد او اذا اجو اصحابهم وما عندك وقت تعملي اشي حلو...واستخدمت فيه لوز مملح كنا عندي من اول وقصة هذا اللوز انه زوجي بيحب المكسرات كثير بس ما باكل اللوز وبيقيمه على جنب فانا طحنته واستعملته في وصفة اليوم..

اما غدا اليوم فكان:
شوربة فريكة (من امبارح)
سلطة التاكو السريعة واللي رح اكتب وصفتها بكرة ان شاء الله...
دجاج بالكزبرة واللي سلطان اله فتره بيطالب فيه بعد ما اكله على الطيارة واحنا راجعين من دبي...اشي بيضحك..اغلب الناس ما بتحب اكل الطيارة كثير ...بس مش سلطان!!!!
وارز ابيض




الاضاءة مش كثير بس يالله...صورة الدجاج بالكزبرة من الطنجرة مباشرة هههه
بوشار الكراميل

ولبكرة عملت تشيلي واللي كانت على المنيو الاسبوع الماضي بس صار تغيير (واستخدمت لحمة مفرومة من الفريزر وكيس الفاصوليا السودا وعلبة فاصوليا حمرا من المونة).

واحلى ما في الموضوع اني كنت جايبة صحنين صدوردجاج الاسبوع الماضي نسيت اذكرهم ، كل واحد فيه 4 صدور بس كانوا بجلدهم وبعظمهم واليوم مشان الدجاج والكزبرة سحبتهم واستعملت 5 لطبخة اليوم و3 راحوا على الفريزر لطبخة تانية وسلقت العظم عشان اعمل شوربة للاسبوع الجاي ان شاء الله وكان فيه شوية لحمة دجاج على العظم فقمتهم ورح يكونوا سلطة دجاج صينية لبكرة ان شاء الله...عشان هيك انا من مشجعين شراء الدجاج بعظمه الا اذا كان المسحب عليه عرض...لانه الاستفادة مضاعفة (الطبخة الاصلية، مرق دجاج من العظم وسلطة من بواقي اللحم على العظم)..بس الموضوع بده شوية وقت من وقتك لتقيمي العظم...

                                     
قطع الدجاج من العظم واللي رح تكون سلطة بكرة ان شاء الله


فمنيو بكرة ان شاء الله هو:
تشيلي مع ارز
سلطة الدجاج الصينية

اما اليومين الماضيين فكان الاكل عند اهلي يوم السبت وبواقي يوم الاحد بس عملت شوربة الفريكة من العظم اللي سلقته الاسبوع الماضي...

بون بون جوز الهند
المقادير:
25 حبة مارشملو كبيرة (او اعملي كل الباكيت)
1/2 كوب كريما سائلة
1/2 ملعقة صغيرة فانيلا
للتغطيس :
حوالي كوب لوز مملح او كاجو او فول سوداني ومطحون
كوب جوز هند محلى (هلأ هادا المكون مش سهل دائما ايجاده وسعره شوي غالي بس عندي منه من اول...ممكن تستخدمي جوز الهند الهادي بس جربي ترشي عليه شوية سكر ناعم)

الطريقة:
اخلطي الكريما والفانيلا وسخنيها في المايكرويف دقيقة ونص
اخلطي جوز الهند واللوز
غطسي حبات المارشملو (واحدة كل مرة باستخدام عود خشب) لمدة 15 ثانية وهزيها لتصفيتها من السائل) ثم في خليط جوز الهند واللوز
اتركيها على ورق شمع لتنتهي من كل الكمية واحفظيها في وعاء محكم الاغلاق...وصحتين



Sunday, February 10, 2013

الخل وفوائد لا تعد ولا تحصى...وسائل تنظيف لبلاط البانيو بالحمام...

زي ما حكيتلكم قبل هيك اني في موود التعزيل واليوم قررت اني اهاجم البانيو في حمام غرفتي وعملت محلول رائع مثل السحر على كل بقع الصابون والبقع السوداء اللي بتصير على بلاط البانيو من المي وقلة الشمس...ولاني بحكي عن التوفير وكمان مشان البيئة وصحتك، المحلول اللي عملته مش بس فعال واوفر واكثر امان للبيئة وكمان الك عشان ما تستنشقي غازات ضارة...

الطريقة:
عبي اي زجاجة الها بخاخ (انا استعملت زجاجة سائل تنظيف الزجاج الفارغة) عبيها للنص بالخل (انا استعملت خل اشتريته بزجاجة كبيرة (3 لتر بدينار وشوي لاستعمالات التنظيف) وبعدين ضيفي ربع كوب عصير ليمون (انا استعملت النوع الجاهز يعني مو فرش برضة زجاجة جوالي لتر وشوي ب دينار) وبعدين ملعقة كبيرة كربونات (وضيفيها شوي شوي لانها رح تفور) وعبي باقي الزجاجة مي...وبس ورشيها على اماكن التكلس في البانيو وخليها 1/2 ساعة وبعدين بفرشاية خشنة (استعملت فرشاية اسنان قديمة) وشوفي قديش رح ينظف...جد رائع...انا قررت اعمل زجاجة واخليها بالحمام عشان استعملها بعد كل حمام ليضل الحمام نظيف....

Saturday, February 9, 2013

واخيرا خلصت الورشة...

ملاحظة: هذا المقال بدأت في كتابته يوم 5 فبراير بس من كثر التعب ما خلص غير بعد يومين عشان هيك رح تلاقوا الموضوع مقسم...
2/5
طبعا انا زهقتكم قد ما حكيت عن الورشة اللي في البيت بس مع الطقس والسفر ومواعيد مش مزبوطة من الناس...الموضوع اخذ شهر ونص...وطبعا بقدم اعتذاري لزوجي لاني اتبعت مبدأ " كتر الزن اقوى من السحرعلى الدان" والله يرضى عليه اتحملني...المهم خلصت الورشة بس ضل طبعا التعزيل والتنظيف اللي رح ياخد عدة ايام خاصة مع مسؤوليات الاولاد والشغل...ياالله...الله بيعين...
اليوم وبالرغم من انه الجو كان بارد شوي قررت آخذ هارون واروح على المول..وجد ما احلى المول الصبح..ما في حدا وهدوء..حتى هارون نام وما غلبني الله يرضى عليه بس للاسف كثير من خططي باني الاقي لقطات (يعني عروض منيحة) على الاشياء باءت بالفشل لاني اتأخرت وكل الاشياء المنيحة طبعا طارت...والحقيقة اني وبالرغم من اني رحت على دبي، ما عرفت اجيب اشياء مثل الناس لانه الوقت قصير ووجود البيبي وانه مريض كلها ما ساعدت...المهم اني مريت على السوبرماركت اللي بالمول "يعني ما بقدر اقاوم اني ما امر"!!! والهدف كان فعليا اني اجيب ورق النوري (لدرس السوشي الاسبوع الجاي ان شاء الله) وللاسف ما لقيت بس اخذت 6 علب فاصوليا (2 حمراء و4 بيضاء) على العرض ب 2.20 دينار...مش بطال واشتريت شنينة الي..ورجعت على البيت وعملت رز لاته متل ما حكيتلكم طبخت البازيلا امبارح...واتغدينا والحمدلله وبدا بعدها التدريس واستغليت فرصة نوم هارون ورحت على سوبرماركت تاني. والحقيقة لفت نظري اديش الناس بصرفوا فلوس على الاطعمة الجاهزة مثل صوص المعكرونة او مكعبات الخبز الجاهزة للسلطة واللي واحدة من المتسوقات بالسوبرماركت ضلت تسأل كل حد عن محلهم وانا عم بفكر اقلها اعمليهم انت والله ازكى وارخصلك وما بياخدوا وقت ابدا...بس طبعا ما قلتلها...!!!!
المهم اني جبت ورق النوري زاخيرا بس مو محسوب من ضمن مصروف البيت بس اشتريت :
خبز حمام صغير للساندويشت للمدرسة ب  85. قرش
اغراض لدرس السوشي من السلمون المدخن ولحم السلطعون...مش محسوبة لانها للدرس
نسكافيه فانيلا ..ما قدرت اقاوم 3.90 دينار
بابريكا مرتبان كبير فيه كمية 4 مرتبانات صغيرة ونص ب 3 دينار(انا بستعملها كثير والمتربان الصغير ب 1.20 فهيك اوفر بكثير...
وجبت كم شغلة برده للتنظيف وشخصية بس المجموع المحسوب هو 7.75 دينار
والعشا كان ساندويشات الي ولزوجي وسلطان اكل بقية السباغتي وياسمين اكلت بازيلا...صحتين

2/7
تعباااااانه!!! الي يومين بعزل وبنقل عفش وبكبكب كراكيب...شعور رائع بالانجاز...واخيرا صار عندي غرفة فيها مكتب وانا حاليا عم بتطبع هذا المقال من على مكتبي :)
امبارح كنت على وشك اني اطلب اكل من برة لاني اشتغلت كثير ومر الوقت بسرعة وما في بواقي اكل كفاية والاولاد على وصول من المدرسة..بس الحمدلله رجعت لعقلي وعملت نودلز تشاو مين بسرعة من شوية فليفلة ملونة ونودلز من المونة وطارت....صحتين..(مما يثبت انو الواحد لما يحط عقله براسه بيعمل وكمان وجود اشياء ثابتة من المعكرونات والصوصات بيساعد تعملي احلى طبق بدون تعب...واليوم كملت مسلسل التعزيل وخلصت غرفة الضيوف واخيرا وطبخت مقلوبة زهرة (براس الزهرة اللي ب 33. قرش وخليت شوي مشان شوربة خلال الاسبوع الجاي ) وآخر كيس لحمة شقف وعملت سبرنغ رولز كبيرة بنص الملفوفة الصينية اللي كانت بالثلاجة ونص ملفوفة حمراء وشوية جزر وبصل وقليت 12 واحدة على الغدا (عزمت حماتي) مع صوص سويت اند سور منزلي وصحن سلطة وصحن لبن...الحمدلله وفرزت 9 حبات سبرنغ رولز لمرة قادمة.  الليلة معزومين ان شاء الله على العشا...

والحقيقة مع التعب والشغل ما عملت حلو بس عنا لسة كب كيك راس العبد :) وهي شكله كم جوه زي ما حكيتلكم...



2/8
اليوم الحمد لله انا انشط من دايما وعملت وافلز على الفطور ولبسنا وطلعنا قضينا اليوم بره مع الاولاد وتغدينا بره فما كان في طبخ بس برضه مرقت على السوبرماركت اللي بالمول الي رحنا عليه (مول تاني) وجد ما بقدر اقاوم..وللحقيقة انا كنت لازم اشتري شغلة لهارون لمصاصات الحليب ما في منها غير بهدا السوبرماركت بس شفت كم شغلة على العرض ما قدرت اقاومهم وان شاء الله رح استفيد منهم باكلات للاسابيع القادمة:

عصير ريد مكس (بحبوا الاولاد كثير) وعادة بيكون ب دينار وشوي...جبت واحدة بس ب 99. لانه مو اشي اساسي
زبدة فريكو ( نوع ممتاز 200 غم ب 99. قرش جبت 6) يعني الاصبع بيطلع ب نص دينار (عرض ممتاز)
جبنة كريمية وزن 228 غم للواحدة ب 99. جبت 6 لاني بعمل كثير حلويات وعندي دروس ممكن اني استخدمها فيها
برغر مفرز (بعرف يمكن تستغربوا) اني اشتريت اشي جاهز بس في الحقيقة انه السعر ممتاز وكمان بيجي اوقات (مثل لما يكون عندي درس) وما لحقت اطبخ بيسعفني انه عندي برغر (كيس من نوع الجامبو) ب 2.99 فيه كيلو برغر (حوالي 10 حبات، يعني طبختين بالنسبة النا...مش بطال)
راس بروكلي كبير ب 55. قرش
كيلو ونص بندورة ب 29. قرش من زمان ما شفت كيلو البندورة ب 19. قرش
كيلو موز صومالي ب 1.56 (مش رخيص بس بدي اطعمي هارون موز وبرتقال على العشا)
كيس برتقال دم الزغلول للعصير (3 كيلو ب 1 دينار)
3/4 كيلو ليمون ب 46. قرش
علبة جبنة امنتال للساندويشات ب 1.39 دينار 
علبة كريما جوز الهند ب دينار (عادة بتكون اكثر)
لفتين خبز عادي ب 54. قرش
خسة ب 26. قرش
باكيت جلو باي فيلنغ نكهة فستق حلبي (مو على السيل بس ما شفت منه الا بهذا السوبرماركت ب 1.55 دينار)
المجموع هو (بدون الغرض لهارون وبدون رولات محارم المطبخ هو 25.6 دينار 

ملاحظة: مجموع الصرف خلال اسبوع....175.25 دينار....كثير صح!!!! بس رح تشوفوا ان شاء الله كيف انه دايما اول الشهر هيك وبعدين ان شاء الله بتزبط اكثر...خلينا ماشيين مع بعض ونشوف...بعدين الاسبوع الجاي عندي البنت اللي عند حماتي رح تكون في ضيافتي لمدة 9 ايام وبالتالي الطبخ ل 4 ناضجين و2 مراهقين وبيبي....وكمان في فطور وغدا وعشا ووجبات المدرسة...فالاستهلاك فعليا اعلى...

هلأ وجبات الاسبوع القادم رح انزلها ان شاء الله في موضوع تاني لاني طبعتهم وما انحفظوا للاسف...ووصفة كرات الدجاج الصينية هي:

كرات الدجاج الصينية
المقادير:
4 صدور دجاج مسحب
3 سن ثوم
بصلة خضراء كبيرة مقسمة
جزرة وسط مبشورة
1/2 ملعقة طعام زنجبيل مبشور
ملعقة طعام صويا صوص
ملعقة طعام صوص تشيلي حارة وحلوة (يمكن الاستغناء عنها)
1/2 ملعقة صغيرة بهارات صينية
ملعقة طعام نشا
1/2 ملعقة طعام زيت السمسم
ملح وفلفل اسود
نشا للتغطيس
زيت غزير للقلي
صوص سويت اند سور
الطريقة:
تطحن المقادير معا وتكور وتغطس بالنشا وتبرد ساعة على الاقل وتغطس مرة اخرى بالنشا وتقلى لتستوي وتحمر وتفدم اما مع الصوص على جنب (انا عملت هيك) او تطبخ معها لدقيقة بعد القلي والف صحة...




Monday, February 4, 2013

بعض التغييرات على المنيو لهذا الاسبوع والسلطة الروسية

سلامي للجمبع...الي يومين مشغولة وجد مش عارفة بشو!!!الوقت بطير والله يعين اللي في راسه 100 اشي وبده كمان 24 ساعة على ال 24 ساعة الاصلية عشان يعمل اشي منهم...من يوم ما رجعت من دبي وانا حاطة موضوع تعزيل البيت في راسي وبعرف انه الجو لسة ما دفي بس مش عارفة..حاسة اني بدي اكبكب كل الكراكيب وانظف كل البيت ...ولاني مش المرأة الخارقة...فقررت انه كل يوم اشي عشان ما انجن واهلك خاصة انه البنت اللي بتساعدني لسه جديدة وسلامتكم بدها كمان سنتين عشان تفهم علي...هذا الموضوع حاليا مخليني اسأل حالي...ليش بجيب الهم لحالي؟ خلص ما بدي مساعدة ...بس بعاود وبقول يلا خلي هالفترة تمر وبعدين الله بيفرجها...

المهم..يوم السبت كان عندي درس وما طبخت فاكلنا البواقي وباليل اجتني حالة الترتيب وطلعت اغراض خزانتين في المطبخ عشان ثاني بوم اعزل...وبدأ مشوار التعزيل واللي كان الهدف منه ضبضبة خزانتين وتحول الى نص المطبخ وغيرت محلات اشياء واستغنيت عن اشياء..الخ وكل هاد مع الطبخ لليوم...وعشان تشوفوا كيف اشي واحد بيغير تريتبات الواحد من حيث لا يدري...فالنية كانت طبخ انشلادا بخبز التورتيلا المنزلي بس بسبب التعزيل قررت اعمل اشي اسهل شوي وهو معكرونة اسباغيتي بصوص البولونيز وكمان كرات الدجاج الصينية (واللي انطلبت مني في الدرس ققررت اني اعملها باستخدام علبة صدور الدجاج اللي اشتريتها اول الاسبوع مع صوص السويت اند سور (اعملناها في الدرس) و السلطة الروسية لانه زوجي بيحبها كثير واللي قررت اني اعملها لما سلقت خضار لهارون فقلت لحالي...سالقة سالقة...اعملي السلطة با بنت....والحقيقة اني تعبت بين الطبخ وهارون والتعزيل...بس كنت عازمة حماتي عالغدا ولكن بسبب ظروف وفاة عائلية خبرني زوجي انه يروح وحماتي كمان وسلطان عند صاحبه وبالتالي ضل انا وياسمين والبنت  على الغدا...فاكلنا نودلز وضل الاكل لليوم...طبعا ما كنت قليت كرات الدجاج ولا سلقت المعكرونة...

واليوم الخطة كانت انه ما اطبخ ولكن هيهات!!!ومش عشان اشي بس حماتي جاييها ضيوف وبكل زوق سالتني اذا بقدر اعمل اشي حلو...قلتها ولو...غالي والطلب رخيص...والحقيقة اني بنبسط لما ينطلب مني هيك طلب...يعني فرصة اعمل اشي بحبه..فعملت رغيف اللوز...



وعملت كب كيك راس العبد...متذكرينه.؟.قصدي راس العبد؟... يعني هذه الشوكولاتة بس قشرة والجوة مثل حشوة راس العبد,,,بركي بكرة بفتح واحدة وبصورها وبحطها للتوضبح...

ولاني بعزل المطبخ...كملت كمان خزاننتين وقررت بما اني مقضية وقت هيك هيك اني اطبخ لبكرة بازيلا وارز...فالتزمت بخطتي وسلقت كيس لحم راس عصفور وكيس عظم مشان اعمل شوربة فريكة اما هذا الاسبوع او الجاي ان شاء الله....والنية هي اني اطلع بكرة ان شاء الله اذا الطقس منيح اقضي بعض الامور انا وبيبي هارون بما انه في مدارس..........وووووههووووو الحمد لله...جد... شهر و 4 ايام عطلة...يعني والله كثير بالشتاء...على الاقل بالصيف فيه نشاطات تنعمل....

ووصفة اليوم هي للسلطة الروسية...وبعرف انكم طلبتوا مني وصفة كرات الدجاج الصينية ووعد انزلها بكرة ان شاء الله...

السلطة الروسية
المقادير:
1/2 كيس بازيلا مفرزة ومسلوقة ومصفاية
2 جزر وسط مقطع مكعبات وسط ومسلوقة ومصفاية
حبة بطاطا كبيرة مقطعة مكعبات ومسلوقة ومصفاية
للصوص:
كوب وربع مايونيز
ملعقتين كبيرتين كاتشب (احنا منحبها مع الكاتشب)
ملعقة طعام سكر مذاب ب ملعقة طعام خل
1/4 كوب لبن
ملح، فلفل اسود

الطريقة:
تخلط مقادير الصوص وتضاف للخضار (في بيتي بنحب يكون عليها صوص كثير)



العشاء كان ساندويشات مرتديلا ولبنة...وصحتين على قلوبكم...

Friday, February 1, 2013

تسوق كبير دائما اول الشهر...ووصفة تبولة السبانخ

لكل اللي قرأوا المقال الاول...بحب اشكركم انكم تحملتوا طوله بس هيك اقتضت الضرورة..وكمان بحب ابين اني بعشق اشي اسمه شراء اكل لاني بحب المطبخ ووبحب اضيف انه الاكل اللي بعمله هو في الواقع ل 3 اشخاص بالغين (انا وزوجي والبنت اللي بتساعدني في شؤون البيت) و 2 مراهقين (مرحلة مبكرة...يعني صحتين بيجيهم حالات جوع شديدة احيانا..الف صحة...وبيبي صغير...وكمان بحب استضيف حماتي كل يوم بعد يوم اذا وقتها سمح مع البنت اللي بتساعدها فيعني فيه طلب على الاكل... :)

 اليوم ومثل ما خبرتكم رحت عملت التسوق الكبير اللي لازم كل اول شهر وخاصة لادوات التنظيف  بس هذه ما رح تدخل ضمن حديث الميزانية اللي حكيت عنه.. المهم اني اشتريت كل الامور اللي لازمتني بس تجاوزت القائمة ببعض الاشياء اللي كان سعرها ممتاز ورح تدخل في تخطيط الوجبات للاسابيع المقبلة وهي:
3 باكيتات ملوخية (انا عادة بفرز طازة بس ما شاء الله البيت عندي بيموتوا عليها فمهما فرزت الا اضطر اشتري جاهز) الباكيت ب 68 قرش
2 باكيت صدر دجاج طازج مسحب (كل باكيت فيه 4 صدور) واحد ب 1.45 والثاني ب 1.59...يا ريتني جبت كمان (السعر ممتاز )
فليفلة حمرا الكيلو ب 1.74 وجبت ب 3.12 دينار وشويت 5 وحطيت كل واحد لوحده في الفريزر ورح يدخل باكلات مثل مع حمص او في سلطة... وضل واحد احمر وواحد اصفر وواحد برتقالي لاكلة خلال الاسابيع القادمة
المزيد من التشكن ناجتس بس ما قدرت اقاوم السعر (3 باكيتات ب 2.45) ممتازين للطوارئ واليوم قليت القديم اللي عندي من اول
باكيت حليب جوز هند بودرة (النية كانت علبة واحدة بس سعرها 1.08 والباكيت الصغير من حليب البودرة وممكن يعمل لحد 5 علب ب 2.20 يعني توفير اكبر وانا بستعمله للكاري والشوربات والحلو...
راس زهرة ب 33قرش (ما كان في نية اله بس قررت اعمل مقلوبة زهرة بدل الباذنجان لاني استعملته كله اليوم في المنزلة)
2 علب مرتديلا سادة (برده للاولاد) ب 50 قرش الواحدة (واحد في الثلاجة وواحد راح على الفريزر)
2 علبة حبش مدخن (للساندويشات) ب 89 قرش للواحدة (واحد في الثلاجة وواحد راح على الفريزر)
لتر عصير توتيات مشكلة ب 77 قرش

اشياء اخرى للاولاد اشتهيتها:
2 باكيت ذرة فرش (4 حبات كبار في كل واحدة ) للسلق والاكل (مممم) الباكيت ب 1.45 (مو رخبص الله يرحم لما كان الواحد ب 10 قروش...اكيد في الحسبة ارخص...لازم اصير اروح على الحسبة :)
اشياء زاكية للمدرسة وعصير وشيبس لسلطان لمدة 3 ايام (لانه الدوام يوم الثلاثاء القادم ان شاء الله)
شنينة علبة كبيرة

اشياء ندمانه اني اشتريتها:
باكيت كاندي حامض (انا كثير بحب الكاندي وخاصة الحامض ودايما بجيب منه بس ولا مرة انتبهت انه سعره 3.36...آخر مرة واحسن لصحتي...

الاشياء اللي لازم اشتريها:
سكر 5 كيلو
ارز 5 كيلو
دايت ببسي صندوق
ببسي عادي 3 زجاجات لتر واحد للزجاجة
4 علب سفن اب دايت (لما تيجي حماتي تتغدى عنا)
2 كيلو لبن
علبة سلامي مدخن
3 باكيت بازيلا مفرزة
علبة طحينية كبيرة
زجاجة كاتشب كبيرة
زجاجة صويا صوص كبيرة
علبة لبنة (مع اني جبت واحدة مبارح بس بنستهلك لبنة)
صندوق حليب بلدنا فراولة للاولاد
جبنة ايدام شرائح (باكيت)
جبنة شدر
نسكافية
حليب مركز للتسكافية (عدة علب)
سمسم محمص (باكيت)
علبة فول
خضار:
ليمون، خس اي بيرغ، جزر، فليفلة خضراء، كوسا

وطبعا ادوات تنظيف وعناية شخصية...دفعت للكل .121.89دينار بس كثير من الاشياء وخاصة ادوات التنظيف لكل الشهر...انا الحسبة الي رح تدخل فعليا في حسبتنا فهي 80.89 دينار + بعتت سلطان على الصيدلية واشتريت حليب لهارون ب 9.40 دينار... يعني الكل اليوم 90.30 دينار...
واليوم زي ما حكيت مبارح الاكل كان منزلة باذنجان وارز، تشيكن ناجتس وبطاطا مقلية وبقية المعكرونة للاولاد وتبولة السبانخ. اما هارون فاكل موز وبرتقال للفطور وكوسا وجزر وشوفان على الغدا  (وعملت لعدة ايام) وسيريلاك للعشا...صحتين...واحنا ما افطرنا فتغدينا بدري...سناك العصر كان فواكه ودرة مسلوقة والعشاء كان ساندويشة شاورما للاولاد (من بواقي امبارح) وساندوشتين لبنة وزيتون وصحن حلو من بواقي مبارح لجوزو وانا ما رح اتعشى احسن انام خفيفة).

  ولانه انطلبت مني تبولة السبانخ فهي الطريقة لعيونكم...

تبولة السبانخ
    المقادير:
6 اكواب سبانخ مغسول جيدا ومصفى ومجفف تماما ومفروم خشن شوي
3 حبات بندورة مزالة البذور والعصير مفرومة ناعم
½ كوب برغل منقوع بالماء 5 دقائق ومصفى ومعصر من الماء تماما
بصلة خضراء مفرومة حلقات
عصير ليمونتين
½ كوب زيت زيتون
¼ ملعقة صغيرة قرفة (اختياري)
بودرة شطة حمراء (اختياري)
ملح وفلفل اسود

  الطريقة:
يوضع الزيت وعصير الليمون والقرفة والملح والفلفل الاسود والشطة البودرة (اذا اردت السلطة حارة) في وعاء وتخلط
يخلط البرغل والسبانخ والبندورة والبصل وتخلط وتضاف الدرسنغ ويتم تذوقها واضافة عصير الليمون او الملح اذا احتاج الامر.


وان شاء الله بكره بواقي لانه في درس طبخ...

محاولة ضبط الميزانية والاسبوع الاول

ملاحظات:
 اولا هذا المقال طويل فبعتذر منكم بس هو ضروري لتعرفوا مبادى التخطيط وبهمني ابين انه   الغرض منه هو اني افرجيكم كيف اذا ست البيت عندها مونة جيدة انها ممكن تنفذ احلى الاكلات بدون كسر الميزانية ونقطة ثانية بحب اشير الها انه كل ست بيت بتختلف عن الثانية واللي بيزبط معي ممكن ما يناسب غيري فانا ما بحاول اعمم التجربة نفسها بقدر محاولتي لمشاركتكم بالمبادى والطريقة اللي بستعملها 
ثانيا.. الميزانية اللي بحكي عنها ورح اشملها هي للاكل بس ولا تشمل ادوات التنظيف او العناية الشخصية او حتى مصاريف البيبي :( جد الله يعين الناس)
ثالثا..المنيو مش اشي لا يمكن الرجوع عنه يعني ممكن يتغير اذا طرئ ظرف مثل جية ضيوف او زيادة اكل من قبل يوم او اني انعزم ؛) فرح اعمل تحديث يوم 7 الشهر لاستعراض النتائج
..وشكرا...

اوكي...خلينا نشوف كيف رح احاول ازبط اموري هذا الشهر مثل ما قررت اول السنة لانه والله بهالاسعار الامور صعبة...عادة بحط مبلغ امشي عليه ولكن بدي اجرب اترك حالي اشوف قديش رح اصرف (وانا عارفة انه في النهايه اللي رح اصرفه يمكن يكون كثير للبعض وقليل للبعض الآخر بس خلينا نشوف سوا)
مثل ما خبرتكم بمقال سابق فانا عزلت خزانة الموونة والفريزر والثلاجة وخزانة البهارات (متذكرين طبعا قصة الكراوية :)!!! المهم... لقيت عندي المواد التالية:
الفريزر:
لحوم:
باكيت اجنحة دجاج
باكيت 3 افخاذ دجاج
2 باكيت عظم خروف
2 باكيت لحمة شقف بدون عظم
باكيت هوت دوغز
باكيت تشكن ناجتز (للطوارئ مع سلطان)
باكيت جمبري (مستعمل منه شوي) مسلوق وجاهز

اجبان:
عدة باكيتات (يمكن 4-5) جبنة موزريلا مبشورة بشتريهل بلوك كبير وببشره وبفرز

خضار وبقوليات:
كمية من البطاطا الفرايز
1/2 باكيت ذرة مجمدة
2 كيس حمص حب مسلوق
كيس فاصوليا سودا (أه سودا :) وهي مشهورة باميركا وانا باستعملها في كثير وصفات..:) والعلب غالية فلما بلاقي الناشف بجيب وبنقعها وبسلقها)
باكيت سبانخ

امور خاصة بالحلويات
باكيت خبز براتا (بيكون ب 99 قرش على العرض والاولاد وجوزو بحبوه لحاله وانا بحبه مع عسل
باكيت عجينة بف
عدة باكيتات توتيات مفرزة (كانت لقطة على العرض ب 99 قرش للباكيت الواحد...

بالنظر الى هذا ولاني بعرف عيلتي وشو بتحب فانا بحاجة الى الاشياء التالية للفريزر:
لحم مفروم وستيك وباكيت صدور دجاج (حسب اذا رح اطبخ اشي فيه دجاج صدور) وعدة انواع من الخضار (رح اشتري حسب المنيو او العروض) وخبز (ما عندي خبز!!!!

خزانة المونة:
من المهم اني اشير انه خزانة المونة عندي ما شاء الله فيها كثير من الاساسيات اللي بتسعفني لما ما يكون عندي خضار او بندورة طازجة وكمان الصوصات الهامة وانواع الخل واللي بتلزم في كثير اكلات وما تزعلي اذا حسيتي انها غالية مرات لانه كثير منها بيضل فترة طويلة بدون ما يصيرله اشي...نصيحتي اشتري نوع او نوعين (حسب ما ميزانيتك بتسمح كل شهر) ومع الوقت بتلاقي انه صار عندك انواع مختلفة بتساعدك في الطبخ..
اهم الاشياء اللي عندي بخزانة المونة هي:
معلبات :
بندورة معلبة (لانه بندورة الشتا مو زاكية للطبخ وانا بحب الاكل الايطالي كثير وبستهلك كثير بندورة وعشان هيك ما بدفع اكثر من 60 قرش بالعلبة ولما الاقيها بنص دينار على العرض بجيب كميات من الفلوس اللي بخصصها لهذه الامور)
بقوليات معلبة (فول، فاصوليا حمراء، ذرة واحيانا حمص وبرضة بشتري كمية على العروض وانا بفضل اجيب الحمص ناشف واسلقه وافرزه
تونا (ممتازة للعشا وسلطة وساندويشات) ولحم كورند بيف (انا كنت احبه كثير وانا صغيرة بس هلآ ابدا بس بجيبه مشان الاولاد)
اساسيات:
طحين،سميد خشن وناعم، سكر، سكر ناعم، سكر يني، عدس احمر واسود، ارز عادي ولما يكون فيه عروض بجيب بسمتي وامريكي، برغل ناعم وخشن، فريكة ناعمة وخشنة، قرشلة، نشا، حليب بودرة، انواع من المعكرونة وخاصة السباغيتي والشعيرية والبيني (الانابيب المتوسطة الحجم) بسكوت للحلو، شوكولاته للحلو (برضه على العروض مثل مرة جبت باكيتات شوكولاتة شيبس ب 1.99 ولسة عندي باكيت ونص وهي عادة بتكون ب 3.5 يعني 1.5 دينار توفير في الباكيت الواحد، جلو وكريم كراميل ومارشملو (لانه الاولاد بيحبوه كثير) وكاكاو (بشتريه بالكيلو وكثير اوفر من العلب ونوعيته ممتازة ..اللي بتحب بقولها من وين بس تبعتلي تعليق او رسالة) وفانيلا وبيكنغ باودر، زعتر ودقه وبوشار وخليط كيك وما بشتريه الا على العروض وب 99 قرش للباكيت وانواع ممتازة وطبعا زيت وسمنةوطبعا  فيه رب بندورة وبعض الاشياء الاخرى
الصوصات:
انواع مختلفة من الاساسيات زي الخل بانواعه والصويا صوص وصوص السمك وزيت السمسم (احتفظي فيه بالثلاجة بعد فتحه لانه بيقدم وبيقنن) وانا بحب اعمل صوصات السلطة بالبيت فما بشتريها جاهزة ابدا الا مكره اخاك لا بطل او اذا السعر خرافي على الآخر...
حواضر: مرتبان مكدوس وزيتون اخضر من ماما الله يخليها ومرتبان زيتون اخضر من بيان ملحيس...شكرا كثير على لطفك المستمر...ومرتبان تطلي برتقال من مها زكريا الله يسعدها..
 وفيه بصل وثوم بس بدي بطاطا...


اما الثلاجة فحاليا عندي:
زبدة، بيض، كريما سائلة، جبنة بارمزان، باكيت جبنة مونتراي جاك ، باكيت حلوم وجبنة نابلسية

خضار وفواكه: بامس الحاجة الى شراء الخضار وعندي بس ملفوفة حمراء صغيرة و1/2 ملفوفة صيني واكم حبة فليفلة خضراء وملونة و3-4 حبات برتقال عصير و2 حبة تفاح اخضر وشوية سبانخ واكم جزرة..

الف الحمد والشكر لله على النعمة واليوم الصبح  النية كانت الذهاب للتسوق لكل الحاجيات على بداية شهر 2 بس الطقس وباب الكراج اللي علق خلاني اؤجل الموضوع ورحت اشتريت اغراض من اقرب محلات وعمري ما بعملها لانه اغلى (على الاقل السوبرماركت):
3 محلات اولها المخبز:
خبز عادي 2 كيلو
لفة خبز شراك (استعملناها اليوم بغدا الشاورما)
دفعت: 1.6

السوبرماركت:
4حبات شوكلاتة وزجاجة لتر بيبسي وعلبة صغيرة سفن اب دايت (للغدا اليوم) و5 باكيتات نسكافية (كنت خايفة تتلج!!! وعلبة لبنة ب: 8 دنانير !!! انا لقيت المبلغ كبير...يمكن نفسيا!!! :)

الخضرجي: ما بعرف الاوزان بالزبط بس انا ما بجيب كميات كبيرة ابدا)
بندورة، بندورة كرز، خيار، 2 باذنجان، بوملي، كلمنتينا، تفاح احمر، ضمة بقدونس، 1/2 1 كيلو موز بلدي (بعرف لاني قلت للخضرجي قديش بدي) 2 بصلة كبيرة بيضاء (استعملت واحدة للشاورما وبحب البصل الابيض لانه ما بيحرق بالاكل ني) وبس ودفعت 14 دينار وبرضه لقيته كثير وما جبت ليمون ولا بطاطا

ووصيت على لحمة (كيلوستيك و2 كيلو لحم مفروم ب 27 دينار (برضه كثير بس انا بحب اجيب من اللحام اللي متعوده عليه وهو بتوصى) ودينار للي بيقطع فالكل: 28 دينار
فحصيلة اليوم: 51 دينار و 60 قرش !!! والشهر لسه ما بدا...الله يعين الناس....

 المنيو لهذا الاسبوع رح تكون كالتالي ان شاء الله (وانا حاطة الوجبة الرئيسية بس ولكن رح اخبركم بعدين ويوم بيوم شو كان الفطور والعشا):
الجمعة 1 شباط...تبولة سبانخ (من السبانخ اللي بالثلاجة)، بواقي الشوربة، منزلة باذنجان وارز (بحبة من الثلاجة لاني انا وزوجي رح ناكلها) وبواقي المعكرونة وتشكن ناجتس للاولاد (لانه صاحبة ياسمين جايه عنا)
السبت 2 شباط ...بواقي المنزلة (لانه عندي درس طبخ)
الاحد 3 شباط...شوربة السبانخ (بباكيت من الفريزر)، انشلادا بيضاء (بباكيت افخاذ الدجاج وباكيت الجبنة مونتراي جاك وخبز تورتيلا منزلي)
الاثنين 4 شباط...بازيلا وارز (لازم اشتري بكره ان شاء الله) وعندي باكيت لحمة شقف بالفريزر
الثلاثاء 5 شباط..بواقي ويمكن اكلة مقبلات جديدة (ببقى اعمل تحديث لما اقرر)
الاربعاء 6 شباط..اجنحة دجاج تيرياكي (من الاجنحة بالفريزر) سلطة ملفوف صينية (من الملفوف بالثلاجة )، شوربة ذرة صينية (من الذرة بالفريزر) وارز صيني مقلي
الخميس 7 شباط...مقلوبة باذنجان (الباذنجانة الثانية وكيس اللحمة الشقف الثاني من الفريزر) ورح اسلق كيس عظم مع اللحمة بالمرة عشان شوربة فريكة ان شاء الله الاسبوع الجاي
الجمعة 6 شباط... تشيلي (طبخة امريكية بالفاصوليا (رح استعمل كيس الفاصوليا السودا من الفريزر وعلبة فاصوليا حمرا  وبندورة من المونة ولحمة مفرومة من الفريزر) ونوع خبز منزلي صمون وبقدمه مع زبدة (برضه رح اخبركم بعدين)
السبت 11 شباط...بواقي من المقلوبة والتشيلي
اما الحلو فما قررت شو اي يوم بس النية هي:
مقروطة (عندي كثير تمر ...نسيت اضيفه على ما عندي في المونة)
كرابيج حلب
نوع بسكوت (لسه ما قررت)
كب كيك شوكولاته على الاغلب يوم الجمعة لانه صاحبة ياسمين جاي...

شكرا للمتابعة وبانتظار نتائج التسوق بكره ان شاء الله...