Thursday, January 31, 2013

بدون نشاط وعزومة الغدا...

بعد ما رجعت من سفرة دبي...اظن اني مشتاقة كثير للصيف او الدفا...اليوم مع الضباب والبرد والمطر والثلج البسيط زاد حنيني للصيف واللي بيعرفوني بيعرفوا اني ما بحب فصل الشتا كثير...طبعا الحمدلله على نعمة المطر بس البرد وعدم وجود الشمس بيخليني اشعر بعدم النشاط...وبالرغم من هالشعور فكان عندي ضيوف على الغدا ولازم احاول اجمع شوية نشاط...المنيو اليوم كانت شاورما لحمة مع خبز شراك وصوص طحينية وبصل  وبطاطا مقلية ومعكرونة بوتانسكا بس ببهارات الكاجون (ان شاء الله ببقى اعمل درس خاص للشاورما :) وسلطة وشوربة البروكلي بالجبنة (وبدها شوربة بهالبردات) ويمكن احلى شي بالبرد هو اني بعمل شوربة لاني بحب الشوربات كثير...وطريقة الشوربة موجودة على المدونة بس بالانجليزي http://www.manalsbites.com/2012/02/cheesy-creamy-broccoli-soup.html (واللي بده اي سؤال عنها ممكن يسألني بس ما في وقت اليوم اترجمها...بعتذر...اما السلطة فكمان ما عندي ليمون فعملت صوص سلطة بسيط ولذيذ للي بحبو الصوصات اللي على حلاوة شوي وهي الطريقة:

صوص السلطة السهل
المقادير:
1/4 كوب زيت ذرة
1/4 كوب زيت زيتون
1/4 كوب سكر
1/4 كوب خل ابيض
ملح
فلفل اسود

الطريقة:
اخلطيها في زجاجة واستعمليها...




اما الحلو فكان لازم يكون سهل وسريع لاني جد مو بالموود اليوم...فكان كوبلر الفراولة والاناناس مع الكريما (وعادة بيكون مع بوظة الفانيلا) بس لانه الدنيا برد قلت كريما بتقضي...والطريقة سهلة لانها بستخدم خليط الكيك وما تقولوا عني غشاشة بس انا زي كل هالستات بيجيني حالات بكون مستعجلة وبدي اشي سريع..جربوه رح يعجبكم كثير بس هو حلو شوي فاتمنى انكم بتحبوا الطعم الحلو...وكل الشكر لسلفتي هند لاتها وصفتها...

كوبلر الفراولة والاناناس
المقادير:
علبة حشوة باي فراولة
علبة كبيرة اناناس مقطعة ومصفاة من العصير مع الاحتفاظ ب 1/3 كوب منه
1/2 باكيت كيك مكس اصفر او ابيض
اصبع زبدة مذاب

الطريقة:
في صحن باركس وزعي حشوة الفراولة والاناناس والعصير
انثري الكيك مكس على الوجه
ذوبي الزبدة ووزعيها على الوجه
ضعيها في فرن على حرارة 175 لمدة 20-25 دقيقة لتحمر قليلا وتصبح ذهبية وتغلي الصوص وقدميها مع الكريما او البوظة وصحتين...

قبل الخبز (وممكن تحضيرها قبل التقديم ب 4-5 ساعات)

بعد الخبز


وهي المعكرونة

وهي الشاورما (انا بخلي كل واحد يعمل ساتدويشته :) مش قلتلكم مش بالموووود :)

Monday, January 28, 2013

الانشغال وفتة اللحم بالخل

من يوم ما رجعت من السفر وانا مشغولة...ترتيب البيت اللي كأنه صرله سنين ما تنظف من الغبر اللي كوم بعد 5 ايام بس!!! ومنه مع "بيبي هارون اللي مرض مرضه قوية من اول يوم "نيالي"!! وطبعا الحمدلله دايما وابدا!!! المهم اني شغالة من الصبح لاخر النهار + شيفت ليلي لما بيصحى البيبي من الكحة القوية...بس كل هدا الحكي مو معناه اني ما بقضي وقت في المطبخ وفي الواقع كان عندي درس يوم السبت الماضي ..بس لغيت درس الاثنين لاني حسيت بالذنب واني لازم ادير بالي على البيبي كاولوية...ولاني لم انجح تماما في مهمتي الشهر الماضي في التخطيط المالي الجيد للوجبات فقررت اني احاول مرة ثانية بشهر 2 واني احاول ابدأ صح من اولها. عشان هيك قضيت اليومين الماضيين وانا ارتب غرفة المونة والفريزر وخزانة البهارات عشان استفيد من الاشياء اللي اصلا عندي وما اشتري زيادة. وعشان تضحكوا علي لقيت عندي 3 باكيتات كراوية مطحونة!!! يعني اللي بيشوف بيقول طول نهاري اغلي واعمل كراوية... المهم اني على الاغلب ما رح اشتري كراوية لوقت طويل !!!

وبعيد عن الكراوية...وبما انه ما عندي خضار فقررت اطبخ فتة اللحم بالخل وهي الطريقة اذا بتحبوا...وصحتين

فتة اللحم بالخل


المقادير:
½ كيلو لحم خروف بدون عظم مقطع قطع كبيرة
زيت نباتي لتقليب اللحم (حوالي 3-5 ملاعق طعام)
 ½ كوب خل التفاح
2 بصلةمتوسطة مقطعة شرائح
6 حبات ثوم مقطعة شرائح
3 ارغفة خبز مقطع مكعبات (ممكن اقل اذا رغبت) مقلي
2 ملعقة طعام رب البندورة
رشة هيل ناعم
رشة فلفل أسود
ملح حسب الرغبة
ماء لسلق اللحم
3 أوراق غار
1 جزرة، مقشرة ومقطعة شرحات
اصبع كرفس مقطع كبير
بصلة مقطعة من النصف
6 -8 حبات هيل
½ ملعقة صغيرة ملح
2 كوب لبن
4 ملاعق طعام طحينة
4 ملاعق طعام عصير ليمون
2 حبة ثوم مدقوق
½ ملعقة صغيرة ملح
2 ملعقة طعام سمنة حيواني او بلدي
2ملعقة طعام صنوبر محمص
بقدونس مفروم
الطريقة:
نغمر اللحم بالماء في طنجرة حتى يغلي.
نغلي حوالي 2 لتر ماء في طنجرة أخرى مع المطيبات من الغار والجزروالبصل والكرفس والهال والملح .
نصفي اللحم من الطنجرة الأولى وضعيه في الثانية التي فيها البهارات ثم نغطيها ونطهو على نار متوسطة لمدة ساعة ونصف حتى تستوي تماما .
في وعاء تمزج اللبن مع الطحينة وعصير الليمون والملح والثوم.
نضع 4 ملاعق زيت نباتي في طنجرة ونضيف البصل والثوم ونقلب لمدة 3 دقائق على نار متوسطة .
نضيف رب البندورة والزنجبيل الهيل والفلفل الأسود و1 لتر من ماء اللحم والخل ونضيف الملح حسب الرغبة ومكعب مرق ونترك الطنجرة على النار مدة 15 دقيقة.
نضيف اللحمة الى الخليط ونتركه يغلي لمدة 15 دقيقة .
نضع الخبز المقلي في طبق التقديم ثم نضيف الصلصة واللحمة على الخبز .
نضيف صوص اللبن على الوجه ثم نقدح عليها بالصنوبر والسمنة ونزينها بالبقدونس.



Tuesday, January 15, 2013

اليوم ووصفات حلو سريعة...

اوكي...يمكن لاني على سفر واللي بيسمع بقول رح اغيب 100 سنة!!! كله هل الاسبوع بس كلنا منعجقين لانه السفرة هالمرة مع "بيبي هارون" رح تكون تجربة ممتعة (لنأمل ذلك!!!)...ويمكن بسبب هذا الحكي وبسبب الورشة اللي في البيت واللي الامل انها تخلص قبل السفرة ما كانت المذكرات مثل ما بدي ومثل ما وعدت..(يعني عم بحاول الاقي عذر لحالي!!!)

المهم اني لقيت اليوم انه ما عندي لحمة مفرومة مثل ما كنت مفكرة بس كيسين لحمة شقف وما عندي خضار فعملت اكلة بالرز (ايرانية) كثير زاكية وقريبة من البرياني وللاسف ما صورتها وكانت هي الغدا مع سلطة ولبن (الف الحمد لله)...اما الحلو اليوم فعملت نوعين من الكوكيز (مربعات او Bars) والطريقتين اسرع من بعض وبيستخدوا خليط الكيك الجاهز...

الوصفة الاولى هي لمربعات الليمون ...وهي من البسكوتات اللذيذة كثير بس انا ما بحب اديش في صفار بيض  في الوصفة الاصلية(واحيانا شوية زنخ)  وهذه الطريقة بحصل فيها على طعم قريب كثير وببيضة واحدة بس...

مربعات الليمون
المقادير:
باكيت كيك مكس ليمون
بيضة
1/2 كوب زيت
علبة جبنة كريمية مثل فيلادلفيا او كيري (بوزن 228 غم)
1/3 كوب سكر
ملعقة طعام عصير ليمون
يشر 1/2 ليمونة

الطريقة:
يخلط الكيك مكس والبيضة والزيت ورح تكون عجينة سميكة (يعني مو مثل الكيك)
ارفعي كوب على جنب ومدي الباقي في صينية مستطيلة مدهونة حجم وسط
تخبز 15 دقيقة على حرارة 180 وتترك لتبرد
تخفق الجبنة والسكر وعصير الليمون وبشر الليمون وتفرد على العجينة المخبوزة ثم تيفتت الكوب الذي رفعناه على الوجة وتخبز 15 دقيقة اخرى. تترك لتبرد وتقطع وترش بالسكر الناعم عند التقديم...وصحتين...




وطبعا لانه سلطان ممكن يحقد علي لانه ما في شوكولاتة فكان لازم براونيز... :)

براونيز بالتشوكلت تشيبس
المقادير:
باكيت كيك مكس شوكولاتة (يفضل نوع غامق بس انا ما كان عندي الا شوكولاته بالحليب)
بيضة
1/4 كوب زيت
1/3 كوب ماء
كوب تشوكلت تشيبس (ممكن تضيفوا جوز او مارشملو)

الطريقة:
تخفق كل المقادير ما عدا الشوكولاتة
تفرد في صينية مستطيلة مدهونة حجم وسط
تخبز على حرارة 180 حتى تجتاز اختبار فحص الكيك وتترك لتبرد




وموعدي معكم قريبا ان شاء الله

       منال
-

Monday, January 14, 2013

مذكرات الاسبوع الثاني من شهر 1...اداء افضل ولكن ليس ممتازا بعد..

 هذا الموضوع طويييييل بس فيه عدة وصفات ونصائح ... :)

بدأ هذا الاسبوع يوم الثلاثاء 8/1 وطبعا الجو بارد جدا بسبب الموجة التي عمت ارجاء الاردن مما عنى عدم الذهاب لشراء اي حاجيات وبالمقابل البقاء في المنزل وطبعا الاكل المستمر...ومن غير مبالغة...مستمر...
من حسن الحظ انني وقبل يومين كنت في احدى محلات السوبرماركت ووجدت في قسم الخضار عربة مليئة بالخضراوات القديمة قليلا ولكني لمحت كيس فيه 3 حبات باذنجان ممتازة وتخيلتها تنظر الي وتناديني...ولانني لست من النوع الذي لا يرد على النداء..احم... فقد سارعت ووضعت الكيس في سلتي والمفاجأة هو السعر ... هل انتم مستعدون؟ 36 قرش لثلاث حبات باذنجان كبيرة...والمفاجأة الافضل هي انها كانت في حالة ممتازة (يمكن كانت بالخطأ بالعرباية) وكانت لذيذة المذاق (حلوة) عندما طبختها...وقمت بعمل طبختين منها...

يوم الثلاثاء  8/1
الافطار: بيض مقلي ومتبل قرع وحواضر اخرى واهمها مربى المشمش من مها (احدى السيدات اللواتي يحضرن دروسي) وجد من ازكى ما اكلت...يسلموا هالايدين يا احلى مها....
الغداء: منزلة باذنجان وارز وشوربة الذرة السوبر سريعة  (سأشارككم في وصفتها قريبا ان شاء الله) وكوسا مسلوقة لهارون (كان عندي 3 حبات كوسا في الثلاجة)
السناكس العصر: مكسرات وفواكه وقهوة
العشاء: نودلز اندومي
حلو ليلا: تارت الفراولة والكيوي...(يعني ما كذبت لما قلت انه اكل مستمر)

نصيحة اليوم: لما قلبت لحمة مفرومة للمنزلة عملت زيادة عشان اوفر وقت وغاز والي ما استعملته راح على الثلاجة لطبختين خلال الاسبوع

يوم الاربعاء 9/1
الطقس ما زال بارد والثلج يتساقط ويعني...مسلسل الاكل مستمر :)
الافطار: فول وسلطة خيار وبندورة وجبنة بيضاء وحواضر وموز مهروس مع عصير برتقال لهارون
الغداء: بواقي من الامس مع صحن معكرونة باللبن واللحم المفروم والبقدونس...(استخدمت جزء من اللحم المفروم اللي طبخته قبل يوم)
السناكس العصر: مكسرات وكيك وشاي (عملت كعكة البطاطا الحلوة بالبهارات واللي عملتها على رؤيا يوم السبت)
العشاء: ما في...الحمدلله على النعمة بس لازم ما يكون فيه عشاء بعد كل هالاكل... :) بس هارون تعشى كوسا لانه ما تغدى اليوم بس حليب

نصيحة اليوم: لما تشتري بطاطا حلوة للشوي والاكل احسبي حساب بحبتين زيادة لتعملي كعكة البطاطا الحلوة اللذيذة والسهلة...

وصفة اليوم: كعكة البطاطا الحلوة بالبهارات والجوز
المقادير:

 ¾ كوب زيت
½ 1 كوب سكر بني معبأ جيدا بكأس المعيار
... 3 بيض حجم كبير
كوب بطاطا حلوة مشوية ومهروسة
ملعقة طعام دبس (عنب او تمر)
ملعقة طعام زنجبيل طازج مبشور
2/3 1 كوب طحين
½ 1 ملعقة صغيرة بيكربونات
¼ ملعقة صغيرة قرفة
¼ ملعقة صغيرة هال مطحون
برشة جوزة الطيب
¾ ملعقة صغيرة ملح

للوجه:
2/3 كوب طحين
½ كوب سكر بني
½ كوب جوز مفروم خشن
رشة ملح
1/2 اصبع زبدة


الطريقة: تخلط مقادير الوجه وتفرك لتصبح مثل الفتات
يدهن قالب الكيك المتحرك القعر او صحن بايركس بالسمنة والطحين
نخفق البيض والزيت والسكر والدبس والبطاطا الحلوة والزنجبيل لمدة دقيقتين لتختلط
ينخل الطحين والملح والبهارات والبكربونات فوق المزيج ويخفق دقيقة ويسكب في القالب وترش بخليط الوجه
تخبز على 180 درجة في الرف الوسط من الفرن حتى تجتاز اختبار فحص الكيك حوالي 30-40 دقيقة وتترك لتبرد وترش بالسكر الناعم وصحتين


يوم الخميس 10/1
الثلج في كل مكان والاولاد ناموا للظهر وبالتالي وفروا علي تحضير وجبة :) بس طبعا لكوني ما بقدر اقاوم قضاء وقت في المطبخ فخبزت 3 ارغفة خبز فرنسي...
الافطار: كعكة البطاطا الحلوة مع شاي
الغداء: رغيف اللحم بصوص الباربكيو المعمولة في البيت ومعكرونة بالسبانخ والارضي شوكي وسلطة القيصر...صراحة كان كثير زاكي...
السناكس العصر: الاولاد راحوا جابوا صحابهم عشان يلعبوا بالثلج وكانوا عاملين مارشملو مغطس بالكراميل والشوكولاته وحطينا شيبس وبقية الكعكة ونسكافيه...
العشاء:  ساندويشات ديك رومي مدخن وجبنة وشرائح مدهونة باللبنة والبندورة والزيتون والنعنع  ورشة زيت زيتون على الخبز الفرنسي المنزلي...




 
 
ما قدرت استنى ليبرد شوي فكل البخار طلع بالتصوير
 
 
وهذا زوجي العزيز ما قدر يصبر لآخذ العشاء لغرفة التلفزيون...صحتين خالد...
 
نصيحة اليوم: من اهم الاساسيات في عمل الخبز هو مدة العجن..اذا زيدتيها بتطلع النتيجة احسن (من 10 -15 دقيقة) والاحسن يكون عندك عجانة...ضيفيها على قائمة الهدايا التي تريديها لعيد الام او عيد ميلادك لانه اذا بتعملي عجين كثير بيستاهل تستثمري بواحدة

وصفة اليوم: صوص الباربكيو في البيت...
المقادير:
2 كوب كاتشب
2 كوب صوص بندورة (3/4 كوب رب بندورة + كوب ماء)
1/4 1 كوب سكر بني
1/4 1 كوب خل عنب
1/2 كوب دبس
4 ملاعق صغيرة سائل الباربكيو المدخن (ممكن الاستغناء عنه ولكن اضافته تعطي نكهه مدخنة للصوص)\2 ملعقة طعام زبدة
1/2 ملعقة صغيرة بودرة الثوم وبودرة البصل
1/4 ملعقة صغيرة بودرة التشيلي
ملعقة صغيرة بابريكا
1/2 ملعقة صغيرة ملح الكرفس
1/4 ملعقة صغيرة قرفة
1/2 1 ملعقة صغيرة فلفل اسود
ملعقة صغيرة ملح

(بعرف انكم وانتو عم تقرؤا المقادير بتقولوا شو هالغلبة بروح بشتريها احسن...انا مش مع او ضد ولكن بما انه كل المقادير عندي بالبيت واللي بيضحك انه ما عندي الباربكيو صوص نفسها فقررت اني اعملها..يعني مش دايما انا بعملها بالبيت بس جد زاكية وبتستاهل وللكاتشب انا استعملت كل باكيتات الكاتشب اللي عندي من الطلبات الخارجية يعني ما استهلكت زجاجة انا شرياها)

الطريقة:
تخلط كل المكونات في طنجرة وتترك لتغلي على نار هادئة 25 دقيقة


 
يوم الجمعة 11/1
 
الجو مازال بارد جدا وما عملت اي شي مميز لاني كنت مشغولة
الفطور: بان كيك عادي وبالتشوكلت تشيبس
الغداء: بواقي اكل من امبارح
سناكس العصر: فواكه وبطاطا حلوة
العشاء: ما حد تعشى لانه اكلنا كثير الفترة الماضية :)
 
 
 
سلطان بيعمل البان كيك
 

وصفة اليوم: خلطة البان كيك
المقادير:
600 غم طحين (حوالي 3/4 4 اكواب)
3 ملاعق طعام بيكنغ باودر
2 ملعقة صغيرة بيكنغ صودا
ملعقة صغيرة ملح
40 غم سكر  (اقل قليلا من ربع كوب)

الطريقة:
تخلط كل المكونات في مرتبان محكم الاغلاق. لعمل البان كيك نأخذ 1/2 1 كوب من الخليط مع بيضة وملعقة صغيرة فانيلا وكوب حليب وتخفق لتختلط (بدون زيادة خفق) ويضاف ملعقة طعام زبدة سايحة. تحمى مقلاة غير لاصقة ونضع حوالي 1/3 كوب من الخليط لعمل البان كيك. لاضافة التشوكلت تشيب نرش كمية على كل قرص فبل قلبه ليستوي على الجهة الاخرى.
 
يوم السبت 12/1
الجو شبه متجمد وكان عندي تصوير في قناة رؤيا فما حضرت فطور لاني طلعت والاولاد نايمين اما الغداء فالاولاد تغدوا بره بموعد مسبق واما  انا وزوجي وبالنظر الى حالة الاكل المستمر اللي كانت في الايام الماضية قررنا ما نتغدى...
العشاء: اومليت (عجة بالخضار) وسلطة خضراء
 
يوم الاحد 13/1
 
يوم ملئ بالمهام والنشاطات بسبب حالة الكسل السابقة خلال ايام الثلج...من موعد روتيني لهارون عند طبيب الاطفال الى الذهاب لشراء حاجات المنزل لغاية السبت المقبل ان شاء الله لاني مسافرة بالاضافة الى استكمال لاصلاحات منزلية تعطلت خلال الفترة السابقة...
 
وطبعا احلى شي عندي هو شراء حاجيات للاكل...ولكن ما كانت الرحلة فيها كثير اشياء من اللي بدي اياها بس سلطان اله بيزن علي اعمل سوشي وانبسطت لاني لقيت عرض على الارز الخاص بالسوشي اشتري واحد والثاني مجانا بسعر 6.5 لكيسين 2 كيلو وهو سعر ممتاز اذا بدي اقارنه ب 5 دنانير وشوي لسعر ارز السوشي لاقل من كيلو... وما رح ازعل اني صرفت عليه مبلغ بنظري لانه رح يعمل عدة اكلات من السوشي...وكمان لقيت جمبري مطبوخ ومفرز بسعر 5 دنانير وشوي للحجم المتوسط وهدفي هو استعماله في اكلتين والكيس بوزن كيلو تقريبا (مش بطال) واحلى عرض كان على زبدة فريكو (82% دسم...يعني زبدة ممتازة ) بسعر 99. قرش لل 200 غم يعني في قاموسي عرض ممتاز فجبت كمية وبخليها بالفريزر (ودفعت من المبلغ اللي برصده لشراء الحاجيات على العروض)
 
الفطور: ساندوشات سريعة وشاي
الغداء: برغر وبطاطا (خبز فريش من المخبز بالسوبرماركت الي اشتريت منه الاغراض)
سناكس العصر: الاولاد برة البيت مع اصحابهم فكان نسكافيه الي
العشاء: برضه الليلة نمنا خفاف :)
 
يوم الاثنين 14/1
اليوم واخيرا عملت سوشي لانه سلطان جننني وهو يطلبه " لانك يا ماما بتعملي زاكي كثير" على قوله...طيب ماشي...وكان ممتع لاني مش طالعة محل اليوم فروقت وعملتله
 
الفطور: ساندوشات سريعة وعصير برتقال فرش
الغداء: سوشي  وتوابعه من الصوصات والشوربة الحامضة والحارة الصينية ومعكرونة بالباشميال وسلطة (طبعا شو دخل هاد بهاد..بعرف بس عندي عمال وما اظن رح ينبسطوا اذا قدمتلهم سوشي على الغداء...)
 
العشاء: بقايا السوشي...مممم
 
 
 من المهم اني اذكركم بأول مرة كتبت فيها عن هذا الموضوع وكيف انه لما ست البيت تحاول تخصص جزء من مصروف الاكل كل اسبوع لشراء البضائع على العروض بتلاقي حالها مو محتارة في ظروف مفاجئة مثل الاجواء الباردة واللي منعتني اني اروح اتبضع لو احتجت...فالباذنجان اللي كان بسعر خرافي تحول الى اكلتين ووجود معلبات عندي مثل الفول والذرة تحول الى فطور وشوربة والنودلز عشاء وعملية طبخ كمية من اللحم المفروم سهلت عملية الطبخ لايام تالية ووفرت وقت وطاقة...

وبالرغم من اني ما سجلت بالضبط مشتريات الاسبوع الاول لكني اذكر بعض الاساسيات منها: 54.5دينار لحمة (مفرومة وراس عصفور وعظم للشوربة و2 كيلو للمنسف وضفت عليهم لحمة من عندي كانت بالفريزر لما عملت المنسف للعزومة)  لغاية نهاية هذا الاسبوع باقي عندي .... طبختين مفرومة و2-4 طبخات لحمة مفرومة اعتمادا على شو رح اعمل فيها + باكيت اجنحة دجاج وباكيت افخاذ دجاج وباكيت هوت دوغز وعظم للشوربة...وبما اني مسافرة السبت ان شاء الله فبدي استخدم اللي عندي لعمل اكل الايام البسيطة الجاي...

بكرة ان شاء الله رح انزل المنيو لغاية يوم السبت مع وصفة جديدة...فتابعوني...

منال
 

Wednesday, January 9, 2013

مذكرات الاسبوع الاول من شهر 1

حسنا...دعوني أبدأ باعتراف بسيط وهو انني لم انجح تماما في التحدي الذي رسمته لنفسي هذا الاسبوع بسبب ورشة من التصليحات في المنزل والتي اخذت جزءا كبيرا من وقتي وبالتالي فاتني تسجيل كل شئ كما كنت اود...وانا هنا لست بصدد التبرير لانه "فشل" شخصي ، اذا جاز التعبير، غير انني لن ادع ذلك ليوقفني لانني ساكون اكثر حرصا في الاسبوع المقبل ان شاء الله...

جدول الوجبات هذا الاسبوع كان كالتالي: (علما بانني لم اقم بعمل اي شئ مميز للافطار والعشاء بسبب الانشغال لذا لن اذكرهما في التفصيل ادناه وهو امر لن يتكرر الاسبوع المقبل
يوم الثلاثاء 1/1 (بواقي من اكل سابق اشتمل على المقلوبة والسلطة)
يوم الاربعاء 2/1 بامية وارز
يوم الخميس 3/1 فيليه الدجاج المقلي بصوص البافلو(الوصفة على المدونة) وطبق معكرونة سيشوان صينية
يوم الجمعة 4/1 كان عندي ضيوف على الغداء فكانت الوجبة هي: متبل باذنجان، نوعين من السلطات والمنسف اما الحلو فكان فطيرة الشوكولاتة و نوع بسكوت والقشطلية بالقطر
يوم السبت  5/1 بواقي
يوم الاحد 6/1 معجنات من درس الطبخ و ساندويشات السلوبي جو
يوم الاثنين 7/1 كان لدي الكثير من الاعمال فطلبنا الشاورما من احد المطاعم.
وبالنظر الى ما ذكرت اعتقد ان علي العمل بشكل اكثر تنظيما في الاسبوع المقبل لانني لم اتمكن من رصد ما صرفت في شراء المواد كما لم اتمكن من رصد الوقت لعمل اطباق جديدة.

وعلى صعيد آخر فانني اود مشاركتكم بطريقة نوع من السلطات التي قدمتها للضيوف على الغداء وهي سلطة البرتقال والشومر والزيتون

سلطة البرتقال والشومر والزيتون

المقادير:
ضمة جرجير مفرومة خشن
2 رأس شومر صغير مقطع شرحات رفيعة
برتقالة مقشرة ومقطعة شرحات
1/4 كوب زيتون اسود من غير بذر
للصوص:
حبة ثوم مدقوق
1/3 كوب عصير برتقال
بشر 1/2 برتقالة (فقط الجزء البرتقالي وليس الابيض المر)
ملعقة صغيرة ماسترد
ملعقة كبيرة عصير ليمون
2/3 كوب زيت زيتون
ملح، فلفل اسود

الطريقة:
تفرد اوراق الجرجير في الصحن
توزع شرائح الشومر والبرتقال والزيتون
تخلط مكونات الصلصة في زجاجة وتخض لتختلط المواد
يرش جزء من الصوص على السلطة ويقدم المزيد على جنب...وصحتين..



 

Saturday, January 5, 2013

فيليه الدجاج المقلي بصوص البافلو

بدأت ال 2013 وبدأت معها الكثير من المشاغل من ورشة اصلاحات في المنزل الى انتهاء امتحانات نصف الفصل للاولاد..مما يعني وجوب قضاء وقت اطول معهم بالاضافة الى دروس الطبخ وطبعا "بيبي هارون" الذي يشغل جزءا كبيرا من وقتي...ولعل هذا هو سبب انقطاعي عنكم في الفترة الاخيرة ...اتمنى ان تكونوا قد قضيتم وقتا لطيفا مع احبابكم واتمنى لكم سنة جديدة مليئة بالحب والتفاؤل والافراح والسلام الداخلي في انفسنا ومع الناس...

مع بداية العام الجديد وبسبب الانشغال الكبير فقد قمت بعمل طبق سريع جدا قبل يومين وهو طبق مقبلات في الحقيقة الا انني قدمته لعائلتي مع طبق من المعكرونة وقد لاقى استحسانهم وامنى ان تحبوه ليس لانه لذيذ فقط بل لانه سريع جدا وفي الحقيقة فيه "غش" اذا جاز التعبير...

فيليه الدجاج المقلي بصوص البافلو

المقادير:
باكيت فيليه دجاج جاهز (اي نوع تفضلوه)
4 ملاعق طعام صوص البافلو الجاهزة (ايضا اي نوع تحبين انا استعملت فرشلي)
3/4  كوب سكر بني
2 ملعقة طعام ماء

الطريقة:
تقلى قطع الدجاج لتصبح ذهبية وفي هذه الاثناء تغلى بقية المكونات على التار ليذوب السكر وتختلط توضع في وعاء كبير له غطاء وتوضع فوقها قطع الدجاج...الآن الجزء الممتع...احكمي اغلاق الوعاء وهزي الدجاج مع الصوص لتغطيها تماما...ثم قدميها مع صوص الرانش وصحتين...