Saturday, December 7, 2013

منيو الاسبوع القادم وافكار بالبراونيز والكريب

اسبوع جديد ومنيو جديدة للاسبوع زي موعدنا دايما يوم السبت...كيف قضيتوا العطلة بهالبرد؟ احنا كنا معزومين على الغدا امبارح وقضينا وقت لطيف على اكلة مسخن لذيذة...يسلموا شذى ومازن ..

وقبل ما نحكي على منيو الاسبوع هاد خليني استعرض اداء الاسبوع الماضي بالنسبة للمنيو ومدى التزامي فيها....عملت الدجاج بالشبت والسالمون بالشبت والورق الدوالي وشوربة البروكلي بالكاري وصينية البطاطا باللحم المفروم والبشاميل والبطاطا رومانوف واشياء تانية ما كتبتها لانها كانت وليدة اللحظة ووجود المواد ومنها صدور الدجاج المخبوزة بصوص البستو (بواقي بستو بدي اخلص منها) وبيتزا تحت طلب الاولاد وسلطة معكرونة وشوربة قرع وطبعا في اطباق ما انعملت رح اخليها للاسبوع هاد (يا رب تنعمل شوربة هالجزر والبرتقال...مش زابطة مش عارفة لييييش!!!!) اما الحلو فبرضه وبحكم التصوير اللي حكيتلكم عنه ما انعمل منه الا بسكوت جوز الهند وبسكوت الشوكولاتة بالكراميل والهيل بس عملت كب كيك رخامي وبسكوت عادي سادة باشكال للتصوير والمارشملو اللي حطيتوا على المدونة وتحت طلب سلطان كريب بالنيوتيلا والكيندر...الواحدة (وحجمها كبير بحوالي 4 دناير وشوي من برة...انا عملت للكل 2 كل واحد حجم وسط بحوالي 4 دنانير باستخدام 2 علبة كيندر اصابع حجم كبير وعلبة نيوتيلا صغيرة ووصفة الكريب...بس اعملي الكريب وادهنيها نيوتيلا وحطي اصبعين كيندر ولفيها ورجعيها على القلاية على نار منخفضة لتسيح الشوكولاتة شوي ورشيها سكر ناعم وصوص شوكولاتة...هاد كان عشا :)


 وعلى هالاساس فمنيو الاسبوع القادم باذن الله موجود على المدونة بس اضغطوا على قائمة الطعام 3

واليوم بدي افرجيكم (مش افرجيكم بمعنى يا ويلكم مني!!) ههههه بس بمعنى تشوفوا كيف انه ممكن من البراونيز (في وصفتي للمكس البيتي او وصفتك المفضلة) نعمل فكرتين بسيطتين وخاصة للي بيحتفلوا بعيد الميلاد ...حضري البراونيز واخبزية عادي بصينية مستطيلة بعدين:
الفكرة الاولى: شجرة عيد الميلاد
قطعيه مثلثات وزينية بكريما لون اخضر وام اند امز ودخلي فيعا عصاية خشب او ممكن مصاص النعنع الاحمر والابيض


الفكرة الثانية: اصابع البراونيز المغطسة بالشوكولاتة
قطعي البراونيز اصابع وغطسيها بشوكولاته سايحة ورشيها بالفارسميلا (زي الصورة)


وما تزعلي على البواقي كتير... قصدي من القصقصة...اعمليها بارفيه
طبقة براونيز، طبقة فراولة مقطعة ومفروكة بشوية سكر ناعم ليطلع منها عصير، طبقة بودينغ شوكولاته، طبقة كريما وزينيها بالشوكولاتة والفراولة



وبهيك بتكوني حققت 3 استفادات من البراونيز وبشكل غير تقليدي...وبهيك بنخلص بوست الشوكولاتة لليوم...






8 comments:

  1. يسلمو اديكي يا عسل هلأ بودنغ الشوكلاته نفس المقادير الي عملتيها لبودنغ الفانيلا وبس الاضافه بتكون كاكاو

    ReplyDelete
    Replies
    1. انا عادة بعملوا بالنشا ممكن احط وصفته لحال

      Delete
  2. كتيير حلوة افكار البراونيز وخصوصا للاطفال
    لانو اطفالي بحبو تقديم الحلويات بطريقة غير عادية
    شكرا كتيير الك

    ReplyDelete
  3. ما شاء الله عليكي منال نشيطه بحسك دايما واقفه بالمطبخ نفسي اعرف كيف بتقسمي وقتك وبتقدري تلحقي تعملي كل هلاشياء الزاكيه
    يعطيكي الف عافية

    ReplyDelete
  4. ما شاء الله مبدعة بس مو تعب عليكي كل هالطبخات مرة واحدة

    ReplyDelete
  5. This comment has been removed by the author.

    ReplyDelete
  6. رائعه منال.. رح استنى وصفاتك . فداء

    ReplyDelete
  7. افكار رائعة يسلمو ايدكي

    ReplyDelete