Wednesday, December 4, 2013

بطاطا رومانوف...طبق جانبي جديد

مؤخرا عم بواجه مشكلة باني انام...مخي بيضل شغال طول الوقت...مش عارفة بس اظن من كتر الاشياء اللي ببالي وقلة الوقت...الله يباركلنا بالوقت عشان نقدر ننجز اللي ببالنا...

وبما انه آخر السنة قرب فقررت اني كل ما اكتب على المدونة اشارككم بفكرة لطيفة تصلح للمناسبات وخاصة اعياد الميلاد وكمان بهاد الوقت من السنة لانه شتاء وبرد وبكرة جاي العطلة وممكن يكون عمل واحدة من هالافكار مشروع لطيف لتقضية وقت حلو مع الاولاد او انه تعطيه كهدايا بعيد ميلاد او جمعة...

واليوم قررت احط فكرة بسيطة وسهلة ورخيصة وبشكلين
الاول هي رجل الثلج من المارشملو بنشك باسياخ وباستخدام الميني ام اند امز وشوية شوكولاتة سايحة مشان يلزق على المارشملو


والثانية هي برضة مارشملو مشكوك على اسياخ ومغطس بالشوكولاتة البيضاء ومزين بالميني ام اند امز والشوكولاتة السوداء كايدين لرجل الثلج


المهم..افكار بسيطة وممكن الاولاد يعملوها بكل سهولة ويتسلوا..

اما وصفة اليوم فهي لطبق بطاطا جانبي....يعني كأنه ما بقدر اقاوم اطباق البطاطا...حكيتلكم :)
اسم الطبق بطاطا رومانوف وهو طبق روسي الاصل وسهل كتير

بطاطا رومانوف
المقادير:
3 حبات بطاطا حجم بين الوسط والكبير مشوية 3/4 استواء ومبردة بحرارة الغرفة وبعدين بالثلاجة (ممكن تنعمل هاي الخطوة قبل بيوم ) وبعدين مبشورة
2 علبة لبن زبادي
1/2 1 كوب جبنة شدر بيضاء مبشورة
ملح
فلفل اسود
بصلة وسط مبشورة

الطريقة:
تخلط كل المواد مع الانتباه بترك 1/2 كمية الجبنة للوجة
توضع في صحن بايركس وترش بالجبنة
توضع بالفرن على حرارة 180 من 25-30 دقيقة
وتقدم...
طبق لذيذ وسهل جنب ستيك او دجاج
وصحتين


ومتذكرين البوست السابق والشبت...جربوا حطوا شبت بحشوة الملفوف او بمقلوبة الفول او الربيعية...طعم تاني...جد!!!



3 comments:

  1. وصفة بسيطة وسهلة بس شكلها طيبة

    ReplyDelete
  2. يسلمو ايدكي كتير سهلة ومبين انها لذيذة كتير ، وافكار المارشميلو ورجل التلج رائعة

    ReplyDelete
  3. كتيير حلوة افكار المارشملو وبسيطة وبتفرح الاطفال
    وسهل انهم يعملوها لحالهم ويشعروا بفرحة الانجااز
    شكرا للافكار الحلوة

    ReplyDelete