Sunday, December 15, 2013

العودة للاساسيات: مرق الدجاج و شوربة الدجاج بالليمون والتايم (زعتر بري)

عم بفكر بالمثل اللي بيقول" بكرة بيذوب الثلج وببين الي تحته" وانا بشرب قهوة الصبح وسامعة كم سيارة مرقوا من الشارع بس اليوم الصوت كأنهم بمشوا على حصى ومسامير لانه الثلج تجمد مع درجات حرارة الليل المتدنية...ومش عارفة جد هاد الثلج قديش بده وقت ليذوب ويبين اللي تحته؟!!! امبارح طلعت وبديت انظف الرصيف قدام البيت ومن على السيارة وجد اطنان من الثلج...الوضع مش سهل ابدا وخاصة هلأ مع التجمد..عم بطلع على سيارتي اللي انقذتها امبارح من تحت اكوام الثلج وهلأ لابسة ثوب جليد!!! بس قلت لحالي هاد اسهل يذوب من لو اتجمدت اكوام الثلج فوقها....عارفة حالي لسة فيها اليوم وبكرة بالبيت...

اليوم انا بموود الخبز....جاي على بالي اخبز...فالغدا وحسب المنيو بيتزا...الاولاد بيحبوا الباربكيو والدجاج وعندي باكيت فيه 4 افخاذ دجاج فقررت انهم رح يستفاد (بضم الياء) ههه ... منهم بثلاث طرق بعد سلق الدجاج واللي جزء مهم من البوست اليوم والعودة للاساسيات وعمل مرق الدجاج...خليني بالاول احكي عن 3 طرق الاستفادة منهم:
1. جزء على البيتزا
2. جزء بالشوربة اللي اشارككم وصفتها اليوم مع المرق
3. العظم والبواقي اللي عليه للخمس قطط صغار(صاروا 4 للاسف بعد ما وحدة طلعت وما رجعت)

ممتاز...هلأ خلينا نحكي عن مرق الدجاج الاساسي واللي ممكن انك تستفيدي منه بالشوربات وغيره...مهم اني ابين التالي:
1. اني لما بسلق الدجاج لاي غرض غير الاكل العربي بستعمل هادي الطريقة لانه ما بدي نكهات البهارات والهيل وغيره...بدي نكهة مرقة الدجاج بس
2. لون المرق فاتح او غامق بيعتمد اذا حمرت الدجاج قبل وضع المي عليه او لأ ففي طريقة المرق الفاتح بانك تحطي كل المكونات مع مي باردة وتسلقي الدجاج قبيكون فاتح او تحمري الدجاج بالاول بعدين التحويجة (الخضار اللي رح تعطي نكهة) بعدين ماء ساخن او مغلي.
3. للتوفير اذا بدك مرق بس من غير دجاج لاي غرض فالطريقة هي شراء عظم الدجاج من محلات مثل السي تاون او سامح مول واللي بيعرضوا باكيت كبير عظم ب 70 قرش بس وبتعملي مرق حوالي 10 اكواب او اكثر وبتحطيه بالفريزر لحين الاستعمال.

هلأ نيجي للطريقة:
مرق الدجاج الاساسي
المقادير:
عظم دجاج او دجاج مقطع بالعظم
بصلة متوسطة مقطعة ارباع
عود كرفس مقطع كبير (مش مهم التقطيع لانها منكهات فقط)
جزرة متوسطة مقشرة ومقطعة
6-8 اعواد بقدونس
6-8 حبات فلفل اسود حب
ورقتين غار
ملح
ماء مغلي

الطريقة:
توضع قطع الدجاج في قدر كبير وتقلب قليلا تضاف المنكهات ويقلب الجميع ويضاف الماء المغلي
عندما تغلي المكونات يزال الرغوة على الوجة وتخفض الحرارة الى متوسطة ليستوي الدجاج او لتحصلي على المرق (حوالي ساعة على حرارة متوسطة الى منخفضة)
تصفى وتستخدم او تفرز بعد تبريدها الى حرارة الغرفة

ميزة هذا المرق انه غني بالمكنهات ولا يغلب عليه طابع البهارات العربية وبالتالي ممكن استخدامة لاي اكل عربي او غربي...

انا شوربة اليوم في شوربة الدجاج بالليمون...ممتازة ومفيدة وخاصة بالبرد او للي مرشح وطعمها مختلف عن الشوربة اللي منعرفها لانه فيها زعتر وليمون

شوربة الدجاج بالليمون والتايم (زعتر بري)
المقادير:
4 ملاعق كبيرة زيت زيتون
بصلة متوسطة مفرومة ناعم
جزرتين وسط مفرومين مكعبات وسط
2 عود كرفس مفروم مكعبات وسط
ورقة غار
بشر ليمونة
2 سن ثوم مدقوق
1/4 ملعقة صغيرة تايم او زعتر جاف
1/4 كوب عصير ليمون
10-8 اكواب مرق دجاج (الوصفة اعلاه)
كوب معكرونة اورزو (راس عصفور) او اي نوع صغير
2 كوب دجاج مسلوق ومقطع
1م4 كوب بقدونس مفروم ناعم

الطريقة:
يوضع زيت الزيتون ويضاف البص والكرفس والجزر ويقلب على نار متوسطة 5 دقائق ليذبل
يضاف الثوم وورقة الغار والتايم او الزعتر وبشر الليمون
يضاف المرق وعصير الليمون وتترك لتغلي ثم تخفض الحرارة وتترك 10 دقائق مغطاة 3/4
يضاف الاورزو (المعكرونة) والدجاج وتترك لتستوي المعكرونة
يضاف البقدونس وتقدم...





3 comments:

  1. بالنسبة لمرق الدجاج انا ما جربته بس مرة احتجت مكعب مرق دجاج وطلبت من جارتي واعطتني مكعبات هي عملتها بنفس طريقتك
    وضلت الفكرة ببالي
    بس بصراحة لانشغالي بالبيت ما جربتها
    بس عجبتني انو صحية وما فيها مواد حافظة

    ReplyDelete
  2. يسلمو ايديكي والله استفدت كتير منك وانا ماكنت بعرف هالنقطة انو الاكل العربي ووالاكلات الغربية بتاثر فيهم مرقة الدجاج وكيف نسلقت والمطيبات الي كانت فيها ، كنت احط الهيل وكبش قرنفل وقرفة وبصل وكرفس وجزر وفلفل اسود واسلق فيها الجاج دايما شو ماكانت الاكلة ، يسلمو كتير

    ReplyDelete
  3. شكرا على وصفة مرق الدجاج،حلو الواد يتعلم انه ما نضيف هيل

    ReplyDelete