Friday, December 13, 2013

كاساديا البطاطا وفكرة فطور اليوم بعجينة البف باستري: اصابع بالمربى وموالح الزعتر

صاحية من الساعة 6:30 ومع التدفئة اللي اشتغلت وفنجان نسكافيه ساخن ولسة بردانة...يا رب تلطف بكل بردان وكل شخص مش لاقي الدفا...يا رب تعينهم وتساعدهم...جد احنا مقصرين كتييير...على الاقل بحكي عن حالي...اشي لازم جديا ابدأ بالتفكير فيه بما انه في سنة جديدة وتوقعات جديدة من حالي.."قدم مساعدة اكثر لغيرك او اعمل اشي واحد منيح كل يوم لشخص ما بيتوقع المساعدة او ما بيتوقعه منك" ...اجت فترة علي قبل عدة سنوات طبقت هاد الموضوع بس مسؤولياتي كانت اقل شوي...بس مش حجة المسؤوليات (هادي بهدلة ادبية لحالي بصوت عالي!!!) يا رب تقدرنا على فعل الخير...وعشان هيك بدي اقدم شكري الخاص لكل حد بيتطوع وبيساعد غيره ولو بابسط الاشياء..

ونرجع للعاصفة الثلجية ....امبارح وبالتصفح للفيس بوك مش معقول...الصور كانت اما للثلج او نكت على الثلج او الاكل اللي عم بينعمل عشان الثلج!!! الله يسعد ايامكم جميعا ويجعل السنة الجاي سنة بيضاء وسنة خير واحسن علينا جميعا... وجمعة مباركة باذن الله

اليوم الوصفة سهلة وسريعة وممتازة للاستفادة من البطاطا المهروسة الزايدة خاصة اذا ما كانت الكمية كبيرة (لما بعمل بطاطا مهروسة بكون سلقتها بمي وملح وهرستها مع زبدة وحليب وشوية جوزة الطيب)...نصيحتي اذا حبيتو تجربو هالطبق اللذيذ ان تعملوا بطاطا مهروسة زيادة عشان تستعملوها تاني يوم للطبق هاد....وطبق اليوم هو نوع من الاطباق المستوحاة من المطبخ المكسيكي وهي من المقبلات وهي كاساديا البطاطا...والكاساديا عبارة عن اما خبزة تورتيا (او تورتيلا زي ما بنحب نسميها) محشية بحشوات مختلفة من نص واحد ومطوية ومسخنة لتسيح الجبنة اللي جواتها او خبزتين بتنحط الحشوة على واحدة وبتطبق التانية فوقها وبرضة بتتسخن بقلاية لتسيح الجبنة اللي جواتها...بكاساديا البطاطا انا حطيت الحشوة على واحدة من النص و طويتها والشكل النهائي بيرجعلكم..


كاساديا البطاطا
المقادير:
كوب وربع بطاطا مهروسة (زادت عندي من قبل بيوم)
5 شرحات بيكون بقري مقطع ومقلي بشوية صغيرة زيت زيتون ليصير ذهبي ويقرمش شوي (انا ما كان عندي بيكون فاستعملت مرتديلا صدر دجاج مدخن وطلع زاكي كتير فممكن تستعملوا سلامي او ببروني او حبش او روست بيف ...المتوفر وممكن الاستغناء عنه بس بيعطي طعم زاكي)
بصلة خصراء صغيرة مفرومة ناعم
4 ارغفة تورتيلا
كوب ونربع جبنة شدر مبشورة
ملعقة طعام زبدة مقسمة الى 4 اقسام اتحميص كل رغيف تورتيلا
فلفل اسود ورشة ملح

الطريقة:
تخلط البطاطا والمرتديلا والبصلة وترش بالفلفل الاسود والملح
توزع الحشوة على ارغفة التورتيلا على نصف واحد من كل رغيف وترش بكمية جيدة من الجبنة (مش بس لانها بتعطي طعم ولانها الغراء للكاساديا)  وتطوى من النص
تحمى مقلاة على نار متوسطة ونضع قطعة زبدة ونحمص اول كاساديا على الجهتين وتكرر العملية
تقدم ساخنة والف صحة وهنا وموعدي معكم بكرة ان شاء الله ومنيو الاسبوع واستعراض ادائي للاسبوع الماضي...


اما فطور اليوم فهو استفادة من عجينة بف باستري عتدي بالفريزر...كنت لازم اطلعها عشان اعمل وسع للخبز (عشان الثلجة) هههه وعملتها اصابع بالمربى


بتفردي العجينة مستطيل وبتهنيها بمربى (انا استعملت رازبري) وبتطويها من النص وبتقطعيها بالطول وبعدين بتمسكي كل حبل ووبتبرميه وبتحطيها على صينية وبتخبزيها بفرن حامي..

زوايد العجينة لما قسمت المستطيل دهنتها شوية صغيرة زيت ورصيت عليها زعتر(مش رشيت) عشان يثبت


3 comments:

  1. عجينة البف باستيري كتيير بحبها وبعمل منها صرر الاوزي بتكوون ولا اروووووووووووووع
    وبعمل منها اصابع الموالح وبرش عليهم زعتر وسمسم
    واطفالي بحبوهم كتيييييير :)

    ReplyDelete
  2. يسلمو كتيييييير عندي باف باستري رح اعمل فيهم زعتر يمي يمي

    ReplyDelete
  3. تم
    حنان ابوغوش
    كاساديا

    ReplyDelete