Sunday, December 1, 2013

شبت..دجاج...سالمون...مقادير ممتازة لوصفتين ولا اسهل :)

شهر واحد لانتهاء ال 2013....جد وين الوقت بيروح...اظن المشكلة مش بالوقت بس بوقع حياتنا السريع هالايام واللي صارت مليانة بالاشياء اللي لازم تنجز وتنعمل...سقالله ايام زمان وايام ما كان الواحد يصحى ويفطر برواق (لا فيه تلفزيون فاتح ولا موبايل بيرن) ويرتب البيت برواق ويطبخ برواق ويتغدى الساعة 2:30 (مش هلأ الكل بياكل لحاله لانه اغلب الدوامات بتختلف) وبعدين نومة بعد الظهر اللي كانت لا تفوت..وبعدها بيفتح التلفزيون...ومش طول الوقت عليه لانه الاولاد بدهم كرتون وبعدين بتصير البرامج مملة للساعة 8 الاخبار وبعدين العشا ومسلسل السهرة...ايام الخميس ابو عواد ومرايا وفيلم عربي او اجنبي على القناة التانية....أخخخخخخخخخخخخخخ...يعني جد كنا نستمتع بكل شي...كل اشي كان اله قيمة...هلأ بس على مستوى التلفزيون من كتر البرامج بتقولي..ما في اشي زي العالم نتفرج عليه..والاولاد هالايام ما في فيلم مش حاضرينه دي في دي او بالسينما...الخ الخ الخ...

وبعرف انه في كتييير اشياء ايجابية هلأ اهمها اني بقدر اكتب على المدونة هههههههههه واتواصل معكم ...

طيب...حكيت بدي احكيلكم عن رحلة التسوق الاسبوع هاد بكارفور لاول الشهر...وهي عادة من الرحلات اللي بصرف فيها منيح لانه في كتير اشياء اساسية بنحتاجها كل شهر من ادوات تنظيف واجبان وغيره..الخ ..فصرفت 121 دينار تقريبا...بس
اشتريت 3 دجاجات الكيلو ب 1.89 وطبخت واحدة امبارح بالشبت والثوم والليمون و2 راحوا على الفريزر (يعني فيه 3 دجاجات بالفريزر)
6 علب بندورة ايطالية معلبة ب 66 قرش للعلبة
وتايد الغسيل باكيت 4 كيلو (سعر باكيت ال 2 كيلو ب 2.95 بس ال 4 كيلو ب 5.50 يعني توفير 50. قرش ومسحوق الغسيل اشي ما بيخرب وبيضل لنص الشهر الجاي)
12 اصبع زبدة ب 1.97 لل 3 اصابع نوع بريزدنت.......ممتازة للحلو

طبعا واجبان وكرتونة بيض واشياء زاكية للمدرسة وخضار وفواكه وكورن فليكس وادوات تنظيف تانية...الخ والحمد لله على النعمة...

ولانه بداية شهر جديد فرح ابدا اشارككم المنيو بس بطريقة احسن عشان تقدروا ترجعوا الها لاي افكار مستقبلية...كل ما عليكم هو الضغط على كلمة منيو 2 ورح تاخدكم على قائمة الاكل لهالاسبوع...كل اسبوع ان شاء الله رح احط القائمة بهادا الشكل واللي بده يرجع لكل القوائم ممكن يضغط عند قوائم طعام اسبوعية باعلى الصفحة الرئيسية...

واذا لاحظتوا على المنيو فانا عندي طبقين بالشبت وهو من الاعشاب اللي جديد بدينا نستعملها بالاردن بس بمصر تستعمل كتير وباميركا كمان...ولانه مش رخيص كتير (الباكيت ب 1.15 دينار) فقررت اني احاول استغل الكمية باكثر من الكلة والنية 3 اكلات (دجاج وسالمون ومعجنات)

امبارح عملت اللي بالدجاج...كتييير سهلة وزاكية



دجاج بالشبت والليمون والثوم
المقادير:
دجاج مقطعة 8 قطع او كما ترغبين وممكن مسحب
ملح، فلفل اسود
ملعقة طعام زيت زيتون وزيت عادي
عصير ليمونة كبيرة
2 سن ثوم مدقوق
3 ملعقة طعام شبت مفروم
1/4 كوب زيت زيتون

الطريقة:
نملح ونبهر الدجاج
نضع الزيت بمقلاة ونحمر قطع الدجاج على الجهتين لتأخذ لون (مش مهم تستوي) ونرفعها على صينية للفرن
نخلط الثوم وعضير الليمون والشبت وزيت الزيتون وملح وفلفل اسود وندهن قطع الدجاج بالخليط
ندخلها الفرن لتكمل نضجها (من 20-25 دقيقة)
تقدم مع السلطة والارز او معكرونة...وصحتين

اليوم عملت سمك السلمون بالشبت وهي الطريقة



سمك السالمون بالشبت
المقادير:
5 شرحات فيلية سمك سالمون
3 ملاعق طعام كبيرة شبت مفروم
4- 5 سن ثوم مقطع شرائح
ليمونة مقطعة شرائح رفيعة ثم مقسمة من النصف بالعرض(سوف نستعمل الجزء اللي بالنصف اكثر)
ملح
فلفل اسود
2 ملعقة طعام زيت زيتون
2 ملعقة طعام زبدة

الطريقة:
بسكين حادة نقوم بعمل جيب في كل شريحة سالمون وندخل بها شرائح الثوم (نبقي القليل من الثوم للوجه) والليمون والشبت المفروم
نرش الشرائح بالملح والفلفل الاسود
نحمر الشرائح بمقلاة بمزيت الزيتون فقط لتأخذ لون بسيط ونرفعها على صينية
نذيب الزبدة مع الثوم المتبقي وندهن بها الشرائح
ندخلها الفرن من 10-12 دقيقة لتنضج
تقدم مع شرائح الليمون





5 comments:

  1. بتمنی ترجع ايام زمان اللي ما كان في محطات الا عمان والشام ولا في موبايلات ولا نت كنا طول الوقت بنحكي مع بعض وحتی العلاقات الاجتماعية كانت غير احلی وابسط

    ReplyDelete
  2. والله مافي احلى واجمل من ايام زمان كانت بسيطة بعيدة عن التعقيد الي هلا موجود بالرغم انو هلا بسطولنا كل شي وكل شي بتحصلي عليه بسهولة بس ايامنا معقدة كتير :(

    ReplyDelete
  3. يسلمواااا ايديكي
    طبق السالمون رااائع
    وما في احلى من ايام زمان ايام البساطة
    هلأ صارت حياتنا تكنولوجيا وبس

    ReplyDelete