Saturday, November 9, 2013

كيف تبني الخزين: البوست الثالث ومنيو الاسبوع القادم وخليط البراونيز المنزلي

قضينا يوم جمعة رائع امبارح بصحبة الاصدقاء بالمزرعة وبشكر ديمة ورجائي على المشاوي اللذيذة والصحبة الالذ...ما في احلى من الاصحاب الطيبين والاجواء الدافية باحضان الطبيعة...عزومتنا كانت على الفطور بس من لطفهم جابوا الغدا وضلينا ناكل طول الوقت...ومن الاشياء اللي عملتها كان البراونيز واللي طاروا الف صحة وهنا..وعلى سيرة البراونيز...انا ولتوفير الوقت والجهد بعمل خليط جاهز (مثل اللي بنشتريه جاهز من السوبرماركت ) وبحطه بمرتبان كبير وبس بدي اعمل براونيز بطلع كوبين منه لكمية صينية مربعة صغيرة. فتوفير وقت وجهد كبار... اليوم رح اشارككم الوصفة للخليط وهي صورته وبحطه بالمونة


بس قبل ما نحكي عن البراونيز خليني احكي كيف انا بوظف المعلومات المهمة اللي حكيت عنها سابقا مثل الشراء على العروض، وسعر الوحدة و عمل الاشياء بالبيت وغيرها ببناء الخزين عندي بالبيت ...مهم انه تنتبهي ل:
1. تواريخ الصلاحية ...رتبي الاشياء مثل السوبر ماركت الاقرب مدة صلاحيته للانتهاء لبرة والاطول لجوة...
2. انتبهي على الاشياء الجافة انها تكون بعلب محكمة الاغلاق وما يدخلها حشرات (يعني مش بعد التعب والجهد يخرب الاشي...صح؟!!!!)
3. راجعي الاشياء اللي عندك عشان ما تضلي تشتري من اشي واحد كتيير وتنوعي بالمخزون...

فمثلا انا اشتريت الاسبوع الماضي:
على العروض:
سكر (دايما بدنا سكر وكمية منيحة (10 كيلو) فما رح اروح واشتري الاسبوع هاد كمان سكر لانو خلي الفلوس تروح على اشي تاني ومن هون لنستهلكه بينزل السكر على عرض تاني (من خلال خبرتي بالاسعار)
رب بندورة (مهمة كتير وبتضل فترة)
مش على العروض:
الموزريلا والمايونيز

الاسبوع هاد رح نشوف شو في عروض ولقطات مثلا على الارز او الطحين او غيره...
طيب...خلينا نراجع المنيو للاسبوع الماضي واعترافاتي الخطيرة بعدم الالتزام فيها تماما بسبب الظروف...

يوم السبت التزمت بكل شي تمام، الاحد للاسف ما لحقت اعمل الغدا بسبب ظروف فجاب زوجي اكل من بره والتكلفة كانت 22 دينار رح احملها على الميزانية آخر الشهر، يوم الاثنين عملت اكل يوم الاحد، يوم الثلاثاء برضه لظروف بس عملت اليخنة وبطاطا مهروسة ففي اشياء لم يتم الالتزام به ومنها الكيكة لصاحبتي، يوم الاربعاء كان اكل يوم الاثنين السلوبي جوز، يوم الخميس طلعنا الاولاد وتغدينا بره وانا بعرف انه لازم يوم بالاسبوع بره بس مع ذلك بحط اكلة على المنيو للاحتياط، يوم الجمعة فطور مناقيش وبيتزا مرجريتا (ما عملتها على العشا مثل ما مخطط، وفول وحمص وغيره ومشاوي من اصحابنا على الغدا). هادا الشي يعني انه لسة عندي خيارات للاسبوع الجاي فالمنيو هي ان شاء الله
السبت 11/9 
الغداء دجاج الا سلطان وارز مصري معمر وسلطة الكينوا الرائعة واللي رح اشارككم وصفتها ان شاء الله
العشاء  كاساديا السبانخ والفتة  (من تبروير السبانخ بالفريزر) برضه رح تنزل على المدونة
كل الاغراض موجودة

الاحد 11/10
الغداء معكرونة بالبشاميل مع سلطة
العشاء حواضر (الا اذا جد اشي ببالي)

الاثنين 11/11
الغداء سمك بالكزبرة والزنجبيل (باستخدام كيس الهامور) وارز بالكاجو والبرتقال وسلطة الجمبري بالافوكادو
العشاء حواضر (الا اذا جد اشي ببالي)

الثلاثاء 11/12
الغداء ملوخية وارز (قلتلكم لازم مرتين بالشهر)
العشاء ساندويشات توست بالدجاج 

الاربعاء 11/13
الغداء كباب شاورما (رح اشارككم بالوصفة) وارز ايراني وشوربة الجزر والبرتقال
العشاء حواضر (الا اذا جد اشي ببالي)

الخميس 11/14
الغداء سر ههههه بخبركم بس لاحط الوصفة :)
العصر: جاي صاحبتي واولادها وانا بعرف انها بتقرأ المدونة فما رح اقول شو رح اضيف ههههههه بس بخبركم بعدين
العشاء حواضر (الا اذا جد اشي ببالي)

الجمعة 11/15
الفطور بالمزرعة مع اصدقاء النا ان شاء الله برضه وعلى الاغلب حمص وفول ومناقيش واشي هيك :) يعني اعادة للاسبوع الماضي واذا جد اشي بخبركم
الغداء برضه مع الاصحاب والنية منيو خاصة حسب عدد المدعوين ورح اعملها خلال الاسبوع وبخبركم فيها 
العشاء حواضر (الا اذا جد اشي ببالي)

حلويات محتملة: كعكة تقاح بصوص كراميل او ابل باي (طريقة قديمة عندي بس بحبها كتير...على طريقة رهام بنت خالتي وهي طباخة ماهرة :)

وعلى هالاساس قائمة الشراء هي:
لحوم: رح اوصي على اللحمة للشهر واللي رح تكلف بس برضه كلفتها على كل الشهر
خضار وفواكة: برتقال للعصير، بصل، خيار، بندورة، خس، برتقال للاكل، فليفلة خضراء وفليفلة حمراءوصفراء، كزبرة، افوكادو، جزر
اشياء اخرى: باكيت معكرونة بيني، اشياء زاكية للمدرسة 
خبز: عادي، توست
ثلاجة وفريزر: ملوخية، لبن (الا اذا روبت بالبيت وهيك النية من باب التوفير)
غير طعام: محارم ورقية

وهلأ نرجع لوصفة خليط البراونيز...ومهم احكي انه لازم ما تنخبز البراونيزمثل الكيك لتجتاز الاختبار لانه وقتها بنكون بطلت براوني وبتنحرق وبتصير يابسة..البراوني بتكون اقل مسامات من الكيك (كانها معجنة) وللحصول على هالقوام لازم تنخبز لتنشف الاطراف والوسط لسة نسبيا طري...

خاطة البراونيز المنزلية
المقادير:
8 اكواب سكر
6 اكواب طحين
2 كوب كاكاو
1/2 1 ملعقة طعام بيكنج باودر
ملعقة طعام ملح

الطريقة:
تخلط معا وتحفظ بمرتبان ويوضع عليها ليبل (بتقدروا تحزروا قديش انا مبسوطة على الليبل الجديد :)...رح احكيلكم عنها ببوست قريب ان شاء الله :)


مقادير عمل صينية 8 انش ب 8 انش (المربعة الصغيرة) من البراونيز:
2 كوب مكس
2 بيضة
2 ملعقة صغيرة فانيلا
1/3 كوب زبدة مذابة

الطريقة:
تخلط المواد السائلة وتضاف للخليط وتحرك بملعقة خشب جيدا وستكون سميكة
توضع في الصينية المدهونة بالفرن على 170 درجة الى ان تنشف الحواف ويبقى الوسط لامع قليلا
تترك لتبرد في الصينية لتكون دافئة
تقلب وتقطع
تقدم مع بوظة وصوص شوكولاتة وهي دافئة او لحالها او ممكن تضيفي اي شي فيها مثل شوكولاتة شيبس ابيض او عادي ، مكسرات...الخ
وصحتين





4 comments:

  1. جوزك يا عزيزتي لازم يدفعلك مهرك مرتين وتلات ,,,يعني بصراحة كتير حابه احكي لابو سلطان (تاعي مش تاعك :P ) انو في مدونه بتجنن بقرأها كل يوم بس خايفه الاخ يعايرني بصراحه ,,
    طيب سؤا ل منال للاسف هاي المشكله عندي دائما بالبيت,,,شو بتعملي بالاكل البايت؟؟!! مأساة حياتي الاكل البايت,,لا ولادي ولا جوزي بيحبو ياكلو تاني يوم ولا انا بقدر اكبو ,,,الا يزيد ..شو اعمل؟؟!!

    ReplyDelete
  2. هههه ضحكتيني...قرأتها لجوزي وابتسم...فقط!!! ههههه بس الله يجبر بخاطرك ما احسنك!!!
    المهم بالنسبة للاكل البايت عادة عندي بياكلوه...واكتر طريقة اني بزرقه على العشا وما بيكون بايت بهاي الحالة...حاولي كمان ما تكتري بس المشكلة لانك بتشتغلي فالواحدة بدها اشي ترتاح تاني يوم..اسأليني ما انا كنت اشتغل...بس برأيي الحل الافضل هو انك تحضري منيو للاسبوع وخليهم يشاركوا فيها عشان يتشجعوا وياكلوا ...التخطيط للمنيو بيعطيكي الامكانية انك تخصصي مثلا ساعة بيوم العطلة او اكثر حسب وقتك انك تعملي تحضيرات للوجبات (اللي بده تنقاية واللي بده قلي واللي بده تقطيع (مثل السبانخ)...الخ وهيك بتخففي على حالك خلال الاسبوع اذا الهدف ما تضل الاكلة على يومين كمان فكري وانت بتخططي للمنيو بانك تتعبي مرة واحدة..يعني عاملة بيتزا...ضاعفي الكمية وحطي بالفريزر وسخني وقت ما بدك...عاملة فاصوليا...اسلقي لحمة زيادة وتاني يوم اعملي رز بفول او اي اكلة تانية بدها لحمة مسلوقة...طريقة تانية بتبعها هي عمل تغيير بسيط على الاكلة لتحويلها الى اكلة تانية...مثلا منزلة الباذنجان تاني يوم بتصير فتة مكدوس... بقايا دجاج مشوي بيصير انشلادا او رولات مسخن او فتة دجاج..بقايا بطاطا مسلوقة بوريه بتصير فطيرة الراعي...بدها شوية عصر مخ ساعة مرة كل اول اسبوع وبترتاحي طول الاسبوع...ان شاء الله اكون جاوبت واي اكلة بتحتاري فيها ابعتيلي بحاول اساعد :)

    ReplyDelete
  3. شو حلو هالتنظيم والتخطيط الله يعطيكي العافيه عنجد موضوع منيو الاسبوع كتير مهم وبريح وكمان حبيت انه بتحطي النوعيات اللي بتشتريها من الاكلات ومن وين انا الي سنه هون كتير بحتار بالماركه المناسبه اللي بدي اجيب منها عشان اوفر طبعاً لانه الاسعار هون غير ولازم تحسبي حسابك صح بس عندي سؤال عن الكريما الحامضه وين بقدر الاقيها كتير كنت استعملها بالاكلات المكسيكيه وبالتشيز كيك ماشفتها ابداً وكمان بدي اشكرك عخليط البراونيز لانه زوجي بحبه كتير

    ReplyDelete
  4. شكرا الك لكل نصائحك الحلوة ووصفاتك الرائعة
    طبق البراوني رااااائع جدا
    بجننننننننننننننننننننننننننننننننننن
    يسلموا ايديكي

    ReplyDelete