Saturday, November 2, 2013

جرد غرفة الخزين والثلاجة والفريزر ومنيو الاسبوع ووصفة انشلادا بالدجاج والفطر والسبانخ وصوص الكزبرة

كيف بالله العنوان؟!!!! مجلد!!! لسة استنوا بس تقرئوا المجلد اللي تحت...!!!! آسفة مقدما !!!!

نبدأ بشوية اخبار شخصية ورحلة عائلية وجولة بالسيارة ولا اروع امبارح بجرش وعجلون وباجواء المطر...مع شنينة من الحارس ومعجنات من ابو احمد...جد قمة السعادة ممكن تكون بابسط الاشياء... وبالرغم من اني بعاني من دوار السيارة خاصة اذا كانت بطريق كلها لفات زي عجلون وراسون بس انبسطنا كتييير...

طيب...خلينا نرجع لميمعة تنظيم الخزين باول الشهر وبرجع للقائمة الرئيسية وجنب كل اشي بكتب شو عندي كجرد لمحتويات الكل ولاني بطبخ كتير فدايما عندي اشياء زيادة وقد تبدو الامور متعبة بس لما تتعودي وتبدي بتصير كتير اسهل ورح تشوفي انه التعب بس بكون بآخر اشهر لما بدك تحصري الكميات وشو بتحتاجي...

غرفة الخزين او المونة اوpantry
اللوازم الجافة:
طحين ابيض  2 كيس 5 كيلو الواحد وحوالي 2 كيلو بالمرتبان يعني حوالي 12 كيلو
طحين اسمر 2 كيلو 
طحين كيك  حوالي 3-4 اكواب (لازم اعمل كمية جديدة)
طحين ذاتي التخمير  ما عندي (لازم اعمل كمية جديدة)
طحين ذرة  2 كيلو
سكر عادي 5 كيلو كيس جديد
سكر مطحون مرتبان فيه حوالي 5 باكيتات صغيرة 
سكر بني علبة
نشا (كنت ناسيته من القائمة في البوست السابق) كيلو
ارز مصري 4 كيلو
ارز بسمتي 3 كيلو
ارز امريكي (طويل الحبة) 4 كيلو
عدس حب حوالي 1/2 1 كوب
عدس مجروش  حوالي 2 كوب
برغل ناعم حوالي 2 كوب
برغل خشن حوالي 2 كوب
فريكة ناعمة علبة
فريكة خشنة 2 علبة
سميد ناعم 1/2 1 كيلو
سميد خشن 2 كيلو
حمص حب (لا يوجد بس فيه بالفريزر مسلوق)
فاصوليا بيضاء  (لا يوجد بس فيه بالفريزر مسلوق)
فول مجروش لا يوجد
حليب بودرة شوي بمرتبان + كيس كبير مسكر
فانيلا بودرة 2 علبة (بستهلك بكميات كبيرة)
بيكنغ باودر (3 علب)
كربونات الصودا (علبة كبيرة مسكرة)
خميرة (بالثلاجة كمية جيدة تكفي للشهر)
خلطة الشوربة الجاهزة  يوجد كمية محضرة مسبقا
معكرونة بانواعها (اسباجتي ما في، فتوتشيني بكيت مسكر، لازانيا  بكيت مسكر، بيني 2 باكيت، معكوفة ما في، زنبرك باكيت، شعيرية باكيت) + لقيت باكيت معكرونة طويلة مثل الزنبرك وهي صورتها

بوشار باكيت مسكر
قرشلة (صنع بيتي من بواقي الخبز) فيه كمية جيدة
قمح ناشف (للي بحب) لا يوجد
ملح يوجد كمية بمرتبان وكيس مسكر

معلبات ومرتبانات:
فول 9 علب (قبل فترة كان في عروض ممكتازة بكارفور فاستغليتها)
بندورة  1 علبة صغيرة ولازم اجيب كمان
رب بندورة في شوي بمرتبان بالثلاجة بس رح احتاج
تونا 3 علبة
فاصوليا حمرا 2 علبة 
ذرة 3 علب
كريمة الذرة علبة
ذرة عرانيس صغيرة (بيبي كورن..برضة اختياري) علبة
حليب جوز هند 5 علب (حاليا بالسي تاون ب 69 قرش للعلبة)
حليب مركز محلى اضغطي على الاسم للطريقة بالبيت 8 علب نستله على عرض قبل فترة من السي تاون ب 59 قرش للعلبة
مخلل مرتبان كبير من النوع اللي للبرغر (مقسم بالشبت)
زيتون اسود علبة
زيتون اخضر لا يوجد
معلبات غير اساسية: بالميتو علبة، كستناء الماء (للاكل الصيني) علبة، براعم الفاصوليا علبة، ارضي شوكي (قلوب او كامل) لا يوجد
لقيت علبة هليونعناصر منكهة وصوص: (موجود من كل اللي مكتوب منها كميات جيدة بعلب مفتوحة)
صويا صوص 
خل تفاح
خل ابيض
خل عنب
خل بلسامك
صوص السمك
صوص هويزن (للي بيعمل اكل الشرق الاقصى)
كاتشب 4 علب مختلفة الاحجام والانواع حيب العروض الماضية
باربكيو صوص لا يوجد بس في علبة مفتوحة بالثلاجة
طحينة علبة صغيرة مسكرة ونص علبة كبيرة مفتوحة
مايونيز (بالثلاجة فور فتحة) مرتبان كبير مفتوح بالثلاجة
ماسترد عادي بقية علبة مفتوحة بالثلاجة
ماسترد ديجون بقية علبة مفتوحة بالثلاجة
ماسترد بالحب whole grain بقية علبة مفتوحة بالثلاجة + 2 علبة كغلقة على العرض ب select ب 1.49 للعلبة ونوع ممتاز

فواكه مجففة ومكسرات ولوازم الحلو ومشروبات (كتير مش اساسية بس للاضافة):
تمر يوجد كميات (خالد بيحب التمر وبشتريه كتير للاكل وفي عندي مفصص وفيه مطحون كمان)
زبيب يوجد حوالي كوب
كرانبري (برضه للي بيحب)  يوجد حوالي كوب
مشمش مجفف 1/2 علبة صغيرة
فواكة مشكلة مجففة (للانجلش كيك) لا يوجد
كرز مجفف  1/2 علبة صغيرة
جوزهند غير محلى مرتبان كبير
لوز كمية جيدة بالثلاجة بس في انواع مثل انصاف وشرائح
جوز حوالي كوب
فول سوداني حوالي كوب
سمسم محمص علبة مسكرة
سمسم غير محمص كمية جيدة
قزحة حب (كمية جيدة) نسيت اضيفها بالقائمة حشوات تشيز كيك (كرز علبة، فراولة لا يوجد، بلوبري علبة ولقيت 2 علبة مشمش صغيرة انصاف
جلو نكهات عادة فراولة وليمون (2 فراولة 1 ليمون لصفر 1 اخضر و1 برتقال)
زبدة الفستق 3 علب (برضه على العروض بس من السيفوي)
مربيات بعض المرتبانات بالثلاجة (مشمش ورازبري)
دبس تمر او عنب علبة
قشطة (قيمر) 2 علبة
حلاوة علبة كبيرة مفتوح منها شوي
بسكوت سادة او دايجستف حوالي 5 باكيتات
بسكوت ليدي فنجرز باكيت ونص
بسكوت شوكولاته سادة او اوريو 3 باكيت
خلطات كيك جاهز (9 علب على عرض الدينار)
كريم كراميل جاهز  6 علب بعرض سابق من كارفور
باكيتات عصير مجفف (زي تانج او سكويز) 10 توتي فروتي 3 اناناس 3 برتقال
نسكافيه علبة صغيرة
نسكافية 3 ب 1 باكيت مفتوح (اكيد رح اشتري كمان)
كوفي ميت 2 علبة مسكرة
كاكاو بشتري بالكيلو لاني بعمل كميات من المحمودية بمجمع جبر ب 6 دنانير للكيلو وفي كمية جيدة
كاكاو للشرب (عملته على رؤيا  وهي الفيديو الوصفة بآخره) ما في بس لازم اجهز خلطة للشتاء
شاي عادي كمية جيدة ميداليات وفرط
شاي اخضر بالنعنع ما في
شاي ايرل جراي كمية جيدة

(اذا بدي اتشبرق شوي... قد ما هي غالية هالاشياء)
كاجو في كمية بسيطة بالثلاجة
بندق اشتريت قبل كم يوم محمص ومقشر من السي تاون نوع تركي حوال 3 كوب ب 4.5 دينار برضة سعر ممتاز خاصة انه مقشر)
بيكان في حوالي 2 كيس صغير قبل فترة من السيفوي ب 2.25 للكيس (سعر فظيع لانع البيكان غالي كتييير)
صنوبر لا يوجد ومش ضرورة ههههه
جوزهند محلى 2 باكيت مسكر (من select ب 2.20 للكيس مقارنة ب 3 دنانير وشوي بحلات تانية)

زيوت:
زيت زيتون بصراحة دايما والحمد لله في من مزرعتنا بالصبيحي
زيت نباتي اشتريت على عرض سابق 3 جلنات من كارفور بدينار للتر فعندي للشهر
زبدة (بالثلاجة) في 5 اصابع بس بدي كمان بستهلك زبدة كتييييير
شورتنغ (كرسكو) في علبة مفتوحة
سمنة حيوانية في علبة مفتوحة
سمنة نباتية في علبة مفتوحة
سمنة بلدية (بحبها بالعزايم) في علبة مفتوحة
زيت سمسم في زجاجة مفتوحة بالثلاجة + زجاجة مسكرة بالخزين

مواد اضافية وغير اساسية للي بيحب الطبخ:
بندورة مجففة في 3/4 كيس
قرشلة يابانية (بانكو) 2 باكيت مسكر
نوري (للسوشي) باكيت
كسكسي مغربي 3/4 باكيت
كينوا باكيت
ولقيت باكيت معكرونة الارز الشفافة وكمان ورق الارز اللي بنلف فيه ال rice spring rolls
اعشاب هامة وبكميات: في من كل الانواع
ميرمية
زعتر ناشف
زعتر اكل
دقة
نعنع ناشف

لوازم الاولاد:
حليب 5 علب (انا بشتري بالكرتونة ال 6 علب كبار مع بعض على عرض دائم بكارفور باقل من دينار للعلبة نوع اجنبي)
كورن فليكس انواع (في انواع للحلو مثل الرايس كريسبز وانواع بالشوكولاته والفواكه للاولاد بس رح اضطر اشتري كمان اكيد خلال الشهر)
اشياء زاكية للمدرسة بدنا ضروري للاسبوع الجاي


بهارات واعشاب: كتيرة وصعب اعددها بس بحب تكون كلها عندي وبحب اعمل خلطاتي الخاصة للتاكو وغيره واذا بتابعوني رح اضل احط وصفات من هون لآخر السنة بخصوص هالموضوع)

حواضر: في من كل الانواع مرتبان كبير 
مكدوس
زيتون اسود
زيتون اخضر
مخللات

الثلاجة:
حواضر للفطور والعشا: لبنة بقية علبة وسط بتكفي للاسبوع، اجبان في عدة انواع للساندويشات وجبنة فتة، لحوم باردة (بقية علبة مرتديلا)، زبدة 5 باكيتات اصابع، بيض في حوالي 28 بيضة
كريما طبخ لا يوجد
كريما خفق علبة مغلقة وبقية علبة مفتوحة حجم لتر
جبنة بارمزان بقية مثلث طازج وبقية علبة مفتوحة

طبعا اسبوعيا خضار وفواكة بس لازم يكون فيه (بصل، ثوم، بطاطا، وليمون وبندورة وخيار بالثلاجة)
في ثوم وبطاطا وبندورة وليمون بس بدنا (خيار وبصل وخضار اخرى حسب المنيو) وفيه بالثلاجة جزر وبقايا ملفوفة وبروكلي و2 حبة تفاح ورمان و5 برتقال) ولازم اجيب موز (مهم جدا) وبصراحة انا جنبي خضرجي واي نواقص خلال الاسبوع بشتريها منه
الفريزر:
عشان اسهل حياتي بالطبخ برضه وجود فريزر فيه مونة بيساعد...بفرزر بيتي عادة في:
لحوم ..انا عادة بشتري 1/2 خروف اول الشهر (وانا بطبخ كتير ومرات بضطر اجيب كمان اذا في عزومة) وبطلب من اللحام يفرم جزء ناعم ويخلطة بعجل وجزء راس عصفور للطبخ وجزء بعظم للمنسف والمقلوبة وغيره رح احتاج اوصي لانه اول الشهر بس باقي 4 باكيت مفرومة وباكيت بعظم
لحوم اخرى: ستيك او لحم عجل مكعبات او نقانق او هوت دوغز او سمك (5 شرائح سلمون، باكيت سمك هامور اشتريته من المحيط للقلي، 3 ستيك كبير لاكلة صيني او اشي من هذا القبيل، علبة بيق مكعبات لليخنة، علبة نقانق بلدي و1/2 باكيت جمبري مسلوق)
دجاج  3 صدر مسحب
جبنة موزريلا (بجيب بلوك كبير وببشره وبفرزة باكياس) ما فيييييييييييييييييي (لازم لازم لازم...قلت لازم كفاية؟ ...هادي الجبنة اساسية بمطبخي...ههه
جبنة نابلسية مغلية (باكياس) بس بدي بطلع كيس وبغليه غلوة وبحليه وبتبروير بالثلاجة في عدة اكياس من خزين شهر 4 موسم الجبنة
بازيلا 2 كيس
حمص وفاصوليا بيضاء مسلوقين 4 اكياس حمص، 6 فاصوليا بيضاء
اي خضار بحب احتفظ فيها بعد الموسم مثل القرع المسلوق والمهروس او البطاطا الحلوة 2 كيس من كل نوع
بامية وملوخية (بجيب بس بدي اطبخهم) ما في
فواكة مثل الفراولة او البلوبري او الفواكه المشكلة في 5 باكيتات مشكل على عرض من السيفوي ب 99 قرش للباكيت وباكيت رازبري من select
خبز في توست (نوع جديد من سويتز شفته بالسي تاون  ب 1.5 بس بالحليب طري كتير حسيته مثل النوع اللي كنت اشتريه باميركا فرح اجرب واخبركم وكمان صار فيه ميني تارت حلو ومالح ب 1.75 للعلبة من سويتز برضة بالسي تاون بس مش عارفة اذا موجود بكارفور اذا لقيت بخبركم) وكمان في فرنسي وتورتيلا باكيت بس لازم اجيب من خبزنا 
وما حكيت عن العجائن الجاهزة بس عادة بيكون عندي بف باستري او سبرنغ رولز وفي باكيت بف وفولفون (بف مقطع دوائر)
وكمان عندي بطاطا مقلية 3/4 كيس كبير و 3 تبروير صغير مشمش معقود لقمر الدين (المهلبية من موسم المشمش) و5 اكياس ورق دوالي وتبروير سبانخ مطبوخ  (انا عندي فريزر كبير وبتمنى اجيب كمان واحد ههسسسسسسسسسسسسس اوعكم تحكوا لخالد!!!! ههههههه)

وزي ما شفتوا لاني متعودة اعمل هيك دايما في عندي اغراض آخر الشهر وبكميات ممتازة وبالتالي لو ما في ميزانية هاد الشهر وقررت استعمل الاشياء اللي عندي بس، بقدر اعمل اشياء كتييير وبسهوله واذا سألتوا حالكم انه منال حكت عن اكتر من محل بتشتري منه وهادا الاشي مش مناسب لناس كتيير لانه مش الكل عنده الوقت او المواصلات ليروح وييجي...صحيح... بس الواقع هي صدف لانه انا بعمل التسوق الاسبوعي عادة من كارفور بحكم انه الاقل سعرا وبيعمل عروض كتير بس جنبي السي تاون وبلاقيه مسعف بكتير اشياء خاصة الدجاج (بحسه كتيير طازج ونظيف من عنده) ولما امر الا ما اشوف العروض واحاول استفيد منها. اما select والسيفوي فعادة ممكن اروح مرة بالشهر لاشوف العروض وصراحة selectممتاز زي ما حكيت ببوست سابق باشياء غالية من اميركا بس عنده ارخص كتيير والسيفوي بحط اشياء على العرض مرات بتكون فظيعة مثل البيكان اللي حكيت عنه سابقا فهو حظ يعني مرات بروح ما بلاقي اشي بس هو مشوار بتسلى (وآه انا من النوع اللي بيتسلى بالتسوق للاكل كتييير :)) 
وقررت اني لما اروح على اي سوبرماركت رح احط على المدونة وعلى الفيس بوك وتويتر العروض اللي بلاقيها عشان اذا بتقدروا تروحوا :) اتفقنا :)

هلأ بنيجي للمنيو الاسبوعية في ضوء الاشياء المتاحة وقائمة الاحتياجات للاسبوع...اولا المنيو ابتداءا من اليوم السبت 11/2 للجمعة 11/8 ورح اشارككم قد ما اقدر من الوصفات وما رح اذكر وجبة الفطور في المنيو الا يوم الجمعة لانه هي عادة  ساندويشات حواضر للاولاد او كورن فليكس(للاسف انا مش من نوع الفطور الا يوم الجمعة...غلط بعرف)
السبت 11/2 
الغداء عند اهلي اليوم بس انا رح اعمل سلطة الشمندر بالفتة و بروسكاتا الفليفلة المشوية (رح احط الوصفة بكرة ان شاء الله) وشوربة بروكلي وحلو كعكة الليمون باللبن والفستق الحلبي)
العشاء ساندويشات بالتوست (احتمال)

الاحد 11/3
الغداء معكرونة بيني بصوص الفليفلة الحمراء المشوية (باكيت لحمة مفرومة من الفريزر و2 باكيت بيني من الخزين) وخبز بالثوم من الخبز الفرنسي والزبدة ومتبل كوسا باللبن (تركي) (عندي 3 كوسا)
العشاء بوريتو النقانق والبطاطا (من النقانق بالفريزر وباستخدام خبز التوريتلا الموجود)

الاثنين 11/4
الغداء سلوبي جوز (ساندويشات) (من اللحم المفروم بالفريزر) وبطاطا مقلية (من الفريزر)وسلطة سيزر عندي خس بالثلاجة
العشاء حواضر (الا اذا جد اشي ببالي)

الثلاثاء 11/5
الغداء يخنة اللحم بخل البلسامك (باستخدام لحمة البيف من الفريزر ) وارز ايراني وشوربة الجزر والبرتقال
العشاء بيتزا مارجريتا

الاربعاء 11/6
الغداء سمك بالكزبرة والزنجبيل (باستخدام كيس الهامور) وارز بالكاجو والبرتقال وسلطة الجمبري بالافوكادو
العشاء حواضر (الا اذا جد اشي ببالي)

الخميس 11/7
الغداء دجاج الا سلطان وارز مصري معمر
العشاء كاساديا السبانخ والفتة  (من تبروير السبانخ بالفريزر)

الجمعة 11/8
الفطور بالمزرعة مع اصدقاء النا ان شاء الله وعلى الاغلب حمص وفول ومناقيش واشي هيك :)
الغداء عند اهلي اليوم بس انا رح اعمل سلطة الشمندر بالفتة و بروسكاتا الفليفلة المشوية (رح احط الوصفة بكرة ان شاء الله) وشوربة بروكلي وحلو ما قررت لسه)  آسفة عشان اريح حالي من الكتابة نسخت بدون الانتباه...بما انه بالمزرعة فعلى الاغلب اشي سريع برضه ولسة ما قررت بس ممكن سلطة واسباجيتي
العشاء حواضر (الا اذا جد اشي ببالي)

الحلويات المقترحة للاسبوع: كريم كراميل من الباكيتات الجاهزة، كعكة الليمون باللبن والفستق الحلبي لاهلي، كعكة التفاح بصوص الكراميل لصاحبتي رايحة عندها يوم الثلاثاء ان شاء الله، سينامون رولز ليوم الجمعة للفطور، ترايفل لانه عندي زوايد كيك)

مكسات للتحضير هالاسبوع: طحين الكيك، طحين ذاتي التخمير، هوت تشوكلت
خبز خلال الاسبوع: تورتيلا للكاساديا

قائمة الاحتياجات للاسبوع:
خضار وفواكه: موز، نوعين فواكة ما عدا برتقال لانه عندي، بصل، افوكادو حبة، كزبرة، خيار، فليفلة خضراء، فليفلة حمراء
للثلاجة: زبدة، جبنة موزريلا، جبنة شدر ومونتراي جاك، مرتديلا وروست بيف
للخزين: اشياء زاكية للمدرسة (تحشيش كيف بنسميها اشياء زاكية كأنه الاشياء التانية مش زاكة ههههه)، حليب فراولة صغير، بيبسي ودايت ببسي، 
خبز: خبز برغر وخبز عادي 
لحوم: بوصي للاسبوع الجاي ان شاء الله لانه الامور جيدة هاد الاسبوع

اما الميزانية المخصصة للاغراض فانا رح احاول انشن على 100 دينار بالاسبوع شاملة مواد التنظيف وحليب لهارون وحفاظات (آسفة بس كنت لازم احكي :) ) و 20 دينار مخصصة للتموين اذا فيه عروض (والله بس افكر بالناس اللي راتبها يدوب يوصل 400 دينار بالشهر باجي بدي انجن بس الحمد لله والله يعين الناس لانه اللي عنده عيلة وبدهم ياكلوا منيح يدوب يكفي وبزكركم اني بطعمي بالمعدل 5 -6 افراد اذا اجت عنا حماتي) رح اخبركم اديش صرفت يوم السبت الجاي ان شاء الله (يا رب يا رب التزم بالميزانية....!!!!!!)...بكرة ان شاء الله رح نحكي عن بناء الخزين وكيف بيصير على مدى الاسابيع وكيف تعملي لتبني المخزون شوي شوي وعلى الميزانية)

اما وصفة اليوم...بعرف طلعت روحكم من قد ما برمت فهي الانشلادا بالدجاج والفطر والسبانخ وصوص الكزبرة...جديدة ولذيذة...

انشلادا بالدجاج والفطر والسبانخ وصوص الكزبرة
المقادير:
للحشوة:
4 - 6 كوب سبانخ مقطع ومسلوق او معمول سوتيه ليذبل ومعصر من الماء بعد النضج
1/2 علبة فطر طازج مفروم ناعم
بصلة مفرومة ناعم 
سن ثوم كبير مدقوق
ملعقة طعام زيت زيتون
2 صدر دجاج مسلوق او بواقي دجاج مسلوق بدون بهارات عربية
ملح، فلفل اسود
كوب جبنة مونتراي جاك مبشورة او شدر بيضاء
10 ارغفة تورتيلا
الصوص:
1/2 1 كوب كريما
1/2 1 كوب حليب
1/2 1 ملعقة كبيرة نشا مذابة بملعقة طعام ماء
1/2 ملعقة صغيرة بودرة الثوم
ملح، فلفل اسود
1/2 ضمة كزبرة مفرومة ناعم

للوجة:
كوب جبنة شدر مبشورة

الطريقة:
يوضع الزيت في مقلاة كبيرة ويقلب البصل ليذبل
يضاف الثوم والفطر وتقلب
يضاف الدجاج والسبانخ
تملح وتبهر 
تترك لتبرد ثم تضاف الجبنة
توزع التورتيلا على الارغفة وتصف بالصينية
تحضر الصوص بوضع الحليب والكريما وبودرة الثوم على النار لتغلي من الجوانب
يذاب النشا بالماء ويضاف لتسمك
ترفع وتضاف الكزبرة المفرومة
تسكب فوق التورتيلا وترش الجبنة على الوجة
يدخل للفرن على حرارة 350 ف او 175-180 مئوي مدة 20-25 دقيقة لتسيح الجبنة
يقدوم مع صحن سلطة او جواكامولي...
صحتين وعافية







4 comments:

  1. كتير بستحي اضل اعلق كل مرة بس بصراحة ما قدرت ما اعلق عا هاد البوست!!!! ماشالله عليكي فعلاً مجهود رائع ,,,مش رح احكيلك غير انو الله يجعلو في ميزان حسناتك,,,انو الواحد يعطي من وقتو وجهدو وتجربتو للناس بس عشان يستفيدو بصراحة بعتبرها قمة الرقي والعطاء,,,,انا معلمه ,,,بعرف ايش يعني تعطي من وقتك عشان تنشري علم just for the pleasure of it ,,,شكراً منال

    ReplyDelete
  2. اوعك تحكي هيك..اصلا بتمنى الكل يشارك ويغلق واللي عنده اضافة او تجربة يكتب...فاجوكي استمري بالقراءة والتعليق عشان تشجعيني :) لازم اعزمك عفنجان قهوة...لاااااازم...عشان يكون اللقاء شخصي على قد ما حبيتك يا سمية...الله يجبر بخاطرك :)

    ReplyDelete
  3. كل الشكر الك وبصراحة بالرغم من انو منظمة بامور شراء الحاجيات الا انو اتعملت منك اشياااء كتتتير
    موفقة يا رب

    ReplyDelete
  4. شو حلو الحكي والنصائح الموجوده والحلو اكتر انه ذاكره الاماكن اللي بتتسوقي منها ولسلوبك دايما شيق وممتع الله يجزيكي كل خير

    ReplyDelete