Friday, November 15, 2013

كيف تخططي لعزومة بدون جنون ووصفة شوربة البروكلي من مطعم بانيرا بكندا

سؤال تاني مهم انسألته وبنساله كتير وهو كيف تعملي عزومة بدون ما تنعجقي وينهد حيلك وتسبحي في عالم من الفوضى العارمة واللي عادة بتجتاح المطابخ بالعزايم وكمان تقدري تستمتعي مع الضيوف بدل ما تقضي الوقت بالمطبخ....الجواب هو نفس الكلمة الذهبية اللي حكينا عنها وقت الميزانية...التخطيط المسبق وبالتخطيط مهم انه تهتمي بالامور التالية:

1. توزيع الشغل على عدة ايام خاصة اذا العزومة كبيرة مشان ما تتعبي كتير يوم العزومة وتكوني متل الجاجة المقطوع راسها بتفرفر بكل مكان!!!! و
2. توزيع المهام على اشخاص يساعدوكي بالانجليزي Delegation

خلينا امشي معكم خطوة خطوة لما بيكون عندي عزومة سواءا ل 2 او 60 بتبع نفس الاسلوب لانه المبدأ واحد بس اللي رح يختلف وقتها هو امتى ابدأ بالشغل بعزومة ل 60 وطبيعة المنيو اللي بدي اقدمها...

قبل كل شي برضه بجيب ورقة او دفتر صغير وبسجل عليه كل شي وبفضل دفتر لانه ممكن ترجعيله بعزومة تانية ويكون كل اشي مدون وما ترجعي تعيدي الشغل

الخطوة الاولى: تحديد عدد المدعوين ويوم العزيمة
وعادة زوجي بيتولى هادي المهمة الا اذا جمعة ستات...وهيك بخفف على حالي جزء من الشغل

الخطوة التانية: تحديد مكان العزومة
يعني اذا بالصيف بتحبي تعمليها بالجنينة اذا عندك واحدة او على السطوح اذا فيه طلة حلوة او بغرفة السفرة جوة البيت. وحاولي تفكري بالاسهل عليكي...يعني اذا فيه كتير طلعي وفوتي اذا بدك تعمليها بره حتى لو الطقس حلو بعمل الاكل جوه وممكن الحلو برة..

الخطوة الثالثة: ترتيب مكان الجلسة
وهاي الخطوة انا عادة ما بقلق عليها كتير اذا كنت رح استضيف الناس بغرفة السفرة والعدد على قد الكراسي . بس اذا كان العدد كبير وما بيكفي القعدة حولين الطاولة لازم افكر بشكل القعدة. زمان كنت اغلط غلطة اني احط الاكل على السفرة والكبار يقعدوا والصغار ينحطلهم طاولة جانبية بس اللي كان يصير انه تعم الفوضى لما الصغار بدهم يسكبوا وبيصيروا بدهم يمدوا ايديهم من فوق الكبار القاعدين والواحد ما بيرتاح بالقعدة فلقيت الحل الاحسن هو اني اعمل بوفية على جنب (اشتريت طاولتين من النوع اللي بنضب من صويلح بمبلغ بسيط) بحط عليهم شرشف مرتب فما ببينوا وعليهم الاكل وبطاولة مدورة برضه عالية شوي عندي من اول بحط الصحون والمعالق وهيك الكل بيسكب والكبار بيقعدوا على الطاولة الكبيرة باريحية والصغار على طاولة جانبية او بالمطبخ بدون اي حد ينزعج) الترتيب هاد بعمله يومين قبل العزومة ومرات كنت ارسم زي مخطط كيف بدها الطاولات تكون. عمل هاد الترتيب قبل العزومة بيومين مش بس بوفر وقت وجهد وكمان بعطيطي المجال تغيري او تبدلي بالترتيب اذا ما عجبك او حسيتي انه مش زابط من غير ما تنعجقي يوم العزومة نفسها.

الخطوة التالتة: المنيو 
وهون بيت القصيد...تحضير شو بدك تطبخي هو  اهم خطوة ومرات بعملها قبل بثلاث اربع ايام من العزومة (وطبعا في عزايم بآخر لحظة وما في رفاهية الوقت  رح احكي شو بعمل بهيك حالة بعدين). تحضير المنيو مهم فيه مراعاة الامور التالية:
1. التنويع 
يعني يكون فيه
- مقبلات
-  سلطات مناسبة لنوع الاكل الرئيسي اللي بدك تقدمية (مثلا عاملة ارز بخاري بده سلطة عربية واعملي سلطة تانية نوع غربي مثلا بس لازم سلطة عربية ولبن مع هيك اكلة)
- الاكل الرئيسي وهون مهم برضه تفكري بالمعزومين اذا بتعرفي انه حد ما بياكل لحمة وبدك تعملي منسف والمنسف سيد السفرة بس لازم تعملي اشي للضيف اللي ما باكل لحمة والا ليش عزمتيه او حد عنده حساسية من نوع معين...الخ. كمان مهم انه الاكل يكون مش كله رز يعني مش تعملي محشي وارز بخاري ومقلوبة مع بعض...لازم يكون فيه اشي رز( مثلا كبسة)، اشي معكرونة (مثلا لازانيا)،  اشي مع ارز ابيض (انا بعمل نوعين اشي بلحمة مثلا ستروغونوف واشي بدجاج مثل ستير فراي (صيني)  ، صواني مثلا شرحات بالخضار والبطاطا...الخ (هلأ مش شرط يكون فيه كل هاد بس الفكرة انه تنوعي ويكون فية ارز، لحمة، دجاج، معكرونة...وفيه ناس بتحب سمك.
- الحلو: مهم انه يكون مناسب للطقس (بارد بالصيف) ومنوع...يعني اشي بشوكولاته، اشي مش بشوكولاتة (لانه فيه ناس ما بتحب الشوكولاتة) وفواكة (سواءا بطيخ وشمام بالصيف) او صحن فواكة او سلطة فواكة

2. الميزانية
وكتير منا بيصير رح يغمى عليه من تكاليف العزايم وما بلومه لانها بتكلف كتير...بس اذا بتتبعي نظام بناء الخزين رح تكتشفي انه كتييير رح يوفر ونصيحتي هي:
1. فكري شو في عندك اشياء اصلا ممكن تستفيدي منها بدل ما تروحي وتشتري...يعني عندك زوايد كيك...خلص واحد من اطباق الحلو ترايفل. عندك حمص معلب بعمل صحن حمص كنوع مقبلات...عندك باذنجانه اشتريتيها قبل يومين على عرض بعمل متبل كمقبلات..عندك ارز بسمتي..بعمل برياني...وهكذا
2. فكري كيف ممكن تمطي الدينار...شو يعني؟!!!! يعني تكلفة  صينية ستيك كتتتتير اكثر من تكلفة ستيك مقطع ليدخل بعمل ستير فراي صيني او ستروغونوف لانه بدك كمية ستيك اكبر بصينية الستيك (على الاقل حبة لكل مدعو) بينما لما يتقطع الستيك بالطول ومع الخضار بيبرك وبكلف اقل. كمان مثال تاني..بدك تعملي صنف باللحمة بس الميزانية لا تسمح بسدر كبسة وقطع لحمة كبيرة عليه فبعمل كباب هندي مع ارز وكمان طباخ روحو (قطع لحمة راس عصفور مع خضار) يعني صنفين لحمة مع طبق ارز ابيض بتكلفة اقل من الطبق الاول وتنويع كمان)
3. شو على العروض وشو بالموسم (واظن هادي النقطة واضحة وحكينا فيها كتير...)
4. شغل البيت دايما اوفر....ما بدها شرح كتييير...صح من برة بترتاحي شوي بس اذا الميزانية قليلة شغل البيت بيربح غير انه ضيوفك بيشعروا انك مغلبة حالك

3. التحضير المسبق
يعني رتبي المنيو بشكل يكون فيه اشياء بتنعمل قبل بوقت من غير ما يؤثر على الطعم ...مثلا اللازانيا بتعمل قبل بيوم كاملة من غير خبز وبتنحط بالثلاجة وتاني يوم (يوم العزومة بتتطلع عشان تصير بحرارة الغرفة وتاخد وقت اقل بالفرن) الحلو عادة اغلبه احسن قبل بوقت (انا بختار حلويات قبل بيوم مثل التشيز كيك والكيك والترايفل والكريم كراميل وغيرها). مثال تاني بدك تعملي شاورما بنقع اللحمة او الدجاج بالتتبيلة قبل بيوم. سلطة (بحضر كل اغراضها بوعاء بلاستيك وبدون غسيل وبالثلاجة وبس بطول وبغسل وبفرم يوم العزومة). متبل...بشوي الباذنجان قبل بيوم وبعمله الصبح وبحطه بصحن التقديم مع الزينة وبغطيه ببلاستيك وبالثلاجة بس بطلعة قبل التقديم بنص ساعة وخلصت فكت... بدي اعمل ستروغونوف وملوخية (كله ممكن يتجهز الصبح وبس يتسخن وما بيصرلوا اشي بيطلع روعة) فاختاري اشياء ما بدها آخر وقت...

4. وسع الثلاجة والفرن
ما في اسوأ من انك يوم العزومة ما تلاقي الا والفرن عم بيموت والاكل ما عم بيستوي لانه في 7000 صينية بالفرن!!! طبعا مستحيل بس القصد انه نوعي المنيو بحيث يكون فية اشياء جوة الفرن واشياء على الغاز من فوق. وكمان الثلاجة...يعني حلو بده تلاجة وحلو ما بده...وهكذا..

5. الوصفات
جمعيها كلها بالدفتر اللي بتخططي فيه عشان برضة ما تنجني لانه سبحان الله كيف بتضيع الوصفة يوم العزومة ما بتعرفي ليش؟!!!

الخطوة الرابعة: قائمة المشتريات
عملتي المنيو هلأ لازم قائمة المشتريات...وهون بتحطي كل وصفات الاشياء اللي قررتي تعمليها وشو بتحتاج منك وايش عندك وما عندك لانه ما في اسوأ من انك تكوني معجوقة بالطبخ وتلاقي ما في غرض من مكونات طبخة...وهاتي تلفونات مع جوزو واللي بيصير يقولك ضروري هلأ!!! او بدك تروحي تشتري وتضيعي وقت انت بحاجه اله والعجقة..الخ. انا عادة بحضر قائمة المشتريات بعد المنيو مباشرة (على الحارك) وبقسم المشتريات على ايام احيانا لانه فيه اشياء لازم تنجاب فرش مثل الخبز او ثلج للايس بوكس وهاي المهمة بوكل فيها جوزو وبقلوه قبل العزومة بيوم عشان نفسيا يحضر حاله...هههههه

الخطوة الخامسة: قائمة الاعمال اليومية
كل يوم شو بدي اعمل...هاد الاشي كتييير بريح...العزومة الخميس واليوم الاحد..فبقسم يوم الاثنين بدي اعمل المنيو وقائمة المشتريات. يوم الثلاثاء بعمل بشتري الاغراض وبرتب القعدة وممكن انقي اذا فيه اشي بده تنقاي وعادة اذا عندك حد يساعد بيكون منيح يعني البنت اللي عندك خليها تنقي وانت بترتبي القعدة . يوم الاربعاء بعمل الحلو وبنقع اللي بده نقع..الخ وبرتب الصحون والادوات والكاسات وصحون التقديم ومعالقهم وعادة بحط ورقة على كل صحن تقيم لشو بده ينحط فيه. يوم العزومة كل اشي بمكانه (القعدة محضرة والحلو انعمل والصحون مرتبة وجاهزة بس بدي اطبق الاكل واحطه على السفرة)

الخطوة السادسة: شراء الاغراض
شراء الاغراض حسب قائمة المشتريات وعادة قبل يومين كله من خضار ولحوم واي شيء آخر لانه بدي احضر قبل بوقت وبدي يكون كله موجود

الخطوة السابعة: التحضير المسبق ويوم العزومة
التحضير المسبق لما يمكن تحضيره وهادا حكينا عنو سابقا...اللي بده تنقاية واللي بده نقع واللي بده تجهيز كامل...وهون بيفيد كتير تعملي قائمة الاعمال بكل يوم اللي حكينا عنها وبس تشطبي ما يتم انجازه لتعرفي وين وصلتي

نقاط ممكن تسهل عليكي اي عزومة:
1. استثمري بشراء ايس بوكس  تيرموس كبير للمي الساخنة وتيرموس للمي الباردة. ليييييييييششششششششششششش؟ لانه بحط المي اباردة مع كاسات على جنب يوم العزومة ومن الصبح وما بنجن كل شوي لما يجوا الضيوف هاتي مي هاتي مي. ولانه بغلي المي السخنة قبل بساعة من العومة وبجهزها مع انواع الشاي والنسكافيه وبهيك ما بنجن وانا اعمل الشاي وبدي احط الحلو بنفس الوقت...اللي بيصير اني بحط الحلو وبقول للضيوف تفضلوا وبوقف جنب طاولة الشاي وبيأل كل ضيف شو بحب او ياسمين وسلطان بيتولوا هادي المهمة Delegation. والايس بوكس لانه ما بضطر احط العصائر والمشروبات الغازية لتاخد وسع بالثلاجة وبس بحطها قبل بساعتين بالايس بوكس مع كيسين ثلج وخلصت فكت .
2. جمعي اولادك واعطيهم مهام قبل العزومة (طبعا اذا كباركفاية ليساعدوا) وهيك بيتحملوا مسؤولية وبيتعلموا وانت بترتاحي شوي.
3. اعملي قوائم مقترحة للعزايم بلحظة صفا...يعني اذا ما عندك شغل وهادا اشي ناااااااادر..ممكن تعملي مجموعة من القوائم او المنيوز المقترحة لعزايم وهون بيفيد اذا عملت القائمة الرئيسية اللي حكينا عنها بالتخطيط للخزين وتاخدي منها.
4. اختاري اكل سهل وممكن تجهيزه قبل بوقت وانت ممتازة فيه...يعني ما تجربي وقت العزومة باكلات جديدة عشان المقالب والذي منه...

واخيرا...

تذكري انه العزومة المفروض تكون لناس بتحبيهم وبيتسمتعي انهم ينبسطوا عندك وتنبسطي فيهم مش تكرهي حالك وتقولي بحياتي ما بعمل عزايم مرة تانية!َ!!!!

و ENJOY 

اما العزايم اللي بآخر لحظة فنصيحتي هي انه اذا عملت القوائم المقترحة فرح تلاقي اختيار الاكل سهل ولانه ما في وقت كتيير اختاري اكلات سهلة تتجهز من الصبح مش آخر لحظة وزيدي الكمية بدل النوعية..يعني ضيوفك كتار وما في وقت لانواع كتير فبعمل اكلات تبرك مثل سدر منسف، كبسة مع دجاج، سدر اوزي وسلطات وطبختين مثل ملوخية و اشي غربي للشباب والحلو فواكه الموسم ونوع حلو سريع وخلص..واقعدي مع جوزك وقوليلوا بالله عزايم آخر وقت لا تكتر من المعازيم مشان ما انجن واجننك معي!!!! مهمة هاي النقطة!!!

طيب وبعد كل هالبرم...خليني اشارككم وصفة اليوم وهي من مطعم بحبه كتيييير بكندا بقدم كتيير اشياء منها الشوربات بخبزة وانا ما عندي وقت لاعمل الخبزة بس عملت الشوربة (رائعة) وببقى اعمل وصفة شوربة تانية بخبز واشارككم فيها...

شوربة البروكلي من مطعم بانيرا
المقادير:
3 كوب مرق دجاج
كوب جزر مبشور
بصلة صغيرة مفرومة
2 سن ثوم مدقوق
واحد راس بروكلي مقطع قطع صغيرة الى وسط
ورقة غار
3 ملعقة طعام طحين
3 ملعقة طعام زبدة
1/4 ملعقة صغيرة بودرة الثوم
1/8 ملعقة صغيرة ريحان ناشف
1/8 ملعقة صغيرة بهار
1/8 ملعقة صغيرة جوزة الطيب
فلفل اسود وملح
كوب كريما
كوب جبنة جودا او ايدام (موجودين بكل السوبرماركتات)
كوب جبنة شدر

الطريقة:
في قدر كبير على النار نضع مرق الدجاج والبروكلي والجزر والبصل والثوم وورقة الغار ونتركها لتغلي ونغطيها 1/4 ساعة لتستوي الخضار ونرفع ورقة الغار
في مقلاة صغيرة نسيح الزبدة ونضع الطحين ونحمصه قليلا ثم نضيفة للشوربة مع التحريك السريع
نضع كل البهارات 
نضيف الكريما والجبنة بنوعيها ونتركها لتشارف على الغليان بدون ان تغلي ولتذوب الجبنة وتقدم مع رشة فلفل احمر على الوجة وصحتيييين


5 comments:

  1. مسا الخير منال بتعرفي وانا بقرا كلامك بدعيلك ..انا ما بعرفك شخصيا بس بجد لما الانسان يكون عنده اشي خاص فيه يكون مصدر رزق اساسي او حتى لو مش مصدر رزق ويشارك الناس فيه ويجاوب على اسالتهم بكل هدوء وطبيه قلب وزوء هالانسان هاد بكون متل نسمه العطر وين ما حلت بتترك ريحه حلوه من كل قلبي بتمنالك التوفيق وكل ما اطبق منك وصفه او اقرا بوست بدعيلك ..موفقه بحياتك والله يحميكي انتي واسرتك ..ورح اخبرك بنتائج تطبيقاتي اكيد بكره رح يكون تطبيق تشيز كيك الهريسه ادعيلي ...منار

    ReplyDelete
  2. والله افكارك حلوة بالتنظيم للعزايم ولعمليات الشراء وترتيب يوم العزومة لان فعلا يوم العزومة بكون يوم صعب
    بصراحة هي افكار كلنا بنعرفها بس بنتعاجز نطبقها لحالنا وبنحب دائما نسمعها من غيرنا
    شكرا الك

    ReplyDelete
  3. ما شاء الله عليكي يا منال بتعطي من كل قلبك و كل تفصيله بتفصيلتها الله يجزيكي الخير افكار رائعه ووصفة الشوربه شكلها كثييييييير زاكيه . شكرا إلك و الله يباركلك و يبارك فيكي

    ReplyDelete
  4. تسلمي شكرا الك وللمتابعة :)

    ReplyDelete