Friday, November 1, 2013

القائمة الرئيسية للخزين الجيد وسلطة السبانخ الخضراء

متحمسة كتير على المدونة للشهر القادم لانه ببالي مشاريع ومشاركات كتيرة متعلقة مش بس بالطبخ... اتمنى اكود قد التحدي....

اولا.. عندي هوس بموضوع التنظيم واللي بيسمع بفكرني منظمة كتير والواقع اني وبالرغم من محاولاتي المتكررة الا اني اميل الى اني ازوغ وامتوه احيانا وكما يقول المثل الغربي "اقع من فوق العربة" ... واللي بيصير هو اني ببدأ وما بكمل او برتب وبنظم وبعدين وبحالة استعجال بترجع حليمة لعادتها القديمة او انه افراد الاسرة المحترمين ما بيحافظوا على اللي رتبته وبرجعولي الامور مخربطة واسوأ مما كانت...وبالرغم من اني بعرف القاعدة الهامة جدا في التنظيم والمتعلقة بانه البساطة وعدم وجود اشياء كتيرة عند الانسان هي احد اهم العناصر اللي بتساعده على التنظيم..فكل ما زادت الكراكيب كل ما زاد احتمالية ترجع الامور تتدهور مرة تانية...الا اني اميل لعدم التخلص من الكراكيب بسهولة بسبب علاقتي "التعلقية " فيهم وشعوري باني رح احتاجهم يوم ...

وبما اني الي فترة بالهالقصة وسعيدة اني شاركتكم قصة تعزيل الملابس الصيفية والشتوية واللي وبكل فخر لسة محافظة على ترتيب الخزانة للآن...وانجزت ترتيب مكتبي وغرفة الخزين او المونة واللي رح يكونلي وقفة عندها بس اقرر شو المشروع اللي ناويالها عليه...وهي غرفة صغيرة فيها خزاين ورفوف بس لونهم عسلي (اااخخخخخ) وفورمايكا كمان...!!! وموضوع تغييرهم مش بالوارد حاليا لانه في اشياء اهم...لازم افكر بحل لتغيير المنظر...ببقى اشارككم صورة خاصة هالايام لاني عزلتها منيح وصار منظرها احسن بس لسه بدها شغل...احد الافكار هي استعمال ورق لاصق بس رح يتبهدلوا الرفوف وما رح يرجعوا زي ما كانوا...فعلى الاغلب رح استعمل ورق مشمع بنقام اذا ما بدي اياه بس يكون حلو ومناسب...بنشوف...

الاشي التاني العزيز على قلبي...ولا الثالث؟!!! والله ما انا عارفة في كتير اشياء بحبها...هههه...المهم الاشي الثاني اللي بحبه هو موضوع التوفير في شراء اغراض البيت المتعلقة بالاكل بالذات...ومع انه الموضوع صعب هالايام مع رفع الاسعار...وبعرف برضه اني مش كتير التزمت فيه من قبل وفشلت فشلا ذريعا قدامكم...بس بداية جديدة لشهر جديد وبما انه غرفة الخزين تعزلت وعرفت شو عندي وشو ما عندي ومع بداية شهر جديد...قررت اعيد المحاولة وبقدر اكبر من الشفافية معكم..
والامور اللي بدي اخدها بعين الاعتيار هي:
1. الاكل الموجود عندي اصلا بالخزاين والثلاجة والفريزر...وحكينا بهادا الموضوع من قبل وكيف لازم نعمل تعزيل وجرد للموجود مشان ما نشتري كمان اوننتبه على تواريخ الانتهاء وبناءا عليه بشتري اللوازم حسب رقم 2
2. شو بدي اطبخ خلال الاسبوع الجاي: قائمة واضحة بالوجبات اللي بتعمليها...احنا الفطور مش اشي اساسي كعائلة عنا خلال الاسبوع ويقتصر على ساندويشات او كورن فليكس للاولاد بس يوم الجمعة الفطور سوا...اما الغدا فهو الوجبة الاساسية واللي بتنحط على المنيو بالاضافة الى 3-4 اقتراحات لوجبة العشا عشان مرات برضه ما بنتعشى كلنا سوا...وعلى المنيو يضاف كم نوع حلو للعصر بالاضافة الى اي مناسبات مثل اذا جاي عندي ناس...تؤخذ بعين الاعتبار
3. الميزانية...وطبعا هادي بتختلف من بيت لبيت حسب الاشخاص والمبلغ المتوفر والاستهلاك...الخ
4. المخزون الاحتياطي: وهادا برضه موضوع مهم مش لانه الواحد يخزن لا سمح الله اذا في اشي او حرب...لأ ..بس مهم لانه بيوفر على المدى الطويل وبيسعف كتير في عمل الوجبات الاسبوعية واذا يوم احتجت اشي بيكون عندك لانك خططت لبناء مخزون جيد....

عشان احكي عن المخزون الاحتياطي مهم اعملكم قائمة بالاشياء اللي لازم تكون موجودة باي خزين لبيت خاصة للي بيحبوا يطبخوا...
طبعا القائمة مقترحة وممكن تغيري فيها متل ما بدك وحسب احتياجات اسرتك بس بتساعد لتعطي فكرة عامة. و كمان مهم تخصيص مبلغ معين من ميزانية الاكل وتوزيعها على كل اسبوع عشان بكل رحلة تسوق تجيبي اشي من الاشياء الناقصة على القائمة لاضافتها للمخزون او لاستغلال العروض اللي بتكون موجودة احيانا ولا تفوت...اذا كنت مخصصة مبلغ بيساعد انك ما تحسي انك عم تتجاوزي الميزانية لتستغلي العروض واذا العروض ممتازة والمبلغ المخصص للاسبوع غير كافي انا عادة باخد من مبلغ الاسبوع اللي وراه لانه ممكن العروض تنتهي وما يكون فيه حاجة اله للاسبوع الجاي. نقطة تانية مهمة وهي اذا ما في عروض جيدة ممكن تشتري بعض النواقص على القائمة بدون صرف المبلغ كامل لاستغلال المبلغ للمستقبل لما يصير فيه عرض...وهيك بتحوشي...

القائمة الرئيسية (كبيرة وشاملة حسب احتياجات بيتي) لاحتياجات الطعام ببيتي:
غرفة الخزين او المونة اوpantry
اللوازم الجافة:
طحين ابيض
طحين اسمر
طحين كيك (انا بعمله بالبيت ورح اشارككم الوصفة قريبا)
طحين ذاتي التخمير (برضه بالبيت ورح اشارككم الوصفة)
طحين ذرة (كمية بسيطة واختياري للي ما بيستعملوه انسوا الموضوع)
سكر عادي
سكر مطحون
سكر بني
ارز مصري
ارز بسمتي
ارز امريكي (طويل الحبة)
عدس حب
عدس مجروش
برغل ناعم
برغل خشن
فريكة ناعمة
فريكة خشنة
سميد ناعم
سميد خشن
حمص حب
فاصوليا بيضاء (الحمص والفاصوليا عادة ما بيضلوا عند اللوازم الجافة لاني بسلق وبحط بالفريزر فممكن يكرروا بعدين لما احكي عن الفريزر)
فول مجروش
حليب بودرة
فانيلا بودرة
بيكنغ باودر
كربونات الصودا
خميرة
خلطة الشوربة الجاهزة  اضغطي على الاسم للطريقة
معكرونة بانواعها (اسباجتي، فتوتشيني، لازانيا، بيني، معكوفة، زنبرك، شعيرية)
بوشار (مهم جدا عندي بالبيت لانه رخيص وصحي وسهل وسريع...الخ غير اني بحبه كتييير)
قرشلة (صنع بيتي من بواقي الخبز)
قمح ناشف (للي بحب)
ملح

معلبات ومرتبانات:
فول
بندورة
رب بندورة
تونا
فاصوليا حمرا
ذرة
كريمة الذرة
ذرة عرانيس صغيرة (بيبي كورن..برضة اختياري)
حليب جوز هند
حليب مركز محلى اضغطي على الاسم للطريقة بالبيت
مخلل
زيتون اسود
زيتون اخضر
معلبات غير اساسية: بالميتو، كستناء الماء (للاكل الصيني)، براعم الفاصوليا، ارضي شوكي (قلوب او كامل)
عناصر منكهة وصوص:
صويا صوص
خل تفاح
خل ابيض
خل عنب
خل بلسامك
صوص السمك
صوص هويزن (للي بيعمل اكل الشرق الاقصى)
كاتشب
باربكيو صوص اضغطي على الاسم للطريقة
طحينة
مايونيز (بالثلاجة فور فتحة)
ماسترد عادي
ماسترد ديجون
ماسترد بالحب whole grain
فواكه مجففة ومكسرات ولوازم الحلو ومشروبات (كتير مش اساسية بس للاضافة):
تمر
زبيب
كرانبري (برضه للي بيحب)
مشمش مجفف
فواكة مشكلة مجففة (للانجلش كيك)
كرز مجفف
جوزهند غير محلى
لوز
جوز
فول سوداني
سمسم محمص
سمسم غير محمص
حشوات تشيز كيك (كرز ، فراولة، بلوبري) كلها اشياء مش اساسية ابدا بس برضه الي بيحب يعمل بلاقيها مفيدة انها تكون موجودة)
جلو نكهات عادة فراولة وليمون
زبدة الفستق
مربيات
دبس تمر او عنب
قشطة (قيمر)
حلاوة
بسكوت سادة او دايجستف
بسكوت ليدي فنجرز
بسكوت شوكولاته سادة او اوريو
خلطات كيك جاهز (بشتريها بس على العروض لما يكون سعر الباكيت دينار وبستعملها باشياء كتيرة وحطيت وصفات كتير فيها مش بس كيك)
كريم كراميل جاهز
باكيتات عصير مجفف (زي تانج او سكويز)
نسكافيه
نسكافية 3 ب 1
كوفي ميت
كاكاو
كاكاو للشرب (عملته على رؤيا  وهي الفيديو الوصفة بآخره)
شاي عادي
شاي اخضر بالنعنع
شاي ايرل جراي (خالد بيحبه)


(اذا بدي اتشبرق شوي... قد ما هي غالية هالاشياء)
كاجو
بندق
بيكان
صنوبر
جوزهند محلى

زيوت:
زيت زيتون
زيت نباتي
زبدة (بالثلاجة)
شورتنغ (كرسكو)
سمنة حيوانية
سمنة نباتية
سمنة بلدية (بحبها بالعزايم)
زيت سمسم (بالثلاجة فور فتحه عشان ما يخرب)

مواد اضافية وغير اساسية للي بيحب الطبخ:
بندورة مجففة
قرشلة يابانية (بانكو)
نوري (للسوشي)
كسكسي مغربي
كينوا

اعشاب هامة وبكميات:
ميرمية
زعتر ناشف
زعتر اكل
دقة
نعنع ناشف

لوازم الاولاد:
حليب
كورن فليكس انواع
اشياء زاكية للمدرسة


بهارات واعشاب: كتيرة وصعب اعددها بس بحب تكون كلها عندي وبحب اعمل خلطاتي الخاصة للتاكو وغيره واذا بتابعوني رح اضل احط وصفات من هون لآخر السنة بخصوص هالموضوع)

حواضر:
مكدوس
زيتون اسود
زيتون اخضر
مخللات

الثلاجة:
حواضر للفطور والعشا: لبنة، اجبان، لحوم باردة، زبدة، بيض
كريما طبخ
كريما خفق
جبنة بارمزان

طبعا اسبوعيا خضار وفواكة بس لازم يكون فيه (بصل، ثوم، بطاطا، وليمون وبندورة وخيار بالثلاجة)

الفريزر:
عشان اسهل حياتي بالطبخ برضه وجود فريزر فيه مونة بيساعد...بفرزر بيتي عادة في:
لحوم ..انا عادة بشتري 1/2 خروف اول الشهر (وانا بطبخ كتير ومرات بضطر اجيب كمان اذا في عزومة) وبطلب من اللحام يفرم جزء ناعم ويخلطة بعجل وجزء راس عصفور للطبخ وجزء بعظم للمنسف والمقلوبة وغيره
لحوم اخرى: ستيك او لحم عجل مكعبات او نقانق او هوت دوغز او سمك
دجاج (حسب المنيو..اذا بدي اعمل اكلة فيها دجاج بجيب) او اذا على العرض وبنظفه وبفرز
جبنة موزريلا (بجيب بلوك كبير وببشره وبفرزة باكياس)
جبنة نابلسية مغلية (باكياس) بس بدي بطلع كيس وبغليه غلوة وبحليه وبتبروير بالثلاجة
بازيلا
حمص وفاصوليا بيضاء مسلوقين
اي خضار بحب احتفظ فيها بعد الموسم مثل القرع المسلوق والمهروس او البطاطا الحلوة
بامية وملوخية (بجيب بس بدي اطبخهم)
فواكة مثل الفراولة او البلوبري او الفواكه المشكلة
خبز

وبرجع بعيد..هادي القائمة الرئيسية بس ممكن يكون في اشياء تانية او نواقص وهو بيجي شو انت بتحبي ببيتك وشو بتستهلك عائلتك فممكن تضيفي على القائمة اي شي بتحبيه وبيلزم ببيتك واطبعيها وخليها مرجعك لما تعملي الجرد بآخر الشهر

وعشان ما ازهقكم...بكفي هيك اليوم وبكرة بحكيلكم شو الاشياء اللي طلعت معي من جرد الشهر وشو اشتريت للوازم طبخ الاسبوع والمنيو وبعديها وبمقال تاني رح اجكي عن طريقة الشراء للتخزين وخطتي لشهر 11... :)

اما اكلة اليوم فهي سلطة خضراء سهلة وسريعة ومفيدة كتير وزاكية وبما انه موسم السبانخ فانا الاسبوع الماضي اشتريت ضمة ونقيتها وفرمتها وبعد الغسيل والتنشيف دخلت في عدة اطباق (وهون كتير التخطيط المسبق بيساعد) وهي: شوية بالسلطة العادية لاعطاء الفائدة، شوية باكل لهارون، بصينية البطاطا المخبوزة بالسبانخ واللي كتير سعيدة انه في منكم جربها وحبها وشوية بالسلطة اللي رح احطها اليوم واخيرا شوية بانشلادا الدجاج اللي رح اشارككم بوصفتها بكرة ان شاء الله...

سلطة السبانخ الخضراء
المقادير:
كمية من اوراق السبانخ المفرومة والمغسولة والمجففة جيدا
كمية من الخس
مكعبات خبز اما مقلي او توست محمص
جبنة بارمزان شرائح للوجه

للصوص:
ليمون (حسب كمية الخضار)
زيت زيتون (ضعف كمية عصير الليمون )
1 ثوم مهروس
ملح
بارمزان مبشورة ناعم

الطريقة:
تخلط مكونات الصوص
تخلط مكونات السلطة وتضاف الصوص





6 comments:

  1. this is the first time i see u live :) looking great and spontaneous as always
    amazing post ,,,thanx

    ReplyDelete
    Replies
    1. Thank you dear...much love for your continuous support...

      Delete
  2. شكرا لك على وصفاتك السهلة واللذيذه وعلى نصائحك المميزه. بالنسبة لوصفة السبانخ اعلاه هل البارميزان ضروري فيها ام يمكن الاستغناء عنه.

    ReplyDelete
    Replies
    1. شكرا لدعمك وكلامك اللطيف...ممكن الاستغناء عنه بس رح يؤثر على الطعم شوي بس بيطلع زاكي ومنعش وصحتين سلف ...

      Delete
  3. انا بعمل سلطة السبانخ بطريقة تانية
    بقطع بندورة وبصلة شرائح وببشر جزرة وبخلطهم كلهم مع السبانخ وبضيف سماق وليمون وزيت
    بتطلع بتشهي
    بس وصفتك حلوة وشهية والطعم بكوون روعة

    ReplyDelete