Thursday, August 15, 2013

سلطة القيصر بصوص منزلي خالي من المايونيز

اليوم 15 من شهر اب...والمدرسة كان من المفروض تبدأ ب 25 (يعني بعد 10 ايام) بس تأجلت ل 28 بسبب الانتخابات..يعني باقي 13 يوم...بالنسبة الي وبعد عملية التعزيل لخزانة ادوات المدرسة لقيت والحمد لله انه في عنا اقلام ومحايات وبرايات ومساطر وغيرها من الاشياء مثل الكبسات والكلبسات والالوان والطوابع من السنة الماضية...يعني ما رح اشتري حاليا اي شي من هادي الاشياء وعندي رول ورق تجليد بس فما رح يكفي فاشتريت رولين كمان...وزي ما قلتلكم اني اقنعت الاولاد باستخدام شناتي السنة الماضية وسلطان عنده مقلمة شبة جديدة وياسمين قالت بدها مقلمة...فاللي ضايل هو شراء مقلمة ياسمين (الها يمكن 3 او 4 سنين على نفس المقلمة..كتر خيرها!!) ...اما الباقي فهو الكتب والزي (لازم ب 22 ان شاء الله). انتو شو اخبار تجهيزات المدرسة؟؟

وعلى صعيد التعزيل العميق الداخلي فزي ما خبرتكم عولنا خزانة ياسمين وسلطان وهارون...تخلصنا من الاواعي اللي مو مرتبة وحولناها لشرايط تنظيف (للي بزبط منها) والمنيح بس صغر راح لاهل الخير والباقي ترتب وانكوى وانعمل جرد للاحتياجات من ملابس (اغلبها الاساسيات واللي مهمة بالمدرسة مثل الجرابات وحذاء رياضة لسلطان) ...

لازم ابدأ بتعزيل المطبخ من الداخل عشان اعرف شو اللي ما بدي اياه وشو اللي تكسر ومش مبين (وللاسف ما اكثره مرات بسبب عدم حرص البنت اللي بتساعدني في ضب الاشياء الزجاجية)...النية يكون هادا الموضوع خالص بنهاية الشهر ان شاء الله...كل يوم شوي
ورح ياخد وقت مش بس لانه عندي ادوات كتييير بس كمان لانه انا بحط الادوات في غرفة الخزين وخزانة خاصة في الممر وكمان في البوفية في غرفة السفرة...يعني مش المطبخ بس..ولازم اتغلب على شعوري بالرغبة بالاحتفاظ بالاشياء بحجة اني ممكن احتاجها في المستقبل...

اليوم رح اشارككم وصفة لطبق جانبي...طبق سلطة "سلطة القيصر" وهي من السلطات المفضلة عندي كتييير وبحب اعمل كل اشي الها من البيت...يعني مكعبات الخبز من التوست البايت ومحمصة مع شوية زيت زيتون واورجنو او زعتر في الفرن..وبحب اعمل الصوص (وفعليا هي وصفة اليوم) بالبيت لانها ازكى كتييير وسهلة كتييير وما فيها مايونيز...وياما اكلت هادي السلطة بمطاعم (ومطاعم مشهورة كمان) وكان نفسي ارجعها لانه مو زاكية ابدا ومليانة مايونيز وبتقعد على المنافس...الصوص الاصلية فبها صفار بيضة وانشوجا بس لاني بعرف كتييير ناس ما بتحب الانشوجا وبتقلق من البيض الني (وانا واحدة من هادول) فلقيت هادي الصوص اروع بديل وبدون مايونيز كمان...والكمية بتكفي لصحنين سلطة...يعني ممكن تعملي الصوص وتخليي الباقي لصحن بعد يومين تلاتة في الثلاجة...وصدقوني رح تحبوها يمكن تعملوها تاني يوم مش تستنوا يومين تلاتة...

سلطة القيصر بصوص منزلي خالي من المايونيز
المقادير:
2 سن ثوم مدقوق
2 ملعقة طعام خردل ديجون بالحبوب (سهل كتيير تلاقوه ومتوفر في اغلب السوبرماركتات وبسعر معقول ) وممكن استخدام الماسترد العادي بس هادا ازكى
2 ملعقة طعام صوص وستشاير
كوب زيت زيتون
عصير ليمونتين كبار
ملح
فلفل اسود

للسلطة:
1/2 راس خس كبير مفروم خشن
جبنة بارمزان مبشورة شرائح
مكعبات خبز محمص


الطريقة:
توضع مكونات الصوص في مرتبان وترج جيدا (ورح تحتاجوا ترجعوا ترجوها لما تستعملوها المرة التانية)


يدار كمية من الصوص فوق الخس ويرتب في صحن التقديم وتوزع عليه مكعبات الخبز والجبنة


وصحتين..


2 comments:

  1. شكرا الك لوصفة الصوص بدون مايونيز
    فعلا لانو بتكون بالمطاعم كلها مايونيز وبتداايق كتيير
    وهيك بتكون السلطة اخف واطيب

    ReplyDelete