Wednesday, July 10, 2013

كعكة بوظة التشيز كيك بالفراولة

اولا كل سنة وانتوسالمين ورمضان كريم علينا جميعا...


الي فترة مشغولة بمناسبات وافراد العائلة اللي جايين من بلدان مختلفة وتحضيرات لرمضان ومن ضمنها الزينة واللي بحب اعلقها كل سنه لانه البيت اللي فيه صغار بينبسطوا خاصة اذا ساعدوا في الترتيبات..... اما تحضيرات تانية فكانت الاشياء المعتادة من اني اشتري لحمة وارتبها في الفريزر واكور لبنة جرشية (كتير زاكية من معرض ايادي اللي كان قبل ايام من سيدة بتبيعها) واطحن بقسماط من بقايا خبز توست وحمام وبرشت بلوك كامل جبنة موزريلا وقسمته برضه بالفريزر ونقعت وحليت جبنة نابلسية مشان السحور بالاضافة الى 4 اكياس للفريزر مشان البنش (نوع من العصائر الباردة واللي اعطيتها بدورة اهلا رمضان)...طبعا عشان ما اكذب اجت هاي التحضيرات هيك...يعني مش خصوصي لرمضان لانه مثلا الخبز موجود ولازم اعمل فيه اشي والجبنة الموزريلا انا دايما بشتريها بلوك كبير (ارخص من القطع) واللبنة الجرشية لانه ما عندي واشتهيتها...يعني ما عملت تحضيرات مثل سمبوسك او غيره...



كمان رجعت وعملت جرد لخزانة المونة عشان استهلك الموجود في رمضان ولقيت انه عندي اغراض لعدة شوربات منها: الفريكة والعدس والبندورة بالكريما وشوربة كويكر، وذرة وشعيرية ...نعمة في الوقت الحالي...وعندي فول (لانه صحن الفول مهم مرات على السفرة) وكمان تنكة زيت قلي كبيرة اشتريتها قبل فترة اليتر بيطلع بدينار...وهادا ارخص سعر من مدة للتر الزيت. وكمان والحمدلله عندي ارز عدة انواع من مصري، بسمتي وامريكي بالاضافة الى معكرونات ونودلز. اما على صعيد الاساسيات ففيه سكر وطحين وسميد ناعم وخشن وبرغل ناعم وخشن وشوفان ...الله يديمها نعمة ويرزق كل محتاج...

في عيلتي احنا منفطر مع الكل (حماتي وبيت سلفي وبيوت بنات حماي التنتين  واحنا + البنات اللي بيساعدونا بشغل البيت...ففيه عدد ما شاء الله) وكل حدا بيجيب طبق وكان فيه اقتراح انه ما نغلب حالنا بالطبخ ويكون الاكل خفيف بس قلنا خليها لما يمر عدة ايام من رمضان بنشتاق للحواضر...انا قررت اني ما بدي اكتر كميات ...

كنت قلتلكم اني بدي احضر قائمة بالاكلات اللي بدي اعملها برمضان عشان اريح حالي من التفكير اليومي واستغل الموجود وكمان اشتري اللازم لما اروح اشتري اغراض...وانا حضرت قائمة تشمل كل الاكلات واللي ما رح اعملها كلها لانه كل حد بيعما اشي وبالتالي مش كله رح يتطبق بس اذا انطلب مني شوربة فانا عندي خيارات بالاضافة الى انه مرات رح يزيد اكل وبالتالي ما فيه طبخ وبتروح الطبخات اللي ما انعملت للاسبوع اللي بعده...

للاسبوع الاول ان شاء الله القائمة للفطور كالتالي وبدون تحديد الايام:
الاول: شوربة فريكة على عظم خروف من الفريزر، فتوش، فول مدمس، ملوخية وارز، عصير ليمون بالجريب فروت وعصير توتي فروتي بوظة تشيز كيك الفراولة
الثاني: شوربة عدس مع مكعبات الخبز المقلية، سلطة عربية ناعمة، سبرنغ رولز، ورق دوالي، لبن، عصير ليمون بالنعنع وبانش، لفائف التمر باللوز وكريم كراميل
الثالث: شوربة الذرة بالجبنة، سلطة يونانية،  انشلادا الدجاج، اصابع الجبنة المقلية، عصير مانجا وعصير برتقال وهريسة جوز الهند
الرابع: شوربة كويكر، اجنحة الدجاج ترياكي، كولسلو، فتة حمص ،  عصير توتي فروتي وقمر الدين بماء الورد وقشطلية
الخامس: شوربة شعيرية، فتة دجاج، ساندويشات التوست بالدجاج ،  عصير فمتو و جوافة مع فراولة ، شباكية (حلو مغربي)
السادس: شوربة قرع (قرع مسلوق من الفريزر)، داوود باشا بالطحينة مع ارز، فول مدمس، فتوش، سمبوسك بف هندي، قطايف عصافيري بالقشطة وبالنيوتيلا
السابع: شوربة بصل بالكريما، معكرونة باللبن، معكرونة ببندورة، سلطة الشيف، سمبوسك بالجبنة الحلوم، مهلبية بالفراولة
المهم انه...

فطورنا اليوم ان شاء الله هو : تمر، شوربة حريرة، سمبوسك لحمة وجبنة، صحن فول، فتوش، مقلوبة، ملوخية وارز وقطايف  وعصائر(احنا بنقدم القطايف على الفطور) وحلو بوظة بعد التراويح (مناسب للشوب)
مهمتي لليوم هي: ملوخية وارز وصحن فول بالبصل الاخضر والبندورة والزيت ولبعد التراويح كعكة بوظة التشيز كيك بالفراولة واللي رح اشارككم وصفتها اليوم وابريقين عصير (ليمون بالجريب فروت) و (توتي فروتي)

اما السحور فان شاء الله ناوية اعمل خبز بالجبنة الكاسات والثوم والبقدونس ....ووصفته بتكون بكرة ان شاء الله...

 كعكة بوظة التشيز كيك بالفراولة 
المقادير:
علبة حليب مركز محلى
2 باكيت كريما بودرة محضرة حسب تعليمات الباكيت
ملعقة كبيرة عصير لبمون
علبة جبنة كريمية 227 غم
ملعقة صغيرة فانيلا
باكيت (حوالي 12 حبة) بسكوت فانيلا محشي
1/2 اصبع زبدة مذاب
علبة فراولة كبيرة (حوالي 12-15 حبة)

الطريقة:
تخفق الجبنة والحليب وتضاف الكريما والفانيلل
يكسر البسكوت ويفرك بالزبدة وتحمص اما في الفرن او على الغاز
تقطع الفراولة ويهرس جزء منها ويضاف
يبطن قالب الرغيف التوست بورق الفريزر او الخبز وتضاف الفراولة والبسكوت وتحتقلب بخفة بشكل يسمح بعمل خطوط حمراء من الفراولة كالامواج.
تسكب في القالب وبفرز 3 ساعات على الاقل
يقلب ويزين بالكريما والفراولة وصوص الفراولة... وبتمنالكم صيام مقبول وفطور هنيء باذن الله...




9 comments:

  1. I tried the ice cream. Very delicious

    ReplyDelete
  2. مرحبا منال :
    بدي اسال هل نطحن البسكوت ناعم جدا و هل نصفه كطبقة متماسكة في القالب و لا يخلط مع خليط الكريما ؟
    شكرا كثير ...اسفة اني غلبتك

    ReplyDelete
  3. اهلا هنادي...ما في غلبة ابدا....البسكوت بيضل مثل ما بتكسري البسكوت لل ليزي كيك (يعني شقف صغيرة مش مطحون عشان يعطي قرشة وانت بتاكلي البوظة ويخلط مع الكريما وما بنرصه بقاع القالب...بتمنى تعجبك :)

    ReplyDelete
  4. شيف منال الفراولة حسب ما بفهمت نصفها مهروس وبينخلط مع الخلطة والنص التاني بينحط مع البسكوت بقاع القالب.وكيف بتكون الفرالولة مقعة ولا مهروسة وشكرا

    ReplyDelete
  5. رزان ما في بسكوت بقاع القالب كله سوا

    ReplyDelete
  6. شكله جداا وفكرتهو حلوة ووصفة باردة وطيبة

    ReplyDelete
  7. يسلمو ايديكي..بس لو سمحتي شو بديل الجبنه الكريميه لانو مو متوافر عنا وجبنه كيري كمان مابجيبها ..شكرا

    ReplyDelete
  8. وايديكي شو إنواع الجبنة عندكم في American heritage

    ReplyDelete