Friday, July 5, 2013

الفيصلية

رمضان على الابواب وكل سنة وانتوا سالمين...الله يبلغنا رمضان آمنين مطمئنين و يفرجها علينا وعلى الجميع...

اليوم كان آخر درس قبل رمضان...الحمدلله كان درس لطيف كتير واستمتعت مع الستات الحلوين ...وهلأ عم بستعد ان شاء الله لتعزيل قبل رمضان...واليوم قالتلي واحدة من الستات ...انه " ما انت عزلت قبل فترة؟!" ضحكت وجواتي انبسطت كتير كيف انه الناس اللي بتابع المدونة بتعرف شو بعمل بحياتي وهادا اشي بسعدني انه يكون فيه متابعبن...شكرا الكم ولولاكم ما بتشجع وبعمل الاشياء اللي بعملها...المهم جوابي الها كان انه التعزيل هالمرة رح يكون في الصميم...يعني داخل الخزاين وبشكل عميق حتى اتخلص من اي اشياء ما بتلزم وممكن تكون مفيدة لغيري...وفرصة بما انه ما في اشغال كتير خاصة اول رمضان والنهار طويل..اني استمثره باشي مفيد...
بعدين كان فيه كاريكاتير هاديك اليوم عن عدة رمضان من الزينة وشافات العصير وغيره...والله اشي حلو كتير...يعني اشياء تضفي مزيد من النكهة على الشهر وبتفرح الاولاد...والنية اني ارتب القعدة شوب لقعدة رمضانية...انزل الفوانيس والزينة واعلقها واغير المخدات اللي بغرفة القعدة وكمان حابة ازين سلة للتمر...اذا عملتها رح اشارككم الصورة ان شاء الله...

الجزء الثاني من اليوم...

طبعا انا هلأ عم بكمل الكتابة بعد ما تركت فترة العصر وطلعت على معرض ايادي بالرويال...كتير حلو وفي اشياء جميلة لرمضان...اشتريت صينية ضيافة حلوة بتنفع لرمضان وبعده وبشاكير لحمام الضيوف (رمضانية) واكسسوار الي وواحد هدية وفناجين قهوة سادة لرمضان هدية لماما العزيزة...المهم انه بدو بير فلوس لانه الاشياء حلوة كتير وبتستاهل...بكرة آخر يوم...

ولتكملة المقال (بعد يوم)...عشان بس تعرفوا اني مرات بياخدني يومين عشان اكتب!!!! لانه هاد بيناديني من هون وتعالي شوفي ووين ابصر شو....الخ!!!

المهم وصفة اليوم هي لحلو عربي سهل جدا ومناسب لرمضان (عشان احنا منحب القطر كتير!!!) وهو الفيصلية وعادة بتنعمل بالفستق الحلبي المجروش ومخلوط بشوية ماء زهر وقطر او بالقشطة وانا عندي قشطة بلدية فقررت اني اعملها فيها...والحقيقة انه عجينة الكنافة اللي عندي زادت من درس اهلا رمضان وحبيت اني اعملها اشي ولانها زوايد الشكل النهائي ما كان باحسن حالاته بس ان شاء الله بعيدها برمضان وبحط صورة احسن...



الفيصلية
المقادير:
1/2    كيلو كنافة خصلات طويلة طازجة
        فستق مجروش
       قطر بارد
       قشطة بلدية او منزلية
       زيت غزير للقلي

الطريقة:
تمد خصلات الكنافة وتُساوى باليد بحيث نتجنب وجود الفراغات.

يخلط الفستق المجروش مع قليل من القطر ورشة ماء الزهر في وعاء عميق مع التقليب حتى يلتصق الفستق ببعضه. هذا في حال استخدام الفستق للحشي.

يوضع جزء من خليط الفستق والقطر  او في حال استخدام القشطة فنضع حوالي ملعقة كبيرة على حرف خصلات الكنافة ثم تُلف الكنافة حول الحشو بشكل مثلثي مائل ( مثل السمبوسك).


 يسخن الزيت في مقلاة على نار متوسطة.

تحمر الكنافة المحشوة في الزيت الساخن مع مراعاة الضغط عليها قليلاً باستخدام ملعقة وخاصة في البداية حتى لا تتفتح داخل الزيت ويتساقط الحشو منها.
ترفع الملعقة وتُترك الكنافة حتى تأخذ لونا ذهبي

 
ترفع على ورق نشاف للتخلص من الزيت الزائد ثم توضع بالقطر  البارد.

ترفع وتُصفى من القطرثم ترتب على طبق التقديم، تُزين بقليل من القشطة والفستق المجروش.



1 comment:

  1. انا كتير بحبها هاد الحلو وبشتري منو كتيير
    بس رح اصير اعمله بالبيت اوفر واطيب

    ReplyDelete