Sunday, May 5, 2013

تحدي التعزيل والجو المغبر ووصفة للبيت ووصفة سلطة...

لما كنت عايشة باميركا ولما يبدا فصل الربيع بيبدأ ما يسمونه "تنظيف الربيع" يعني بالعربي تعزيل البيت من كركبة الشتا واغراضه الكتيرة وتهوية البيت ...الخ من الاشياء اللي ستاتنا وامهاتنا واحنا بنعمله كل ربيع (مع انه الحقيقة السنة حسيت الصيف نط على الشتا واخذ الربيع معه!!!) وما عندي اعتراض ابدا لاني بحب الدفاااااااااااا.
 طبعا انا متأكدة انه كتير منكم بدوا بالعملية وانا يعني بدي ابدا بس كل ما بتطلع على الغبر اللي بالجو بقول خليني استنى شوي (لغسل البرادي وتهوية الفراش...الخ) بس بعرف اني لازم ابدا من نقطة ما وفي ظل الانشغالات اليومية وامتحانات المدارس اللي ما بتخلص (الله يعين الاولاد) لازم اعمل جدول واضح يكون في كل يوم اشي عشان ما انجن (لاني من النوع اذا بديت ما بعرف اوقف لحد ما ينهد حيلي!!!). وقلت بشارككم فيه اذا ناويين تعزلوا معي ...اهو...بنعمل مجموعة دعم لبعض...ويا ريت اذا حد منكم بيحب يشترك بجدوله في التعليقات بيكون ممتاز كتير...
المهمات العامة اللي حابة اعملها هي:

  1. غسل الحرامات (والحمدلله هي خفيفة)
  2. تهوية كل الفراش من لحف ومخدات
  3. غسيل البرادي (غرف الاولاد والضيوف والقعدة)
  4. فرك الارضيات (عندي البلاط بده هيك تقريبا كل شهر بالصابون النابلسي المبروش)
  5. الشبابيك (والحمدلله هدول بينعملوا كل اسبوع فما كتتير تبهدلوا مع الشتوة الاخيرة)
  6. تبديل الملابس الشتوية بالصيفية للاولاد (حاليا الوضع شوي فوضى من ناحية انه الصيفي نزل على الشتوي واختلط الحابل بالنابل!!!) وبهاي العملية رح اعرف النواقص اللي لازمة للاولاد ورح نشوف الاواعي الصغيرة...الخ
  7. نكش قواوير الزريعة للتهوية وتسميدها
  8. اي شي تاني ممكن ينضاف اذا حسيت لازم


اما تعزيل الغرف نفسها فما رح يكون فيه شغل كتير لانه احنا بنعزل غرفة كل يوم (او بنظفها منيح فما في اشي كتير خطير بس يمكن شوية تزييح للاشياء الثقيلة للتنظيف تحتها نثل مكتبة غرفة المكتب، الثلاجة في المطبخ، التسريحة في غرفتي والمكتب والخزانة بغرفة الاولاد.

رح اشارككم كل يومين مع سوا... ابتداءا من اليوم الاحد (اضافي على الشغل اليومي):
الاحد: هارون عنده تطعيم وناوية اروح افطر عند اهلي ان شاء الله وامرر اواعي للدراي كلين(يمكن عم بتقولوا...ولو شو هالبداية!!! هههه بس القصد اني بدي اعطي بعض المهام للبنت اللي عندي في فترة الصبح عشان تنجز وانا مو بالبيت...
- شباك البرندة والستارة المعدنية
- غسيل الحرامات (علي بس ارجع وضبها)

الاثنين: تهوية فراش غرف الاولاد وغسيل كامل
تبديل الملابس الصيفية للاولاد (سلطان وهارون)
شباك غرفة الاولاد والحمام
فرك ارضية غرفة الاولاد والحمام

طبعا هادا الحكي لا يعني انه الطبخ رح ينحط على الرف...بعني بدكم بعد كل هالتعب كمان ما في اكل لزيز!!! :)
بس قبل ما احكي عن الاكل بدي اشارككم وصفة لسائل مسح الكاونتر بالمطبخ..بما انه بدينا بالتنظيف اليوم ...وهو سهل، ريحته حلوة..واوفر على الجيبة بالاضافة انه بيعقم الى حد ما اكثر من مجرد استخدام بشكير المطبخ لانه فيه كحول طبي...

سائل تعقيم اسطح المطبخ:
المقادير والطريقة:
زجاجة رش سائل تنظيف الزجاج (فارغة ومغسولة)
عبي 1/8 الزجاجة كحول طبي (رخيص ومتوفر في قسم العناية الشخصية بكل السوبرماركتات)
قطرات من زيت معطر (بتعرفوا الزيت اللي بنشتريه للمباخر (بس اختاري نوع ريحته معقولة مش عود مثلا..اشي مثل الخزامى او ببل جم اذا بتحبي)
نقطة دواء جلي
عبي باقي الزجاجة ماء وخضيه شوي وبسسسسسسسسسسسسسسسسسسس...كتير سهل ورخيص وبتلاقيه مفيد...
وهي اللي عملته اليوم...


اما الاكل اليوم او الوصفة لليوم فهي وصفة سلطة الفاصوليا البيضاء مع النعنع...منعشة ومفيدة وصحية جدا...انا هيك موديلي...شوربات بالشتا وسلطات بالصيف..

سلطة الفاصوليا البيضاء مع النعنع
المقادير:
علبة فاصوليا بيضاء مصفاية ومغسولة
بصلة حمراء صغيرة مفرومة ناعم
1/2 كوب نعنع مفروم
حبة فليفلة حمراء مفرومة
2 ملعقة طعام قبار (ممكن الاستغناء عنه)
3 ملاعق طعام خل تفاح او عصير ليمون
ملح، فلفل اسود
زيت زيتون

الطريقة:
ينقع البصل بالخل 1/4 ساعة
تخلط بقية المواد معا وتترك لتمتزج النكهات ساعة في الثلاجة وصحتين...


1 comment:

  1. هاي التعزيلات مشكلة وبتاخد وقت كببير وبكون الواحد مو جاي على بالو يقلي بيضة من التعب
    شكرا الك لوصفة السلطة
    كتتير منظرها بيفتح النفس

    ReplyDelete