Saturday, March 2, 2013

محشي الفليفلة المكسيكي

ما في اشي احلى من انك تروحي على السوبرماركت وتلاقي اشي على عرض رائع ويوحيلك بطبخة اليوم!!! هدا الاشي قبل يومين كان الفليفلة الملونة واللي سعرها كان يوصل ل 1.79 واكثر للكيلو...طيب شو رأيكم اذا قلتلكم اني رحت على كارفور وكان الكيلو ب ....مستعدين؟!!! 49 قرش!!!! اه 49 قرش بس!!! شو يا حزركم صار بمنال....ههههههه يعني قادرين تتخيلوني بحط قد ما بقدر في الكيس وخاصة الفليفلة الحمرا,,,وهادا اللي صار...والاكلة اللي قررت اعملها هي محشي الفليفلة المكسيكي...والسبب اني اتذكرت انه ارز ابيض زيادة من قبل يوم وما في اشي يتاكل معه وشوية لحمة مفرومة مقلبة مع بصلة وبدون بهارات بس ملح وفلفل اسود...اوكي!!! طيب وباقي الفليفلة....اشي استعملته لدرس اليوم واشي رح يستعمل في عمل بيتزا لبكرة ان شاء الله والكم الاكبر شويته في الفرن زي ما زكرتلكم مره على رؤيا لما عملت سلطة الباذنجان والرمان...بغسل الفلفل وبنشفه وبحطه في صينية وبرشه زيت زيتون خفيف وملح وفلفل اسود وبشويه في الفرن وبعدين بحطه في صحن بايركس وبغطيه بورق جيلاتين بلاستيك عشان اقدر اقشره بعدين ووبعدين ومن غير ما اقشر بحط كل حبة في كيس بالفريزر لحد ما بدي استعملها في وصفة بدها فليفلة مشوية بعد ما اقشرها...

طيب...وصفتي اللي رح اشارككم فيها اليوم مش بس مفيدة وشكلها حلو وطعمها زاكي زمختلفة وكمان فيها استفادة من الارز الابيض البايت اذا كان بكمية مش كبيرة ومش عارفة شو تعملي فيه وما بدك تطبخي اشي بيحتاج الى ارز...

محشي الفليفلة المكسيكي
المقادير:
6-8 حبات فليفلة حمراء وصفراء وممكن برتقالي (ما كان في على العرض) وممكن اخضر بس الفليفلة الملونة طعمها على حلاوة شوي وبالتالي اطيب في الطبخ
2 كوب ارز ابيض مطبوخ
2 ملعقة طعام زيت زيتون
بصلة صغيرة مفرومة ناعم
200 غم لحم مفروم
حبة ثوم مهروس
1/2 علبة فاصوليا حمراء
1/2 علبة ذرة
2 ملعقة طعام بهارات التاكو
ملح وفلفل اسود
علبة بندورة صغيرة معلبة ومهروسة
ملعقة طعام رب بندورة
1/2 ملعقة صغيرة كمون 
كوب ماء
2 كوب جبنة شدر
1/4 كوب كزبرة خضراء مفرومة ناعم

الطريقة:
نقسم الفليفلة من النصف بالطول ونزيل البزر والالياف البيضاء
نملح ونبهر الفليفلة ونصفها في صحن بايركس
في مقلاة نضع زيت الزيتون ونقلب البصلة واللحم حتى ينضج ونملح ونبهر
نضيف الثوم والارز والفاصوليا والذرة والبهارات و3/4 علبة البندورة ونقلب من 3-5 دقائق ونرفعها
نضيف 1/2 كمية الجبنة و1/2 كمية الكزبرة ونقلب
نحشي الفليفلة بالارز 
نخلط الماء ورب البندورة وبقية علبة البندورة وترشها بالملح والفلفل الاسود والكمون ونضعها في قاع صحن البايركس اللي فيه الفليفلة ونضع رشة سريعة لزيت الزيتون
نحمي الفرن الى 180 ونغطي الصينية بورق الالمينوم ونضعها في الفرن مدة 25-30 دقيقة
نرفع الغطاء ونضع الجبنة المتبقية على كل حبة فليفلة ونعيدها الى الفرن لتذوب حوالي 5 دقائق
تقدم مع رش الكزبرة المتبقة على الوجه وتقدم مع السور كريم او (اللبن) مثل ما عملنا...وصحتين والف هنا



2 comments:

  1. يسلمو ايديكي منال انا دايما بعملو بس بدون جبنة شيدر ع الوجه ، بظن هالاضافة لازم اعملها يسلمو

    ReplyDelete
  2. شعوور رائع تماما لما بلاقي اشي بحبه بالعروض وسعره اقل بنسبة منيحة
    بصراحة باخد منو كميات كبيرة وبستغلها وبعمل منها كتتتير وصفات
    ووصفة الفليفلة المحشية كتيير راائعة

    ReplyDelete