Tuesday, February 12, 2013

سلطة التاكو السريعة وصوص السلطة الفرنسية

سلام...اليوم كان زي العادة حافل بالشغل خاصة انه الجو مش مشجع على الطلعة بوجود بيبي صغيرفكملت تعزيل زي ما انا مخططه ومش معقول اديش الشغل في البيت "نبع" ما بيخلص. وخطر على بالي كيف كنت وانا صغيرة اطلع على امي واستغرب جدا من كتر ما تشتغل في البيت واقول لحالي "ما بتزهق"!!! بس الحقيقة انه لما الواحدة بتشتغل في بيتها اكيد انه الشعور مختلف...طبعا بيت اهلي بهداك الوقت كان بيتي...ما تفهموني غلط!!! بس قصدي انه الواحدة لما تشعر انها بتتحكم بامور بيت بيكون بيتها وهي الملكة فيه "زي ما بيقولوا". وهون فهمت ليش امي ما كانت تزهق شغل بالبيت...المهم انه كان في انجازات على صعيد الترتيب والتنظيم بالاضافة الى التخلص من الكثير من الاشياء الزيادة بالبيت وان شاء الله بيستفيد منها ناس تانيين بحاجة الها...وطبعا متل ما خبرتكم امبارح اني طبخت تشيلي لليوم بس عملت شوية رز زيادة وعملت سلطة الدجاج الصينية بالدجاج اللي طلع من سلق العظم وعملت اصابع الخبز (بريد ستيكس) وشراب ليموناضة لزيز...رح اعلمه للستات من ضمن سلسة دروس تقديم الاكل في الحفلات "الدرس الاول" في نهاية الشهر ان شاء الله...

ومتل ما وعدتكم فوصفة اليوم هي سلطة التاكو السريعة وصوص السلطة الفرنسية (واللي ممكن يستخدم في اي وصفة بتحتاج لهذا الصوص) لاني ومتل ما ذكرت سابقا نا بحب اشتري صوصات السلطة الجاهزة...

سلطة التاكو السريعة وصوص السلطة الفرنسية
المقادير:
 باكيت شيبس تورتيلا (يفضل نوع ما عليه بهارات كثير..انا استعملت النوع اللي بينحط في المطاعم لانه بس مملح ومكتوب على الباكيت Restaurant Style كسري اغلبه وخلي قطع كاملة لتزيين الجوانب
1/2 خسة صغيرة ايس بيرغ مغسولة ومنشفة ومفرومة شرائح وسط
200 غم (شوي مو كثير) لحمة مفرومة ناعم مقلبة لتستوي ومرشوش عليها بهارات التاكو (اما بتشتروها جاهزة او بتعملوا البهارات انتو وفي وصفة على المدونة للبهارات)
حبة بندورة كبيرة مزالة البذور والعصير مفرومة ناعم
بصلة خضراء صغيرة مفرومة شرائح
كوب جبنة شدر حادة مبشورة
ممكن اضافة الفاصوليا الحمراء، الذرة، الزيتون الاسود وممكن الاستغناء عن اللحمة لتكون نباتية
1/2 كمية من صوص السلطة الفرنسية

مقادير صوص السلطة الفرنسية:
كوب كاتشب
كوب زيت
1/2 كوب سكر
1/4 كوب خل
1/4 كوب ماء
ملعقة صغيرة بودرة الثوم
ملح وفلفل اسود (رشة)

الطريقة:
تخفق مقادير الصوص معا في الخلاط وسنحتاج الى نصف الكمية للسلطة والباقي ممكن الاحتفاظ فيه لمدة شهر في الثلاجة في زجاجة محكمة الاغلاق
للسلطة: تفرد كمية التيبس المكسر وفوقها الخس ثم البندورة واللحم والجبنة والبصل وتوزع الصوص بدون خلط السلطة وتزين الجوانب بقطع التيبس الكاملة والف صحة...




صوص السلطة (انا عملت نص الكمية)

السلطة...

اما في الغد فان شاء الله رح اشارككم وصفة اصابع الخبز اللي عملتها اليوم...والمنيو للغد هي بواقي اكل اليوم ان شاء الله وبركي بعمل حلو...

منال

9 comments:

  1. ما شاء الله شغلك و أسلوبك رائع
    أنا متابعة مدونتك دائما

    ReplyDelete
  2. التعليق متأخر يا نادين...آسفة..:لك زوق حبيبتي وان شاء الله بتزوري كدونتي دايما وبتلاقي اشياء تحبيها...مع حبي

    ReplyDelete
  3. This comment has been removed by the author.

    ReplyDelete
    Replies
    1. اهلا ريما وكل سنة وانتو سالمين...بالنسبة للمنيو مهم التنويع...هلأ بيعتمد على المعزومين وعلى الوقت...باعياد ميلاد اولادي بحب اعمل ميني برغر بالصمون الصغير وجنبة الاشياء اللذيذة معه وبغز عود تنظيف الاسنان مع مخللة صغيرة او بندورة تشيري وتحته خس مفروم...كمان بحب اعمل نوعين سلطة...سلطة التاكو هاي زاكية كتير وممكن سلطو معكرونة وفيه كتير سلطات على المدونة اذا حبيتي...ممكن كمان تعملي عجينة العشر دقائق او اي عجينة بتفضليها وترقيها مستطيل وتحشيها بحشوات مختلفة زي جبنة حلوم وزعتر، حشوة بيتزا، كشكوان وتيركي...اللي بدك ايا وتلفيها زي رولات القرفة وتخبزيها كرغيف كامل مرشوش بسمسم وتقطعيها على السفرة دوائر .. ناتشوز البيتزا كمان زاكي وموجود بالوصفات ... ممكن تعملي خبز النيوتيلا الموجود برضه بالوصفات... كمان ساندويشات جيب التاجر رائعين جدا وسهلين كتير...المهم انه تنوعي...نوعين معجنات مثل الزعتر والجبنة اللي عندك وصفتها او اي نوع بتحبيه، ساندويشات نوع (برغر او جيب التاجر او عرايس زي ما انت حابة)، نوعين سلطة زي التاكو، المعكرونة، نوعين اشياء تانية مقبلات زي غموس وخضار وشيبس جنبه او ناتشوز وممكن حراق اصبعه وما تكتري حلو طبعا الكيكة وممكن نوع حلو بارد ونوع عربي...والف صحة...

      Delete
  4. This comment has been removed by the author.

    ReplyDelete
    Replies
    1. شاركينا الصور...والله يعطيكي العافية مقدما :)

      Delete
  5. بصراحة هي السلطات بدوقها بالمطاعم بس ولا مرة اتجرأت اعملها
    بس مبين انو طريقة عملها سهلة
    شكرا الك

    ReplyDelete
  6. السلطة ممممممم بتشهي كتييييير بس اجيب الشيبس رح اعملهااا ان شاءالله

    ReplyDelete
  7. This comment has been removed by the author.

    ReplyDelete