الاثنين، 17 نوفمبر، 2014

مشروعين منزليين بالصواني والستير فراي بالستيك

مؤخرا ومع الانشغال بكل شي في الدنيا عم بتروح واجبات تانية من قائمة العمل..بتقدروا تقولوا بتتأجل...بتنحذف لفترة ...الخ ومن اهم الاشياء اللي كانت ببالي هي تنظيف غرفة المونة...رح تقولولي شو جننتينا فيها...مزبوط بس هي اهم غرفة بالبيت...بنك الطعام...ومكاني المفضل بعد المطبخ...وطبعا محسوبتكم مرات من العجقة الا ما احط اشياء مش بمحلها وبالتالي يومين ثلاثة وتعود وتكتسح الفوضى العارمة ارجاء المكان...فامبارح قعدت انظف وارتب وامسح غبر واغسل تبرويرات وارتب من الساعة 8:30 الصبح ولغاية 12:30 الظهر...4 ساعات من الشعبطة على السلم والنزول وغيره وغيراته  بس شعور رهيب صارت ورجعت في قمة الترتيب والحمد لله.... 

بس من افضل الاشياء اللي نتجت عن عملية "الهجوم على غرفة المونة" طبعا غير الترتيب والنظافة هو عمل بعض الاشياء من الاغراض الموجودة وبتستناني احن عليها عشان تنعمل من ضمنها مرتبان مربعات السمورز اللي اخذته معي على رؤيا عشان افرجيكم كيف ممكن تقدموها كهدية...وطبخت ارز بفول اخضر وخلصت من شوية ارز امريكي خلطتهم مع الارز العادي وحطيت شوية لوز مقلي على الوجة برضه من لوز صرله فتره وكمان لقيت (لاحظوا كلمة لقيت!!!!!)...يعني الواحد بينسى مرات شو عنده  يا جماعة!!!! المهم لقيت كيس تمر قديم (حوالي 3 اكواب) وعلى السريع حطيت عليهم 3 اكواب مي مغلية وبس طريوا طحنتهم وبالفريزر ل 3 كيكات تمر..بلاقيهم الواحد وقت الزنقة...

وطبعا صار عندي هاجس هلأ انه لازم ارجع فكرة اطبخ مما وجد من هون لآخر السنة ان شاء الله لانه جد في كتير اشياء ولازم استغلها...

قبل 7000 سنة هههههه اذا بتتذكروا حكتلكم عن مشروع صواني رخيصة جبتها وقررت احولها لشكل تاني واخيرا صحللي اخصص وقت لهالموضوع...
المهم هدول الصواني اللي اشتغلت عليهم جبتهم بدينار للصينية من كارفور...حجمهم مش كتير كبير بس ممتازين للاغراض اللي استعملتهم الهم..اليوم رح احط شكلين وببوست تاني بحط شكلين تانيين ان شاء الله...
هي شكل الصينية لما اشتريتها...مش بطالة بس مش زوقي والناس ازواق... :)



طبعا انا بعاني من انه خالد (زوجي) لما يحط اغراضه بس يرجع من الشغل بيكونوا بشكل مش مرتب على الdresser (شو dresser  بالعربي؟ مأساة...مش خاطر على بالي..
فقررت اني اجيب ورق حلو واقيسه على قد داخل الصينية عشان الزقه عليها ولحمايته من اي اشي جلدت الورق بورق التجليد الشفاف واستعملت مسدس الصمغ ولزقته على الصينية واسفة الصورة معتمة شوي بس اشتغلت بالليل وتمت العملية بحدود ال 15 دقيقة :)



وطبعا انا ما دهنت الصينية خليتها على لونها وهي الشكل النهائي...ارتب بكتير :)


والصينية التانية قررت احطها على الكومودينا جنبي وعليها كتبي ولاني كتير بحب الورد فقررت اني ادهنها ابيض عشان تتناسب مع الورق وعملت نفس الاشي وعليها كتبي اللي بقرأ فيهم بالليل حاليا...وكتب طبخ بالمناسبة هههههههه يعني مش اشي غريب او عجيب :) 





بتمنى يكونوا عجبوكم وما كلفت الصينية اكتر من الدينار لانه كل المواد التانية عندي بالبيت من ورق وعلبة دهان رش... :)

اما وصفة اليوم فهي وصفة للستير فراي الصيني بالستيك من زمان عندي ما بحب اغيرها جربوها بتمنى تعجبكم

ستير فراي
    المقادير:
لصوص النقع:
ملعقة كبيرة خل ابيض
2 ملعقة طعام صويا صوص
رشة ملح
رشة فلفل اسود
حبة ثوم مدقوق
2 ملعقة كبيرة نشا
500 غم ستيك (روز بيف) مقطع شرائح
للستير فراي:
جزرة كبيرة مقطعة شرائح
2 فليفلة حمراء وفليفلة صفراء مقطعة شرائح
3 حبات ثوم مقطع شرائح
بصلة مقطعة شرائح (يمكن استخدام بصل اخضر)
*يمكن استخدام اي خضار مثل البروكلي
3 ملاعق كبيرة زيت نباتي
قطرات من زيت السمسم

لصوص الستير فراي:
فنجان قهوة صويا صوص
2 ملعقة طعان نشا
2 ملعقة طعام خل
فنجان قهوة ماء
بصلة خضراء مقطعة شرائح
           
   الطريقة:
توضع كل مقادير صوص النقع في كيس ويوضع فوقها الستيك وتنقع لمدة ليلة.
في مقلاة نضع الزيت ويحمى ونضيف الستيك وتقلب لعدة دقائق ويراعى عدم وضع كمية كبيرة من اللحم مرة واحدة او في زيت غير حامي.
يضاف البصل والثوم ويقلب
يضاف الجزر والفليفلة وتقلب لعدة دقائق
تخلط مكونات الصوص الثانية وتضاف وترش بالقليل من زيت السمسم وتقدم



الثلاثاء، 11 نوفمبر، 2014

دونتس التفاح بالخليط المتعدد الاستعمالات

اذا بدي اقول شو قمة السعادة بشغل الانسان فاكيد هي الناس اللي بتقدره وبتحترمه وبتحترم شغله وبتحسسه انه بيقدم اشي يعمل فرق...بس من اروع هاي اللحظات لما التقدير بيجي من شخص قدير في نفس المجال اللي انت بتشتغل فيه..من شخص له صولات وجولات بالمطبخ (لانه مجال عملي) ...شخص بالنسبة الك هو معلم وقدير وياما تطلعت اله...لما بيجي التقدير من شخص هيك اكيد بتكون لحظة سعادة غامرة وبتخليك تحس انك ماشي صح...ست منال العالم...كل الحب والتقدير الك على رسالتك الحلوة واتصالك معي ومن دبي كمان...اكيد لحظة رائعة بالنسبة الي...انا تعلمت منك كتير وما زلت بتعلم...بستمتع وانا بتفرج على اي برنامج بتقدميه...قمة الاخلاق والذوق والفن والدقة...تحياتي الك من الاردن...ومن مدونتي المتواضعة...

السبت الماضي قدمت طبق الصفيحة الارمنية اللي كتير ناس سألتني عنه...وقلت وبعيد مرة تانية انه اصولها تنعمل حشوة نية على العجينة بس لانه افران البيت غير عن الافران برة انا بطبخ الحشوة عشان ما تنزل ميتها على العجينة ويصير زفرة غير مرغوبة او تعجن العجينة...نفس العجينة بستعملها للصفيحة الشامية بس حشوة بلبن...هي الطريقتين وبتمنى تجربوهم وكمان تحبوهم للي ما جربها
والحقيقة مبسوطة كتير من الصور اللي عم تبعتوها ...وانه في منكم جربها وحبها...


الصفيحة الأرمنية 
مقادير العجين:
٦ أكواب طحين
٢ كوب لبن
كوب زيت زيتون
ملح
١/٢ ٢ ملعقة صغيرة خميرة
الحشو:
٥٠٠غرام لحمة مفرومة (عجل أو خروف أو مخلوطة عجل وخروف)
2 ملعقة طعام زيت 
بصلة كبيرة، مفرومه ناعم
٢حبة ثوم، مفروم ناعم أو مهروس
١ملعقة صغيرة بهار سادة
١/٢ملعقة صغيرة قرفة مطحونة
١/٢ ملعقة صغيرة فلفل أسود
١/٢ ملعقة صغيرة بابريكا
٢ ملعقة صغيرة ملح
٤-٥حبات كبيرة بندورة (طماطم)، مفرومة مكعبات صغيرة
٤/٣ كوب بقدونس مفروم ناعم
2 ملعقة طعام فلفل احمر مشوي مهروس
١ حبة فلفل أخضر حلو، مفروم ناعم
١ حبة فلفل أخضر حار، مفروم ناعم (اختياري)
١/٢ ١ ملعقة كبيرة رب البندورة 
٢ ملعقة صغيرة دبس الرمان 
ملعقة كبيرة نعنع طازج، مفروم ناعم
١/٣كوب صنوبر
طريقة عمل الصفيحة
نحمي الزيت ونضيف إليه البصل ونقلبهم حتى يذبل البصل قليلاً بدون أن يتغير لونه. نضيف اللحمة والبهار السادة والقرفة والفلفل الأسود والبابريكا ونقلبهم حتى تستوي اللحمة.
عندما تستوي اللحمة وتتبخر معظم عصارة اللحمة نضيف الملح والفلفل الأخضر الحلو والفلفل الحار المفروم. ونقلبهم لمدة دقيقتين.
نضيف البندورة المفرومة ورب البندورة ودبس الرمان . نقلبهم فوق النار حتى تتبخر نصف كمية ماء البندورة. لا نريد أن تتبخر كل الماء حيث أن حشوة اللحمة عندما تبرد تتكثف معظم الماء ونحن نريد الحشوة أن تكون رطبة قليلاً.
نغلق النار ونضيف النعنع المفروم والصنوبر. نخلطهم جيداً.
نفرد العجينة بعد ونضع الحشو عليها وبالفرن على ٢٠٠ من ١٥-٢٠ دقيقة لتصبح ذهبية
* يفضل تغطية المعجنات بشكل عام بعد الخبز ببشكير نظيف لتظل طرية

وهي الفيديو



اما الصفيحة الشامية




حشو الصفيحة الشامية:
٥٠٠غرام لحمة مفرومة (عجل أو خروف أو مخلوطة عجل وخروف)
2 ملعقة طعام زيت
بصلة كبيرة، مفرومه ناعم
١ملعقة صغيرة بهار سادة
١/٢ملعقة صغيرة قرفة مطحونة
١/٢ ملعقة صغيرة فلفل أسود
١/٢ ملعقة صغيرة بابريكا
٢ ملعقة صغيرة ملح
٢ حبة بندورة مفروم ناعم
١/٢ كوب لبن
2 ملعقة طعام طحينة
ملعقة طعام خل
صنوبر حسب الرغبة
ملعقة طعام دبس رمان (اختياري)
الطريقة:
تقلب اللحمة والبصل بالزيت ثم البهارات والبندورة لتذبل قليلا ثم بقية المكونات وترفع وتبرد وتفرد على العجينة وتخبز ويمكن اضافة الصنوبر

ومتذكرين وصفة الخليط المتعددالاستعمالات...طيب...عملنا فيه كتير وصفات وكلها هون على المدونة 
وبما انه عم نحكي عن الاشياء الحلوة فمن اروع الاشياء بالشتاء هو التفاح 


وعشان اجمع بين التفاح والخليط المتعدد الاستعمالات عملت دونتس بالتفاح بشبة اللي بنشتريه جاهز بالمبدأ بس الطعم مختلف لانه ما في خميرة هون فما تتوقعوا انه زيه بالزبط بس زاكي كتير

دونتس التفاح بالخليط المتعدد الاستعمالات
المقادير:
2 كوب خليط متعدد الاستعمالات
1/2 كوب ماء بارد
بيضة
2 ملعقة صغيرة فانيلا
ملعقة صغيرة قرفة
1/2 1 كوب تفاح مقشر ومقطع صغير
للجليز:
3 كوب سكر بودرة منخل
3-4 ملاعق طعام حليب

الطريقة:
تخلط كل المقادير السائلة ثم تضاف المقادير الجافة ثم التفاح
نحمي زيت غزير ونأخذ مقدار من الخليط بملعقة كبيرة وننزلها على الزيت الساخن ونحمرها لتنضج ونصفيها فوق ورق نشاف 
نحضر الجليز بخلط السكر والحليب ثم نغطس الدونتس بالخليط
والف صحة

ممكن وضع سكر ناعم فقط على الوجة لحلاوة اقل


الأربعاء، 5 نوفمبر، 2014

الخبيزة...اكلة قديمة وصحية

زي ما كتير منكم قرأ على الفيسبوك قبل يومين الله ستر وطلعت من مكة مول بالوقت المناسب قبل ما تبدأ المي تدخل على الطابق السفلي...الحقيقة الي زمان مش رايحة على مكة مول وقررت سبحان الله اني اروح هداك اليوم واشتري كم غرض وامر على مايلز...واللي صار هو اني لما دخلت الكراج الدنيا كانت شمس والسماء نسبيا صافية بحدود الساعة 10 صباحا...لما خلصت وطلعت للكراج كان في شوية زحمة بالكراج وضجة بس لسة ما كنت عارفة شو عم بيصير...نا علينا قلت ازمة زي العادة بالكراج...حطيت الاغراض بالسيارة وطلعت ولاحظت بمجرد ما بديت امشي انه المي عم تنبع...جد تنبع من المناهل...قلت بعقلي...معقول مجاري؟!!!! موضوع مش رائع على مدونة للاكل بس نرجع للسولافة...وانا طالعة من الباب وبلاقي بدون مبالغة نهر متجه باتجاه الكراج ولسة انا مش منتبهة انه الدنيا شتا لاني لسة ما طلعت من الكراج وتبعون الامن عم يركضوا لجوا...فتحت الشباك اسأل شو في  ولا رجل الامن بيقولوا " انفدي بجلدك" ...شو!!! ولا ما شاء الله الدنيا بره زخ زخ زخ وبرد وبرك مي هائلة والحالة حالة....دعيت ربي اوصل بسلام للبيت وكتبت البوست اياه على الفيس بوك تحذيرا لاي حد بده يروح على شارع مكة انه ما يروح لانه الشارع مش بس غرقان وكمان انجرفت التربة من الاماكن اللي مش مبني عليها وصار في حجار وتراب وطين بالشارع...الله ستر ووصلت البيت وغرقت وانا بطلع الاغراض...بس الحمد لله اجت سليمة...لو تأخرت 5 دقايق بس كان على الاغلب غرقت سيارتي بالكراج...الحمد لله!!!! رضا رب العالمين وان شاء الله رضا الوالدين!!!

وللتأكيد امبارح نزلت على وسط البلد وبس رجعت بحدود ال 12:30 برضه زخت الدنيا منيح (مش بسوء اول امبارح) بس برضه رضا ما تبهدلت وخاصة وسط البلد الوضع مطين بالشوارع بدون هالواسطة!!! يا ريت يحافظوا على النظافة...جد مكان رائع بس بيعاني من قلة النظافة وشوي ازمة اخلاق عند البعض خاصة اتجاه الستات!!! 

ما علينا..وانا ماشية بالبلد امبارح...في ست قاعدة على الرصيف وقدامها ربطات خبيزة بيشهوا... بس انا كنت مستعجلة فاطلعت علي بابتسامة حلوة  وقالتلي "يما بدك خبيزة؟" ابتسمتلها وقلتلها " يسلموا شكرا" وضحكتلي مع اني ما اشتريت منها وضليت ماشية بس ابتسامتها بعيوني...فحملت حالي ورجعت واشتريت منها 4 ضمم...ولما رجعت على البيت نقيتهم وغسلتهم وفرمتهم خشن وطلع معي صحن خبيزة من الآخر...اكلة تراثية قديمة بتمنى تجربوها للي ما بيعملها لانها مفيدة جدا وصحية وسهلة...


الخبيزة
المقادير:
4 ضمم خبيزة (الاوراق فقط) مغسولة جيدا ومنشفة ومفرومة خشن
بصلة وسط مفرومة
3 سن ثوم مهروس
3 ملعقة طعام زيت زيتون
ملح، فلفل اسود
1/4 كوب كزبرة خضراء مفرومة
بصلة مقطعة شرائح ومقلية لتصبح ذهبية الى مكرملة (للوجة
عصير ليمون

الطريقة:
يوضع الزيت بالطنجرة ونقلب البصل ليذبل ثم نضيف الخبيزة ونرشها بالملح والفلفل الاسدو ونقلب على نار هادئة لينزل ماءها وتنزل كميتها الى النصف تقريبا.
نضيف الثوم ونقلب قليلا ثم الكزبرة الخضراء
نضعها في صحن التقديم ونزينها بالبصل وتقدم مع الفجل وعصير الليمون والخبز الطازج..والف صحة

الأحد، 2 نوفمبر، 2014

المطابقة الاردنية...طبق يتناسب مع موسم عصر الزيتون

من اروع جروبات الطبخ اللي انا مشاركة فيها هو جروب نكهة عربية لانه عم بيرجعنا على التراث القديم واللي اذا ما حفظناه رح يروح مع جيل البرغر والناتشوز والبيتزا...طبعا كلها اكلات زاكية وانا شخصيا بحبها كتير ومش غلط ابدا انه الواحد يكون بيحب الاكل من الشعوب والبلاد المختلفو بس من غير ما يتخلى عن ثقافته الاصلية وبلاده واكلاتها الشعبية

مضيفتنا هاد الشهر العزيزة اريج الصمادي واللي قدمتلنا طبق انا ما كنت بعرفه...طبق اردني رائع جدا رح يكون من الاطباق اللي لازم تنعمل دائما ان شاء الله ببتي...انا سميتها بف باستري الاردن...هشة بطعم زيت الزيتون البكر الاصيل والبصل المذبل بالزيت والشومر والقزحة واليانسون....عرفتوه؟ طبق شهر 10 بمجموعة نكهة عربية هو المطابقة الاردنية..موسمها هلأ هي والمكمورة لانه هلأ موسم عصر زيت الزيتون.... 



بالمجموعة اريج قالت  انه الوصفة هاي عندها غير
الذكرى والايام الجميله والاهل واللمه والبرد والصوبايه كلها ذكريات رجعتلي وانا بعمل فيها ما فيه احلى من الماضي والجميل ولمة العيله بحضن دافي عطبخه طيبه دافيه . طبقي اليوم من قلب عروس الشمال من مسقط رأسي (اربد)بنسميه مطابقة بصل طبق قديم جدا وتقريبا الجيل الجديد ما بيعمله كتير للاسف.. كتير الطبق بيشبه المكموره الاردنيه لكن ما فيه دجاج عباره عن رقائق عجين محشيه بصل والكثير من زيت الزيتون مخبوزه تقدم ساخنه او بارده مع الزلطه الاردنيه الحاره وكاسة الشاي الساخنه  "



شكرا مرة تانية اريج وخلينا ندخل بالمفيد...ما تفكروها صعبة...كتير زاكية وجربوها

المطابقة الاردنية ...
المقادير:
٣ كوب طحين 
ملح 
 نص ملعقه حبة بركه ونص ملعقه شومر ونص ملعقه يانسون حبوب(اختياري)
ماء للعجين
الحشو
راسين بصل كبار 
كاس زيت زيتون
ملح
فلفل 
رشة كركم او عصفر 

الطريقة: 
بنعجن العجين العويص حتى يتشكل عنا عجينه طريه بفضل تنعجن حوالي ربع ساعه مع الدعك الجيد وتقرص لأقراص وتغمر بزيت الزيتون ونتركها ترتاح عالاقل ساعه



الحشو 
نفرم البصل فرم ناعم نضع بالقلايه زيت الزيتون وبس يحمى نضع البصلات مع الملح والفلفل حسب الرغبه والعصفر او الكركم ونبداء بتقليبه حتى يذبل البصل ويستوي


1- نضع على رخامة المطبخ كمية من الزيت الزيتون ونبداء برق العجين حتى تصبح رقيقه وشفافه
2 و 3 و 4 ونفرد عليها ملعقه كبيره من الخليط ونطبقها كما في الصوره ونضعها على جنب
5 نفرد قرص اخر بنفس الطريقه نضع بصل ونفرده ونضع العجينه المطبقه الاولى بنصف هذه المفروده ونطبق العجينه المفروده عليها بنفس الطريقه نكمل بهذه الطريقه حتى نكمل العجين نترك القرص الكبير يرتاح نصف ساعه
6- ثم نضعه بصينيه دائريه ونفرده جيدا وبحذر حتى يتشكل عنا رغيف كبير مكون من كل الطبقات 


طبعا الفرن حامي من قبل حراره ٣٨٠ ف نضع الصينيه بالفرن تخبز حوالي ٣٥ دقيقه ل ٤٠ دقيقه المده تعتمد على عدد الطبقات
انا عملت 7 اخدت 60 دقيقه و غطيتها بالفويل قبل الخيز وبصينية ذات حواف وتركتها بالفرن عنار وسط مده اطول حتى تستوي الطبقات 
تقدم ساخنه جنبها السلطة او خيار ولبن او شنينه 

بجد رااااااااااااااااااااااااااائعة


ومن جوة




الخميس، 30 أكتوبر، 2014

سلطة الكينوا بالقرع العسلي


كل اسبوع بقول رح افضى شوي ويتطلعلي اشي... اكيد بحمد ربي على نعمة الانشغال مقابل الزهق بس اشتقت للكتابة كتير...الي زمان ما حسيت حالي كتبت بوست زي الناس على المدونة...

وصفات الاسبوع الماضي على دنيا يا دنيا كانت برياني الكفتة وهي الفيديو


وسلطة الطبقات بنكهة عربية

وكعكة السميد والليمون بجوز الهند اليونانية

كتير مبسوطة من ردود الافعال ومن الناس اللي عم بتجرب الوصفات وسعيدة بكل الاقتراحات لمواضيع لحلقات قادمة ..بتمنى دايما 
نضل على تواصل من خلال الفيسبوك والمدونة

وعلى الصعيد الشخصي اليوم هارون عندة حفلة هالوين بالمدرسة...مش معقول شو الزمن تغير..لما كنت آجي زيارة على الاردن وانا باميركا كنت احكي عن الهالوين ومن النادر حد يعرف شو هو..هلأ صار اشي مش بس معروف..اليوم بمكتبة الشالاتي كل حد بيدخل وبيسأل عن الازياء والتنكرية ...طبعا هارونو مش كتير بيحب يحط اشياء على راسه واشياء تقيده وانا محتارة جدا جدا شو ممكن يلبس وخاصة انه اسعار الاشياء مش رخيصة ولو بدي اعمل زي بالبيت لسة بدي مواد ويمكن يلبسه ويمكن لأ...حبيت اكتر من فكرة شفتها مثل مهرج (في عندي العدة بس المشكلة مش رح يلبسها) وممكن شحاد..ههههه برضه حلوة كتير بس ما حبتله اياها (الله يغنيه من فضله) وبعدين وانا في حيرة من امري ...زوجي خالد اقترح كوماندو...جد اقتراح رائع لانه عنده البنطلون الجيشي المبرقع (ج) بس بيضل شوية الوان وهون رحت على الشالاتي وجبت الوان للوجه...ب 5 دنانير 3 الوان (اسود وسكني وزيتي)فدهنت وجهه الوان الكوماندو وكان صعب لانه ضله يتحرك وما بده  وكمان ما لحقت اصوره فطلبت من معلمته تصوره وبحط الصورة بالبوست الجاي ان شاء الله... فهذه فكرة جيدة للاولاد الصغار اللي ما بيحبوا يلبسوا اشي مختلف وكمان بيستفيد الواحد من البنطلون (لو اشتراه) احنا عنا اياه من الاول فتوفير بالتأكيد..
انتو عندكم احتفالات بالهالوين؟ مش عارفة من وين طلعلنا هالهالوين؟!!!!

اليوم قرار بالهجوم على الثلاجة واعمل الغدا من الاشياء الموجودة بالثلاجة...وهي اللي لاقيته:
لحمة مفرومة مقلبة (رح اعملها معكرونة باللبن)
بواقي بازيلا وارز لسلطان وهارون...ياسمين متعاونة وبتاكل من كل شي :)
بواقي سلطة الكينوا والقرع واللي رح تكون وصفتها تحت :) زاكية ومنعشة ومفيدة والكينوا غالية شوي بس ممكن تستعملوا برغل ناعم بدالها او كسكسي ناعم مفلفل
صحن متبل صغير (بواقي)
رولات تورتيلا (محشية بحشوات مختلفة من امبارح (طلبية)

يا سلام وبهيك بفضي الثلاجة شوي وكمان بناكل كل البواقي...ربنا يديمها نعمة...
وكل هاد تحضيرا لشهر 11 لانه النية اني جد استغل المجود بالفريزر والثلاجة وغرفة المونة واقلل من الشراء قد ما بقدر...شهر 10 كان ممتاز لانه اتخذت نفس القرار وحتى كان عندي عزومة وما اضطريت اشتري اشياء كتير لاني عملت اشياء من الموجود..

وصفة اليوم هي برضه بالقرع لانه قلنا بدنا نستغله... (لسة عندي 4 اكياس بالفريزر من القرعة الكبيرة اللي كتبت عليها دنيا يا دنيا :)



سلطة الكينوا بالقرع العسلي
المقادير:
كوب كينوا تطبخ بعد غسلها بالماء ب 1/2 1 كوب ما او مرق دجاج (فلفلة مثل الارز)
3-4 كوب قرع مقطع مكعبات ومرشوش بزيت زيتون وملح وفلفل اسود ومشوي بالفرن
بصلة حمراء صغيرة مفرومة ناعم
كوب جبنة فتة مكعبات (وبالحديث عن الجبنة الفتة اجاني تعليق مره انه انا بضل اغلط واكتبها فنة بدل فيتا بس الواقع انه لفظها بالانجليزي فتة وليس فيتا :)
1/2 كوب بندورة مجففة ومكبوسة بالزيت ومقطعة
1/4 كوب بقدونس مفروم ناعم
للصوص:
1/3 كوب عصير ليمون
2/3 كوب زيت زيتون
ملعقة صغيرة ماسترد
ملح
فلفل اسود
رشة اوريغنو (زعتر يوناني)

الطريقة:
تخلط كل مقادير الصوص وترج بمرتبان
تخلط مقادير السلطة وتحرك بخفة مع الصوص
تبرد ساعة وتقدم (وازكى تاني يوم)
والف صحة





الثلاثاء، 21 أكتوبر، 2014

قرع في كل مكان

من افضل الاشياء بالمطبخ انه نستغل الاشياء بموسمها...لعدة اسباب
ازكى (سبحان الله)
متوفرة بكثرة
و سعرها ممتاز 

بتذكر زمان ستي الله يرحمها كانت وباعتبار انه ما كان في هالكم الهائل من السوبرماركتات الكبيرة والتبريد...كانت في الصيف دايما محاشي وقلاية بندورة باللحمة على الغدا وبطيخ وجبنة للعشا...وبالشتا يشتغل العدس واقراص السبانخ :) ايام حلوة كتير...هلأ والحمدلله الاكل متوفر بشكل عام بكل انواعه بس اكيد انه على الاقل سعره بيفرق لما نشتريه بموسمه...

السبت الماضي على رؤيا استغليت القرع وتوفره بالسوق وحبيت اشارككم بوصفات باستخدامه...بس قبل هيك لما تشتروا القرع...اغسلوه ونشفوه منيح ..لانه بتقيموا البكتيريا اللي على القشرة وبالتالي بتضل القرعة فترة اطول...(كلمة القرعة زكرتني بباب الحارة رمضان الماشي ومرت ابو عصام اللي طلعة بالقرعة...ههههه) المهم نرجع للقرع..بتقسموها وبتفرغوها من اللب الداخلي والبزر ممكن تحمصوه بشوية زيت زيتون وملح وفلفل اسود بالفرن..طري وبيتاكل بقشره من اد مو زاكي لانه القشرة من يابسة...
لتفريز القرع اما:
- بيتقطع وبيتفرز عادي بدون طبخ (يفضل استخدامه للشوربة بهيك حالة)
- يتقطع وينسلق ليستوي ويتصفى وينهرس وينحط بباكيتات بالفريزر وفرغوها منيح من الهوا
- ينشوى بقشرة بعد ما تقسموا القرعة ارباع وبعدين بترشوها شوية زيت وبالفرن شوي وبس تستوي بتغرفوا اللب المستوي بالمعلقة وبتهرسوه وبتفرز

الوصفة الاولى كانت لفتة القرع وهي الفيديو



الوصفة التاينة كانت للتشيلي...اكلة مشهورة بجنوب اميركا كتير واضافة القرع بتعطي عمق وحلاوة لذيذة
ومع هاي الوصفة بتلاقوا خلطة بهارات فطيرة القرع

واخيرا تشيز كيك القرع واللي طاقم التصوير لاقاها كتير زاكية مع انهم استغربوا منها بالاول بس لتفاجئوا بالطعم اللذيذ...جربوها وهي الفيديو
وهي النتيجة النهائية


ولاني وعدتكم باكثر من وصفة هادول الاسبوعين بما انه عندي قرع كتير...فهي اول وصفتين لعيونكم

سلطة بصوص القرع
المقادير:
1/4 كوب قرع مهروس
1/4 كوب خل تفاح
2 ملعقة طعام عسل
ملعقة صغيرة خردل معجون (ديجون)
ملعقة طعام ماء
1/2 كوب زيت زيتون
ملح، فلفل اسود
1/2 ملعقة صغيرة زعتر اوريجانو

الطريقة:
تخلط كل المقادير ما عدا الزيت بالخلاط وعندما تختلط ننزل عليها زيت الزيتون لتمتزج وتسمك



اما الوصفة الثانية فلشوربة القرع بالزنجبيل...رائعة مع اجواء البرد

شوربة القرع بالزنجبيل
المقادير:
4 اكواب قرع مقطع مكعبات
بصلة متوسطة مقطعة مكعبات
2 جزرة كبيرة مقطعة مكعبات
معلقة زيت زيتون
ملح وفلفل اسود
ملعقة زبدة
ملعقة زيت زيتون
4 اسنان ثوم
ملعقة طعام زنجبيل طازج مبشور
ملعقة صغيرة كمون
ملعقة صغيرة بابريكا
2 ملعقة صغيرة كزبرة ناشفة
حبة بطاطا كبيرة مقطعة مكعبات
6 اكواب ماء او مرق دجاج
1/4 كوب كريما (اختياري)

الطريقة:
نخلط القرع والبصل والجزر بالزيت ونرشها بالملح والفلفل الاسود

ندخلها الفرن على 180 درجة لتنضج هكذا


في قدر عميق نضع الزبدة والزيت ونشوح الثوم والزنجبيل والبهارات ونضيف البطاطا ثم الخضار المشوية والمرق ونتركها لتغلي ونخفض الحرارة الى متوسطة الى منخفضة لتنضج الخضار
نطحنها ونضيف الكريما ونضبط الملح والفلفل
والف صحة وهنا


الاثنين، 20 أكتوبر، 2014

BitterBallen...Daring Cooks October Challenge بتر بولن وتحدي نادي الطبخ لشهر 10


The October Daring Cooks’ Challenge was brought to us by Andrea from 4pure. She introduced us to one of her family favorites which is soon to become one of yours, too. Welcome to the world of Dutch Bitterballen!




I have been so busy lately that I unfortunately missed few daring cooks and bakers challenges...Note to self...NEVER AGAIN!!!! These challenges as so much fun not to mention that they give us a huge enrichment on other cultures and food from around the world. The Daring Cooks Challenge for the month of Oct was to make Bitterballen...say again..."Bitterballen"..Yes you heard me...what are they? They are so darn delicious I don't know where to start!!! Thanks to Adndrea from 4Pure for this wonderful Dutch challenge.


In her introduction to the delicious appetizer she said and I quote " Bitterballen (a small deep fried kroket (croquette)) are a traditional Dutch snack available in every snack bar. It used to be a method to use leftover

 meat and was served as an entrée. Now it is a real treat which you can get anywhere around the 
Netherlands. In the Netherlands we eat about 300 million bitterballen portions each year (about 25 per person each year).
Bitterballens are filled croquettes made from a roux (a mixture of cooked flour and butter) that is made into a salpicon (by the addition of milk and/or stock and sometimes gelatine) to which the filling (meat, seafood or cheese) is added and then shaped into small balls which is breaded (crumbed) and deep fried until golden brown"

I made the cheese version of this as I had all ingredients (sort of) on hand...Here is Andrea's recipe with my little alterations to suit my family. My notes are in bold and underlined
Cheese BitterBallen
Ingredients
½ stick (½ cup) (4 oz) (100 gm) butter
¾ cup (180 ml) (4 oz) (110 gm) flour
2 cups (500 ml) milk
½ teaspoon nutmeg
2 teaspoons (1/3 oz) (10 gm) gelatin I added an extra 1/2 a tsp
3 oz (80 gm) old cheese or parmesan
3 oz (80 gm) soft cheese like brie, camembert (I used Elemental not quite very soft but I had it on hand)
3 oz (80 gm) matured cheese (I used old English Cheddar)
2 egg yolks (I didn't use eggs as they tend to be very eggy here in Jordan and the result turned out fabulous)
1/3 cup (80 ml) cream
salt and pepper at taste
Directions:
Grate the cheeses. Melt the butter. Then add the flour all at once and while stirring cook for another 3 minutes. Then add the milk, whisk very well and let it come to a boil (keep stirring). Cook at a high simmer for another 10 minutes. Add the nutmeg, salt and pepper to taste. Whisk the egg yolks with the cream (if using them, I only added the cream)and whisk into the cheese mixture. Dissolve the gelatine in a little cold water and add to the cheese mixture. Take a cooled plate or oven dish (rinsed in some cold water) spread the filling out and cover with some plastic wrap and let cool for at least 2 hours in the refrigerator (better to let it cool overnight).
Take three bowls and fill the first one with flour, the second one with the eggs and the third one with bread crumbs.
Take the filling and take a spoon of filling and make a ball of it. Roll it through the bowl with flour.
Roll the floured ball through the beaten egg and at last
Roll through the bread crumbs.


Place on a plate and repeat for the rest of the filling. Place the plate in the refrigerator for 30 minutes, and heat your frying pan to 350°F/180°C (medium heat). Check the temperature by placing a small cube of bread in the heated oil it should sizzle and brown in a minute or two.
Deep fry the bitterballen for about 3 to 4 minutes until done (golden brown).
Storage & Freezing Instructions/Tips:These bitterballen can be frozen (before you cook them in the frying pan) and stored for about 1 month. Add 1 minute of extra cooking time when you use them (you don’t need to defrost them).

Here are some tips that I found beneficial

- The heat of the oil need to be quite high in order to ensure that the balls are golden brown before the filling starts to ooze out of the crust
- Refrigerating the balls before frying helps and maybe freezing them is even better (need to try that next time)

Now here is the hero after I took my first bite...so cheesy and delicious...thanks Andrea for the great recipe!





الي فترة ما اشتركت بتحدي الطبخ بالمجموعة اللي انا فيها وزعلانة من حالي لانه جد حلو وبيفتح عيون الواحد على اكلات من مختلف انحاء العالم...تحدي الطبخ لشهر 10 كان من اندريا من الدنمارك لنوع من انواع المقبلات اللي ما بيخلى منها اي حفل او طاولة مقبلات وبتنعمل بحشوات مختلفة...منها اللحمة والسمك والجبنة...اسم المقبلات (بتر بولن)...وهي عبارة عن كروكيت معمول بشكل كرات خليني افرجيكم الوصفة واعطيكم بعض النقاط اللي غيرت فيها بما يناسبني...

كروكيت الجبنة الدنماركي (بتر بولن)

المقادير:
اصبع زبدة 100 غم
3/4 كوب طحين
2 كوب حليب
رشة جوزة الطيب
2/1 2 ملعقة صغيرة جيلاتين مذاب بالقليل من الماء البارد
80 غم جبنة بارمزان طازجة مبشورة
80 غم جبنة امنتال
80 غم جبنة شدر حادة
1/3 كوب كريما
ملح، فلفل اسود
للتغطيس: طحين، بيض، بقسماط

الطريقة:
نذيب الزبدة ونقلب الطحين قليلا ثم نضيف الحليب ونحرك باستمرار وسيسمك المزيج كثيرا نضيف البهارات وانواع الجبنة والكريما ونرفعه عن النار ثم نضيف الجيلاتين المذاب بالماء ونفرد المزيج بصحن باركس ونغطيها ببلاستيك ونتركها تبرد 24 ساعة بالثلاجة
نحضر الطحين والبيض المخفوق والبقسماط للتغطيس ونقوم بتشكيل كرات من الخليط (المفروض جمد منيح) ونغطس كل كرة بالطحين ثم البيض ثم البقسماط ونرجعها على الثلاجة لتبرد او ممكن تفريزها
للطبخ نحمي زيت غزير على حرارة عالية (يجب ان يكون الزيت ساخن لمنع الحشوة الداخلية من الخروج اثناء القلي)
تقلى الكرات من 3-4 دقائق لتصبح ذهبية ونضيف دقيقة زيادة اذا كانت مفرزة حيث تقلى وهي مجمدة

وكانت النتيجة رائعة...رح اجرب انواع تانية واشارككم فيها قريبا ان شاء الله...