Tuesday, September 18, 2018

Living without a house helper "Lesson 4" and Pizza Pizza anyone?!




يمكن هاد اهم بوست لالكم هو والبوست اللي بعده لاني بهاد البوست رح احكي عن جولي التنظيمي الجديد بعد الاستغناء عن المساعدة. بس قبل ما ابدا بالحديث عن هالجدول خليني احكي كم شغلة بالاول:
الاول اعتراف...
المساعدة صار الها تاركة البيت شي 3 اشهر وشوي..صدقا هلأ بس بديت اشعراني اتركنت وانه الامور صارت تحت سيطرتي بشكل كامل...ليش هيك وليش اخد هالوقت كله...السبب انه عندي الف قصة منها قصة البزنس تبعي ودروس الطبخ وهاد كتير بياخد من وقتي مو مثل اللي قاعدة ومركزة بالموضوع وتخلصه...كل ما بدي اركز بيطلعلي قصة بضطر اني اؤجل الامورزززمو مشكلة المهم اني وصلت لمرحلة الراحة الان....الراحة بالوضع مش راحة جسدية اكيد...
وكمان بصراحة استغليت الوضع اني ارتب وانظم بالبيت وهاد بده وقت وتفكير وميزانية..الاشياء التنظيمية المختلفة بدها كاش...ومش دايما بتلاقي اللي بدك اياه...يعني الامور بتاخد وقت

الاشي الثاني اللي بدي اقوله هو انه هاد الجدول اللي طلع معي اولا بيناسبني انا ووضعي وممكن ما يناسبك انتي...فممكن تاخدي اللي بيعجبك منه وتتركي اللي ما بيناسبك...
ثانيا جدولي مرن يعني مو زي الكتاب المحفوظ ممنوع يطرق عليه تغيير...لازم الواحد يتعلم يتأقلم مع الظروف والا بياكل هوا الصراحة.... وبيضل يجلد ذاته انه مو ملحق...take it easy on your self 

نيجي هلا للجدول اللي زي ما قلتلكم اخدني وقت...قبل ما احط جدولي قررت اكتب الاشياء التالية:
- شو المهمات اليومية بتنظيف البيت
- شو المهمات المرتين بالاسبوع
- شو المهمات اللي مرة اسبوعيا
- شو المهمات مرتين بالشهر
- شو المهمات الشهرية
- شو المهمات الموسمية

بهاد الشكل صار عندي تصور واضح شو الاشي اللي قدامي وكيف بدي انظم اموري ليزبط...

امثلة:
مهمات يومية: جلي، مسح كاونترات المطبخ،  تفريغ سلات القمامة، ضب البيت كامل، مسح الغبار بمنفضة الغبار سريع سريع، مسح الزجاج وين في طبع، سقي الزريعة الخارجية
مهمات مرتين بالاسبوع او ممكن يوم بعد يوم: الحمامات، شطف المطبخ، مسح الارض، الغسيل، ..الخ
مهمات اسبوعية: تغيير الشراشف، شطف البيت، الكوي، شطف البرندة، الغاز، عمل الدرج .... الخ
مهمات مرتين بالشهر: الثلاجة تنظيف عميق
مهمات شهرية: اول كل شهر تخصيص 3 ايام لازاحة كل شي والشطف تحته، تهوية الفراش بالشمس...الخ
مهمات موسمية: عمل الشبابيك، تغيير الجرايد فوق خزاين المطبخ

وطبعا ما ننسى كل يوم ساعة مهمات العشر دقايق (6 مرات باليوم) تعزيل...درج، رف...الخ
بهاي الطريقة تأكدي تماما انك ما رح تحتاجي حد يساعد الا بالمهمات الكبيرة مثل في حالتي جبت واحدة نظفت الشبابيك مثلا...وزي ما قلتلكم بتعملي اللي بيناسبك

هلا نيجي للمهم...
المهمات اللي لازم ما انام الا وهي خالصة وهاي مهمات تساعد النفسية جدا بالصباح...انا اول ما اصحى لازم اروح على المطبخ لفنجان القهوة....فتخيلوا معي مطبخ مليان صحون متسخة او العفو القمامة مليانة او الكاونترات قايمة قاعدة...

يبقى هي قائمتي بالاشياء اللي لااااازم تكون خالصة قبل ما انام:
- ما في جلي بالمجلى وسخ ولا على المصفاية مش مضبوب
- المطبخ مرتب بشكل عام
- غرفة القعدة مرتبة (هاي العملية بتاخد 5-10 دقائق من وقتي قبل ما انام)

هلا لو انا بشتغل برة البيت من الاشياء اللي بضيفها لقائمة قبل النوم:
- ملابسي للعمل تاني يوم جاهزة
- الطبخة لبكرة عارفة شو هي ومرتبة امورها
- اذا في اطفال مدارس تكون امور فطور المدرسة جاهزة

هل هاد الحكي مكتوب على حجر صوان؟ اكييييد لا في استثناءات
الاستثناءات...لما يكون عندي طلبية كبيرة بيوم التنظيف... عادي بعمل شيفت او تبديل بالايام بين هاد اليوم واليوم اللي وراه
لما يصير اي ظرف عائلي طارئ سوار مفرح او محزن او عادي واضطر اني ما التزم...برجع برتب اموري...بجوز مثل هاي الظروف تكركبنا بس بنعاود بنرجع على المسار...

مهمات مهمة بخلي غيري يقوم فيها
شراء اغراض البيت (حاليا مع ابلكيشن باسكت.جو) مريحيني كتير ...لسة بضطر للروحة على السوبرماركت بس كتير اقل
تنظيف الاشياء الكبيرة زي الشبابيك او عيرها...بجيب واحدة كم ساعة وبيخلص الموضوع

هلا بعد كل هاد شو تعملي...
فنجان قهوة وورقة وقلم وابدي روقي على جدول يناسبك وتذكري انه:
- وضعك خاص فيكي فاعملي اللي بيناسبك 
- كوني عقلانية وتضغطيش على حالك كتير
- استمتعي ..هاد بيتك مملكتك...خليه جنة وسعادة
- هل بتحتاجي لمساعدة حد خلال الاسبوع او الشهر...هل بتحتاجي لادوات معينة تساعد بالتنظيف...كل هاد بده تفكير وتخطيط وميزانية كمان

بتمنى اكون ساعدتكم اد ما بقدر بتنظيم اموركم..اللي بيتابعوني على سناب تشات رح يشوفوا كتير من التطبيقات بهاد المجال من خلال يومياتي

نيجي لوصفة اليوم وهي البيتزا كعجينة وصوص نوعين...بندورة والصوص الالفريدو...



عجينة البيتزا
المقادير:
طحين : 3 اكواب 
خميرة : ملعقة صغيرة ونصف (فورية) 
سكر : 1/2 ملعقة كبيرة
ملح : نصف ملعقة صغيرة
ماء فاتر : كوب 
زيت الزيتون : 3 ملاعق كبيرة 

الطريقة:
توضع الخميرة مع السكر والماء وتذاب.
يضاف الطحين بمقدار ½ 2 كوب و½ 2 ملعقة زيت والملح وتعجن إما بالعجانة أو باليد ويضاف المزيد من الطحين بالتدريج لتصبح العجينة غير دبقة وتعجن بين 5-7 دقائق حتى تصبح ناعمة الملمس.
يدهن وعاء عميق ببقية الزيت وتوضع العجينة مغطاة بورق بلاستيك وتلف بملاءة لإبقاء الحرارة أو ممكن توضع في فرن دافئ (مطفئ) حتى تختمر ويتضاعف حجمها وتستعمل.


نصائح
* عندما تفرد العجينة يراعى أن تثقب عدة مرات بشوكة لضمان توزيع الحرارة والهواء أثناء الطبخ.
* تخبز في فرن حامي على 200-210 سلسيوس.
* في حال استعمال الصينية المثقوبة تدهن بالزيت وتفرد العجينة وتوضع الحشوة وتخبز في الطبقة الأخيرة من الفرن لعدة دقائق ثم في الوسطى حتى تنضج
* احرصي على التأكد من نضج القاع ويمكن أن تتأكدي من ذلك برفع العجينة بملعقة مسطحة للتأكد السواء.


صوص البيتزا الحمراء السريعة
المقادير:
علبة رب بندورة (135 غم) 
ثلاث أرباع الكوب  من الماء
  3 ملاعق كبيرة جبنة بازميزان
 نصف ملعقة صغيرة بودرة الثوم
ملعقتان صغيرتان سكر
ثلاثة أرباع الملعقة الصغيرة بودرة البصل 
 ربع ملعقة صغيرة زعتر
 ربع ملعقة صغيرة (بيزل) 
 ربع ملعقة صغيرة فلفل اسود
ملح 
الطريقة:
تخلط  جميع المقادير معا في قدر أو وعاء وتترك لتتمازج لمدة ½ ساعة قبل الاستعمال ويمكن عمل كمية وحفظها في الثلاجة أو الفريزر.

صوص الالفريدو البيضاء
المقادير:
2 ملعقة طعام زبدة
3 حبة ثوم مهروس
3 ملاعق طعام طحين
ملح، فلفل اسود
1/4 ملعقة صغيرة زعتر
كوب حليب
1/3 كوب جبنة بارمزان
الطريقة:
في قدر على النار نسيح الزبدة ونضيف الثوم والطحين والزعتروتقلب قليلا ثم الحليب وتحرك لتسمك وتغلي
تضاف الجبنة والملح والفلفل الاسود





Monday, September 3, 2018

Living without a house helper "Lesson 3" and two recipes (chicken shawerma sandwich & Caramel choco dessert



هالبوست متأخر متأخر اد ما اقول واكتر ومعلش بس فتحت الف ورشة بالبيت مع سوا وصيف ومغتربين وعجقة خرافية بالاضافة طبعا للالتزامات المتعلقة بالبزتس وغيرها فالوضع جنون...
(طبعا بالاضافة لمرض اخوي وسفر ياسمين لاسبانيا فالوضع زينون)

نكمل الجزء الثالث من البوست تبعنا وهو الاستغناء عن العاملة المنزلية  وكنت حاكية رح اغطي المواضيع التالية بالبوستات

-          وجود المساعدة المنزلية الحسنات والسيئات  تم
-          تنظيم الامور بعد الاستغناء عن خدماتها تم
-          الصعوبات اللي ممكن تواجهيها
-          افضل 10 استثمارات اشتريتها او خدمات بستعملها لمساعدتي بتدبير الامور في البيت
-          جدولي المعتمد حاليا
-          10 نصائح لتخوض التجربة بنجاح تم
وقررت اضيف بوست خاص عن ال tips المميزة لكل مهمة تنظيف من جلي وغسيل وكوي... الخ
واللي بحب يشاركنا بافكار او تجارب يا ريت...بنتعلم وبنستفيد سوا

ورح نحكي عن الصعوبات اللي ممكن تواجهيها وحلول مقترحة...

صعوبة 1
الوقت الوقت الوقت...وهاي فعلا اكبر عائق لانه بالوقت اللي هلا انا بنظف فيه زمان كنت اعمل اشياء ثانية بحبها ...
الحل:
التنظيم ووضع اهداف معقولة وسهلة التحقيق مشان ما يصير فيه احباط

صعوبة 2
التعب الجسدي وكيف ممكن يأثر على صحتك... هلا هاد ممكن يكون سبب انه كتير ناس ما بتقدر تستغني عن المساعدة بس اذا الصحة تمام انا بشوف انه الاستغناء عنها ايجابي انه انتي بتحركي وبالتالي ممكن ينقص وزنك وممكن تصيري انشط..اهم شي ما ترهقي نفسك ولا تحمليها فوق طافتها وديري بالك على حالك وانتي بتشتغلي..يعني ما تحملي تقيل ..حطي ماسك لشعرك...لوجهك...خدي استراحة قهوة...افطري...

صعوبة 3
رعاية الاطفال والمشاركة بالمناسبات الاجتماعية
هاي مشكلة صدقا كبيرة للي عندها التزامات اجتماعية وما في حد يساعد...زمان كنت اترك هارون عندها واروح هلا عندي حل من اثنين:
ما اروح
او الاقي حل بديل
ومرات بتاخر عن الكل لينام وبخلي البنت اللي عند حماتي تطل عليه وهو نايم او ياسمين الله يسهل عليها هلا سافرت او مرات بروح بدري مثلا اذا المناسبة العصر...اما طلعاتي المعدودة مع صديقاتي فيا بتكون الصبح بدري وهو بالمدرسة او متأخر وخالد بيدير باله عليه...فبدك تضحي وتحاولي تلاقي بدائل

صعوبة 4
حجم الانجاز
اكيد حجم الانجاز صار اقل باعتبار اني مش سباديرمان وبقدر اكون بالف مكان والي 7000 رجل وايد...بالنهاية الي قدرات واكيد البيت ما بيتنظف كله مرة واحدة زي الاول...
الحل:
بنرجع بنحكي عن التطنيش والتنظيم

صعوبة 5
حمل الاغراض
زي ما حكيت انا ساكنة طابق 3 وما في مصعد...
الحل اللي لقيته هو الاستفادة من خدمات التسوق الموجودة حاليا من السوبرماركت زي Basket.jo او من الخدمات التسوقية اون لاين...كله بيجيني للبيت بدون ما اطلع ولا اصرف بنزين او وقت مقابل مبلغ بعتبره معقول وبسيط مقابل الوقت والجهد اللي بوفره

صعوبة 6
العزايم
الصراحة هاي اكتر منطقة عندي فيها صعوبة لاني متعودة بعمل كل اشي...ما بشتري اكل من برة بس لازم الاقي حل وفعلا من الحلول الممكنة:
- اعزم الناس برة خاصة اذا العدد قليل والتكلفة واحد نسبيا
- اعزم عدد قليل مش اعداد كبيرة
- اجيب حد يساعدني اذا العدد كبير بالجلي على الاقل
- اختصر الاكل واعمل اكلات كبيرة واقلل تفاصيل
- اوزع الاكل بحيث اني اعمل اشي واشتري اشي
- ما اعمل عزايم زي اول ...اريح :)

صعوبة 7
المهمات الكبيرة
غسيل سجاد، تنظيف شبابيك...الخ
الحل:
حد يساعد او انتي بتعمليها....لا حد يساعد احسن


وصفتنا لليوم هي حلو لزيز جدا وسهل جدا رح اسميه


 طبقات بسكوت الشوكولاتة بالكراميل

المقادير:
علبة حليب مركز محلى مكرمل (اما الجاهز او انتي بتكرملية بغمره بالماء بطنجرة الضغط وبتسكريها وبس تصفر بتحسبي 45 دقيقة وبتطفيها وبس تبرد بتفتحيها وبيطلع عندك حليب مكرمل لما تفتحي العلبة)
113 غم جبنة كريمية
كوب كريما خفق
علبة ونص بسكوت شوكولاتة سادة (ماري او اولكر)

لتغطيس البسكوت:
كوب حليب
ملعقة كبيرة كاكاو

للوجة:
كوب شوكولاتة غامقة او حليب
200 مل كريما او قشطة
ممكن رش الوجة بالمكسرات او الفليك او الويفر المكسر

الطريقة:
تخلط مكونات التغطيس معا
تخفق الجبنة والحليب المكرمل وتضاف الكريما ليصبح لدينا مزيج خفيف
للوجة:
تسخن الكريما وتضاف الشوكولاتة وتترك عدة دقائق ثم تحرك للحصول على جناش
للترتيب النهائي:
طبقة بسكوت مغطس بالحليب بالكاكاو بالقالب من اختيارك
طبقة كريما بالحليب
بسكوت
وتكرر 3 مرات
توضع بالفريزر نص ساعة
تسكب طبقة الوجة وتزين وتعاد عدة ساعات للفريزر او الثلاجة
تقدم اما باردة جدا مثل البوظة او من الثلاجة فتكون اكثر طراوة


وكنوع من التعويض في وصفة لزيزة لساندويشات قريبة على الشاورما سر الطعم فيها هو البابريكا المدخن


ساندويشات شاورما الدجاج والبطاطا
المقادير:
2 صدر دجاج مسلوق مع بصل وبهارات صحيحة مثل الفلفل الاسود وورق الغار والكرفس والقرفة
حبة بطاطا كبيرة مقطعة بالطول ومقلية (انا استخدمت المفرزة حوالي 300 غم وقليتهم بالقلاية الهوائية)
للصوص:
علبة لبن زبادي
عصير ليمونة
2 ملعقة كبيرة زيت زيتون
1/4 كوب حليب
1 ملعقة طعام جبنة كاسات
2 ملعقة طعام مايونيز
2 سن ثوم مهروس
ملح، فلفل اسود
1 ملعقة صغيرة بابريكا مدخنة

اختياري لعمل ساندويشات:
خبز تورتيلا او شراك
جبنة موزريلا وشدر
ممكن مخلل

الطريقة:
في صحن بايركس توضع البطاطا والدجاج المفسخ
تخلط مكونات الصوص
تفرد على الوجة
توضع بالفرن على 180 20-25 دقيقة
تؤكل هكذا
او يؤخذ منها جزء ونلفه بالخبز مع الجبن وتحمص بالتوستر



Tuesday, July 3, 2018

Living without a house helper "Lesson 2" and flour date kaek recipe



سعيدة جدا انه الموضوع الاول في سلسلة الاستغناء عن المساعدة المنزلية عجبكم...ما توقعت ردود الفعل الحلوة كلها هاي واتمنى من كل قلبي انكم تستمتعوا بالمقال هاد لانه في رح نغطي...
-          وجود المساعدة المنزلية الحسنات والسيئات  تم
-          تنظيم الامور بعد الاستغناء عن خدماتها
-          الصعوبات اللي ممكن تواجهيها
-          افضل 10 استثمارات اشتريتها او خدمات بستعملها لمساعدتي بتدبير الامور في البيت
-          جدولي المعتمد حاليا
-          10 نصائح لتخوض التجربة بنجاح
(وانا بكتب حسيت انه النصائح دخلت على النظام فقلت بحطهم بموضوع واحد)
وقررت اضيف بوست خاص عن ال tips المميزة لكل مهمة تنظيف من جلي وغسيل وكوي... الخ
واللي بحب يشاركنا بافكار او تجارب يا ريت...بنتعلم وبنستفيد سوا

هلا رح احكي عن حالي وشو صار معي وبكل شفافية ... بس بدأت الافلام كان الوضع صعب... يعني بطلت عارفة هي صح تعبانة ولا انها بتسحب افلام لانه بدها تسافر...فكنت اساعدها كتير ومرات كتير اخليها ترتاح وتنام وانا اشتغل...احكي الحقيقة بلحظات كنت كتير اتضايق وبعدين صار الموضوع عم بزيد عن حده...يعني انا بالله بتدفع راتب وانا اللي بشتغل؟!!! ولو مرض جسدي بقول حرام مش مشكلة بس الافلام اللي سحبتها وانها انجنت... لا هيك كتير ناهيك عن الرعب اللي صراحة صرت عايشة فيه تعمل فينا اشي واحنا نايمين...بعدين ما قلتلكم..هربت مرتين..الاولى حكت بالسفارة انه احنا كتير مناح بس هي عقلها تعبان بس قالولها على الاقل اعطيهم فرصة يلاقوا بدالك ووعدت تضل لشهر 10 وطبعا بهاي المرحلة بدينا قصة هي ترتاح وانا اشتغل... بعدين هربت المرة الثانية فخلص انا ولعت..قبعت..معي اللي بدكم اياه قولوه... طبعا ليش انا بحكيلكم هاد الاشي لانه بدي تعرفوا انه سبحان الله وعسى ان تكرهوا شيئا وهو خير لكم...لانه هي كانت ممتازة وبعدين انجنت...فلو تركت وهي ممتزة كنت ما رح اقدر الا اجيب حد وما رح اخوض التجربة...بس هي من كتر عمايلها واللي هي مش موضوعنا هلا...عوفتني اشي اسمه حد يساعد ... فكان هاد التحضير النفسي...وتأكدوا انه جدا مهم...يعني انتي مو لازم البنت اللي عندك تعمل افلام بس اذا قررتي تخوضي التجربة لازم تكوني نفسيا متشجعة وواثقة من نجاحك ومتقبلة لاي تحديات ممكن تعترض طريقك ومنفتحة لايجاد حلول وبدائل والا رح تكوني متضايقة من كل شي وتعبانة وقرفانة وكل اشي بتعمليه بنكد وبتأفف وبيصير الاشي متعب وبتفشل التجربة وبترجعي على اقرب مكتب تستقدمي مساعدة جديدة...

هلا بعد ما راحت حسيت كأنه هم وانزاح ولاني كنت الي فترد يشتغل بالبيت ما حسيت اني متقلة...على الاقل ما بتدفع راتب لحد وهو نايم وانا بشتغل... بس مالنا ومال الحكي...حسيت اني ضايعة...هاي من السيئات اللي حكينا عنها بالمقال الاول..انك بتركني ونوعا ما بتبطلي عارفة وين الاشياء بالزبط وشو النظام الافضل الجديد اللي ممكن تتبعيه...وفعلا كنت زي الدجاجة اللي بتفعفط بكل مكان بدي اعمل واعمل بعدين هديت اللعب وقررت اني لازم ابدأ واحدة واحدة واعيد استكشاف بيتي

بالزبط زي ما قرأتوا.... بيتي اللي كانت تحت ادارة واحدة تانية وسيطرت عليه برضاي ...نعم كنت اشرف وكتير كمان بس تفاصيل التفاصيل ما كنت اعرف عنها كتير وبدات رحلة الاكتشافات...طبعا اشي منها كان حلو زي لما تلاقي اشي ضايع اله فترة وانتحرتي وانتي بتساليها وينه وهي داحشته بقرنه الجن الازرق ما رح يلاقيه فيها واشي منها بيخض وبيخليكي تقولي بحرم اذا بدخل حد بيتي زي انك تلاقي اشياء مو نضيفة وكراكيب ما الها لازمة واشياء مجمعة ما بتفهمي ليش زي علب بلاستيك فاضية واكياس واكياس واكياس...هاد وانا منظمة ومشرفة على الامور بس كل هالبلاوي كانت بغرفتها وانا صدقا كنت احترم خصوصيتها... اشي بيغيظ زي علب اللبنة الثلاثة بالثلاجة وما في غير مدام بدنا لبنة...واشي بيبسط وبيغيظ مع بعض لما تلاقي علب صابون جلي مش مستعمل وهي بس على ما تطلب كمان وهو مليان عندك....يلا...

بعد الاستكشاف وبعض التعزيل المبدئي والتخلص من اطنان الاكياس وغيره من اللامفيد من الاشياء... بديت اشعر باني لازم لازم احط نظام.. بيتي كبير نسبيا وعندي 2 مراهقين وهارون بده جيش ينظف وراه.... هاد النظام ما رح يكون زي النظام اللي حطيته الها...لا بد يكون مختلف تماما خاصة انها ما كانت تمد ايدها على الطبخ بس انا عندي طبخ وبزنس وهارون ومسؤوليات وشراء اغراض...فالنظام تبعي بده يكون اكثر مرونة وبصراحة رح اتعلم اشي مهم ما بعرف اعملو منيح ابدا وهو اني اطنش
شو يعني؟

يعني اذا شفت شوية غبر بسيطين لاني ما مسحت الغبر اليوم بهاد المكان (واحنا معروف عنا انه بتمسحي الغبر هلا بعد 5 دقائق بتلاقيه غيرة مرة تانية) رح اغض البصر واطنش وبكرة بس افضى بمسحها...

الاشي التاني بالنظام كان ضرورة الالتزام ب روتين ما قبل النوم لحياة سعيدة صباحا... ولا مش اني اغسل وجهي وامشط شعري.. !!! هههههه لا!! الروتين الليلي هو كل سلات القمامة مفرغة من القمامة وما في جلي بالمجلى ...(طبعا قدر المستطاع) اختاري الروتين اللي بيريحك واعمليه

الاشي الثالث هو التقنين...وبرضه مش بالمصاريف وانما بالاشياء اللي ببيتك من اكسسوارات وغيره...كنت لازم اغير شوي بالديكور واقلل الاكسسوارات...لانه اكسسوارات اكتر يعني مسح غيرة اكتر واصعب... كل ما قلت الاشياء كل ما كان الشغل ابسط

التخطيط وهاد موضوع ياما حكيت فيه....وجبات الاسبوع ( وبالتالي ممكن اطبخ اكتر من طبخة بوقت واحد اذا بزبط لانه بكرة بدي اشطف البيت فبكون الاكا مأمن وهيك)...كل ليلة قبل ما انام بكتب على جدولي مهمات اليوم التالي..

سحر نظام ال 10 دقائق...ولا مش عجينة ال 10 دقايق...ههههه نظام ال 10 دقائق هو نظام بيتجزا ل 6 اجزاء (مجموعه ساعة كل يوم) موزعة على مدار اليوم...كل 10 دقائق بعمل اشي سريع متعلق بمهمة تعزيلية...مثلا...بدي اعزل المطبخ ....بس جدولي كمنال وشخص عنده  الف قصة مستحيل اخصص يوم كامل بس اله...بفطس...عملية انتحارية 100% وستقضي على تجربتي فورا... لا كل يوم باخد 10 دقائق بعمل خزانة، درج، بنظف الطناجر من اي بواقي زيوت، بعمل الفرن...هيك ممكن بعض المهمات تحتاج 30 دقيقة زي الفرن...مش مشكلة بقسم المهمة ل 3 اجزاء وكل 10 دقائق بعمل جزء وبوقت حالي وبعاير الساعة...بصير زي اللعبة بدي اتحدى نفسي اني اخلص بالوقت وبتزبط وبتسلى وبخلص...نظفي درج كومودينا او خزانة الحمام او غيرها من هاد النوع من المهمات...بتنبسطي بالانجاز وما بتحسي حالك هلكتي وشوي شوي بتلاقي انك خلصتي كل غرفتك او المطبخ ...الخ

وعلى سيرة بتسلى....استمتعي وانتي بتشتغلي...اعملي ماسك لشعرك واربطيه او لوجهك...حطي موسيقى بتحبيها....انبسطي وكوني مستمتعة واتذكري انه هاي مملكتك اللي استعدتيها من الغريبة.... وان الاوان تحطي النقاط على الحروف....

ما تراكمي الشغل ...الجلي، الغسيل، الكوي، هاي الاشياء بتتكاثر...لا تراكميها ...رح تشكريني بعدين

اشتري الادوات اللي رح تساعدك بتسهيل مهمتك..وهاي رح يكون الها بوست خاص...بس خليني اكون صريحة ويمكن لئيمة شوي... يعني انا سخيت بشراء الادوات لاني عارفة اني انا اللي رح استخدمها وعارفة اني ما رح اضيع او اهدر او اكسر او استهتر بالاستخدام...انا عن نفسي بديت بمماسح وخرق تنظيف جديدة... ومقسمة على الالوان...نظام ونظافة J

دخلي البشر بحياتك لمساعدتك....يعني كل ولد عندي مسؤول عن غرفته...ما بنظف ولا غرفة اذا التخت مو مضبضب او السلة مفرغة من القمامة او في كاسات او غسيل..شوي شوي بدأوا باستيعاب الموضوع ومشي... رمي كيس الزبالة على مين مثلا...هيك اشياء... في ناس بتحب تجيب حد اسبوعي للتعزيل...انا شخصيا ما عملت هيك ومش ناوية... الله يقدرني

شوفي الخدمات اللي ممكن تساعدك لتسهيل حياتك ورح احكي عنها بالتفصيل برضه بعدين... بس مثال سريع هو نظام الكتروني بتشتري من خلاله اغراض البيت واللي هو باسكت دوت جو...
قررت وانا بكتب هاد البوست اخصص بوست تاني عن ال tips اللي ممكن اعطيها لشغل معين بالبيت زي الجلي او الكوي او غيرها...

ونعود لوصفتنا لليوم وهي كعك التمر بالطحين..وصفة لزيزة وسهلة جدا وطعمها روعة



كعك التمر بالطحين (سريع)
المقادير:
3 كوب طحين
300 غم زبدة
4 مربعات جبنة كيري
4 ملاعق طعام سكر بودرة
2 ملعقة صغيرة كلفة الكعك

الحشو:
تمر مطحون معجون بالقليل من الزبدة والهيل والقرفة ومكور طابات حسب طريقة التشكيل او القالب



الطريقة:
تخفق الزبدة والسكر والجبنة
يضاف الطحين وكلفة الكعك وتعجن لتختلط ويصبح لدينا عجينة جيدة
نأخذ القليل من العجين ونلفها حول كرة التمر
نحمي الفرن على 200
نرتب قطع الكعك بالصينية
انا استخدمت قالب كبس مدور بشكل وردة
يخبز من 12-16 دقيقة ليحمر من تحت وفوق
يبرد على سلك معدني








Monday, June 25, 2018

Living without a house helper "Lesson 1" and Creme Caramel quick dessert



Note: I couldn't write this post in English as it will take a lot more time than I can afford to spend here unfortunately due to the address stated above. However I hope you Arabic readers will be following this series and will enjoy my experience and tips.


تنويه:
الموضوع ادناه هو تجربتي الشخصية ويعكس رايي الشخصي وليس انتقاص من قيمة اي انسان سواء ست بيت او عاملة منزلية ...كلنا سواسية وكلنا اولاد 9 بس حبيت ادردش معكم عن تجربتي بدون وجود عاملة منزلية واشارككم رايي

كيفكم يا حلوين؟
زمان عن الكتابة ويا الله شو اشتقت..
بتمنى تتنظم اموري اكتر بعد شهر من عدم وجود مساعدة معي بالبيت.وكله الله وكيلكم على راسي...عيلة...تنظيف ...طبيخ...بزنس...التزامات اجتماعية  ...سوشال ميديا... الوضع زينون... بس مبسوطة كتير بعدم وجود مساعدة منزلية ولاسباب كتيرة وهاد هو موضوعنا المطول واللي بيتابعوني على سناب تشات بيعرفوا اديش انا متحمسة احكي عن الموضوع..
اولا قد يبدو الموضوع لكتير من الستات اللي ما عندهم عاملات منزليات في منتهى السخافة وانه على شو كل عالهليله...بس فعليا اذا انتي شخص متعود على وجود مساعدة الوضع مش سهل كتير وبده وقت لتتأقلمي مع التغيير...فاذا انتي من الناس اللي عندهم مساعدة وحابة تخوضي التجربة بالاستغناء عن خدماتها يبقى هاد الموضوع الك...وطبعا ممكن الاخرين يستفيدوا...
هلا موضوع الاستغناء عن المساعدة المنزلية عندي اجى فجأة...البنت اللي بتساعدني صارت تعمل افلام...اه وربنا...تشوف ناس ميتين...تحكي مع حالها...هيك قصص...طبعا اخدناها على الدكتور مشان نبرأ ذمتنا واكتشفنا انها ما بتاخد الدوا اللي اعطاها اياه...قال عندها اكتئاب!!!! اي عليم الله عندي مليون سبب يخليني اكتئب وهينا ماشيين...بس خلص سفرناها بعد ما جننتني ورفضت تشتغل 3 ايام وانا ماكله الحمل ومع طلبيات وهارون وتصوير لبرنامج ليدرز شيف ورمضان....اشي خياااال!!! بس لقيت حالي بمطب انه يا اما باخد اي حد او اني بجرب اخوض التجربة اللي الي من زمان حابة اني اخوضها...هاد الجكي من شهر...اسمع احلى زقفة للجدعان....مرق شهر واموري لحد الان ماشية ممتاز...

هلأ عشان احكي عن موضوع الاستغناء عن المساعدة المنزلية خليني اجزأ الموضوع لعدة اجزاء رح يكون كل جزء منها بوست قائم بحد ذاته
-          وجود المساعدة المنزلية الحسنات والسيئات
-          تنظيم الامور بعد الاستغناء عن خدماتها
-          الصعوبات اللي ممكن تواجهيها
-          افضل 10 استثمارات اشتريتها او خدمات بستعملها لمساعدتي بتدبير الامور في البيت
-          جدولي المعتمد حاليا
-          10 نصائح لتخوض التجربة بنجاح
واللي بحب يشاركنا بافكار او تجارب يا ريت...بنتعلم وبنستفيد سوا
موضوعنا اليوم هو وجود المساعدة المنزلية الحسنات والسيئات...طبعا المنظومة الاجتماعية في مجتمعنا والظروف والحيثيات كلها اتشقلبت...الستات كنير منهم بيشتغلوا برة البيت وبالتالي كتير منهم بيحتاج مساعدة....كمان المسؤوليات كل مالها بتزيد...البيوت كبرت..الشغل زاد ..العيلة بتكبر...حد كبير بالبيت بده عناية...طفل عند احتياج خاص بده رعاية....كتير في اسباب تتطلب وجود شخص يساعد...وللاسف انه قليل لتلاقي هاد الشخص محليا...يعني من اهل البلد..واذا لقيتي بيكوم مش ملتزم دايما او ما بيقدر يتأخر او مش امين او ممكن حتى يلطش البزنس تبعك اذا عندك بزنس زي حالاتي (وصارت مع ناس كتير بعرفهم) طبعا ناهيكم عن الصورة النمطية الاجتماعية المرتبطة بالمساعدة المنزلية وانها مهنة غير جيدة وانها مش اشي مقبول اجتماعيا فصعب اصلا تلاقي حد محترم...فشو الحل؟ طبعا عمالة خارجية...وانتي وحظك...واذا حظك زي حظي فالبطيخة اغلب الوقت بتطلع قرعة!!!! الي سنوات بعاني ومع مختلف الجنسيات...اشي لئيم، اشي بيكذب، اشي مو نظيف، اشي عنيد....وطبعا التعصيب بيزيد وبولع انا...ما يغركم تفكروني هادية... وكله من صحتي... يعني بدرب وبدرب وبدرب وكله على الفاضي...اذا ما ضليتك متابعة صعب...
طيب شو حسنات وجود العاملة المنزلية؟
الراحة الجسدية (وركزولي الجسدية بس لانه النفسية بالعادة بتكون زفت) ...يعني بترتاحي صح من شغل البيت بس اذا انتي شخص دقيق ممكن كتير تضطري تشتغلي بايدك لانه هي مو عارفة او ما عم تعمل الشغلة صح...
بيصير عندك وقت لاشياء تانية بحياتك زي انك تكتبي بوست على مدونتك ههههه او تطلعي مشوار ...الخ بس بعدين بتلاقي انه بشوية تنظيم بتمشي الامور ورح نحكي بعدين عن الموضوع
وجود شخص ممكن يدير باله على الاطفال اذا انتي معزومة مكان (هاي لحد الان اكتر اشي استصعبته لانه مع الصيف في التزامات اجتماعية كتيرة وهاد الموضوع صعب بس لجأت لخدمات المساعدة اللي عند حماتي (طبعا بمقابل مادي) ولياسمين مرة...

نيجي هلا للسيئات ويا ما اكترهم اتاري... ورح احطهم بشكل معاكس للحسنات
القلق النفسي والعصبية بسبب عدم العمل بالشكل المطلوب...انا بالعادة بعمل جدول اسبوعي وكل يوم في مهمات اولا لتسهيل الشغل عليها ولتسهيل التشييك من قبلي بس للاسف الالتزام بيكون اولها وبعدين سلامتكم وبنبلش مسلسل ليش ما انعمل هاد وليش ما انعمل هداك
بس تروح وتشتغلي بايديك بتكتشفي انه الاشي اللي بياخد منك نص ساعة كان ياخد منها ساعة ونص وانتي بتعمليه احسن
بتصيري اكثر اطلاعا على ما يدور ببيتك....خلينا نكون شفافين مع بعض...يعني الواحدة فينا بتركن...خلص...عندك هالبنت وبتدفعيلها راتب لتقوم بمهمات وبتحسي حالك خلص المفروض تركني... بس الواقع المرير اللي بتكتشفيه بس تروح انه هي كانت سارحة والرب راعيها وانها بتعمل الوش الوش وانها بتألف عليكي واشياء كتير

التخريب!!!! تخلونيش ابدأ احكي عن الصحون المنقرة والكاسات المكسرة الاطراف ولا المكاوي وكم واحدة حرقت  وكم بلوزة او تنورة حرقت ولا طاولة الكوي اللي انكسرت ولا ولا...يا عمي مش مالها ليش تقلق...وشو بدك تعملي؟ تخصمي من راتبها؟ مش معقول...هلا الواقع احنا بشر وكلنا ممكن نكسر بس في منهم بيكسروا كتير صدقا...

الصرف الزائد..مي، ادوات تنظيف حدث ولا حرج،كهرباء على كوي كوي واعادة كوي لانه مش مكوي منيح... حتى الاكل (خاصة بعض الانواع  زي الرز والنودلز ههههههه) بتشوفي اديش كنتي تصرفي قبل وبعد...بيكفي سائل الجلي...والله لون انه عصير مش هيك!!! علبة كل اسبوع!!!! 5 كيلو رز بالاسبوع!!! خبز هاد اشي تاني!! يعني عيب الواحد يحكي بس واقع...طبعا غير مصاريفها الشخصية...اللي كانت عندي لازم نيفيا ولازم بانتين ولازم زوج كفوف كل اسبوعين غير اليونيفورم وغيره...
وتحت بند الصرف الزايد بيجي الهدر بالموارد زي انها تقولك بدنا لبنة وتكتشفي انه عندك 3 علب لبنة بالثلاجة بس هي ما شافت او ما دورت...والهدر بالوقت...لما تسأليها شو لازم اغراض تنظيف تحكيلك وتروحي على السوبرماركت وتشتري الاغراض وبس توصلي على البيت تكتشف انه مو ضايل سائل جلي او صابون غسيل!!!بيعصب ولا لأ!!!!

وجود شخص غريب بالبيت...هلا هاي الحالة قد لا يشعر فيها بعض الناس اللي عندهم مساعدات من سنوات...يعني نفس المساعدة الها سنين...بتصير من اهل البيت...وما في مشكلة بالعكس حلو انها تشعر انه هاد بيتها..اكيد رح تكون حريصة عليه اكتر من شخص جاي يشتغل سنتين ويخلص...شعور انه ما في شخص غريب بالبيت يحد من حركتك وحريتك ما اله ثمن...للاسف يطلع عليكي مرات بنظرات انتي مش قادرة تعرفي هل هي حسد او غيرة...الله يكفينا شر العين بس بتصير..وهمه بالنهاية بشر...وفي ناس محترمين بتكرميهم بيشبعوا وفي ناس مهما اكرمتيهم للاسف عينهم فارغة...
مصاريف الاقامة والفيزا واللي بتصل لحدود 4000-6000 دينار تقريبا خلال سنتين مدة العقد وحسب الجنسية طبعا غير الراتب الشهري ومصروفها واستهلاكها
الاتكالية....سواء منك او من الاولاد او الزوج...خلص طبيعة بشر...كل شي هي بتعمله!!!  بيصير الكل spoiled
ومن هذا المنطلق اجد نفسي سعيدة جدا بقراري بالاستغناء عن خدماتها....الحمد لله
المرة الجاي بحكي عن تنظيم الامور بعد الاستغناء عن خدماتها

نرجع للطبخ تبعنا ووصفتنا اليوم لحلو كتير ناس عملوه من متابعين سناب تشات...ناس حبوه وناس لا لانه اظن انهم فكروه رح يكون بقوام الكريم كراميل


حلو الكريم كراميل السهل
المقادير:
باكيت كريم كراميل بدون السكر
علبة قيمر
¼ 1 كوب ماء دافئ
8 حبات بسكوت سادة (ماري او بيتي بير)

الطريقة:
تخلط كل المكونات بالخلاط
تصب بكؤوس وتبرد 4 ساعات على الاقل وتقدم